Пайвандҳои дастрасӣ

Хабари нав

Хабарҳо

Корнамоии тоҷири 33-солаи тоҷик дар Иркутски Русия

Иркутск. Акс аз бойгонӣ

Расонаҳои Русия рӯзи 8-уми сентябр аз корнамоии як тоҷири тоҷик дар шаҳри Иркутски Русия гузориш доданд. Онҳо гуфтанд, Шамс Ширинови 33-сола гарданбанди ғоратшудаи як пиразани русро аз дасти дузде гирифта, ба ӯ баргардондааст.

"Комсомолская Правда-Байкал" навишт, ҳодиса рӯзи 6-уми сентябр рух дод. Ба навиштаи нашрия, "зани бознишастае дод мезад, ки ӯро ғорат карданд. Шамс Ширинов барои дастгир кардани дузд аз паси ӯ давид. Ба ӯ ҳамватанонаш кумак карданд. Онҳо ба самте, ки дузд давид, ишора намуданд. Баъдан ноболиғони дучархасавор ба дузд имкон надоданд, ки пинҳон шавад."

Ба навиштаи расона, ба Шамс Ширинов муяссар шуд, ки дуздро дар назди Донишгоҳи Байкал дастгир кунад ва ба пулис супорад.

Бисёре аз корбарон дар шабакаҳои иҷтимоӣ аз чунин рафтори тоҷири тоҷик изҳори хушӣ кардаанд. Дар гузашта низ чанде аз муҳоҷирони тоҷик дар Русия ба кумаки дармондаҳо шитофта, номашон дар сархатти расонаҳо қарор гирифта буд.

Баъзеи онҳо мехоҳанд, бо чунин рафтор дидгоҳи шаҳрвандони Русияро нисбат ба муҳоҷирони тоҷик ба самти мусбат тағйир диҳанд. Баъзеи дигар мегӯянд, бо вуҷуди кумак ба дармондаҳо дар Русия натанҳо мавриди таваҷҷуҳ қарор нагирифтанд, балки заҳмати онҳо ба номи дигарон сабт шудааст.

Дар бархе ҳолат, исми муҳоҷир зикр шавад ҳам, шаҳрвандиаш пинҳон мемонад, мисли корнамоии Алиназар Баҳодурови 21-сола, ки ҷони худро дар хатар гузошта, барои боздошти як марди мусаллаҳ кумак расонда буд. Расонаҳои Русия ин корнамоии Баҳодуровро нашр карданд, аммо аз кадом кишвар ва намояндаи кадом миллат будани ҷавонро нагуфтанд.

Ҳодисаи дигар ба қаҳрамонии Собир Хаспаллаев рабт дорад. Рӯзи 5-уми декабри соли 2017 Собир шоҳиди ба дарё рафтани мошини сабукрав шуд ва зиёд фикр накарда, худро ба дарё андохту ронандаи ин мошинро наҷот дод, вале дар гузоришҳо аз ӯ ном гирифта нашуд.

Аммо дар мисоли сӯхтори маркази тиҷоратии "Зимняя вишня" дар Кемерово корнамоиҳои Фарзон Салимовро худи раиси Кумитаи тафтишотии Русия қадрдонӣ карда буд.

Вокунишҳо ба мубодилаи зиндониён миёни Русия ва Украина

Раҳбарони шуморе аз кишварҳои ҷаҳон аз иқдоми Украина ва Русия барои табодули 70 зиндонӣ ва афроди боздоштшуда ситоиш карданд.

Аз миёни 35 зиндонии украинӣ, ки Русия рӯзи шанбе озод кард ва ба ватанашон фиристод, 24 дарёнавард низ ҳастанд. Русия онҳоро соли гузашта дар тангии Керч дар дарёи Азов боздошт карда буд.

Владимир Зеленский, раиси ҷумҳури Украина, аз 35 украинӣ дар фурудгоҳи Бориспол бо гармӣ пазироӣ кард. Вай гуфт, “дар қадами баъдӣ дар мавриди бозгардондани тамоми зиндониён иқдом хоҳем кард ва тибқи созишномаи Минск ба хуруҷи нерӯҳо дар ду минтақаи шарқи Украина дар ду марҳила идома медиҳем. Сипас оташбаси пурра ва поёни ҷанг.”

Филмсоз Олег Сентсов ҳам дар миёни украиниҳои озодшуда аст. Вай баъд аз ишғоли Қрим аз тарафи Русия ба иттиҳоми даст доштан дар фаъолияти террористӣ дастгир шуда буд. Сентсов рӯзи шанбе пас аз расидан ба фурудгоҳи Бориспол ба хабарнигорон гуфт, "умед дорам, тамоми зиндониёни украинӣ ба зудӣ озод шаванд, аммо бо вуҷуди раҳоии охирин зиндонӣ ҷанги мо поён нахоҳад ёфт. Пирӯзӣ ҳанӯз бисёр дур аст. Душман қавӣ асту даст намебардорад, аммо яқин ки пирӯзӣ аз они мо хоҳад буд."

35 зиндонии Русия ҳам дирӯз ба Маскав расиданд. Кирилл Вишинский, хабарнигори РИА Новости ва Владимир Семах, гумонбар ба сарнагунии ҳавопаймои Малайзия дар миёни онҳо ҳастанд. Дар ин ҳодиса дар соли 2014-ум 298 тан ҷон бохтанд.

Доналд Трамп, раиси ҷумҳури Амрико, мубодилаи зиндониён миёни Русияву Украинро “хабари хуб" дониста ва ба ҳар ду тараф муборакбод гуфтааст. Курт Волкер, намояндаи хоси Амрико барои Украина, изҳори умед кард, ки ин иқдом заминаро барои музокирот ба ҳадафи поён додани хушунат дар шарқи Украина фароҳам меорад.

Ангела Меркел, садри аъзами Олмон, мубодилаи зиндониён миёни Русия ва Украинро “нишонаи умедворкунанда" хонд. Федерика Моғеринӣ, масъули сиёсати хориҷии Иттиҳодияи Аврупо аз ҳар ду тараф хост, ин иқдомро тақвият бахшанд.

Мақомоти Фаронса гуфтаанд, мубодилаи зиндониён нишон дод, ки эътимоди байни ду кишвар афзоиш ёфта ва ду тараф барои аз саргирии гуфтугӯ ирода доранд.

Аз моҳи апрели соли 2014 ба ин сӯ, ки ҷанг миёни ҷудоиталабони тарафдори Русия ва нерӯҳои ҳукуматии Украина дар шарқи ин кишвар идома дорад, беш аз 13 ҳазор нафар кушта шудаанд.

