Пайвандҳои дастрасӣ

Хабари нав

Хабарҳо

Помпео дар Миср дар пасманзари барномаи хуруҷи ИМА аз Сурия

Миср - Майк Помпео бо Абдул Фаттоҳ ал-Сисӣ. 10 январи 2019

Котиби давлатии ИМА Майк Помпео дар охирин истгоҳи сафараш ба нуҳ кишвари Ховари Миёна ба Миср расид, то шарикони Арабро мутақоид кунад, ки Вашингтон аз минтақа берун рафтанӣ нест.

Помпео рӯзи 10 январ баъди боздид аз Урдун ва Ироқ ба Миср омад. Ӯ талош кард раҳбаронро мутақоид кунад, ки хуруҷи нерӯҳои ИМА аз Сурия ба маънои даст кашидан аз мубориза бо гурӯҳи "Давлати Исломӣ" ва ё сабук кардани фишор ба Эрон нест.

Сафари Помпео ба минтақа дар пасманзари номуайянӣ оиди барономаи маъмурияти Трамп, ки гуфтааст нерӯҳои ИМА аз Сурия хориҷ мешаванд, ҷараён гирифт.

Баъди гуфтугӯ бо Сисӣ Котиби давлатии ИМА дар твиттер навишт, ки мулоқот "созанда" буд. "ИМА аз Миср дар баробари тааҳудаш оиди озодиҳои мазҳабӣ ва мубоиза бо терроризм, ки ба ҳамаи дӯстони мо дар Ховари Миёна таҳдид мекунад, қотеона пуштибонӣ хоҳад кард",- навишт Помпео.

Помпео дар нишасти матбуотии ягҷоя бо вазири хориҷии Миср Самеъ Шукрӣ ба суоли хабарнигорон оиди барномаи берун рафтани нерӯҳои ИМА аз Сурия гуфт, ки Вашингтон нерӯҳоро аз Сурия хориҷ мекунад, аммо мубориза бо гурӯҳи террористии "Давлати Исломӣ"-ро то охир мерасонад.

Пешниҳоди ҳазорҳо доллар барои лонаи хаффош дар шабакаҳои иҷтимоӣ

Лонаи куршапарак

Фаъолони муҳити зисти Узбекистон мегӯянд, музоядаеро, ки ҳаннотон барои фурӯши лонаи хаффош ё куршапарак дар шабакаҳои иҷтимоӣ ташкил кардаанд, хаффошҳоро аз макони зист маҳрум мекунад.

Дар бахшҳои узбекии шабакаҳои иҷтимоӣ ҳоло баҳсҳое идома доранд, ки гӯиё бо дарёфти лонаи хаффош метавон даромади ҳангуфте ба даст овард ва бархеҳо як лонаро аз 5 то 10 ҳазор доллар мехаранд.

Баъзеҳо ба ин гуфтаҳо бовар карда, ба ҷӯстуҷӯи лонаи кӯршапарак пардохтаанд. Онҳое, ки пайдо кардаанд, лонаҳоро аксу навор гирифта, дар шабакаҳои иҷтимоӣ нашр мекунанд.

Фаъоли ташкилоти ҳомии ҳайвонҳо - "Сайёраи зинда" дар шаҳри Тошканд Анастасия Ташилова аз маҳви лонаҳои кӯршапаракҳо ташвиш дорад. "Одамон ба ин гуфтаҳои беасос бовар карда, лонаҳои кӯршапаракҳоро вайрон мекунанд. Ба онҳо бовар накунед. Ин идеяи ҳаннотон ва фиребгарон аст", - мегӯяд Ташилова.

Бархе аз корбарони узбек мегӯянд, аз лонаи кӯршапарак барои табобати бемории саратон дору истеҳсол мешавад. Ҳарчанд дар ин бора иттилои қобили эътимод дастрас нест.

Дар ҳамлаи Толибон дастикам 15 сарбози пулис кушта шуд

Ҷангиёни Толибон

Дар пайи ҳамлаи Толибон ба қаламрави ду вилояти Афғонистон дастикам 15 афсари пулис кушта ва 19 нафари дигар захмӣ шуд. Ин ҳамлаҳо рӯзи 10 январ ҷараён гирифтанд.

Камаш 8 сарбози пулис дар вилояти шимолии Тахор замоне кушта шуд, ки ҷангиёни Толибон ба постгоҳи онҳо ҳамла карданд,- гуфт узви Шӯрои вилоят Мавлавӣ Кароматулло. Ба гуфтаи ӯ, ин ҳамла дар Хоҷа Ғор сурат гирифт ва 14 нафари дигрро захмӣ кард.

Ҳафт афсари дигар дар ҷараёни ҳамла ба постгоҳе дар Бағлон ба ҳалокат расид ва панҷ нафар захмӣ шуд,- гуфт Зариф Зариф узви Шӯрои вилоят.

Толибон то ҳол ин ду ҳамларо шарҳ надодаанд.

Дар пасманзари афзоиши амалиёти нерӯҳои Афғонистон ва ИМА бар зидди фармондеҳони Толибон, ин гурӯҳи мусаллаҳ дар чанд моҳи ахир ҳамлаҳоро ба муассисаҳои давлатӣ афзоиш додааст.

Домоди Отамбоев аз мақоми президентии Федератсияи футбол истеъфо дод

Семетей Султонов

Федератсияи футболи Қирғизистон хабари истеъфои Семетей Султонов, домоди президенти пешини ин кишвар Алмосбек Отамбоевро нашр кард.

"Имрӯз, дар марҳилае, ки тими мунтахаби мо барои дарёфти Ҷоми Осиё талош мекунад, ман тасмим гирифтам. Тасмим хеле муҳим ва масъулиятнок аст дар навбати аввал барои худи ман - ман тасмим гирифтам, ки пеш аз муҳлат курсии президентии Федератсияи футболи Қирғизистонро тарк кунам. Ин тасмим аз қабл омода шуд, ман бо омодагӣ ба ин тасмим расидам, касе маро водор ё фишор наовардааст, ки чунин тасмим гирам", - гуфтааст Султонов.

