Пайвандҳои дастрасӣ

Хабари нав

Хабарҳо

Зеленский ба Радиои Озодӣ дар толори варзиш мусоҳиба дод

Президенти Украина Володимир Зеленский ба Бахши украинии Радиои Озодӣ дар толори варзиш дар Бруссел мусоҳиба дод.

Дар ин гуфтугӯ бо хабарнигори Бахши украинии Радиои Озодӣ Григорий Жигалов, ки низ мисли президент дар велотренажёр нишаста буд, раҳбари Украина ба пурсишҳое дар бораи эҳтимоли вуруди кишвараш ба НАТО ва Иттиҳоди Аврупо, мушкилоташ бо порлумон, беқурбшавии эҳтимолии пулии миллии Украина, вазъият дар Донбасс ва муносибаташ ба вазирони амалкунанда посух дод.

Аз ҷумла Зеленский самтгирии кишварашро ба сӯйи НАТО ва Иттиҳоди Аврупо тасдиқ намуд. «Мо кишвари мустқилем ва ҳаққи интихоб аз мост,» – гуфт президент. Вай аммо афзуд, бо эҳтиром ба ҳуқуқи мардуми кишвараш ин масъалаҳо, вақте ки омода шуданд, дар назархоҳии умумӣ ҳал хоҳанд гашт.

Президенти Украина вазъи мураккаби иқтисодии кишварашро тасдиқ намуд, аммо овозаҳоро дар бораи эҳтимоли беқурбшавии эҳтимолии пулии миллӣ рад кард. Ҳамзамон ӯ дар бораи омодагии Иттиҳоди Аврупо ба кумаки молии Украина изҳори назар кард.

Духтари 11-сола дар Варзоб ба дарё афтод ва ҷон бохт

Як хонандаи мактаб дар деҳаи Такоби ноҳияи Варзоб ба дарё афтода, ҷон бохтааст. Мутриба Ваҳҳобидиноваи 11-сола дар синфи чаҳорум мехонд.

Наздиконаш ба Радиои Озодӣ гуфтанд, Мутриба 5-уми июн, дар рӯзи таҷлил аз Иди Фитр, ҳамроҳи хоҳари ҳафтсолааш ба кӯча баромада буд.

"Ҳарду хостаанд, ки аз болои пули чӯбин гузаранд, нохост ба дарё афтодаанд. Ҷасади Мутрибаро дар оромгоҳи деҳа дафн карданд", -- гуфт яке аз наздикони ӯ ба Радиои Озодӣ.

Сафар Шарофов, омӯзгори мактаб дар деҳаи Такоб, низ гуфт, "мардум хоҳари Мутрибаро наҷот доданд, вале натавонистанд, худи ӯро зуд аз об берун кашанд."

Дар гузашта низ баъзе аз хонандагони мактаб ба дарё афтодаанд. Аз ҷумла, моҳи апрели соли гузашта ду духтар – як хонандаи синфи 8 ва як хонандаи синфи 11 дар ноҳияи Рашт ҳангоми суратгирӣ аз болои санг лағжида дар дарёи Сурхоб ғарқ шуданд.

Доналд Трамп гуфт, омодаи гуфтугӯ бо Эрон аст, вале...

Доналд Трамп бо малика Елизабет

Доналд Трамп, раиси ҷумҳури Амрико, гуфт, ки барои музокира бо Эрон омодааст, вале ҳамзамон афзуд, "ҳамеша эҳтимоли иқдоми низомӣ зидди Теҳрон вуҷуд дорад".

Трамп, ки бо сафари давлатӣ дар Бритониё аст, рӯзи 5-уми июн ба телевизиони ITV гуфт, "аз замоне ки ман корро сар кардам, Эрон як кишвари ххасмона буд."

Вай афзуд, "онҳо дар он замон кишвари террористи рақами яки дунё буданд ва, мумкин аст, имрӯз ҳам бошанд."

Президент Трамп гуфт, ҳеч майле ба ҷанг бо Эрон надорад, аммо "ҳамеша эҳтимоли иқдоми низомӣ ҳаст."

Доналд Трамп ба ин суол, ки омодааст бо раисиҷумҳури Эрон Ҳасани Рӯҳонӣ гуфтугӯ кунад, ҷавоб дод: "Бале, албатта. Беҳтар медонам, ки гуфтугӯ кунем."

Шарҳи Трамп дар ҳоле садо дод, ки танишҳо байни Эрону Амрико ва муттаҳидонаш дар Халиҷи Форс афзоиш ёфтааст.

Вашингтон соли гузашта аз созиши ҳастаӣ бо Эрон берун шуд. Ин созиш соли 2015 байни қудратҳои бузурги ҷаҳон ва Эрон имзо шуда буд. Бар асоси он Эрон бояд аз таҳримҳои иқтисодӣ озод шуда, дар иваз барномаи ҳастаиашро коҳиш медод.

Доналд Трамп гуфт, шартҳои созишнома ба қадри зарурӣ "сахт набуд", то Эронро аз барномаҳои ҳастаӣ ва мушакиаш боздорад. Вашингтон зидди Теҳрон таҳримҳои нав ҷорӣ карда, бо нигаронӣ аз таҳдидҳои эҳтимолӣ аз сӯи Эрон ҳузури низомиашро дар Ховари Миёна низ тақвият додааст.

Оятуллоҳ Алии Хоманаӣ, раҳбари Ҷумҳурии Исломӣ, рӯзи 5-уми июн гуфт, "Эрон фирефтаи пешниҳоди Трамп дар бораи музокира нахоҳад шуд ва ҳамчунин аз барномаи мушакии худ даст нахоҳад кашид".

