Мақомот дар вилояти Қандаҳори Афғонистон гуфтаанд, ки дар ҳоли ҳозир даргирӣ миёни нерӯҳои афғон ва покистонӣ дар минтақаи марзии Спин Булдак идома дорад. Ба гуфтаи мақомоти маҳаллӣ, даргирӣ соати се субҳи ҷумъа оғоз шудааст.
Самим Хплвок, сухангӯи раиси вилояти Қандаҳор рӯзи 5 май дар сӯҳбат бо Радиои Озодӣ гуфт, ки даргирӣ дар деҳаи Луқмони ин минтақа замоне оғоз шуд, ки низомиёни покистонӣ мехостанд ба манзури шумориши аҳолӣ, ба ин деҳа ворид шаванд, аммо бо мухолифати нерӯҳои афғон рӯбарӯ шуданд.
Сухангӯи раиси вилояти Қандаҳор гуфтааст, ки дар ин даргирӣ ду тонки нерӯҳои покистонӣ аз байн бурда шуда ва ба ҳар ду тараф талафот ворид шудааст. Аммо ӯ дар мавриди талафот маълумоти дақиқ ва бештар ироа накард.
Дар ҳамин ҳол, мақомоти фармондеҳии амнияти Қандаҳор гуфтаанд, ки сарбозони тозанафасро ба маҳали ҳодиса фиристодаанд. Як мақоми марзбонии афғон ба шарти онки аз ӯ ном бурда нашавад, ба Радиои Озодӣ гуфтааст, ки дар асари ин даргирӣ шаш тан аз нерӯҳои марзбонии Афғонистон захмӣ шудаанд.
Хабарнигори Радиои Озодӣ дар Қандаҳор мегӯяд, ки пас аз ин рух додани ин даргирӣ, роҳи Спин-Булдак-Чаман, ки Афғонистонро ба Покистон мепайвандад, баста шудааст. Мақомоти Покистон то ба ҳол дар робита ба ин даргириҳо чизе нагуфтаанд.