Семетей Султонов соли 2012 ба мақоми раҳбарии Федератсияи футболи Қирғизистон интихоб шуд. Соли 2016 ӯро дубора ба ин мақом интихоб карданд ва мебоист, то соли 2020 ба федератсия роҳбарӣ кунад. Дар давраи роҳбарии Султонов мунтахаби миллии Қирғизистон дар сатҳи ҷаҳонӣ мавқеашро беҳтар кард. Ба ҷуз ин, мунтахаби Қирғизистон бори аввал ба Ҷоми Осиё-2019 роҳ ёфт.

Семетей Султонов шавҳари яке аз духтарони Алмосбек Отамбоев аст.

Моҳвораи зиддимушакии Русия дар фазо оташ гирифт

Моҳвораи низомии Русия

Моҳвораи "Космос-2430"-и Русия, ки бахши сохтори огоҳисозии ҳамлаи мушакии "Око" буд, дар фазо оташ гирифт. Дар ин бора хабаргузории ТАСС рӯзи 9 январ бо такя ба Фармондеҳии мудофиавии фазоии Амрикои Шимолӣ (NORAD) иттилоъ медиҳад.

Ба иттилои NORAD, моҳвора аз мадор берун шуда, "маҳв гардидааст". Қисматҳои оташнагирифтаи он мумкин аст, рӯзи 5 январ дар минтақаи ҷанубии уқёнуси Ором афтанд.

Рӯзи якшанбеи 6 январ Radio New Zealand дар сомонааш навишт, ки дар фазои ҷазираи Шимолии Зеландияи Нав тӯли чанд сухтани маводеро мушоҳида шудааст. Корбарони шабакаҳои иҷтимоӣ аксҳои оташсӯзиро дар интернет нашр карданд.

"Космос - 2430" рӯзи 23 октябри соли 2007 ба мадор расид. Ин моҳвора то соли 2012 дар хизмат буд.

Ҳоло Русия низоми нави мудофиаи кайҳониро роҳандозӣ мекунад. Ин моҳвораи "Тундра" аст, ки нахустин намунааш соли 2015 ба мадори замин бароварда шуд.

Донишмандон сарчашмаи мавҷҳои номаълумро меҷӯянд

Акс аз бойгонӣ.

Мунаҷҷимон дар Канада туғёни мавҷҳои асроромези радиоеро ташхис кардаанд, ки хориҷ аз манзумаи офтобӣ омадаанд. Онҳо дар ин бора бо нашри ду таҳқиқе дар маҷаллаи мӯътабари илмии “Nature” рӯзи 9-уми январ хабар доданд.

Дар таҳқиқ омадааст, ки маълум нест, сарчашмаи туғёни мавҷҳои қавӣ аз куҷост ва чӣ онҳоро ба вуҷуд меорад. Панҷоҳ мунаҷҷим аз 5 муассисаи таҳқиқотӣ ин мавҷҳоро таҳқиқ кардаанд.

Туғёни такрории мавҷҳои баландсуръати радиоро, ки як сония ҳам давом намекунанд, соли гузашта ҳангоми озмоиши телескопи бузурги CHIME ошкор кардаанд. Радиотелескопи қавитарини ҷаҳон, ки баробар ба як майдони футбол аст, ба таҳқиқи мавҷҳои нав машғул мешавад.

Муҳаққиқон ҳадс мезананд, ки туғёни мавҷҳои номаълум мумкин аст, дар натиҷаи гардиши сахти ситораҳои нейтронӣ, ба ҳам омехта шудани ду ситораи нейтронӣ ва ё ҳатто мавҷи киштии кайҳонии махлуқони осмонӣ бошад.

Бердимуҳаммадов ба нашри зарбулмасалҳои кишоварзӣ дастур дод

Бердимуҳаммадов дар иҳотаи варзишгарон - 18 август, 2017

Қурбонгулӣ Бердимуҳаммадов, президенти Туркманистон дастур дод, ки "суханҳои пурҳикмати гузаштагон, ки миёни мардум маҳфуз мондаанд", ҷамъоварӣ ва дар шакли маҷмуа нашр шавад.

Дастури Бердимуҳаммадов дар як ҷаласае марбут ба баррасии бахши кишоварзӣ садо дод. Президенти Туркманистон дар он ҷаласа гуфт "анъанаҳои миллии кишоварзӣ" рушд дода шаванд.

"Президент ба ноиби сарвазир супориш дод, ки суханҳои пурҳикмати ҷамъоварии ҳосил ва дар шакли маҷмуа нашр шаванд", - хабар доданд расонаҳои Туркманистон.

Президенти Туркманистон дар паёми солинавиаш, бо такя ба боварҳои мардумӣ, барои туркманҳо дар соли 2019 ваъдаи фаровонӣ дод.

Дар нимаи дуюми соли гузашта сокинони Туркманистон ба камбуди орду равған рӯ ба рӯ шуда, мақомот барои фурӯши маҳсулот лимит ҷорӣ карданд.

Охирин раиси Шӯрои олии СССР Анатолий Лукянов даргузашт

Анатолий Лукянов

Охирин раиси Шӯрои олии СССР Анатолий Лукянов дар синни 88-солагӣ баъди бемории вазнин дар Маскав даргузашт. Дар ин бора духтари Лукянов -- Елена ба хабаргузории РБК иттилоъ додааст.

Лукянов соли 1930 дар Смоленск ба дунё омад. Соли 1943 корро дар корхонаи дифоӣ оғоз карда, соли 1953 факултети ҳуқуқшиносии Донишгоҳи давлатии Москваро хатм намуд. Баъди хатми донишгоҳ дар ниҳодҳои гуногуни ҳукуматӣ фаъолият дошт ва соли 1961 корро дар дастгоҳи Шӯрои олии СССР оғоз кард.

