Пайвандҳои дастрасӣ

Хабарҳо

Оғози баҳси узвияти Албания ва Хорватия дар Нато

Албания ва Хорватия расман музокироти узвият дар паймони Наторо оғоз намуданд. Моҳи равон дар нишасти Бухарест Нато ду кишвари ёдшударо ба паймон даъват кард. Баъди анҷоми музокирот ду кишвар протоколи узвиятро ба имзо мерасонанд. Дар паи он 26 кишвари узв бояд ин протоколро ба тасвиб расонанд, то узвияти Албанияву Хорватия расмӣ шавад. Агар музокирот тибқи нақша ба поён расанд, моҳи апрели соли 2009-ум аснои таҷлили 60 солагии Нато ду кишвар ба ҳайси аъзои 27-ум ва 28-уми паймон дар ҷашнвора иштирок хоҳанд кард.

Садамаи автобуси мисрӣ боиси марги 9 нафар шуд

Имрӯз дар Миср бар асари тасодуми автобуси сайёҳӣ камаш нӯҳ нафар кушта ва чандин каси дигар захмӣ шуданд.
Аснои ҳаракат дар самти нимҷазираи Сино автобус чаппа шуда, оташ гирифтааст. Сайёҳон мехостанд аз шаҳри Шарм-уш-Шайхи соҳили баҳри Сурх ба пойтахт шаҳри Қоҳира сафар кунанд. То ҳол иттилои собит дар бораи шаҳрвандии қурбониҳо нашр нашудааст, вале сафорати Руминия гуфт, дар байни қурбониҳо як зан аз ин кишвар мебошад. Сафорати Русия ҳам таъкид кардааст,ки яке аз қурбониҳо шаҳрванди Русия мебошад. Ҳамчунон гуфта мешавад, ки дар тасодум як украинӣ низ ҳалок шуд.
Мақомоти мисрӣ изҳор намудаанд, ки дар ҳодиса14 рус, чор британиявӣ, ду шаҳрванди Канада, ду италиявӣ, ду румин, як украинӣ ва чор мисрӣ маҷрӯҳ шудаанд.

100 маҷрӯҳ бар асари зилзила дар Эрон

Телевизиони давлатии Эрон гузориш медиҳад, ки зилзилаи баробар ба 4,7 дараҷаи ченаки Рихтер манотиқи ҷанубу ғарби Теҳронро такон дода, беш аз 100 нафарро маҷрӯҳ намуд.
Ба қавли ҳамин манбаъ афроде, ки бар асари заминларза дар шаҳри Буруҷард захм бардоштаанд дар ҷои ҳодиса мавриди муоинаву табобат қарор гирифтанд. Эрон дар минтақаи аз нуқтаи назари заминларза хатарбор мавқеъ дорад.

Ихроҷи 10 дипломати ИМА аз Беларус

Дирӯз Беларус дастур дод, ки 10 дипломати амрикоӣ қаламрави ин кишварро тарк кунанд. Шореҳон ин амалро бо баҳс рӯи таҳрими Беларус ва вазъи ҳуқуқи башар дар ин кишвар иртибот медиҳанд. Масъули умури сафорати ИМА Ҷонатан Мур мегӯяд, ба 10 дипломат барои тарки хоки Беларус 72 соат вақт додаанд. Ӯ афзуд, 5 дипломати дигар имкон доранд, дар қаламрави ин кишвар корашонро идома диҳанд. Соли равон ду дафъа ҳукумати Беларус аз ИМА хост шумораи дипломатҳояш дар Минскро коҳиш диҳад. Ҳамзамон Беларус теъдоди дипломатҳояш дар Вашингтонро коҳиш дода буд. Сафири ИМА дар Минск аллакай ин кишварро тарк кардааст.
ИМА Беларусро мавриди таҳрим қарор додааст, то дар ин кишвар ислоҳоти демократӣ пиёда шуда, маҳбусони сиёсӣ аз зиндонҳо раҳо гарданд.
Сухангӯи Департаменти давлатии ИМА Шон Маккормак изҳор намуд, ки ихроҷи дипломатҳо амали ноодилона аст ва Вашингтон ба он посухи муносиб хоҳад дод.