"Ин ҳиллаи сиёсӣ наметавонад мақомоти Эрон ва миллати Эронро ба дом андозад", -- гуфт Хоманаӣ.

Пизишкон аз кушта шудани даҳҳо эътирозгар хабар доданд

Кумитаи марказии пизишкони Судон рӯзи 5-уми июн гуфт, дар амалиёти ду рӯзи ахир барои саркӯби эътирозгарон дар шаҳри Хартум 60 нафар кушта шудааст.

Қаблан ин кумита гуфта буд, аз замоне ки амалиёт барои пароканда кардани эътирозгарон оғоз шуд, беш аз 300 нафар захмӣ гардидаанд. Боз ҳам рақами мушаххаси маҷруҳон маълум нест, чун Шӯрои низомии интиқолӣ интернетро дар чанд минтақа қатъ кардааст.

Шӯрои низомии интиқолӣ, ки баъд аз барканории раиси ҷумҳури пешин Умар ал-Башир аз ду моҳ ба ин сӯ қудратро дар даст дорад. Ин шӯро ҳамагуна тавофуқ бо мухолифинро бекор кард.

Мухолифон эълони артиши Судонро, ки гуфт, дар нӯҳ моҳ интихобот баргузор мешавад, рад кард. Мухолифон гуфтанд, ба маъракаи худ барои дур сохтани низомиён аз қудрат идома медиҳанд.

Ҳамлагарон дар Синойи Миср 10 нерӯи амниятиро куштаанд

Мақомоти Миср гуфтанд, ки ҳамлаварон дар нимҷазираи Синой 10 нерӯи амниятиро куштаанд.

Ҳамла рӯзи 4-уми июн ба як посгоҳи нерӯҳои амниятӣ замоне сурат гирифт, ки мардум барои намози ид гирдиҳам омада буданд.

То ҳол кадом гуруҳ масъулияти ҳамларо ба дӯш нагирифтааст.

Мақомоти Миср мегӯянд, ҳамлаварон талош кардаанд, ба тарафи саҳро гурезанд. Дар натиҷаи ҳамлаҳои ҳавоӣ 5 тани онҳо кушта шудаанд.

Миср чаҳор сол боз дар шимоли Синой бо ифротгароёни гуруҳи тундрави “Давлати исломӣ” даст ба гиребон аст.

Ҳалокати се сарбози украинӣ дар ҷанг бо ҷудоиталабон

Дар натиҷаи даргирӣ бо ҷудоиталабони тарафдори Русия дар шарқи Украина, се сарбози ин кишвар кушта ва се нафари дигар маҷруҳ шудааст.

Вазорати мудофиаи Украина рӯзи 5-уми июн гуфт, ҷудоиталабон аз мушакҳои зидди тонк ва норинҷакандоз истифода карда, "дар шабонарӯзи гузашта 16 бор бандҳои созиши оташбасро вайрон намуданд".

Бар асоси созиши Минск, истифода аз силоҳҳои вазнин, аз ҷумла мушакҳои зидди тонк манъ аст.

Вазорати мудофиаи Украина гуфт, нерӯҳои ин кишвар як ҷангҷӯи ҷудоиталабро кушта ва як нафари дигарро маҷруҳ кардаанд.

Аз моҳи апели соли 2014 ба ин тараф дар ҷанги байни нерӯҳои давлатии Украина ва ҷудоиталабони зери ҳимояти Русия 13 ҳазор нафар кушта шудаанд. Ҷудоиталабон назорати минтақаҳои Донетск ва Луганскро дар ихитёр доранд.

Оташбас ба унвони бахше аз созишномаи Минск (сентябри 2014 - феврали 2015) ба коҳиши муноқишаҳо сабаб шуд, вале мушкилро пурра ҳал накард.

Оташбаси нав ҳаштуми март ба даст омад, вале ду тараф якдигарро барои нақзи он муттаҳам карданд.

Президенти Чин бо сафари расмӣ вориди Русия шуд

Президенти Чин Сӣ Ҷинпин бо ҳадафи рушди ҳамкориҳои стратегии миёни Пекин ва Маскав вориди Русия шуд. Дар фурудгоҳи Внуково, ки ҳавопаймои раҳбари Чин он ҷо нишаст, Ҷинпинро мувофиқ бо муқаррароти пешвози меҳмони расмӣ пазироӣ карданд.

Қарор аст чанде баъд бо президенти Русия Владимир Путин дар Кремлин дидору гуфтугӯ анҷом диҳад. Ҷинпин қарор аст дар Форуми иқтисодии Санкт-Петербург ҳам иштирок кунад, ки қарор аст бо раҳбарии Путин рӯзҳои 6 то 8 июн баргузор шавад.

Хабаргузориҳои русӣ дар нақли қавл аз Ҷинпин гуфтанд, ки “ин сафар барои рушди ҳамкориҳои Чину Русия, ҳамкориҳои фарогир ва додугирифтҳои стратегӣ дар аҳди нав мусоидат мекунад”.

Ҷинпин гуфтааст, ки бовар дорад ин сафар натиҷаҳои пурбор хоҳад дошт.

Ишғоли минтақаи украинии Қрим, ки боиси мушкил шудани робитаҳои миёни Маскав ва ҳамкорони ғарбиаш шуд, Русияро водор кард, ки бештар бо ҳамсояҳои шарқиаш наздик шавад.

Мушовири президенти Русия дар умури сиёсати хориҷӣ Юрий Ушаков гуфт, сафари Сӣ Ҷинпин “рӯйдоди асосии муносибатҳои дуҷониба” ба шумор меравад. Хабаргузориҳои Русия ба нақл аз Ушаков менависанд, Сӣ ва Путин дар бораи “густариши коршарикии фарогир ва ҳамкориии стратегӣ дар марҳалаи нав” як эъломияи якҷоя ба имзо хоҳанд расонд.