Лукянов соли 1990, пас аз президенти СССР интихоб шудани Михаил Горбачев раисии Шӯрои олиро бар зимма гирифт. Ӯ соли 1991 дар ташкили ГКЧП ё ошӯби зидди Горбачев иштирок дошт ва баъди он боздошт шуд.

Соли 1994 ӯро авф карданд. Лукянов пас аз озодии худ, солҳои 1994-2000 дар Кумитаи марказии Ҳизби коммунистии Русия кор мекард.

Қазоқистон 47 шаҳрвандашро аз Сурия бозпас овард

Фурӯдгоҳи байналмилалии Остона

Остона мегӯяд, ки 47 шаҳрванди Қазоқистон, аз ҷумла 11 зан ва 30 кӯдакро аз Сурия ба ватан бозпас овард. Бештари кӯдакон аз 1 то 5 сол доранд,

"Онҳоро бо роҳи фиреб ба ин кишвари ҷангзада бурданд, дар дасти террористҳо асир буданд", омадааст, дар изҳороти расмӣ. Ба гуфтаи мақомоти Остона, ин шаҳрвандон дар давоми як моҳ аз марҳилаҳои мутобиқсозӣ мегузаранд ва бо ёрии зарурии тиббӣ таъмин мешаванд

Дар наворе, ки нашр шуд, афроде дар либоси низомӣ занону кӯдаконро ба ҳавопаймо савор мекунанд. Дар охир фурудоии ҳавопаймо дар Қазоқистон нишон дода мешавад.

Бино ба иттилои Кумитаи давлатии амнияти милии Қазоқистон, аз аввали нооромиҳои Ховари Миёна ҳудуди 800 шаҳрванди ин кишвар ба Ироқу Сурия рафтаанд. Бештари онҳо кӯдакон буданд.

"Бино ба омори моҳи июли соли 2018, дар сафи гуруҳҳои даҳшатафкан дар Ироқу Сурия 120 мард, беш аз 250 зан ва 500 кӯдаки ноболиғи қазоқ ҳузур доранд", - омадааст дар иттилоияи кумита.

Кумитаи ҳифзи кӯдакони Вазорати маориф ва илми Қазоқистон 19 декабр хабар дод, ки тайи 2 соли охир 91 кӯдак аз Сурия ба кишвар оварда шуд.

Чин ба ду ҳазор қазоқтабор иҷозат дод аз Шинҷон хориҷ шаванд

Бинои Вазорати корҳои хориҷии Қазоқистон

Мақомоти Қазоқистон гуфтанд, ки Пекин ба беш аз ду ҳазор қазоқтабор иҷозаи хуруҷ аз минтақаи Шинҷони Чинро додааст.

Мақомоти Шинҷон пештар аз ин маъракаи густардаеро бо ҳадафи бозтарбия шуруъ карданд. Дар урдугоҳҳои бозтарбия, ки Пекин онҳоро "марказҳои бозомӯзии касбӣ" унвон мекунад, бештар аз як миллион одамро нигаҳ дошта мешаванд.

Онҳое, ки муддате дар ин урдугоҳҳо нигаҳдорӣ шудаанд, гуфтанд, баъди боздошт ва интиқол ба урдугоҳҳо аз онҳо талаб шудааст, аз фарҳанг ва дидгоҳҳои мазҳабии худ даст кашанд.

Вазорати корҳои хориҷии Қазоқистон дар як изҳороте, ки 9 январ нашр кард, иттилои расонаҳоро дар бораи иҷозаи хуруҷи бештар аз 2 ҳазор қазоқтабор аз Чин тасдиқ кард. Вазорати корҳои хориҷии Қазоқистон гуфт, онҳо метавонанд, ба маҳзи вориди Қазоқистон шудан, барои дарёфти шаҳрвандӣ муроҷиат кунанд.

Курдҳо як ҷангҷӯи 22-солаи тоҷикро дар Сурия дастгир кардаанд

Нерӯҳои курд дар Сурия аз боздошти Муҳаммад Давлат (Абу Мусаъаб Тоҷикӣ), шаҳрванди 22-солаи Тоҷикистон ва узви гуруҳи тундрави "Давлати исломӣ", хабар доданд.

Ҳамроҳ бо ӯ ҳафт ҷангҷӯи дигари ДИИШ дастгир шудаанд.

Вебсайти нерӯҳои худдифои курдҳои Сурия рӯзи 9-уми январ навишт, ҷангҷӯёни гуруҳи "Давлати исломӣ" қасди ҳамла ба мардуми осоиштаро доштанд ва "рӯзҳои 6 ва 7-уми январ дар ҷараёни амалиёт дар шаҳри Ҳоҷини Дейр-аз-Зор ба даст афтоданд".

Бино ба феҳрасте, ки курдҳои Сурия нашр карданд, дар қатори Муҳаммад Давлат, номи Одил Раҳимов (Абу Оминаи Узбекӣ) Фарҳод Қодиров (Абу Билоли Узбекӣ) аз Узбекистон, Аскар Зарманбетов (Абу Довуд) аз Украина, Сотибек Ошибоев (Абу Руқия) аз Қазоқистон, Бекҷон Бимурзаев (Абу Соро) аз Русия, Сулай Нӯҳ Су (Абу Сулаймон Ал Амрикӣ) аз Амрико ва Лукас Глеб (Абу Иброҳим Ал Олмонӣ) аз Олмон сабт шудааст.

Дар ин миён Абу Сулаймон Ал Амрикии 16-сола ноболиғ буда, боқимонда аз 22 то 58-солаанд.

Мақомоти Тоҷикистон мегӯянд, бино ба ҳисоби онҳо то моҳи сентябри соли гузашта тақрибан 1900 шаҳрванди кишвар ба Ироқу Сурия рафта, ба сафи гуруҳи тундрави “Давлати исломӣ” пайвастаанд. То кунун даҳҳо нафари онҳо дар ҷараёни даргириҳо кушта шудаанд.