Интихоботи маҷлисҳои маҳаллӣ дар Русия пас аз эътирозҳои густарда

Шаҳрвандони Русия рӯзи 8-уми сентябр пас аз мавҷи эътирозҳои густарда дар тобистони имсол барои иштирок дар интихоботи маҷлисҳои маҳаллӣ ба пойи сандуқҳои райъдиҳӣ рафтанд. Интихобот дар ҳоле баргузор гардид, ки оморҳо баёнгари кам шудани маҳбубияти раҳбарони феълии Кремлин, аз ҷумла президент Владимир Путин аст. Нигоҳҳо бахусус ба интихоботи Маҷлиси шаҳри Маскав дӯхта шуда буд. Ҷое, ки ба қавли мухолифон номзадҳои мустақил ва намояндагони оппозитсиюн роҳ дода нашуданд. Тобистони имсол даҳҳо ҳазор тан ба хиёбонҳои пойтахти Русия баромада, зидди сиёсатҳои давлат ва фасод эътироз карданд. Ин эътирозҳо аз назари шумори роҳпаймоён тайи дастикам ҳашт соли гузашта бесобиқа будааст. Дар ин эътирозҳо пулис ба камияш 2000 ҳазор нафарро боздошт кард. Чанде аз онҳоро ҷарима ва бархеро ҳабс намуданд. Интихоботи рӯзи якшанбе дар 83 минтақаи Русия баргузор шуд. Дар ин интихобот волӣ ё губернаторон низ баргузида шуданд.

Даргузашти модари Давлат Худоназаров ва Далер Назаров

Меҳрубон Назаров, вазири пешини фарҳанги Тоҷикистон бо ҳамсараш Нодирамо Қадамшоева. Акс аз саҳифаи Музаффари Имдод дар Фейсбук

Нодирамо Қадамшоева, модари сиёсатмадору коргардони маъруфи тоҷик Давлат Худоназаров ва овозхони шинохта Далер Назаров дар 97-солагӣ дар Душанбе даргузашт.

Қадамшоева ҳамсари вазири пешини фарҳанги Тоҷикистон Меҳрубон Назаров мебошад. Ӯ дар гузашта ба ҳайси ровии Радиои Хоруғ ва мусаҳҳеҳи нашрияи "Бадахшони Советӣ" кор кардааст.

Қадамшоева як ҳафта пеш аз ҷашни таваллудаш ва дар рӯзи 60-солагии Далер Назаров ҷон дод. Ӯро рӯзи 8-уми сентябр дар оромгоҳи Сариосиёи шаҳри Душанбе дафн карданд.

Дар шабакаҳои иҷтимоӣ даҳҳо нафар ба Далер Назаров ва Давлат Худоназаров изҳори таслият гуфтаанд.

Тамошои муҳориба ва "ҷашн"-и пирӯзии Нурмагомедов дар Душанбе. ВИДЕО, АКС

Ҳабиб Нурмуҳаммадов (Нурмагомедов), варзишкори маъруфи доғистонӣ, дар муҳорибаи бидуни қоида ба рақибаш Дастин Поре аз Амрико пирӯз омад ва унвони қаҳрамониро дар созмони UFC ҳифз кард.

Рақобати Нурмуҳаммадов ва Поре шаби 8-уми сентябр дар шаҳри Абу Забии Имороти Муттаҳидаи Араб баргузор шуд. Сабқат хеле пуршиддат ҷараён гирифт. Нурмуҳаммадов дар даври севум бо роҳи буғӣ кардан Пореро шикаст дод.

Дар Тоҷикистон садҳо нафар ин мусобиқаро тавассути экранҳои бузург тамошо карданд. Бештари онҳо гуфтанд, ки аз Нурмуҳаммадов ҷонибдорӣ намудаанд. Баъд аз пирӯзии ин варзишкори доғистонӣ дар кӯчаҳои Душанбе гурӯҳи бузурги ҷавонон садои "Ҳабиб, Ҳабиб" сар доданд.

Тамошои муҳориба ва "ҷашн"-и пирӯзии Нурмагомедов дар Тоҷикистон
лутфан мунтазир бошед

Феълан кор намекунад

0:00 0:00:33 0:00

Баъзе аз корбарони шабакаҳои иҷтимоӣ аз чунин рафтори ҷавонони тоҷик интиқод карда, онро як навъ "бегонапарастӣ" номидаанд.

Қаблан масъулони нуқтаҳои букмекерӣ дар Тоҷикистон гуфта буданд, ки барои сабқати Нурмуҳаммадов ва Поре шартбандиҳои зиёде қабул кардаанд.

Нурмуҳаммадов қаҳрамони мутлақи созмони UFC дар вазни сабук аст ва Поре соҳиби ҷоизаи муваққатии ин созмон мебошад. Ҳабиб Нурмуҳаммадов дар моҳи октябри соли гузашта Конор Макгрегор, варзишгари ирландиро шикаста дода буд.

Ин варзишгари доғистонӣ дар феҳрасти маҳбубтарин варзишгарони созмони UFC дар мақоми дувум меистад. Тибқи навиштаи маҷаллаи “Forbes”, ӯ дар соли 2018 дар миёни варзишгарони Русия аз ҳама бештар даромад дошт.

Нурмуҳаммадов соли 2017 ба Тоҷикистон омада буд.

Видео: Ҷашни пирӯзии Нурмагомедов дар зодгоҳаш Доғистон:

Дар Доғистон пирӯзии Ҳабиб Нурмагомедовро ҷашн гирифтанд
лутфан мунтазир бошед

Феълан кор намекунад

0:00 0:00:46 0:00

Мулоқоти пайвандон бо Маҳмадалӣ Ҳайит дар зиндон. Боз шикоят аз шиканҷа

Маҳмадалӣ Ҳайит

Пайвандони Маҳмадалӣ Ҳайит, муовини пешини ҳизби ҳоло дар Тоҷикистон мамнӯи наҳзати исломӣ, рӯзи 7-уми сентябр ва пас аз ним соли шикоят аз шиканҷа бо ӯ дидор кардаанд.

Маҳмадалӣ Ҳайит соли 2015 боздошт ва дар мурофиаҳои паси дарҳои баста ба ҳабси абад маҳкум шуд. Мақомот ӯ ва ҳамроҳонашро ба узвият дар гурӯҳҳои ҷиноӣ, қатлу терорризм, талоши ғасби қудрат ва ошӯби мусаллаҳона гунаҳкор карданд. Чизе, ки онҳо ва наздиконашон бофта мехонанд.

Савриннисо Ҷӯраева, ҳамсари Маҳмадалӣ Ҳайит, рӯзи шанбе дар тамоси телефонӣ ба Радиои Озодӣ гуфт, мулоқоти онҳо дар зиндон аз пушти шиша ва ду соат идома кард. Ба қавли ӯ, шавҳараш шикоят кардааст, ки вайро дигарбора мавриди шиканҷаву азият қарор додаанд.

