Пайвандҳои дастрасӣ

Хабарҳо

Русия донишманд Фахриддин Аббосовро ба Озарбойҷон депорт кард

Фахраддин Абосзода

Русия донишманди талиштабор ва раҳбари ҷумбиши миллии талишҳо Фахиддин Аббосовро ба Озарбойҷон депорт кард. Ӯ баробари бозгашт аз Маскав дар фурудгоҳи Боку боздошт шуд. Дар ин бора Хадамоти амнияти Озарбойҷон рӯзи панҷшанбе хабар дод. Аббосов бо ҷурми "фаъолиятҳои зиддиозарбойҷон" дар ҷустуҷӯ қарор дошт.

Пештар аз ин созмони ҳомии ҳуқуқ - Amnesty International хабар дод, ки Фахриддин Аббосов аз боздоштгоҳи Люберциии Русия нопадид шуд. Ба маълумоти фаъолони ҳуқуқи инсон, 27 феврал бархе аз кормандони ниҳодҳои интизомӣ ба боздоштгоҳ омада, санади озодшавии Аббосовро нишон доданд ва ӯро бо худ ба самти номаълум бурданд.

Мурофиаи парвандаи Аббосов бояд рӯзи 23 феврал баргузор мешуд, аммо додгоҳ ӯро пайдо накард ва мурофиаро ба 18 март гузошт.

"Агар Аббосовро ба хотири таслим кардани ӯ ба мақомоти Озарбойҷон озод карда бошанд, инро метавон ҳамчун нақзи дағалонаи меъёрҳои ҳуқуқи байналмилалӣ арзёбӣ кард",- гуфт раҳбари намояндагии Amnesty International дар Русия Наталя Звягина.

Фаъолони ҳуқуқ пофишорӣ доранд, ки Русия масъулияти ҳимояи ҳуқуқи инсонро риоя ва аз истирдоди нафароне, ки дар кишварҳояшон мавриди шиканҷа қарор мегиранд, худдорӣ кунад. Мақомоти интизомии Русия то ҳол депортатсияи Аббосовро шарҳ надодаанд.

Устоди донишгоҳи Боку Фахриддин Аббосов барои ҳимоя аз фарҳангу суннатҳои талишҳои Озарбойҷон фаъолона мубориза мебурд. Талишҳо як қавми эронитабори Озарбойҷон аст, ки дар Қафқози ҷанубӣ зиндагӣ мекунанд. Боку Аббосовро ба "даъватҳои оммавии зидди давлат" муттаҳам мекунад. Дар хабари хадамоти амнияти Озарбойҷон гуфта мешавад, ки Фахриддин Аббосов ба Арманистон сафар ва алайҳи "Озарбойҷон ва якпорчагии он" суханронӣ кард.

Аббосов соли 2004 бинобар таъқибҳо аз Озарбойҷолн ба Русия фирор кард ва соли 2011 дар он кишвар ҳақи иқомат гирифт. Сарфи назар аз мақоми ҳуқуқиаш ӯ 6 сентябр дар Маскав боздошт шуд.

Лукашенко ба интихоботи оянда меравад, аммо намехоҳад президенти якумрӣ шавад

Александ Лукашенко бо писараш Николай

Президенти Беларусия Александр Лукашенко гуфт, ки дар интихоботи баъдӣ номзад мешавад, аммо намехоҳад якумр ҳукмронӣ кунад.

Ӯ рӯзи 1 март дар ҷараёни "Гуфтугӯи густарда бо президент", дар посух ба суоли хабарнигори бахши беларусии Радиои Озодӣ гуфт, ки "аз президентӣ сер шудааст", аммо дар интихоботи оянда иштирок мекунад, то нагӯянд, ки "дар марҳилаи душвор фирор кард".

Лукашенко ҳамзамон таъкид кард, ки ӯ шеваи "интиқоли қудрат аз худ ба худ" ё ба фарзандонашро, истифода намекунад.

"Ваъда медиҳам, ки маро аз курсии президентӣ ба он дунё намебаранд. Ман қудратро барои фарзандонам нигаҳ намедорам ва қудратро ба онҳо мерос намегузорам Ҳеҷ яки онҳо чунин хоҳиш надорад, ҳатто хурдӣ ҳам",- гуфт Лукашенко.

Соли равон аз замони интихоби аввали Лукашенко ба мақоми президентӣ 25 сол пур мешавад. Аз он вақт ӯ борҳо ба ин мақом интихоб шуд, зеро дар Қонуни асосии Беларусия давраи интихоби президент маҳдудият надорад. Мухолифин Лукашенкоро ба тақаллуби натиҷаи интихобот муттаҳам мекунад.

Интихоботи президкнтии Беларусия соли 2020 баргузор мешвад, аммо имкон дорад ин маъракаро ба тирамоҳи соли равон гузаронанд.

Донишҷӯи Донишгоҳи омӯзгорӣ барои латукӯби духтари туркман муҷозот шуд

Муҳассилон аз Туркманистон дар донишгоҳи омӯзгории Душанбе таҳсил мекунанд

Додгоҳи ноҳияи Исмоили Сомонӣ дар шаҳри Душанбе як ҷавондухтари туркмантабори Тоҷикистонро барои латукуби донишҷӯдухтари шаҳрванди Туркманистонро дар шаҳри Душанбе ҷарима баст. Додгоҳ рӯзи 1-уми март хабар дод, ки Дилфуза Ҷумъаева, донишҷӯи соли сеюми Донишгоҳи омузгориро барои авбошӣ ва вайрон кардани тартиботи ҷамъиятӣ ва латукуби як донишҷӯи туркман дар пушти донишгоҳ 5 ҳазор сомонӣ ҷарима бастааст.

Додгоҳ гуфтааст, ки Дилфуза Ҷумъаева рӯзи 12-уми декабри соли гузашта бо Гулмира Нарсаҳатова, донишҷӯи ин донишгоҳ, ки аз Туркманистон омадааст, муноқиша карда ва сипас ӯро зери мушту лагад гирифтааст. Ба гуфтаи додгоҳ, дар ин муноқиша донишҷуи хориҷӣ осеб дидааст. Додгоҳ гуфтааст, бо назардошти соҳиби як фарзанд будан ва доғи ҷиноӣ надоштани Дилфуза Ҷумъаева, додрас амр дод, ки ӯ барои авбошӣ дар назди мардум 5 ҳазор сомонӣ ҷарима пардозад. Назари вакили дифои Дилфуза Ҷумъаева ҳоло маълум нест.

Дар донишгоҳҳои олии Тоҷикистон бар асоси созишномаҳои байнидавлатӣ садҳо ҷавон аз Туркманистон таҳсил мекунанд.

ИМА барои маълумот дар бораи писари бен Лоден $1 миллион ваъда дод

Ҳамза бин Лоден

Мақомоти ИМА барои маълумот дар бораи макони будубоши Ҳамза бин Лоден - писари Усома бин Лоден, раҳбари пешини созмони террористии "Ал-Қоида", 1 миллион доллар ваъда кардаанд. Дар ин бора рӯзи 28 феврал дар саҳифаи Департаменти давлатӣ хабар пахш шуд.