Ирсоли нерӯҳои Русия ба Абхозистон

Имрӯз сарфи назар аз нигарониҳои байналмилалӣ Русия ба минтақаи ҷудоихоҳи Абхозистони Гурҷистон нерӯи иловагӣ ирсол намуд. Маскав изҳор намудааст, ки афзоиши нерӯҳо мухолифи созиши оташбаси соли 1994 намебошад, ки бар пояи он метавон дар Абхозистон то 3000 сарбози ҳомии сулҳи кишварҳои муштаракулманофеъро мустақар намуд. СММ, паймони Нато, Иттиҳодияи Аврупо ва ИМА ба Гурҷистон ҳамроҳ шуда, ирсоли нерӯҳои Русия ба Абхозистонро маҳкум намуданд. Президенти Гурҷистон Михеил Саакашвилӣ тасмим гирифтааст, вазъро ба ҳолати пештара баргардонад.

Марги 1 сарбози Нато ва 8 мулкӣ дар Афғонистон

Рӯзи чоршанбе дар Афғонистон бар асари чанд таркиши ҷудогона 1 сарбози Нато ва 8 фарди мулкӣ кушта шуданд. Сухангӯи Нато изҳор намуд, ки сарбози ин паймон аснои гашт дар вилояти Лугар, воқеъ дар ҷануби Кобул ба қатл расид. Полиси афғон мегӯяд, дар натиҷаи ду таркиш дар наздикиҳои марзи ин кишвар бо Покистон 8 фарди осоишта ва мин ҷумла 3 кӯдак ҳалок шуданд. Ба қавли ҳамин манбаъ дар минтақаи Спин Болдаки вилояти ҷанубии Қандаҳор мошини онҳо аз роҳи минакоришуда убур кард.

Таҷлили 1-уми май дар саросари дунё

Имрӯз дар саросари дунё Рӯзи байналмилалии меҳнаткашон 1-уми май бо раҳпаймоиҳоиву гирдиҳамоиҳо ҷашн гирифта шуд.
Дар ин ҷамъомадҳо ба вижа дар мамолики рӯ ба тараққӣ нигаронӣ аз болоравии нархҳо садо дод.
Дар шаҳри Манилаи Филиппин ҳазорҳо нафар бо шиорҳои зидди ҳукумати президенти хонум Глория Аройо ба кӯчаҳо баромаданд.
Дар шаҳри Ҷакартаи Индонезия наздик ба 15 ҳазор узви Иттифоқи касаба бо тақозои боло бурдани маош, ҳифзи меҳнаткашон ва эътироз ба афзоиши нархи маводи ғизоӣ раҳпаймоӣ карданд.
Дар Туркия полис коргаронеро, ки дар назди ситоди Иттифоқи касабаи чапгаро дар шаҳри Истанбул ҷамъ шуда буданд, чанд дафъа бо истифода аз об ва гази ашковар пароканда кард. Як идда ҷамъомадагон маҷрӯҳ ва шуморе ҳам боздошт шудааст.
Дар гӯшаҳои мухталифи Русия мардум ба нишони мухолифат ба таварруми рӯ ба афзоиш раҳпаймоӣ карданд.
Дар шаҳри бандарии Ҳамбурги Олмон дар арафаи 1-уми май полис бо ҷавонони балвогар бархӯрд намуд ва пешбинӣ мешавад, ки дар давоми рӯз бархӯрдҳо дар гӯшаҳои дигари ин кишвар идома хоҳанд ёфт. .

Дар Тоҷикистон мусобиқоти куҳнавардӣ барпо мешавад

Рузҳои 2-юм ва 3-юми май дар куҳҳои дараи Варзоб мусобиқаи қаҳрамонии куҳнавардии Тоҷикистон баргузор мешавад. Бино ба хабари Кумитаи Ҷавонон ва Ҷаҳонгардии Тоҷикистон дар ин мусобиқоти қаҳрамонӣ куҳнавардони сайёҳ, варзишгарони куҳнавард ва дастаҳои наҷот ширкат хоҳанд ҷуст. Мусобиқот дар чаҳор гуруҳ сурат хоҳад гирифт: Гуруҳи мардон, гуруҳи занон, гуруҳи духтарон ва гуруҳи писарон. Мусобиқоти инфиродӣ низ дар назар аст.