"Гуфт, баъд аз шикояти мо дар моҳи марти имсол ду моҳ ором гузоштаанд. Баъд аз он дигарбора шиканҷаро оғоз кардаанд. Вазъияташ хуб набуд. Лабаш кафида буд. Худаш гуфт, доруҳояшро намедиҳанд. Ҳатто оби гарм намедиҳанд. Ҷойхоб ва радиоашро гирифтаанд. Мехоҳанд, зидди раҳбарияти ҳизб изҳорот диҳад, ки ӯ қабул намекунад", -- нақл кард Ҷӯраева.

Талошҳои мо барои пайдо кардани мақомоти зиндон рӯзи шанбе бенатиҷа буд. Вале Мансурҷон Умаров, сардори Сарраёсати иҷрои ҷазои ҷиноятии Вазорати адлия, моҳи марти имсол дар номаи расмӣ шиканҷа шудани Маҳмадалӣ Ҳайитро рад карда буд.

Вай дар номаи ҷавобӣ (25-уми марти 2019) ба шикояти ҳамсари Маҳмадалӣ Ҳайит навиштааст, "Сарраёсати иҷрои ҷазои ҷиноятии Вазорати адлия аризаи шуморо вобаста ба ҷой доштани ҳолатҳои шиканҷа нисбат ба шавҳаратон – маҳкумшуда Ҳаитов Маҳмадалӣ Раҳмонович баррасӣ намуд. Дар рафти санҷиши хизматӣ ваҷҳҳои дар ариза қайднамудаи шумо тасдиқи худро наёфтанд."

Наздикони Маҳмадалӣ Ҳайит ду дафъа дар моҳҳои март ва июли имсол дар бораи шиканҷа шудан ва вазъи бади ӯ ба мақомот ва расонаҳо шикоят карданд. Онҳо гуфтанд, ӯ латту кӯб шуда, дар як утоқи "тангу ифлос" нигоҳдорӣ мешавад.

Он вақт Омбудсмени Тоҷикистон аз Додситонии кул хост, ки хабари шиканҷа шудани Ҳайитро таҳқиқ кунад. Савриннисо Ҷӯраева мегӯяд, бо гузашти ним сол аз Додситонии кул ҳеч посух нагирифт.

Як гурӯҳи кории Созмони Милали Муттаҳид, ки парвандаҳои боздоштҳои худсарона дар кишварҳои ҷаҳонро таҳқиқ мекунад, моҳи майи соли 2018 хулоса дода буд, ки боздошти Маҳмадалӣ Ҳайит, як узви раёсати ҳизби ҳоло дар кишвар мамнӯи наҳзати исломӣ “ғайриқонунӣ аст” ва аз ин рӯ, “бояд фавран озод карда шавад”. Юсуф Раҳмон, додситони кулли Тоҷикистон, моҳи июл дар ҷаласаи Кумитаи ҳуқуқи башари СММ гуфт, "...ин афрод наметавонанд озод шаванд, чун ҷиноятҳои махсусан вазнин кардаанд ва дар доираи муҷозоти пешбиникардаи қонуни Тоҷикистон бояд ҷавоб гӯянд, на бар асоси кадом қонунҳои дигар".

Болтон гуфт, киштии нафткаши Эрон ба Сурия расид

Ҷон Болтон

Ҷон Болтон, мушовири амнияти миллии Кохи Сафед, гуфт, киштии нафткаши Эрон, ки моҳи гузашта аз боздошт дар Гибралтар озод шуд ва ҳанӯз ҳам таҳти ҷустуҷӯи мақомоти амрикоист, ба бандари Тартус дар Сурия расидааст.

Болтон рӯзи 7-уми сентябр дар Твиттер тасвири моҳвораиро аз рӯзи 6-уми сентябр нашр кард. Дар он киштии "Адриан Дарё 1" дар зери осмони абрӣ ва дар соҳили Тартус нишон дода шудааст.

Ҷон Болтон навишт, "ҳар касе, ки гуфт "Адриан Дарё 1" ба тарафи Сурия намеравад, ҳамеша дурӯғ гуфтааст. Барои Теҳрон таъмини молии режими қотили Башор Асад муҳимтар аз таъмини мардуми худаш аст. Мо метавонем гуфтугӯ кунем, аммо то замоне ки Эрон дурӯғ гуфтан ва густариши терроризмро бас накунад, ҳеч яке аз таҳримҳояш бекор нахоҳад шуд."

Теҳрон моҳҳо пойфишорӣ карда буд, ин киштии нафткаш, ки қаблан "Грейс 1" ном дошт, ба ҳеч ваҷҳ ба сӯи Сурия намеравад.

Киштии нафткаши Эрон рӯзи 4-уми июли имсол аз сӯи нерӯҳои баҳрии Бритониё ба гумони интиқоли нафт ба Сурия боздошта шуда буд, вале онро рӯзи 19-уми август озод карданд.

Иёлоти Муттаҳида дар охири моҳи агусти имсол ба нафткаши эронии мавсум ба "Адриан Дарё 1" ва капитан ё нохудои ҳиндии он таҳрим бор кард. Вазорати хазонадории Амрико рӯзи 30-юми август гуфт, барои он ба нафткаш таҳрим бор шуд, ки аз он нерӯҳои қудси Сипоҳи посдорони инқилоби исломии Эрон фоида мегиранд.

Табодули зиндониён миёни Украина ва Русия. ВИДЕО, АКС

Мақомоти Украина ва Русия ба табодули зиндониён оғоз карданд.

Президенти Украина Владимир Зеленский рӯзи 7-уми сентябр гуфт, ин «қадами аввал барои ҳалли низоъ» дар кишвараш аст. Сухангӯи Вазорати корҳои хориҷии Русия Мария Захарова мегӯяд, “бо вуҷуди баъзе иғвоҳо ва мушкилоти воқеӣ, ин раванд билохира анҷом шуд. Қадами бисёр муҳим аст.”

Рӯзи 7-уми сентябр ҳавопаймои ҳомили шаҳрвандони Русия, ки дар Украина зиндонӣ буданд ва ё дар боздошт нигоҳдорӣ мешуданд, ба фурудгоҳи Внуковои шаҳри Маскав расид.

Аз пойтахти Русия ба фурудгоҳи Борисполи Киев шаҳрвандони маҳкумшудаи Украинаро фиристоданд.

Табодули зиндониён миёни Украина ва Русия
лутфан мунтазир бошед

Феълан кор намекунад

0:00 0:00:40 0:00

Бар асоси рӯйхате, ки нашрияи "Украинская правда" рӯзи шанбе чоп кард, Киев ба Маскав 35 нафарро супурдааст. Манобеъ мегӯянд, Русия низ ҳамин миқдор шаҳрвандони боздоштшуда ва маҳкумшудаи Украинаро озод намуд.

Шаҳрвандони озодшудаи Украинаро дар фурдугоҳи Бориспол наздиконашон ва президенти Украина Владимир Зеленский пешвоз гирифтанд. Яке аз онҳо коргардони украинӣ Олег Сентсов аст, ки бо ҷурми омодагӣ ба таркишҳо дар Қрими ишғолшуда ба 20 соли зиндон маҳкум шуда буд.

