Пайвандҳои дастрасӣ

Хабари нав

Хабарҳо

Нашри маълумоти шахсии дипломати ИМА дар Чин ҷанҷол барангехт

Иёлоти Муттаҳида Чинро, ки акс ва ҷузъиёти шахсии як дипломати амрикоиро чоп кард, "режими авбош" номидааст.

Сухангӯи Вазорати корҳои хориҷии Амрико Морган Ортагус дар нишасти матбуотӣ гуфт, "фикр намекунам, ки ифшои маълумоти шахсии дипломати амрикоӣ бо аксу номи фарзандонаш эътирози расмӣ бошад. Ин корест, ки як режими авбош хоҳад кард."

Изҳороти Вазорати корҳои хориҷии Амрико пас аз он нашр шуд, ки рӯзномаи Ҳонгконг "Та Кунг Па" як акси дипломати ИМА-ро нашр кард.

Рӯзнома ӯро Ҷули Эдеҳ аз бахши сиёсии консулгарӣ шинос намудааст, ки бо роҳбари эътирозҳои донишҷӯён дар меҳмонхонаи боҳашамат сӯҳбат доштааст. Дар зери акс навишта шудааст: "Дахолати нирӯҳои хориҷӣ".

Рӯзи 8-уми август Пекин ба Вашингтон паём дод, ки "мудохиларо ба корҳои Ҳонгконг бас кунад" ва ба гуфтааш "ба шӯришҳои зидди Чин" поён диҳад.

Муносибатҳои Амрико ва Чин дар пасманзари ҷанги тиҷоратӣ ва рақобат барои нуфузи низомӣ дар ғарби Уқёнуси Ором ва масъалаҳои дигар тезу тунд шудааст.

Эътилофи зидди шиканҷа аз вазъи Раҳматуллои Раҷаб изҳори нигаронӣ кард

Валамат Иброҳимзода

9-уми август, Эътилофи ҷомеаи шаҳрвандӣ зидди шиканҷа ва беҷазоӣ дар Тоҷикистон бар пояи дархости ҳамсари маҳбус Ҷобир Раҳматуллои Раҷаб барои баррасии қазияи ӯ ба Ваколатдори ҳуқуқи инсон дар Тоҷикистон муроҷиат намуд.

Валамат Иброҳимзода, ҳамсари Раҳматуллои Раҷаб, изҳор доштааст, ки ҳуқуқи шавҳари ӯ, узви зиндонии ҳизби феълан дар кишвар мамнӯи наҳзати исломӣ поймол мешавад.

Ҳафтаи гузашта фарзанди Раҳматуллои Раҷаб низ аз вазъи падари худ дар маҳбас изҳори нигаронӣ карда буд.

Дар посух ба шикояти наздикони ин маҳбус охири моҳи май мақомоти интизомӣ гуфта буданд, ки Раҳматуллои Раҷаб бо иттиҳоми риоя накардани қоидаҳои маҳбас ба ҳуҷраи ҷазо интиқол ёфтааст.

Трамп президенти Фаронсаро барои "паём" ба Эрон танқид кард

Доналд Трамп, президенти Амрико, Эммануэл Макрон – раиси ҷумҳури Фаронсаро айбдор кард, ки ба Эрон барои эҳтимоли гуфтушунид бо Вашингтон паёмҳои "носозгор" мефиристад.

"Эрон дучори душвории молии ҷиддӣ мебошад. Онҳо ноумедона аз паси музокирот бо Амрико ҳастанд, аммо аз ҳамаи онҳое, ки ният доранд моро намояндагӣ кунанд, паёмҳои носозгор дода мешаванд, аз ҷумла президенти Фаронса Макрон", -- навишт Трамп рӯзи 8-уми август дар Twitter.

Вай афзудааст, "медонам, ки Эммануэл нияти нек дорад, ҳамон тавр ки дигарон доранд, аммо ҳеҷ касе наметавонад ба ҷои Иёлоти Муттаҳида гап занад, ба ҷуз аз худи Иёлоти Муттаҳида."

Маълум нест, ки Трамп дар паёмҳои худ ба чӣ ишора кардааст ва Кохи Сафед шарҳе надодааст.

Доналд Трамп моҳи майи соли 2018 аз созишномаи ҳастаии Эрон, ки бо шаш қудрати ҷаҳонӣ имзо гузоштааст, даст кашид ва дубора таҳримҳои сахттарро ба Теҳрон бор кард. Ӯ гуфт, шартҳои созишномаи 2015 барои пешгирӣ аз тавлиди силоҳи ҳастаӣ чандон сахт набуданд.

Раиси ҷумҳури Амрико изҳор дошт, ки омодааст бо раҳбарони Эрон сӯҳбат кунад, аммо Теҳрон гуфт, пеш аз ҳама таҳримҳо бояд бардошта шаванд.

Фаронса, дар якҷоягӣ бо Бритониё, Олмон, Русия ва Чин, дар созишномаи ҳастаии соли 2015 монданд ва Вашингтонро водор карданд, ки дар созишнома монад.

Дар оғози ҳафтаи равон "Ал-Монитор" дар гузорише гуфт, ки раҳбари Фаронса президенти Эрон Ҳасани Рӯҳониро барои вохӯрӣ бо Трамп ба нишасти G7 даъват кард, ки охири моҳи август дар Фаронса баргузор хоҳад шуд.

Як дипломати фаронсавӣ ин гузоришро инкор кард ва ба хабаргузории Reuters гуфт, "бартарӣ ин аст, ки Эрон ба ӯҳдадориҳои ҳастаии худ пойбанд аст."