Тавре дар хабар омадааст, Ҳамза бин Лоден моҳи августи соли 2015 бо пахши як навори аудиоӣ дар интернет аз тарафдоронаш даъват кард, ки ба ИМА ва шарикони ғарбии он ҳамла кунанд. Ӯ таҳдид кард, барои падараш, ки ӯро сарбозони амрикоӣ куштанд, интиқом меситонад.

Моҳи январи соли 2017 ИМА алайҳи Ҳамза бин Лоден таҳрим ҷорӣ кард. Вашингтон бар ин назар аст, ки фаъолиятҳои писари бин Лоден ба амнияти Амрико таҳдид мекунад. Ба маълумоти Департаменти давлатӣ, Ҳамза бин Лоден соли 2015 расман ба "Ал-Қоида" ворид шуд. Баъди як сол ба ҷанги зидди ИМА даъват кард.

Созмони террористии "Ал-Қоида" масъулияти ҳамлаи 11 сентябри соли 2001 ба Амрикоро бар дӯш гирифт. Он замон ҷангиёни ин гурӯҳ чаҳор ҳавопайморо рабуданд ва ба Маркази тиҷоратӣ дар Ню Йорк, Пентагон саҳрое дар Пенсилвания ҳамла бурданд. Дар ин ҳамла наздик ба 3 ҳазор нафар кушта шуд. Раҳбари созмони Усома бин Лоден "террористи рақами 1" эълон шуд ва Амрико барои сари ӯ 50 миллион доллар ваъда кард. Усома Бен Лоден соли 2011 дар пайи амалиёти нерӯҳои вежаи ИМА дар Покистон кушта шуд.

Чин аз ҳамкории низомӣ бо Тоҷикистон ҳимоят кард

Пас аз нашри гузоришҳо аз ҳузури қобили таваҷҷуҳи сарбозони чинӣ дар як постгоҳи наздимарзӣ дар Тоҷикистон, вазорати дифои Чин аз ҳамкорӣ бо Тоҷикистон дифоъ кард. Рен Гуоқианг, сухангӯи вазорати дифои Чин рӯзи панҷшанбеи 28-уми феврал дар нишасти хабарӣ гуфт, ки ҳамкории байни ду кишвар дар чаҳорчӯбаи қонунҳои байналмилалӣ ва қатъномаҳои таъйидшуда аз сӯи Шӯрои амнияти Созмони Милали Муттаҳид аст.

"Ин ҳамкорӣ ба нафъи ҳар ду кишвар, нерӯҳои мусаллаҳи он ва суботи оромии минтақа аст",-гуфтааст сухангӯи вазорати дифои Чин. Рен Гуоқианг ҳамзамон гузоришҳо дар мавриди ҳузури низомии Чин дар долони Вахон мутааллиқ ба вилояти Бадахшони Афғонисторо радд кардааст.

Рӯзномаи мӯътабари амрикоии “Вашингтон Пост” рӯзи 18-уми феврал навишт,Ҷумҳурии Мардумии Чин дар Тоҷикистон чанд сол аст, ки як посгоҳи наздимарзӣ дорад, ҳарчанд ду кишвар ҳеҷ гоҳ онро расман эътироф накардаанд.

Дар гузориши мукаммали рӯзнома, ки дар вебсайти он нашр шуд, омадааст, “посгоҳи хоксорона дар наздикии гузаргоҳи Вахон дар Афғонистон ва дар қаламрави ноҳияи Мурғоб аст” ва ба гуфтаи Гаррӣ Шиҳ, муаллифи матлаб се-чор сол аст, ки вуҷуд дорад.

Хабарнигори “Вашингтон Пост” навиштааст, ки чанде пеш ҳангоми сафараш ба марзи Тоҷикистону Афғонистон ин қароргоҳи низомии Чинро дид ва гурӯҳе аз неруҳои чиниро вохӯрд, ки дар бозори шаҳри Мурғоб харид мекарданд.

Ба қавли хабарнигор, онҳо либоси сарбозони воҳидҳои низомии Чин дар Вилояти Шинҷон-Уйғурро доранд, ки асосан мусулмонон онҷо зиндагӣ мекунанд.

Дар гузориш гуфта мешуд, ки дар посгоҳ рамзҳои Тоҷикистону Чин дида мешаванд, вале маълум нест, пули нигаҳдориро кӣ мепардозад ва сохтмон ба кадом тараф тааллуқ дорад. “Вашингтон Пост” акси моҳвораиро нашр кардааст, ки як бинои хурд, хобгоҳ ва майдони таълимӣ дар он дида мешавад. Акси қароргоҳеро, ки се бинои алоҳида ва манораи мухобиротӣ дорад, дар гузориш ҷой додаанд.

“Вашингтон Пост” дар бораи теъдоди сарбозони чинӣ дар Тоҷикистон маълумоти дақиқе надодааст, вале аз қавли сокинони Мурғоб овардааст, ки мумкин аст, даҳҳо ва ё садҳо сарбози чинӣ дар посгоҳ мустақар бошанд.

Ҳадаф аз таъсиси пойгоҳи Чин ба навиштаи “Вашингтон Пост” ҳузур дар минтақаҳои нооромест, ки барои амнияташ фавқуллода муҳим аст. Ҷумҳурии Мардумии Чин як қитъаи бисёр хурди ҳаммарз бо Афғонистон дорад, ки дар минтақаи Вахон ҷойгир аст ва ин нуқтаро ҳамчун макони эҳтимолии нооромӣ аз Афғонистон арзёбӣ мекунад.

Марзи Тоҷикистону Чин ҳам дар ин гӯшаи куҳистонист ва 500 километрро ташкил медиҳад. Вилояти ноороми мусулмоннишини Шинҷону Уйғур ҳам дар ин минтақа ҷойгир аст. Чин аз ҷудоиталабии уйғурҳо нигарон аст ва бо Тоҷикистон дар бораи пешгирӣ аз ифротгароӣ, қочоқи маводи мухаддир ва ҷудоиталабӣ созишнома имзо кардааст.

Шӯрои Амнияти СММ натавонист қатъномаи Венесуэларо қабул кунад

Ҷаласаи Шӯрои амнияти СММ

Шӯрои Амнияти СММ рӯзи панҷшанбе натавонист, қатъномаи марбут ба Венесуэларо қабул кунад. Пешниҳоди ИМА дар бораи баргузории интихоботи президентии "озоду одилона" дар он кишварро Русия ва Чин вето кардан ва ба раъйдиҳӣ роҳ надоданд.

Аз 15 узви Шӯрои амният танҳо чаҳор кишвар аз тарҳи пешниҳодии Русия пуштибонӣ карданд. Дар ин лоиҳа омадааст, ки буҳрони Венесуэларо бояд сокинони он кишвар ҳал кунанд ва ҳар гуна дахолати хориҷӣ ва таҳдиди истифодаи неруи низомӣ ғайри қобили қабул аст.

ИМА дар лоиҳаи пешниҳодиаш ба иҷозаи иштироки нозирони хориҷӣ дар интихобот ва бардоштани маҳдудияти вуруди кумакҳои башардӯстона даъват карда буд.

Рӯзи шанбеи гузашта ҷонибдорони президенти Венесуэла Николас Мадуро, ки қонунӣ будани ӯро бисёре аз кишварҳо эътироф намекунанд, сӯи корвони мошинҳои кумакҳои башардӯстона оташ кушоданд.

