Пайвандҳои дастрасӣ

Хабари нав

Хабарҳо

Николай Бордюжа баъди 13 сол аз мақомаш рафт

Николай Бордюжа

Генерал Валерий Семериков, ки дар ҷанги Афғонистон иштирок кардааст, иҷрокунандаи вазифаи дабири кулли Созмони Паймони Амнияти Дастҷамъӣ шуд. Дафтари матбуоти СПАД гуфт, ки рӯзи 31 декабри соли 2016 ваколати Николай Бордюжа дар ин созмон ба поён расид. Бордюжаи 68-сола аз 2003 ба ин тараф чор навбат сесолӣ дабири кулли Созмони Паймони Амнияти Дастҷамъӣ интихоб шуда ва ваколаташ бояд соли 2015 ба итмом мерасид. Аммо моҳи декабри соли 2015 қарори мӯҳлати роҳбарии ӯ то январи соли 2017 қабул карда шуд. Вай аз соли 1999 то 2003 ба ҳайси сафири Русия дар Шоҳигарии Дания низ кор кардааст. Валерий Семериков, ки ҳоло иҷрокунандаи вазифаи дабири кулли СПАД шуд, то ин вақт муовини Николай Бордюжа буд. СПАД ё ОДКБ бар пояи Созишномаи амнияти дастҷамъии 15 майи соли 1992, ки аз сӯи кишварҳои узви Иттиҳоди Давлатҳои Мустақил имзо шуда буд, таъсис ёфтааст. Дар ҳоли ҳозир, Арманистон, Беларус, Русия, Тоҷикистон, Қазоқистон ва Қирғизистон узви ин созмонанд. Узбакистон аз июни соли 2012 узвияти худро дар ин созмон қатъ кардааст.

Трамп: Бо Русияву Чин муносибати хуб хоҳем дошт

Доналд Трам

Доналд Трамп, раиси ҷумҳури мунтахаби Амрико, дар шаби Соли нави милодӣ гуфт, ки баъди вуруд ба Кохи Сафед робитаи хуберо бо ҳамаи кишварҳо, аз ҷумла Русияву Чин ба роҳ хоҳад монд. Трамп дар посух ба суоле дар бораи иттиҳоми ҳамлаи ҳакерии Русия аз тарафи ниҳодҳои амниятии Амрико гуфт, “ин иттиҳом хеле ҷиддӣ аст ва мунтазир мемонам, то мутмаин шаванд”. Доналд Трамп рӯзи 20 январ ба унвони раиси ҷумҳури нави Иёлоти Муттаҳида савганд хоҳад хӯрд.

Ҳалокати нӯҳ пулис дар ҳамлаи Наҷаф

Дар пайи ҳамлаи интиҳорӣ ба як нуқтаи бозрасӣ дар ҷануби шаҳри Наҷафи Ироқнӯҳ маъмури пулис кушта шудаанд. Бино ба гузориши Ройтерс, ҳамлаварон савори ду мошин буданд. Яке аз мошинҳо ҳангоме ки пулис онро барои бозрасӣ нигоҳ дошт, таркидааст. Мошини дигарро аз маҳалли ҳодиса дур бурдаанд, вале ду нафари дохили он бо тири маъмурони пулис кушта шудаанд. Гурӯҳи тундрави “Давлати исломӣ” дар баёнияе масъулияти ин ҳамларо бар дӯш гирифтааст. Наҷаф дар 160-километрии шаҳри Бағдод, пойтахти Ироқ, ҷойгир буда, маҳалли шианишин аст. Ин ҳамлаи интиҳорӣ дар ҳоле сурат гирифта, ки нерӯҳои давлатӣ ва пешмаргаҳои курд моҳҳо боз барои раҳо кардани Мавсил, дувумин шаҳри бузурги Ироқ аз дасти ҷангҷӯёни гурӯҳи тундрави “Давлати исломӣ” талош доранд. Як рӯз пеш дар ҳамлае ба бозори серодами Бағдод чандин нафар кушта ва захмӣ шуданд.

