Феҳристи футболбозоне, ки дар мусобиқоти қаҳрамонии аврупоӣ маоши аз ҳама баланд мегиранд, эълон шуданд. Рӯйхати онҳо дар сомонаи нашрияи L’Equipe чоп шудааст.
Дар садри ин рӯйхат ҳамлагари «Барселона»-и Испания Лионел Месси қарор дорад. Ӯ дар як моҳ 8,3 миллион евро (ба ҷуз пардохти андоз) фоида мекунад.
Мақоми дувумро ҳамлагари «Ювентус»-и Италия Криштиану Роналду касб намудааст. Маоши ӯ нисбат ба Мессии аргентинӣ қариб ду баробар камтар аст - 4,7 миллион евро. Ҳамлагари «Атлетико»-и Мадрид Антуан Гризманн дар ҷойгоҳи севум аст - 3,3 миллион евро.
Ҳамчунин ба даҳгонаи беҳтаринҳо ҳамлагари ПСЖ Неймар (3,06 миллион), ҳамлагари «Барселона» Луис Суарес (2,9), ҳамлагари «Реал» Гарет Бэйл (2,5), нимҳимоятгари «Барселона» Филиппе Коутинйо (2,3), ҳамлагари МЮ Алексис Санчес (2,28), ҳамлагари ПСЖ Килиан Мбаппе (1,73) ва нимҳимоятгари «Арсенал» Месут Озил (1,6) дохиланд.
Месси дар ҳайати «Барселона» чор бор ғолиби Лигаи қаҳрамонҳо шудааст. Роналду дар ҳайати «Манчестер Юнайтед»-и Англия як бор барандаи унвони асосии аврупоӣ гардида, боз чор бори дигар дар ҳайати «Реал»-и Мадрид дар Лигаи қаҳрамонҳо пирӯз шудааст. Ӯ тобистони соли 2018 аз «Реал» ба «Ювентус» гузаштааст.