Ба ҷонибдорӣ аз роҳбари пешини "Қазатом" эътироз доир шуд

Дар шаҳри Семеи Қазоқистон рӯзи 9 август ба ҷонибдорӣ аз роҳбари пешини ширкати миллии "Қазатомпром" Мухтор Ҷакишев эътирозҳои алоҳида баргузор шуд. Ҷакишев дар зиндони Семе адои ҳукм мекунад.

Динора Муборак, фаъоли ҷомеаи шаҳрвандӣ бо шиори "Ман озодии Мухтор Ҷакишевро талаб мекунам" назди зиндон омад. Фаъоли дигар Дилора Актолкинова бо шиори "Озодӣ ба Мухтор Ҷакишев ва ҳамаи зиндониёни сиёсӣ" назди бинои додситонӣ ҳозир шуд. Фаъолон баъди ним соат пароканда шуданд.

Дар Семе аз ибтидои ҳафта бори дувум аст, ки чунин эътирозҳо баргузор мешаванд. Баъд аз он ки додгоҳ дар таърихи 24 июл ҳукми ҳабси Ҷакишевро бе тағйир боқӣ гузошт, даҳҳо иқдом дар шаҳрҳои мухталифи Қазоқистон бо талаби озодии вай барпо шуд.

Мухтор Ҷакишев моҳи майи соли 2009 боздошт шуд. Додгоҳ ӯро соли 2010 дар фасодкорӣ айбдор ва 14 сол зиндонӣ кард. Чанде аз созмонҳои ҳомии ҳуқуқ дар соли 2013 Мухтор Ҷакишевро маҳбуси сиёсӣ эътироф карданд.

WSJ: Конгресси ИМА дар бораи созиши русҳо бо Трамп иттилоъ ёфт

Чанд бонки бузург ба Конгресси ИМА иттилоеро дастрас карданд, ки "марбут ба русҳоест, ки эҳтимол бо Трамп, хонаводаи вай ва ё ширкатҳояш доду ситад доштаанд". Дар ин бора нашрияи The Wall Street Journal иттилоъ медиҳад.

Ба иттилои нашрия, бонкҳое амсоли Bank of America, Citigroup, Deutsche Bank, JPMorgan, Morgan Stanley ва Wells Fargo ба Конгресс маълумот додаанд.

Пештар аз ин Трамп бо ҳадафи маҳдуд кардани дастрасӣ ба суратҳисобҳои бонкӣ ва иттилоъ дар бораи пардохтҳои молиаш ба додгоҳ шикоят бурда буд.

Моҳи майи соли ҷорӣ сенати аёлати Ню-Йорк қонунеро қабул кард, ки имкон медиҳад, иттилоъ дар бораи пардохтҳои молии президент ба Конгресс ироа гардад.

Ҳамчунин моҳи апрели соли ҷорӣ ду кумитаи Палатаи намояндагони ИМА аз бонкҳо дар бораи дороиҳои Доналд Трамп иттилоъ дархост карда буданд.

Моҳи март додситонии Ню-Йорк аз бонкҳои Deutsche Bank ва Investors Bank дар робита ба ширкатҳои Трамп иттилоъ дархост карда буд.

Бишкек гуфт, Бабанов ба маҳзи баргаштан ба ҷавобгарӣ кашида мешавад

Кумитаи давлатии амнияти миллии Қирғизистон ба тасмими номзади пешин ба мақоми президентии ин кишвар Омурбек Бабанов, ки гуфта буд аз хориҷ ба ватан бармегардад, вокуниш нишон дод. Дар изҳороти кумита омадааст, ки Бабанов ба маҳзи баргаштан ба Қирғизистон дар доираи қонун ба ҷавобгарӣ кашида хоҳад шуд: "Дар робита ба Омурбек Бабанов ду парванда таҳқиқ мешавад".

Сиёсатмадори мухолифи қирғиз, ки ки ҳоло дар хориҷ зиндагӣ мекунад, пештар аз ин гуфта буд, ки 13 апрели соли равон ба ватан бармегардад. Вале дертар бо нашри як изҳороти видеоӣ аз фурудгоҳи шаҳри Москва гуфт, аз тасмими худ сарфи назар кард. Зеро ӯро огаҳ кардаанд, ки дар тазоҳуроти бахшида ба бозгашти вай фитнаеро барангехтанианд. Ӯ аз ҷонибдоронаш даъват кард, ки даст ба тазоҳурот назананд ва вай рӯзҳои наздик оромона ба Қирғизистон бармегардад.

Омурбек Бабанов пас аз интихоботи президентии Қазоқистон дар соли 2017 кишварро тарк карда, гуфт, ки аз сиёсат канор рафтааст. Зидди ӯ ду парвандаи ҷиноӣ боз карданд. Парвандаи аввал дар натиҷаи як суханрониаш дар доираи маъракаи пешазинтихоботӣ дар шаҳри Ӯш бар пояи банди "Ангехтани адовати миллӣ ва нажодӣ" кушода шуд.

Парвандаи дувум бар пояи банди "Даъвати оммавӣ барои сарнагун сохтани сохти конститутсионӣ" боз гашт. Президенти пешини Қирғизистон Алмосбек Отамбоев 10 декабри соли 2018 дар суҳбат бо телевизиони "Апрел" гуфт, парвандаҳои зидди Бабанов бояд қатъ карда шаванд.