Гурӯҳи тундрави "Давлати исломӣ" дар соли 2014 дар Сурия ва Ироқ иддаои хилофат кард ва замоне назорати аз се як ҳиссаи қаламрави Ироқ ва бахшҳои калоне аз Сурияро дар ихтиёр дошт.

Соли гузашта нерӯҳои ироқӣ дар амалиётҳои пайдарпай онҳоро аз минтақаҳои зери назорат берун ронданд ва дар Сурия низ нуфузи онҳо ба шакли қобили мулоҳиза коҳиш ёфт.

Сафари Халилзод ба Афғонистон шуруъ шуд

Залмай Халилзод,

Залмай Халилзод, фиристодаи хоси Амрико барои Афғонистон бо ҳадафи шуруи музокироти сулҳ бо Толибон сафари дуҳафтаинаеро ба Кобул ва дигар кишварҳои минтақа шуруъ кард.

Сафари ӯ рӯзи 8-уми январ оғоз ёфт ва дар рӯзе, ки намояндагони Толибон гуфтанд, дар мулоқотҳои барномарезишуда дар бораи сулҳ дар рӯзҳои 9-ва 10-уми январ бо Халилзод ва дигар мақомоти амрикоӣ ширкат намекунанд.

Қарор аст, фиристодаи Амрико ба Чину Покистон ва Ҳинд сафар кунад ва ин сафар то 21-уми январ идома меёбад. Залмай Халилзод моҳи декабр бо намояндагони Толибон дар шаҳри Абузабӣ мулоқот дошт.

Як намояндаи ин гуруҳ дар Қатар ба Радиои Афғонистон Озод гуфтааст, ки то замони машварати оянда ва ҳалли масъалаи рузномаи мулоқот музокирот бо Халилзодро ба таъхир андохтаанд.

Як манбаи дигари Толибон гуфтааст, ки Амрико мехоҳад, намояндагони ҳукумати Афғонистон дар ин музокирот ширкат кунанд, дархосте, ки Толибон пайваста рад кардаанд.

Узбекистон раиси ширкати "Зеромакс"-ро озод кард

Миродил Ҷалолов

Мақомоти Узбекистон Миродил Ҷалолов, мудири ширкати “Зеромакс”- ро баъди 7 соли боздошти бидуни муҳокима озод кардаанд. Ҳамсари ӯ Фотима Ҷалолова ба Радиои Озодӣ гуфт, шавҳарашро рӯзи 8-уми январ баъди муҳокимаи якрӯзаи додгоҳӣ аз боздоштгоҳи Тошканд раҳо карданд. Вай афзуд:

Имрӯз ӯро озод карданд, ҳамон лаҳза хона омад. Мо бисёр хурсандем. Тақрибан 8 сол дар зиндон буд. Ман барои озодии шавҳарам аз раҳбари кишвар Шавкат Мирзиёев бисёр сипосгузорам.

Ӯро ба тақаллуби молӣ ва аз худ кардани моликияти ғайр гунаҳкор донистаанд ва додгоҳ амр додааст, ки 2 ҳазор доллар ҷарима бипардозад.

Миродил Ҷалоловро соли 2010 боздошт карданд ва ширкаташро, ки дар Швейтсария сабти ном шуда буд, бастанд. Баъдан гуфта шуд, ки ширкатро Гулнора Каримова, духтари раиси ҷумҳури собиқи Узбекистон ба номи худ кардааст.

Ширкатро аввал дар Амрико дар соли 1999 таъсис додаанд ва бино ба гузоришҳо онро шарикони Ғафур Раҳимов, раиси Иттиҳодияи Байналмилалии Бокс таъсис додааст. Ин фардро вазорати молияи Амрико, “як ҷинояткори асосӣ” дар Узбекистон номида ва аз қочоқбарони асосии маводи мухаддир номидааст. Ширкати “Зеромакс” чанд сол бузургтарин кордиҳанда ва сармоягузор дар Узбекистон буд.

Ширкати Apple истеҳоли iPhone-ҳои навро маҳдуд мекунад

iPhone X

Ширкати Apple истеҳсоли iPhone-ҳои навро то 10 дар сад коҳиш медиҳад. Сомонаи Nikkei рӯзи 9-уми январ навишт, ки ширкат аз пойгоҳҳои таъминкунанда истеҳсоли камтари телефонҳои ҳамроҳи навъи XS Max, XS ва XR-ро дархост кард.

Дар Apple ин хабарро шарҳ надоданд.

Ин дувумин мавриди коҳиши истеҳсоли таҷҳизоти ширкат дар як соли охир аст. Моҳи ноябри соли 2018 Apple тавлиди iPhone XR-ро маҳдуд карда буд.

Аввали моҳи январи соли 2019 Apple аз кам шуданаи даромадаш хабар дод, ки дар 16 соли ахир собиқа надоштааст. Бинобар гузориш, даромади ширкат дар се моҳи аввали соли гузашта аз 89-93 миллиард то 84 миллиард коҳиш ёфт. Дар рӯзи пахши гузориш қимати саҳмияҳои Apple 9 дар сад поён рафт.

Моҳи августи соли гузашта ширкати Apple триллион доллар арзиш дошт ва гаронтарин дар ҷаҳон ҳисоб мешуд. Ҳоло Apple дар ҷойи чаҳорум қарор дорад ва ҷойи аввалро ба Amazon дод.

Коҳиши қимати Apple-ро ба мустаҳкам шудани доллар ва ҷанги тиҷоратӣ дар байни Амрикову Чин рабт медиҳанд. Бахши умдаи корхонаҳои ин ширкат дар Чин ҷойгир шудаанд. Ба ғайр ин, коҳиши рушди иқтисоди Чин низ ба кам шудани талабот ба маҳсулоти Apple сабаб шудааст.