Кумитаи ҳолатҳои фавқулода аз сардии шадид ҳушдор дод

Акс аз бойгонӣ

Кумитаи ҳолатҳои фавқулодаи Тоҷикистон аз 2 то 4 январ сардии ҳаворо дар кишвар пешбинӣ кардааст. Ин ниҳод бо нашри огоҳӣ аз сокинон хост, ки ҳангоми сафар ба минтақаҳои баландкӯҳ ва ҳаракат дар роҳҳо ҳушёр бошанд, чун боридани барфу яхбандиҳои шадид дар назар аст. "Кумитаи ҳолатҳои фавқулода ба шаҳрвандон тавсия медиҳад, ки дар ин рӯзҳо хеле эҳтиёткор бошанд. Ронандагонро лозим меояд, ки қоидаҳои ҳаракат ва суръати ҳаракат дар роҳҳоро ҷиддан риоя кунанд", - таъкид шудааст дар огоҳӣ. Инчунин, Кумитаи ҳолатҳои фавқулода аз сокинон хостааст, ки ҳангоми гарм кардани хонаҳо, бахусус баландошёнаҳо, қоидаҳои зидди сӯхторро риоя кунанд.

СММ аз созиши оташбас ва музокироти сулҳи Сурия ҳимоят кард

Шӯрои амнияти Созмони Милали Муттаҳид рӯзи 31 декабр қатъномаеро дар пуштибонӣ аз созиши оташбас ва музокироти сулҳи Сурия тасвиб кард. Ин қатъномаро Русия дар аввалин рӯзи иҷрои созиши оташбас миёни нерӯҳои давлатӣ ва мухолифини мусаллаҳи Сурия ба Шӯрои амният пешниҳод карда буд. Дар қатънома барои ташкили як давлати интиқолӣ дар Сурия таъкид мешавад. Инчунин, бар асоси гузориши хабаргузории Олмон, қатъномаи Шӯрои амният муқаррар мекунад, ки имдодгарон дар саросари Сурия бояд аз шароити хуб ва амнияти комил бархӯрдор бошанд, то тавонанд бо суръат ба кумаки ниёзмандон расанд. Ин қатънома аз музокироти сиёсӣ, ки қарор аст дар шаҳри Остонаи Қазоқистон миёни намояндагони ҳукумати Сурия ва мухолифони ин кишвар баргузор шавад, низ истиқбол мекунад. Ин музокирот бо миёнравии Туркия ва Русия моҳи январи имсол баргузор хоҳад шуд.

Франсуа Олланд гуфт, ки ба Ироқ меравад

Франсуа Олланд, раиси ҷумҳури Фаронса, рӯзи 2 январ ба Ироқ хоҳад рафт. Вай рӯзи шанбе ҳангоми паёми солинавиаш ба марудми Фаронса гуфт, мехоҳад низомиёни кишварашро, ки дар Эътилофи таҳти раҳбарии Амрико дар Ирқо ҳастанд, бо Соли нав табрик гӯяд. «Ҳанӯз мубориза бо терроризм поён наёфтааст. Мубориза идома хоҳад кард», - гуфт Франсуа Олланд ва афзуд, «рисолати низомиёни мо низ аз буданашон дар Мали, Сурия ва Ироқ низ ҳамин аст.»

Чораҳои шадиди амниятӣ дар баъзе аз пойтахтҳои Аврупо

Дар лаҳзаҳои таҷлил аз Соли Нав ба хотири ҷилавгирӣ аз ҳамагуна ҳамлаҳои эҳтимолӣ дар баъзе аз пойтахти кишварҳои Аврупо тадобири шадиди амниятӣ рӯйи даст гирифта шудааст. Олмон, Бритониё, Испания ва Фаронса аз ҷумлаи кишварҳое ҳастанд, ки нерӯҳои махсуси худро барои ҳифзи амнияти сокинон дар лаҳзаҳои ҷашн сафарбар кардаанд. Дар пойтахти ин кишварҳо дар атрофи марказҳои харид ва макони серодам саддҳои бетонӣ гузошта шудааст. Ин чораҳои амниятӣ дар ҳолест, ки рӯзи 19 декабр як мошини боркаш тӯдаи мардумро дар бозори "Крисмас"-и Берлин пахш кард. Дар ин ҳодиса 12 нафар қурбон ва 48 нафар захмӣ шуданд. Мақомот гуфтанд, ин мошини боркашро Анис Амрӣ, паноҳандае аз Тунис идора мекард ва баъдан дар пайи амалиёти боздошташ дар Италия кушта шуд. Масъулияти амали террористиро гурӯҳи тундрави "Давлати исломӣ" бар дӯш гирифт.

Сафири Юнонро дар Бразилия кӣ кушт?