Моҳи январ роҳбари мухолифони Венесуэла Хуан Гуайдо худро президенти муваққат эълон ва баргузории интихоботи озоду одилонаро талаб кард. Аз Гуайдо ИМА, чанде аз кишварҳои Амрикои Лотинӣ ва аксари кишварҳои Иттиҳоди Аврупо ҷонибдорӣ карданд. Русия, Чин, Куба ва Мексико президенти кунуниро эътироф мекунанд. Маскав Вашингтонро ба талоши барканории ҳукумати Венесуэла айбдор мекунад.

NYT: дастрасии Кушнер ба маводи сиррӣ бо амри Трамп сурат гирифт

Ҷаред Кушнер

Ҷаред Кушнер - домод ва мушовири Доналд Трамп, соли 2018 бо амри шахсии президент ба маводи комилан махфӣ дастрасӣ пайдо кард. Дар ин бора нашрияи The New York Times рӯзи 28-уми феврал бо такя ба чаҳор манбаъ гузориш дод. Ба гуфтаи нашрия, Трамп чунин дастурро ба раҳбари вақти дастгоҳи раёсати ҷумҳур Ҷон Келли дода буд. Келли аз ин дастур мақомоти баладпояи дигарро огоҳ кард.

Доналд Макган, ки он замон дар мақоми мушовири Кохи Сафед фаъолият дошт, иддао мекунад, ки фармони Трамп барои таъмини дастрасии Кушнер ба маводи сиррӣ, нигарониҳои аз ҷумла Идораи истихборотро ба бор оварда буд. Макган дар як нома аз Трамп хоҳиш кард, ки қарорашро бекор кунад.

Моҳи январ президент Трамп дар сӯҳбат бо нашрияи The New York Times гуфт, ки дар тасмимгирии дастрасии домодаш ба маводи маҳрамона иштирок надошт. Сухангӯи Кохи сафед Сара Сандерс гуфт, ки маъмурияти президент маълумотро дар бораи дастрасии кормандонаш ба маводи комилан сиррӣ шарҳ намедиҳад.

Маводи комилан маҳрамона аз маълумот дар бораи манбаъҳои истихборотӣ, шеваи дарёфт ва таҳлили онҳо иборат аст. Қарори дастрасӣ ба ин маводро Идораи истихбороти ИМА қабул мекунад. Бо дастрасӣ ба ин манбаъҳо, Кушнер метавонист дар ҷаласаҳое иштирок кунад, ки хадамоти махсуси ИМА барои президент Трамп баргузор мекарданд.

Кушнер баъди оғози фаъолияти расмии Трамп муддати як сол ба санадҳои комилан махфӣ дастрасӣ дошт. Моҳи ферали соли 2018 раҳбари дастгоҳи президент Ҷон Келли тасмим гирифт, ки сатҳи дастрасии Кушнер ба маводи "комилан махфӣ"-ро то "махфӣ" коҳиш диҳад. Ба гуфтаи нашрияҳои амрикоӣ, коҳиши мақоми Кушнер ба тафтиши маълумот дар бораи робитаҳои хориҷӣ ва муомилоти молӣ рабт дошт.

Туркманистон мубориза бо филтршиканҳоро пурзӯр кард

Интернеткафе дар минтақаи Балканободи Туркманистон

Мақомоти Туркманистон тайи ду ҳафтаи ахир мубориза бо барномаҳои филтршикан - VPN ва маҳдудияти дастрасӣ ба сомонаи Бахши туркмании Радиои Озодиро сахттар кардаанд.

Ин иқдом пас аз хабари Радиои Озодӣ гирифта шуд, ки мегуфт мақомоти туркман барои таъқиби шаҳрвандони худ аз ширкати олмонии Rohde & Schwarz дастгоҳи махсусе харидаанд.

Ёдрас мешавем, Бахши туркмании Радиои Озодӣ 31 январ дар бораи эҳтимоли ҳамкории мақомоти махсуси Туркманистон бо ширкати олмонии Rohde & Schwarz дар робита ба хариду фурӯши дастгоҳҳои рақамӣ як таҳқиқоти рӯзноманигориро нашр кард.

Радио бо истинод ба як манбаи худ гуфт, ширкати олмонӣ ба вазоратҳои мудофиа ва алоқаи Туркманистон дастгоҳҳое додааст, ки барои таъқибу назорат ва бастани сомонаҳои аз дидгоҳи мақомот номақбул истифода мешаванд. Ҳамчунин дастгоҳи ширкати Rohde & Schwarz мумкин аст, барои гӯш кардани суҳбатҳои телефонии сокинон истифода шавад.

Дар Туркманистон ҳамаи сомонаҳои мустақил, аз ҷумла сомонаи Радиои Озодӣ дастнорасанд. Шабакаҳои иҷтимоии Facebook, YouTube, Twitter VKontakte, инчунин паёмрасонҳои WahtsApp, Telegram, Viber, Signal баста шудаанд. Барои роҳ ёфтан ба ин шабакаҳо ва паёмрасонҳо сокинони Туркманистон аз барномаҳои филтршикан истифода мебаранд.

Тарҳи қонун "Дар бораи ҳолати ҷангӣ" ба баррасии парлумон ирсол шуд

Саҳнае аз машқҳои низомӣ дар Ҳарбмайдон

Ҳукумати Тоҷикистон дар ҷаласаи рӯзи 28 феврал тарҳи қонун “Дар бораи ҳолати ҷангӣ”-ро муҳокима карда барои баррасӣ ба Маҷлиси намояндагони Тоҷикистон ирсол кард. Ношири ин хабар - вебсайти президенти Тоҷикистон дар бораи ҷузъиёти тарҳи ин қонун хабар намедиҳад.

Вале дар як сохтори қудратии Тоҷикистон ба Радиои Озодӣ гуфтанд, ки тарҳи қонуни нав аз ҷониби мутахассисони соҳаи низомии мақомоти қудратии Тоҷикистон таҳия шуда вазифаву рисолатҳои ҷузъу томи кишварро дар ҳолати ҷангӣ дар ҳудуди кишвар мушаххас ва таъин мекунад.

Дафтари матбуоти Вазорати дифои Тоҷикистон бо назардошти “сиррӣ будани тарҳи мазкур” аз шарҳи ҷузъиёт худдорӣ кард. Айни замон, як мақоми Вазорати мудофеаи Тоҷикистон, ки аз тарҳи қонун огоҳ аст, ба шарти ифшо нашудани номаш рӯзи 1 март ба Радиои Озодӣ гуфт, ки ин санад барои ҳолати мабодо пеш омадани ҳолати ҷангӣ таҳия шуда, чунин қонун дар қонунгузориҳои кишварҳои зиёд амал мекунад.

Дар тарҳи қонун паҳлӯҳои қонунии амалиёти ҷангӣ, дифоӣ ва вазифаҳои мақомоти қудратӣ - шуруъ аз ҷузъу томи вазорати мудофиа то неруҳои сарҳадӣ, Гвардияи миллӣ, вазорати корҳои дохилӣ дар ҳолати ҷанг арзёбӣ шудааст. Ӯ гуфт: “Масъалаи ақибгоҳ дар ҳолати ҷангӣ ва таъмини он бар дӯши кадом ниҳодҳо гузошта мешавад, дар тарҳи мазкур нишон дода шудааст ва ҳамчунин роҳҳои қонунии ҷалби нерӯҳои захиравӣ бар асоси фаслҳо ва моддаҳо зикр карда шудааст”.

