Пайвандҳои дастрасӣ

Хабари нав

Хабарҳо

"Bilan": Қасри амаки Оқохонро дар Швейтсария духтари Назарбоев харид

Динара Қулибоева

Динара Қулибоева, духтари хурдии президенти пешини Қазоқистон, қасри амаки Оқохонро дар Швейтсария ба маблағи 62 миллион франки швейтсарӣ харидааст. Ин қасрро дар асри ҳабдаҳум сохтаанд.

Дар ин бора маҷаллаи швейтсарии "Bilan" рӯзи 21-уми август хабар дод. Қасре бо номи "Белерив" дар минтақаи Женева ҷойгир буда, ба феҳрасти сарватҳои миллии Швейтсария шомил аст.

Як корманди идораи маҷаллаи “Bilan” рӯзи 22-юми август ба Радиои Озодӣ гуфт, Динара Қулибоева ин қасрро "чанд рӯз пеш харид". Муҳаррири маҷалла хабарро дар шумораи рӯзи гузашта ҳамчун матлабе нашр кард, ки аз манобеи махфӣ ба даст омадааст.

Дар хабари маҷаллаи швейтсарӣ гуфта мешавад, қасри Белеривро соли 1997 падарандари бародарон Сарсок – шоҳзода Садруддин Оқохон – тақдим кард, ки худ бефарзанд буд. Садруддин Оқохон соли 2003 дар 70-солагӣ даргузашт.

Ӯ солҳои зиёд дар ниҳодҳои Созмони Милали Муттаҳид кор кардааст. Аз ҷумла, солҳои 1970-ум ба ҳайси раиси Комиссариати олии СММ оид ба паноҳандагон ифои вазифа намудааст.

Ба иттилои манобеи интернетӣ, ӯ ду дафъа оиладор шуда, ҳеҷ гоҳ фарзанд надошт ва ҳамсари дуюми ӯ Кетрин Сарсок буд, ки писаронаш дар охир соҳиби қасри зебое дар ҳудуди 28,700 метри мураббаъ шуданд.

“Bilan” менависад, қасри Белеривро се сол пеш бо арзиши 120 миллион франки швейтсарӣ ба фурӯш гузоштанд ва ниҳоят чанд рӯз пеш аз ҷониби духтари президенти собиқи Қазоқистон Нурсултон Назарбоев бо нархи 62 миллион франк харида шуд.

Нашрия менависад, Динара Қулибоева соли 2009 низ дар Женева бар ивази 75 миллион франк хона харида буд.

Ҳанӯз худи Динара Қулибаева ва ё намояндаи расмии ӯ ба ин хабар вокуниш накардааст.

Путин гуфт, ба озмоиши мушаки нави Амрико посух медиҳанд

Раиси ҷумҳури Русия Владимир Путин бо президенти Финландия Саулӣ Ниинистё

Владимир Путин, президенти Русия дар сафараш ба Финландия аз озмоиши мушаки болдори Амрико интиқод кард.

Вай ҳамчунин дар ин сафар эътирозҳои сокинони Маскавро барои интихоботи озод камаҳамият баҳо дод ва ҳамчунин гуфт, таркиши силоҳи атомӣ дар размоишгоҳи Северодвини Русия ба ҳамсояҳо хатар эҷод намекунад.

Путин дар ин бора дар нишасти хабарии муштарак бо президенти Финландия Саулӣ Ниинистё рӯзи 21-уми август дар шаҳри Ҳелсинкӣ изҳори назар кард.

Мулоқоти Путин бо Саулӣ ба равобити дуҷониба дар бахши тиҷорат, иқтисод ва сармоягузорӣ бахшида шуда буд. Аммо дар нишасти хабарӣ Путин бештар дар бораи мавзӯъҳои дохилии Русия ва мушкилу баҳсҳои байналмилалӣ изҳори назар кард.

Президенти Русия дар ин нишаст гуфт, озмоиши мушаки нав дар ИМА хатарҳои наверо эҷод кардааст, ки Кремл бояд ба онҳо посух диҳад.

Пентагон рӯзи 18-уми август дар бораи озмоиши мушаки нави болдор хабар дод, ки қодир аст, аз масофаи бештар аз 500 километр ба ҳадаф бирасад.

Эрон як системаи нави мушакии дурпарвозро рӯнамоӣ кард

Ҳасан Рӯҳонӣ

Эрон як системаи нави мушакии дурпарвози сохти маҳаллиро рӯнамоӣ кард. Президенти Эрон Ҳасан Рӯҳонӣ рӯзи 22-юми август ҳангоми пардабардорӣ аз системаи нави мушакӣ гуфт, "душманони Эрон мантиқро намепазиранд ва инҷо ҷое нест, ки мо дар баробари зӯр, агар бихоҳем, бо мантиқ ҷавоб диҳем."

Вай афзуд: "Вақте душман ба зидди мо мушак мефиристад, мо наметавонем суханронӣ кунем ва бигӯем: "Ҷаноби мушак, инҷо кишвари мо ҳаст, инҷо мардуми бегуноҳ ҳастанд. Ҷаноби партояндаи мушак, агар метавонед тугмаро пахш кунед ин мушак дар мобайни ҳаво нобуд шавад."

Суханронии Рӯҳонӣ ва системаи мушакӣ як амали охирини ҷанги гуфтугӯ миёни Теҳрон ва Вашингтон аст, ки нигарониҳои зиёдеро ба бор овардааст. Бисёриҳо аз он нигаронанд, ки ин радду бадалҳо метавонад ба муноқишаи мусаллаҳона кашонад.

Иёлоти Муттаҳида як сол пеш аз созиши ҳастаии қудратҳои ҷаҳон бо Эрон даст кашид ва ба Эрон таҳримҳои нав бор кард, ки соҳаҳои нафту молии онро нишон гирифтааст. Иқтисоди Эрон аз таҳримҳо зарар дидааст.

Ҳалокати як сарбози тоҷик ҳангоми хидмат дар артиш

Акс аз бойгонӣ

Як сарбози Вазорати мудофиаи Тоҷикистон аз захми тир ба ҳалокат расидааст.

Мақомот шоми 21-уми август ҷасади Ҳадиятулло Тағоев, сарбози Вазорати дифоъро ба волидонаш дар деҳаи Чоркӯҳи Исфара супурданд.

Тағоев моҳи октябри соли 2017 довталабона ба артиш пайваст ва то анҷоми муҳлати хизмати сарбозиаш ҳамагӣ 40 рӯзи дигар монда буд.

Наздикони Тағоев ба Радиои Озодӣ гуфтанд, ки тир ба миёнаи ду абрӯяш задааст ва онҳо то ҳанӯз дақиқ намедонанд фарзандашон дар кадом шароит ҷон бохтааст.

Мақомот гуфтаанд, ӯ худкушӣ кардааст, вале наздикон ба ин фарзия бовар надоранд.