Сентсов ҳаргиз ба ин гуноҳ эътироф накардааст. Созмонҳои байналмилалии ҳомии ҳуқуқ ӯро "зиндонии сиёсӣ" медонистанд.

Олег Сентсов рӯзи шанбе гуфт, баъди панҷ соли раҳоӣ аз зиндонҳои Русия ва бозгашт ба ватан хушҳол аст. Вай ба ҳамаи онҳое, ки барои ӯ ва дигарон мубориза кардаанд, сипосгузорӣ намуд.

Дар миёни афроди озодшуда 24 маллоҳи украинӣ ҳам ҳастанд. Ин маллоҳон моҳи ноябри соли 2018 дар наздикии гарданаи Керч, наздик ба нимҷазираи аз ҷониби Русия ғасбшудаи Қрим боздошт ва зиндонӣ шуданд.


Киев мегӯяд, Русия дар зиндонҳои худ тахминан 150 шаҳрванди ин кишварро ба таври ғайриқонунӣ нигаҳ медорад. Мақомоти украинӣ ин оморро моҳи июли имсол, замони омодагиҳо ба табодули зиндониён бо Русия дар музокираҳои ваколатдорони ҳуқуқи башари ду кишвар ба забон оварданд.

Бино ба рӯйхате, ки нашр шуд, ҷониби Украина ба Русия 35 нафар, аз ҷумла сардабири оҷонсии РИА “Новости” дар Украина Кирилл Вишинский ва Владимир Семах, гумонбар ба сарнагунии ҳавопаймои Малайзияро додааст.

Озодии ноҳияи Вардуҷи Бадахшон аз дасти Толибон

Мақомоти Вазорати мудофиаи Афғонистон гуфтанд, ки нерӯҳои ин кишвар рӯзи 7-уми сентябр маркази ноҳияи Вардуҷи Бадахшонро аз дасти Толибон гирифтаанд. Ин ноҳияи стратегии вилояти Бадахшони Афғонистон тақрибан чаҳор сол пеш ба дасти шӯришиён афтода буд.

Фавод Амон, муовини сухангӯи Вазорати дифои Афғонистон, рӯзи 7-уми сентябр ба Радиои Озодӣ гуфт, дар ҷараёни амалиёти бозпасгирии Вардуҷ даҳҳо ҷангҷӯи Толибон, бо шумули бархе аз фармондеҳони калидии ин гурӯҳ кушта шудаанд. Вай афзуд, “дар ҷараёни амалиёт дар даҳ рӯзи гузашта сад ҷангҷӯи дохилӣ ва хориҷӣ, аз ҷумла Қорӣ Фасеҳуддин, волии Толибон барои Бадахшон, кушта шуданд.”

Муовини сухангӯи Вазорати дифои Афғонистон ҳамчунон гуфт, амалиёти нерӯҳои афғон барои бозпасгирӣ баъзе аз минтақаҳои дигари вилояти Бадахшон ба шумули ноҳияи Юмгон идома дорад.

Толибон ҳанӯз дар ин маврид ба расонаҳо чизе нагуфтаанд.

Шӯришён ба тозагӣ ҳаракаташонро дар минтақаҳои гуногуни Афғонистон, аз ҷумла Кундузу Форёб афзоиш додаанд.

Ба Элла Памфилова дар хонааш ҳамла кардаанд

Элла Памфилова

Мақомоти Вазорати корҳои дохилии Русия гуфтанд, ки як нафар вориди хонаи Элла Памфилова, раиси Кумисюни марказии интихоботи Русия шуда, ба ӯ ҳамла кардааст. Ҳодиса субҳи 6-уми сентябр, ду рӯз пеш аз баргузарии интихоботи ҷанҷолбарангези маҷлиси шаҳрӣ, иттифоқ афтод.

Сухангӯи Вазорати умури дохилии Русия гуфт, “ҳамлавари ниқобпӯш ба воситаи тиреза ба хона даромада, бо электрошокер ба соҳиби хона ҳамла намудааст. Сипа сза ҷои ҳодиса фирор мекунад.”

Таҳқиқи ҳодиса оғоз шудааст. Элла Памфилова ба хабарнигорон гуфт, "умед дорад, ки ин ҳодисаи тасодуфӣ бошад.” Вай афзуд, яке аз ангуштонаш осеб дида, қисмате аз баданаш харошида шудааст. Памфилова 65-сола аст.

Мардум дар интихоботи рӯзи якшанбеи 8-уми сентябр ба пойи сандуқҳои раъйдиҳӣ мераванд, то аъзои Маҷлиси шаҳри Маскавро интихоб кунанд. Ин маҷлис аз 45 курсӣ иборат аст. Дар пайи сабти ном нашудани номзадҳои мухолифон дар Маскав эътирозҳо баргузор шуд.

Мақомҳои Русия ин эътирозҳоро, ки ба як дарди саре ба Кремл табдил шуда буд, ғайриқонунӣ эълон карда, беш аз 2000 нафарро боздошт ва чанде аз онҳоро ҳабс намуданд.

Навраси 14-сола дар Узбекистон донишҷӯ шуд

Сокини 14-солаи ноҳияи Китоби Узбекистон Ҷасурбек Ғуломов бо касби 120,9 хол донишҷӯи Донишгоҳи давлатии вилояти Қашқадарё шуд.

Ба иттилои сомонаи донишгоҳ, наврас аз ҳисоби будҷаи давлат таҳсил хоҳад кард.

Ёдрас мешавем, имсол дар Узбекистон маҳдудияти синни дохил шудан ба донишгоҳҳои ин кишварро бекор карданд.

Пештар хабар дода шуд, ки Маматқул Бердиалиеви 78-сола, Тухтамиш Султонови 80-сола ва як зани дигари 72-сола низ барои дохил шудан ба донишгоҳҳои Узбекистон ҳуҷҷат супоридаанд.

Маркази давлатии тестии Узбекистон гуфт, калонсолтарин довталаби ин кишвар 87 сол дорад.

Президент "эътирозҳои зиддичинӣ"-ро ҳангома номид

Президент Қосимҷомарт Тоқаев имрӯз, 6-уми сентябр дар ҷаласаи Шӯрои миллии боварии ҷомеа дар шаҳри Нурсултон дар бораи "эътирозҳои зиддичинӣ", ки ахиран панҷ шаҳри Қазоқистонро фаро гирифтанд, суҳбат карда, гуфт, бархеҳо ҳадафи "ноором" кардани ин кишварро доранд.

Эътирозгарони қазоқ аз мақомот талаб доранд, ки иҷрои тарҳҳои муштарак бо Чин қатъ ва сафари президенти ин кишвар Тоқаев ба шаҳри Пекин дар рӯзҳои 11-12-уми сентябр бекор карда шавад.

