Пайвандҳои дастрасӣ

Хабари нав

Хабарҳо

Раисҷумҳури Амрико бо сафари давлатӣ ба Ҷопон рафт

Доналд Трамп

Доналд Трамп, раиси ҷумҳури Амрико, бо сафари давлатӣ ба Ҷопон рафт, то бо вуҷуди танишҳои тиҷорӣ равобити қавӣ бо Токиоро намоиш диҳад.

Трамп ва бонуи аввали Амрико Меланиа Трамп рӯзи 25-уми май пас аз сафари чаҳордаҳсоата вориди Ҷопон шуданд.

Нахуствазири Ҷопон Шинзо Абе Трампро ба зиёфати бошукӯҳ ва сабқати сумо даъват кардааст.

Ӯ ҳамчунин яке аз нахустин раҳбарони кишварҳои хориҷӣ хоҳад буд, ки императори нави Ҷопон Наруҳиторо мебинад. Наруҳито дар оғози моҳи ҷорӣ тахти шоҳаншоҳиро ба мерос гирифт.

Трамп рӯзи 23-юми май гуфт, "нахуствазир Абе бисёр мушаххас ба ман гуфт, ки шумо меҳмони боиззате ҳастед. Дар онҷо фақат як кас меҳмони боиззат аст. Ман меҳмони боифтихори яке аз маъракаҳои бузургтарини онҳо дар дусад соли ахир ҳастам."

Сафари раисҷумҳури Амрико ба Ҷопон то 28-уми май идома мекунад.

"Писарамро кӣ парронд?" Нома аз Исфара ба додситони кулли Қирғизистон

Нусхаи шиносномаи русии Расоиддин Тешаев

Як сокини ҷамоати Ворухи Исфара аз додситони кулли Қирғизистон Откурбек Ҷамшедов хостааст, ки гумонбарони қатли писараш Расоиддин Тешаевро боздошт карда ва ба ҷавобгарӣ кашад.

Расоиддин Тешаеви 37-сола, шаҳрванди Тоҷикистону Русия, рӯзи 14-уми марти имсол ҳангоми муноқиша дар марз аз тири силоҳи оташфишон кушта шуд. Наздиконаш дар ин кор сокинони деҳаи Оқсойи Қирғизистонро муттаҳам мекунанд. Қаблан мақомот гуфта буданд, ки ҳодисаро таҳқиқ мекунанд.

Нома ба додситони кулли Қирғизистон рӯзи 14-уми май тавассути почта ва рӯзи 23-юми май тавассути имейл фиристода шудааст. Ҷониби Қирғизистон гуфт, муроҷиати интернетии Иномиддин Тешаевро рӯзи 24-уми май дастрас кардааст ва он баррасӣ мешавад.

Нусхаи нома рӯзи 25-уми май дар шабакаҳои иҷтимоӣ низ нашр шуд. Бино ба он, Иномиддин Тешаев гуфтааст, аз марги писараш ду моҳ гузашт, вале то ҳол касе ба ҳайси гумонбар дар ин ҳодиса дастгир нашуд.

"Ҳар рӯз набераҳоям аз ман мепурсанд, ки падари мо куҷост? Кай меояд? Ман қудрати ба ин суол посух гуфтанро надорам. Ва ин фикр маро низ ором намегузорад, ки кӣ бо истифода аз силоҳи оташфишон писари маро кушт?" -- навиштааст ӯ.

Иномиддин Тешаев мегӯяд, дар ин ҳодиса арӯси 28-солааш бо се фарзанд танҳо монд: "Мо бе ноновар мондем. Ман 84-сола ва оилаам 76-сола аст. Таҳаммули чунин фоҷиа барои мо хеле сахт аст."

Рӯзи 19-уми марти имсол Додситонии кулли Қирғизистон эълон карда буд, ки дар пайи низоъ дар марз бо Тоҷикистон парвандаи ҷиноӣ боз шуда, таҳқиқи ҳодиса оғоз шудааст.

Ҳамчунин Азим Иброҳим, муовини нахуствазири Тоҷикистон гуфта буд, Тоҷикистон ва Қирғизистон ба мувофиқа расиданд, дар навбати аввал афродеро, ки даст ба ҷиноят зада, боиси сар задани муноқиша шуданд ва боиси кушта шудани ду нафар гардиданд, ба ҷавобгарӣ мекашанд.

Бо гузашти ду моҳ ду тараф дар ин бора иттилое надодаанд.

Дар муноқишаи рӯзҳои 13 ва 14-уми марти имсол дар марз ду шаҳрванди Тоҷикистон аз тири силоҳ кушта ва беш аз 20 шаҳрванди Тоҷикистону Қирғизистон маҷруҳ шуданд. Моҷаро баъди он сар зад, ки сокинони деҳоти Ворухи Тоҷикистон бо корҳои сохтмонии роҳи Ботканд-Оқсой-Тамдиқ мухолифат карданд. Ҳодисае. ки ҳарду тараф ба ҳақ будани худ пофишорӣ доранд.

Борону сел дар Афғонистон боис ба марги 24 нафар шуд

Бар асари омадани сел дар Афғонистон 21 нафар ҷон бохтаанд.

Бахши дарии Радиои Озодӣ навишт, бориши сахти борон ва омадани сел заминҳои кишт ва хонаҳои мардум ва роҳҳоро низ вайрон кард.

Муҳаммадаслам Сиёсӣ, муовини вазири ҳолатҳои фавқулодаи Афғонистон, рӯзи 25-уми май ба Радиои Озодӣ гуфт, “аз вилояти Ҳирот, Ғӯр ва Ғазнӣ дар маҷмуъ аз марги 24 нафар гузориш шудааст.” Вай афзуд, дар миёни ҳалокшудаҳо се кӯдак низ ҳаст.

Дар ҳамин ҳол, Созмони Милали Муттаҳид гузоришеро дар мавриди вазъяти башарӣ дар Афғонистон ба нашр расонд.

Дар гузориш гуфта шудааст, пеш аз ин селобҳо наздик ба сесад ҳазор нафар ба хотири хушксолӣ беҷо шуда буданд. Ба қавли масъулони созмон, хушксолии пайдарпай ва акнун боронҳои шадид ва омадани сел афғонҳоро дар вазъияти бади башарӣ қарор додааст.

