Пайвандҳои дастрасӣ

Хабари нав

Хабарҳо

Владимир Путин бо паёми солона ба порлумон муроҷиат мекунад

Суханронии Владимир Путин дар ҷаласаи муштараки порлумони Русия дар соли 2016

Владимир Путин, раиси ҷумҳури Русия, имрӯз бо паёми солона ба порлумон муроҷиат мекунад ва қарор аст, масоили дохилӣ ва умури хориҷии кишварашро ба баррасӣ бигирад. Паёми солона дар рӯзи 15-уми январ дар Шӯрои Федератсия замоне ироа мешавад, ки Русия ба сабаби амалкардҳояш дар Украина, Сурия ва дахолат ба интихобот дар Амрико зери таҳрими кишварҳои ғарбӣ қарор дорад.

Таҳримоти иқтисодӣ то кунун монеи рушди иқтисодӣ, афзоиши камбизоатӣ, авҷ гирифтани ноқаноатмандӣ аз сиёсатҳои ҳукумат дар Русия шудааст. Владимир Путини 67-сола ду даҳсола аст, лаҷоми ҳукуматро дар даст дорад ва аз соли 1999 дар мақоми нахуствазир ва ҳам раиси ҷумҳур ифои вазифа кардааст. Ӯро соли 2018 барои шаш соли дигар раиси ҷумҳур интихоб карданд.

Владимир Путин имсол дар толори Манежи Маскав суханронӣ мекунад. Паёми мазкури раиси ҷумҳури Русия паёми 16-уми ӯ ба Шӯрои Федератсия аст ва дар ин ҷаласа ҳамчунин вазирону додрасҳо, раисони вилоятҳо ва дигар мақомоти баландпоя ширкат мекунанд.

Ҳалокати як сокини Душанбе аз таркиши норинҷак

Дар натиҷаи таркиши норинҷаки "РГД-5" сокини 33-солаи Душанбе Иван Мезентсев ҷон бохтааст. Мақомоти Вазорати корҳои дохилии Тоҷикистон гуфтанд, ки ҳодиса баъд аз зуҳри 14-уми январ дар даромадгоҳи яке аз биноҳои хиёбони Рӯдакӣ рух дод.

Ҳарчанд мақомот дар бораи ҷароҳат бардоштани афроди дигар расман чизе нагуфтанд, шоҳидон ба Радиои Озодӣ нақл карданд, ки дар ин таркиш ду роҳгузар "ҷароҳатҳои сабук" бардоштаанд.

Дар пайи таркиш падари Иван Мезентсев барои бозпурсӣ даъват шуда, маъмурони милиса ба дари хонаи онҳо муҳр задаанд.

Таҳқиқи ҳодиса идома дорад.

Ба иттилои мақомот, Иван Мезентсев ин норинҷакро "ба таври ғайриқонунӣ" дар хонааш нигоҳ медоштааст. Аммо дар хабари расмӣ гуфта нашудааст, ки ин сокини Душанбе норинҷакро кай ва аз куҷо пайдо кардааст.

Ҳамсояҳои Иван Мезентсови 33-сола дар маҳаллаи наздик ба Боғи Айнии пойтахт дар суҳбатҳои бидуни микрофон ба Радиои Озодӣ гуфтанд, ки падару писар зиндагии хуб надоштанд. "Онҳо шароб нӯшида, бо ҳам ҷанҷол мекарданд. Соли гузашта дар пайи муноқишаҳои оилавӣ бибии солхӯрдаи Иван худро аз ошёнаи дуюм ба поён партофта, худкушӣ карда буд", -- нақл кард яке аз ҳамсояҳо ба шарти он ки номаш фош нашавад.

Мушоҳидаҳои хабарнигорони Радиои Озодӣ нишон дод, ки дар даромадгоҳи бинои истиқоматӣ осори таркиши норинҷак, хун, дастпӯшакҳои тиббӣ ва деворҳои рехта аз таркиш дида мешавад.

Дар гузашта низ ҳодисаҳои таркиши норинҷак дар Душанбе сабт шудааст. Чанд сол пеш дар маҳаллаи "Автовокзал"-и пойтахт як мард бо истифода аз норинҷак худро тарконда буд. Мақомот мегӯянд, маъмулан ин таркишҳо аз силоҳҳое рух медиҳад, ки аз даврони ҷанги шаҳрвандӣ дар дасти сокинон мондааст.