Дар Тоҷикистони замони истиқлолият қонуне дар бораи ҳолати ҷангӣ вуҷуд надошт ва солҳои 1990-ум ҳам, ки ин кишвар шоҳиди ҷанги шаҳрвандӣ шудааст, мақомоти кишвар муқаррароти хоси мисли "қуюди шабгардӣ" ва "ҳолати фавқулодда"-ро ҷорӣ карда буданд.

Чунин қонун дар даврони Иттиҳоди Шӯравӣ вуҷуд дошт ва яке аз мавридҳои татбиқи он ба 22 июни соли 1941, рӯзи ҳамлаи Олмони фашистӣ ба хоки Иттиҳоди Шӯравӣ марбут аст. Дар Русия, ки чунин қонунро соли 2001 қабул кардааст, бар асоси қонун “Дар бораи ҳолати ҷангӣ”, шароити ҷорӣ шудани ҳолати ҷангӣ дар дар тамоми қаламрави ин кишвар ваё манотиқи ҷудогонаи он бар асоси Конститутсияи Русия пешбинӣ шудааст. Масъулияти эълони ҳолати ҷангӣ дар кишвар ба дӯши президент мебошад. Дар ин қонуни Русия гуфта шудааст, ки ҳолати ҷангӣ дар ҳоле эълон мешавад, ки қаламрави ин кишвар аз ҷониби кишвари дигаре мавриди ҳамла қарор бигирад.

САҲА аз боздошти рӯзноманигорон дар Қазоқистон нигарон аст

Арлем Дезир - намояндаи САҲА дар умури озодии матбуот

Намояндаи Созмони Амният ва Ҳамкорӣ дар Аврупо (САҲА) дар умури расонаҳо Арлем Дезир дар робита ба боздошти чандин рӯзноманигору блогер ҳангоми бозтоби эътирозҳои Алмато, Жанаозен ва Урал ибрози нигаронӣ кард.

"Аз таҷрибаи боздошти кутоҳмуддати рӯзноманигорону блогнависон нигаронем, ки монеи иҷрои вазифаҳои касбияшон мешавад. Огаҳ кардани ҷомеа аз эътирозҳои иҷтимоӣ ва масъалаҳои ҷамъиятӣ вазифаи асосии рӯзноманигорон аст ва онҳо набояд барои иҷрои вазифаҳои худ муҷозот шаванд", - омадааст дар изҳороти Дезир аз 27 феврал.

Намояндаи САҲА гуфтааст, 27 феврал хабарнигору наворбардори Бахши қазоқии Радиои Озодӣ -- Сания Тойкен ва Санат Нурбекро дар Жанаозен дастгир карданд. Онҳо пас аз шаш соати бозпурсӣ дар шуъбаи пулиси шаҳри Актау озод шуданд. Худи он рӯз дар Алмато блогер Асхат Берсалимов ва дар Урал блогер Аскар Шайгумаровро боздошт карданд.

Ба гуфтаи Дезир, вақтҳои ахир дар Қазоқистон боздошти худсаронаи рӯзноманигорон афзоиш ёфтааст. Аз ҷумла, Сония Тойкенро 12 феврал ҳангоми иҷрои вазифаи касбияш боздошт карда, ба шуъбаи пулис бурданд. Миёнаҳои моҳи декабри соли гузашта низ дар Алмато чандин рӯзноманигор барои чанд муддат дастгир шуданд.

Намояндаи САҲА гуфтааст, маъмурони ниҳодҳои ҳифзи ҳуқуқ ва амниятии Қазоқистон набояд ба кори рӯзноманигорон ҳангоми бозтоби ҳамоишҳои эътирозӣ монеъ шаванд.

Покистон сарнишини ҳиндиро ба хотири "сулҳ" озод мекунад

Суханронии нахуствазири Покистон Имрон Хон дар порлумон. 28 феврал, 2019

Покистон мехоҳад, пилот ё сарнишинеро, ки дар пайи сарнагун кардани ҳавопаймои ҷангии Ҳиндустон боздошт кардааст, рӯзи ҷумъа озод кунад. Дар ин бора сарвазири Покистон Имрон Хон рӯзи панҷшанбе дар порлумон хабар дод. Ба гуфтаи ӯ, сарнишин ҳамчун "амали сулҳхоҳона" раҳо мешавад.

Муносибатҳои Ҳиндустону Покистон рӯзҳои ахир ба сардӣ гароида, расонаҳо аз тирпаронӣ дар Кашмир хабар медиҳанд. Покистон ахиран ҳарими ҳавоии худро баст ва дар натиҷа ҳазорҳо парвоз ба Осиёи Шарқӣ бекор карда шуданд.

Вазъ дар Кашмир пас аз зарбаҳои ҳавоии Ҳиндустон ба пойгоҳҳои эҳтимолии террористон дар ҳудуди Покистон бад шуд. Зарбаҳои ҳавоӣ посух ба ҳамлаи террористие буданд, ки 14 феврал бар зидди низомиёни ҳинду дар Кашмир анҷом шуд. Дар натиҷаи ҳамла, ки масъулияти онро созмони "Артиши Муҳаммад" бар зимма гирифт, 40 низомии ҳиндь кушта шуданд.

Мақомоти Покистон мегӯянд, дар минтақае, ки ҳадафи зарбаҳои ҳавоии Ҳиндустон қарор гирифт, ягон пойгоҳи террористӣ мавҷуд набуд. ИМА ва кишварҳои дигар Ҳиндустону Покистонро ба хештандорӣ ва муколама даъват доранд.

ИА Facebook, Twitter ва Google ба ваъдахилофӣ айбдор кард

Комиссияи Аврупо 28 феврал бо нашри як изҳорот гуфт, ҷӯяндаи Google ва шабакаҳои иҷтимоии Фейсбуку Твиттер ваъдаҳои худро дар мубориза бо хабарҳои дурӯғ иҷро намекунанд.

Аз ҷумла, Фейсбук бар хилофи созишҳо моҳи январи соли равон натиҷаҳои санҷиши эълоyҳоеро пешниҳод накардааст, ки корбаронро ба гумроҳӣ мебаранд. Ҳамчунин Google нагуфт, ки барои пешгирӣ аз паҳни маълумоти бардурӯғ чи корҳоеро анҷом додааст. Твиттер низ натиҷаҳои беҳтар гаштани назорати паҳни огаҳиҳоро нафиристодааст.

Дар изҳороти Комиссияи Аврупо омадааст, ки ширкатҳои мазкур дар арафаи интихоботи порлумони Аврупо ҳеч гуна пешрафтеро нишон надоданд.

Иттиҳоди Аврупо тирамоҳи соли 2018 бо ширкатҳои Facebook, Twitter ва Google қоидаҳои ихтиёрии мубориза бо хабарҳои дурӯғро ба имзо расонида буд. Бар пояи санад, эъломҳои сиёсӣ бояд ишора ва мубориза бо паҳнкунандагони маълумоти дурӯғ пурзӯр карда шавад.