Wall Street Journal: ИМА бо Венесуэла гуфтугӯи пинҳонӣ дорад

Ҳукумати Доналд Трамп, президенти ИМА бо афроди наздик ба президенти Венесуэла Николас Мадуро бо ҳадафи ташкили шароити аз қудрат рафтани Мадуро ва баргузории интихоботи шаффоф дар он кишвар гуфтугӯи пинҳонӣ дорад. Дар ин бора The Wall Street Journal ​бо такя ба манобеи хабар дод, ки дар гуфтугӯҳои ширкат мекунанд.

Диосдадо Кабело, роҳбари Анҷумани конститутсионии Венесуэла, ки дар гузашта раиси порлумони он кишвар буд ва ахиран шомили таҳримҳои ИМА шуд, бо ҳукумати Трамп гуфтугӯ дорад. Ҳадафи ин гуфтугӯҳо - ҳалли буҳрони сиёсии кишвар бо роҳи осоишта унвон шудааст. Муколамаи ду кишвар дар марҳилаи ибтидоӣ қарор дорад.

Кабело ва дигар ширкатдорони венесуэлии шомили гуфтугӯҳо ҳавасманд ҳастанд, ки барои боқӣ мондан дар кишварашон кафолати амрикоӣ ва ҷомеаи ҷаҳониро дошта бошанд ва амнияташон таъмин гардад. Ин кафолатро ҳукумате, ки дар Венесуэла дар натиҷаи гуфтугӯи сулҳомез сари қудрат меояд, бояд эътироф кунад.

Бори нахуст дар бораи гуфтугӯҳо бо наздикони Мадуро рӯзи сешанбе президенти ИМА Доналд Трамп хабар дод. Дертар Николас Мадуро ҳам ин хабарро тасдиқ кард.

Додситони пешини Қирғизистон дар робита ба озодии Батукаев ҳабс шуд

Зидди додситони кулли пешини Қирғизистон Индира Ҷолдубоева дар доираи парвандаи озодсозии ғайриқонунии ҷинояткори бонуфуз Азиз Батукаев бо гумони фасодкорӣ айб эълом шудааст. Додгоҳи ноҳияи Якуми майи шаҳри Бишкек Индира Ҷолдубоеваро ба ҳабси хонагӣ маҳкум кард.

Индира Ҷолдубоева аз моҳи январи соли 2015 то моҳи апрели соли 2018 додситони кулли Қирғизистон буд. Ӯ қаблан раҳбарии шуъбаи ислоҳоти додгоҳӣ ва волоияти қонуни дастгоҳи президентро бар зимма дошт.

Соли 2013 додгоҳи шаҳрии Норини Қирғизистон дар асоси ташхиси табибон қарори пеш аз муҳлат озод кардани Азиз Батукаевро қабул кард. Батукаев ҳамон рӯзи озодшавиаш аз Бишкек ба Русия парвоз кард. Ин ҳодиса баҳси густардаеро ба миён овард.

Дар доираи парвандаи ғайриқонунӣ озод шудани Батукаев зидди як қатор мансабдорони вақти қирғиз тафтишот оғоз шудааст. Дар миёни онҳо вазири пешини тандурустӣ Динара Сагинбаева, мушовири пешини раҳбари Хадамоти зиндонҳо Калибек Качкиналиев, муовини пешини сарвазир Шомил Атахонов, додситони кулли пешини Қирғизистон Аида Салянова ва чандин табиб низ ҳастанд.

Дар робита ба озодии Батукаев зидди президенти пешини Қирғизистон Алмосбек Отамбоев низ айб эълом шудааст.

Дар Қазоқистон тағйири қонуни интихоботро пешниҳод доранд

Як гуруҳи фаъолони мадании Қазоқистон 21 август дар як нишасти хабарӣ дар шаҳри Нурсултон пешниҳод карданд, ки барои ворид кардани тағйиру иловаҳо ба қонунҳои интихоботии ин кишвар раъйпурсии умумимиллӣ баргузор карда шавад. Иштирокдорони нишаст гуфтанд, интихоботи пеш аз муҳлати президентие, ки моҳи июн дар Қазоқистон баргузор шуд, одилона набуд.

Раиси "Бунёди рушди парламентаризм дар Қазоқистон" Зауреш Батталова бештари ҳизбҳои сиёсии ин кишварро ба "ҳамкорӣ бо мақомот" айбдор кард. Ӯ гуфт, бо тағйири қонун шумори аъзои лозимиро барои сабти номи ҳизб аз 40 то ба 10 ҳазор бояд поин бурд.

"Бовар надорам, ки аҳзоби сиёсии кунунӣ мустақил шуда тавонанд. Бинобар ин, 50 дарсади вакилон бояд аз ҳисоби аҳзоб ва 50 дарсади боқӣ аз ҳавзаҳо интихоб шаванд", - афзуд ӯ.

Бар асоси Конститутсияи Қазоқистон, интихоботи навбатии порлумонии ин кишвар соли 2021 баргузор хоҳад шуд. Вале фаъолони маданӣ нигаронанд, ки он ба монанди интихоботи президентии имсола пеш аз муҳлат баргузор карда мешавад.

Президенти пешини Қазоқистон Нурсултон Назарбоев, ки моҳи марти соли равон аз мақоми худ истеъфо дод, 21 август дар ҷаласаи Шӯрои сиёсии ҳизби ҳокими "Нур Отан"-и Қазоқистон гуфт, ҳамаи интихоботҳо дар муҳлате баргузор хоҳанд шуд, ки Конститутсия муайян кардааст".

"Мо суханони мухолифони худ ва блогерҳоеро мешунавем, ки баргузории интихоботи пеш аз муҳлати порлумониро пешниҳод доранд. Бояд ба ин баромадҳо имрӯз посух дода шавад. Далелҳои асоснок нест. Танҳо чун ҳамеша маҳкумкунӣ ҳаст. Вақте ҳукуматро танқид мекунанд, ба ҷуз аз суханҳои холӣ дигар чизе нест. Ҳадди ақал пешниҳод кунанд, ки чи бояд кард",-изҳор дошт Назарбоев.

Шаҳрдори Тошканд дар вохӯрӣ бо сокинони норозӣ худро идора карда натавонист

Масъулони ҳукумати шаҳри Тошканд даҳҳо сокини норозии ноҳияи Мирободи пойтахти Узбекистонро, ки 16 август ба қабулгоҳи шаҳрдор Ҷаҳонгир Ортиқхоҷаев рафта буданд, аз толор пеш карданд. Худи шаҳрдор Ортиқхоҷаев низ бо онҳо муносибати дағалона кардааст.

Дар наворе, ки дастраси мо шуд, шунида мешавад, сокинони Миробод аз Ортиқхоҷаев дархост мекунанд, қарори шаҳрдори пешини Тошканд дар бораи ҷудо кардани қитъаи замин барои як соҳибкор дар кӯчаи Нукусро бекор кунад.