Моҳи марти имсол бар асари омадани сел дар Эрону Афғонистон даҳҳо нафар ҷон бохта ва маҷруҳ шуданд.

Маводи мухаддир дар зиндонҳои Тоҷикистон аз куҷост? Баҳс дар порлумон. САДО

Абдуманнон Холиқзода

Муовини аввали вазири адлияи Тоҷикистон мавридҳои истифода аз маводи мухаддир дар зиндонҳои кишварро тасдиқ кард. Абдуманнон Холиқзода дар ҷаласаи се рӯз пеш дар порлумон гуфт, барои ҷилавгирӣ аз ин масъалаи доғ чора меҷӯянд.

Ин масъаларо Абдуҳалим Ғаффоров, узви Маҷлиси Намояндагон ва раиси ҳизби сотсиалист, матраҳ кард. Ҳарчанд мавзӯи ҷаласаи порлумон “дар бораи эъломияи дороиҳои кормандони ниҳодҳои қудратӣ” буд, ӯ аз муовини якуми Вазорати адлия тақозо намуд, сабабҳои вуҷуди маводи мухаддир дар зиндонҳоро шарҳ диҳад.

Абдуҳалим Ғаффоров
Абдуҳалим Ғаффоров

“Ҳодисаҳои дар муассисаҳои ислоҳӣ аз воситаҳои нашъадор истифода бурдани маҳбусон зиёд аст. Бо кадом роҳу восита он дастраси маҳбусон мешавад?” -- пурсид Ғаффоров.

Ҳарчанд муовини аввали вазири адлияи Тоҷикистон Абдуманнон Холиқзода бо назардошти аз мавзуъ берун будани масъала хоҳиш кард, ба ин суол посух надиҳад, муовини раиси Маҷлиси намояндагон Абдуҷаббор Азизӣ исрор намуд, ки “масъала шарҳ дода шавад”.

Абдуманнон Холиқзода дар ҳузури вакилон гуфт, “воқеан, ин гуна ҳолатҳо дар муассисаҳои ислоҳӣ ҷой доранд. Роҳбарияти вазорат кӯшиш дорад, ки пеши роҳи онҳо гирифта шавад. Як қатор омилҳое ҳастанд, ки ба паҳншавии маводи мухаддир дар муассисаҳои ислоҳӣ мусоидат менамоянд ва яке аз онҳо ба кормандони ин муассисаҳо вобастагӣ дорад.”

лутфан мунтазир бошед

Феълан кор намекунад

0:00 0:02:54 0:00
Линки мустақим

Холиқзода гуфт, “аттестатсия” ё санҷиши маъмурони зиндонҳо гузаронда шудааст ва бар асоси он чанде аз онҳо “бинобар сатҳи пасти дониш ва қонуншиканиҳо, аз кор ва хидмат озод карда мешаванд”.

Вале Холиқзода дар хусуси теъдоди маҳбусоне, ки гирифтори маводи мухаддир ҳастанд ва дар соли равон чӣ қадар маводи мухаддир ба маҳбасҳо ворид шудааст ва манбаъҳои таъминкунанда кадомҳоянд? посух нагуфт.

Қаблан ҳомиёни ҳуқуқ ва омбудсмени Тоҷикистон фавт ва ба бемориҳои сироятӣ гирифтор шудани зиндониёни тоҷикро мушкили асосӣ дар муассисаҳои ислоҳӣ номида буданд. Дар гузорише, ки Ваколатдори ҳуқуқи инсон дар Тоҷикистон нашр кард, гуфта шудааст, “ҳоло дар муассисаҳои ислоҳӣ 307 маҳбуси мубтало ба вируси норасоии масунияти бадан адои ҷазо менамоянд. Теъдоди гирифторони бемории сил дар зиндонҳо 173 нафар аст"

Дар маҳбасҳои Тоҷикистон, бино ба иттилои расмӣ, 12 ҳазор маҳбус нигоҳдорӣ мешаванд. Баҳори соли гузашта Кумитаи мубориза зидди шиканҷаи Созмони Милали Муттаҳид ба ҳукумати Тоҷикистон тавсия дод, ки барои ҷилавгирӣ аз паҳншавии бемориҳои сироятии сил ва ВИЧ дар боздоштгоҳу зиндонҳо даст ба кор шавад.

Доналд Туск, раиси Шӯрои Аврупо, ба Тоҷикистон меояд

Доналд Туск

Доналд Туск, раиси Шӯрои Аврупо, ҳафтаи оянда аз чанд кишвари Осиёи Марказӣ, аз ҷумла Тоҷикистон дидан хоҳад кард.

Шӯрои Аврупо дар баёнияи расмӣ гуфт, Туск сафарашро ба Осиёи Марказӣ рӯзи 30-юми май аз Тоҷикистон оғоз мекунад. Қарор аст, ӯ дар Душанбе бо раисҷумҳур Эмомалӣ Раҳмон мулоқот кунад. Ҳамкориҳои дуҷониба, тағйири иқлим, ҳифзи марз ва амнияти минтақа аз мавзуъҳои суҳбат хоҳад буд.

Раиси Шӯрои Аврупо баъдан ба Қазоқистону Узбекистон меравад. Мулоқоти ӯ бо раисҷумҳури муваққати Қазоқистон Қосимҷомарт Тоқаев ва президенти нахустини он кишвар Нурсултон Назарбоев пешбинӣ шудааст. Вай дар Узбекистон бо президент Шавкат Мирзиёев дидор хоҳад кард.

Сафари раиси Шӯрои Аврупо дар минтақа то 2-юми июн идома мекунад. Туск дар ҳоле ба кишварҳои Осиёи Марказӣ меояд, ки дипломатҳои Иттиҳоди Аврупо рӯзи 15-уми май дар Брюссел ёддошти муштараки ин ниҳодро дар бораи стратегияи нави Иттиҳодияи Аврупо дар Осиёи Марказӣ қабул карданд. Ин қадами ниҳоӣ дар остонаи қабули стратегияи “ИА ва ОМ: Имкониятҳои нав ба хотири ҳамкориҳои қавӣ” аст, ки интизор меравад моҳи июни имсол аз тарафи вазирони умури хориҷии эътилоф тасвиб ва моҳи июл дар мулоқоти раҳбари сиёсати хориҷии ИА Федерика Могеринӣ дар Бишкек муаррифӣ шавад.