Мақомоти пулиси Бразилия гуфтанд, ки қотили сафири Юнон дар ин кишвар як афсари 29-солаи пулис будааст. Ин афсар эътироф карда, ки бо ҳамсари дипломати юнонӣ Кириакос Амиридис робита дошт ва бо фармоиши ӯ сафирро кушт. Ба гузориши хабаргузории Фаронса, ҳамсари сафири Юнон низ ба доштани робита бо ин маъмури пулис эътироф кардааст. Ҷасади Кириакос Амиридиси 59-сола рӯзи панҷшанбеи гузашта дар дохили як худрави сӯхта пайдо шуд. Ӯ аз соли 2001 то 2006 консули Юнон дар Рио-де-Жанейро буд ва имсол ба унвони сафири ин кишвар дубора ба Бразилия баргашт.

Маркази "Сова" ба рӯйхати "агентҳои хориҷӣ" ворид шуд

Александр Верховский

Вазорати адлияи Русия маркази "Сова"-ро, ки бештар ба омӯзиши миллатгароӣ дар ҷомеаи он кишвар машғул аст, ба рӯйхати "агентҳои хориҷӣ" шомил кард. Дар вебсайти Вазорати адлия гуфта мешавад, тасмими онҳо ба дунболи тафтиши ҳуҷҷатҳои созмон гирифта шудааст. Раиси маркази "Сова" Александр Верховский гуфт, ин созмони ғайриҳукуматӣ барои гӯё "дарёфти сармояи хориҷӣ" ва "баҳогузорӣ ба кори ниҳодҳои давлатӣ дар маҳзари умум" муттаҳам шудааст. Верховский гуфт, маркази таҳти раёсати ӯ норозигии худро аз ин қарори Вазорати адлия хаттӣ пешниҳод карда ва ба додгоҳ шикоят хоҳад бурд, то номи онҳоро аз феҳристи "агентҳои хориҷӣ" берун кунад. Маркази "Сова" дар Русия ба омӯзиши мушкили миллатгароӣ, бадбинии нажодӣ ва радикализми сиёсӣ машғул буд.

Ҳалокати 93 журналист дар як сол дар ҷаҳон

Павел Шеремет моҳи июли имсол кушта шуд

Дар як соли гузашта дар гӯшаҳои мухталифи ҷаҳон 93 корманди расонаҳо кушта шудаанд. Масъулони Федератсияи байналмилалии журналистон гуфтанд, бисёре аз ин хабарнигорон ҳангоми адои вазифа дар Ироқу Афғонистон, Мексика, Яман ва Сурия қурбон шуданд. Дар ин қатор исми Павел Шеремет, корманди "Ҳақиқати Украина" ҳам дарҷ шудааст. Соли 2015 дар ҷаҳон 112 журналист кушта шуда буд. Филипп Лерут, президенти Федератсияи байналмилалии журналистон, рӯзи 31 декабр гуфт, аз ҳамагуна коҳиши хушунат алайҳи хабарнигорон истиқбол мекунад, аммо ҳамзамон афзуд, "ин омор ва ҳамлаҳо алайҳи журналистон моро ором гузошта наметавонад".

Тавсифи Трамп аз Путин барои ихроҷ накардани дипломатҳои амрикоӣ

Доналд Трамп

Доналд Трамп – президенти мунтахаби Иёлоти Муттаҳида – аз тасмими раиси ҷумҳури Русия барои аз ин кишвар берун накардани дипломатҳои амрикоӣ тавсиф намудааст. Трамп дар Твиттераш чунин чархиши Маскавро "олӣ" ва Владимир Путинро "инсони бисёр оқил" донистааст. Президенти Русия рӯзи 30 декабр дар ҷавоб ба қарори Амрико барои ихроҷи 35 дипломати рус дар заминаи ҳамлаҳои ҳакерӣ гуфт, Русия ягон дипломати амрикоиро хориҷ намекунад. Аз ин пештар мақомоти расмии Маскав гуфтанд, ҳукумати Русия дар посух ба таҳримоти эъмолкардаи Амрико ба зидди дипломатҳо ва ниҳодҳои амниятӣ посухи ҳамвазн медиҳад. Иёлоти Муттаҳида дар посух ба ҳамлаҳои ҳакерии Маскав 35 дипломати русро ихроҷ карда ва алайҳи як қатор шаҳрвандон ва идораву муассисаҳои Русия таҳримҳои нав ҷорӣ кард. Ниҳодҳои амниятии Амрико ба ин хулоса омадаанд, ки рахнаи шабакаҳои компютерии Ҳизби демократи Амрико ва дуздии номаҳои аъзои ҳизб бо огаҳии мақомоти баландпояи Русия сурат гирифтааст. Баъзе аз ин номаҳо дар ҷараёни интихоботи раёсати ҷумҳурии Амрико нашр шуданд.