Тоқаев гуфт, дар ҷомеаи Қазоқистон дар бораи "55 тарҳи муштараки сармоягузорӣ бо Чин" хабарҳои дурӯғе паҳн карда мешавад ва ҳамчунин дар миёни мардум овозаҳое чарх мезанад, ки гӯиё заминҳои ин кишварро ба Чин мефурӯшанд.

"Ин овозаҳоро бадхоҳон паҳн мекунанд, ки мехоҳанд, бо сӯистифода аз руҳияи ватандӯстии сокинон, бахусус мардуми эҳсосӣ ба ҳадафҳои худ бирасанд. Бояд дарк кард, ки ингуна сӯистифода кардани мардум як ҷузъи геополитика буда, ҳадафи он ба ҳам задани ягонагии сокинон ва ноором кардани вазъ дар Қазоқистон аст", - афзуд Тоқаев.

Вале ӯ дақиқ нагуфт, ки кадом "бадхоҳон"-ро дар назар дорад ва кадом бозигарони геополитикӣ ба ноором сохтани Қазоқистон алоқаманданд.

Президенти пешини Қазоқистон Нурсултон Назарбоев моҳи апрели соли 2019 дар ҷараёни сафараш ба Пекин хабар дод, ки бо Чин дар робита ба "55 лоиҳаи сармоягузорӣ дар бахши сохтмон, саноат, истеҳсоли гушт, гандум созишномае ба имзо расидааст".

Сокинони шаҳри Жанаозени Қазоқистон чандин рӯз мешавад, зидди бунёди 55 корхонаи чинӣ дар ин кишвар ва сафари президент Қосимҷомарт Тоқаев ба Пекин эътироз доранд. Дар як қатор шаҳрҳои дигари Қазоқистон ҳам ба ҷонибдорӣ аз сокинони Жанаозен эътирозҳо ҷараён доранд.

Рӯзи 3-юми сентябр ҳудуди 30 нафар дар майдони назди бинои шаҳрдории Нурсултон ҷамъ шуда, аз мавқеи сокинони Жанаозен зидди "тавсеаталабии Чин" ҷонибдорӣ карданд. Сардори Идораи рушди ҷомеаи шаҳрдории Нурсултон Талгат Раҳмонбердиев ба назди эътирозгарон баромада, гуфт, Чин дар Қазоқистон ягон корхона бунёд карданӣ нест.

Чин чаҳорумин сармоягузор ва севумин қарздиҳандаи бузурги Қазоқистон аст. Қазоқистон дар навбати худ барои Чин манбаи ашёи хом, бозори фурӯши маҳсулот ва минтақаи транзитӣ мебошад. Пекин имсол ба Нурсултон 2 миллиарду 62 миллион юан додааст. Қазоқистон дар ҳоли ҳозир аз Чин беш аз 12 миллиард доллар қарздор аст.

Узбекистон. Муҳлати сарбозӣ барои ҳама баробар мешавад

Муҳлати хизмати сарбозӣ дар Узбекистон расман 12 моҳро ташкил медиҳад. Қонуни мазкурро президенти он кишвар Шавкат Мирзиёев рӯзи 5-уми сентябр имзо кард.

Тағйиру иловаҳо ба Қонун "Дар бораи уҳдадориҳои умумии низомӣ ва хизмати сарбозӣ" муҳлати адои хизмати сарбозиро 12 моҳ таъйин кард.

То ин замон дар Узбекистон хизмати низомӣ барои сарбозони қаторӣ ва ҳайати сержантҳо 12 моҳ ва барои афроди дорои маълумоти олӣ 9 моҳро ташкил медод.

Ба ҷуз ин, тибқи қонун, сабти шаҳрвандон дар қитъаҳои низомӣ моҳҳои апрел-май сурат мегирад. То кунун ин гуна сабт моҳҳои апрел-июн давом мекард.

Сабқати Ҳабиб Нурмуҳаммадов бо Дастин Поре. Дар Тоҷикистон чиро интизоранд?

Навиштаҳо бо акси Ҳабиб Нурмуҳаммадов дар зодгоҳаш Доғистон. 6-уми сентябри соли 2019

Ҳабиб Нурмуҳаммадов (Нурмагомедов), варзишкори маъруфи доғистонӣ, бо Дастин Поре аз Амрико дар шаҳри Абу Забии Имороти Муттаҳидаи Арабӣ вориди рақобат мешавад. Бисёриҳо дар Тоҷикистон тамошои мусобиқаро интизоранд.

Чанд хонаи синамо дар Душанбе эълон карданд, ки мусобиқаро мустақим намоиш медиҳанд. Ҳамчунин масъулони нуқтаҳои букмекерӣ барои сабқати Нурмуҳаммадов ва Поре шартбандиҳои зиёде қабул кардаанд.

Идораҳои букмекерӣ пирӯзии Ҳабиб Нурмуҳаммадовро пешгӯӣ мекунанд. Вай аз 27 сабқати худ дар муҳорибаи бидуни қоида боре шикаст нахӯрдааст.

Шаби 7 ба 8-уми сентябр дар шаҳри Абу Забии Имороти Муттаҳидаи Араб мусобиқаи 242-юми созмони UFC баргузор мешавад ва дар он чанд варзишгар дар муҳорибаи бидуни қоида бо ҳам сабқат мекунанд. Аммо таваҷҷуҳи бисёриҳо дар Тоҷикистон ба сабқати асосии ин мусобиқа миёни Ҳабиб Нурмуҳаммадов ва Дастин Поре нигаронда шудааст.

Нурмуҳаммадов қаҳрамони мутлақи созмони UFC дар вазни сабук аст ва Поре соҳиби ҷоизаи муваққатии ин созмон мебошад.

Дар Тоҷикистон бештар аз Ҳабиб Нурмуҳаммадов тарафдорӣ мекунанд. Ҳазорҳо нафар аз пирӯзии ӯ ба Конор Макгрегор, варзишгари ирландӣ дар моҳи октябри соли гузашта ситоиш карда ва дар либоспӯшӣ аз ӯ пайравӣ намуда буданд.

Нурмуҳаммадов соли 2017 ба Тоҷикистон омадааст.

Ҳабиб Нурмуҳаммадов дар феҳрасти маҳбубтарин варзишгарони созмони UFC дар мақоми дувум меистад. Тибқи навиштаи маҷаллаи “Forbes”, ӯ дар соли 2018 дар миёни варзишгарони Русия аз ҳама бештар даромад дошт.

Дар Туркманистон барои гирифтани нафақа навбат мепоянд

Дар шаҳри Туркманободи вилояти Лебапи Туркманистон нафақахӯроне, ки ҳанӯз нафақаашон ба кортҳои плостикии бонкӣ нагузаштааст, аз қабл барои дарёфти нафақа дар рӯйхати навбатпойӣ сабти ном кардаанд.