Стратегияи нав бо ҳадафи мусоидат ба минтақа дар муқобила бо ҳама гуна зарбаҳои (иқтисодии) дохиливу хориҷӣ, риояи қонун ва ҳуқуқи башар, фароҳам овардани фазои озоди кор барои сохторҳои маданӣ ва матбуоти мустақил амалӣ мешавад.

Вайнштейн ба қурбониёни озори ҷинсӣ $44 млн медиҳад

Ҳарвӣ Вайнштейн

Коргардони собиқи Ҳолливуд Ҳарвӣ Вайнштейн бо заноне, ки ӯро ба озори ҷинсӣ муттаҳам карда буданд, ба "тавофуқ" расидааст.

Ба гузориши The Wall Street Journal, Вайнштейн вазифадор шудааст, ки ба онҳо ҳудуди 44 миллион доллар медиҳад. Бо ин ҳол, ӯ даст доштан дар даҳҳо ҳолати озори ҷинсиро эътироф накардааст.

Парвандаи Вайнштейн аз рӯйи моддаи дастдарозӣ ба номус моҳи июн баррасӣ хоҳад шуд. Дар сурати тасдиқи ин иттиҳом, мумкин аст, коргардони собиқи Ҳолливуд ба ҳабси абад маҳкум шавад.

Моҳи октябри соли 2017 даҳҳо зан, аз ҷумла ҳунарпешаҳои машҳур, Ҳарвӣ Вайнштейнро ба озору азияти ҷинсӣ муттаҳам карданд. Баъди он Вайнштейн аз шӯрои мудирони ширкати продюсерӣ ва аз ҳайати Академияи синамои Амрико хориҷ карда шуд.

Дертар ширкате, ки ӯ бо бародараш Боб таъсис дода буд, муфлис эълон гардид.

60 моҳвораи интернети бепул ба кайҳон расид

Субҳи ҷумъа ширкати Илон Маск -- SpaceX бахши аввали моҳвораҳои худро барои ташкили интернети моҳвораӣ ба мадори Замин баровард. Бо расидан ба хатти парвози доимии худ ҳамаи 60 моҳвораи хурд бо шабакаи интернет пайваст шуданд.

Сафина барои ба мадор баровардани моҳвораҳои Илон Маск аз космодроми гулугоҳи Канаверал дар Флоридаи Иёлоти Мутаҳида партоб шуд. Партоби моҳвораҳо нахуст мебоист рӯзи 16-уми май амалӣ мегашт, вале бо сабаби бад будани ҳаво ва тафтиши ниҳоии таҷҳизот ба таъхир афтод.

Оғози кори ин моҳвораҳо бахши аввали тарҳи Starlink аст, ки аз соли 2015 ба ин сӯ таҳия шуда, ҳадафаш таъмини аҳолии ҷаҳон бо интернети тез ва ройгон дар ҳамаи нуқоти ҷаҳон аст.

Ду моҳвораи озмоишии ин тарҳ ҳанӯз моҳи феврали соли 2018 ба мадори Замин расонда шуданд. Илон Маск мақсад дорад дар чанд соли оянда шумораи онҳоро ба чанд ҳазор адад расонад. Харҷи умумии тарҳ 10 миллиард доллар ҳисоб шудааст.

Ҳамсари Раҳматуллои Раҷаб хост, ӯро аз ПКТ озод кунанд

Валамат Иброҳимзода

Ҳамсари Раҳматуллои Раҷаб, яке аз аъзои зиндонии ҳизби феълан дар кишвар мамнӯи наҳзати исломӣ, аз мақомот талаб кард, то ӯро аз ҳуҷраи ҷазо ё ПКТ озод кунанд.

Қаблан мақомоти интизомӣ гуфта буданд, ки Раҳматуллои Раҷаб бо иттиҳоми риоя накардани қоидаҳои маҳбас ба ҳуҷраи ҷазо интиқол ёфтааст. Ӯ дар зиндони шаҳри Ваҳдат нигоҳдорӣ мешавад.

Валамат Иброҳимзода, ҳамсари Раҳматуллои Раҷаб, рӯзи 24-уми май дар изҳороти видеоӣ гуфт:

"Мо бояд рӯзи 25-уми май бо шавҳарам мулоқот мекардем. Пештар ба зиндон рафта пурсидам, ки оё воқеан мулоқот мешавад ё не? Ба раиси зиндон Идибек Муҳтоҷзода муроҷиат кардам ва ӯ гуфт, мо дар давоми ду моҳи оянда ӯро дида наметавонем. Сабабашро пурсидам, гуфт, ки ӯро дар ПКТ ҷойгир кардаанд ва ҳама медонад, он чист."

Гуфта мешавад, шароит дар боздоштгоҳи ҷаримавии мавсум ба ПКТ хеле шадидтар аз ҳамаи бахшҳои дигари муҷозотист. Дар онҷо хондани рӯзнома, гӯш кардани радио ё қабули ғизое, ки наздикони маҳбусон меоранд, манъ аст. Маҳбус дар як рӯз танҳо барои ним соат ҳавои кушод бароварда мешавад.

Мақомоти зиндон то ба ҳол қазияро шарҳ надодаанд. Аммо Валамат Иброҳимзода гуфт, рӯзи шанбе ба қабули сардори идораи зиндонҳо меравад, то ба мушкилаш расидагӣ кунанд.

"Агар ба мушкили мо расидагӣ нашавад, гуруснанишинӣ хоҳам кард", -- гуфт ӯ.

Раҳматуллои Раҷаб як моҳ пеш сактаи мағзӣ шуда буд. Ҳамсараш мегӯяд, ҳоли ӯ чандон хуб набуд ва ҳоло мехоҳад бо чашмони худ бубинад, ки дар чӣ вазъ аст.