Президенти Қирғизистон Сооронбой Ҷеенбеков 19 декабри соли гузашта дар нишасти хабарии солонаи худ изҳор дошт, ки "ҳеч гуна гуфтугӯи дуҷониба ё сеҷонибае бо Омурбек Бабанов анҷом надодааст".

"Узбеккино" наворбардории филми фоҷеаи 11 сентябро ба поён расонд

Оҷонси давлатии "Узбеккино" наворбардории филми "парвози 101"-ро бо фармоиши давлатӣ ба поён расонд. Ин нахустин филми ватании фоҷиаест, ки дар асоси ҳаводиси воқеии 11 сентябри соли 2001 дар шаҳри Ню-Йорк таҳия шудааст.

Филми коргардон Акром Шоҳназаров ҳодисаи воқеиеро қисса мекунад, ки 11 сентябри соли 2001 - рӯзи ҳамлаҳои террористӣ дар ИМА дар дохили ҳавопаймои ширкати "Узбекистон ҳаво йӯлларӣ" дар масири Тошканд- Ню-Йорк рух додааст.

"Агар дар ёд дошта бошед, дар натиҷаи ҳамлаҳои террористии 11 сентябри соли 2001 ҳарими ҳавоии Амрико барои як муддат баста шуда буд. Боинг-767-и "Узбекистон ҳаво йӯлларӣ", ки таҳти рақами 101 аз Тошканд ба Ню-Йорк парвоз карда буд, бо 180 мусофир дар осмон бо мушкил рӯ ба рӯ шуд. Филм дар бораи ин ҳодиса ва мардонагии халабони узбеке қисса мекунад, ки тавонист он рӯз ин мушкилро ҳал кунад",-изҳор дошт филмсоз Равшан Норбоев.

Филмномаро Шоҳсанам Сафиева ба раҳбарии нависанда Эркин Аъзам навиштааст. Филми мазкур охирҳои соли равон дар Узбекистон намоиш дода хоҳад шуд.

Дар Бишкек тазоҳуроти ҷонибдорони Отамбоевро пароканда карданд

Пулиси Қирғизистон шаби 8-уми август тазоҳуроти ҷонибдорони пешини ин кишвар Алмосбек Отамбоевро дар шаҳри Бишкек бо гази ашковар ва норинҷаки садо пароканда кард.

Ба иттилои расонаҳо, иштирокчиёни тазоҳурот ба самти пулис ва ҳатто рӯзноманигорон санг ҳаво доданд. Кормандони пулис эътирозгаронро аз майдони марказии шаҳри Бишкек ва хиёбонҳои наздик ба он берун карданд. Пештар худи Отамбоев тазоҳуроти бемуҳлат эълом карда буд.

Пулис 8-уми август дар натиҷаи амалиёти дувуми худ Отамбоевро дар манзили зисташ дар деҳаи Кой-Тош дастгир кард. Президенти пешини Қирғизистон дар натиҷаи гуфтугӯ худро ба мақомот таслим намуд.

Алмосбек Отамбоев моҳҳои охир се дафъа барои бозпурсӣ ба Вазорати корҳои дохилии Қирғизистон даъват шуд, вале нарафт. Вакили мудофеи президенти собиқ даъват ба бозпурсии ӯро ғайриқонунӣ номид ва пешниҳод кард, ки нафари зери ҳимояташ ба суоли хаттии муфаттишон хаттӣ ҷавоб гӯяд. Ин пешниҳоди ӯ қабул нашуд.

Порлумони Қирғизистон рӯзи 27-уми июни имсол Алмосбек Отамбоевро аз унвони президенти пешин ва ҳамин тавр масуняит маҳрум кард.

Алмосбек Отамбоевро ба ғайриқонунӣ озод кардани "дузди қонунӣ" Азиз Батукаев гумонбар медонанд. Вай ҳамчунин ба ғайриқонунӣ соҳиб шудани қитъаи замин дар деҳаи Кой-Тош, фасодкорӣ ҳангоми бозсозии Маркази гармидиҳии Бишкек, фишор ба вакилони порлумон, додрасҳо, фаъолони маданиву расонаҳо, муттаҳам аст. Вале худи ӯ гуфтааст, ҳеҷ як иттиҳомро қабул надорад.

Дар Туркманистон ба қарздорони обу барқ ҳуҷҷат намедиҳанд

Дар Туркманистон шумори ҳуҷҷатҳое афзоиш ёфт, ки мақомот пеш аз таҳияи онҳо аз сокинон аризаи қарздор набудан аз хадамоти коммуналиро талаб мекунанд. Сокинони шаҳри Марии Туркманистон хабар доданд, мақомоти он шаҳр аз касоне, ки барои дарёфти ариза ё ҳуҷҷате муроҷиат мекунанд, расидҳои пардохти хизматрасониҳои коммуналӣ талаб менамоянд.

"Субҳ (8 август) мо назди бинои Сабти асноди ҳолатҳои шаҳрвандӣ (ЗАГС) истода будем. Ин муассиса дар робита ба ақди никоҳ, бекор кардани он, таваллуд ва марг санад медиҳад. Касоне ки дар навбат буданд, ба муассиса даромада, зуд берун мешуданд. Як корманди он берун омада, гуфт, беҳуда дар навбат наистед, зеро бе нишон додани расиди пардохти ҳаққи истифодаи обу барқ ба касе санад дода намешавад",-гуфт як сокини маҳаллӣ.

Мақомоти Туркманистон ба ин тартиб, талош доранд, ки сокинон ҳаққи истифодаи обу барқу газро пардохт намоянд. Дар минтақаҳои дигари Туркманистон пештар аз ин аз кормандони бахши буҷавӣ талаб карданд, ки барои дарёфти маош нахуст расиди пардохти ҳаққи истифодаи хизматрасониҳои коммуналиро пешниҳод кунанд.