Таркишҳои Бағдод ҳудуди 30 кушта бар ҷо гузошт

Ду таркиш дар шаҳри Бағдод, маркази Ироқ, ҳудуди 30 кушта бар ҷо гузоштанд. Ин ҳодиса субҳи 31 декабр дар як бозори серодам рух дода, ба иттилои хабаргузориҳо, даҳҳо тани дигарро маҷруҳ кардааст. То ҳол ҳеч кас ё гурӯҳ масъулияти ҳамларо дар дӯш нагирифтааст. Дар гузашта масъулияти чунин таркишҳои маргборро асосан гурӯҳи тундрави "Давлати исломӣ" бар ӯҳда мегирифт. Аз ҷумла, моҳи ноябр дар ҳамлаи интиҳории ин гурӯҳ дар шаҳри Ҳиллаи Ироқ байни Карбало ва Бағдод даҳҳо зоири эронӣ кушта шуданд. Тайи моҳҳои охир нерӯҳои давлатӣ ва пешмаргаҳои курд барои озод кардани Мавсил, дувумин шаҳри бузурги Ироқ, аз дасти ҷангҷӯёни гурӯҳи тундрави "Давлати исломӣ" талош доранд.

Нишасти Тоҷикистону Чин дар масъалаи марзи давлатӣ

Кумисюни муштараки Тоҷикистону Чин дар умури марзи давлатӣ ҷаласаи навбатии худро баргузор кардааст. Ҷузъиёти ин нишаст маълум нест. Вале Вазорати умури хориҷии Тоҷикистон бо нашри иттилоияе гуфт, ин ҷаласа рӯзҳои 27-29 декабри имсол дар Душанбе баргузор шудааст. Ҷониби Тоҷикистонро дар ин нишаст Маҳмадшариф Ҳақдод – муовини вазири корҳои хориҷии Тоҷикистон ва тарафи Чинро Чжоу Сзян раҳбарӣ кардаанд. “Тарафҳо масъалаҳои дахлдори татбиқи Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Халқии Хитой оид ба низоми сарҳади давлатии Тоҷикистону Хитойро аз 5 июни соли 2012 баррасӣ карданд”, - таъкид шудааст дар иттилоия. Ба қавли манбаъ, дар поёни ҷаласа проткол ҳам ба имзо расидааст.

“Гулистон”-ро ба 4 миллион доллар мефурӯшанд. ВИДЕО

Яке аз таблиғоти пешинаи корхонаи "Гулистон"

Корхонаи “Гулистон”, ки то соли 2014 ба миллиардери украинӣ Дмитрий Фирташ ва хонаводаи соҳибкори зиндонӣ Зайд Саидов муталлиқ буд, бо қимати 32 миллион сомонӣ (каме бештар аз 4 миллион доллар) ба фурӯш гузошта шудааст. Ин корхона ду сол пеш бо қарори Додгоҳи иқтисодии Душанбе давлатӣ гардид. Кумитаи сармоягузории Тоҷикистон дар бахши музоядаи вебсайташ навиштааст, ки 100 дар сади саҳмияҳои корхона фурӯхта мешавад. Корхонаи “Гулистон” қаблан ба истеҳсоли шиму либосҳои “ҷинс” машғул буд ва маҳсулоташро ба кишварҳои Аврупо содир мекард. Аммо баъди мусодираи он ба нафъи давлат, корхона нуфузашро аз даст дод ва дар моҳи ноябри соли гузашта дар пайи як мушоҳидаи хабарнигори Радиои Озодӣ дастгоҳҳояш низ кор намекарданд. «Гулистон» ягона корхонае нест, ки Дмитрий Фирташ дар Тоҷикистон дошт. Корхонаи «Абрешими Хуҷанд» ва 75 дарсади «Тоҷиказот» низ моли Фирташ буд. Тайи тақрибан ду соли охир мақомоти Кумитаи давлатии сармоягузорӣ истироҳатгоҳи Зумрад дар Исфара, маҷмааи Сафедорак ва инчунин табобатгоҳи Шоҳамбариро фурӯхтаанд.