Раҳматуллои Раҷаб ҳамчун фаъоли Ҳизби наҳзати исломӣ дар аввали моҳи июли соли 2016 боздошт ва ба 28 соли зиндон маҳкум шуд. Додгоҳи олии Тоҷикистон фаъолияти ин ҳизбро соли 2015 мамнӯъ ва онро террористӣ унвон кард. Додгоҳ гуфт, аъзои ин ҳизб дар ташкили ошӯби мусаллаҳонаи моҳи сентябри соли 2015 даст доранд. Ҳизб ва аъзои он ин иттиҳомро рад мекунанд.

Амрико зидди муассиси "Викиликс" айбҳои нав эълон кард

ИМА зидди муассиси Викиликс (Wikileaks) Ҷулиан Ассанж бар асоси 17 банди дигар айб эълом кард. Муассиси Викиликс дар нашри ғайриқонунии санадҳои махфӣ ва созиш барои рахнаи компютерҳо айбдор мешавад.

Вашингтон то ба ҳол Асанжро танҳо барои кӯшиши рахнаи шабакаи компютерҳои Пентагон мехост, ба ҷавобгарӣ кашад. Барои ин навъи ҷиноят то 5 соли зиндон пешбинӣ шудааст. Дар сурати истирдодаш аз Бритониё ба ИМА айбҳои нав ҳукми вайро тӯлонитар хоҳанд кард.

Ассанж аз августи соли 2012 аз тарси ин ки боздошт ва ба Шветсия истирдод мешавад, дар дохили сафорати Эквадор зиндагӣ мекард. Мақомоти Эквадор моҳи апрели соли равон ҳаққи паноҳандагии Асанжро бекор карда, вайро ба мақомоти Бритониё супурданд. Ҳоло ӯро барои нақзи қоидаҳои раҳоӣ бар ивази гаравпулӣ 50 рӯз ба ҳабс гирифтанд. Ҳамчунин масъалаи истирдодаш ба ИМА баррасӣ мешавад. Шветсия низ истирдоди Асанжро талаб карданист.

Асанж ҳамеша мегуфт, ки аз истирдод шуданаш ба ИМА ҳарос дорад. Зеро дар онҷо ӯро иттиҳомҳои ҷиддӣ мунтазир аст.

Дар WikiLeaks дубора боз шудани парванда зидди муассиси худро дар Шветсия "фишори сиёсӣ" номиданд.

Нахуствазири Бритониё эълон кард, ки ба истеъфо меравад

Тереза Мей

Тереза Мей эълон кард, ки рӯзи 7-уми июн аз мақоми раҳбари ҳизби муҳофизакори Бритониё канор меравад. Ин амал майдонро барои сабқати ишғоли курсии нахуствазир дар ҳизби ҳокими Бритониё боз мекунад.

Хонум Мей рӯзи 24-уми май гуфт, ӯ то замони интихоби сарвазири нав ба ҳайси сарпарасти ин мақом хоҳад монд. Интихоби сарвазир метавонад чанд ҳафта идома кунад.

Мей, яке аз мухолифони узвияти Бритониё дар Иттиҳодияи Аврупо, соли 2016, баъд аз ҳамапурсии Брекзит ба мақоми нахуствазир расид.

Аз се соли раёсат, Тереза Мей як соли охирро доим бо ҳамҳизбиҳо, аъзои ҳизби мухолиф ва сарони Иттиҳодияи Аврупо гузаронд, то тарҳи ҷудоии Бритониё аз Иттиҳодияи Аврупоро амалӣ кунад. Вале ӯ рӯзи 24-уми май гуфт, “ин андӯҳи амиқ ҳамеша бо ман хоҳад буд, ки натавонистам Брекзитро амалӣ кунам.”

Тереза Мей ба хотири ончи нокомиаш дар заминаи берун кардани Бритониё аз Иттиҳодияи Аврупо хонда мешавад, аз сӯи ҳизбаш зери фишор қарор доштааст.

Акнун қарор аст Бритониё рӯзи 31-уми октябр аз Иттиҳодияи Аврупо берун шавад, аммо порлумон ҳануз шароити хуруҷи ин кишвар аз Иттиҳодияи Аврупоро тасвиб накардааст.

Зариф дар Покистон, дар пасманзари танишҳо байни Эрону ИМА

Муҳаммадҷавод Зариф бо Шоҳмаҳмуд Қурайшӣ

Дар ҳоле ки таниш байни Теҳрону Вашингтон афзоиш ёфтааст, вазири умури хориҷии Эрон Муҳаммадҷавод Зариф рӯзи 24-уми май бо ҳамтои покистониаш Шоҳмаҳмуд Қурайшӣ мулоқот мекунад.

Зариф рӯзи 23-юми май вориди Покистон шуд. Ба гузориши хабаргузории "Форс", вай аз ҷомеаи ҷаҳонӣ хост, то зидди "бархӯрди таҳоҷумии" Амрико бо Эрон иқдом кунанд.

Зариф гуфт, “ҳоло минтақаи мо дар вазъияти бисёр бӯҳронӣ аст ва дар минтақа иқдомҳои хатарнок сурат мегирад. Бино ба ин, мо ба машварат бо ҳамаи ҳамсояҳо ниёз дорем.”

Дар изҳороти расмии Вазорати корҳои хориҷии Поркистон низ вазъият дар минтақа “ҷиддӣ” тасвир шудааст.

Равобити миёни Эрону Амрико як сол пеш, баъди аз созиши ҳастаӣ берун шудани Вашингтон бад шуд. Созиши соли 2015 миёни қудратҳои ҷаҳон ва Эрон, дар ивази бекор кардани таҳримҳои иқтисодӣ аз Ҷумҳурии Исломӣ тақозо мекард, то фаъолияти ҳастаиашро коҳиш диҳад.

Вашинтон соли гузашта дубора алайҳи Эрон таҳрим ҷорӣ кард.

Моҳи ҷорӣ Амрико ҳузури низомии худро дар Ховари Миёна ва Халиҷи Форс низ тақвият дод ва гуфт, ин иқдом дар вокуниш ба таҳдидҳо аз сӯи Эрон гирифта шудааст.

Теҳрон ин иттиҳомро рад мекунад.

Ҳасани Рӯҳонӣ, раиси ҷумҳури Эрон, рӯзи 23-юми май гуфт, ҳатто дар сурати бомбборон, кишвараш ба фишорҳои Амрико таслим нахоҳад шуд.