Шоҳиди ҳодисае шудед, ё аксе видеое доред, лутфан, ба ин шумораҳо ва ба воситаи Вотсап, Вайбер, Телеграм ва ё ИМО бифристед: (+420) 607 900 808; (+420) 724 056 681; (+420) 724 053 959; (+992) 980 15 10 10

Узбекистон барои монеа ба фаъолияти рӯзноманигорон ҷарима таъйин мекунад

Интизор меравад дар Узбекистон бо ворид кардани тағйирот ба Кодекси ҳуқуқвайронкунии маъмурӣ барои дахолат ва эҷоди монеа ба фаъолияти рӯзноманигор ҷарима таъйин шавад.

Чунин тағйирот дар моддаи 197 қисми панҷ пешбинӣ мешавад.

"Моддаи 197 қисми 5. Дахолат ё эҷоди монеа ба фаъолияти қонуниву касбии рӯзноманигор ё водор кардан ба паҳнсозӣ ва ё пешгирӣ аз паҳнсозии иттилоъ, беасос рад кардани дархости аккредитатсия ва беасос бекор кардани аккредитатсия, поймол кардани ҳуқуқи рӯзноманигор дар робита ба дархости рӯзноманигорӣ ва дарёфти иттилои зарурӣ ва ё ғайриқонунӣ мусодира кардани мавод ва асбобҳои кории рӯзноманигор - боиси ҷаримабандии аз ду то панҷ нишондиҳанда барои ҳисобҳо мешавад".

Дар ҳоли ҳозир як нишондиҳанда барои ҳисобҳо дар Узбекистон наздики 23 долларро ташкил медиҳад.

Баррасии тарҳи мазкур то 28-уми январ давом хоҳад кард.

Зидди муовини пешини вазири энержии Қазоқистон айб эълом шуд

Айбдоркунандаи давлатӣ 14-уми январ дар додгоҳи Қарағандаи Қазоқистон гуфт, ки муовини пешини вазири энержии ин кишвар Анатолий Шкарупа ва ду гумонбари дигари парвандаи ӯ ба чӣ айбдор карда мешаванд. Шкарупа ва ду гумонбари дигар дар "азхудкунии гурӯҳии амволи ғайр бо маслиҳати пешакӣ дар ҳаҷми махсусан калон" айбдоранд.

Бино ба фарзияи айбдоркунандаи давлатӣ, Шкарупа (ҳангоми шаҳрдори Саранди Қарағанда будан) ҳамроҳ бо Набиев медонистанд, ки барои насби ҳисобкунакҳои оби гарм дар манзилҳои зисти Саран маблағ пешбинӣ нашудааст, нақшаи коррупсиониеро таҳия кардаанд. Дар иҷрои ин нақша шахси севум -- раҳбари Бунёди рушди манзили шаҳр Кайсар Байдалиро низ ҷалб кардаанд. Нақши ӯ дар доираи ин нақша сармоягузории ғайриқонунии ширкати "Сарантеплосервис" будааст.

Анатолий Шкарупа нимаи дувуми моҳи ноябри соли 2018 боздошт шуда буд. Шкарупа ибтидои моҳи октябри соли гузашта ба ин мақом таъйин шуда буд. То ин дам ӯ ду сол раиси шаҳри Сарани вилояти Қарағанда буд. Шкарупа ба он айбдор мешавад, ки ҳангоми раиси шаҳр буданаш 215 миллион танга (беш аз 580 ҳазор доллар)-ро аз худ кардааст.

Додситони кулли Қазоқистон Кайрат Кожамжаров ду ҳафта пеш аз боздошти ӯ дар Шӯрои амнияти кишвараш ба президент Нурсултон Назарбоев гуфт, ки ҳангоми раҳбарии Шкарупа дар Саран дар хонаҳои сокинон ҳисобкунакҳои низоми гармидиҳӣ насб карда шудааст. Вале дар ин шаҳр шабакаи гармидиҳӣ аслан вуҷуд надорад.

Муҳлати ҳабси президенти пешини Қирғизистон тамдид шуд

Муҳлати ҳабси президенти пешини Қирғизистон Алмосбек Отамбоев то 15-уми марти соли равон дароз карда шуд. Дар ин бора вакили дифоъ Замир Жоошев баъди мурофиаи навбатии марбут ба парвандаи ғайриқонунӣ озод кардани саркардаи олами ҷиноӣ Азиз Батукаев аз зиндони Қирғизистон иттилоъ дод.

