Пайвандҳои дастрасӣ

Хабари нав

Хабарҳо

Шикояти Песков аз боздошти тоҷири амрикоӣ

Майкл Калвей

Сухангӯи раиси ҷумҳури Русия мегӯяд, ҳукумат мехоҳад, сармоягузори шинохтаи амрикоӣ Майкл Калвей, ки дар ҳабси хонагӣ аст, дар форуми маъруфи иқтисодии Русия ҳузур дошта бошад. Майкл Калвей ба тақаллуби молӣ муттаҳам мешавад, ҳарчанд худаш иттиҳомот дар ин заминаро рад кардааст. Форуми иқтисодии Санкт Петербург ҳафтаи оянда баргузор мешавад.

Дмитрий Песков, сухангӯи Владимир Путин рӯзи 3-уми июн бо ишора ба номи Майкл шикоят кард, ки “вазъи маъюскунандае” бо ӯ пеш омадааст ва афзуд, ҳукумати Русия ӯро ҳамчун “тоҷири қобили эътимоде медонад, ки ба тиҷорат дар Русия кӯмак мекунад.” Айни замон ӯ гуфт, волоиятии қонун бояд таъмин шавад ва афзуд, ки ҳукумат ба парвандаи Майкл Калвей мудохила намекунад. Дмитрий Песков гуфт, “Мо албатта мехоҳем, Майкл дар байни ширкатдорони форум бошад”.

Ин нишасти иқтисодӣ, ки барои ҷалби сармоягузорон ба иқтисоди Русия ҳар сол баргузор мешавад, рӯзҳои 6 ва 8-уми июн дар шаҳри Санкт Петербург сурат мегирад. Боздошти Майкл Калвей, ки соли 1994 ширкати молии хусусии “Баринг Восток Капитал Партнерс”-ро таъсис додааст, сармоягузорони Ғарбӣ ва тоҷирони худи Русияро ҳайратзада кард. Онҳо омилҳои боздошт ва муҳокимаро ӯро шубҳабарангез медонанд.

Озарбойҷон хариди 10 Боинг-ро ба таъхир андохт

Ҳавопаймо аз соли 2017 вориди бозор шуд, аммо ҳоло аз парвоз мондааст.

Ширкати ҳавопаймоии “АЗАЛ”-и Озарбойҷон эълон кард, ки хариди ҳавопаймои Боинг 10737 Макс ба таъхир андохтааст. Аз ин пештар сухангӯи ширкат гуфт, ки ширкати бузург аз хариди ин ҳавопаймоҳо даст кашидааст. Сабаб ба гуфтаи Пошо Кесаминси, сухангӯи ширкат “омилҳои амниятӣ” будааст. Ӯ рӯзи 3-уми июн ба хабарнигорон гуфтааст, “АЗАЛ тасмим гирифт, ки ба сабабҳои амниятӣ аз ширкати Боинг 10 ҳавопаймо нахарад ва қарордоди марбутаро лағв кард”.

Баъди суқути ҳавопаймои серхаридори Боинг 737 Макс дар шаҳри Аддис Абебаи Эфиопия кишварҳои зиёде парвози ин ҳавопайморо дар фазои худ манъ карданд. Дар ин фалокат дар рӯзи 3-уми март 157 нафар кушта шуданд. Ҳавопаймо ба ширкати Эфиопия эйрлайнз тааллуқ дошт. Аз ин пеш бо айни мушкил ҳавопаймои Лайон Эйр аз Индонезия дар моҳи окятбр суқут кард ва 189 нафар ҳалок шуданд. Ҳавопаймои навро Боинг соли 2017 вориди бозор кард.

Тазоҳуроти занони қазоқ дар назди Кохи президент

Тазоҳуроти занон дар назди қасри президент

Як ҳафта қабл аз интихоботи раёсати ҷумҳурӣ дар Қазоқистон даҳҳо зан дар назди кохи раиси ҷумҳурӣ дар шаҳри Нурсултон пойтахти кишвар эътироз карданд. Онҳо хостанд, имтиёзҳои иҷтимоӣ ва манзил барои мардум бештар карда шавад.

Тазоҳургарон аз мақомот мехостанд, ки ваъдаҳояшон барои кӯмаки молӣ ва тақсими хона ба оилаҳои серфарзанд ва занони танҳоро иҷро кунанд. Онҳо “Хонаи дуруст барои фарзандони мо” шиор медоданд ва талаб карданд, ки нахуствазир Аскар Мамин, раиси ҷумҳури муваққат Қосимҷомарт Токаев ва Нурсултон Назарбоев, раиси ҷумҳури собиқ бо онҳо суҳбат кунад.

Бердибек Сафарбоев, вазири кор ва ҳифзи иҷтимоӣ ва дигар мақомоти расмӣ бо тазоҳургарон мулоқот карда ва аз онҳо хостанд, ба бинои порлумон раванд, вале тазоҳургарон нарафтанд. Баъди ҳалокати панҷ кӯдак дар як хонаи фақирона дар Қазоқистон дар моҳи феврал талабу эътироз дар масъалаи хона зиёд шуд.

Ифшогари урдӯгоҳҳои Чин аз Қазоқистон рафт

Сайрагул Саутбой дар додгоҳи Алмаато. Акс аз бойгонист.