Дар Узбекистон мусофирбарҳоро мошини пулис ҳамроҳӣ мекунад

Дар Узбекистон аз 1-уми сентябри имсол мусофирбарҳоро шабона мошини пулис ҳамроҳӣ хоҳад кард. Дар ин бора Девони вазирони Узбекистон қарореро содир намуд.

Қоидаи нав ба масирҳои байнивилоятӣ, байнишаҳрӣ, байналмилалӣ, сайёҳӣ ва интиқоли кӯдакон дахл хоҳад дошт.

Қарори мазкур ҳамчунин ширкатҳои мусофиркашониро вазифадор мекунад, ки аз 1-уми сентябр дар автобусҳо дастгоҳи муайянкунандаи сатҳи хастагии ронандагонро насб кунанд.

Ба ронандагон танҳо пас аз 12 соати истироҳат иҷозат дода хоҳад шуд, ки дубора ба роҳ бароянд.

Ба ҷуз ин, аз моҳи сентябри соли 2021 дар Узбекистон интиқоли мусофир бо автобусҳое, ки беш аз 15 сол истифода шудаанд, манъ мегардад.

Дар вилояти Тошканди Узбекистон охирҳои моҳи апрели имсол як автобуси хонандагон чаппа шуда, оташ гирифт. Дар дохили он 37 хонанда, 3 омӯзгор, 10 падару модар ва се ронанда ҳузур доштанд. Ҳамаи мусофирон наҷот дода шуданд.

Ҳалокати чаҳор нафар дар чоҳи фозилоб дар Қазоқистон

Кумитаи ҳолатҳои фавқулодаи Қазоқистон хабар дод, ки шаби 23-юми май дар шаҳри Нурсултон чаҳор корманди ширкати коммуналии "Остона су арнасӣ" ба ҳалокат расиданд.

Ба огаҳии кумита, шаш корманди "Остона су арнасӣ" қубури фозилобро таъмир мекарданд ва якеашон ба чоҳ афтодааст. Кормандони дигар ҳангоми берун овардани шарикашон аз дохили чоҳ беҳуш шудаанд. Бино ба маълумоти пешакӣ, онҳо аз гази ботлоқ заҳролуд гаштаанд.

Раиси Кумитаи ҳолатҳои фавқулодаи Қазоқистон Владимир Беккер гуфт, ҳалокшудаҳо аз 24 то 52 сол доштанд.

Вазорати меҳнат ва ҳифзи иҷтимоии аҳолии Қазоқистон барои таҳқиқи ҳодисаи мазкур як комиссияи махсус ташкил кардааст.

Ба гуфтаи Владимир Беккер, маъмурони наҷот ҷасади ҳалокшудаҳоро аз ҷуқурии 10-метрие баровардаанд, ки се метраш фозилоб буд.

Лукашенко хост, ки Белорус аз Қазоқистон нафт харад

Александр Лукашенко

Президенти Белорус Александр Лукашенко пешниҳод кард, ки барои воридоти нафт аз Қазоқистон гуфтугӯро оғоз кунанд.

Ба иттилои хабаргузории давлатии БелТА, Лукашенко дар ин бора дар мулоқот бо сафири Қазоқистон дар Минск Ёрмуҳаммад Ёртисбоев изҳори назар кардааст. Дипломати қазоқ дар навбати худ гуфта, ки ҷониби Қазоқистон омодааст, Белорусро бо нафт таъмин кунад, вале барои ин розигии ҷониби Русия зарур аст.

Русия моҳи апрели соли равон, пас аз ошкор шудани нафти ифлос дар лӯлаи "Дӯстӣ", интиқоли нафтро ба воситаи он қатъ кард.

Ширкати Transpetrol рӯзи 23-юми май хабар дод, ки интиқоли нафт ба Словакия аз сар гирифта шуд. Лӯлаи "Дӯстӣ" аз Қазоқистону Русия тавассути Белорус ба Лаҳистону Олмон низ нафт интиқол медиҳад.

Пеш аз ин, ширкати давлатии "Белнефтихим" иттилоъ дода буд, ки барои азсаргирии интиқоли нафт тавассути лӯлаи мазкур пас аз қазияи ошкор шудани маводи ифлос ду моҳ лозим аст.

Президенти Русия Владимир Путин ҳодисаи мазкурро ба обурӯ ва низоми зербиноии нафти кишвараш "хисороти хеле ҷиддӣ" номид. Ширкати русии "Транснефт" дар он қазия як ширкати хусусиро айбдор кард.

Интернет ба замин. SpaceX 60 моҳвораро ба кайҳон бурд

Мушаки борбари Falcon 9-и ширкати SpaceX субҳи 24 май 60 моҳвораи хурди тарҳи Starlink-ро ба кайҳон бурд. Ин моҳвораҳо барои ташкили шабакаи ҷаҳонии интернет пешбинӣ шудаанд.

Ҳамаи онҳо ба интернет вайваст ҳастанд. Дар ин бора молики ширкати SpaceX Илон Маск хабар дод. Партоби мушак аз космодроми Канаверали аёлати Флорида сурат гирифт.

Парвози мушак тариқи шабакаи SpaceX дар YouTube нишон дода шуд.​

Ин дар ҳолест, ки партоби мушак ду дафъа ба таъхир гузошта шуда буд. Ибтидо мебоист, рӯзи 16-уми май маҳвораҳо ба кайҳон бурда шаванд, аммо бори аввал ба далели ҳавои номусоид ва бори дувум ба далели санҷиши дастгоҳҳо партоб сурат нагирифт.

Тарҳи Starlink, ки соли 2015 таҳия шудааст, барои таъмини тамоми кураи замин бо интернети боэътимоду баландсуръат пешбинӣ гардидааст. Ду моҳвораи санҷишӣ моҳи феврали соли 2018 мувафаққона ба кор дароварда шуданд.

Илон Маск тасмим дорад, давоми чанд соли оянда чанд ҳазор мушакро ба кайҳон барорад. Харҷи ин тарҳ 10 миллиард доллар ҳисоб шудааст.

Шикояти доруфурӯшон аз Узбекистон: "Маҷбур мекунанд, ки..."