Ба гуфтаи ӯ, баррасии парвандаи мазкур ба иллати бемор будани вакили дифои яке аз гумонбарон ба 16-уми январ ба таъхир гузошта шуд. Худи президенти пешини Қирғизистон дар мурофиа иштирок накардааст.

"Дар мурофиа як чанд дархости вакилони дифоъ баррасӣ шуд. Яке аз дархостҳо иваз кардани айбдоркунандаи давлатӣ буд. Зеро ӯ дар рафти тафтишот иштирок кардааст. Бар асоси қонун, дар ингуна ҳолатҳо додситон бояд иваз шавад. Вале додрас дархостро рад кард. Дувум, масъалаи ҳабси гумонбарон баррасӣ шуд ва муҳлати ҳабси Отамбоевро дароз карданд",-изҳор дошт Жоошев.

Ба гуфтаи Жоошев, ҳимоятгарони Отамбоев ҳабси шахси зери ҳимояи худро ғайриқонунӣ ва беасос меҳисобанд.

Додгоҳи шаҳрии Норини Қирғизистон чанд сол қабл дар асоси хулосаи табибон Азиз Батукаевро пеш аз муҳлат аз зиндон озод кард.

Дар озодсозии ғайриқонунии Батукаев чаҳор тан - президенти пешин Алмосбек Отамбоев, додситони пешин Индира Ҷолдубоева, мушовири пешини раиси муассисаҳои ислоҳии Қирғизистон Калибек Качкиналиев ва мудири пешини маркази гематологии Қирғизистон Абдуҳалим Раимҷоновро айбдор мекунанд. Дар маҷмуъ дар доираи ин парванда 19 кас гумонбар мешаванд.

Парвандаи беэътимодӣ ба Трамп ба Сенат меравад

Интизор меравад, ки имрӯз, 15-уми январ дар Маҷлиси Намояндагони Конгресси ИМА дар мавриди ирсол кардани парвандаи эъломи нобоварӣ ба президент Доналд Трамп ба Сенат раъйгирӣ анҷом шавад. Дар ин бора раиси Маҷлиси Намояндагон Нэнсӣ Пелосӣ иттилоъ додааст.

Маҷлиси Намояндагон, ки аксарияти аъзои онро демократҳо ташкил медиҳанд, ба ҷонибдорӣ аз беэътимодӣ ва ё импичменти Трамп ҳанӯз дар моҳи декабр раъй дода буданд. Зидди президент дар асоси ду модда - сӯистифода аз мансаб ва монеъ шудан ба пажуҳиши Конгресс айб эълом шудааст.

Айбҳо ба он рабт доранд, ки Трамп бо ҳадафи беобрӯ кардани рақиби эҳтимолии интихоботиаш Ҷо Байден ба мақомоти Украина фишор овардааст. Трамп ин айбҳоро рад мекунад ва рафтори демократҳоро талоши табаддулоти давлатӣ меномад.

Демократҳо талаб доранд, ки барои шоҳидӣ додан мақомҳои баландпояи Кохи Сафед, инчунин мушовири пешин дар умури амнияти миллӣ Ҷон Болтан даъват шаванд. Демократҳо бовар доранд, ки ин афрод айбҳои зидди Трампро тасдиқ хоҳанд кард. Ҷумҳурихоҳони ИМА метавонанд, ба ҳайси шоҳид писари Ҷо Байденро, ки дар Украина фаъолият дошт, ба шоҳидӣ додан даъват кунанд.

Аммо дақиқ нест, ки оё шоҳидони иловагӣ даъват хоҳанд шуд ё на. Бештари ҷумҳурихоҳон пеш аз ин гуфта буданд, ки ба бегуноҳоии Трамп бовар доранд. Барои аз мақом барканор кардани Трамп ҳадди ақал 67 раъйи сенаторҳо зарурист. Дар айни ҳол аз эҳтимол дур аст, ки ин теъдод аз сенаторҳо ба ҷонибдорӣ аз импичменти Трамп раъй диҳанд.