Сайрагул Саутбой, як шаҳрванди қазоқтабори Чин, ки шаҳодаташ дар додгоҳ, “ӯрдугоҳҳои тарбиявӣ” дар шимолуғарби кишварро ошкор кард, Қазоқистонро тарк кардааст, чун ба ӯ ҳаққи паноҳандагӣ надодаанд. Айман Умаров, вакили дифои ӯ рӯзи 3-уми июн дар Фейсбук навишт, ки фарди зери ҳимояташ Қазоқистонро тарк карда ва ба қавли ӯ ба “яке аз кишварҳои пешрафтаи ҷаҳон рафтааст.”

Сайрагул Саутбой бисёр мехост дар Қазоқистон паноҳандагии сиёсӣ бигирад, вале моҳи август додгоҳ ӯро ба убури ғайриқонунии марз муттаҳам кард. Ӯро озод карданд ва ба Чин ҳам насупурданд. Сайрагул Саутбой моҳи апрел аз Чин гурехт ва дар додгоҳ гуфт, ки ҳазорон нафар аз аққалиятҳои қазоқ, уйғӯр ва дигар мусулмононро мақомоти Чин дар вилояти Шинҷон дар урдӯгоҳҳои махсус ба истилоҳ “тарбияи сиёсӣ” нигаҳ медоранд.

Мақомоти Созмони Милал гуфтаанд, ки дар Чин тахминан як миллион уйғӯр дар “марказҳои зидди ифротгароӣ” нигаҳ дошта мешаванд ва миллионҳо нафари дигарро ба урдӯгоҳҳои тарбиявӣ мефиристанд. Ҳомиёни ҳуқуқ мегӯянд, бо ин афрод бадрафторӣ сурат мегирад ва онҳоро маҷбур мекунанд, мухолифи эътиқоду арзишҳои динии худ рафтор намоянд.

Сафари давлатии Доналд Трамп ба Бритониё оғоз шуд

Доналд Трамп ва ҳамсараш ҳангоми вуруд ба Лондон.

Доналд Трамп, раиси ҷумҳури Амрико бо сафари серӯзаи давлатӣ вориди Бритониё шуд. Ӯ ва ҳамсараш Мелания рӯзи 3-уми июн бо хонаводаи салтанатии Бритониё ва аз ҷумла Малика Элизаветаи дуввум дар Кохи Букингем мулоқот карданд.

Пеш аз вуруд ба Лондон, ӯ раиси ин шаҳр Содиқ Хонро дар Твиттер “як бозандаи сангдил” номид, чун ӯ ҳукумати Бритониёро барои истиқболи бошукӯҳи Доналд Трамп танқид кард. Сафари Трамп ба Лондон дар замоне сурат мегирад, ки Бритониё ба сабаби масъалаи хуруҷ аз Иттиҳодияи Аврупо ба бӯҳрони сиёсӣ гирифтор шудааст.

Тереза Мей нахустазири кишвар чанде пеш истеъфо дод. Трамп қабл аз сафар баёнияҳои баҳсбарангезе дар бораи Бритониё дод ва аз ҷумла гуфт, ки Борис Ҷонсон, вазири собиқи умури хориҷӣ метавонад, як нахуствазири “олӣ” бошад.

Ӯ гуфт, ки вориси Тереза Мей пули хуруҷ ба Иттиҳодияи Аврупоро напардозад ва ин иттиҳодияро бе ҳеҷ созише тарк кунад. Ҳангоми наҳори давлатии Доналд Трамп бо Элизаветаи дуввум, садҳо нафар қасд доранд, ба нишони эътироз аз сафари ӯ “наҳории мардумӣ” ташкил кунанд .

Дар Алмато чанд эътирозгарро ҳабси хонагӣ карданд

Додгоҳе дар шаҳри Алматои Қазоқистон шаби 1-уми июн ду зан - Жазира Демеуова ва Гулзипа Ҷаукероваро ба ҳабси хонагӣ гирифт. Додгоҳ гуфт, ин ду зан аъзои созмони мамнуъ ҳастанд ва ба ин тартиб, онҳоро то 1 моҳ ҳабси хонагӣ кард. Чанде пештар додгоҳ нисбати модари танҳо Оксана Шевчук низ айни ҳамин ҳукмро содир карда буд. Додгоҳ гуфт, вай узви ҳаракати мамнуи "Интихоби демократии Қазоқистон" аст.

Ҷаукерова ва Демеуова дар додгоҳ гуфтанд, ки аъзои созмони "Интихоби демократии Қазоқистон" нестанд, аммо ҳамзамон афзуданд, барномаи ин ҳаракат ба онҳо писанд аст.

Жазира Демеуова, Гулзипа Ҷаукерова ва Оксана Шевчук аз шумори даҳҳо боздоштшудаҳои эътирози 1-уми май дар шаҳри Алмато ҳастанд. Ин се танро ҳамзамон 9-уми май низ ҳангоми роҳпаймоии "Полки абадӣ" боздошт карда буданд. Миёнаҳои моҳи май хабар расид, ки онҳоро дар ҳамкорӣ бо ҳаракати мамнуи "Интихоби демократии Қазоқистон" гумонбар мекунанд.

Дар Қирғизистон корҳои иктишофӣ ва кандани уран манъ шуд

Дар Қирғизистон корҳои иктишофӣ дар майдонҳои дорои иҷозатнома бо ҳадафи пайдо кардани уран манъ шуд. Ин фармонро сарвазири Қирғизистон Муҳаммадқулӣ Абилғозиев имзо кард. Бар асоси фармон, то танзим шудани ин масъала дар сатҳи қонунгузорӣ, корҳои иктишофӣ ва кандани уран манъ мешавад.