Навори видео аз бойгонӣ:

Дар Душанбе "Гулистон"бекор хобидааст.
лутфан мунтазир бошед

Феълан кор намекунад

0:00 0:01:13 0:00

Путин: Русия ягон дипломати амрикоиро хориҷ намекунад

Президенти Русия Владимир Путин дар посух ба қарори ИМА дар бораи ихроҷи 35 дипломати рус, дар заминаи ҳамлаҳои ҳакерӣ гуфт, ки Русия ягон дипломати амрикоиро хориҷ намекунад.

Каме пештар аз ин Вазорати хориҷии Русия ба президенти ин кишвар пешниҳод кард, ки ба таҳримҳои ИМА посухи ҳамвазн диҳад ва 35 дипломати амрикоиро аз қаламрави кишвар хориҷ кунад. Дар ин бора хабаргузории "Интерфакс" бо такя ба изҳороти Сергей Лавров гузориш дод.

Лавров пешниҳод кардааст, ки 31 дипломати сафорати Амрико дар Маскав ва чаҳор дипломат аз Консулгарии ИМА дар Санкт Петребург аз Русия хориҷ шаванд. Лавров номи дипломатҳои ИМА-ро мушаххас накардаст.

Вазорати хориҷии Русия ҳамчунин ба президент пешниҳод кардааст, ки истифодаи истироҳатгоҳи "Серебренный бор" ва анборе дар кӯчаи Дорожнии Маскав аз тарафи дипломатҳои Амрикоро мамнӯъ кунад.

Рӯзи гузашта Ийолоти Муттаҳида аз ихроҷи 35 дипломати рус хабар дод. Дар ҳамон рӯз Вазорати молияи Амрико дар посух ба ҳамлаҳои ҳакерӣ алайҳи як қатор шаҳрвандон ва идораву муассисаҳои Русия таҳримҳои нав ҷори кард.

Беш аз ҳазор корбар дар ИМА линкҳои зараровар гирифтанд

Евгений Богачев ва Александ Белан- ду шаҳрванди Русия, ки ба ҳамлаҳои киберӣ муттаҳам шудаанд.

Бюрои федеролии тафтишоти Амрико хадамоти истихбороти Русияро ошкоро ба дахолат дар умури интихобот муттаҳам кард ва дар ин замина гузориши муфассал нашр намуд. Ин гузориш намунаи рамзҳои зарароварро зикр кардааст, ки аз ҷониби ширкатҳои бузурги ҳакерӣ ё рахнагар истифода шудаанд. Ба гуфтаи "Садои Амрико" сар аз миёнаи соли 2015, истихбороти Русия ва Хадамоти амнияти ин кишвар ба беш аз ҳазор нишонӣ, бо шумули суроғаи аъзои ҳукумати Амрико, линкҳои зараровар фиристодааст. Ин рақамҳо дар гузориши 13 саҳифагии Бюрои федеролии тафтишот ва Вазорати амнияти дохилии Амрико дарҷ шудаанд.

Бюрои федеролии тафтишот гузориши худро рӯзе пахш кард, ки президенти ИМА Барак Обама таҳримоти нав, бо шумули ихроҷи дипломатҳои рус ва дар робита ба ҳадамоти амният ва истихбороти Русияро эълон кард. Президент Обама аз истихборот дархост карда буд, ки баҳои худро то анҷоми мӯҳлати раёсати ӯ ироа кунанд.

Қирғизистон дар рӯйхати кишварҳои арзони сайёҳӣ

Маҷаллаи Forbes Қирғизистонро ба рӯйхати самтҳои арзони сайёҳӣ дар соли 2017 ворид кард. Дар рӯйхат 21 самт аз 17 кишвар шомил шудааст. маҷалла Қирғизистонро самти нави сайёҳӣ унвон кардааст.

Ба навиштаи маҷалла, 93 дарсади Қирғизистон минтақаи куҳӣ буда, ин кишвар фарҳангу таърихи бой дорад ва аз гӯшаҳои кашфношудаи ҷаҳон аст. Маҷалла Бишкекро маркази омӯзиши Осиёи Марказӣ, мероси Роҳи Абрешим унвон кардааст.

Қирғизистон дар баробари арзонӣ, ҳамчунин дастрас низ ҳаст, менависад маҷалла. Дар шаҳрҳои Қирғизистон бар ивази 15 доллар мешавад хобгоҳ ва дар ивази 2 доллар ғизо дарёфт кард.