"Моҳи ҷорӣ дар Туркманобод нафақахӯроне, ки ҳанӯз нафақаашон нагузаштааст, рӯйхат тартиб дода, аз қабл пушти банкоматҳо навбат гирифтаанд. То имрӯз шумори навбатпоён ба 2 ҳазор расидааст", - гуфт як сокини Туркманобод.

Дар Туркманистон, маъмулан, нафақа санаҳои 1 то 5-уми ҳар моҳ ба кортҳои бонкӣ интиқол дода мешавад.

Ба гуфтаи сокинон, дар навбатпойӣ сабти ном кардани нафақахӯрон ба он рабт дорад, ки бештари вақт банкоматҳо пули нақд надоранд ва маблағе ҳам ки оварда мешавад, на ба ҳама мерасад.

"Ду моҳ аст, ки норасоии маблағ дар банкоматҳо идома дорад. Моҳҳои гузашта маблағ дар банкоматҳо кам буд, вале садҳо одам навбатпойӣ мекард. Одамон чандин рӯз, ҳатто ҳафтаҳо пушти банкоматҳо навбат гирифтанд, ки маблағи кортҳояшонро дарёфт кунанд. Ба ҳамин хотир ин бор аз қабл номнавис мекунанд", - гуфт сокини маҳаллӣ.

Ба иттилои Бонки марказии Туркманистон, то 1-уми январи соли 2019 бонкҳои он кишвар бештар аз 3 миллион корти бонкӣ нашр ва тақсим кардаанд. Ҳамзамон дар саросари Туркманистон наздики 2200 бонкомат насб шудааст. Дар ҳоли ҳозир аксари бонкоматҳо маблағи нақд надоранд.

Пас аз сӯхтор 16 соҳибкорро ба дигар ҷо кӯчониданд

Бозори "Саховат"-и Кӯлоб

Пас аз оташ гирифтани зарфи гази моеъ дар бозори “Саховат”-и шаҳри Кӯлоб маъмурияти бозор 16 фурӯшандаро маҷбур карданд, ки ҷояшонро иваз кунанд.

Рӯзи 5-уми сентябр зарфи гази моеъ дар ин нуктаи фуруши ғизо оташ гирифт, вале алангаи оташ зуд хомӯш карда шуд.

Ин фурушандаҳо, ки маъмурияти бозор онҳоро ба беаҳамияти гунаҳкор мекунад, дар дохили толори пушидаи бозори марказии шаҳр хуроки саридастӣ мепухтанд.

Бобоҷон Нуров, директори бозори “Саховат”-и шаҳри Кӯлоб рӯзи 6-уми сентябр дар суҳбат ба Радиои Озодӣ гуфт, мехостанд, пеш аз сӯхтор фурушандаҳоро ба ҷойи дигар кӯчонанд, вале онҳо розӣ набуданд.

Ӯ гуфт, ҳоло онҳо ба макони дигари бозор интиқол дода шуданд ва шароиташон барои пухтупази хуроки саридастӣ бехатар аст.

Як фурушандаи ин бозор бидуни зикри номаш гуфт, ҷойе, ки ҳоло онҳоро бо баҳонаи сӯхтори хурд кӯчониданд, камодам буда, муштарӣ пайдо кардан душвор аст.

Дар бозорҳои Тоҷикистон сӯхторҳои зиёновар ба соҳибкорон зиёд ба назар мерасад. Дар аксар ҳолат, сабабҳои сӯхтор “расиши кутоҳи ноқилҳои барқӣ” унвон мешаванд.

Дар Қирғизистон ҳукми додситонҳои гунаҳкор ба фасодро кам карданд

Қиличбек Арпачиев

Муҳлати зиндони сардори пешини раёсати тафтишоти Додситонии кулли Қирғизистон Қиличбек Арпачиевро кам карданд. Арпачиев, ки соли 2016 барои порахӯрӣ 14 сол зиндонӣ шуда буд, ҳамакнун ба зиндони сукунтӣ интиқол ёфт.

Мақомоти Қирғизистон гуфтанд, муҳлати зиндони корманди пешини додситонӣ дар робита ба тағйироти кодексҳои нав кам шудааст. Моҳи феврали соли ҷорӣ додгоҳ муҳлати зиндони Арпачиевро ба 10 сол расонд. Арпачиев ҳамчунин 15-уми июл ба маҳбаси сукунатӣ интиқол ёфтааст.

Баҳори соли 2015 як тоҷир ба КДАМ хабар дод, ки корманди додситонии кул барои қатъи парвандаи ҷиноӣ аз вай 200 ҳазор доллар талаб дорад.

Дар рафти амалиёти фаврӣ Арпачиев дар утоқи кориаш ҳангоми гирифтани пора дар ҳаҷми 100 ҳазор доллар боздошт шуд. Додгоҳ соли 2016 ӯро 14 сол зиндонӣ карда буд.

Бонки миллӣ: 1 доллар аз 9,65 то 9, 70 сомонӣ фурӯхта шавад

Қурбии расмии доллар дар Тоҷикистон пас аз ҷаҳиши якбора каме коҳиш ёфтааст. Бонки миллии Тоҷикистон санаи 6-уми сентябр қурби 1 доллари амрикоиро 9 сомониву 68 дирам таъйин кардааст. Аммо бо ин вуҷуд, Бонки миллӣ ба бонкҳо ва ташкилотҳои қарзӣ иҷозат додааст, ки долларро дар доираи 9 сомониву 65 дирам ва 9 сомониву 70 дирам хариду фурӯш кунанд. Чунин иқдоми Бонки миллӣ, ки ба ташкилотҳои моливӣ ҳақ додааст, ки дар доираи муайян мувофиқи салоҳдиди худ долларро хариду фурӯш кунанд, собиқа надошт.

Каме поён рафтани қурби доллар дар ҳолест, ки Бонки миллӣ рӯзи 20-уми август якбора қурби расмии долларо 27 дирам, яъне дар як шаб аз 9 сомониву 43 дирам то ба 9 сомониву 70 дирам боло бурд.

Вакилони амрикоӣ гуфтанд, русҳо аз Путин хаста шуданд

Эътироз дар Маскав бо шиори "Русия озод хоҳад шуд!" 31 августи соли 2019

Ду вакили мардумии баландпояи Амрико, Русияро барои баргузор накардани “интихоботи озоди маҷлисҳои маҳаллӣ” танқид карданд.

Дар баёнияи муштараки Элиот Эгел, вакили Ҳизби демократ ва Майкл Маккаул, вакили Ҳизби Ҷумҳурихоҳ омадааст, раҳпаймоиҳо бо талаби интихоботи озод “ҳамроҳ бо вокуниши Кремл ба он, далели дигарест, ки мардуми Русия аз шеваҳои истибдодии ҳукуматдории Владимир Путин хаста шудаанд”.