Ба гуфтаи сокинон, шаҳрдори пешин Раҳмонбек Усмонов соли 2017 ба соҳибкор қитъаи заминеро ҷудо кардааст, ки барои таваққуфгоҳи мошин ва майдони бозии кӯдакон пешбинӣ шуда буд ва ин қарори ӯ хилофи Кодекси банақшагирии шаҳр ва талаботи санитарӣ аст.

Ортиқхоҷаев дар аввал ба сокинони норозӣ оромона мефаҳмонад, ки наметавонад қарори шаҳрдори пешинро бекор кунад. Вале пас аз он ки сокинон мегӯянд, дар сурати бекор нашудани қарор ба президент муроҷиат мекунанд ё даст ба тазоҳурот хоҳанд зад, шаҳрдори Тошканд ба тундгӯӣ гузашта, мегӯяд, "шумо ба онҳо муроҷиат кунед ва онҳо муроҷиати шуморо боз ба мо мефиристанд. Ман ба додгоҳ эътироз карда наметавонам. Қонун ин ҳақро ба ман намедиҳад".

"Шумо моро ба додситонӣ мефиристед, додситонӣ ба додгоҳ ва додгоҳ боз ба назди шумо мефиристад. Шумо магар мардумро масхара мекунед? Шумо салоҳияти бекор кардани қарори шаҳрдори пешинро доред",-изҳор медоранд сокинон дар посух ба суханони шаҳрдор.

Сипас шаҳрдори Тошканд ба додзанӣ даромада, мегӯяд, "маро ба додгоҳ кашед! Ба куҷое мехоҳед, муроҷиат кунед! Мехоҳед, ба президент, мехоҳед, ба Худо муроҷиат кунед. Мехоҳед, ҳатто ба Брюссел шикоят баред. Агар мехоҳед, гирдиҳамоӣ низ бикунед".

Дар ҳамин ҳол занони дар толор буда аз шаҳрдори Тошканд дархост мекунанд, ки ба онҳо иҷозат диҳад, дар сурати ҳал нашудани мушкил ҳамоиши эътирозӣ баргузор кунанд. Дар натиҷа шаҳрдор ба ғазаб омада, ба мардони дар толор нишаста мегӯяд, "шумо мард ҳастед? Ору номус доред? Шумо мардон аз чӣ метарсед, аз зиндонӣ шудан?".

Ӯ ҳамчунин ба занон хитоб карда, суол мекунад, ки "шумо шавҳар, фарзанд ва номус доред? Вақте мард гап мезанад, зани мусулмон бояд сарашро хам карда, хомуш бинишинад".

Сокинони Миробод мегӯяд, дар вохӯрӣ бо Ортиқхоҷаев натавонистанд, мушкили худро ҳал кунанд ва масъулони шаҳрдорӣ низ дар охир аз онҳо хостанд, ки толорро тарк намоянд.

Ду низомии амрикоӣ дар Афғонистон кушта шуданд

Маъмурияти ҳимояти қотеъ таҳти раҳбарии НАТО шоми 21-уми август таъйид намуд, ки ду сарбози он дар Афғонистон кушта шудаанд.

Дар ин эъломия омадааст, ки ду сарбози амрикоӣ рӯзи чаҳоршанбе дар Афғонистон ба қатл расиданд. Дар ин эъломия маълумоти бештаре ироа нашудааст, ки ин сарбозон дар куҷо кушта шудаанд.

Аз оғози соли равон то ба ҳол 16 сарбози амрикоӣ дар Афғонистон ҷон бохтаанд. Шумораи сарбозони кушташудаи амрикоӣ аз оғози ҳамлаи ин кишвар ба Афғонистон дар соли 2001, ба беш аз 2400 нафар мерасад.

Душанбе ва Кобул дар рафъи оқибати ҳодисаҳои табиӣ ҳамкорӣ мекунанд

Мақомоти умури изтирории Тоҷикистон ва Ҷумҳурии Исломии Афғонистон шоми 21-уми август дар чаҳорчӯби як ҳамоиши минтақавӣ дар Душанбе созишномаи ҳамкорӣ дар бораи ҳамкорӣ дар умури пешгирӣ ва рафъи оқибатҳои ҳодисаҳои табийӣ созишнома имзо карданд.

Наҷиби Фаҳим, вазири давлат дар умури расидагӣ ба ҳаводиси Ҷумҳурии Исломии Афғонистон дар сӯҳбат бо Радиои Озодӣ гуфт, ки ин созишнома шароити қонунӣ барои эъзоми наҷотдиҳандагони ду кишвар барои рафъи оқибатҳои офатҳои табиӣ ба кишварҳои ҳамдигарро фароҳам мекунад.

Ба гуфтаи Наҷиби Фаҳим, ҳамчунин омӯзиши наҷотдиҳандагони афғон дар марказҳои таълимии Тоҷикистон дар назар гирифта шудааст ва тибқи бандҳои ин созишнома барои фиристодани сареи наҷотдиҳандагон зарурати дарёфти визо бекор карда шудааст.

Дар ҳамин ҳол, Рустам Назарзода, раиси Кумитаи ҳолатҳои фавқуллодда ва мудофиаи граждании Тоҷикистон дар сӯҳбат бо Радиои Озодӣ гуфт, ки наҷотдиҳандагони тоҷик метавонанд танҳо ба он минтақаҳои офатзадаи Афғонистон эъзом шаванд, ки таҳти назорати сохторҳои давлатӣ қарор доранд. "Ҳеҷ кишваре наҷотдиҳандагони худро ба кишваре, ки дар он ҷо ба ҷони наҷотдиҳандагон хатар вуҷуд дорад, намефиристад",-афзуд Рустам Назарзода.

Афғонистон ва Тоҷикистон 1400 километр марзи муштарак доранд. Ҳодисаҳои табиӣ дар минтақаҳои марзии яке аз ин кишварҳо метавонад ба дигаре таъсир расонад. Аз ҷумла дар тобистони соли 2017 фаромадани сел дар ду мавзеи Дарвози Афғонистон маҷрои дарёи Панҷро баст ва ҳаракат дар шоҳроҳи Душанбе-Кӯлоб-Дарвоз-Хоруғро барои чанд ҳафта ба мушкил рӯбарӯ намуд.

Марги як сарбози 18-сола дар артиши Туркманистон

Овезалӣ Экаеви 18-сола, сарбози туркманистоние, ки дар шаҳри Балканободи он кишвар адои хизмати ҳарбӣ мекард, ба иттилои расмӣ, субҳи 20 август фавтидааст. Шоми ҳамон рӯз ҷасади ӯро ба волидонаш доданд.

"Ҷасадро ба маҳзи овардан ба манзили волидонаш, ба хок супурданд. Аз наздикони сарбоз забонхат гирифтанд, ки ин ҳодисаро оммавӣ намекунанд",-гуфт хабарнигори бахши туркмании Радиои Озодӣ.