Роҳбари Қазоқистон ҳаводиси Қирғизистонро "кори дохилии он кишвар" номид

Қосимҷомарт Тоқаев, президенти Қазоқистон ҳаводиси ахири Қирғизистонро "кори дохилӣ"-и ин кишвар арзёбӣ кард.

Дар ин бора Берик Курмангалӣ, сухангӯи президент дар саҳифаи "Фейсбук" хабар дод. Дар хабар омадааст, ки Тоқаев ҳаводиси Қирғизистонро пайгирӣ дорад ва умедвор аст, вазъ ба зудӣ муътадил шавад.

Шаби 7-уми август неруҳои махсуси мақомоти Қирғизистон ба манзили Алмосбек Отамбоев, президенти пешини Қирғизистон бо мақсади ҳозир кардани вай ба бозпурсӣ, ҳамла бурданд. Аммо ҷонибдорони Отамбоев ба ҳамлаи неруҳои махсус муқовимат нишон доданд. Дар натиҷа шоми рӯзи 8-уми август мақомот бори дувум ҳамла бурданд ва ин бор Отамбоев таслим шуд.

Вазорати тандурустии Қирғизистон хабар дод, ки дар натиҷаи ҳамлаи рӯзи 7-уми август як низомӣ кушта, 52 тани дигар захмӣ шуданд.

Отамбоев дар соли 2017, замони президентиаш мақомоти Қазоқистонро танқид карда буд. Вай роҳбарияти Қазоқистонро дар дахолат ба умури дохилии Қирғизистон айбдор ва президенти вақти Қазоқистон Нурсултон Назарбоевро "диктатори куҳансол" номид.

Узбекистон: вазъ дар марз бо Қирғизистон зери назорат аст

Неруҳои марзбонии Хадамоти амнияти давлатии Узбекистон мегӯяд, вазъ дар марз бо Қирғизистон зери назорат буда, иттилои фавриро бо ҳамтоёни худ аз кишварҳои ҳамсоя табодул мекунанд.

Шаби 7 ба 8-уми августи соли равон неруҳои махсуси Кумитаи амнияти миллии Қирғизистон ба манзили зисти президенти пешини ин кишвар Алмосбек Отамбоев ҳамла карда, хостанд, ӯро боздошт кунанд, вале амалиёт ноком анҷомид. Дар натиҷа миёни ҷонибдорони Отамбоев ва неруҳои махсус задухурд сурат гирифта, як кас кушта ва 52 тани дигар захмӣ шуданд.

Хабаргузории "Интерфакс" ва сомонаи 24.kg рӯзи панҷшанбе навиштанд, ки неруҳои махсуси полиси Қирғизистон президенти пешин Алмосбек Отамбоевро пас аз бархӯрди шадид бо посбонҳо ва садҳо тарафдоронашбоздошт карданд.

Вакилони порлумони Қирғизистон, ки ба таътили тобистона рафта буданд, 8-уми август дубора ҷамъ шуда, ҷаласаи изтирорӣ баргузор карданд.

HRW хост, Тоқаев мушкилоти марбут ба ҳуқуқи инсонро ҳал кунад

Қосимҷомарт Тоқаев

Созмони байналмилалии ҳомии ҳуқуқи Human Rights Watch гуфт, ки президенти нави Қазоқистон Қосимҷомарт Тоқаев бояд мушкили марбут ба ҳуқуқи инсонро ҳал кунад. Дар ин бора созмони мазкур ба президенти Қазоқистон нома фиристодааст.

Дар номаи созмон, ки 6-кми август нашр шуд, омадааст, HRW аз мақомоти Қазоқистон мехоҳад, "барои ҳалли мушкилоти ҷамъшуда дар бахши ҳуқуқи инсон чораҷӯӣ кунанд".

Созмон ба вижа аз Тоқаев хостааст, маҳдудиятҳои марбут ба эътирозҳои осоишта ва озодии баёну расонаҳоро бекор кунад ва иҷрошавии ҳуқуқи кӯдакони маъюбро таъмин намояд.

"Қазоқистон мебоист, аз муддатҳо пеш ба кафолати ҳуқуқу озодӣ машғул мешуд", - омадааст дар мактуб.

"Солҳост, ки роҳбарияти Қазоқистон дар бахши ҳуқуқи инсон ҳарфҳои дурусте мезанад, аммо дар амал ҳуқуқҳои асосӣ ва озодиҳои инсон поймол мешаванд", - зикр шудааст дар мактуб.

Созмон ҳамчунин ишора кардааст, ки "моҳи марти соли 2018 додгоҳи Қазоқистон ҳаракати сабтиномнашудаи "Интихоби демократии Қазоқистон"-ро "террористӣ" унвон карда, аз он замон то кунун ҷонибдорони ҳаракати мазкур таҳти фишор ҳастанд". Ба гуфтаи созмон, "чанд шаҳрванди Қазоқистон бо айби ҷонибдорӣ ва сармоягузории ҳаракати мазкур ба ҷавобгарии ҷиноӣ ҷалб шудааст".

Мулоқоти раҳбарони Украина ва Туркия дар бораи савдои озод

Раҷаб Таййиб Эрдуғон, раиси ҷумҳури Туркия бо ҳамтои украиниаш Владимир Зеленский

Дар изҳороте дар вебсайти президенти Украина гуфта мешавад, ки Украина ва Туркия қарордоди тиҷорати озодро баррасӣ мекунанд. Аз рӯи ин қарордод савдои дуҷониба метавонад солона аз ду то ба 10 миллиард доллар афзуда шавад.