Моҳи апрели соли ҷорӣ дар Қирғизистон дар пасманзари нақшаҳои коркарди кони урани вилояти Иссиқкӯл эътирози мардумӣ сар зад. Фаъолон дар шаҳрҳои Бишкек, Балиқчӣ, Қаракӯл ва дар наздикии кон эътироз баргузор карданд.

Дар робита ба норозигии мардум ҳукумати он кишвар 22-юми апрел фаъолияти ширкати "ЮрОсиё дар Қирғизистон"-ро дар кон муваққатан манъ кард. 25-уми апрел фаъолияти ширкат дар кон комилан манъ шуд. Ширкат гуфт, ки тасмим дорад, технологияи безарарро барои кандани уран кор фармояд.

Порлумони Қирғизистон 2-юми май қарор қабул кард, ки коркарди конҳои уран дар Қирғизистон манъ шавад.

Дар пойтахти Туркманистон навбатпоӣ барои биринҷу шакар идома дорад

Ин рӯзҳо пушти дари мағозаҳои давлатии пойтахти Туркманистон навбатпоии тӯлонии харидорони шакар, биринҷ ва равғани растанӣ мушоҳида мешавад.

"Шумори навбатпоён то 100 тан мерасад. Миёни онҳо занон бо кӯдакони ширхор, куҳансолон, кӯдакону наврасон ҳам ҳастанд. Онҳо аз субҳи содиқ назди мағоза меоянд",-гуфт як сокини Ишқобод.

Ба гуфтаи ин сокин, барои ҳар кас на бештар аз се кило биринҷ ва як кило шакар фурӯхта мешавад.

Расонаҳо хабар медиҳанд, дар ҳоле пушти дари мағозаҳои давлатӣ навбатпоӣ мушоҳида мешавад, ки дар бозорҳои он шаҳр қимати маҳсулот боло меравад.

Дар Туркманистон ду соли охир камчинии маҳсулоти ниёзи аввалия дида мешавад. Навбатпоӣ барои шакар, равған, тухми мурғ ва орду нон ба анъана табдил шудааст.

Ироқ ду шаҳрванди Фаронсаро ба қатл маҳкум кард

Рашид Қосим, зодаи Фаронса ва узви ДИИШ.

Додгоҳе дар шаҳри Бағдод ду шаҳрванди Фаронсаро барои узвият дар гуруҳи ба ном “Давлати исломӣ” ба қатл маҳкум кардааст. Додситонҳои Ироқ дар ин бора рӯзи 2-уми июн хабар доданд. Ҳамингуна дар як ҳафтаи гузашта 9 нафар шаҳрванди Фаронса бо айни иттиҳом дар Ироқ ба қатл маҳкум шуданд.

Ин афрод аз ҷумлаи 12 шаҳрванди Фаронса ҳастанд, ки размандагони курди зери ҳимояти Амрико дар Сурия дастгир карда ва моҳи январ ба Ироқ супурдаанд. Фаронса гуфтааст, ҳама кори мумкинро мекунад, то ҳукми ин афрод дар Ироқ иҷро нашавад. Дидбони Ҳуқуқи Башар мақомоти Ироқро ба истифодаи “усулҳои гуногуни шиканҷа” муттаҳам карда ва гуфтааст, Фаронсаву дигар кишварҳо набояд муҳокимаи шаҳрвандонашро ба кишварҳои дорои додгоҳҳои табъизгар вогузор кунанд.

Помпео: "Омодаи гуфтугӯи бе пешшарт бо Эрон ҳастем"

Майк Помпео

Майк Помпео, вазири умури хориҷии Амрико мегӯяд, кишвараш омодаи гуфтугӯ бе “пешшарт” бо Эрон аст, вале фишор ба онро идома медиҳад. Ӯ дар ин бора рӯзи 2-уми июн баъди мулоқот бо ҳамтои швейтсариягиаш Игнасио Касис дар шаҳри Белинзона сухан гуфт.

Швейтсария ба ҳайси миёнарав, аз Амрико дар Эрон намояндагӣ мекунад. Аз ин пештар дар рӯзи 1-уми июн раиси ҷумҳур Ҳасан Рӯҳонӣ гуфтааст, агар Амрико бо эҳтиром рафтор кунад, мумкин аст, Эрон бо он кишвар музокирот анҷом диҳад.

Танишҳо байни Амрикову Эрон баъд аз он авҷ гирифт, раиси ҷумҳур Доналд Трамп, Амрикоро аз созиши атомӣ бо Эрон хориҷ ва таҳримоти иқтисодӣ ба зидди онро аз нав барқарор кард. Ӯ моҳи майи имсол аз кишварҳои ҷаҳон хост, воридоти нафти Эронро бас кунанд, дар акси ҳол ба таҳримоти Амрико дучор мешаванд. Чанде пештар Амрико нерӯҳои ҷангиаш дар Ховари Миёнаро тақвият дод ва гуфт, нерӯҳоро барои муҳофизати манофеъ аз таҳдидҳои эҳтимолии Эрон фиристодааст. Ҳарду Амрикову Эрон гуфтаанд, ки хоҳони ҷанг нестанд.

Рӯҳонӣ гуфтааст, бо Амрико гуфтугӯ мекунем, агар...