Рӯзи гузашта Русия ва Чин ба Шӯрои Амнияти Созморни Милал имкон надоданд, қатъномаеро роҷеъ ба вазъият дар Судон ба тасвиб расонад.

Даҳҳо ҳазор нафар истеъфои сарвазири чехро талаб карданд

Тазоҳуроти 4 июн дар Прага

Наздик ба 120 ҳазор нафар дар Прага хостори истеъфои сарвазир Андрей Бабиш ва вазири адлияи таъйинкардаи ӯ Мария Бенешова шуданд, ки калонтарин намоиши эътирозӣ пас аз “инқилоби махмалӣ”-и соли 1989 аст.

Норозиён ҳукуматро ба фишор бар сари низоми додгоҳии кишвар айбдор карданд.

Эътироз дар Чехия замоне афзоиш ёфт, ки полис сарвазирро ба қаллобӣ айбдор кард ва хостори посух гуфтани ӯ дар додгоҳ шуд. Тазоҳуркунандагон нигаронанд, ки вазири адлия метавонад ба парванда таъсир расонад.

Пештар дар натиҷаи дарз додани маълумот гузориши нотамоми Шӯрои Аврупо паҳн гашт, ки бино бар он Бабиш барои бархӯрди манфиатҳо танқид шудааст. Гуфта мешавад, кумакҳои Иттиҳоди Аврупо ба ширкате дода шудаанд, ки ба сарвазири амалкунанда тааллуқ дошт.

Дар гузориши худ намояндагони Иттиҳоди Аврупо ба натиҷае расиданд, ки Андрей Бабиш ҳамгоми кор дар мақоми сарвазири кишвар ҳамоно ба фаъолияти ширкати Agrofert раҳбарӣ мекунад. ИН, ба гуфтаи мансабдорони Шӯрои Аврупо, тазоди манфиатҳоро ба миён меорад. Сарвазир ин гумонҳоро рад мекунад.

Тазоҳуроти 4 июнро дар Прага гуруҳи «Миллион лаҳза барои демократия» созмон дод. Ба ғайр аз мардум дар он ҳамчунин вакилони чандин ҳизби мухолиф низ ширкат варзиданд.

Андрей Бабиш аз соли 2017 сарвазири Ҷумҳурии Чех аст. Бабиш, раҳбари ҳизби авомгарои ANO яке аз сарватмандтарин афроди кишвар буда, дороии ӯ 3,7 миллиард доллар баровард мешавад.

Русия ва Украина дар масъалаи Донбасс ба ҳам паём доданд

Назари Русия ба ҳалли низоъ дар Донбасс маълум аст, аммо тарафи украин ҳанӯз дар бора назар надодааст, гуфт сухангӯи дастгоҳи раёсатҷумҳурии Руси Дмитрий Песков.

Владимир Путин масъалаи эҳёи гуфтушуниди марбут ба Донбассро дар чаҳорчӯби «ҳамоиши Нормандия» баррасӣ кард, вале назари Киев дар ин бора ҳоло рушан нест, ба ин сабаб нишаст баргузор намешавад, гуфт Песков.

Ба гуфтаи ӯ, ҳанӯз ҳайати музокиракунандаи Украина низ муайян нашудааст ва тараф «вазифаи хонагияш»-ро ба ҷой наовардааст.

Дар ин байн рӯзномаи "Украинская правда" изҳороти раҳбари гуруҳи группы "Океан Елзи" ва ҳизби сиёсии "Голос" Святослав Вакарчукро нашр намуд, ки мегӯяд, президент, дасти ӯ ва порлумон «ниҳоят қонунеро қабул кунанд, ки шеваи муносибат бо Русияро ҳамчун кишвари таҷовузкор муайян намояд». Вай афзуд, дар ин самт бояд ба меъёрҳои дугона роҳ дода нашвад.

3 июн маълум гашт, ки ҳайати Украинаро дар гуфтушуниди Минск президенти дувуми Украина Леонид Кучма раҳбарӣ хоҳад кард. Дар ин бора раҳбари феърии ин кишвар Володимир Зеленский гузориш дод. Кучма дар солҳои 2014–2018 низ ба ҳайати Украина дар музокироти Гуруҳи сеҷонибаи тамос сари масъалаи Донбасс сарварӣ кардааст. Вай мегӯяд, дар ин самт масъалаҳое ҳастанд, ки ҳалли онҳо бояд бо қонунгузориҳои Украина мушаххас шавад.

Трамп сафари амрикоиҳоро ба Куба маҳдуд кард

Ҳукумати президенти ИМА Доналд Трамп қариб ҳамаи имкониятҳои қонунии сафари шаҳрвандони ин кишвар ба Кубаро, ки ҳукумати президенти пешин Барак Обама ҷорӣ карда буд, бекор кард.

Вазорати молияи Иёлоти Муттаҳида қоидаҳои навро мунташир намуд, ки бар пояи онҳо сафарҳои дастҷамъонаи омӯзишии шаҳрвандони ИМА ба Куба ва саёҳат дар киштиҳои ҷаҳонгардӣ, ҳавопаймо ва заврақҳои хусусӣ манъ мешавад. Қоидаҳои нав фаврӣ ҳукми иҷро мегиранд ва танҳо сафарҳое истисно хоҳанд буд, ки агар одамон аллакай чипта харидаанд, ба роҳ баромадаанд ё дар қаламрави Куба ҳастанд.