Дар ин рӯйхат ҳамчунин Португалия, Куриёи Ҷанубӣ, Руминия, Юнон, Филиппин, Австралия, Тирнидад ва Тобаго, Словакия, Гурҷистон, Лаос, Миср, Боливия, иёлати Юта, Гватемала, Белиз ва Гондурас шомил шудаанд.

Соли 2016 чанд маҷаллаи дигари маъруфи ҷаҳонӣ ба сайёҳон тавсия доданд, ки ба Қирғизистон сафар кунанд.

Боздошти гумонбарони "ҳамлаҳои солинавӣ" дар Маскав

Сарбозони Хадамоти амнияти Русия

Хадамоти амнияти Русия (ФСБ) гуфт, ки ҳафт нафарро бо гумони тарҳрезии ҳамлаҳои террористӣ дар остонаи соли нав, боздошт кардааст, ки дастури гурӯҳи тундрави "Давлати Исломӣ"-ро иҷро мекарданд.

Ин ниҳоди амниятӣ рӯзи 29 декабр гуфт, ки ходимонаш тарҳрезони амалҳои террористиро дар Доғистон, минтақае дар Қафқози Шимолӣ, боздошт карданд. Ба гуфтаи хадамоти амният ин гурӯҳ мехост бо истифода аз силоҳи автоматӣ ва маводи тарканда дар маконҳои серодам амали террористӣ анҷом диҳад.

Шӯришгарони исломӣ дар Доғистон пайваста ба пулис ва мақомот ҳамла мекунанд ва гуфта мешавад, ки баъзеи онҳо бо гурӯҳи тундрави "Давлати Исломӣ" байъат кардаанд.

Аз моҳи сентябри соли 2015, Русия бо ҳадафи кӯмак ба президент Башор Асад, ҳамлаҳои ҳавоиро ба Сурия оғоз кард. Раҳбарони гурӯҳи тундрави "Давлати исломӣ" таҳдид кардаанд, ки ба Русия дар қаламрави худаш ҳамла мекунанд.

Биноба ҳисобҳои Русия ҳазорҳо шаҳрванди ин кишвар ва сокинони Осиёи Марказӣ бо ҳадафи сарнагун кардани режими Сурия ва пуштибони он, Маскав, ба шӯришгарони исломӣ ҳамроҳ шудаанд.

Дар пасманзари "таҳдидҳои солинавӣ" мақомоти Маскав барои ҳимояи сайругаштҳои мардум аз тадбирҳои амниятӣ, бо шумули масдуд кардани роҳҳо ва ҷилавгирӣ аз вуруди эҳтимолии мошинҳои ҳамлагар ба макони ҷашнҳо, кор мегиранд.

Оташбаси Сурия бо даргириҳои ҷудогона риоя мешавад

Оташбаси саросарӣ дар Сурия, бо миёнҷигии Русия ва Туркия, сарфи назар аз даргириҳои ҷудогона, ба сурати умум риоя мешавад.

Хатми даргириҳо соати 12-и шаби 29 декабр (вақти Прага) ҳукми иҷро гирифт ва ин нахустин оташбаси саросарӣ аст, ки баъди шикаст хурдани чунин як талош дар моҳи сентябр дар Сурия ҷорӣ мешавад.

Гурӯҳи нозири ҳуқуқи башари Сурия дар Лондон рӯзи 30 декабр гуфт, ки бахши умудаи кишвар ором буд, аммо ҷангҳои шадид дар байни шӯришгарон ва нерӯҳои ҳукуматӣ дар вилояти Ҳома ҷараён гирифтанд.

Абдул Раҳмон, раҳбари гурӯҳи назоратӣ ба хабаргузории France Press гуфт, ки "як гурӯҳи хурди шӯришгарон ва ҷангиёни содиқ ба онҳо барои вайрон кардани оташбас талош карданд, зеро оташбас ба мавҷудияти онҳо хотима мегузорад".

Раиси ҷумҳури Русия Владимир Путин, шарики калидии президенти Сурия Башор Асад, рӯзи 29 декабр эълон кард, ки ҳукумати Сурия ва мухолифини он ба созишномаи оташбаси саросарӣ дар кишвар имзо гузоштанд.

Путин гуфт, ки санади тадбирҳои риоя шудани оташбас низ имзо шудааст.