Ҷоми қаҳрамонии футбол насиби кӣ хоҳад шуд?

Дастаи Футболи Челсии Лондон ба бозиҳои ниҳоии Ҷоми Қаҳрамонии Аврупо роҳ ёфт. Ин даста бар дастаи дигари Бритонё, яъне бар Ливерпул бо ҳисоби 3 бар 2 пируз шуд ва дар бозии ниҳоӣ бо Манчестер Юнайтед зурозмоӣ хоҳад кард. Ин бозӣ 21-уми май дар Маскав баргузор мешавад. Манчестер Юнайтед низ дастаи футболи Бритонёст.

Дар Афғонистон Гармсер ба тасарруфи давлат даромад

Низомиёни Амрико дар Афғонистон мегуянд, ки шаҳраки Гармсерро дар вилояти Ҳилманд ба контроли худ даровардаанд. Ин шаҳрак то ҳол яке аз марказҳои нируҳои Толибон дониста мешуд. Барои таъмини амният дар ин минтақа дар оғози ҳафтаи ҷорӣ нируҳои Бритонё ва Амрико дар вулусволии Гармсер амалиёте оғоз карда буданд.

Амрико барои ҳамла ба Ирон нақшае надорад

Як мақоми низомии Амрико гуфтааст, нақшаҳои тозаи низомӣ барои ҳамла ба Ирон вуҷуд надорад. Бино ба гуфтаи Ҷон Сеттлер-раиси низомии нақшаҳои стротегии Амрико, ба вазорати дифоъи ин кишвар барои омода кардани тарҳи ҳамла дастур дода нашудааст. Дируз дар нишасти хабарии вазорати дифоъ гуфта шуд, ки ҳузури ду ҳавопаймобари Амрико дар Халиҷи Форс муваққатист, зеро яке дигариро иваз мекунад.

Ҳамла ба Карзай дар Покистон тарҳрезӣ шудааст

Раиси хадамоти кашфи Афғонистон гуфтааст, ҳамлаи рузҳои ахири ҳафтаи гузашта ба паради низомӣ дар Кобул дар Покистон тарҳрезӣ шудааст. Амруллоҳ Солеҳ гуфт, афроде, ки дар ин ҳамла ширкат доштанд, телефонӣ бо Вазиристони Шимолӣ- минтақаи қабиланишини Покистон дар тамос будаанд. Мақомоти расмии Покистон ба ин изҳорот то ҳол вокуниш нишон надодаанд. Дар маросими паради низомӣ дар Кобул Ҳомид Карзай-раиси ҷумҳури Афғонистон ширкат дошт.

НАТО бар сафороии нируҳои Руссия назорат мекунад

Паймони НАТО мегуяд, бар сафороии нируҳои Руссия дар Абхозистон-ҷумҳурии ҷудоихоҳи Гурҷистон назорат мекунад, зеро чунин равиши Руссия боъиси ташаннуҷи вазъ дар минтақа шудааст. Дар Вошингтон Кохи Сафед гуфтааст, аз афзоиши шумораи нируҳои посдори сулҳи Руссия дар Абхозистон нигарон аст. Иттиҳодияи Аврупо аз ин кори Руссия интиқод кард. Руссия мегуяд, ба Абхозтстон нируҳои изофӣ мефиристад, то ба гуфтаи худаш, аз нақшаҳои ҳамлаи Гурҷистон ба Абхозистон ҷилавгирӣ кунад.