Маҳдудиятҳои нав ба фиристодани пул аз ҷониби амрикоиҳои кубаиасл ба хешовандонашон дахл намекунад. Ҳамчунин парвози ҳавопаймоҳои амрикоӣ ба Куба бекор намешаванд, вале доираи одамоне, ки метавонанд, ба ин кишвар сафар кунанд бо хешовандон ё ашхосе, ки сафари корӣ анҷом медиҳанд, маҳдуд мегардад. Сухангӯи Вазорати молияи Иёлоти Муттаҳида гуфт, дар моҳҳои наздик маҳдудиятҳои дигаре зидди Куба ҷорӣ хоҳанд шуд.

Вазири корҳои хориҷии Куба Бруно Родригес Парриля, ки соли 2015 дар Вашингтон сафорати Кубаро ифтитоҳ карда буд, маҳдудиятҳои навро «ҳамла ба ҳуқуқи байнулмилал ва поймолшавии зишти ҳаққи ҳамаи кубагиҳо» номид.

Қоидаи нави маҳдудкунанда баёнгари сиёсати нави ИМА мебошанд, ки мушовири Трамп дар умури амнияти миллӣ Ҷон Болтон моҳи апрел эълом дошт. Ин равиш аз сиёсатҳои президенти пешин Барак Обама, ки робитаҳои дар солҳои 1960 кандашудаи ду кишварро барқарор намуд, фарқ мекунад. Ҳукумати Трамп Кубаро дар пуштибонӣ аз ҳукумати президент Николас Мадуро дар Венесуэла айбдор медонад ва Ҳавана инро рад мекунад.

Раиси демократҳои Суғд шартан озод шуд

Абдуҷаббор Юлдошев, раиси дафтари Ҳизби демократ дар вилояти Суғд ба озодӣ баромад. Оқои Юлдошев моҳи майи имсол бо қарори додгоҳ ба ҳабс гирифта шуд ва ӯро дар маҳбаси сукунатӣ нигоҳ медоштанд.

Худи Абдуҷаббор Юлдошев рӯзи 5-уми июн дар суҳбат ба Радиои Озодӣ раҳо шуданашро тасдиқ кард. Ӯ гуфт,ҳафтае қабл ба озодӣ баромад. Ба таъкиди раиси дафтари Ҳизби демократ дар вилояти Суғд, ӯ бояд ҳар моҳ ба муассисаи ислоҳӣ 220 сомонӣ супорида, инчунин ҳар 10 рӯз аз қайд гузарад.

Абдуҷаббор Юлдошев бо қарори Додгоҳи ноҳияи Бобоҷон Ғафуров дар моҳи декабри соли 2018 шартан ба якуним сол аз озодӣ маҳрум шудааст. Оқои Юлдошев ба сӯхтор дар манзили ҳамсояаш дар ҷамоати Ёва, айбдор мешавад.

Масъулони Ҳизби демократ қаблан ба Радиои Озодӣ гуфтанд, Абдуҷаббор Юлдошев аз зинаҳоии болоии додгоҳ бозбинии парвандаашро талаб карда буд ва бо бетағйир мондани ҳукми қаблӣ аз сӯи Додгоҳи вилояти Суғд дар моҳи май ӯро ба ҳабс гирифтанд.

Худи Юлдошев баъди ба озодӣ баромадан ҳам гуфт, аз қарори додгоҳ розӣ нест ва аз болои он дубора ба Додгоҳи вилояти Суғд шикояти назоратӣ бурдааст.

Додгоҳ Абдуҷаббор Юлдошевро ба сар задани сӯхтор дар манзили ҳамсояаш дар ҷамоати Ёваи ноҳияи Бобоҷон Ғафуров тибқи моддаи 256 -и Кодекси ҷиноятӣ, яъне "аз беэҳтиётӣ несту нобуд ё вайрон кардани молу мулк", айбдор дониста, ҷазои якуним соли ҳабси шартӣ ва пардохти ҳудуди 32 ҳазор сомонӣ зиён ба ҳамсоя, таъин карда буд.

Вале Юлдошев аз аввал то кунун муҷозоти худро "фармоишӣ" ва "дорои ангезаҳои сиёсӣ" номида буд. Ӯ иддао карда буд, ки сӯхтор аз хонаи ӯ ба ҳамсоя нагузашта, балки алангаи сӯхтор аз манзили ҳамсоя ба хонаи ӯ забона зад ва баръакс, ӯ зарар дидааст.

Абдуҷаббор Юлдошев қаблан дар сӯҳбат бо Радиои Озодӣ тахмин зада буд, ки чанд интиқоди ӯ ҳамчун узви Шӯрои ҷамъиятии ислоҳоти сохтори милитсия ба мақомоти ноҳияи Бобоҷон Ғафуров аз фаъолияти сехҳои мебелсозӣ, ба ин вазъият сабаб шуд. Ӯ аз он изҳори нигаронӣ карда буд, ки ин сехҳо чанд дафъа боис ба сӯхтор шудаанд. "Ба ҷойи ҳалли ин мушкил дар ҳамкорӣ бо соҳибкорон ба ман ин айбро бор карданд".

Мақомот аз ӯ пардохти ҷуброни зиён ба ҳамсояашро талаб карданд. Вале ӯ мегуфт, маблағ надорад ва зиёда аз ин, худро дар ин қазия бегуноҳ донист ва умедвор буд, ки рӯзе додгоҳ ин "нофаҳмӣ"-ро поён медиҳад ва ӯро бегуноҳ эълон мекунад.