Ҷапаров пешниҳод кард, ки вилоятҳои Қирғизистонро ба Ҷопону Амрико ва Русия диҳанд

Намояндаи мардумии Қирғизистон Оқилбек Ҷапаров

Вакили порлумони Қирғизистон Оқилбек Ҷапаров пешниҳод кард, ки ҳар як вилояти кишварашро ба давлати пешрафтае диҳанд.

Ба гуфтаи ӯ, Қирғизистон ҳамеша аз кишварҳои хориҷӣ ва созмонҳои бузурги байналмилалӣ кумаки молӣ дархост мекунад.

"Барои намуна, вилояти Норин ё Бодкандро ба Ҷопон диҳем. Бигзор, он вилояти моро рушд диҳад. Роҳҳоро ободу низоми маорифу тандурустиро пешрафтатар гардонад. Ба Амрико вилояти дигарро медиҳем. Шаш вилоятро ба шаш кишвари бузург бо шумули Русия медиҳем", - гуфт Оқилбек Жапаров дар суҳбат бо радиои маҳаллии "Марал".

Ӯ мегӯяд, дар сурати зарурӣ кишвараш ба ҳудудҳои хурдтари маъмурӣ тақсим шавад ва ба 40 сафорати кишварҳои хориҷие, ки дар Қирғизистон фаъолият доранд, 40 ноҳияро пешниҳод кунанд.

"Қирғизистониҳо набояд хасисӣ кунанд. Метавонанд дар он вилоятҳо парчами Ҷопон, Олмон ё Русияро насб кунанд. Мехоҳам ин пешниҳодро бори дигар ба ҳукумат ироа кунам. Агар боз гӯш накарданд, лоиҳаи қонун таҳия мекунам", - афзуд Жапаров.

Қирғизистон 7 вилоят ва 2 шаҳри бузург дорад.

Амрико кумаки молӣ ба Узбекистонро се баробар афзоиш дод

Ноиби ёвари Котиби Давлатии ИМА дар умури Осиёи Ҷанубӣ ва Марказӣ Элис Уеллс

Амрико ҳаҷми кумакҳои молиро ба Узбекистон дар ду соли охир се маротиба афзоиш додааст. Дар ин бора дар ҷараёни машваратҳои сиёсии Амрикову Узбекистон дар шаҳри Тошканд кафили ёвари котиби давлатии ИМА дар умури Осиёи Марказиву Ҷанубӣ Элис Уэллс хабар дод.

Ба гуфтаи ӯ, дар соли 2016 Вашингтон ба Тошканд 10,1 миллион доллар кумаки молӣ расонида буд. Дар соли 2018 ин нишондод ба беш аз 28 миллион доллар расид.

Элис Уэллс гуфт, афзоиши кумакҳои молии ИМА ба Узбекистон ба хотири пуштибонӣ аз барномаи ислоҳоти Тошканд аст.

Элис Уэллс рӯзи 26 феврал бо ҳадафи ширкат дар машваратҳои сиёсии Амрикову Узбекистон вориди Тошканд шуд. Уэллс бо президенти ин кишвар Шавкат Мирзиёев мулоқот кард.

Gallup:32 дар сади амрикоиҳо Русияро "душмани асосӣ" медонанд

Доналд Трамп ва Владимир Путин дар Буэнос-Айрес, ноябри 2018

Пажуҳиши нави Gallup - бунгоҳи омӯзиши афкори умум, пуштибонии фаъолияти маъмурияти феълии ИМА-ро дар муқоиса бо маҳбубияти раҳбарони Русия ва Чин дар сатҳи паст арзёбӣ кард. Баҳои раҳбарияти Олмон ба таври қобили мулоҳиза баланд будаст. Чунин аст натиҷаи таҳқиқи Gallup барои соли 2018.

Посухдиҳандагон аз 133 кишвари ҷаҳон ба суоле назар доданд, ки ба раҳбарияти чаҳор кишвар ва сиёсати онҳо дар сатҳи байналмилалӣ чигуна баҳо медиҳанд.

Дараҷаи обрӯмандии Амрико, ки дар аҳди Барак Обама ба 50 дар сад баробар буд, соли 2017 18 зина поён рафт ва 30 дар сад шуд. Соли 2018 ин нишондиҳанда ба эътидол омад: ҳоло нишондиҳандаи нави эътимод ба раҳбарияти ИМА 31 дар сад аст.

Ҳамзамон дараҷаи бовари ба раҳбарияти Русия ва Чин рӯ ба афзоиш овард. Сатҳи маҳбубияти раҳбарияти Русия, ки дар соли 2017 22 дар сад боуд, дар соли 2018 ба 30 дар сад расид, аммо боз ҳам дар зинаи поёни обрӯмандии чаҳор кишвар қарор дорад.Ба раҳбарияти Чин 34 дар сад ва Ба Олмон 39 дар сад эътимод доранд.

Дар аврупо 34 дар сади посухдиҳандаҳо ба раҳбарияти ИМА изҳори эътимод карданд. Дар сади онҳое, ки ба Русия эътимод дорадн 21 дар сад аст.

Сатҳи баланди эътимод ба раҳбарияти ИМА дар як қатор кишварҳои Аврпуои Марказӣ ва Шарқӣ ва ҳамчунин Исроил мушоҳида шудааст ва пасттарин дар Ироқ, Яман, қаламрави Фаластин ва Русия. Ин нишондод ба 11 дар сад баробар аст.

Бинобар пурсиши дигари Gallup, ки рӯзи чоршанбе нашр шуд, дар посух ба суоли амрикоиҳо кадом кишварро душмани асосии ИМА арзёбӣ мекунанд, Русия ба ҷойи аввал баромад. Як соли пеш амрикоиҳо Кореи Шимолиро душмани аслии кишварошон ном мебурданд.

Кушнер бо президенти Туркия ва шоҳзодаи саудӣ мулоқот кард

Мулоқоти Кушнер бо Эрдуғон

Мушовири аршади Кохи сафед Ҷаред Кушнер ба думболи мулоқот бо валиаҳди Арабистони Саудӣ Муҳаммад бин Салмон, бо президенти Туркия Раҷаб Тайиб Эрдуғон дидору гуфтугӯ анҷом дод. Ин гуфтугӯҳо дар чаҳорчӯби ибтикори сулҳи маъмурияти ИМА дар Ховари Миёна анҷом шуданд.

Дафтари Эрдуғон рӯзи 27 феврал гуфт, ки дар мулоқот бо Ҷаред Кушнер -домоди президент Трамп, ҳамчунин Берат Албайрақ, вазири иқтисоди Туркия ва домоди Эрдуғон иштирок кард.

Хабаргузории Анадолу гуфт, ки мулоқот ду соат идома дошт, аммо дар бораи он тафсилот надод.

Ба гуфтаи Кохи сафед, сафари Кушнер талоши пешбурди ибтикори сулҳ дар Ховари Миёна аст, ки бояд рӯнамоӣ шавад. Кушнер гуфт мехоҳад ҷузъиёти барномаро баъди интихоботи Исроил эълон кунад, ки ба 9 апрел барномарезӣ шудааст.