Ҳасан Рӯҳонӣ

Як хабаргузории нимарасмии Эрон навиштааст, раиси ҷумҳур Ҳасан Рӯҳонӣ гуфтааст, агар Амрико бо эҳтиром рафтор кунад, мумкин аст, Эрон бо он кишвар музокирот анҷом диҳад. Хабаргузории Форс бо нашри ин хабар аз қавли Ҳасан Рӯҳонӣ навиштааст, ки Эронро наметавон бо фишор ба гуфтугу моил кард.

Хабаргузории Форс аз қавли Рӯҳонӣ навиштааст: "Мо тарафдори музокироти мантиқӣ ҳастем, ба шарте ки тарафи муқобил дар мизи музокирот бо эҳтиром рафтор кунад ва ба муқаррароти байналмилалӣ эҳтиром бигузорад.”

Раиси ҷумҳури Эрон дар ин бора рӯзи 1-уми июн суҳбат кардааст ва дар замоне, ки танишҳо байни Амрикову Эрон авҷ гирифтааст. Ин танишҳо баъд аз он авҷ гирифт, раиси ҷумҳур Доналд Трамп, Амрикоро аз созиши атомӣ бо Эрон хориҷ ва таҳримоти иқтисодӣ ба зидди онро аз нав барқарор кард.

Ӯ моҳи майи имсол аз кишварҳои ҷаҳон хост, воридоти нафти Эронро бас кунанд, дар акси ҳол ба таҳримоти Амрико дучор мешаванд. Чанде пештар Амрико нерӯҳои ҷангиаш дар Ховари Миёнаро тақвият дод ва гуфт, нерӯҳоро барои муҳофизати манофеъ аз таҳдидҳои эҳтимолии Эрон фиристодааст.

Сабабҳои таркиши қавӣ дар Русия таҳқиқ мешавад

Таркиш корхонаро комилан вайрон кардааст.

Мақомоти Русия мегӯянд, корҳои наҷотбахшӣ дар як корхонаи азими аслиҳа дар шаҳри Дзержинск ба поён расид ва ҳоло муфаттишон сабабҳои таркиш дар корхонаро таҳқиқ мекунанд. Валерий Синков, як мақоми вазорати ҳолатҳои фавқуллодаи Русия рӯзи 2-уми июн ба хабарнигорон гуфт, “ки амалиёти наҷот хотима ёфт ва ҳоло чораҳо барои бартараф кардани оқибатҳои фалокат ва осеби он ба биноҳо андешида мешаванд.

Вазорати тандурустии Русия рӯзи 2-уми июн гуфт, баъди таркиш дар корхонаи аслиҳасозии “Кристал” 89 нафар аз ҷумла 44 коргари корхона баъди таркиш ба бемористон муроҷиат кардаанд. Ба гуфтаи мақомот, 39 коргар ва 46 сокини биноҳои атроф асосан аз шишапораҳо осеб дидаанд. Ба навиштаи Би Би Си дар ин корхона асосан бомбҳои қавӣ месохтаанд.

Ҳамлаву хунрезӣ дар Афғонистон идома кард

Инҷо маҳалли ҳамлаи маргталабона дар рӯзи 31-уми май дар Кобул аст.

Дар остонаи Иди Рамазон ҳамлаву бобмгузорӣ дар Афғонистон идома ёфт ва Толибон даъват барои оташбас дар рӯзи идро рад карданд. Ба гуфтаи мақомоти расмӣ, рӯзи 2-уми июн танҳо дар шаҳри Кобул се таркиш ба вуқӯъ пайваст. Дар натиҷаи таркиши бомби насбшуда дар бадани як автобуси донишҷӯён дар Кобул як нафар кушта ва 17 тани дигар маҷруҳ шуд. Касе масъулияти ин ҳамларо бар дӯш нагирифтааст.

Чанд соат пештар дар вилояти Ғазнӣ як мошини бомбгузоришуда таркид ва 6 афсари пулисро кушт. Толибон масъулияти ҳамлаи рӯзии 22-уми май дар Ғазниро бар ӯҳда гирифтанд, ки дар натиҷаи он ду афсари пулис ҷон доданд ва 17 тани дигар захм бардоштанд. Рӯзҳои 30 ва 31-уми май ҳам бе таркишу хунрезӣ набуд. Соли гузашта Толибон дар Иди Рамазон созиши оташбаси серӯза эълон карданд ва афғонҳо умедвор буданд, ки шояд имсол ҳам бишавад.

Сафари Попи Рум дар Руминия поён меёбад

Попи Рум дар шаҳри Блаж

Попи Рум Франсис сафари серӯзааш дар Руминияро бо омурзиши ҳафт усқуфи руминӣ ва юнонӣ ба поён мебарад, ки дар даврони коммунистӣ ҳалок шуданд. Қарор аст, пешвои католикҳои ҷаҳон ба шаҳри Блаҷ, ба яке аз маҳаллаҳои фақирнишини лӯлиён биравад, ки шароити зиндагиашон баръакси дигар гӯшаҳои Руминия бисёр бад аст.

Попи Рум барои ҳафт рӯҳоние ниёиш мекунад, ки аз соли 1950 то соли 1970 дар даврони ҳукумати коммунистӣ дар Руминия боздошт шуданд. Ҳамаи онҳо, ё дар зиндон, ё дар урдӯгоҳҳои корӣ аз сардиву беморӣ ва ё гуруснагӣ ҷон додаанд. Аксарияташон ҳам муҳокима нашудаанд ва ё онҳоро бе маросими видоъ ва дар гӯрҳои беном дафн кардаанд.