Гуфтугӯҳои сулҳи Либия ба таъхир афтод

Фоиз ас-Сарраҷ ва Халифа Ҳафтар

Гуфтугӯҳои сулҳ дар Маскав миёни раҳбарони рақиби Либия пас аз он ки рӯзи 13-уми январ пешниҳодҳои оташбаси Русия ва Туркияро баррасӣ карданд, як шаб ба таъхир афтод.

Фоиз ас-Сарраҷ, сарвари давлати миллии аз тарафи Созмони Миллал шинохташуда дар Триполи ва рақиби ӯ Халифа Ҳафтар - фармондеҳи Артиши Миллии Либия (LNA) - бо дипломатҳои олӣ ва мансабдорони ҳарбии Русия ва Туркия вохӯрданд.

Гуфтугӯҳо тақрибан ҳафт соат давом кард ва пушти дарҳои пӯшида баргузор шуд. Сарраҷ ва Ҳафтар бо ҳам вонахӯрданд.

Созишномаи санҷишӣ рӯзи 12-уми январ эътибор пайдо кард. Вазири корҳои хориҷии Русия Сергей Лавров ва ҳамтои турки ӯ Мавлуд Човушоғлу гуфтанд, ки Сарраҷ ин тарҳро имзо кардааст, аммо Ҳафтар барои баррасии он вақти бештар дархост кардааст.

Оташбас ба ҷангҳои сахт ва ҳамлаҳои ҳавоӣ хомӯшӣ овард. Тарафҳо якдигарро дар вайрон кардани созишнома айбдор карданд, зеро дар атрофи пойтахт тирпаррониҳо идома ёфтанд.

Бисёре аз нозирон мегӯянд, нигоҳ доштани оташбас бо хусусиятҳои бесуботӣ ва ноустувории гурӯҳҳои низомии Либия душвор хоҳад буд.

Давлати Африқои Шимолӣ аз замоне ки фармонравои пешини он Муаммар Қаззофӣ дар соли 2011 барканор ва кушта шуд, ба ҷангу кашмакашҳо рӯбарӯ шудааст.

Рӯҳонӣ гуфт, масъулони "хатои нобахшиданӣ" бояд ҷазо гиранд

Ҳасани Рӯҳонӣ, раиси ҷумҳурии Эрон

Ҳасани Рӯҳонӣ, президенти Эрон, дар баробари эътирозҳои сахт хостори ташкили додгоҳи вижа барои баррасии сарнагунии ҳавопаймои мусофирбари украинӣ аз тарафи дифои зиддиҳавоии ин кишвар шуд. Ҳамаи 176 нафар, ки савори ҳавопаймо буданд, дар фоҷиа ҷон бохтанд.

Рӯҳонӣ дар як суханронии телевизионӣ рӯзи 14-уми январ гуфт, ҳамаи масъулони "хатои нобахшиданӣ" бояд ҷазо дода шаванд.

Эътирозҳо дар шаҳрҳои Эрон рӯзи 11-уми январ, пас аз он ки артиши ин кишвар гуфт, ҳавопаймои Боинг 800-737 аз сӯи мушаки зидди ҳавопаймоии Эрон, пас аз чандин дақиқаи парвоз аз фурудгоҳи байналмилалии Имом Хумайнии Теҳрон, "нохост" зада сарнагун карда шуд, сар шуданд.

Бисёрии онҳое, ки дар ин фоҷиа кушта шуданд, шаҳрвандони Эрон ва Канада буданд. Фоҷиа пас аз ҳамлаи мушакии Эрон ба зидди пойгоҳҳои низомии Амрико дар Ироқ рӯй дод.

Ҳасани Рӯҳонӣ бе ишора ба ниҳод ва созмоне хост, то ин масъала, ба гуфтаи ӯ, бо садоқат ба мардум баён карда шавад. Рӯҳонӣ гуфт: "Барои мардуми мо дар ин ҳодиса хеле муҳим аст, ҳар касе ки дар кадом сатҳе гунаҳкор аст ва ё бепарвоӣ кардааст, бо адолат рӯ ба рӯ шавад.”

Боздошти чанд кас дар Эрон дар робита ба суқути ҳавопаймои украинӣ

Мақомоти Эрон чанд касро дар доираи парвандаи сарнагунсозии "Боинг"-и ширкати ҳавопаймоии Украина боздошт карданд.

Ғуломҳусайн Исмоилӣ, сухангӯи додгоҳи Эрон гуфт, ҳамаи боздоштшудагон дар суқут додани ҳавопаймо даст доранд. Аммо гуфта намешавад, ки дар маҷмуъ чанд нафар боздошт шудааст.