Таҳқиқоти "Озодӣ": Дастури сарвазири Қирғизистон ба тафтиши берун бурдани $700 млн

Сарвазири Қирғизистон Муҳаммадқулӣ Абилғозиев дар робита ба таҳқиқи далелҳое ҷаласа баргузор кард, ки дар таҳқиқоти рӯзноманигории бахши қирғизии Радиои Озодӣ садо дода буданд.

Ғуломҷон Анарбоев, раиси Хадамоти давлатии иктишофи молӣ гуфт, дар соли 2014 хулосаи ниҳоди зери роҳбарии вай оид ба хориҷ бурдани маблағҳои зикршуда ба вазорати корҳои дохилӣ фиристода шуда буд. Хадамоти иктишофи молӣ ҳамчунин дар соли 2016 такроран хулосаашро ба Хадамоти давлатии мубориза бо ҷиноятҳои иқтисодӣ фиристодааст.

"Хулосаи мо оиди далелҳои ҷамъовардаи таҳқиқоти рӯзноманигорӣ ба мақомоти давлатӣ ирсол шуда буд. Дар ҳоли ҳозир Хадамоти иктишофи молӣ дар якҷоягӣ бо пулиси молӣ омӯзиши такрории берун бурдани 700 миллион долларро ба роҳ мондааст", - гуфт Анарбоев.

Сарвазири Қирғизистон дастур додааст, ки пажуҳиш суръат бахшида шавад. "На танҳо таҳқиқи мӯшикофона анҷом дод, балки ҳамзамон ҷомеаро бояд аз натиҷаҳои он хабардор кард", - гуфт сарвазир.

29 май бахши қирғизии Радиои Озодӣ хабар дод, ки хонаводаи Матраимовҳо дар берун бурдани садҳо миллион доллар аз Қирғизистон даст доранд.

HRW Русияву Сурияро барои истифодаи силоҳи мамнуъ маҳкум кард

Созмони ҳомии ҳуқуқи байналхалқии Human Rights Watch (HRW) "эътилофи низомӣ"-и Русияву Сурияро дар истифодаи силоҳи мамнуъ айбдор кард. Созмон мегӯяд, низомиҳои ду кишвар дар ҳамла ба минтақаи шимолу ғарби Сурия аз чунин силоҳ истифода кардаанд.

Дар изҳороти HRW, ки 3 июн нашр шуд, омадааст, сар аз 26 апрел ба минтақаҳои таҳти назорати гуруҳҳои зиддиҳукуматии Сурия дар вилоятҳои Идлиб, Ҳама ва Ҳалаб ҳамарӯза садҳо зарба зада шудааст, ки дар пайи ин зарбаҳо 200 сокини осоишта, аз ҷумла кӯдакон кушта шудаанд.

Нозирони созмони мазкур бо такя ба манобеи мухталиф хабар медиҳанд, ки дар минтақаҳои истиқоматии сокинони осоишта даҳҳо бомбаи мамнуъ партофта шудааст.

Русия ба ҳукумати президенти Сурия Башор Асад сар аз соли 2011 - замони оғози ҷанги дохилии он кишвар то кунун - кумаки низомиву дипломатӣ мерасонад.

"Хомӯшӣ" дар Чин. Солгарди 30-юми рӯйдодҳои хунини Тянанмен

Дар Чин аз 30-юмин солгарди саркӯби эътирозгарони тарафдори демократия “хомӯшона” ва бо афзоиши чораҳои амниятӣ ёдоварӣ карданд.

Бо ин вуҷуд, гузоришҳо ҳокист, ки чандин нафар дастгир шудаанд. Пулис дар берун аз истгоҳи метрои майдони Тянанмен (дар Пекин) асноди сайёҳон ва мусофиронро баррасӣ мекард.

Хабарнигорони хориҷӣ иҷозаи дастрасӣ ба ин майдонро наёфтанд ва пулис ба онҳо ҳушдор додааст, ки акс нагиранд. Дар Чин дар бораи саркӯби эътирозҳои майдони Тянанмен ошкоро чизе гуфта намешавад ва ҳукумати ин кишвар ҳам аз он рӯйдод бо баргузории маросими расмӣ ёд намекунад.

Донишомӯзону коргарон дар баҳори соли 1989 дар майдони Тянанмен гирдиҳам омада ва хостори тағйири демократӣ ва поёни фасод дар Чин шуданд.

Пас аз чанд рӯзи эътироз, ҳукумати коммунистии Чин танҳову сарбозонро ба ин майдони Пекин фиристод. Нерӯҳои чинӣ эътирозгарону раҳгузаронро таъқиб карданд. Бисёре аз муътаризон дар сеюм ва чаҳоруми июни соли 1989 ткушта ва захмӣ шуданд.

Майк Помпео, вазири корҳои хориҷии Иёлоти Муттаҳидаи Амрико, муътаризони соли 1989-ро "қаҳрамонони мардуми Чин" хонд, ки ба гуфтаи ӯ “30 сол пеш "шуҷоъона" хостори ҳуқуқашон шуда буданд”.

Сафорати Чин дар Вашингтон ин суханони Помпеоро “дахолат дар умури дохилии Чин” хондааст.

Ҳодисаи нохуш дар марзи Тоҷикистону Қирғизистон

Ин аксро Иқбол Илёсзода, сухангӯи ҳукумати Исфара дар Фейсбук нашр кард

Шаҳбоз Ғанизода, сокини 28-солаи Исфара мегӯяд, бошандагони деҳаи Оқсойи ноҳияи Бодканди Қирғизистон ба мошини ӯ санг партофта, монеи ҳаракаташ ба сӯи Ворух шудаанд. Роҳи миёни Исфара ва Ворух аз ҳудуди Қирғизистон мегузарад. Ҳодиса рӯзи 4-уми июн иттифоқ афтодааст.

