Адҳам Аҳмадбоев, вазири собиқи корҳои дохилии Узбекистон, ки моҳи декабри соли гузашта аз тарафи раиси ҷумҳури он кишвар Шавкат Мирзиёев ба “хиёнат” айбдор шуда буд, боздошт гардидааст. Як манбаъ дар Вазорати умури дохилии Узбекистон рӯзи 29-уми январ ба бахши узбакии Радиои Озодӣ гуфт, боздошти Аҳмадбоев баъд аз зуҳри ҷумъаи гузашта дар хонааш дар шаҳри Тошканд сурат гирифт.
Ин рутбаро Адҳам Аҳмадбоев соли 2014, дар замони раёсати Ислом Каримов, раиси ҷумҳури нахустини Узбекистон, гирифта буд.
Бино ба иттилои дарёфтӣ, Адҳам Аҳмадбоеви 52-сола бо қарори Додситонии кулл ба боздоштгоҳи Вазорати корҳои дохилии Узбекистон интиқол ёфтааст. “Алайҳи ӯ рӯзи 29-уми январ расман айб эълон хоҳад шуд”, - гуфт манбаъ.
Як мақоми дигар дар Додситонии кулли Узбекистон низ хабари боздошти Адҳам Аҳмадбоевро тасдиқ кард. Вай гуфт, феълан тафтишоти қазияи ӯро муфаттишони Додситонии кулл анҷом медиҳанд.
То ба ҳол сабаби боздошти Адҳам Аҳмадбоев маълум нест. Аммо боздошти ӯ дар ҳоле сурат гирифт, ки охири моҳи декабри соли гузашта Шавкат Мирзиёев ӯро ба “хиёнат” айбдор кард. Мирзиёев дар ҷаласаи муштараки ҳукумат ва порлумони Узбекистон рӯзи 22-юми декабри соли 2017 гуфт, барои “хиёнат”-аш ӯро аз рутбаи генерал-лейтенант маҳрум кардааст.
Ин рутбаро Адҳам Аҳмадбоев соли 2014, дар замони раёсати Ислом Каримов, раиси ҷумҳури нахустини Узбекистон, гирифта буд.
“Шумо медонед, ки собиқ вазири умури дохилӣ Аҳмадбоев бо хиёнатҳои худ ба давлат ҳоло дар куҷо аст? Ӯ ҳангоми вазири умури дохилии Узбекистон буданаш ба гуруҳе пайваста, ба давлат хиёнат кард. Пагонҳои ду генералро канда партофтам. Боз онҳо генерал-лейтенант будаанд”, - гуфта буд президенти Узбекистон дар нишасти моҳи декбари соли гузашта.
Адҳам Аҳмадбоев, ки аз соли 2013 вазири умури дохилии Узбекистон буд, моҳи январи соли 2017 аз мақомаш барканор шуд. Пештар расонаҳо хабар доданд, ки Аҳмадбоев мушовири президент оид ба умури сиёсӣ ва ҳуқуқӣ таъйин шудааст. Наздикони Аҳмадбоев гуфта буданд, ки ӯ моҳи марти соли гузашта ҳамчун омӯзгор ба Академияи ВКД Узбекистон фиристода шуд.
Адҳам Аҳмадбоев карйераи худро соли 1984 ба ҳайси маъмури милисаи ноҳияи Шайхонтохур сар карда, баъдан дар идораи умури дохилии вилояти Тошканд ва сипас дар дастгоҳи иҷроияи презиенти Узбекистон идома додааст.