Оташбас ба мубориза алайҳи гурӯҳҳои тундраве чун "Давлати Исломӣ" ва " Ал-Нусра", ки ҳоло худро ҷабҳаи "Фотеҳ ал-Шом" ном гузоштааст ва мегӯяд бо Ал Қоида пайванде надорад, пахш намешавад.

Оташбаси саросарӣ ҷанд рӯз баъд аз назорати комили нерӯҳои ҳукуматӣ бар Ҳалаб, дуюмин шаҳри бузурги Сурия, ки қисмати шарқии он аз соли 2012 дар дасти шӯришгарон буд, эълон шуд.

Ҷасади сафири Юнон дар Бразилия ошкор шуд

Рио-де-Жанейро

Пулиси Бразилия мошинеро бо ҷасади сӯхтаи сафири Юнон ошкор кард. Ҳамсари сафир қаблан аз нопадид шудани ӯ ба пулис хабар дода буд. Ба гуфтаи пулис, дипломати Юнон чанд рӯз пеш мошинеро киро кард ва баъдан нопадид шуд. Бори охир Кириакос Амридиси 59 соларо рӯзи 26 декабр дида буданд.

Тавре "Globo.com" - шабакаи телевизионии Бразилия хабар медиҳад, пулис фарзияи рабуда шудани сафирро аз эҳтимол дур медонад, зеро касе барои фидя бо хонаводаи ӯ дар тамос нашудааст.

Кириакос Амиридис аз моҳи январ раҳбари намояндагии дипломатии Юнон дар Бразилия буд ва барои истироҳати солинавӣ ба Рио-де-Жанейро омад. Ин дипломат аз соли 2001 то 2004 дар мақоми консули генералии Юнон дар Рио-де-Жанейро фаъолият кардааст.

Бердимуҳаммадов барои кӯдакон "Can't Stop the Feeling"-ро сароид

Қурбонгулӣ Бердимуҳаммадов, президенти Туркманистон ҳамроҳ бо ду наберааш суруди "Can't Stop the Feeling"-ро, ки оҳанги сарояндаи машҳури амрикоӣ Ҷастин Тимберлейк аст, сароид. Бердимуҳаммадов 28 декабр аз майдони марказии ҷашнҳои солинавӣ дидан кардааст.

Бо таманнои хушбахтиҳои солинавӣ, таътили хуби зимистонӣ, барор дар таҳсил Бердимуҳаммадов гуфтааст, ҳамаи бачаҳоро ояндаи дурахшон интизор аст. Баъди ин вай ба мулоқоти кӯдакони мансабдорон рафтааст.

Дар ин ҷо Бердимуҳаммадов ҳамроҳ бо ду наберааш сарояндагӣ кардааст. Президенти Туркманистон як писар, се духтар ва чаҳор набера дорад. Бердимуҳаммадов аз соли 2007 ба ин сӯ президенти Туркманистон аст.

Равуо миёни ИМА ва Қазоқистон осон шуд

Акс аз бойгонӣ.

Сар аз 29 декабри соли ҷорӣ шаҳрвандони Қазоқистон, ки бо нияти корӣ, шахсӣ ва ё сайёҳӣ қасди сафар ба ИМА-ро доранд, метавонанд раводиди 10-сола дарёфт кунанд. "Ҷорӣ кардани ин навъи виза ба шаҳрвандони Қазоқистону Амрико имкон медиҳад, ки ба муҳлати тӯлонитар сафар кунанд ва аз ҷиҳати ҳуҷҷатгузорӣ ташвиш накашанд", - гуфтааст сафири ИМА дар Қазоқистон Ҷорҷ Крол.

Ба гуфтаи вазорати корҳои хориҷии Қазоқистон арзиши ин навъи виза 160 долларо ташкил медиҳад. Дар ҳамин ҳол, шаҳрвандони ИМА низ метавонанд визаи Қазоқистонро ба муҳлати то 10 сол дарёфт кунанд. Аз ибтидои соли 2016 шаҳрвандони ИМА барои сафарҳои то 30 рӯза ба Қазоқистон дигар эҳтиёҷ ба виза надоранд.

Азми Алишер Усмонов барои таъсисӣ бунёди хайриявӣ дар Ӯзбекистон

Алишер Усмонов.