Овезалӣ Экаев се моҳ пеш ба хизмати сарбозӣ даъват шуда ва аз саломатиаш шикояте надошт. Мақомоти ҳарбӣ сабабҳои марги сарбозро ба волидонаш шарҳ надодаанд. Аммо наздикони сарбоз мегӯянд, вай бар асари шиканҷа кушта шудааст.

Дар як моҳи охир ин дувумин сарбоз аст, ки дар артиши Туркманистон кушта мешавад.

Омодагиҳо барои раҳоии маллоҳони Украина

Русия ва Украина барои табодули зиндониён омодагӣ мебинанд. Дар ин бора расонаҳои русии "Коммерсант", РБК, ва "Интерфакс" бо истинод ба чандин манбаъ иттилоъ доданд.

Ба иттилои "Коммерсант" ва РБК, маллоҳони украинӣ, ки моҳи ноябри соли 2018 аз сӯи марзбонони рус боздошт шуда буданд, то охири соли равон ба ватан бармегарданд.

Додгоҳи шаҳрии Москва дирӯз муҳлати ҳабси маллоҳони украинро то охири моҳи октябри соли равон дароз кард. Додгоҳ 16 август боздошти 11 маллоҳро қонунӣ номида буд.

Манбаи "Коммерсант" гуфтааст, гуфтугӯҳо дар бораи табодули зиндониён миёни Русия ва Украина ба марҳалаи ниҳоӣ расидаанд. Ба гуфтаи ҳамсуҳбати нашрия, маллоҳони украинӣ то моҳи сентябр ба ватан бармегарданд. Манбаи РБК афзудааст, ки тасмими таслими маллоҳон хеле пеш гирифта шуда буд ва онҳо моҳи август озод мешаванд.

Хабаргузории русии "Интерфакс" мегӯяд, ба Киев панҷ шаҳрванди Украина супурда мешавад, ки дар Русия барои ҷиноятҳои гуногун зиндонӣ шудаанд. Онҳоро ахиран ба боздоштгоҳи "Лефортово" интиқол додаанд. Сухан аз Владимир Балух, Станислав Клих, Александр Колченко, Павл Гриб ва Николай Карпюк меравад. Ба гуфтаи манбаи хабаргузорӣ, онҳо боқии ҷазои худро дар ватан адо мекунанд.

Расонаҳои Русия нагуфтанд, ки ба Москва кадом маҳбусон таслим карда мешаванд. Ба иттилои "Коммерсант", эҳтимол дорад, сармуҳаррири пешини "РИА Новости – Украина" Кирилл Вишинский, ки дар Украина дар хиёнат ба давлат айбдор аст, ба Русия супурда шавад.

Украина мегӯяд, дар Русия ҳудуди 150 шаҳрванди ин кишвар ғайриқонунӣ нигаҳдорӣ мешаванд.

Муҳоҷирони узбекистонӣ эҳтимолан аз равғани растанӣ заҳролуд шуданд

69 тан аз муҳоҷирони меҳнатии Узбекистон, ки дар ширкати кишоварзие дар вилояти Самараи Русия фаъолият мекарданд, эҳтимол аз заҳри муше заҳролуд шудаанд, ки дар равғани растанӣ омехта шуда буд.

11 тан аз сокинони вилояти Улянови Русия, аз ҷумла ду кӯдак, баъди заҳролудшавӣ аз равған дар бемористон бистарӣ шуданд. Ду тан аз заҳролудшудаҳо фавтиданд.

Мақомоти тандурустии вилояти Улянов хабар доданд, ки нишонаҳои заҳролудшавии сокинони ин вилоят ба нишонаҳои бемории 69 тан аз шаҳрвандони Узбекистон монанд аст.

"11 тан зери назари табибон ҳастанд, ду кас фавтид. Нишонаҳои ҳар ду якранг буд: навъҳои гуногуни хунравӣ. Дақиқ шуд, ки ҳамаи ин одамон дар ғизо аз як навъ равғани растанӣ истифода кардаанд",-хабар дод Гулия Заббарова, сухангӯи мақомоти тандурустии Улянов.

Як сокини 69-солаи вилояти Улянов аз донаи офтобпарасте 200 литр равған истеҳсол кард, ки эҳтимол дорад, он бо доруи марги муш омехта шуда буд. Ин сокини вилояти Улянов донаи офтобпарастро аз ширкати кишоварзие аз вилояти Самара дарёфт кард, ки 69 тан муҳоҷири узбекистонӣ миёнаҳои моҳи июл онҷо заҳролуд шуда буданд.

200 литр равғани истеҳсолшударо сокини 69-солаи Улянов ба вилояти Самара интиқол дод. Вай 15 литри равғани истеҳсолшударо барои худ боқӣ гузошт, ки духтараш 10 литри онро ба ҳамкоронаш тақсим кард. Ҳашт тан аз онҳое, ки ин равғанро истеъмол карданд, дар бемористон бистарӣ шуданд.

Ёдрас мешавем, 18 июл дар вилояти Самараи Русия 69 тан муҳоҷири ӯзбекистонӣ бо нишонаҳои заҳролудшавӣ дар бемористон бистарӣ шуданд. Бемории онҳо ба бемории сокинони вилояти Улянов шабоҳат дошт. Рӯзи 4 август Ойбек Собирови 24-сола, як тан аз узбекистониҳои заҳролудшуда дар бемористон фавтид.

Ба иттилои расмӣ, аз 69 муҳоҷири заҳролудшуда то кунун 54 тани онҳо дар бемористон табобат мегиранд. Мақомоти тандурустии Узбекистон гуфтанд, рӯзи 17 август чанде аз табибони Узбекистон барои муолиҷаи муҳоҷирони заҳролудшуда ба Самара парвоз кардаанд.

Google ва Mozilla "сертификати бехатарӣ"-и Қазоқистонро масдуд мекунанд

Ширкатҳои Mozilla ва Google, ки браузерҳои Chrome ва Firefox ба онҳо тааллуқ доранд, гуфтанд, имкони насби "сертификати бехатарӣ"-и мақомоти Қазоқистонро дар дастгоҳҳои пайвасткунанда ба Интернет масдуд хоҳанд кард.

Mozilla бо нашри як изҳороти расмӣ дар сомонаи худ гуфтааст, ширкат пас аз нашри хабарҳо дар бораи тасмими мақомоти Қазоқистон барои ҷорӣ кардани "сертификати бехатарӣ" чора андешид. Ба гуфтаи ширкат, насби сертификати мазкур ба мақомоти Қазоқистон имкон медиҳад, ки маълумоти фиристодаи корбаронро рамзкушоӣ кунанд.