Вазири пешини Исроил барои ҷосусӣ ба фоидаи Эрон 11 сол дар зиндон мемонад

Гонен Сегев, вазири кобинаи Исроил, ки ба ҷосусӣ муттаҳам шуд

Вазири собиқи энергетикаи Исроил Гонен Сегев иттиҳоми ҷосусӣ ба фоидаи Эронро эътироф кард.

Ӯ бо тафтишот созиши қабл аз додгоҳӣ имзо кард ва бар пояи он ба 11 соли зиндон маҳкум мешавад. Додгоҳ ин созишро бояд моҳи феврал тасдиқ кунад. Дар ин бора сомонаи newsru.co.il рӯзи 9-уми январ хабар дод.

Ба маълумоти тафтишот, вазири пешин аз тарафи афсари истихбороти Эрон, ки соли 2012 дар сафорати ин кишвар дар Нигерия ба таври махфӣ кор мекард, истихдом шуд. Сиёсатмадор баъди истихдомаш, бо он ки Эрон шаҳрвандони Исроилро ба қаламраваш роҳ намедиҳад, ду дафъа ба Эрон рафт.

Гонен Сегеев барои дарёфти маълумоти мавриди таваҷҷуҳи истихбороти Эрон бо исроилиҳое, ки бо дипломатия, мудофиа ва истихборот рабт дошанд, тамос барқарор кард. Аммо мақомоти махсуси Исроил мегӯянд, ки ӯ натавонист маълумоти муҳим дастрас кунад.

Бонки Ҷаҳонӣ гуфт, коҳиши иқтисоди дунё бештар аз интизорот аст

Бонки Ҷаҳонӣ пешгӯияшро дар робита ба рушди иқтисоди дунё дар соли 2019 аз рушди 3 дар сад ба 2,9 дар сад поён овард.

Тамоюли коҳиши иқтисод ба Русия таъсир дорад, ки маҷмаи маҳсулоти дохилиаш то якуним дар сад боло хоҳад рафт. Ин 0,3 дар сад камтар аз пешгӯиест, ки Бонки Ҷаҳонӣ моҳи июли соли гузашта карда буд.

Ин муассисаи молӣ дар гузорише, ки рӯзи 8-уми январ бо номи "Дурнамои рушди иқтисоди ҷаҳон" пахш шуд, коҳиши сатҳи тиҷорати байналмилалӣ, кам шудани сармоягузорӣ ва афзоиши ташаннуҷ дар робитаҳои тиҷоратиро пешгӯӣ мекунад.

"Кунд шудани ислоҳоти сохтории Озарбойҷон, Арманистон, Беларус, Туркия ва Украина сатҳи номуайянии сиёсиро боло мебарад ва ташаннуҷ дар атрофи Сурия ва Украина матавонад таҳримҳои нав ва, ҳамин тавр, нобоварӣ ба минтақаро ба миён биёрад.

Дар пешгӯии нави Бонки Ҷаҳонӣ қимати нафт поин нишон дода шуд.

Интизор меравад, ки дар солҳои 2019-2020 нархи як бушка нафт ба ҳисоби миёна 67 доллар хоҳад буд, ки ду доллар камтар аз пешгӯии моҳи июни соли гузашта аст.

Полковники СНБ-и Узбекистон 16 сол ҳукми зиндон гирифт

Нодир Турқулов

Сардори пешини Идораи тафтишотии Хадамоти амнияти миллии Узбекистон (СНБ) полковник Нодир Турақулов барои 16 сол аз озодӣ маҳрум ва 81 миллион сӯм (беш аз $9,7 ҳазор) ҷарима шуд. Ҳукм зоҳиран охири соли гузашта баромад, аммо ин хабар нав расонаӣ шуд.

Раҳбари созмони ҳомии ҳуқуқи "Эзгулик" Абдураҳмон Ташанов, ки дар робита ба ин парванда бо қурбониён ва муфаттишон суҳбат кардааст, гуфт, "Додгоҳи олии Узбекистон Турақуловро бар асоси беш аз 10 банд, аз ҷумла сӯистифода аз мақом, порагирӣ ва қаллобӣ муҷрим эълон кард".

Ҳамроҳ бо Турақулови 42-сола 12 нафари дигар бо шумули маъмурони пешини Хадамоти амнияти миллӣ, додситонӣ ва пулиси Узбекистон зиндонӣ шудаанд.

Ба гуфтаи Ташанов, бар зидди Турақулов бар асоси беш аз 10 банди дигари Кодекси ҷиноии Ӯзбекистон парвандаи дувум боз шудааст.

Полковники пешини Хадамоти амнияти миллии Узбекистон Нодир Турақулов 22 январи соли гузашта дар шаҳри Тошканд дастгир шуда буд. Ҳамсари ӯ духтари бародари додситони кулли пешини Узбекистон Рашид Қодиров аст. Худи Қодиров низ дар ҳабс аст.

Беш аз 20 сарбози Афғонистон дар наздикии марзи Туркманистон кушта шуд

Марзи Туркманистон бо Афғонистон.

Ба иттилои манобеи расмӣ, ҷангҷӯёни "Толибон" ба дидбонгоҳҳои амниятӣ дар ғарби Афғонистон ҳамла ва 21 корманди пулисро куштаанд.

Ба гуфтаи мақомоти давлатӣ, ҳамла шаби 6 январ дар ду дидбонгоҳи мухталифи вилояти Бодғис сурат гирифт, ки бо Туркманистон ҳаммарз аст.

Абдулазиз Бақо, раиси шӯрои вилояти Бодғис гуфт, 21 корманди пулис кушта ва 9 тани дигар маҷруҳ шуд.

Ҳамзамон дар ин ҳамла 15 тан аз ҷангҷӯёни толиб кушта ва 10 каси дигар ҷароҳат бардоштааст.

Дар ҳамин ҳол Қори Юсуф Аҳмадӣ, сухангӯи толибҳо иддао кард, ки ҷангҷӯён 34 тан аз кормандони мақомоти амниятиро кушта ва аслиҳаи зиёдеро бо худ бурдаанд.