Ҳасани Руҳонӣ, президенти Эрон низ субҳи имрӯз ваъда дод, ҳамаи касоне, ки дар суқут додани ҳавопаймо даст доранд, муҷозот хоҳанд шуд.

57 тан аз 176 қурбонии ҳавопаймои украинӣ, ки рӯзи чаҳоршанбеи 8-уми январ аз Теҳрон ба Киев парвоз мекард ва аз сӯи Сипоҳи посдорони Эрон сарнагун шуд, эронӣ-канадаӣ буданд. Дар миёни қурбониёни ин ҳодиса шаҳрвандони Эрон, Афғонистон ва Украина низ буданд.

Ҳавопаймои "Боинг"-и украинӣ рӯзи 8-уми январ дар ҷараёни ҳамлаи мушакии Сипоҳи посдорон ба ду пойгоҳи мавриди истифодаи Амрико дар Ироқ дар интиқом ба кушта шудани Қосим Сулаймонӣ бо дастури Доналд Трамп, дар наздикии Теҳрон сарнагун шуд.

Се рӯз пас аз суқути ин ҳавопаймо, Ситоди кулли нерӯҳои мусаллаҳи Эрон дар баёнияи расмӣ пазируфт, ки Сипоҳ дучори хато шуда, ба иштибоҳ ин ҳавопайморо ҳадаф қарор додааст.

Блогнависи қазоқ талоши дарёфти паноҳандагии Украинаро дорад

Додгоҳе дар Украина қарор аст, имрӯз, 14-уми январ шикояти блогнависи қазоқистонӣ Жанара Ахмет, ҳамсафи роҳбари "Интихоби демократии Қазоқистон" Мухтор Аблязовро ба баррасӣ гирад. Жанара Ахмет аз болои қарори Хадамоти муҳоҷирати Украина дар робита ба рад кардани дархости паноҳандагии вай ба додгоҳ шикоят бурд.

Гуруҳе аз вакилони порлумони Италия ахиран ба президенти Украина Владимир Зеленский дар робита ба парвандаи Жанар Ахмет муроҷиат карданд. Вакилон изҳори умедворӣ карданд, ки додгоҳ қарорашро ба нафъи блогнависи қазоқистонӣ содир мекунад.

"Агар қарори хадамоти муҳоҷират тағйир наёбад, эҳтимол дорад, ки Жанара Ахмет ба Қазоқистон истирдод шавад",-гуфт Владислав Гришенко, вакили мудофеи Жанара. Блогнавис Жанара Ахмет, ки дар шаҳри Алмаато зиндагӣ мекард, моҳи марти соли 2017 ба Украина фирор кард.

Жанара ҳамроҳ бо писари 9-солааш ба Украина рафт. Жанара Ахмет мегӯяд, дар Қазоқистон борҳо ба ҷавобгарии маъмурӣ ҷалб шуданаш боис гардид, ки фирор кунад. Вай яке аз гумонбарони парвандаи ҷиноии "ташкили созмони ғайриқонунӣ" дониста мешуд. Жанара Ахмет баъди озодии шартӣ аз зиндон зери назорати мақомот буд.

Блогнавис Жанара Ахмет бо навиштаҳои танқидиаш зидди ҳукумати Қазоқистон дар шабакаҳои иҷтимоӣ маъруф аст.

"Оҳангаронсемент"-и Узбекистон ба далели камбуди газ аз кор монд

Бузургтарин корхонаи истеҳсоли семент дар Узбекистон -- "Оҳангаронсемент" сар аз 10-уми январ ба далели камбуди газ аз кор монд.

"Дар умум фаъолияти корхона 26-уми декабр қатъ шуда буд. Ду рӯз комилан бе кор нишаста будем. Баъд барои ду тафдон газ доданд. Дар ин ду тафдон корҳо шабона давом мекарданд. Субҳи 10-уми январ ин тафдонҳо ҳам хомӯш шуданд",-хабар дод як коргари корхона.

Мақомдороне, ки хабари аз кор мондани корхонаро тасдиқ карданд, гуфтанд, ин ҳолат муваққатист, аммо маълум нест, ки корхона кай дубора ба кор мепардозад.