Яке аз ҳадафҳои сафари Попи Рум ба Руминия, аз байн бурдани ҷудоии дерина дар байни католикҳо ва масеҳиёни православ аст. Дар Руминияи 20 миллион нафарӣ тақрибан 4 дар сади мардум худро католик мешуморанд, бақия пайравони Калисои православӣ ҳастанд.

Таркиш дар корхонаи "Кристалл"-и Русия. Даҳҳо нафар маҷруҳ шуд

Дар корхонаи истеҳсоли маводи тарканда дар шаҳри Дзержински вилояти Нижегороди Русия таркиш ба вуқуъ пайваст.

Мақомоти Русия гуфтанд, бар асари таркиши рӯзи 1-уми июн дар корхонаи "Кристалл" дастикам 38 нафар маҷруҳ шудааст. Дар бораи талафоти ҷонӣ гузориш нест.

Бино ба хабари оҷонсии “Интерфакс” ва “ТААС” дар натиҷаи таркиш як бахши корхона қисман хароб шуда, сӯхтор ба амал омадааст. Дар чандин навори видеоӣ, ки ба Интернет роҳ ёфт, садои баланди таркиш шунида мешавад ва дуди ғафс дар ҳоли баланд шудан ба ҳаво аст.

Дмитрий Красанов, муовини волии Нижегород, дар суҳбат бо телевизионҳои маҳаллӣ гуфт, “ду нафар нопадид шудаанд”. Хабаргузории “Интерфакс” навишт, Глеб Никитин, раиси ҳукумати Нижегород нишасти фавқулода даъват кард.

Малик Салмон Эронро ба ҳимоят аз шибҳанизомиён айбдор кард

Салмон бин Абдулазиз, подшоҳи Арабистони Саудӣ

Дар яке аз шадидтарин ҳамлаҳои лафзии худ ба Эрон, шоҳи Саудӣ Теҳронро ба "пуштибонӣ аз шибҳанизомиён" муттаҳам кард, ки ба гуфтаи ӯ "таҳдиде барои таъмини манбаъҳои нафтии ҷаҳон ва амнияти минтақа аст".

Малик Салмон рӯзи 1-уми июн дар нишасти изтирории Созмони Ҳамкориҳои Исломӣ дар Макка ҳамлаи чанде пеш ба киштиҳои нафткаш дар соҳили Имороти Муттаҳидаи Араб ва ҳамлаи бесарнишинҳо ба муассисаҳои тавлиди нафти Саудиро "амали террористӣ" номид. Вай дар ҷамъи ҳозирон гуфт: "Мо тасдиқ мекунем, ки ин ҳамлаҳои тахрибкорона нафақат ба Саудӣ ва минтақаи Халиҷи Форс, балки ба амнияти ҳавонавардӣ ва таъмини ҷаҳон бо энержӣ равона шудааст."

Шоҳи Саудӣ гуфт, ҳамлаи дронҳо ба муассисаи тавлиди нафти ин кишвар аз тарафи шӯришиёни ҳусӣ дар Яман анҷом шудааст. Вай шӯришиёни ҳусиро "шибҳанизомиёни террористи зери ҳимояти Эрон" ном бурд.

Арабистони Саудӣ (суннинишин) зери ҳимояти Амрико яке аз рақибони асосии Эрон (асосан шианишин) аст ва ҳарду барои касби нуфузи бештар дар минтақа сабқат доранд. Ҳафтаҳои охир таниш дар гулӯгоҳи Ҳурмуз, яке аз роҳҳои калидӣ барои ҳамлу нақли нафт дар даҳонаи Халиҷи Форс афзоиш ёфтааст ва Эрон таҳдид карда, ки онро мебандад.

Дар оғози моҳи гузашта Вашингтон бо зикри таҳдидҳо аз тарафи Эрон нерӯҳояшро дар Ховари Миёна ва Халиҷи Форс тақвият дод.

Эрон даст доштани худ дар ҳамлаҳои ахирро рад кардааст. Аббос Мӯсавӣ, муовини сухангӯи Вазорати умури хориҷии Эрон, ба хабаргузории ИРНА гуфтааст, "Арабистони Саудӣ моҳи мубораки Рамазон ва шаҳри муқаддаси Маккаро барои ба даст овардани суди сиёсӣ ва иттиҳомҳои беасос алайҳи Эрон истифода кардааст."

Арабистони Саудӣ моҳи гузашта ин нишасти изтирориро даъват карда буд, то мавқеи ягонаи кишварҳои мусалмонӣ ва арабиро зидди Эрон эҷод кунад. Вале мақомоти Ироқ, ки ҳам бо Эрон ва ҳам Амрико ҳамкории қавӣ доранд, гуфтаанд, "амният ва субот дар Эрон ба нафъи давлатҳои мусалмонӣ ва арабист".

Дар тирандозӣ дар Вирҷиния дастикам 12 нафар кушта шуд

Дар тирпаронии як марди зоҳиран "норозӣ" дар бинои ҳукумати шаҳри соҳилии Вирҷинияи Амрико дастикам 12 нафар кушта шудаанд.

Полис рӯзи 31-уми май гуфт, марди мусаллаҳ пеш аз он ки аз тарафи нерӯҳои давлатӣ кушта шавад, чаҳор нафари дигарро захмӣ кардааст. Яке аз захмиён маъмури полис аст. Мақомот мегӯянд, ӯ ба далели ин ки либоси зидди гулӯла пӯшида буд, осеби ҷиддӣ надидааст.

