Раисиҷумҳури Нигерия Гудлак Ҷонатан дар бахше аз кишвари худ пас аз силсилаи бомбгузориҳо вазъи фавқулода эълон кард. Гурӯҳи исломии “Боко Ҳаром” масъули ин таркишҳо дониста мешавад. Ҷонатан дастур дод, марзҳои байнулмилалии минтақаи мазкур баста шавад. Вазъи изтирорӣ ҳамчунин вилояти Борноро дар бар мегирад, ки аз марказҳои исмогароёни тундрав ба шумор меравад. Дар бомбгузориҳои рӯзи мавлуди Масеҳ дар назди калисоҳо зиёда аз 40 нафар кушта шуданд ва гурӯҳи “Боко Ҳаром” масъулияти таркишҳоро ба зимма гирифт.