СММ ба духтари фирории саудӣ мақоми паноҳандагӣ дод

Раҳаф ал-Кунун бо мақомоти муҳоҷирати Таиланд

Созмони Милали Муттаҳид шаҳрванди Арабистони Саудӣ Раҳаф Муҳаммад ал-Қунуни 18-соларо, ки аз хонаводаи худ фирор кардааст, паноҳанда эътироф кард.

Дар ин бора намояндагони Вазорати умури дохилии Австралия хабар доданд, ки Оҷонси СММ дар умури паноҳандагон ба онҳо муроҷиат карда буд. Ҳукумати маҳаллӣ низ гуфт, "муроҷиатро ба шакли муқаррарӣ баррасӣ хоҳад кард".

Пештар духтари саудӣ гуфта буд, ки ӯ раводиди Австралияро дошт ва мехост, аз ин кишвар дархости паноҳандагӣ кунад. Бародару падари духтар дар Тайланд қарор доранд, вале Раҳаф мулоқот бо онҳоро рад кард.

Ал-Қунун 5 январ аз Кувайт, ки ҳамроҳи хонаводааш ба онҷо рафта буд, фирор кард ва мехост, аз тариқи Таиланд ба Австралия сафар кунад. Вале ба маҳзи фуруд омаданаш дар шаҳри Бангкок кормандони сафорати Арабистони Саудӣ шиносномаи ӯро гирифтанд. Дипломати саудӣ гӯё ба Раҳаф гуфтааст, ки хонаводааш розӣ нестанд, ки ӯ ба Австралия сафар кунад, бинобар ин, бояд ба Кувайт баргардад.

Духтар дертар дар меҳмонсарои фурудгоҳи Бангкок худро бандӣ кард, то ба Кувайт ихроҷаш накунанд. Мақомоти Таиланд баъд аз як шабонарӯзи гуфтугӯ эълон карданд, ки ӯро ба Кувайт ихроҷ намекунанд. Духтар ҳамроҳ бо намояндагони СММ фурудгоҳро тарк кард.

Раҳаф дар суҳбат бо Би-би-сӣ изҳор дошт, ки аз Ислом рӯй гардондааст ва дар сурати бозгашташ ба хона "ӯро марг мунтазир аст".

Дар Арабистони Саудӣ бо вуҷуди баъзе аз сабукиҳо занон ҳанӯз ҳам бо маҳдудиятҳои сахт рӯбарӯянд.

Боздиди дипломатҳои Осиёи Марказӣ аз минтақаи Шинҷони Чин

Қирғизҳои Чин

Як гуруҳи дипломатҳои хориҷӣ, аз ҷумла намояндагони кишварҳои Осиёи Марказӣ аз 28 то 30 декабри соли 2018 бо даъвати ҳукумати минтақаи худмухтори Чин – Шинҷон ба шаҳрҳои Урумчӣ, Кошғар ва Хутан сафар карданд.

Ба маълумоти Вазорати умури хориҷии Қирғизистон, ба гуруҳи дипломатҳо намояндагони 12 кишвар, аз ҷумла Қирғизистон, Қазоқистон, Русия, Тоҷикистон, Узбекистон, Афғонистон, Ҳиндустон, Индонезия, Кувайт, Малайзия, Покистон ва Тайланд шомил буданд.

Дипломатҳо дар онҷо бо рушди иҷтимоиву иқтисодии минтақа, маконҳои фарҳангӣ, муассисаҳои таълимӣ, масҷиду бозор ва иншооти дигари он шинос шуданд. "Дар ҷараёни боздид намояндагони сафоратхонаҳо бо донишҷӯёни муассисаҳои таълимӣ суҳбат карда, бо вазъу шароити онҳо ошно шуданд", - омадааст дар иттилоияи вазорат.

Ба иттилои расонаҳо, дипломатҳои хориҷӣ ҳамчунин аз урдугоҳҳои ба истилоҳ "марказҳои бозомӯзии сиёсӣ"-и Чин дидан кардаанд, вале Вазорати умури хориҷии Қирғизистон дар ин бора маълумот надод.

Дар бораи ташкили марказҳои мазкур дар Шинҷон ва боздошту нигаҳдории намояндагони ақалиятҳои миллии мусулмон дар онҳо бори аввал соли 2017 хабар дода шуд.

Шоҳидон, инчунин созмонҳои ҳомии ҳуқуқ мегӯянд, дар ин урдугоҳҳо одамонро иҷборан нигаҳдорӣ ва нисбати онҳо муносибати бераҳмона мекунанд. Вале Пекин ин иддаои расонаҳои хориҷӣ ва ҳомиёни ҳуқуқро як навъ "туҳмат" меномад.

Сафири Тоҷикистон дар Ироқ расман ба кор сар кард

Зубайдулло Зубайдов

Зубайдулло Зубайдов – сафири Тоҷикистон дар Кувайт – ҳамзамон ба ҳайси намояндаи кишвар дар Ироқ ба кор сар кард.

Ӯ рӯзи 8-уми январ эътимодномаашро ба мақомоти Вазорати корҳои хориҷӣ ва дастгоҳи раёсати ҷумҳурии Ироқ таслим намуд.

Равобити дипломатии Тоҷикистону Ироқ соли 1995 оғоз ёфтааст, вале ҳарду кишвар дар қаламрави якдигар сафорати худро надоранд.

Сафири Тоҷикистон дар Ироқ дар ҳоле ба кор оғоз кардааст, ки даҳҳо зану кӯдаки тоҷик дар паноҳгоҳҳо дар Бағдод мондаанд. Қаблан мақомот аз роҳҳои гуногун баъзе аз онҳоро ба кишвар оварда буданд.

Зубайдулло Зубайдов соли 2013 сафири Тоҷикистон дар Кувайт таъйин шудааст. Ӯ қаблан намояндаи расмии Тоҷикистон дар Покистон буд.