Як доруфурӯш аз ноҳияи Шаҳрихони Узбекистон хабар дод, ки ширкати дорусозии "Андиҷон Дору-Дармон" соҳибони дорухонаҳоро дар вилояти Андиҷон ба фурӯхтани доруҳои муҳлатгузашта ва доруҳое, ки муҳлати истифодаашон кам мондааст, маҷбур мекунад.

Дар як огоҳие аз рӯзи 22-юми апрел роҳбарияти ширкати саҳҳомии "Андиҷон Дору-Дармон" аз соҳибони дорухонаҳо дархост кардааст, ки дар фурӯши 30 номгуи доруҳо кумак кунанд. "Агар ман доруҳои муҳлатгузаштаашонро намегирифтам, онҳо ба ман дигар дору намедоданд",-шикоят кард як доруфурӯш.

Аз ширкати "Андиҷон Дору-Дармон" гуфтанд, ки ин мушкил бартараф ва касоне, ки чунин тасмим гирифта буданд, аз мақом барканор шуданд. Вале доруфурӯшҳо мегӯянд, сарфи назар аз иваз шудани роҳбарияти ширкат, ҳанӯз ҳам ин мушкил ҳал нашудааст.

Таъсиси гурӯҳҳои махсус барои пешгирӣ аз низоъҳо дар марз

Мақомоти марзбонии Қирғизистону Узбекистон тасмим доранд, гуруҳҳои фаврии муштараке барои ҳалли мушкилоти марзӣ таъсис диҳанд. Ин гуруҳҳо қарор аст, аз низоъҳо ва баҳсҳои марзӣ пешгирӣ кунанд.

Ба иттилои мақомоти марзбонии Қирғизистон, дар Намангони Узбекистон мулоқоти мақомоти ду кишвар баргузор шудааст. Онҳо вазъи марз ва хатарҳои эҳтимолиро баррасӣ кардаанд. Соли 2018 чунин вохӯриҳо 21 дарсад афзуда, назорати муштарак ҳам 20 дарсад боло рафтааст. "Ҳолатҳои марзшиканӣ аз ду ҷониб дар соли гузашта "бамаротиб" кам шудааст",- хабар медиҳанд мақомоти Қирғизистон.

Пештар аз ин мақомоти марзбонии Қирғизистон гуфтанд, ки дар соли 2018 дар марзҳои ин кишвар 11 ҳодиса ба қайд гирифта шудааст. Дар марзи Тоҷикистону Қирғизистон 7 ҳодиса, дар марзи ин кишвар бо Узбекистон 4 ҳодиса сар задааст.

Ҷаримаи ду қазоқистонӣ барои "назарсанҷӣ" дар шабакаҳои иҷтимоӣ

Акс аз бойгонӣ.

Додситонии кулли Қазоқистон 23-юми май хабар дод, ки ду шаҳрвандро ба ҷавобгарии маъмурӣ ҷалб кардааст: онҳо дар шабакаҳои иҷтимоӣ дар мавзуи интихоботи президентӣ назарсанҷӣ доир ва ба ин тартиб, қонун дар бораи интихоботро вайрон кардаанд.

Қонуншикани аввал, сокини шаҳри Алмато, рӯзи 17-уми май дар шабакаи иҷтимоии "ВКонтакте" назарсанҷӣ анҷом дод ва 100 доллари ИМА ҷарима шуд. Қонуншикани дувум, сокини вилояти Алмато, чунин назарсанҷиро дар "Фейсбук" анҷом дод ва ӯ низ ҷарима баста шуд.

Додситонӣ ҳамчунин хабар дод, ки роҳандозии назарсанҷӣ аз сӯи молики сомонаи интернетии Nur.kz - яке аз маъруфтарин сомонаи хабарӣ дар Қазоқистон - мушоҳида шудааст. Ба гуфтаи додситонӣ, сомонаи мазкур "бидуни дар ҷараён гузоштани Комисияи марказии интихоботӣ" ин корро анҷом додааст.

Қонунгузории Қазоқистон талаб мекунад, ки назарпурсӣ дар бораи интихоботҳоро танҳо шахсони ҳуқуқие метавонанд, анҷом диҳанд, ки таҷрибаи на камтар аз 5-солаи баргузории назарсанҷиҳоро дошта бошанд. Қонунгузорӣ ҳамчунин талаб мекунад, ки пеш аз баргузории назарсанҷӣ Комисияи марказии интихоботӣ бояд дар шакли хаттӣ дар ҷараён гузошта шавад. Интихоботи ғайринавбатӣ дар Қазоқистон 9-уми июн баргузор мешавад.

Ҳомии ҳуқуқ мегӯяд, барои эътироз ҳангоми сафари Э.Раҳмон ҷарима шудааст

Баҳром Ҳамроев

Баҳром Ҳамроев, як ҳомии ҳуқуқи муҳоҷирон дар Русия, гуфт, аз ҳукми додгоҳи ноҳияи Твери Маскав, ки ӯро барои эътироз ҳангоми сафари президенти Тоҷикистон 15 ҳазор рубл ҷарима баст, ба зинаи болоии додгоҳ шикоят хоҳад кард.

Ин ҳомии ҳуқуқ рӯзи 17-уми апрел, дар ҷараёни сафари расмии Эмомалӣ Раҳмон ба Русия дар наздикии Кремл бо шиори “Рахмон! Освободи политзаключенных!” эътироз кард.

Баҳром Ҳамроев, корманди созмони “Мемориал” аст, ки аз ҳуқуқи муҳоҷирон ҳимоят мекунад. Ӯ рӯзи 23-юми май ба Радиои Озодӣ гуфт, аз қарори додгоҳ ба зинаи болоӣ шикоят мебарад.

Ӯ мегӯяд, "ин ҳукм далели маҳкум кардани садои эътироз дар баробари ҳукуматест, ки мақомоти Русия аз он пуштибонӣ мекунанд".

"Шояд дар Русия ин ҳукмро бекор накунанд, вале то Додгоҳи аврупоии ҳуқуқи башар шикоят мекунам”, -- афзуд ӯ.