Ҷеймс Сервера, раиси полис, гуфт, марди ҳамлавар дар бинои ҳукумати шаҳри соҳилии Вирҷиния ба кормандон "яксара" тир кушод.

Ба иттилои расмӣ, тирандоз дар бахши хадамоти коммуналӣ фаъолият дошт. Ҳодиса замоне иттифоқ афтод, ки соат чаҳори бегоҳ шуда буд ва кормандон барои берун рафтан аз идора омода медиданд. Ангезаи ҳамла ошкор нашудааст.

Солҳои ахир дар Амрико куштори одамон бо истифода аз силоҳи оташфишон бештар шудааст ва бисёре аз сокинон мехоҳанд қонуни назорати силоҳ бозбинӣ шавад.

Садамаи маргбор. Ҳалокати се ҷавон дар роҳи Душанбе-Хуҷанд

Акс аз бойгонӣ

Бар асари садамаи худраве дар роҳи Душанбе-Хуҷанд се нафар ҷон бохтаанд. Ҳодиса шаби 30-юми май дар ҳудуди ноҳияи Спитамен, ки бахше аз роҳи Душанбе-Хуҷанд аст, иттифоқ афтодааст.

Вазорати умури дохилии Тоҷикистон рӯзи 1-уми июн дар хабарномае гуфт, Фаррух Додоев, сокини 31-солаи шаҳри Истаравшан, ҳангоми ҳаракат дар роҳи Душанбе-Хуҷанд “аз ӯҳдаи идораи мошин набаромад”, ба мошини тамғаи “Тойота Прадо” бархӯрдааст. Ронандаи ин мошин дар навбати худ ба як мошини боркашон задааст.

“Дар натиҷа, ронандаи мошини “Мерседес-Бенс” Фаррух Додоев ҷароҳати вазнин бардошта, дар роҳ ба беморхона ба ҳалокат расид. Ҳамчунин мусофирони дигари мошини мазкур, Азизҷон Ҷалолов ва Насим Ҳакимов дар беморхона ҷон доданд”, -- гуфта шудааст дар хабарномаи Вазорати умури дохилӣ.

Мақомот мегӯянд, ронандаи мошини тамғаи “Тойота-Прадо” бо се мусофираш маҷруҳ шуда, дар шифохона бистарианд. Таҳқиқот дар ин замина идома дорад. То ҳол наздикони ҳалокшудаҳо ваё осебдидагон дар бораи ҳодиса чизе нагуфтаанд.

Дар тақрибан ду соли охир дар Тоҷикистон бар асари садамаҳои нақлиётӣ беш аз 700 нафар ҷон бохта ва беш аз 2300 тани дигар маҷруҳ шудаанд. Аксари ин садамаҳо, ба гуфтаи мақомот, аз беэҳтиётӣ сар задаанд.

Дар оғози майи имсол вакили порлумони Тоҷикистон Ҷамшед Муртазозода барои пешгирӣ аз садамаҳои маргбор пешниҳод кард, ки ҷаримаи ронандаҳоро боло баранд. Вале сокинон мегӯянд, баъзе ронандагон интихобӣ муҷозот мешаванд ва ба ҳамин хотири ҳамагуна қонун нақзи қоидаҳои ҳаракат дар роҳҳоро кам нахоҳад кард.

IAEA: Эрон бар асоси созиши ҳастаӣ бо қудратҳои ҷаҳон амал кард

Бинои Оҷонси байналмилалии энержии атомӣ дар Вена

Оҷонси байналмилалии энержии атомӣ (IAEA) мегӯяд, Эрон ба ваъдааш бар асоси созиши ҳастаии соли 2015 бо қудратҳои бузурги ҷаҳон идома медиҳад, агарчи захираҳои ураниюми ғанишуда бо дараҷаи поин ва обҳои сангини ин кишвар дар ҳоли афзоиш аст.

Бар асоси гузориши чаҳормоҳаи Оҷонс, ки рӯзи 31-уми май ба кишварҳои узви ин идора ирсол шуд, Эрон бар асоси маҳдудиятҳое, ки дар мувофиқатнома зикр шудааст, амал кардааст.

Эрон соли 2015 бо шаш қудрати бузурги ҷаҳон тавофуқ кард, ки дар ивази коҳиши таҳримҳои байналмилалӣ, барномаи ҳастаиашро маҳдуд мекунад.

Амрико дар соли гузашта аз ин созиш берун шуд. Президент Доналд Трамп тавофуқномаи атомиро бо Эрон ноқис хонд ва дубора зидди ин кишвар таҳримҳо ҷорӣ кард.

Дар як моҳ дар Идлиби Сурия 948 нафар кушта шудааст

Дар натиҷаи афзоиши ҷангҳо дар як моҳи гузашта дар вилояти Идлиби Сурия 948 тан кушта шудаанд.

Созмони назорат аз ҳуқуқи башари Сурия, қароргоҳаш дар Лондон, рӯзи 31-уми май гуфт, тақрибан сесад нафари онҳо афроди мулкӣ, аз ҷумла кӯдакон ҳастанд. Ин талафот дар натиҷаи тирандозии низомиёни Русия ва нерӯҳои Сурия давлатии сурат гирифтааст.