Ҷониби Тоҷикистон онро "иғво" номид. Мақомоти расмии Қирғизистон ҳанӯз вокуниш накардаанд. Вале баъзе аз расонаҳои ин кишвар ҳодисаро садамаи нақлиётӣ арзёбӣ намуданд.

Шаҳбоз Ғанизода ҳамроҳи модар ва кӯдакаш аз шаҳри Исфара ба Ворух ҳаракат доштааст. Иқбол Илёсзода, сухангӯи ҳукумати шаҳри Исфара, рӯзи 4-уми июн гуфт, сокинони деҳаи Оқсойи Қирғизистон "барқасдона монеи ҳаракаташ шуда, баъдан ӯро барои роҳ надодан ба мошини КАМАЗ муттаҳам ва мошинашро сангборон кардаанд".

Илёсзода гуфт, "дар натиҷа шишаи қафои мошини Шаҳбоз Ғанизода пора-пора шуда, кӯдаки 6-7 солаи ӯ аз ин ҳодиса тарсидааст ва ӯро барои муоина ба бемористон бурдаанд."

Дар ҳамин ҳол, баъзе аз расонаҳои Қирғизистон ҳодисаро садамаи нақлиётӣ қаламдод кардаанд. Хабаргузории "Турмуш" навишт, "Шаҳбоз Ғанизода мошинро идора карда натавонист ва ба КАМАЗ, ки онро шаҳрванди Қирғизистон идора мекард, бархӯрд."

Феълан мақомоти ҳифзи ҳуқуқи Исфара ба таҳқиқи ҳодиса оғоз кардаанд.

Тоҷикистону Қирғизистон 970 километр марз доранд ва аз ин ҳисоб 519 километраш мушаххас ва аломатгузорӣ шудааст. Дар минтақаҳои таъйину аломатгузоринашуда гоҳ-гоҳ ҷангу даъвову кашмакаш барои обу чарогоҳу замин рух медиҳад ва ба хунрезӣ ҳам кашидааст.

Тазоҳурот ҳангоми мулоқоти Доналд Трамп бо Тереза Мэй

Ҳангоми мулоқоти президенти Амрико бо нахуствазири Бритониё дар Лондон даҳҳо ҳазор нафар дар кӯчаҳои ин шаҳр тазоҳурот карданд. Мулоқоти Доналд Трамп ва Тереза Мэй рӯзи 4-уми июн сурат гирифт.

Нахуствазири Бритониё дар оғози суҳбат гуфт, "мо пайваста бо ҳам кор кардаем ва ҳамчунон ҳамкорӣ мекунем, барои мустаҳкам кардан, шакл додан ва таъсир гузоштан ба иқтисоди ҷаҳон ва қонуну қоида ва рукнҳои он. Зеро мо ба бозори озоду шаффоф ва боз бовар дорем."

Як рӯз пеш аз ин раҳбари Амрико меҳмони боифтихори малика Элизабет буд. Малика дар суханронии худ бештар ба аҳамияти муносибатҳои ду кишвар таъкид кард.

Доналд Трамп дар навбати худ аз равобити махсуси Вашингтону Лондон ситоиш намуд ва солрӯзи набарди Норманди ҳангоми ҷанги дувуми ҷаҳониро зикр кард.

Назарсанҷиҳо нишон медиҳанд, ки Доналд Трамп чандон аз маҳбубияти мардуми Бритониё бархӯрдор нест.

Мушкили шаҳодатномаи ронандагии занҳо дар Туркманистон

Дар Туркманистон бонувон ҳангоми дарёфти шаҳодатномаи нави ронандагӣ ва тамдиди муҳлати онҳо бо мушкил рӯбарӯ мешаванд.

Ба иттилои бахши туркмании Радиои Озодӣ, аз ҷумла дар шаҳри Ишқобод пулис ба занон шаҳодатномаи нави ронандагӣ намедиҳад ва муҳлати истифодаи санадро тамдид намекунад.

"Вақте занҳо барои тамдиди муҳлати шаҳодатномаҳои ронандагӣ ба пулис муроҷиат мекунанд, ҷавоби рад мегиранд. Ба онҳо ошкоро мегӯянд, ки "ба занҳо шаҳодатнома намедиҳанд", - иттилоъ дод хабарнигори радио дар Ишқобод.

Ба гуфтаи ӯ, ҳамзамон дар пойтахти Туркманистон таҷрибаи гирифтани шаҳодатномаҳои ронандагии бонувон идома дорад. "Бо ҳар баҳона шаҳодатномаҳои ронандагии бонувонро гирифта, санади муваққатӣ медиҳанд ва сипас барнамегардонанд", - афзуд хабарнигор.

Дар Туркманистон шаҳодатномаи ронандагӣ барои 10 сол дода мешавад.

Чин ба Қирғизистон ба маблағи беш аз $4 млн техникаи низомӣ дод

Ҳукумати Чин ба пулиси Қирғизистон автобус, микроавтобус, мошинҳои зиреҳпӯши пулис ва техникаи дигар тақдим кард. Арзиши умумии ин техника ба наздики 4,3 миллион доллар мерасад.

Рӯзи 3-юми июн дар шаҳри Бишкек муаррифии техникаи тақдимшуда баргузор гардид.

Кашкар Ҷунушалиев, вазири корҳои дохилии Қирғизистон, гуфт, техникаи тақдимшуда дар боло бурдани сатҳи мубориза бо ҷинояткориҳо ва таъмини тартиботи ҷамъиятӣ, аз ҷумла ҳангоми баргузории самити Созмони ҳамкориҳои Шонгҳой нақши муҳим хоҳанд дошт.