Трамп дар паёми телевизиониаш аз девори амниятӣ пуштибонӣ кард

Доналд Трамп

Президенти ИМА Доналд Трамп дар нахустин паёми телевизиониаш вазъ дар марзи Амрико ва Мексикаро буҳрони ҷиддии башарӣ номид.

Ӯ аз қонунгузорҳои амрикоӣ даъват кард, ки бунёди девор дар марзи Мексикаро сармоягузорӣ кунанд ва ба "чархаи бепоёни ранҷ" хотима гузоранд. .

Ба гуфтаи президент дар марзҳое ҷанубӣ деворе зарур аст, ки аз қочоқи маводи мухаддир, қисман ба воситаи Мексика, ҷилвгирӣ кунад. Бунёди девор ҳамчунин пеши роҳи убури ғайриқонунии садҳо ҳазор муҳоҷири ғайриқонуниро, ки дар байни онҳо ҷинояткорон кам нестанд, мегирад. Ҳазорҳо амрикоӣ қурбонии муҳоҷироне шуданд, ки ба таври ғайриқонунӣ ба ИМА омаданд,- гуфт Доналд Трамп.

Трамп демократҳоро, ки ба сармоягузории девор мухолифат доранд, дар риёкорӣ айбдор кард ва аз онҳо пурсид, ки чаро дар атрофи хонаҳои худ девор бунёд кардаанд? "На барои он ки шахсони дар пушти девор бударо бад мебинанд. Барои он сохтанд, ки шахсони дар дохил бударо дӯст медоранд", - изҳор дошт Трамп.

Пештар Трамп аз Конгресс барои бунёди девор 5,7 миллиард доллар дархост кард. Вале демократҳои Конгресс ин тарҳро рад карданд. Дар натиҷа фаъолияти баъзе аз муассисаҳои давлатӣ қатъ шуда, вазъи ба истилоҳ "шатдаун" ҳафтаи севум аст, идома дорад.

Маъмурияти президенти ИМА эълони ҳолати изтирорӣ аз ҷониби президентро соқит намекард. Ин ба Трамп имкон медод, ки бидуни қабули тарҳ бунёди деворро оғоз кунад. Вале президенти ИМА аз фикраш баргашт ва хост, ки ақидаи ҷомеаро ба фоидаи худ шакл диҳад. Дар ҳоли ҳозир, бар асоси назарсанҷиҳо, аксари амрикоиҳо ба тарҳи бунёди девор бо шубҳа менигаранд.

Раҳбари Палатаи намояндагон Нэнси Пелосӣ ва раиси ақалиятҳои демократи Сенат Чак Шумер президентро ба ин айбдор карданд, ки мехоҳад, миллиардҳо долларро ба бунёди девори нодаркор сарф кунад ва миллионҳо хидматчии давлатиро, ки ҳоло бемаош мондаанд, ба гаравгони идеияи табдил диҳад. Раҳбарони демократҳо изҳороти Трампро дар бораи буҳрон дар марзи ҷанубии кишвар рад карданд.

Тарҳи бунёди девор дар марзи ИМА бо Мексика яке аз ваъдаҳои асосии Доналд Трамп дар маъракаҳои интихоботияш буд. Он замон ӯ таъкид мекард, ки пули деворро аз Мексика меситонад, вале мақомоти Мексика аз оғоз гуфтанд, ки барои девор пул намедиҳанд.

Мӯи сари Бердимуҳаммадов дар як сол "хокистарӣ" шуд

Қурбонгулӣ Бердимуҳаммадов

Идораҳои давлатии Туркманистон, бо шумули мактабҳо, муваззаф шуданд, ки аксҳои президент Қурбонгулӣ Бердимуҳаммадовро иваз кунанд. Дар ин бора бахши туркмании Радиои Озодӣ рӯзи 7 январ хабар дод. Кормандони давлатӣ муваззаф шуданд, ки ба ҷойи аксҳои Бердимуҳаммадов бо мӯйҳои сиёҳ акнун тасвири ӯро бо мӯйҳои хокистарӣ ё сиёҳу сафед харидорӣ кунанд. Аксҳои соли гузашта, ки дар онҳо президент мӯйи комилан сиёҳ дорад акнун бо нархи арзонтар ба фурӯш мераванд.

Тавре хабарнигори Озодӣ аз Туркманистон менависад, тасвирҳои президент дар мактабҳо охири ҳафтаи гузашта иваз шуд. Тасвирҳои Бердимуҳаммадов дар муассисаҳои Туркманистон ба тавари муназзам нав карда мешаванд.

Ҳамаи муассисаҳои давлатӣ, бо шумли бемористонҳо, макотиб, истироҳатгоҳҳо, вазоратҳо, ҳукуматҳои маҳаллӣ, ниҳодҳои интизомӣ, муассиcаҳои варзишӣ ва ҳатто ҳавопаймоҳо бояд портрети президентро дошта бошанд.

Акси Бердимуҳаммадови сиёҳмӯй акнун арзон фурухта мешавад
Акси Бердимуҳаммадови сиёҳмӯй акнун арзон фурухта мешавад

Сар аз августи соли гузашта президенти Туркманистон Бердимуҳаммадов бо мӯйҳои хокистарӣ дар мазҳари ом пайдо шуд. Ӯ то расидан ба қудрат дар соли 2006 мӯйҳои сафед дошт,- мегӯяд нашрия.

Акси президент бо мӯйҳои хокистарӣ 5 манат - 95 рубли русӣ ва акси ӯ бо мӯйҳои сиёҳ 4 манат - 76 рубл нарх дорад.

Моҳи марти соли 2018 мақомоти амнияти вилояти Дашоғузи Туркманистон бо рейдҳои ногаҳонӣ ба хонаи сокинон даромаданд, то бубинанд, ки мардум акси президентро ба ҷойи коғази ташноб истифода накунад.

Охири соли 2017 якчанд талабаи мактаб дар ин вилоят барои таҳқири президент боздошт шуданд. Ба гуфтаи манбаи бахши туркмании Радиои Озодӣ талабаҳо аз 3 то 4 сол зиндонӣ шуданд.