Дар блоги расмии Google низ изҳороти ҳамсон нашр шудааст. Ширкат гуфтааст, онҳо барои масдуд кардани сертификати бехатарии мақомоти Қазоқистон худ чора хоҳанд андешид ва корбарон эҳтиёҷ надоранд, ки дар ин замина мустақилона иқдоме бикунанд.

"Мо даст ба ин амал заданӣ набудем, вале ҳимояти корбарон ва тамомияти Интернет усули асосии мавҷудияти Firefox" мебошад",- гуфтааст сардори бахши эътимод ва бехатарии Mozilla.

"Мо барои ҳифозат аз ин мушкил чора андешидем ва дар оянда низ барои ҳифзи корбарони худ дар саросари дунё тадбир меандешем",- гуфтааст масъули умури технологии браузери Chrome.

Мақомоти Қазоқистон гуфтанд, насби "сертификати бехатарӣ" дар ҳамаи дастгоҳҳое, ки ба Интернет васл мешаванд, амнияти иттилоотии шаҳрвандонро таъмин мекунад. Ширкатҳои интернетрасони маҳаллӣ ба корбарон тавсия медиҳанд, ки "сертификати бехатарӣ"-ро насб кунанд, дар ғайри сурат, мумкин аст, пайваст шудан ба интернет мушкил гардад.

Бархе аз коршиносони бахши технологияҳои иттилоотӣ гуфтанд, мақомоти махсуси Қазоқистон тавассути "сертификати бехатарӣ" ба иттилои корбарон - муколамаҳо, рамзҳо, ворид шудан ба сомона ва ғайра - даст хоҳанд ёфт.

Додгоҳи Қирғизистон парвандаи Текебоевро бозбинӣ мекунад

Додгоҳи олии Қирғизистон 21 август парвандаи роҳбари зиндонии Ҳизби "Ота Макон" Омурбек Текебоев ва сафири пешин Дуйшенқул Чотоновро барои бозбинӣ ба додгоҳи ноҳияи Якуми майи Бишкек фиристод. Ҳукмҳои пешини эъломшуда бекор шуданд.

Вакили дифоъ Таалайгул Токтакунова гуфт, парванда ангезаи сиёсӣ дорад ва бинобар ин, додгоҳ ба баёноти вакилони порлумон, аъзои пешини ҳукумат ва сиёсатмадорони эътибор намедиҳад.

Ба гуфтаи ҳуқуқшинос, мақоми Текебоев ва Чотонов аз айбдоршуда ба гумонбар тағйир ёфта, онҳоро аз зиндон ба боздоштгоҳи муваққатӣ интиқол додаанд. Вакилони дифоъ тағйири ҳукми ҳабси онҳоро дархост хоҳанд кард. Ҳамчунин масъалаи барқарор кардани мандати вакилии Текебоев низ матраҳ хоҳад шуд, зеро ҳукми ӯро бекор карданд.

Ҳимоятгарони сиёсатмадори мухолифи қирғиз мегӯянд, далелҳоеро доранд, ки дуруғ будани баёноти соҳибкори рус Леонид Маевский зидди Текебоев ва Чотоновро тасдиқ мекунанд. Пештар аз ин вакилони Текебоев ба Додситонии кул дархост карда буданд, ки парвандаро бозбинӣ кунад. Додситонӣ тавсия дод, ки ба Додгоҳи олӣ муроҷиат карда шавад.

Додгоҳи олии Қирғизистон рӯзи 3 май парвандаи сиёсатмадорони зиндонӣ Омурбек Текебоев ва Дуйшенқул Чотоновро аз рӯи кодексҳои нав дубора баррасӣ карда, ҳукми 8 соли зиндони онҳоро бетағйир гузошта буд. Вале ҳукми мусодираи амволи онҳо тағйир дода шуда, дороиҳои мусодирашудае, ки ба парвандаи ҷиноӣ ҳеч рабте надоранд, ба сиёсатмадорон баргардонида мешавад.

Раиси Ҳизби "Ота Макон", вакили порлумони Қирғизистон Омурбек Текебоев ва ҳамҳизби ӯ - сафири пешини ин кишвар дар Кореяи Ҷанубӣ Дуйшенқул Чотонов моҳи феврали соли 2017 боздошт шуданд.

Текебоев дар асоси баёноти шаҳрвандони Русия Алексей Модин ва Леонид Маевский боздошт шуд, ки гуфтанд, ба ӯ барои кумак дар харидории саҳмияҳои ширкати қирғизии "Мегаком" 1 миллион доллар доданд. Вале худи Текебоев парвандаро сиёсӣ меномад.

Муовини Помпео ва вазири хориҷии Тоҷикистон аз чӣ гуфтанд?

Девид Ҳейл, муовини котиби давлатии Амрико дар масоили сиёсӣ, бо вазири корҳои хориҷии Тоҷикистон Сироҷиддин Муҳриддин

Девид Ҳейл, муовини котиби давлатии Амрико дар масоили сиёсӣ, бо вазири корҳои хориҷии Тоҷикистон Сироҷиддин Муҳриддин мулоқот кардааст.

Суҳбати онҳо рӯзи 21-уми август дар шаҳри Нурсултон (Остонаи собиқ) дар чаҳорчӯби нишасти С5+1 (панҷ кишвари Осиёи Марказӣ ва Амрико) сурат гирифт.

Ҷониби Тоҷикистон мегӯяд, дар ин мулоқот "вазъ ва дурнамои муносибатҳои Душанбеву Вашингтон ва рушди робитаҳо" баррасӣ шуд. Сомонаи Вазорати умури хориҷии Тоҷикистон навишт, ки "тарафҳо масъалаи рушди минтақавӣ ва мубориза алайҳи таҳдиду чолишҳои амниятӣ"-ро низ баҳс кардаанд.

Ҷузъиёти аз ин бештари мулоқот дастрас нест.

Дэвид Ҳейл, муовини котиби давлатии Амрико, то 23-юми август дар минтақаи Осиёи Марказӣ аст. Вай дар доираи самити С5+1 бо намояндагони вазоратҳои корҳои хориҷии Қазоқистону Қирғизистон, Узбекистон ва Туркманистон ҳам гуфтугӯ мекунад.

Мулоқоти С5+1 моҳи ноябри соли 2015 "бо ҳадафи ҳалли масоили муштараки амниятиву иқтисодӣ, беҳсозии тиҷорати минтақавӣ ва рушди минбаъдаи тиҷорату сармоягузории Амрико дар минтақа" таъсис шуда буд.

Зариф аз иқдомҳои "пешгӯинашаванда"-и Эрон ҳушдор дод

Муҳаммаҷавод Зариф

Эрон мегӯяд, ба паймони паҳн накардани силоҳи ҳастаӣ (NPT) содиқ мемонад, аммо сиёсати "пешгӯинашаванда"-и президенти Амрико Доналд Трамп метавонад посухҳои монандро аз Теҳрон талаб кунад.