Амрико мегуяд, Ирон ҳомии терорризм дар ҷаҳон аст

Вазорати хориҷаи Амрико гузориши солонаи худро роҷеъ ба терроризми сартосарӣ ба табъ расонд. Дар он аз Ирон ба унвони кишвари аслии ҳомии тероризми байналмилалӣ ном бурда шудааст. Дар гузориш омдааст, Ирон талош дорад дар минтақа нуфузи худро афзоиш диҳад ва Амрикоро аз Ховари Миёна хориҷ кунад. Дар ин гузориш ҳамчунин аз Сурия, Курёи Шимолӣ, Кубо ва Судон ба унвони кишварҳои ҳомии терроризм ном бурда шудааст. Бино ба ин гузориш, дар солҳои 2006 ва 2007 дар Афғонистон ҳамлаҳои террористӣ 16 дарсад афзоиш ёфтааст. Аммо дар Ироқ ҳамлаҳрои террористӣ дар ин муддат коҳиш ёфтааст.

Дипломатҳои Амрико тарки Беларус мекунанд

Беларус имрӯз аз як теъдод дипломатҳои амрикоӣ талаб кард, қаламрави ин кишварро тарк кунанд. Вазорати хориҷаи Беларус гуфт, феҳрасти дипломатҳое, ки бояд хориҷ шаванд, ба дасти кордори сафорати Амрико Ҷонатан Мур супурда шудааст.

Беларус дар моҳи март аз сафири Амрико низ айни талабро карда, сипас то 6 нафар коҳиш додани шумори кормандони сафорати он кишварро талаб гузошт.

Танҳо дар соли ҷорӣ бори дуввум аст, ки Минск коҳиши шумори кормандони сафорати Амрикоро талаб мекунад.

Таниши дипломатӣ байни Амрикову Беларус дар пайи ҷорӣ шудани таҳримот алайҳи ширкати “Белнефтехим” авҷ гирифт.

НАТО ва Амрико низ аз Маскав интиқод карданд

Паймони низомии НАТО гуфт, ҷараёни афзоиши нирӯҳои ҳомии сулҳи Русия дар Абхозистон, ҷумҳурии ҷудоиталаби Гурҷистонро назорат мекунад. Сухангӯи НАТО Ҷеймс Апатураӣ гуфт, ки ин иқдоми Маскав танишро дар минтақа бештар хоҳад кард. Амрико низ дар бораи ин тасмими Русия изҳори нигаронӣ карда ва Иттиҳодияи Аврупо аз он интиқод кардааст.

Хавйер Солана, раҳбари идораи сиёсати хориҷии ИА дар пайи мулоқот бо вазири хориҷаи Русия Сергей Лавров гуфт, ин амал ба оддӣ шудани равобити танишомези Маскав бо Тифли мусоидате намекунад.

Русия мегӯяд, нирӯҳои иловагиро ба ин минтақа дар вокуниш ба қасди, ба гуфтаи Маскав, ҳамлаи имконпазири Гурҷистон ба ин ҷумҳурии ҷудоиталаб мефиристад.

"Ҳамла ба Карзай дар Покистон тарҳрезӣ шуда буд"

Амруллоҳ Солеҳ, раҳбари хадамоти амниятии Афғонистон гуфт, нақшаи ҳамлаи рӯзи якшанбе алайҳи раҳбари ин кишвар Ҳомиди Карзай дар Покистон кашида шудааст. Амруллоҳ Солеҳ гуфт, омилони ин ҳамла бо афроде дар минтақаҳои қабиланишини Боҷавор ва Вазиристони шимолӣ ва шаҳри Пешовари Покистон тамоси телефонӣ доштаанд. Исломобод то ҳол ба ин иддаои Кобул вокунише нишон надодааст.

Амруллоҳ Солеҳ дар сӯҳбат бо хабарнигорон ҳамчунин ба ҷузъиёти амалиёти нирӯҳои амниятӣ дар минтақаи Гузаргоҳи Кобул пардохта, гуфт, дар ҷараёни ҳамла ба як паноҳгоҳи ҷангиён дар ин минтақа 7 нафар, кушта шуданд.

Амруллоҳ Солеҳ гуфт, ду тан аз кушташудагон “террористҳо” ва якеи дигар зане будааст, ки ба хотири анҷоми ҳамлаи интиҳорӣ омада буд. Раҳбари хадамоти амниятии Афғонистон афзуд, дар ҷараёни амалиёт ҳамчунин як кӯдак ва 3 тан аз нирӯҳои амниятӣ кушта шудаанд.