Ин фаъоли ҷамъиятӣ мегӯяд, ҳадафи эътирозаш ҷалби таваҷҷӯҳ ба “зиндониёни сиёсӣ” дар Тоҷикистон буд. Мақомоти тоҷик вуҷуди “мабусони сиёсӣ”-ро ҳамеша рад карда ва ин ибораро бофта медонанд.

Рӯзи 17-уми апрел, дар лаҳзаҳое, ки Эмомалӣ Раҳмон ва Владимир Путин дар Кремл мулоқот доштанд, ду тан аз тарафдорони созмони феълан дар Тоҷикистон мамнӯи “Гурӯҳи 24” дар Майдони Сурхи шаҳри Маскав бо шиори "Шинос шавед: Диктатор Эмомалӣ Раҳмон” пикети эътирозӣ ташкил карда, ба раҳгузарон варақаҳоро бо чунин мазмун низ тақсим карданд.

Аъзои “Гурӯҳи 24”-ро низ он рӯз ҳамроҳи Баҳром Ҳамроев ба пулис бурда, протокол карданд.

Эмомалӣ Раҳмон рӯзҳои 16-17-уми апрели имсол дар раъси як ҳайати бузурги давлатӣ бо як сафари расмӣ ба Маскав рафт ва бо президенти Русия Владимир Путин мулоқот кард.

Дар ҷараёни ин сафар байни ду кишвар 16 санади нави ҳамкорӣ ба имзо расид, ки аксараш дар сатҳи ёддошт буд ва бузургтарин созишномаи имзошуда тавофуқи Русия барои сохтани 5 мактаби русӣ дар 5 шаҳри Тоҷикистон ва тавофуқи Талко бо бонки ВТБ буд.

Кремл: BBC барои истифодаи симои Путин муроҷиат накардааст

"Tonight With Vladimir Putin" - саҳнае аз барномаи нави шабакаи Би-би-си

Кремл гуфт, ки шабакаи BBC (Би-би-си) ҳеҷ гоҳ истифодаи симои президент Владимир Путинро дар як филми тасвирии шакли 3D дархост накардааст. Оҷонсии ТАСС рӯзи 23 май дар нақли қавл аз сухангӯи Кремлин Дмитрий Песков гуфт, “на, (муаллифони барнома) ба мо муроҷиат накардаанд”.

Телевизиони бритониёии BBC барномаи наверо ба роҳ монд, ки дар он ба ҳайси барандаи барнома симои сохтакоришудаи президенти Русия Владимир Путин интихоб шудааст ва ин қаҳрамон, ки дар шакли рақамии 3D сохта шудааст, бо инсонҳои воқеӣ мусоҳибаҳо барпо мекунад. Ин барнома ҳанӯз нашр нашудааст, вале як тарҳи 12-дақиқаии санҷишии он аллакай ба шабакаҳо роҳ ёфт.

Дар паи моҷарои заҳролудшавии ҷосуси рус Сергей Скрипал дар шаҳри Салисбурии Бритониё, равобити Лондону Маскав бад шудааст.

Боздошти се нафар дар робита бо куштори духтари 10-сола

21 май, саҳнае аз эътирози зидди куштори бераҳмонаи кӯдак

Мақомоти покистонӣ гуфтанд, ки се нафарро бо гумони дуздӣ ва куштори духтари 10-сола боздошт кардаанд. Холид Овон, сухангӯи полиси Исломобод рӯзи 22 май гуфт, ки дар нисбати чор афсари полис ҳам барои саҳлангорӣ дар иҷрои вазифаҳои касбиашон парванда боз шудааст.

Дар паи ин ҳодиса дар саросари Покистон, ки ҷиноят алайҳи кӯдак як падидаи маъмулӣ шудааст, намоишҳои эътирозӣ барпо шуд. Ҷасади Фариштаи 10-сола бо осори зарбу азияти зиёд рӯзи 15 май дар канори шаҳри Шаҳзод пайдо шуд. Давоми чор рӯз духтарак бедарак буд ва падари ӯ Ғулом Набӣ ходимони полисро дар он гунаҳгор кард, ки сари вақт дар паи ҷустуҷӯи духтари ӯ нашуданд. Ӯ инчунин гуфт, ки замони шикояташ ходимони полис ҳарфҳои ӯро ҷиддӣ нагирифтанд. Хонаводаи Фаришта аз паштутаборҳои шимолуғарби Покистон мебошад. Куштори бераҳмонаи кӯдак боиси эътирози шадиди аксар паштуҳои Исломобод шуд, ки муҷозоти омилони таҷовуз ва куштори духтарро талаб мекунанд.

Саакашвилӣ аз Зеленский хост, шаҳрвандии ӯро барқарор кунад

Киев, декабри соли 2017. Намоиши эътирозии зиддиҳукуматӣ ба раҳбарии Саакашвилӣ

Михаил Саакашвилӣ, собиқ президенти Гурҷистон ва замоне раҳбари вилояти Одесса, аз президенти нав хост, ки шаҳрвандии украинии ӯро барқарор кунад. Вакили Саакашвилӣ Руслан Чорнолутский рӯзи 22 май дар Фейсбук хабар дод, ки ба унвонии дастгоҳи президенти нави Украина Владимир Зеленский дар ин замина як дархосте навиштааст. Президенти собиқ Петро Порошенко соли 2015 ба Саакашвилӣ шаҳрвандии Украинаро тақдим ва ба мақоми волии Одесса мансуб кард. Баъди ин мақомот дар Гурҷистон бо баҳонаи ин ки қонунгузории Гурҷистон душаҳрвандиро иҷоза намедиҳад, Саакашвилиро аз ҳақи шаҳрвандӣ маҳрум карданд. Вале баъди як сол равобити Порошенкову Саакашвилӣ дар заминаи баҳсҳои марбут ба коррупсия бад шуд ва ноябри соли 2016 Порошенко Саакашвилиро аз мақоми раиси вилоят барканор кард. Июли соли 2017 баъди он ки Саакашвилӣ як ҳизби нави сиёсӣ бо номи “Ҷумбиши нирӯҳои нав”-ро таъсис дод, Порошенко бо судури фармоне шаҳрвандии Саакашвилиро ҳам аз ӯ гирифт. Саакашвилӣ ин қарори Порошенкоро “ғайриқонунӣ” ва мухолиф бо муқаррароти байналмилалӣ номида гуфтааст, ки Порошенко ӯро бидуни шаҳрвандӣ гузошт.