Вазири корҳои хориҷии Эрон Муҳаммадҷавод Зариф рӯзи 21-уми август дар Пажӯҳишгоҳи Байналмилалии Тадқиқоти Сулҳи Стокҳолм (SIPRI) ҳамсоягони худро огоҳ кард, ки "хароҷоти зиёд барои силоҳҳои ғарбӣ ба Халиҷи Форс оромии пурра нахоҳад овард".

Зариф гуфт: "Пешгӯинашаванда будани ду тараф боис ба бетартибӣ мешавад. Президент Трамп наметавонад интизор дошта бошад, ки ӯ пешгӯинашаванда ва дигарон пешгӯишаванда бошанд."

"Арабҳои Халиҷи Форс наметавонанд бо харҷ кардани миллиардҳо доллар ё харидани аслиҳаи ғарбӣ ба оромӣ дар минтақа даст ёбанд... Ҳеҷ миқдори низомии хориҷӣ бо буданаш (дар Халиҷи Форс) наметавонад ноамниро пешгирӣ кунад", -- афзуд Зариф.

Кашмакашҳо миёни Вашингтон ва Теҳрон аз он дам боло гирифтанд, ки Трамп аз созишномаи ҳастаии соли 2015 баромад ва ба Эрон таҳримҳои нав бор кард.

Суханони Муҳаммадҷавод Зариф як рӯз пас аз он садо дод, ки котиби давлатии Амрико Майк Помпео Теҳрон ва наздикони онро дар барангехтани "террор ва нооромӣ" дар муноқишаҳо дар Ироқ, Лубнон, Сурия ва Яман "бо пайомадҳои вайронгари башарӣ" айбдор кард.

Блогерони тоҷик барои видеои танфурӯшон дар додгоҳ ҷавоб мегӯянд? ВИДЕО

Блогерҳои тоҷик мегӯянд, ки ҷинояте содир накардаанд
лутфан мунтазир бошед

Феълан кор намекунад

0:00 0:03:20 0:00

Додситонии шаҳри Душанбе ҳафтаи гузашта таҳқиқи парвандаи чаҳор блогери тоҷикро, ки моҳи июли имсол дар бораи занони танфурӯш гузориш карда буданд, ба анҷом расондааст.

Мақомот онҳоро ба "ғайриқонунӣ ҷамъ овардан ва паҳн кардани маълумоти шахсӣ" муттаҳам медонанд. Ин иттиҳом аз 11 то 27 ҳазор сомонӣ ҷарима ё як сол корҳои ислоҳиро пешбинӣ мекунад. Худи блогерон мегӯянд, ки ҳадафашон нишон додани мушкилоти иҷтимоӣ буд, на паҳн кардани иттилоти шахсӣ.

Бо ин вуҷуд, онҳо баъди бозпурсии аввал навори видеоро аз Ютуб ҳазф карданд.

Як мақоми Додситонии шаҳри Душанбе бе зикри номаш рӯзи 21-уми август ба Радиои Озодӣ гуфт, парвандаи блогерон барои баррасӣ ба додгоҳ фиристода шудааст. Худи блогерон ҳам гуфтанд, ки аз онҳо хоста шудааст, барои иштирок дар додгоҳ омода шаванд.

Чаҳор блогер як моҳи пеш бо ҳадафи анҷоми як навори таҷрибавӣ занҳоеро, ки аз онҳо "фоҳиша" ном мебурданд, дар хиёбонҳои пойтахт савори мошин карда, дар бораи нарху хадамоташон пурсиданд.

Тибқи иттилои дарёфтӣ парванда алайҳи блогерон бар асоси шикояти шаш қаҳрамони навори пахшшуда дар шабакаи Ютуб боз шудааст. Шахсияти ин занон ва ҳамин тавр назари онҳо дар бораи ин қазия барои мо дастрас нест. Мақомот шахсияти онҳоро ошкор намекунанд. Дар видеое, ки блогерон ҳам пахш карданд, чеҳраи онҳо пӯшида буд.

Рустам Ашӯров, яке аз блогерон, рӯзи 21-уми август гуфт, ҳеҷ гоҳ фикр намекарданд, ки кор то ба ин ҷо кашида мешавад. “Мо ба ҷуз аз матраҳ кардани мушкили ҷомеа ягон мақсади дигар надоштем”, -- афзуд ӯ.

Дар ин миён баъзе аз ҳуқуқшиносон гуфтанд, бархӯрд бо наворҳое, ки дар онҳо фаҳш дида мешавад, дар Тоҷикистон яксон нест. Ойниҳол Бобоназарова, ҳуқуқшиноси тоҷик, мегӯяд, агар нисбат ба блогерон барои ин навор парванда боз шудааст, пас, масъулине, ки наворҳои бадахлоқонаро бо зикри ному насаби шахс дар телевизионҳои давлатӣ пахш мекарданд, низ бояд муҷозот шаванд.

Машғул шудан ба фаъолиятҳои блогерӣ солҳои ахир миёни ҷавонони тоҷик маҳбубият пайдо мекунад. Мавзӯи суҳбати блогерон бештар ба мушкилоти ҷавонон рабт мегирад.

Аммо пас аз қазияи чаҳор блогер бархе ба ин боваранд, ки ин гуруҳро дар иҷрои кори худ эҳтиёткор мекунад.

Нишасти изтирории ҳавопаймои Душанбе-Маскав дар Оренбург

Ҳавопаймои ширкати “Уралские авиалинии”, ки субҳи 21-уми август аз Душанбе ба самти Маскав парвоз кард, бо сабаби бад шудани саломатии як мусофири хурдсол дар шаҳри Оренбург нишасти изтирорӣ анҷом дод. Умедҷон Лолаев, намояндаи ширкати "Уралские авиалинии" дар Душанбе ба Радиои Озодӣ гуфт, ин қазия ба хубӣ анҷом шуд ва баъд аз муоинаи табибон ва бо хости волидони кӯдак, ҳавопаймо ба Маскав парвозашро идома дод. "Ҳама чиз хуб аст ва ҳавопаймо тахминан ду соат пеш дар Маскав нишаст", -- гуфт Лолаев.

Ба иттилои ӯ, ҳангоми парвоз духтари 13-сола, ки бо волидонаш ба самти Жуковский парвоз мекарданд, аз бад шудани саломатии кӯдак шикоят карданд. Дар оғоз гуфта шуд, ки кӯдак аз норасоии қалб (сердечная недостаточность) азият мешавад, вале баъдан ин диагноз тасдиқ нашудааст. Халабонҳо қарор карданд, ки дар фурудгоҳи Оренбург нишасти изтирорӣ анҷом дода, табибони ёрии таъҷилиро ба назди бемор даъват кунанд.

“Баъди муоинаи кӯдак табибон ба волидонаш пешниҳод карданд, ки дар бемористон бистарӣ шавад, вале онҳо ин пешниҳодро рад карда гуфтанд, ки парвозро идома медиҳанд", -- гуфт Лолаев. – Баъди ин ҳавопаймо ҳамроҳ бо духтари бемор ба самти Жуковский парвоз карда ба фурудгоҳ расиданд”.