Раиси ҷумҳури Туркия Раҷаб Таййиб Эрдуғон ин суханонро пас аз вохӯриаш бо президенти Украина Владимир Зеленский дар Анқара рӯзи 7-уми август изҳор доштааст.

Зеленский гуфт: “Ҳаҷми савдои дуҷониба дар соли 2018 беш аз 4 миллиард доллар буд. Ман бовар дорам, ки ин ҳадди тавони мо нест."

Эрдуғон ёдрас кард, ки ҳарду дар бораи "ҳама ҷанбаҳои муносибатҳои Туркия ва Украина" сӯҳбат кардаанд ва гуфт, "акнун вақти ба поён расондани раванди гуфтушунид оид ба савдои озод" мебошад, ки солҳои дароз идома дорад.

Зеленский бо як сафари дурӯза дар Туркия мебошад. Вай ҳамчунин барнома дорад, ки бо аъзои ҷамоаҳои украинӣ ва қримӣ-тоторӣ, инчунин, Патриархи Барталомей, роҳбари рӯҳонии масеҳиёни православӣ вохӯрад.

Нерӯҳо дубора ба хонаи Алмосбек Отамбоев наздик мешаванд

Рӯзи 8-уми август дубора шумораи зиёди нерӯҳои ҳифзи ҳуқуқ ба хонаи раиси ҷумҳури пешини Қирғизистон Алмосбек Отамбоев дар Қой-Тош, канори шаҳри Бишкек наздик шудаанд. Хабарнигори бахши қирғизии Радиои Озодӣ гуфт, бисёре аз онҳо маъмурони пулисанд ва дар миёнашон вазири корҳои дохилӣ Кашкар Ҷунушалиев низ мушоҳида шудааст. Гутфа мешавад онҳо аз гази ашковар истифода мекунанд. Вале дар Вазорати корҳои дохилии Қирғизистон дар ин бора ҳеч иттилоъ надодаанд. Манзили зисти Отамбоев ҳанӯз ҳам дар иҳотаи тарафдоронаш мебошад.

Дар ин боара бештар бихонед:

Амалиёти боздошти Отамбоев як кушта ва беш аз 50 захмӣ ба ҷой гузошт. ВИДЕО, АКС

Талоши боздошти президенти пешин бо муқовимати хунин рӯбарӯ шуд. ВИДЕО

Раиси ҷумҳури пешини Қирғизистон тазоҳуроти бемуҳлат эълон кард

Марям Навоз, духтари Навоз Шариф, боздошт шуд

Марям Навоз

Бюрои миллии мубориза бо коррупсия дар Покистон рӯзи 8-уми август Марям Навоз, раҳбари мухолифон ва духтари нахуствазири пешини ин кишварро дастгир кард. Марям Навоз муовини раҳбари Ҳизби Лигаи мусалмонҳои Покистон аст.

DawnNewsTV ба нақл аз манобеи Бюрои миллии зидди фасод гуфт, Марям Навозро ҳангоми дидор бо падараш Навоз Шариф дар зиндон боздошт кардаанд.

Раъно Аббос, як намояндаи Ҳизби Лигаи мусалмонони Покистон ба Радиои Озодӣ гуфт, мақомот то ҳол далели боздошти Марям Навозро эълон накардаанд.

Манобеи Бюрои миллии зидди фасод бо шарти фош нашудани номи худ гуфтаанд, Марям Навоз ба “амалиёти шубҳаовар” дар корхонаи тавлиди шакари Chaudry Sugar Mills гумонбар аст. Вай яке аз саҳмдорони корхона аст.

Қарор аст, Марям Навоз рӯзи 9-уми август дар додгоҳ ҳозир шавад.

Навоз Шариф, нахуствазири пешини Покистон давраи ҳафтсолаи ҷазоро дар зиндон адо мекунад. Ӯ бо ҷурми фасоди молӣ ҳабс шудааст. Ҷонишини ӯ дар Ҳизби Лигаи мусалмонони Покистон Шаҳид Ҳоқон Аббосӣ низ бо ҷурми фасоди молӣ дастгир шудааст. Вай иттиҳомро рад мекунад.

Ин боздоштҳо мухолифонро асабонӣ кард. Онҳо ҳукумати нахуствазир Имрон Хонро ба он айбдор мекунанд, ки барои халосӣ аз рақибони худ аз низоми додгоҳӣ сӯистифода мекунад.

Раиси ҷумҳури пешини Қирғизистон тазоҳуроти бемуҳлат эълон кард

Алмосбек Отамбоев

Президенти пешини Қирғизистон Алмосбек Отамбоев дар назди бинои "Медиа Форум", ки ба ӯ тааллуқ дорад ва телевизиони "Апрел" ҳам дар он ҷойгир аст, тазоҳуроти бидуни муҳлат эълон кард.

Ӯ рӯзи 8-уми август гуфт, "даст ба тазоҳурот мезанем, то моро гӯсфанд наҳисобанд. Дирӯз талош карданд, боздошт кунанд. Мақомот самти худро тағйир медиҳанд. Дар он маҷмаа танҳо Отамбоев мусаллаҳ буд. Додситонии кул намедонад ё худро ба нодонӣ мезанад. Хонаи ман то қарори додгоҳ зери ҳимояти давлат аст ва қудратиҳо ҳаққи ба онҷо омаданро надоранд."