Рӯзи 26 феврал Кушнер бо валиаҳди қудратманди саудӣ Муҳаммад бин Салмон дар Риёз мулоқот кард. Ин нахустин дидори рӯ ба рӯ баъди кушта шудани Ҷамол Хошуқҷӣ, журналисти муқими Амрико буд, ки моҳи март дар консулгарии Арабистони Саудӣ дар Истамбул ба қатл расид. Ба думболи ин ҳодиса мавҷи танқидҳо ва иттиҳомот алайҳи шоҳзода Салмон баланд шуданд.

Риёз даст доштани Муҳаммад бин Салмонро дар ин кушттори Хашоқҷӣ рад мекунад ва онро кори дасти "мақомоти саркаш" дар консулгарӣ медонад.

Кушнер ҳамчунин бо раҳбарони Иморати Араб ва Омон мулоқот анҷом дод.

Трамп ва Ким Чен Ун дар мулоқоти Ҳаной ба созиш нарасиданд

Доналд Трамп ва Ким Чен Ун

Доналд Трамп ва Ким Чен Ин дар мулоқоти Ҳаной ба созиш нарасиданд. Дар ин бора Кохи сафед дар поёни мулоқоти роҳбарони Амрико ва Куриёи Шимолӣ хабар дод.

Мулоқоти ду роҳбар рӯзи панҷшанбе барпо шуд. "Ду кишвар гуфтугӯҳоро идома хоҳанд дод", - омадааст дар изҳороти маъмуритяи президенти ИМА.

Зиёфати нисфирӯзии муштараки Трамп бо Ким лағв шуд, ҳамчуноне, ки пештар аз ин маросими имзогузории санадҳо бекор шуда буд. Трамп ва Ким Чен Ун макони гуфтугӯҳоро тарк карданд.

Дар нишасти хабарӣ Трамп гуфт, ки масъалаи асосӣ дар гуфтугӯҳо бо Ким Чен Ун талаби Куриёи Шимолӣ комилан бекор кардани таҳримҳои зидди Пхенян буд, аммо ИМА инро қабул накард.

Ҳам Трамп ва ҳам котиби давлатии ИМА Майк Помпео гуфтанд, ки ҳамоно барои расидан ба созиш "назари мусбат доранд". Ба гуфтаи Помпео, саммити Ҳаной барои расидан ба чунин ҳадаф кумак кард, вале, мутаассифона, имкон нашуд, ки ҳамаи масир тай гардад. Трамп гуфт, ӯ мисли гузашта муносибатҳои хуб ва "дӯстона"-ро бо Ким нигоҳ хоҳад дошт.

Ба гуфтаи президенти ИМА, роҳбари Куриёи Шимолӣ ваъда кардааст, ки дигар мушаки ҳастаӣ озмоиш нахоҳад кард.Рӯзи панҷшанбе дувумин рӯзи гуфтугӯҳои Трамп бо Ким буд. Дар ин гуфтугӯҳо масъалаи халъи силоҳи ҳастаии Пхенян дар миён буд. Пеш аз оғози нишаст Трамп гуфт, тасмим надорад, барои расидан ба "созиши дуруст" шитоб кунад. Агар "муносибатҳо хуб бошанд, пас корҳое хубе анҷом хоҳанд шуд", - афзуд Трамп. Ким Чен Ин дар навбати хуб гуфт, "тамоми ҷаҳон" ба дидори онҳо нигоҳ мекунад.

Додгоҳ Отамбоевро ба пардохти 300 000 сом ҷуброн маҳкум кард

Алмосбек Отамбоев

Додгоҳи ноҳияи Октябри шаҳри Бишкеки Қирғизистон даъвои се шаҳрванд алайҳи президенти пешин Алмсобек Отамбоев ва мудири телевизиони "Апрел" Дмитрий Ложников қисман қонеъ кард.

Отамбоев вазифадор шуд, ки ба ҳар кадом аз се даъвогар 100 ҳазор сом - дар маҷмуъ 300 ҳазор сом (наздики 4,5 ҳазор доллар) ҷуброн пардохт кунад.

Ахматбек Келдибеков, раиси пешини порлумон, Азимбек Бекназаров ва Кенешбек Дуйшебоев аъзои пешини Ҳукумати муваққат 26 декабри соли 2018 Отамбоев ва мудири телевизиони "Апрел" Дмитрий Ложниковро ба додгоҳ кашиданд. Баҳс сари мусоҳибае буд, ки Отамбоев 10 декабр дар телевизиони мазкур доир кард.

Ба бовари даъвогарон, президенти пешин дар мусоҳибааш ба шарафу номуси онҳо латма задааст. Даъвогарон аз президенти пешин 18 миллин сом ҷуброни зарари маънавӣ талаб доштанд.

Украина дар озмуни "Евровидение" иштирок намекунад

Овозхони украинӣ Анна Корсун

Украина дар озмуни "Евровидение-2019" иштирок намекунад. Дар ин бора Ширкати миллии радиотелевизионии Украина хабар дод. Худдории тими ғолиб аз иштирок дар озмуни пешини "Евровидение" сабаби чунин тасмим шудааст.

Ширкати радиотелевизионӣ ҳамчунин ба "мушкили системавӣ" ишора кардааст, ки ба ҳунарнамоии сарояндагони украинӣ дар ҳудуди "кишварҳои таҷовузгар" марбут аст. Қонунгузории Украина ин мафҳумро танҳо дар нисбати Русия кор мебарад.

Пештар аз ин аъзои гуруҳи ҳунарии Brunettes shoot Blondes-и Украина хабар доданд, ки ба озмуни "Евровидение" намераванд.

Ширкати миллии радиотелевизионии Украина чанде пеш гуфт, баъди он ки чанд гуруҳи ҳунарӣ аз ширкат дар озмун даст кашиданд, мумкин аст, Украина дар озмун аслан ширкат накунанд.

Сароянда Maruv (номи аслиаш Анна Корсун) низ гуфт, дар "Евровидение" аз Украина намояндагӣ намекунад.

Украина дар озмуни "Евровидение -2016" пирӯз шуда буд. Он замон овозхони тотор аз Қрим Ҷамила Украинаро дар озмун намояндагӣ карда буд.

Баррасии тарҳи ҷамъоварии маълумот оиди пулҳои Путин дар Конгресси ИМА

Президенти Русия Владимир Путин

Конгресси ИМА тарҳи қонунеро баррасӣ мекунад, ки ба истихбороти Амрико дастур медиҳад дар бораи дороиҳои президенти Русия Владимир Путин маълумот ҷамъ кунад. Ин санад, ки бо ибтикори узви Конгресс аз Ҳизби Демократ Валдис Деминг ва ҷумҳурихоҳ Элис Стнефаник таҳия шудааст, дар саҳифаи Деминг нашр шуд. Ба гуфтаи муаллифони тарҳи қонун, ҳукумати Русия коррупсияро ҳамчун абзори нигаҳдории қудрат ва заъиф кардани режимҳои демократӣ истифода мекунад.

"Беҳтарин роҳ ҳамла ба ҳукумати Путин ва шириконаш ва пайгирии мавҷи пулҳои ғайриқонунии пинҳонӣ аст, ки амалиёти онҳоро сармоягузорӣ мекунад",- гуфт Деминг. Тарҳи қонун ёдрас мекунад, ки Русия ба дахолат ба сохторҳои демократии ИМА муттаҳам мешавад.