Ба иттилои расмӣ, дар дохили ҳавопаймое, ки соати 8-и субҳи имрӯз парвоз кард, 17 тифли ноболиғ буд.

Нишастҳои изтирорӣ бо сабаби бад шудани вазъи саломатии мусофирон дар дохили ҳавопаймо дар гузашта ҳам рух додааст. Соли 2018 дар давоми як ҳафта ду мусофири ҳавопаймои ширкати "Уралские авиалинии" даргузаштанд. Сабаби марги мусофирони калонсол дар бад шудани вазъи саломатии онҳо гуфта шуд.

Помпео Эронро ба доман задани низоъ дар Ховари Миёна муттаҳам кард

Майк Помпео

Вазири корҳои хориҷии Амрико дар нишасти Шӯрои амнияти Созмони Милали Муттаҳид дар бораи мушкилоти сулҳу амният дар Ховари Миёна ба таври мушаххас аз Эрон ном гирифт. Ин нишаст рӯзи 20-уми август баргузор шуд.

Майк Помпео Теҳрон ва ҳомиёнашро ба доман задан ба даҳшатафканӣ ва нооромӣ дар Ироқу Лубнон ва Сурияву Яман муттаҳам кард. Вай гуфт, “ин паёмадҳои вайронгари башарӣ дорад”.

Вазири умури хориҷии Амрико афзуд, агар Созмони Милали Муттаҳид иҷоза диҳад, ки таҳрими зидди Эрон дар моҳи октябри соли 2020 хотима ёбад, Теҳрон ба эҷоди нооромии нав рӯй хоҳад овард.

Ин таҳрим шомили манъи сафари Қосим Сулаймонӣ, фармондеҳи нерӯҳои қудс, ҷиноҳи хориҷии нерӯҳои Сипоҳи посдорони инқилоб, мешавад. Манъи сафари 23 эронии дигар низ ба ин таҳрим дохил аст.

Вазири умури хориҷии Амрико афзуд, “аз вақте ки Амрико ба дунболи ба сифр расондани фурӯши нафти Эрон аз моҳи апрели соли гузашта аст, оятуллоҳ тамоми талоши худро сарфи дипломатияи зӯргӯёна кардааст. Ва ин листи кӯтоҳи корҳоест, ки режим аз моҳи июл ба ин тараф раво дид. Эрон рӯзи 1-уми июл захираи ураниюми ғализиаш камро аз ҳудуди таъйиншуда 300 кило баландтар бурд. Рӯзи 2-юми июл ҳусиҳои зери ҳимояти Эрон дар Яман ба як фурудгоҳ дар Арабистони Саудӣ ҳамла карданд ва ҳанӯз ба ин корашон идома медиҳанд.”

Таниши миёни Эрон ва Амрико баъд аз он афзоиш ёфт, ки Вашингтон соли гузашта аз созиши ҳастаии соли 2015 миёни Эрон ва қудратҳои ҷаҳон хориҷ шуд ва таҳримҳои зидди ин кишварро аз сар гирифт.

Роҳбари пешини Оҷонсии муҳоҷирати Узбекистон 12 сол зиндонӣ шуд

Додгоҳи шаҳрии Тошканди Узбекистон Равшан Иброҳимов, раиси пешини Оҷонсии муҳоҷирати ин кишварро 12 сол зиндонӣ кард. Иброҳимов дар фасодкорӣ ва қаллобӣ айбдор шуд. Ба иттилои додгоҳ, Иброҳимов бо моддаҳои "қаллобӣ", "порадиҳӣ", "қонунисозии даромадҳои ғайриқонунӣ" айбдор дониста шуд.

Муовини пешини раиси оҷонсӣ Улуғбек Назаровро ҳам 12 сол зиндонӣ карданд. Ҳанӯз дар моҳи ноябри соли 2018 Иброҳимову Назаров ва ду тани дигар аз кормандони Оҷонсии муҳоҷирати Узбекистон боздошт шуда буданд.

Он замон гуфта мешуд, ки мансабдорони оҷонсии мазкур барои ирсоли муҳоҷирони меҳнатӣ ба Кореяи Ҷанубӣ аз шаҳрвандон бештар аз 20 миллион доллари ИМА пора гирифтаанд.

Ҷонибдорони Отамбоев аз Ҷеенбеков хостанд, монеи "истибдод" шавад

Сокинони деҳаи Кой-Тош ва Арашани ноҳияи Аламудини Қирғизистон ба президенти ин кишвар Сооронбой Ҷеенбеков муроҷиатнома фиристоданд. Дар муроҷиатнома омадааст, ки "ҳамдеҳагон аз Отамбоев бо даъвати виҷдон ҳимоят карданд ва ба манзили вай ба он хотир омаданд, ки изҳори пуштибонӣ кунанд".

"7 август неруҳои вижа бидуни огоҳӣ ба бачаҳои мо ҳамла кард. Одамони ношинос аз болои девор вориди хонаи Отамбоев шуда, ба латту кӯб ва паррондани сокинон сар карданд. Занону куҳансолонро ҳам заданд. Дар қонун омадааст, ки шаҳрвандон ба ҳимояти худ ҳақ доранд, аз ҷумла ба ҳимоят аз амалҳои ғайриқонунии мақомоти махсус. Ва мо аз ин ҳуқуқ истифода кардем",-омадааст дар муроҷиатнома.

Сокинони Кой-Тош ва Арашан хабар медиҳанд, ки мақомот "ҳоло онҳоро таъқибу таҳдид доранд ва парванди ҷиноӣ боз мекунанд". Сокинон аз президент хостанд, ки "таъқибу тарс додан қатъ ва онҳое аз кор ронда шаванд, ки дастури ғайриқонунии ҳамларо додаанд".

Рӯзҳои 7-8 август дар манзили Отамбоев дар деҳаи Кой-Тоши вилояти Чуй бо ҳадафи иҷборан ба бозпурсӣ ҳозир кардани президенти пешин ҳамла сурат гирифт. Баъди боздошт нисбати Отамбоев дар доираи парвандаи ғайриқонунӣ озод кардани дузди қонунӣ Азиз Батукаев, бо моддаҳои "Фасодкорӣ" ва "Иштирок дар ҷиноят" парванда боз шуд. Бо қарори додгоҳ, Отамбоев то 26 август ба ҳабси пешакӣ гирифта шуд.

Додситонии Қирғизистон 13 август хабар дод, ки нисбати президенти пешин дар робита ба ҳаводиси Кой-Тош чанд парвандаи дигар боз шудааст.