Дар шаҳрҳои гуногуни Русия аз моҳи июл ба ин тараф ҳазорон нафар бо талаби интихоботи озоду одилона ва барои роҳ наёфтани номзадҳои мухолифон ба интихоботи маҷлисҳои шаҳри Маскав ва Санкт Петербург тазоҳурот карданд. Мақомот мегуфтанд, ки номзадҳои мухолифин натавонистаанд, барои сабти ном ба қадри кофӣ имзо ҷамъ оваранд.

Рӯзи 5-уми сентябр мақомоти интизомии Русия ҳамчунин дафтари Алексей Навалний пешвои мухолифони давлат ва ду қароргоҳи дигари ӯро тафтиш карда ва се нафарро бо худ бурдаанд. Навалний ва ҳамсафонаш дар шабакаҳои иҷтимоӣ дар ин бора хабар дода ва навиштанд, ки ин се нафар баъд аз муддате озод шудаанд.

Ҳабси абади се мард дар Покистон барои "қатли номусӣ"

Додгоҳе дар вилояти шимолуғарбии Хайбар Пахтунхоҳ дар Покистон се мардро барои “қатли номусӣ” ба зиндони якумрӣ маҳкум кардааст. Ҳарсеро барои он ҷазо доданд, ки соли 2012 се занро барои рақсидан дар як ҷашни арӯсӣ дар минтақаи дурафтодаи Куҳистон куштаанд.

Додгоҳи шаҳри Бешом рӯзи 5 -уми сентябр ҳангоми мурофиа панҷ марди дигарро бегуноҳ донист. Онҳое, ки зиндонӣ шуданд, бародар ва падарони занони кушташуда ҳастанд. Ҳодисаи ваҳшатангез 9 сол пеш дар ин минтақаи муҳофизакори Покистон рух дод. Мардони хонаводаи се духтар, баъди дидани видеои кафкӯбӣ ва сурудхонии онҳо дар як ҷашни арӯсӣ духтаронро куштаанд.

Дар ин видео ҳамчунин як марде мерақсидааст, ҳарчанд дар навори комилан алоҳидае дида мешавад. Марди дуввумӣ саҳнаро навор бардоштааст. Куҷо будани ин мардон ва сарнавишти ду зани дигаре, ки дар видео дида мешаванд, маълум нест. Дар бораи ин видео Афзал Кӯҳистонӣ бародари ду ҷавон дар видео хабар дод ва эълон кард, ки қабиласолорон амр додаанд, ки занон барои беобрӯ кардани оила кушта шаванд. Худи Кӯҳистониро моҳи марти имсол дар шаҳри Абатобод дар шимоли Исломобод бо зарби тири туфанг куштанд.

Эмомалӣ Раҳмон ба 42 корманди "Роғун" мукофотҳои давлатӣ дод

Чархаи аввали нерӯгоҳи "Роғун"

Эмомалӣ Раҳмон, раисҷумҳури Тоҷикистон ба муносибати ба истифода додани чархаи дуввуми нерӯгоҳи “Роғун” ба 42 нафар мутахассисони ин иншоот мукофотҳои давлатӣ супоридааст.

Дафтари матбуоти Президент рӯзи 6-уми сентябр хабар дод, ки “барои саҳми муҳим дар сохтмони нерӯгоҳ коргарон бо ордени “Шараф дараҷаи II”, медали “Хизмати шоиста” ва “Ифтихорномаи Ҷумҳурии Тоҷикистон” қадр карда шуданд.”

Ба гуфтаи манбаъ, Президенти Тоҷикистон дар ин маросим таъкид кардааст, ки бунёди “Роғун” кишварро ба истиқлолияти комили энергетикӣ мерасонад.

Қарор аст чархаи дуввуми “Роғун” рӯзи 9-уми сентябр ба кор дарояд. Чархаи якуми нерӯгоҳ моҳи ноябри соли гузашта фаъол шуда буд. Ду чархаи нерӯгоҳи "Роғун" ба таври муваққат насб шудаанд ва мувофиқи нақша то соли 2021 барқ истеҳсол мекунанд ва баъдан иваз мешаванд.

Омбудсмени Қирғизистон: мактаби "контейнерӣ" ба меъёрҳо ҷавобгӯ нест

Намояндагони Омбудсмени Қирғизистон бо шароити таҳсили хонандагони деҳаи Кенеши вилояти Норин ошно шуданд, ки ба далели садамавӣ будани бинои мактабашон дар контейнерҳо дарс мехонанд.

Ба гуфтаи онҳо, шароити таҳсили хонандагони мазкур ба талаботи меъёрҳои раванди омӯзиш ҷавобгӯ набуда, бар хилофи меъёрҳои ҳуқуқи кӯдакон ба таҳсил, саломатӣ ва бехатарии шахсӣ аст.

"Контейнерҳо наметавонанд ҷои синфхонаҳоро иваз кунанд. Дар як контейнер танҳо 15-16 хонандаи синфҳои ибтидоӣ метавонанд ҷойгир шаванд ва ҳамчунин дохили онҳо дар фасли тобистон гарм ва дар зимистон аз кӯча дида сардтар аст", - омадааст дар изҳороти омбудсмен.

​Ваколатдори ҳуқуқи инсони Қирғизистон афзуда, ки бо ирсоли як нома аз ҳукумати ин кишвар дархост хоҳад кард, ки бунёди бинои нави мактаби деҳаи Кенешро барои на камтар аз 200 хонанда дар наздиктарин фурсат оғоз карда, онро бо таҷҳизоти зарурӣ таъмин кунад.

Рӯзи 2-юми сентябр дар шабакаҳои иҷтимоӣ аксҳое аз кушодашавии мактаби ба истилоҳ, "контейнерӣ" дар деҳаи Кенеши вилояти Норин нашр шуданд, ки баҳсҳои тундеро дар ҷомеаи Қирғизистон ба бор оварданд. Дар он маросим намояндагони мақомоти маҳаллӣ низ иштирок доштанд.

Дар пайи ин баҳсҳо вазири маориф ва илми Қирғизистон Гулмира Кудойбердиева ва намояндаи ҳукумати ин кишвар дар вилояти Норин Амонбой Кайипов бо хости худ аз мақомашон канор рафтанд. Вале маълум нест, ки ба истеъфои онҳо баҳсҳо атрофи "мактаби контейнерӣ" сабаб шудааст, ё не.

Фаъолони мадании қирғиз бо кушодани ҳисоби бонкие гуфтанд, барои бунёди мактаб дар деҳаи Кенеш маблағ ҷамъоварӣ мекунанд. Вале ҳукумати Қирғизистон эълом кард, ки ин мушкилро худ ҳал хоҳад кард.

Президенти Узбекистон омодагиҳо ба "Олимпиада-2020"-ро танқид кард

Президенти Узбекистон 4-уми сентябр бо баргузории як ҷаласа дар шаҳри Тошканд масъалаи рушди тарбияи ҷисмонӣ ва варзишро дар ин кишвар баррасӣ кард.