"Вақте газ камбуд набошад, ҳафт рӯз дар ҳафта шабу рӯз кор мекунем. Ҳоло газ, ки нест, корхона аз кор монд", - гуфт як мақомдори корхона.

86 дарсади саҳмияҳои корхонаи Оҳангарон дар соли 2006 ба ширкати русии Eurochem Group фурӯхта шуд.

Ба иттилои расмӣ, корхонаи "Оҳангаронсемент" солона 2 миллиону 180 ҳазор тона семент истеҳсол мекунад.

Ортиқхоҷаев баъди интиқоди Мирзиёев дубора шаҳрдори Тошканд шуд

Вакилони нави Маҷлиси халқии шаҳри Тошканд, пойтахти Узбекистон Ҷаҳонгир Ортиқхоҷаевро дубора раиси шаҳр интихоб карданд. Номзадии Ортиқхоҷаевро ба ин мақом президенти Узбекистон Шавкат Мирзиёев пешниҳод кардааст.

Расонаҳои маҳаллии Узбекистон 11 январ хабар доданд, ки Мирзиёев бо рафти бозсозии боғи миллии кишвараш ба номи Алишер Навоӣ шинос шуда, дар ҷараёни он Ортиқхоҷаев ба ӯ дар бораи сохтмонҳое хабар додааст, ки қарор аст дар Тошканд анҷом шаванд.

Тавре аз хабарҳо маълум шуд, Ортиқхоҷаев, ки се моҳ пеш аз сӯи ҷомеа ва президенти Ӯзбекистон танқид шуда буд, соли 2020 низ пойтахти ин кишварро раҳбарӣ хоҳад кард.

Ёдрас мешавем, шарҳдори Тошканд пас аз як баҳси худ бо расонаи маъруфи узбекии Kun.uz мавриди интиқод қарор гирифта буд. Дар шабакаҳои иҷтимоӣ 16 ноябри соли гузашта наворе нашр шуд, ки дар он марди садояш монанд ба шаҳрдори Тошканд Ҷаҳонгир Ортиқхоҷаев рӯзноманигоронро ба қатлу зиндон таҳдид карда, мегӯяд, онҳоро дар шаш сония ҳамҷинсгаро хоҳад кард.

Зоҳиран навор ҳангоми суҳбат бо рӯзноманигорон сабт шудааст. "Як ҳафта пеш дар бораи корхонаҳои ман навиштанд ва онҳоро инҳисор номиданд. Агар ҳозир барояшон 10 ҳазор доллар бидиҳӣ, ситоишро оғоз хоҳанд кард. Онҳо кӣ ҳастанд? Палидҳои пастанд! Онҳо фарзанди инсон ё саг бошанд? Тавре мекунам, ки шуморо ба маҳаллаатон роҳ намедиҳанд ва волидонатонро масхара хоҳанд кард. Ҳамсояҳоятон шарм медоранд, ки бо шумо салом кунанд. Ман ин корро карда метавонам. Барои ман ҳамҷинсгаро эълом кардани шумо мушкил аст? Осон аст! Дар 6 сония шуморо дар як таксӣ бо ҳамҷинсгаро шинонда, акс мегирам. Тамом! Шумо ҳамҷинсгаро!",-гуфта мешавад дар навор.

Ортиқхоҷаеви 45-сола бори нахуст моҳи декабри соли 2018 шаҳрдори Тошканд интихоб шуд. Ӯ дар гузашта мудири ширкати "Артел инжиниринг" ва корхонаи давлатии "Tashkent City" буд.

Помпео: ИМА стратегияи пешгирии Эрон, Русия ва Чинро барқарор месозад

Майк Пампео, котиби давлатии ИМА гуфт, аз байр бурдани Қосим Сулаймонӣ, генерали баландпояи эронӣ як ҷузъи стратегияи густардаи гирифтани пеши роҳи душманони Амрико буд ва ин стратегия Чину Русияро низ фаро хоҳад гирифт.

Помпео рӯзи душанбе ҳангоми суханронӣ дар донишкадаи Гувер зери унвони "Барқарорсозии сиёсати пешгирикунанда: намунаи эронӣ", суханронӣ кард.

"Душман бояд бифаҳмад, ки мо натанҳо тавони талаби посухи амалҳояшро дорем, балки метавонем онро анҷом низ бидиҳем",-изҳор дошт Пампео. Ӯ ҳамчунин ҳукумати президенти пешини ИМА Барак Обамаро барои имзои созишномаи ҳастаӣ дар соли 2015 бо Эрон танқид кард.