Трамп бозгашти Русияро ба "Ҳафтгонаи бузург" қобили қабул хонд

Президенти ИМА Доналд Трамп рӯзи сешанбеи 20 август гуфт, ки бозгашти Русия ба "Ҳафтгонаи бузург" (G7) қобили қабул аст. Бритониё, Олмон, Италия, Канада, ИМА, Фаронса ва Ҷопон шомили G7 ҳастанд.

Расонаҳои амрикоӣ бо такя ба манобеи худ дар Кохи Сафед хабар доданд, ки Трамп бо президенти Фаронса Эммануэл Макрон дар гуфтугӯи телефонӣ изҳори ризоият кардаанд, ки Русия дар нишасти "ҳафтгона" дар соли 2020 даъват шавад. Пештар аз ин Макрон дар мулоқот бо Владимир Путин, президенти Русия гуфт, ки агар Русия барои танзими низоъи Украина иқдомҳои мушаххасе рӯи даст гирад, ин кишвар ба мизи гуфтугӯ даъват хоҳад шуд.

Дар рӯзҳои оянда дар Фаронса саммити навбатии G7 баргузор мешавад, ки Русия ба он даъват нашудааст. Узвияти Русия дар ин созмон соли 2014, ба далели ғасби Қрим, бекор шуд. "Ман фикр мекунам, ки созмон бояд Ҳафтгонаи бузург номида шавад, зеро бештари мавзуҳои баррасишаванда ба Русия дахл доранд",-гуфт Трамп.

Ин бори аввал нест, ки Трамп аз бозгашти Русия ба созмон ҷонибдорӣ мекунад. Моҳи июни соли 2018 Трамп ба Москва пешниҳод кард, ки дар саммити созмон дар Канада ширкат варзад. Вале Путин гуфт, ки Русия омодаи қабули кишварҳои узви созмон дар Москва аст.

Русия дар соли 1997 бо даъвати президенти вақти ИМА Билл Клинтон ва сарвазири вақти Бритониё Тонӣ Блэр шомили G7 шуд.

Ҳамҷинсгарои узбек баъди муроҷиат ба Мирзиёев дар пайгард қарор гирифт

Мақомоти ҳифзи ҳуқуқи Узбекистон Шохрух Салимовро ҷустуҷӯ доранд, ки бо нашри як муроҷиати видеоӣ дар Интернет президент Шавкат Мирзиёевро ба ҳимояти ҷомеаи ҳамҷинсгароён дар ин кишвар даъват карда буд.

Салимов, ки ҳоло дар Туркия ба сар мебарад, гуфт, пас аз нашри он видео маъмурони пулис ба хонаи наздиконаш дар Узбекистон рафта, гуфтаанд, ки мехоҳанд, вайро дастгир кунанд. Шохрух Салимов пештар бо нашри як муроҷиатномаи видеоӣ ба номи президенти Узбекистон хостори ҳазфи банди "Бачабозӣ" аз Кодекси ҷиноии ин кишвар шуда буд.

"Ба хонаи мо кормандони пулис рафта, гуфтаанд, ки маро боздошт карданианд. Сабаб муроҷиати ман ба президенти Узбекистон будааст. Дар Узбекистон барои айбдор кардани шахсе шарт нест, ки ӯ коре кунад. Барои намуна, маъмурони пулис метавонанд ба хонаи шумо ба далели изҳори назаре биёянд, ки зидди назари президент ё ҳукумат аст. Ман зидди банди 120-и Кодекси ҷиноӣ ҳастам. Ман хоста будам, ки он банд ҳазф ва ҳуқуқи ҳамҷинсгароён ҳифз шавад",-гуфт ӯ.

Дар мақомоти ҳифзи ҳуқуқи Узбекистон гуфтанд, зидди Салимов парвандае боз нашудааст. Вале боздиди кормандони пулис аз хонаи наздикони ӯро шарҳ надоданд.

Қонунгузории Узбекистон "Бачабозӣ"-ро ҷиноят шумурда, барои он аз 1 то се соли зиндонро пешбинӣ мекунад.

Назарбоев мухолифони ҳукумати кунунии Қазоқистонро танқид кард

Нурсултон Назарбоев

Президенти пешини Қазоқистон Нурсултон Назарбоев, ки моҳи марти имсол аз мақоми худ истеъфо дод, интиқодгарони ҳукумати кунунии кишварашро танқид кард.

Назарбоев рӯзи 21-уми август дар ҷаласаи Шӯрои сиёсии ҳизби ҳокими "Нур Отан"-и Қазоқистон гуфт, ҳамаи интихоботҳо дар муҳлате баргузор хоҳанд шуд, ки Конститутсия муайян кардааст.

Ӯ хост, ба суханони "мухолифони инфиродӣ"-е, ки интихоботи пеш аз муҳлати порлумониро пешниҳод доранд, посух дода шавад.

"Мо суханони мухолифони худ ва блогерҳоеро мешунавем, ки баргузории интихоботи пеш аз муҳлати порлумониро пешниҳод доранд. Бояд ба ин баромадҳо имрӯз посух дода шавад. Далелҳои асоснок нест. Танҳо чун ҳамеша маҳкумкунӣ ҳаст. Вақте ҳукуматро танқид мекунанд, ба ҷуз аз суханҳои холӣ дигар чизе нест. Ҳадди ақал пешниҳод кунанд, ки чи бояд кард", - изҳор дошт Назарбоев.

​Президенти пешини Қазоқистон, ки аз унвони "элбасӣ" (пешвои миллат) ва ҳаққи дахлнопазирӣ бархӯрдор аст, дақиқ нагуфт, ки манзури ӯ аз мухолифони инфиродӣ ва блогерҳо кӣ ҳаст. Ҳамчунин шарҳ надод, ки аз интиқодгарон кадом пешниҳодҳоро мунтазир аст.

Бар асоси Конститутсияи Қазоқистон, қарор аст, дар ин кишвар соли 2021 интихоботи порлумонӣ баргузор шавад.

Интихоботҳои пеш аз муҳлати президентӣ ва порлумонӣ дар Қазоқистон борҳо баргузор шудааст. Ягона интихоботе, ки дар Қазоқистон дар муҳлати муайяншуда баргузор шуд, интихоботи президентии соли 2005 аст. Пас аз қабули Конститутсияи Қазоқистон дар соли 1995 ягон интихоботи порлумонӣ дар муҳлати муайяншуда баргузор нашудааст.

Назарбоев соли гузашта ва ибтидои соли равон низ гуфта буд, ки интихоботи президентии кишвараш пеш аз муҳлат баргузор намешавад. Вале бар хилофи гуфтаҳои ӯ, интихоботи президентии ахири Қазоқистон рӯзи 9-уми июни соли равон пеш аз муҳлат баргузор шуд.

Ёфтҳои бештар

Гузоришҳои видеоӣ

Барфи аввал дар Душанбе (бидуни шарҳ)
лутфан мунтазир бошед
Embed

Феълан кор намекунад

0:00 0:02:14 0:00
XS
SM
MD
LG