Нархи ғизо ба 1 миллиард нафар асобат кардааст

Бонки Рушди Осиё мегӯяд, афзоиши нархи ғизо ба ҳаёти 1 миллиард мардум дар қораи Осиё ба таври ҷиддӣ асобат кардааст. Мудири кулли Бонки Рушди Осиё Раҷат Наг имрӯз гуфт, ин омор аз ҷумла фарогири 600 миллион мардумест, ки бо камтар аз 1 доллар даромади рӯзона ба сар мебаранд. 400 миллион нафари дигар, ба гуфтаи вай, даромади як каме бештар аз 1 доллар дар рӯз доштаанд.

Раҷат Наг гуфт, мавзӯъи афзоиши нархи ғизо дар ҷаласаи солонаи Бонк, ки рӯзи шанбе дар Мадрид, пойтахти Испания, оғоз ба кор мекунад, баррасӣ хоҳад шуд.

Омилони таркиш дар бозори Черкизово маҳкум шудаанд

Хабаргузориҳои русӣ мегӯянд, ҳайъати мунсифаи додгоҳи шаҳри Маскав 4 нафарро б о ҷурми даст доштан дар бамбгузории 2 соли пеш дар бозори Черкизовои пойтахти Русия маҳкум кардааст. Ҳайъати мунсифаи додгоҳи ин 4 нафарро дар куштор ва тарҳрезии куштор муҷрим шинохтааст.

3 тан аз ин маҳкумшудагон донишҷӯ буда, бо гурӯҳҳои қавмгаро ҳамкорӣ доштаанд.

Дар таркиши бамб дар бозори Черкизовои шаҳри Маскав дар моҳи августи соли 2006 14 нафар, аз ҷумла 7 шаҳрванди Тоҷикистон, бо шумули 2 кӯдак кушта шуданд.

Дар садамаи КАМАЗ 8 тонна кетчуп нобуд шуд

Дар асари сониҳаи як мошини боркаши КАМАЗ дар шаҳри Оқтеппаи Қазоқистон 8 тонна кетчуп рӯи роҳ рехтааст.

Ба навиштаи хабаргузории Интерфакс, раҳгузарон кетчупро ба маҳзи ранги сурхаш ҳавзи хун пиндошта, ба ҷойи ҳодиса мошинҳои “Ёрии таъҷилӣ” ва гурӯҳҳои наҷотбахшро даъват кардаанд.

Аммо маълум шуд, ки ин садама хисороте ба дунбол надоштааст. Албатта, ба ҷуз аз 8 тонна кетчупи рӯи роҳ рехта.

IMF мегӯяд, ихтилофаш бо Душанбе рафъ шудааст

Карлос Пенеруа, раҳбари ҳайъати намояндагии Сандуқи Байналмилалии Пул (IMF) имрӯз дар Душанбе ба дунболи мулоқоташ бо раисиҷумҳури Тоҷикистон Эмомалӣ Раҳмон гуфт, ихтилофи назарҳо байни ин созмон ва давлати Тоҷикистон рафъ шуда, ва Сандуқи Пул акнун дар садади роҳандозии як барномаи нав ба хотири ислоҳи низомии бонкии Тоҷикистон аст.

Сандуқи Байналмилалии Пул дар моҳи март давлати Тоҷикистонро ба ироаи маълумоти носаҳеҳ муттаҳам кард ва аз Душанбе хост, 47,4 миллион доллар қарзи боимтиёзеро, ки бар пояи ин маълумотҳои ғайривоқеъӣ дарёфт кардааст, пеш аз мӯҳлат баргардонад.

Пирӯзии "Манчестер Юнайтед" бар "Барселона"

Рӯзи сешанбе тими футболи “Манчестер Юнайтед”-и Инглистон дар бозии дуввуми даври ниманиҳоии Ҷоми қаҳрамонҳои футболи Аврупо бар тими “Барселона”-и Испания бо ҳисоби 1:0 пирӯз шуда, нахустин роҳхат ба даври ниҳоии ин мусобиқоти мӯътабарро ба даст овард. Бозии аввали ин ду тим дар Барселона бо натиҷаи 0:0 анҷом ёфта буд.