Алишер Усмонов, миллиардери ӯзбектабори Русия дар суҳбат бо телевизиони "Россия 24" гуфтааст, ки ният дорад, дар Ӯзбекистон бунёди хайриявие таъсис диҳад. Усмонов қаблан низ гуфта буд, мехоҳад барои рушди соҳаи илм, ҳунару варзиш ва ташвиқи тадқиқотҳои илмӣ дар Ӯзбекистон як бунёд ташкил кунад. Дар баробари ин, Усмонов афзудааст, ки дар сурати пешниҳоди мақомоти Ӯзбекистон ҳавасманди сармоягузорӣ дар тарҳҳо низ ҳаст.

"Ҷое хуб аст, ки ба онҷо даъват мешавӣ. Ба фарқ аз дигарон, ман ҷое меравам, ки даъватам мекунанд. Дар сурати ғайр, танҳо чизе, ки мехоҳанд, кумак мекунам. Мехоҳам, дасти кам дар онҷо барои иҷрои тарҳҳое, ки ҳоло дар Москва амалӣ мекунам, як бунёд таъсис диҳам. Албатта, барои ин иҷозат хоҳам пурсид", - изҳор доштааст миллиардер.

Алишер Усмонов рушди Ӯзбекистонро ба раҳбарии президент Шавкат Мирзиёев, ки ба назари ӯ таҷрибаи бузурги идорӣ дорад, мусбат арзёбӣ мекунад. "Борҳо гуфтаам, ки бо ӯзбек буданам ифтихор дорам. Ман фахр мекунам, ки ин сарзамини ман аст. Ҳар чизе, ки аз дастам меояд, барои Ӯзбекистон ва раҳбарияти он омодаам, ки иҷро кунам. Дар ҳама давру замон", - мегӯяд ӯ.

Ёдрас мешавем, ки Алишер Усмонов қудои Шавкат Мирзиёев, президенти тозаинтихоби Ӯзбекистон аст. Ҷияни Мирзиёев - Диёра соли 2009 бо ҷияни Усмонов - Бобур издивоҷ кард. Вале дувумӣ соли 2013 дар натиҷаи садамаи нақлиётие дар шаҳри Тошканд ба ҳалокат расид.

ИМА "ҷавоби" ҳамлаи ҳакерии Русияро дод

Иёлоти Муттаҳидаи Амрико 35 дипломати русро аз Вашингтон ва Сан-Франсиско хориҷ ва алайҳи Русия таҳримҳои нав ҷорй кард кард. Тавре гуфта мешавад, таҳримҳои нав алайҳи Русия дар заминаи ҳамлаи ҳакерӣ ба почтаи электронии Ҳизби демократ қабл аз интихоботи президентии моҳи ноябр дар Амрико амалй мешаванд.

Иёлоти Муттаҳида фаъолияти ду намояндагии дипломатии Русия дар Мэриленд ва Ню-Йоркро, ки ба гуфтаи мақомоти Амрико бо ҳадафи ҷамъоварии истихборот истифода мешуданд, низ манъ мекунад. Ба гуфтаи ББС, дастрасии дипломатҳо ба намояндагӣ соати 12-и шаби ҷумъа мамнӯъ мешавад.

Дипломатҳои "нон грата" бояд дар тӯли 72 соат қаламрави Амрикоро тарк кунанд. Таҳримҳо ба мансабдорони дигар аз панҷ муассисаи Русия, бо шумули Хадамоти амнияти федеролӣ (ФСБ) таъсир хоҳанд дошт.

Соати эълони оташбаси саросарй дар Сурия маълум шуд

Артиши Сурия ҷангро дар саросари ин кишвар шаби 30 декабр қатъ мекунад. Дар изҳороти ҳукумат, ки хабаргузории давлатии SANA нашр кардааст, гуфта мешавад, оташбас бо гурӯҳи террористии "Давлати исломӣ" ва ҷангҷӯёни марбут ба он пахш намешавад.

Дар бораи созиши оташбаси байни Димишқ ва мухолифини мусаллаҳ ва оғози музокироти сулҳ рӯзи 29 декабр президенти Русия Владимир Путин хабар дод.

Дар мулоқот бо Сергей Лавров ва Сергей Шойгу, раҳбарони вазоратҳои хориҷӣ ва дифоъ Владимир Путин, инчунин, гуфт, ки теъдоди нерӯҳои Русия дар Сурияро коҳиш медиҳад.

Ёфтҳои бештар

Гузоришҳои видеоӣ

Ба шаҳраки як замон машҳури Шӯроб чӣ шуд? ВИДЕО
лутфан мунтазир бошед

Феълан кор намекунад

0:00 0:03:01 0:00
XS
SM
MD
LG