Санад ба ҷомеаи истихбороти Амрико - 16 ниҳоде, ки ба ҷамъоварии маълумоти истихборотӣ машғул аст, пешниҳод мекунад, ки манбаҳои бой шудани атрофиёни Путин ва шахсан худи ӯро пайгирӣ ва мушаххас кунад, ки кадом олигархи рус "таҷрибаҳои коррупсионии Владимир Путин"-ро осон мекунад.

Моҳи январи соли 2018 Вазорати молияи ИМА "гузориши Кремлин"- рӯйхати афроди наздик ба президенти Русия Владимир Путинро нашр кард, ки метавонанд таҳти таҳрими Амрико қарор бигиранд. Ба ин феҳраст 210 нафар, бо шумули ҳамаи аъзои ҳукумати Русия, кормандони маъмурияти президент, ширкатҳои давлатӣ, раҳбарони вазоратҳои қудратӣ ва олигархҳо шомил ҳастанд.

Моҳи июли соли 2017 раҳбари бунёди Heritage Capital Уилиям Браудер ҳангоми сӯҳбат дар кумитаи Сенати ИМА гуфт, ки Владимир Путинро сарватмандтарин одами ҷаҳон арзёбӣ мекунад. Броудер, ки дар Русия ба ҷиноятҳои молӣ муттаҳам шуд, дороиҳои Путинро $200 миллиард шумурдааст.

Биноба маҷаллаи Forbes соли 2017 дороиҳои Кирилл Шамолов - домоди президенти Русия Владимир Путин, ба $1,3 миллиард баробар буд. Дертар Bloomberg хабар дод, ки Шамолов аз духтари Путин ҷудо шудааст.

Покистон ду сарнишини ҳиндуро асир гирифт

Яке аз сарнишинҳои ҳавопаймои Ҳиндустон

Мақомоти Покистон субҳи 27-уми феврал аз сарнагун кардани ду ҳавопаймои низомии Ҳиндустон хабар доданд. Яке аз ҳавопаймоҳо дар ҳудуди Кашмир ва дувумӣ дар Ҳимолойи Ҳиндустон суқут кард.

Ба гуфтаи мақомоти Покистон, ду сарнишини ҳинду ба асорат афтодаанд, ки якеашон ҳоло дар беморхона бистарӣ аст.

Низомиёни Ҳиндустон низ аз ин пештар тасдиқ карданд, ки як ҳавопаймои низомии онҳо дар минтақаи баҳсии миёни ин кишвару Покистон – Кашмир суқут кардааст.

Ҳиндустон пас аз суқути ҳавопаймоҳояш дасти кам чаҳор фурудгоҳро дар марз бо Покистон баст. Чину Амрико Ҳиндустон ва Покистонро ба хештандорӣ даъват карданд. Намояндаи Толибон дар навбати худ гуфт, низои ду кишвар метавонад ба раванди гуфтугӯи сулҳи Афғонистон таъсири манфӣ расонад.

Нирӯҳои ҳавоии Ҳиндустон субҳи 26-уми феврал бахши покистонии Кашмирро ҳадаф қарор доданд. Ба иттилои хабаргузории ANI, 12 ҳавопаймои "Мираж 2000С"-и Ҳиндустон гӯё ба пойгоҳи ҷангҷӯёни гуруҳҳои террористии "Артиши Муҳаммад" ва "Ҳизби Муҳаммад" бомба афканда, онро пурра маҳв карданд.

"Дар натиҷаи зарбаҳои ҳавоии Ҳиндустон пойгоҳҳои террористии Балакот, Чакотӣ ва Музаффаробод пурра маҳв шуданд", - навиштааст ANI.

Вазири умури хориҷии Ҳиндустон Виҷай Гокхале гуфт, ҷангҷӯён ба ҳамлаҳои нави террористии зидди кишвараш омодагӣ медиданд ва зарбаҳои ҳавоӣ низ барои пешгирӣ аз ин ҳамлаҳо анҷом дода шуд. Ба гуфтаи ӯ, дар натиҷаи зарбаҳо шумори зиёди ҷангҷӯён бо шумули фармондеҳонашон кушта шудаанд.

Вале мақомоти Покистон гуфтанд, дар минтақае, ки ҳадафи зарбаҳои нирӯҳои ҳавоии Ҳиндустон қарор гирифт, ягон пойгоҳи террористӣ вуҷуд надошт ва касе ҳам ба ҳалокат нарасидааст. "Ҳеч гуна талафоти инсоние ба қайд гирифта нашудааст", - гуфт сухангӯи Нирӯҳои ҳавоии Покистон генерал-майор Азиф Ғафур.

Боздошти 16 эътирозгар дар Жанаозени Қазоқистон (Видео)

Хабарнигорони Радиои Озодъ Сония Тойкен ва Санат Нурбек

Аз 23 то 25 феврал дар шаҳри Жанаозени Қазоқистон 16 сокин ба ҷавобгарии маъмурӣ ҷалб шудааст. Ҳар кадоми онҳо аз 5 то 7 рӯз ҳабси маъмурӣ шуданд. Дар ин бора додситонии маҳаллӣ хабар дод.

Ба иттилои мақомот, сабаби боздошти сокинон "ифлос кардани ҷойҳои ҷамъиятӣ, суханҳои қабеҳ ва дигар аъмоли огоҳонае, ки ба тартиботи ҷамъиятӣ халал мерасонад", будааст.

Ба ҷуз ин, ба иттилои додситонӣ, нисбати як сокини шаҳри Жанаозен барои "барангехтани адовати иҷтимоӣ, миллӣ, қавмӣ ва нажодӣ" парвандаи ҷиноӣ боз гардидааст.

Ин дар ҳолест, ки пештар мақомот хабари ба ҷавобгарӣ ҷалб шудани сокинони Жанаозенро рад карда буданд. Сокинон бо талаби таъмини ҷойи кор гирдиҳамоӣ ташкил карданд.

Дар Жанаозен чӣ мегузарад?
лутфан мунтазир бошед
Embed

Феълан кор намекунад

0:00 0:01:49 0:00

27 феврал пулиси Жанаозен хабарнигорони бахши қазоқии Радиои Озодӣ Сания Тойкен ва Санат Нурбековро боздошт кард. Ин ду хабарнигор баъди шаш соати боздошт раҳо шуданд.

Дар идораи пулис шикоятеро аз номи як сокини шаҳр ба хабарнигорон нишон додаанд. Сокини шаҳр бо насаби Шаудиров шикоят кардааст, ки мусоҳибаи хабарнигорон бо сокинони шаҳр мумкин аст, "боиси оташангезӣ" шавад.

Дар шаҳри Жанаозен чораҳои амниятӣ тақвият дода шудааст. Дар кӯчаҳои шаҳр шумори зиёди низомиҳо дида мешавад.

Идомаи боздошти мақомоти баландпоя дар Узбекистон

Вазорати адлияи Узбекистон

Чанд манбаъ дар мақомоти ҳифзи ҳуқуқи Узбекистон хабар доданд, ки маъмурони Хадамоти амнияти президент рӯзи 23-юми феврал муовини сардори Идораи кадрҳои Вазорати адлияи ин кишвар Юсуф Хоҷаевро боздошт кардаанд.