Президенти Қирғизистон Сооронбой Ҷеенбеков 8-уми август дар ҷаласаи Шӯрои амнияти кишвараш гуфт, Отамбоев ба раванди қонунии тафтишот муқовимати мусаллаҳона кард ва Конститутсия ва қонунгузории кишварро дағалона вайрон намуд.

Дар деҳаи Кой-Тош, ки онҷо манзили зисти Отамбоев ҷойгир аст, дар ҳоли ҳозир ҳудуди 300 нафар ҷамъ шудаанд. Онҳо тасмим доранд, бо талаби истеъфои Ҷеенбеков ба назди «Кохи Сафед» ва бинои ҳукумати Қирғизистон дар шаҳри Бишкек бираванд.

Нерӯҳои махсуси Кумитаи амнияти миллии Қирғизистон шаби 7 ба 8-уми август ба хонаи Отамбоев ҳамла карда, хостанд, ӯро боздошт кунанд. Вале амалиёт ноком анҷом ёфт.

Ҷонибдорони Отамбоев ба неруҳои махсус иҷозат надоданд, ки ба бино ворид шуда, президенти пешинро дастгир кунанд.

Бино ба маълумоти ахир, дар натиҷаи задухӯрд 52 кас осеб дида, як сарбози нерӯҳои махсус аз тири силоҳ ба ҳалокат расид.

Алмосбек Отамбоев моҳҳои охир се дафъа барои бозпурсӣ ба Вазорати корҳои дохилии Қирғизистон даъват шуд, вале нарафт. Порлумони Қирғизистон рӯзи 27-уми июни имсол Алмосбек Отамбоевро аз унвони президенти пешин ва ҳамин тавр масуняит маҳрум кард.

Алмосбек Отамбоевро ба ғайриқонунӣ озод кардани "дузди қонунӣ" Азиз Батукаев гумонбар медонанд. Худи ӯ иттиҳомро рад кардааст. Алмосбек Отамбоев аз соли 2011 то 2017 раиси ҷумҳури Қирғизистон буд.

Дар Узбекистон кӯлҳоро ёдгориҳои табиии давлатӣ эълом мекунанд

Ҳукумати вилояти Тошканди Узбекистон вазифадор карда шудааст, ки дар муддати як моҳ кӯли "Урунгач"-ро ба масоҳати 43 ҳектар дар боғи миллии Угам-Чатқол ёдгории давлатии гидрологии табиӣ эълом кунад.

Дар ин бора дар тарҳи қарори девони вазирони Узбекистон дар бораи "Танзими истифодаи ҳудудҳои алоҳида ва иншооти боғи миллии Угам-Чатқол" гуфта шудааст.

Дар қарор омадааст, ки ёдгории давлатии гидрологии табиии "Урунгач" дар ҳудуди хоҷагии ҷангали Бурчмулло ҷойгир буда, аз сӯи он идора мешавад ва анҷоми ҳама гуна фаъолиятҳое, ки ба иншооти мазкур таъсири манфӣ мерасонанд, манъ мебошад.

Пештар расонаҳо хабар доданд, ки бунёди худсаронаи маконҳои хурди истироҳатӣ дар соҳили кӯли Урунгач ва ба роҳ мондани хидматрасониҳои гуногун, аз қабили қаиқсаворӣ дар он нигаронии ҳомиёни муҳити зисти Узбекистонро ба бор овардааст.

Занони футболбози тоҷик барои коромӯзӣ ба Вашингтон рафтанд

Бозигарони дастаи мунтахаби миллии занонаи футболи Тоҷикистон дар доираи барномаи таълимии муштариёни варзишӣ барои коромӯзӣ дар пойтахти Иёлоти Муттаҳидаи Амрико – шаҳри Вашингтон – қарор доранд. Дар ин бора сомонаи Федератсияи футболи Тоҷикистон хабар додааст.

Ба иттилои ин манбаъ, ҳайати вакилони мунтахаби занонаи футболи Тоҷикистон бо даъвати ҳукумати ИМА рӯзи 6-уми август ба Вашингтон омадааст.

Сардори шуъбаи футболи занонаи Федератсияи футболи Тоҷикистон Дилором Нусратуллоева гуфтааст, ки ҳайати вакилони мунтахаби Тоҷикистон дар Вашингтон дар доираи барномаи таълимии муштариёни варзишии ИМА бо ҳамкасбони амрикоии худ мулоқот намуда, масоили рушди футболи занонаро баррасӣ хоҳанд кард.

Дар ҷараёни сафари дувоздаҳрӯза ба ИМА ҳайати вакилони мунтахаби Тоҷикистон аз варзишгоҳҳо, мактабҳои варзишӣ ва донишгоҳҳо дидан карда, инчунин бозиҳои мусобиқоти қаҳрамониизанонаро тамошо мекунанд.

Заминларза Тоҷикистонро такон дод

Субҳи рӯзи панҷшанбеи 8-уми август заминларза Тоҷикистонро такон дод. Зилзила соати 5:46 дақиқаи вақти маҳаллӣ рух дод. Дар Душанбе замин ба муддати тақрибан 20-25 сония ларзид ва сокинони дигар маҳаллаҳои Тоҷикистон низ шиддати зилзиларо ҳис карданд.

Ба гуфтаи Маркази зилзилашиносии Амрико, маркази он минтақаи Фархори вилояти Тахор воқеъ дар шимоли Афғонистон мебошад. Қувваи зилзила дар маркази он 5,8 балл будааст. То ба ҳол дар мавриди хисороти ин заминҷунбӣ маълумоте ба даст нарасидааст.