Ба огаҳии Хадамоти матбуотии президенти Узбекистон, Мирзиёев сатҳи омодагиҳоро ба Бозиҳои тобистонаи олимпии соли 2020 дар Токио ғайриқаноатбахш номида, сахт танқид кардааст.

Шавкат Мирзиёев ҳамчунин гуфтааст, ки федератсияҳои варзишӣ ва маъмуриятҳои Узбекистон барои варзишкорон шароити лозимиро фароҳам намекунанд.

Дар ҷаласа ҳамчунин қайд карда шудааст, ки варзишкорон барои зуд барқарор кардани нерӯи худ пас аз мусобиқаҳо ба кумаки фармакологӣ ниёз доранд. Вале дар Узбекистон дар самти фармакологии варзишӣ ҳечгуна корҳое анҷом дода намешавад ва дар ин соҳа низ мутахассисони ботаҷриба мавҷуд нест.

"Бештари варзишкорон намедонанд, ки кадом доруҳоро бояд истеъмол кунанд ва кадоме аз онҳо мамнуъ ҳастанд. Ягон федератсия барои таҳлили омода кардани аъзои мунтахаби кишвар ба мусобиқаҳо ё барқарор кардани нерӯи онҳо озмоишгоҳ надорад. Раҳбари давлат ба ниҳодҳои дахлдор дастур дод, ки лоиҳаи қарори рушди фармакологии варзишӣ ва ташкили озмоишгоҳҳоро дар федератсияҳои варзишӣ таҳия ва пешниҳод кунанд", - афзуд манбаъ.

Путин табодули зиндониёнро бо Украина шарҳ дод

Гуфтугуҳо барои табодули зиндониён ва шахсоне, ки дар Русия ва Украина нигаҳдорӣ мешаванд, дар ҳоли анҷомёбӣ ҳастанд. Ин нуктаро президенти Русия Владимир Путин дар ҷаласаи умумии Анҷумани иқтисодии Шарқ баён дошт.

Ба гуфтаи президенти Русия, табодул "дастаҷамъӣ" ва барои муътадил шудани муносибатҳои Маскав ва Киев "қадами хуб" хоҳад шуд.

Путин санаи дақиқи табодули зиндониёнро эълом накард. Вале манбаи хабаргузории русии Интерфакс дар доираҳои дипломатӣ дирӯз гуфта буд, ки он 7-уми сентябр баргузор мешавад. Президенти Украина Владимир Зеленский умед дорад, ки натиҷаҳои нахустини гуфтугӯҳо барои табодули зиндониён дар рӯзҳои наздик ба даст биёянд.

Субҳи 30-юми август дар бораи оғози табодули маҳбусон миёни Украина ва Русия хабарҳои зидду нақиз нашр шуданд. Вале дертар онҳо рад шуданд. "Гуфтугӯҳо барои табодули маҳбусон идома доранд", - иттилоъ дод сухангӯи Хадамоти амнияти Украина Елена Гитлянская.

Ноиб-сарвазири Қазоқистон: 15 тарҳи муштарак бо Чин иҷро шуд

Женис Қосимбек

Дар Қазоқистон 15 тарҳи муштарак бо Чин анҷом шуда, дар ҳоли фаъолият ҳастанд. Дар ин бора рӯзи 5-уми сентябр Женис Қосимбек, муовини сарвазири он кишвар хабар дод.

Иттилои Қосимбек дар ҳолест, ки дар чанде аз шаҳрҳои Қазоқистон зидди тарҳҳои муштарак бо Чин эътироз баргузор мешавад. Вале ноиб-сарвазир мегӯяд, дар доираи барномаи саноатсозӣ интизор меравад, 55 тарҳи дигар амалӣ шавад.

"Барои иҷрои 15 тарҳи анҷомшуда 3,9 миллиард доллар харҷ гардид. Ин тарҳҳо бахшҳои мухталифи иқтисодро дар бар мегиранд. Дар маҷмуъ, дар доираи 15 тарҳ бештар аз чаҳор ҳазор ҷои кор муҳайё шуд, ки 95 дарсадашон шаҳрвандони Қазоқистон ҳастанд", - афзуд Қосимбек.

"Ҳоло мардум мегӯянд, ки корхонаҳои нав "ифлосанд" ва ин тарҳҳои куҳнашуда аст, ки ба ҳудуди Қазоқистон меоранд. Расман изҳор медорам, ки ягон корхонаи куҳна дар ҳудуди Қазоқистон нест. Ҳамаи ин тарҳҳо нав ҳастанд", - гуфт Қосимбек.

Ба гуфтаи вай, давоми 5-6 соли оянда ҳамаи 55 тарҳи дигар амалӣ хоҳад шуд.

Сокинони шаҳри Жанаозени Қазоқистон чандин рӯз мешавад, зидди бунёди 55 корхонаи чинӣ дар ин кишвар ва сафари президент Қосимҷомарт Тоқаев ба Пекин эътироз доранд, ки қарор аст, рӯзҳои 11-12-уми сентябр сурат бигирад.

Президенти пешини Қазоқистон Нурсултон Назарбоев моҳи апрели соли 2019 дар ҷараёни сафараш ба Пекин хабар дод, ки бо Чин дар робита ба "55 лоиҳаи сармоягузорӣ дар бахши сохтмон, саноат, истеҳсоли гушт, гандум созишномае ба имзо расидааст".

Дар як қатор шаҳрҳои дигари Қазоқистон ҳам ба ҷонибдорӣ аз сокинони Жанаозен эътирозҳо ҷараён доранд.

Рӯзи 3-юми сентябр ҳудуди 30 нафар дар майдони назди бинои шаҳрдории Нурсултон ҷамъ шуда, аз мавқеи сокинони Жанаозен зидди "тавсеаталабии Чин" ҷонибдорӣ карданд. Сардори Идораи рушди ҷомеаи шаҳрдории Нурсултон Талгат Раҳмонбердиев ба назди эътирозгарон баромада, гуфт, Чин дар Қазоқистон ягон корхона бунёд карданӣ нест.

Чин чаҳорумин сармоягузор ва севумин қарздиҳандаи бузурги Қазоқистон аст. Қазоқистон дар навбати худ барои Чин манбаи ашёи хом, бозори фурӯши маҳсулот ва минтақаи транзитӣ мебошад. Пекин имсол ба Нурсултон 2 миллиарду 62 миллион юан додааст. Қазоқистон дар ҳоли ҳозир аз Чин беш аз 12 миллиард доллар қарздор аст.

Ёфтҳои бештар

Гузоришҳои видеоӣ

Манъи парвариши чорво дар гӯшаҳои нави пойтахти Тоҷикистон
лутфан мунтазир бошед

Феълан кор намекунад

0:00 0:02:37 0:00
XS
SM
MD
LG