Моҳи майи соли ҷорӣ Ҷунушалиев бо вазири амнияти ҷамъиятии Чин Чжао Кэчжӣ дар мавриди расонидани кумаки техникӣ ба Қирғизистон ба созиш расида буданд.

Самити навбатии Созмони Ҳамкориҳои Шонгҳой рӯзи 14-15-уми июн дар шаҳри Бишкек баргузор мешавад.

Президенти Узбекистон дар моҳи Рамазон 575 маҳбусро афв кард

Президенти Узбекистон Шавкат Мирзиёев бахшида ба моҳи Рамазон бо имзои як фармон садҳо маҳбусеро афв кард, ки "аз сидқи дил пушаймон шуда, ба роҳи рост баргаштаанд".

Бар пояи фармон, ҷамъан 575 маҳбус афв шуданд. Аз ин миён, 361 нафар аз зиндон озод гашта, муҳлати ҷазои 214 зиндонии дигар кам мешавад.

Дар миёни маҳбусони афвшуда 7 нафари аз 60-сола боло, 6 зан ва як шаҳрванди хориҷӣ низ ҳастанд.

Шавкат Мирзиёев барои иҷрои фармон вазорату идораҳои дахлдори Узбекистонро вазифадор карда, ба мақомоти маҳалҳо дастур додааст, ки барои баргаштани маҳбусони озодшуда ба зиндагии осоишта шароити заруриро фароҳам ва онҳоро бо ҷои кор таъмин кунанд.

Собиқ Додситони кулли Қирғизистон боздошт шуд

Додситони кулли пешини Қирғизистон Аида Салянова пас аз бозпурсии 48-соатӣ боздошт шуд. Саляноваро дар доираи парвандаи озодсозии ғайриқонунии ҷинояткори бонуфуз Азиз Батукаев ба бозпурсӣ даъват карда буданд.

Дар ҷараёни бозпурсӣ додситони кулли пешини Қирғизистон бо додситони пешини низомӣ Майрамбек Акматалиев ва муовини пешини додситони кулли ин кишвар Людмила Усмонов рӯбарӯ карда шуданд. Сипас тасмим гирифта шуд, ки Саляноваро боздошт кунанд.

Ба иттилои вакили порлумони Қирғизистон Алмамбет Шикмаматов, бозпурсии Салянова 3-юми июн, соати 15:00 оғоз шуда буд.

Пештар комиссияи вакилони порлумони Қирғизистон пас аз омӯзиши раҳоии Батукаев рӯйхати 28 мансабдореро таҳия кард, ки дар ғайриқонунӣ озод кардани ҷинояткори қирғиз даст доранд.

Соли 2013 додгоҳи шаҳрии Норини Қирғизистон дар асоси ташхиси табибон қарори пеш аз муҳлат озод кардани Азиз Батукаевро қабул кард. Батукаев ҳамон рӯзи озодшавиаш аз Бишкек ба Русия парвоз кард. Ин ҳодиса баҳси густардаеро ба миён овард.

Пештар Салянова дар суҳбат бо расонаҳо гуфт, аз озод шудани Батукаев замоне хабар ёфт, ки ӯ аллакай аз Қирғизистон берун рафта буд.

Эътирози занони Ҷопон ба талаботи пӯшидани пойафзори пошнабаланд

Дар Ҷопон бонувон зидди қоидаи либоспӯшие эътироз доранд, ки онҳоро вазифадор мекунад, дар ҷои кор пойафзори пошнабаланд бипӯшанд. Ба иттилои The Guardian, эътирозҳо бо ташаббуси ҳунарманд ва нависандаи ҷопонӣ Юми Исикава оғоз шуданд.

Фаъолони ҷопонӣ бо роҳандозии як флешмоб дар шабакаҳои иҷтимоӣ аз ҳукумати ин кишвар даъват доранд, ки талаботи пӯшидани пойафзори пошнабаландро дар ҷои кор барои занон бекор кунад. Ҳудуди 19 ҳазор сокини Ҷопон аз ташаббуси мазкур ҷонибдорӣ мекунанд.

Исикава пас аз мулоқот бо намояндагони Вазорати меҳнати Ҷопон дар суҳбат бо хабарнигорон гуфт, мақомот аз талаби бонувони коргар ҷонибдорӣ мекунанд. Ҳунарманди ҷопонӣ қоидаи мазкури либоспӯшии бонувонро дар Ҷопон як навъи табъиз ё озори ҷинсӣ номид.

Соли 2017 дар чандин вилояти Канада низ мақомот ширкатҳоро вазифадор карданд, ки талаботи пӯшидани пойафзори пошнабаландро барои занон бекор кунанд. Ин таҷриба хатарнок ва табъиз номида шуд. Худи он сол дар Филиппин ҳам чунин қонуне ба имзо расид.

Ҳудуди заминҳои иҷораи Русия дар Қазоқистон васеътар шуд

Ҳукумати Русия тарҳи созишномаи масири нави партоби мушакбари "Союз-2" аз пойгоҳи "Байконур"-ро бо Қазоқистон ба тасвиб расонд.

Он дар шимоли пойгоҳ ҷойгир буда, қисматҳои ҷудошудаи мушакбар дар ҳудуди вилояти Костанойи Қазоқистон хоҳанд афтид. Бино ба гузориши телевизиони "Настоящее Время", ин минтақа ба заминҳое, ки Русия аз Қазоқистон иҷора гирифта буд, шомил намешуд. Матни созишномаи нав, ки барои панҷ сол имзо шуд, дар сомонаи иттилои ҳуқуқӣ нашр гаштааст.