Имрӯз барои дарёфти роҳхати дуввум ба даври ниҳоии Ҷоми қаҳрамонҳои футболи Аврупо ду тими инглисии “Челси” ва “Ливерпул” вориди рақобат мешаванд.

Бозии аввали ин ду тим дар майдони “Ливерпул” ҳафтае пеш бо ҳисоби мусовии 1:1 поён ёфта буд.

Дар ҳар сурат, маълум аст, ки дар даври ниҳоӣ ду тими Инглистон ба дидори ҳам хоҳанд рафт. Бозии ниҳоии Ҷоми қаҳрамонҳои футболи аврупо рӯзи 21 май барои нахустин бор дар варзишгоҳи “Лужники”-и шаҳри Маскав баргузор хоҳад шуд.

Эрон дигар нафташро бо доллар намефурӯшад

Ҳуҷҷатуллоҳ Ғанимифард, як мақоми вазорати нафти Эрон гуфт, ин кишвар харидуфурӯши нафт бо доллари амрикоиро комилан қатъ кардааст. Вай афзуд, ки чунин муъомилот аз ин ба баъд танҳо бо евро, воҳиди пули ИА, ва бо йени Ҷопон сурат дода хоҳанд шуд. Эрон, ки дуввумини кишвари бузурги тавлидкунандаи нафт дар созмони ОПЕК маҳсуб мешавад, харидуфурӯши нафташ бо долларро ҳанӯз аз соли гузашта дар пайи пойинравии қурби пули Амрико ба таври сареъ коҳиш дод.

Уфти қурби пули Амрико мояи нигаронии тавлидкунандагони нафт шудааст, чунки арзиши захираи доллари онҳоро ночиз мекунад.

Путин гуфт, равобити Русия бо Эрон идома хоҳад ёфт

Раисиҷумҳури Русия Владимир Путин ба ҳамтои эрониаш Маҳмуди Аҳмадинажод гуфтааст, Маскав равобиташ бо Теҳронро идома хоҳад дод. Владимир Соболев, кафили дабири Шӯрои амниятии миллии Русия гуфт, ин паёми лафзии Путинро дар мулоқоти ҳафтаи ҷориаш ба Аҳмадинажод расондааст.

Владимир Путин дар ин паём гуфтааст, ин сиёсат сарфи назар аз он ки кӣ ба раёсати Русия меояд, идома хоҳад ёфт.

Қарори маълум, дар моҳи май Дмитрий Медведев ба ивази Владимир Путин ба курсии раёсати ҷумҳурии Русия хоҳад нишаст.

Озарбойҷон бори Русия барои Эронро раҳо мекунад

Озарбойҷон гуфт, таҷҳизоти барои нирӯгоҳи ҳастаии Бушаҳри Эрон фиристодаи Русияро, ки дар авохири моҳи март дар марзи Озарбойҷон боздошт шуда буд, ба зудӣ раҳо мекунад.

Муовини вазири хориҷаи Озарбойҷон Ораз Азимов гуфт, ин масъала дар наздиктарин фурсат ҳалл хоҳад шуд. Ӯ афзуд, ширкати русии масъули эҳдоси нирӯгоҳи Бушаҳр тамоми асноди лозим барои ин таҷҳизотро ироа кардааст.

Мошинҳои ҳомили ин таҷҳизот рӯзи 29 март дар марзи Озарбойҷон бо Эрон боздошт шуданд.

Маскав Бокуро айбдор кард, ки ҳадафмандона ба ҳаракати ин корвон мамониат кардааст. Эрон дар ивази бунёди реактори Бушаҳр ба Русия беш аз 1 миллиард доллар мепардозад.

Ёфтҳои бештар

Гузоришҳои видеоӣ

Таҷлил аз солрӯзи Раҳим Масов, нигорандаи "Таърихи табартақсим"
лутфан мунтазир бошед

Феълан кор намекунад

0:00 0:04:02 0:00
XS
SM
MD
LG