Тоҷикистон дар яке аз минтақаҳои зилзилахези қораи Осиё ҷойгир аст. Ҳамасола дар кишвар садҳо заминларза сабт шуда, дар натиҷаи он баъзе аз манзили сокинон вайрон мешавад.

Зеленский аз Путин хост, ба ҷудоихоҳони Донбасс "фишор" орад

Президенти Украина Владимир Зеленский ба ҳамтои русаш Владимир Путин занг зада, аз ӯ хостааст, ба ҷудоихоҳони Донбасс таъсир расонад. Дар ин бора худи Зеленский 7-уми август пас аз як ҷаласа бо фармондеҳи артиши Украина хабар дод.

Ин ҷаласаи изтирорӣ пас аз ташаннуҷи авзоъ дар марзи Украина баргузор шуда, аз тири ҷудоихоҳон чаҳор низомии Украина ҷон бохтаанд. "Субҳ бо Путин суҳбат кардам ва гуфтам, ки қатли низомиён моро ба сулҳ наздик намесозад. Ман хоҳиш кардам, ки ба он тараф таъсир расонад, то куштори одамони моро қатъ кунанд",-гуфт Зеленский.

Дар шарқи Украина 21-уми июн оташбаси навбатӣ эълом шуд. Вале ҷонибҳои даргир якдигарро ба нақзи оташбас айбдор мекунанд. Зеленский гуфт, ба далели даргириҳои ахир дар шарқи Украина эҳтимол дорад, сафарашро ба Туркия қатъ кунад. Кремл то ҳол гуфтугӯи телефонии Путину Зеленскийро шарҳ надодааст.

Задухурди нерӯҳои ҳукуматии Украина бо ҷудоихоҳони мавриди ҳимояти Русия дар шарки ин кишвар аз соли 2014 идома дошта, ҷони беш аз 13 ҳазор одамро рабудааст.

Муҳоҷирони заҳролудшудаи узбек ҳанӯз ҳам бистариянд

Раёсати тандурустии вилояти Самараи Русия мегӯяд, ҳудуди 60 шаҳрванди Узбекистон, ки 17-уми июли соли равон заҳролуд шуда буданд, ҳанӯз ҳам дар беморхона қарор доранд.

"57 шаҳрванди Узбекистон дар бемористонҳои вилоят бистарӣ буда, 12 тани дигар ҷавоб дода шуданд",-иттилоъ додааст РИА Новостӣ бо истинод ба намояндаи Раёсати тандурустии Самара.

Ёдрас мешавем, 17-уми июли соли равон дар вилояти Самара 69 шаҳрванди Узбекистон бо нишонаҳои заҳролудшавӣ аз "маводи номаълум" ба беморхона интиқол дода шуданд.

Шаҳрвандони Узбекистон дар як корхонаи Самара кор мекарданд. Роҳбарияти корхона мегӯяд, ҳамаи муҳоҷирон фаъолияти қонунӣ дошта, дар асоси шартнома кор менамуданд. Корфармо хабар дод, ки харҷи табобати муҳоҷиронро мепардозад.

Ҳодиса таҳти назорати Вазорати умури хориҷии Узбекистон қарор дорад.

Вазири пешини дифои Қазоқистонро аз сафи неруҳои мусаллаҳ ронданд

Сакен Жасузаков, вазири пешини мудофиаи Қазоқистон аз сафи неруҳои мусаллаҳ ронда шуд. Фармони ронда шудани вай рӯзи 7-уми август дар сомонаи президенти он кишвар нашр гардид.

Дар фармон омадааст, ки вазири пешин дар робита ба таркиши анбори аслиҳа дар шаҳри Арис аз сафи неруҳои мусаллаҳ ронда шуд. Таркиш дар шаҳри Арис охири моҳи июн рух дод.

Сакен Жасузаков "барои хунукназарӣ дар иҷрои уҳдадориҳо ва камбудиҳои ҷиддӣ дар таъмини бехатарӣ ва ҳифзи таслиҳот, ки боиси таркиши анбори аслиҳа дар шаҳри Арис гардид", ронда шудааст.

Ҳамчунин ба чанд тан аз мақомдорони вазорати мудофиа дар робита ба ин ҳодиса танбеҳи ҷиддӣ эълом шудааст.

Рӯзи 15-уми июл нисбати вазири кунунии мудофиаи Қазоқистон Нурлан Ермекбоев низ танбеҳ эълом шуда буд. Таркиш дар анбори аслиҳаи шаҳри Арис рӯзи 24-уми июн рух дод. Сокинонро ба ҷои амн интиқол доданд.

Ба иттилои мақомот, 85 дарсади манзилҳои Арис тахриб ва бештар аз 20 хонаи дигар оташ гирифт. Дар пайи он ҳодиса чаҳор тан кушта шуд.

Давоми 10 соли охир бори чаҳорум аст, ки дар шаҳри Арис таркиши аслиҳа боиси марги инсонҳо мешавад. Бино бар арзёбиҳои мақомоти Қазоқистон, барои барқарории шаҳри Арис на камтар аз 20 миллиард танга сарф хоҳад шуд.

Дар Андиҷон барои иҷрои нақшаи содирот аз деҳқонон маблағ мерӯёнанд

Ба деҳқонони ноҳияи Избаскони вилояти Андиҷони Узбекистон дастур доданд, ки аз ҳар гектар замин 3,5 долларӣ "пардохт" кунанд. Деҳқонон мегӯянд, ин маблағ барои иҷрои уҳдадориҳои содиротии вилояти Андиҷон ҷамъ мешавад.