Боздошти Хоҷаеви 58-сола дар пасманзари дастгир шудани даҳҳо мансабдори баландпояи Хадамоти амнияти давлатӣ ва мақомоти додситонии ин кишвар сурат мегирад.

Як манбаъ дар Додситонии кулли Узбекистон гуфт, Юсуф Хоҷаев дар доираи парвандае боздошт ва бозпурсӣ мешавад, ки зидди раҳбарони дастгиршудаи Хадамоти амнияти давлатӣ боз шудааст.

13-уми феврал хабар расид, ки раиси барканоршудаи Хадамоти амнияти давлатии Узбекистон Ихтиёр Абдуллоев ба муҳлати як моҳ таҳти боздошт қарор гирифт ва ҳоло дар боздоштгоҳи хадамот бозпурсӣ мешавад.

Юсуф Хоҷаев, ки дар миёни ҳамкоронаш бо лақаби "Юсуфи тасмимгир" маъруф аст, гӯиё дар ҳолатҳои ришвахории миёни раҳбарияти пешини Хадамоти амният ва мақомоти ҳифзи ҳуқуқи Узбекистон даст дорад.

Як ҳуқуқшинос аз шаҳри Тошканд гуфт, ки наздикони Юсуф Хоҷаев дар ҳоли ҳозир вакили дифоъ ҷустуҷӯ дорад.

Ветнам мизбони мулоқоти Трамп ва Ким шуд

Президенти ИМА Доналд Трамп ва раҳбари Кореяи Шимолӣ Ким Чен Ун дар остонаи шурӯи ҳамоиши дурӯза дар пойтахти Ветнам ҳамдигарро шодбош гуфтанд. Дар ин ҳамоиш қарор аст масъалаи барномаи ҳастаӣ ва мушакии Пхенян мавриди баррасӣ қарор гирад.

Дар лаҳзаи шодбош, ки дар меҳмонхонаи панҷситорадори Sofitel Legend Metropole дар шаҳри Ҳаной ҷараён гирифт, ду раҳбар дасти ҳамдигарро фишурда ба ҳам табассум карданд. Қарор аст ду раҳбар дар ҳузури мушовиронашон инчунин як ғизои шоме ҳам бихӯранд.

Трамп дар сӯҳбат бо хабарнигорон гуфт, ки бовар дорад музокироти онҳо “муваффақиятомез” мегузарад ва худи ӯ дар “масъалаи халъи силоҳи ҳастаӣ” фикрашро тағйир доданӣ нест.

Ким Чен Ун ҳам изҳори хушбинӣ кард ва гуфт, ки бовар дорад “натиҷаҳои ин музокирот мавриди истиқболи ҳама мардум мешавад”. Вай гуфт, “тамоми талошамро ба харҷ медиҳам, ки натиҷаи хубе ба даст ояд”.

Трамп талош дорад бо Ким, ки бо сиёсати диктаторӣ ва саркӯби мардум ва озодиҳояш маъруф буда баробар бо ин дорои силоҳи ҳастаӣ мебошад, созиш кунад.

Ин дуюмин мулоқоти ду раҳбар аст. Нахустин дидори таърихии миёни президентони ИМА ва Кореяи Шимолӣ моҳи июни соли 2018 дар Сингапур баргузор шуда буд. Вале аз он замон то кунун дар равобити ду ҷониб пешрафти андаке мушоҳида шудааст.

Трамп дар ҳавопаймои ширкати Air Force One вориди Ҳаной ва Ким савори қатори махсуси амниятӣ дар давоми се шабонарӯз ва дар паи як сафари 3-ҳазоркилометрӣ, тавассути хоки Чин вориди пойтахти Ветнам шуд.

Пеш аз тарки Вашингтон, Трамп дар саҳифаи худ дар Twitter навишт: “Дар паи анҷоми барномаи халъи силоҳ, Кореяи Шимолӣ базудӣ ба як қудрати иқтисодӣ табдил мешавад. Вагарна вазъият тағйир намеёбад. Раҳбар Ким як қарори оқилона қабул мекунад”.

Рӯзи 25 феврал дар ҷараёни мулоқот бо раҳбарони аёлатҳои кишвар дар Кохи Сафед, Трамп пешгӯӣ кард, ки ин “як ҳамоиши хеле азим” хоҳад буд.

Қаноатшоҳ Лоиқзода: "Барканори ман ба ягон ҳодиса рабт надорад"

Қаноатшоҳ Лоиқзода

Қаноатшоҳ Лоиқзода рӯзи 26-уми феврал аз мақоми раиси ноҳияи Рашт барканор шуд. Дар шарҳи фармони президент дар ин бора сабаби аз мақомаш озод шудани Лоиқзода гуфта намешавад.

Ҳоло Раҳимҷон Муқимӣ иҷрокунандаи вазифаи раиси ноҳияи Рашт аст. Маълум нест, Қаноатшоҳ Лоиқзода ба вазифаи наве дар сохторҳои ҳукуматӣ таъйин хоҳад шуд ё на.

Лоиқзода рӯзи 27-уми феврал ва пас аз чанд лаҳзаи нашри фармони барканориаш гуфт, ба ӯ кор дар мақоми дигар пешниҳод нашудааст. “Мо сарбозем. Новобаста аз он ки мансаб медиҳанд ё не, хидмат мекунем”, - афзуд ӯ.

Қаноатшо Лоиқзодаи 48-сола чаҳор сол пеш ба мақоми раиси ноҳияи Рашт таъйин шуд ва исмаш борҳо дар матбуот ва шабакаҳои интернетӣ дар робита бо ҳодисаҳои баҳсбарангез расонаӣ гардид.

Ҷунайдулло Худоёров
Ҷунайдулло Худоёров

Яке аз ҳодисаҳои пурсарусадо – боздошту зиндонӣ шудани як фаъоли Фейсбук аз ноҳияи Рашт Ҷунайдулло Худоёров буд. Худоёров соли 2018 бо ҷурми пайравӣ аз ҷараёни мазҳабии “Салафия” ба панҷ соли зиндон маҳкум шуд.

Наздикони Худоёров ин иттиҳомро қотеона рад карда мегӯянд, Ҷунайдулло ба хотири интиқодаш аз мақомоти ноҳияи Рашт, аз ҷумла раиси ҳамакнун собиқ Қаноатшоҳ Лоиқзода дар саҳифаҳои шабакаҳои иҷтимоӣ ба зиндон рафт.

Қаноатшоҳ Лоиқзода рӯзи 27-уми феврал гуфт, ки барканории ӯ ба ин ва дигар ҳодисаҳо рабт надорад. Лоиқзода кӯтоҳ гуфт, ки “ин нодуруст аст” ва телефонашро қатъ кард.

Мувофиқи қонунҳои Тоҷикистон, таъйини мақомоти маҳаллии ҳокимияти давлатӣ интихобӣ нест ва бар асоси фармони президент сурат мегирад.

Ёфтҳои бештар

Гузоришҳои видеоӣ

Нигоҳе ба рӯзи дуввуми эътирозҳо ба афзоиши қимати нафт дар Эрон
лутфан мунтазир бошед

Феълан кор намекунад

0:00 0:03:17 0:00
XS
SM
MD
LG