Ба гуфтаи масъулони созмон, дар ҷараёни ҳамин муддат 22 нафар, ба шумули даҳ кӯдак, дар натиҷаи тирандозии шӯришён ба минтақаҳои зери назорати нерӯҳои тарафдори режими Башор Асад кушта шудаанд.

Дар моҳи сентябри соли гузашта ба хотири ҷилавгирӣ аз ҳуҷумҳои зиёди нерӯҳои тарафдори режими Сурия ба вилояти Идлиб ва минтақаҳои атрофи он як тавофуқ сурат гирифт. Ин минтақаҳо дар назорати гурӯҳи “Таҳрири Шом” аст.

Ба гуфтаи созмони назорат аз ҳуқуқи башари Сурия, аммо режими Сурия ва муттаҳиди он Русия аз моҳи апрел ба ин сӯ ҳамлаҳои маргбори ҳавоиро ба манотиқи таҳти назорати шӯришён бештар кардаанд.
Ин дар ҳолест, ки Дмитрий Песков, сухангӯи Кремл, рӯзи 31-уми май гуфт, дар вилояти Идлиб ба оташбас ниёз буд ва лозим аст, ки террористон тирандозӣ болои афроди мулкӣ ва муассисаҳоро бас кунанд.

Иёлоти Муттаҳидаи Амрико ва Туркия аз гурӯҳҳои мухталифи шӯришён, вале Русияву Эрон аз режими Башор Асад ҳимоят мекунанд.

Ангела Меркел, садри аъзами Олмон, рӯзи ҷумъа дар нишасти хабарии муштарак бо Майк Помпео, вазири умури хориҷии Амрико дар Берлин гуфт, “мо мушкилоти мухталифро мавриди баҳси қарор хоҳем дод. Табъан дар мавриди вазъияти Сурия ва авзои хеле шикананда дар Либия гуфтугӯ хоҳем кард.”

Ба гуфтаи мақомоти Созмони Милали Муттаҳид, аз моҳи апрели имсол ба ин тараф дар натиҷаи ҷангҳо дар Сурия ҳудуди 270 ҳазор тан бе ҷо шудаанд. Идораҳои СММ маҷбур шудаанд, ки дар баъзе аз минтақаҳои ин кишвар фаъолияти худро муваққатан боздоранд.

Раиси ҷамъияти "Помир" дар Санкт-Петербург даргузашт

Бахтибек Бердов

Бахтибек Бердов, роҳбари ҷамъияти "Помир" дар шаҳри Санкт-Петербурги Русия ва вакили шӯрои мунитсипиалӣ аз ҳизби "Русияи воҳид" рӯзи 30-юми май дар 54-солагӣ даргузашт. Қарор аст, ӯро дар оромгоҳи мусалмонони Санкт-Петербург дафн кунанд. Бахтибек Бердов соли 1965 дар Вилояти Мухтори Кӯҳистони Бадахшон зода шуда, бештар бо лақаби "Бабек" маъруф буд. Вай солҳои 1984-1986 дар сафи нерӯҳои мусаллаҳи Шӯравии собиқ хидмат ва соли 2000 Донишгоҳи омӯзгории ба номи Гертсен ва баъдан Академияи хидмати давлатии ҳавзаи Шимолу Ғарбро хатм кардааст. Солҳои охир дар Омӯзишгоҳи захираҳои об кор мекард. Қаҳрамони Аврупо, ноиб-қаҳрамони Иттиҳоди Шӯравӣ ва чаҳор даъфа қаҳрамони Петербург оид ба каратэ буд. Сомонаи "Pamir Daily News" рӯзи 31-уми май навишт, ки Бахтибек Бердов новобаста аз маҳал ба муҳоҷирони корафтодаи тоҷик кумак мекард. Ин вебсайт айни замон навишт, ӯ дар гузашта яке аз мухолифони Душанбеи расмӣ буд, вале солҳои охир бо мақомот ва сафорати Тоҷикистон дар Русия ҳамкории фаъол дошт.

Масъулияти таркиш дар Кобулро Толибон ба ӯҳда гирифтанд

Толибон масъулияти таркиши маргбори як мошини ҳомили бомбаро ба ӯҳда гирифтанд. Ин ҳодиса субҳи 31 май дар Кобул, пойтахти Афғонистон рух дод ва ин таркиши дуюми пурқурбонӣ дар давоми ду рӯзи ахир дар ин кишвар мебошад. Дар ин таркиш, ки дар маҳаллаи Яккатути Кобул рух дод, тибқи гузоришҳо 7 нафар куштаву захмӣ шуданд. Як шоҳиди ин таркиш ба хабаргузории Ройтерс гуфт, ки дар паи таркиши ногаҳонӣ ҳадди аққал як марди маҷрӯҳро ба бемористон интиқол додааст.

Таркиш лаҳзаҳое рух дод, ки корвони низомии амрикоиҳо аз ин маҳалла убур мекард. Сухангӯи низомиёни амрикоӣ гуфт, ки дар ин ҳодиса чор низомии онҳо ҷароҳати сабук бардоштаст. Сухангӯи вазорати умури дохилии Афғонистон Нусрат Раҳимӣ ба хабаргузории Франс Пресс гуфт, ки дар ин ҳодиса чор раҳгузар кушта ва се нафар маҷрӯҳ шуданд.