Соҳибкорони шаҳри Андиҷон ҳам мегӯянд, аз онҳо талаб шудааст, ки 0,1% аз ҳисоби содироти ҳатмӣ, ки ҳукумат муқаррар кардааст, ҷамъ оранд. Мақомоти ноҳияи Избаскон ва вилояти Андиҷон аз шарҳи ин мавзуъ худдорӣ варзиданд.

Ба гуфтаи деҳқонон, аз онҳо ба хотири афзудани нишондодҳои содирот маблағ ҷамъ меоранд. "Мо бояд ба Раёсати хоҷагии кишоварзӣ 170-230 долларӣ пардохт кунем. Ҳеч ҳуҷҷате дар иваз ба мо намедиҳанд",-гуфт як деҳқон.

Ба гуфтаи як кишоварзи дигар, ҳамаи кишоварзон маҷбур ба пардохтҳои содиротӣ ҳастанд. "Роҳбари ноҳия дастури шифоҳӣ додааст",-гуфт деҳқон.

Оғози муҳокимаи парвандаи худкушии Гулбаҳори 18-сола

Гулбаҳор Фаромарзова баъди як моҳи издивоҷ худкушӣ кард.

Муҳокимаи додгоҳии марде, ки ба худкушӣ расонидани ягона келинаш айбдор мешавад, дар додгоҳи ноҳияи Ҷайҳуни вилояти Хатлон оғоз ёфтааст. Эмом Забирови 64-сола аз деҳаи Зарнисор ба худкушии Гулбаҳор Фаромарзоваи 18-сола гумонбар аст. Раҷабзода Шоҳрух, додситони ноҳияи Ҷайҳун дар сӯҳбат ба Радиои Озодӣ гуфт, ки муҳокима рӯзи 7-уми август дар додгоҳи ноҳия оғоз ёфт.

Гулбаҳор Фаромарзоваро рӯзи 15-и апрел дар анбори хонаи шавҳараш овехта пайдо карданд ва дар маҳаллаҳои атрофу сару садо бархост, ки чаро як арӯси 18-сола бо гузашти муддати кӯтоҳе аз арӯсӣ худро куштааст. Мақомот баъди боздошти Эмом Забиров дар моҳи июли имсол гуфтанд, ки “Озори зиёд, таҳқири мунтазам ва паст задани шаъну шараф сабаб шудааст” келини ҷавон, ки шавҳараш дар Русия буд, худкушӣ кунад. Аммо хонаводаи шавҳар мегуфтанд, ки бо ӯ рафтор ва ё муносибати бад надоштанд.

Эмомалӣ Фаромарзов, амаки Гулбаҳор ба Радиои Озодӣ гуфт, ки бародарзодааш ҳамеша аз “зулми хусур шикоят мекард”, вале волидон тавсия медоданд, ки барои аз ҳам напошидани оила ба хонаи шавҳараш баргардад. Дар Тоҷикистон барои ба худкушӣ расонидани инсон аз 5 то 8 соли зиндон ҷазо муқаррар шудааст. Ҳомиёни ҳуқуқи зан мегӯянд, зӯроварӣ ва ҷабру зулм ба зан як сабаби аслии худкушии онҳо аст.

Ҷалби соҳибони мошинҳои гаронбаҳо ба хидмати меҳмонони фестивали "Таронаҳои Шарқ"

Дар вилояти Самарқанди Узбекистон соҳибони мошинҳои навъи Malibu-2 ва Captiva иҷборан ба меҳмонони ҷашнвораи "Таронаҳои Шарқ" хизмат хоҳанд расонд, ки рӯзҳои 23-30 август дар назар дошта шудааст.

Як соҳиби мошини навъи Малибу-2 аз Самарқанд шикоят кард, "ба ман писанд нест, ки ба одамон давоми як ҳафта ройгон хизмат расонам. Мошини ман 30 ҳазор доллар арзиш дорад",-гуфт вай.

Раёсати бехатарӣ дар роҳҳои вилояти Самарқанд вазифадор шудааст, ки дар рӯзҳои ҷашнвора меҳмононро бо ҳамлу нақли ройгон таъмин кунад.

Дар фармони президенти Узбекистон "Дар бораи омодагӣ ба баргузории ҷашнвораи байналхалқии "Таронаҳои Шарқ" аз 26-уми феврали соли 2019", омадааст, ки барои ин чорабинӣ аз будҷаи кишвар маблағи кофӣ ҷудо шудааст.

Аммо як намояндаи Раёсати бехатарии роҳҳои вилояти Самарқанд гуфт, давлат ҳақ дорад, "дар ҳолатҳои зарурӣ аз мошини сокинон истифода барад".

Ҷашнвораи мазкур рӯзҳои 26-30 август баргузор хоҳад шуд. Интизор меравад, дар расми кушоиши он мудири кулли ЮНЕСКО Одре Азуле ширкат варзад. Ҳамчунин дар ин ҷашнвора аз 78 кишвар сарояндагону навозандагон ва рассомон даъват шудаанд. Ҷашвораи "Таронаҳои Шарқ" аз соли 1987 инҷониб дар ду сол як маротиба таҷлил мешавад.

Ёфтҳои бештар

Гузоришҳои видеоӣ

"Ҳудуди ним млн шаҳрванди то 30-солаи Тоҷикистон аз таҳсил дур мондаанд"
лутфан мунтазир бошед

Феълан кор намекунад

0:00 0:04:11 0:00
XS
SM
MD
LG