ИМА мехоҳад, ки хуруҷи нерӯҳо аз Сурия ба курдҳо зарба назанад

Ҷон Болтон

Ҷон Болтон, мушовири амнияти миллии президент Доналд Трамп, рӯзи 8-уми январ суолҳои марбут ба хуруҷи нерӯҳои ИМА аз Сурияро бо мақомоти Туркия дар Анкара матраҳ кард. Рӯзи сешанбе Болтон бо Иброҳим Калин, мушовири аршади президенти Туркия Раҷаб Таййиб Эрдуғон, дидору гуфтугӯ дошт.

Сухангӯи Шурои амнияти миллии Амрико Гаретт Маркиз дар як изҳорот гуфт, ки тарафҳо мавзӯҳои минбаъдаи муколамаро муйаян карданд ва Иёлоти Муттаҳида машваратҳои низомиро интизор аст.

Ҳеҷ маълумот дар бораи мулоқоти Болтон бо вазири дифои Туркия Ҳулуси Акар дастрас нашудааст.

Ҷон Болтон гуфт, Амрико мехоҳад мутмаин бошад, ки Туркия ба курдҳои Сурия, яъне шарики Иёлоти Муттаҳида ҷанги зидди гурӯҳи террористии "Давлати исломӣ", ҳамла намекунад.

Ӯ гуфт, "шарт"-и амалишавии барномаи Трамп барои хуруҷи нерӯҳо аз Сурия ҳамин аст.

Сафари Болтон баробар бо сафари котиби давлатии Амрико Майк Помпео ба минтақа ҷараён мегирад. Трамп рӯзи 19-уми декабри соли 2018 ногаҳон эълон кард, ки нерӯи 2-ҳазорнафарии ИМА аз Сурия хориҷ мешавад. Қарори Доналд Трамп шарикони Амрикоро ҳайрон кард ва ба дунболи ин раҳбари Пентагон Ҷеймс Мэттис истеъфо дод.

Мақомоти Амрико ва дигарон аз ин нигаронанд, ки бо хуруҷи нерӯҳои ИМА аз Сурия вазъ ноором мешавад ва Туркия дастаҳои курдро маҳв мекунад.

Мурофиаи додситони пешини Узбекистон пушти дарҳои баста мегузарад

Додситони пешини Узбекистон Рашидҷон Қодиров

Додгоҳи ноҳияи Юнусободи Тошканд рӯзи 7 январ баррасии парвандаи пурсарусадои додситони кулли пешини Узбекистон Рашид Қодировро оғоз кард. Ба гуфтаи як мансабдори узбек, парвандаи Қодиров пушти дарҳои баста баррасӣ мешавад.

"Додраси парванда муовини раиси Додгоҳи шаҳри Тошканд Акбар Туробов аст. Дар бораи ҷузъиёти муҳокима ҳатто ба хешони гумонбарон хабар дода намешавад. Дақиқан гуфта наметавонам, ки дар мурофиаи имрӯза чанд гумонбар ҳузур дорад. Тахминан 15 нафар буданд. Пеш аз оғози он ба назди бинои додгоҳ мошини "Ёрии таъҷилӣ" омад, ки зоҳиран Мирғулом Мирзоев низонҷо буд”, - гуфт ҳамсуҳбати мо.

Мирғулом Мирзоев, муовини собиқ додситониТошканд, ки дар давраи раҳбарии президенти пешин Ислом Каримов яке аз чеҳраҳои таъсиргузори Узбекистон ҳисоб мешуд, моҳи феврали соли 2018 бо ҷурми сӯистифода аз мақом ва гирифтани пора дар ҳаҷми махсусан калон дастгир шуд. Тирамоҳи соли гузашта хабар расид, ки ӯ ба бемористони Вазорати умури дохилии Узбекистон интиқол ёфтааст.

Рашид Қодирови 66-сола, ки 15 соли ахир додситони кулли Узбекистон буд, моҳи апрели соли 2015 аз мақом барканор ва 22 феврали соли 2018 дар шаҳри Тошканд бо гумони як қатор ҷиноятҳо дастгир шуд.

Президенти Узбекистон Шавкат Мирзиёев 19 майи соли гузашта дар ҷараёни сафараш ба ноҳияи Улуғнор гуфт, “ҳоло додситони кул бо гуруҳаш дар зиндон аст. Пас аз ду – се моҳ тавре мекунам, ки ба воситаи телевизион ҳама чизро бигӯяд. Зеро ӯ дар ҳама ҷой коррупсияро паҳн кард. Аз ҳар додситони ноҳия 30-40 ҳазор доллар мегирифтааст. Дузди воқеӣ буд. Бинобар ин, аз мақомоти додситонӣ 70%-и кормандон барканор шуданд. Шахси бовиҷдонеро ба ҷои ӯ таъйин кардам. Агар касе хиёнат кард, аз пушти ӯ хоҳад рафт”.

Вазорати умури дохилии Узбекистон 5 марти соли 2018 писари 39-солаи Қодиров – Алишерро низ бо ҷурми қаллобӣ ва тамаъҷӯӣ таҳти пайгард қарор дод. Ба зидди падару писар ба маблағи ним миллиард доллар даъво ва шикоят шудааст.

Ёфтҳои бештар

Суҳбати Сарвинози Рӯҳуллоҳ бо Нуриддин Саид
лутфан мунтазир бошед

Феълан кор намекунад

0:00 0:05:26 0:00
Гузоришҳои радиоӣ
ПОДКАСТ
Суҳбати Сарвинози Рӯҳуллоҳ бо Нуриддин Саид
Гузоришҳои радиоӣ

Гузоришҳои видеоӣ

Суқути ҳавопаймои Амрико дар Ғазнӣ
лутфан мунтазир бошед
Embed

Феълан кор намекунад

0:00 0:00:40 0:00
XS
SM
MD
LG