Дар ҳамин ҳол сухангӯи Толибон Забеҳулло Муҷоҳид, ки ҳамларо кори дасти ин гурӯҳи шӯришӣ номид, бидуни овардани далеле иддао кард, ки дар таркиш 10 сарбози амрикоӣ кушта шуд.

Фаронсаву Олмон хостори азсаргирии музокироти сулҳи Украина шуданд

Президенти Украина дар сӯҳбат бо вазирони хориҷаи Олмону Фаронса дар Киев

Вазирони хориҷаи Фаронсаву Олмон гуфтанд, ки ин кишварҳо хостори азсаргирии музокирот барои хатми низоъҳои мусаллаҳона дар Украина мебошанд. Вазири олмонӣ Ҳейко Маас ва ҳамкори фаронсавиаш Жан Ив Ле-Дриан рӯзи 30 май дар як нишасти матбуотӣ гуфтанд, ки дар Киев бо президенти нави Украина Владимир Зеленский як сӯҳбати фавқулодда хубе анҷом додаанд. Фаронсаву Олмон пуштибонҳои муҳими ҷараёни сулҳи Украина мавсум ба “созишномаи Минск” мебошанд, ки ҳадафаш пешбурди музокирот бо ҷудоиталабони рӯ ба Кремлин ба хотири хатми ҷангҳо дар шарқи Украина мебошад.

Шурӯъ аз апрели соли 2014 дар низоъҳои мусаллаҳонаи шарқи Украина ҳудудан 13 ҳазор нафар кушта шудаанд. Низоъҳои мусаллаҳона дар қаламравҳои минтақаҳои Донетск ва Луҳанск дар шаҳри Украина ҷараён доранд. Маас гуфт, ки фурсати муносиби азсаргирии музокираҳо бар асоси созишномаи Минск фаро расидааст. Ӯ гуфт, ки шонси воқеии барқарории сулҳ фаро расидааст ва президент Зеленский ҳам гуфтааст, ки барқарории сулҳ дар авлавияти кори ӯ хоҳад буд.

Помпео Эронро дар ҳамла ба нафткашонҳои Иморот айбдор кард

13 май, бандари Фуҷайра. Киштии "ANDREA VICTORY" осеб дидааст

Вазири хориҷаи ИМА Майк Помпео гуфт, ки Эрон дар оғози моҳи май ба хотири фишор овардан дар афзоиши нархи нафти хом ба киштиҳои нафткаши Имроти Муттаҳидаи Араб ҳамла кардааст. Помпео ин нуктаро дар остонаи сафараш ба Аврупо рӯзи 30 май баён кард. Қабл аз ин мушовири амнияти миллии Кохи Сафед Ҷон Болтон гуфт, ки шаҳодати ҳамлаи эрониҳо ба нафткашонҳои Иморотро ҳафтаи оянда дар ихтиёри Шӯрои амнияти СММ қарор медиҳад.

Ба савол дар бораи ин ки оё Помпео ин шаҳодатҳоро дидааст ё на, ӯ гуфт: “Бале. Сафир Болтон онро дуруст кардааст”. Теҳрон даст доштанаш дар ҳама гуна ҳамлаҳоро рад карда мегӯяд, ки ин иттиҳомот “соддалавҳона” буда дар навбати худ Вашингтонро барои “ниятҳои бад”-аш дар минтақа айбдор кард. Инчунин рӯзи 30 май намояндаи вижаи ИМА дар умури Эрон ҳушдори Вашингтонро такрор кард, ки агар Эрон манфиатҳои Амрико дар минтақаро ҳадаф қарор диҳад, ИМА посухи низомӣ хоҳад дод.

Тафтиши телефони наздикони муҳоҷирон дар Туркманистон

Дар ноҳияи Саяти вилояти Лебапи Туркманистон кормандони мақомоти қудратӣ хона ба хона гашта, телефону симкорти сокинонеро тафтиш мекунанд, ки наздиконашон дар муҳоҷирати корӣ дар Туркия ҳастанд.

"Кормандони пулис ва амният ба хонаҳо омада, мепурсанд, ки фарзанд ё наздиконатон дар Туркия чӣ кор мекунанд? Бо онҳо тамос мегиред? Чӣ қадар пул мефиристанд?" - гуфт як манбаъ аз Саят.

Ба қавли ҳамсуҳбати мо, маъмурони ҳифзи ҳуқуқи туркман ҳатто телефону симкортҳои бархе аз сокинонро барои тафтиш бо худ бурдаанд ва ҳудуди 15 рӯз мешавад, барнагардондаанд.

Созмонҳои ҳомии ҳуқуқи байналмилалӣ пайваста ҳукумати Туркманистонро барои нақзи ҳуқуқу озодии шаҳрвандон танқид мекунанд. Бахши туркмании Радиои Озодӣ борҳо хабар дода буд, ки мақомоти ҳифзи ҳуқуқи Туркманистон телефонҳои сокинонро мусодира карда, маълумоти шахсии онҳоро тафтиш мекунанд.

Дар вилояти Дашоғузи Туркманистон моҳи марти соли гузашта маъмурони пулис телефонҳои кормандони буҷавӣ, аз ҷумла муассисаҳои таълимиро дастаҷамъона мусодира карда буданд.

Ёфтҳои бештар

Гузоришҳои видеоӣ

Сармояҳои барбодрафта? Шикваи онҳое, ки аз "Нури Раҳмон" хона мехостанд
лутфан мунтазир бошед

Феълан кор намекунад

0:00 0:02:48 0:00
XS
SM
MD
LG