Русия мушакбари "Союз-2"-ро барои партоби дастгоҳҳои кайҳонӣ истифода мекунад ва созишномаҳои имзошуда ба партоби мушак аз Байконур дар тӯли сол, ба ҷуз аз 1 апрел то 30 июн иҷозат медиҳанд. Вале "Роскосмос" ва ширкати русиву қазоқии "Байтерек", ки Байконурро ба иҷора гирифтаанд, бояд мақомоти маҳаллиро пешакӣ огаҳ кунанд, то дар сурати зарурат сокинони атрофро ба ҷойҳои бехавф интиқол диҳанд.

Русия барои иҷораи заминҳои нав ба Қазоқистон солона 460 ҳазор доллар пардохт мекунад. Вале агар партобҳо аз меъёри созишшуда бештар шаванд, ин маблағ 50 ҳазор доллари дигар афзоиш хоҳад ёфт.

Ҳанӯз дар ибтидои соли 2018 маълум шуда буд, ки Русия барои ба иҷора гирифтани заминҳои иловагӣ бо Қазоқистон гуфтугӯ дорад.

Дар Ишқобод бахшида ба Рӯзи дучарха рекорди нав гузошта шуд

Дар Туркманистон Рӯзи дучархаро бо дучархасавории оммавӣ ва рекорди нави миллӣ таҷлил карданд. Расонаҳои Туркманистон хабар медиҳанд, ки ин бор дучархасаворони туркман бо тӯлонитарин намоиши дучархасаворӣ вориди Китоби рекордҳои Гиннес шуданд.

Дучархасаворони иборат аз 2019 одам дар як хат саф кашида, дар масофаи муайяне аз ҳамдигар 3300 метрро тай карданд. Ин рекорд 1-уми июн, дар остонаи Рӯзи дучарха гузошта шуд, ки ҳамасола 3-юми июн Рӯзи умумиҷаҳонии дучарха таҷлил мешавад.

Туркманистон ташаббускори эълом кардани Рӯзи дучарха аст. Ин рӯзро соли 2018 эълом карданд. Дар робита ба ин Иттиҳоди байналхалқии дучархасаворон роҳбари Туркманистонро бо сертификат қадрдонӣ кард.

Дар Туркманистон варзиши дучархасаворӣ дар сатҳи давлатӣ таблиғ мешавад. Кормандони давлатӣ, донишҷӯён, хонандагони мактаб ба маъракаҳои дучархасаворӣ ҷалб мешаванд.

Ин дувумин рекорди Туркманистон дар бахши варзиши сартосарии дучархасаворӣ аст. Соли 2018 иштирокчиёни варзиши дучархасаворӣ, бо ҳузури президенти Туркманистон Қурбонгулӣ Бердимуҳаммадов барои "Густардатарин дарси варзиши дучархасаворӣ" вориди Китоби рекордҳои Гиннес шуда буданд.

Чин ба Қирғизистон дар ҳаҷми $4,3 млн техникаи низомӣ дод

Ҳукумати Чин ба пулиси Қирғизистон автобус, микроавтобус, мошинҳои зиреҳпӯши пулис ва техникаи дигар тақдим кард. Арзиши умумии ин техника ба наздики 4,3 миллион доллар мерасад. Рӯзи 3-юми июн дар шаҳри Бишкек муаррифии техникаи тақдимшуда баргузор гардид.

Кашкар Ҷунушалиев, вазири корҳои дохилии Қирғизистон гуфт, ки техникаи тақдимшуда дар боло бурдани сатҳи мубориза бо ҷинояткориҳо ва таъмини тартиботи ҷамъиятӣ, аз ҷумла ҳангоми баргузории саммити Созмони ҳамкориҳои Шангхай (СҲШ) нақши муҳим хоҳанд дошт.

Моҳи майи соли ҷорӣ Ҷунушалиев бо вазири амнияти ҷамъиятии Чин Чжао Кэчжӣ дар мавриди расонидани кумаки техникӣ ба Қирғизистон ба созиш расида буданд.

Саммити навбатии СҲШ 14-15 июн дар шаҳри Бишкек баргузор мешавад.

Дар Узбекистон қимати газу барқ боло нарафт

Қимати газ ва барқ дар Узбекистон аз 1-уми июн гарон нашуд. Ин дар ҳолест, ки пештар аз гароншавии он хабар расида буд.

Нашрияи "Сухани халқ" 3-юми июн хабар дод, девони вазирони он кишвар 31-уми майи соли 2019 қарори содагардонии гузариш ба низоми бозорӣ ва истифодаи оқилонаи захираҳои сӯхтро қабул кард.

Зимнан қарори боло бурдани қимати газ ва барқ аз 1-уми июни соли 2019 бекор шуд. Расонаҳо пештар хабар дода буданд, ки 1 киловатт неруи барқ аз 250 сӯми кунунӣ ба 280 сӯм ва як метри мукааб газ аз 320 сӯми кунунӣ ба 350 сӯм боло бурда мешавад.

Бори охир дар Узбекистон тарофаҳо моҳи ноябри соли 2018 гарон шуда буданд. Он замон якбора бензин, маводи сӯхти дизелӣ, неруи барқ, газ, оби гарм ва низоми гармидиҳӣ боло рафта буд.

Ёфтҳои бештар

Гузоришҳои видеоӣ

Сармояҳои барбодрафта? Шикваи онҳое, ки аз "Нури Раҳмон" хона мехостанд
лутфан мунтазир бошед

Феълан кор намекунад

0:00 0:02:48 0:00
XS
SM
MD
LG