Саакашвилӣ гуфтааст, ки баъди ваъдаи Зеленский дар бораи он ки омода аст ба онҳое, ки барои ояндаи Украина хидмат мекунанд, шаҳрвандӣ тақдим кунад, тасмим гирифт аз ӯ кӯмак хоҳад.

17 сол баъд: Толиби амрикоӣ аз зиндон раҳо мешавад. ВИДЕО

Ду шакли акси Ҷон Волкер Линд аз соли 2002

Ҷон Волкер Линд, як амрикоӣ, ки замони ширкат дар ҷангҳои Афғонистон дар тарафи Толибон ноябри соли 2001 боздошт шуд, қарор аст 23 май зиндонро тарк кунад. Линд 38 сол дорад ва ӯ бо исми “Толиби амрикоӣ” маъруф шудааст. Қарор аст ӯро се сол пештар аз хатми мӯҳлати 20-солаи зиндон барои рафтори хубаш аз зиндони низомаш сангини Индиана озод кунанд. Линд зодаи Калифорния буда, дар 16-солагӣ дини исломро қабул карда дар миёнаҳои соли 2001 ба сафи Толибон пайвастааст.

"Толиби амрикоӣ" озод мешавад
лутфан мунтазир бошед
Embed

Феълан кор намекунад

0:00 0:01:38 0:00


ИМА дар паи ҳамлаҳои террористии 11 сентябри соли 2001 вориди Афғонистон шуд ва Линд яке аз садҳо ҷангиёни Толибон буд, ки рӯзи 24 ноябр дар Афғонистон боздошт гардид. Ҳоло, ки Линд ба озодӣ мебарояд, шоҳиди он мешавад, ки ҷанги ИМА бар зидди Толибон ҳанӯз ҳам идома дорад. Залмай Халилзод, дипломати собиқадори амрикоӣ то ҳол чандин даври музокирот бо Толибонро анҷом додааст, вале Толибон аз музокира бо намояндагони ҳукумати Афғонистон худдорӣ карда, ҳеҷ гоҳ даст аз хушунатҳо набардоштанд.

"Бритониё барои муқобила бо рахнагарони Русия кумак кардааст"

Ҷереми Ҳант, вазири хориҷаи Бритониё рӯзи 23 май қарор аст эълон кунад, ки Бритониё дар давоми якуним соли гузашта 16 муттафиқи худро дар НАТО дар бораи фаъолиятҳои рахнагарони Русия ва таҳдиди мавҷуда алайҳи кишварҳои онҳо огоҳ кардааст. Матбуот бо нашри пораҳое аз суханронии барномарезишудаи Ҳант менависад, ки қарор аст вазири хориҷаи Бритониё дар ин конфронс хадамоти амниятии Русияро дар он муттаҳам кунад, ки зидди сохторҳои муҳим “як маъракаи сартосарӣ” ба роҳ мондаанд. Қарор аст дар конфронси НАТО дар Лондон раҳбари ин паймони низомӣ Йенс Столтенберг ва сафирони дигар иштирок кунанд. Интизор меравад, ки Ҳант мегӯяд: “Метавонам ин иттилоро ба шумо бирасонам, ки давоми 18 моҳи гузашта Маркази миллии амнияти киберӣ маълумоти бадастовардаашро бо 16 кишвари шарики мо дар НАТО ва ҳатто бештар аз доираи ин паймон дар робита бо фаъолиятҳои киберии Русия дар кишварҳои онҳо тақсим кардааст”. Дар нутқи вазири хориҷӣ бояд инчунин як огаҳӣ ё ҳушдоре садо бидиҳад, ки ин “маъракаи сартосарӣ бо ҳадафи хароб кардани кори шабакаҳои марказии ҳукуматӣ роҳандозӣ шудааст”. Ҳант мегӯяд, ки кишварҳо бояд барои муқобила бо ин таҳдидҳо омода бошанд.

Тазоҳурот дар назди сафорати Туркманистон дар Амрико

Гаспар Маталаев

Ба ҷонибдорӣ аз фаъоли мадании зиндонӣ Гаспар Маталаев 22 май дар назди сафорати Туркманистон дар ИМА тазоҳурот баргузор шуд.

Дар тазоҳурот 17 нафар иштирок доштанд. Онҳо дархости озодии Маталаевро, ки зери он 100 ҳазор нафар аз саросари ҷаҳон имзо гузошта буданд, ба кормандони сафорат пешниҳод карданд.

"Ба инҷо омадем, то эътирози худро ба ҳабси Гаспар Маталаев ва меҳнати иҷборӣ дар Туркманистон баён кунем. Мо инҷо ба хотири озодии баёну расонаҳо дар Туркманистон ҳастем. Озодӣ ба Гаспар Маталаев!", - иқтибос овардааст turkmen.news аз сухани тазоҳургарон.

Гаспар Маталаев яке аз ҳомиёни ҳуқуқи туркман аст, ки зидди ҷалби сокинони Туркманистон ба меҳнати иҷборӣ дар мавсими ҷамъоварии пахта мубориза мебурд. Ӯро шаби 4 октябри соли 2016 дар хонааш, дар Туркманобод дастгир карданд.

Ба иттилои turkmen.news, Маталаевро бо барқ шиканҷа кардаанд, то гуноҳро ба гардан гирад ва додгоҳ низ ӯро се сол аз озодӣ маҳрум кард.

Созмонҳои ҳомии ҳуқуқ, аз ҷумла Front Line Defenders ва Freedom United борҳо боздошти фаъоли туркманро маҳкум карданд. Гуруҳи кории СММ дар умури боздоштҳои худсарона моҳи июни соли 2018 ҳабс ва ҳукми зиндони Гаспар Маталаевро худсарона номиданд.

Ёфтҳои бештар

Гузоришҳои видеоӣ

Аз мадрасаҳои Бангладеш наврасони тоҷикро баргардонданд
лутфан мунтазир бошед

Феълан кор намекунад

0:00 0:02:08 0:00
XS
SM
MD
LG