Ба гуфтаи котиби давлатии ИМА, ҳадафи стратегияи пешгирикунандаи Амрико танҳо Эрон нест. Ӯ интиқоли силоҳ ба Украина, маҳкум кардани Созишномаи маҳви мушакҳои кутоҳу миёнапарвоз ва озмоиши мушакҳои амрикоии миёнапарвозро ҷузъе аз талошҳои стратегӣ нисбат ба Русия номид. "Мо мафҳуми пешгирикунандаро барқарор месозем", - афзуд Пампео.

Вазири адлияи Узбекистон бо аъзои ҳизби мухолифи "Эрк" мулоқот кард

Русланбек Давлатов, вазири адлияи Узбекистон.

Русланбек Давлатов, вазири адлияи Узбекистон рӯзи 10 январ намояндагони ҳизби мухолифи демократии "Эрк" ("Ирода")-ро бо роҳбарии Отаназар Орифов ба ҳузур пазируфт. Дар бораи ин мулоқот Аъзам Тургунов, яке аз аъзои "Эрк" хабар дод.

"Давлатов бо мо мулоқот ва фикру ақидаҳои моро шунид. Аммо дар давоми мулоқот вай гуфт, ки "ин ҳизб дар гузашта мондааст, онро фаромӯш кунед". Оинномаи ҳизб 3 сентябри соли 1991 дар вазорати адлия сабти ном шуда буд. То ҳол санаде ё ҳуҷҷати дигаре мавҷуд нест, ки аз баста шудани ҳизби мо шаҳодат диҳад. Дар робита ба ин мо аз вазир тақозо кардем, ки ба мо иҷозаи фаъолиятро бидиҳад. Вазир гуфт, ҳуҷҷате, ки дар соли 1991 қабул шудааст, қувваи қонуниашро аз даст додааст. Аммо сарфи назар аз ҳамаи ин - миёни мухолифону ҳукуматдорон муколама шуруъ шуд",-гуфт Аъзам Тургунов.

Ин ҳам дар ҳолест, ки Шавкат Мирзиёев, президенти Узбекистон рӯзи 27 декабри соли 2019 дар бораи мухолифони сиёсӣ изҳори назар карда буд.

"Дар Шабакаҳо мухолифон баҳсу баррасӣ мекунанд. Онҳо чи фоидае оварданд? Ман ҳамчун президент зид нестам, аммо бояд муҳите фароҳам шавад, ки онҳо (мухолифон) дар дохили кишвар шакл гиранд, мушкили мардумро дарк кунанд, нону оби ҳамин ҷоро истифода кунанд", - гуфт Мирзиёев ва илова кард, ки "ба вуруди мухолифон аз хориҷ ба кишвар иҷозат намедиҳад".

Бо гузашти 13 рӯз аз ин ҳарфҳои президент вазири адлияи он кишвар бо мухолифони хориҷӣ мулоқот кард. Чанде пеш аз ин вазорати адлия ҳамчунин бо намояндагони ҳизби "Бирлик" мулоқот карда буд.

Ҳизбҳои "Эрк" ва "Бирлик" дар охирҳои солҳои 80-уми асри гузашта ташкил шуда буданд.

Ба иттилои расмӣ, раиси ҳизби "Эрк" Муҳаммад Солеҳ дар интихоботи президентии соли 1992 12,7 дарсад раъй ба даст оварда буд.

Аммо баъди он интихобот тазоҳуроти ҷонибдорони Солеҳ пароканда ва нашрияҳои ҳизб баставу зидди роҳбарияти он парванда боз шуд. Дар натиҷа мухолифон яке пас аз дигарӣ Узбекистонро тарк карданд.

Рӯзноманигори маъруфи қирғиз латтукӯб шуданашро таҳқиқ мекунад

Сармуҳаррири сомонаи FactCheck.kg Болот Темиров, ки ахиран аз сӯи афроди номаълум мавриди ҳамла қарор гирифт, гуфт, мехоҳад дар робита ба ҳамлагарон таҳқиқоти рӯзноманигориеро анҷом диҳад.

Ӯ афзуд, ки ба воқеъбинона анҷом шудани тафтишот бовар надорад. "Мо бо ҳамкорон тасмим гирифтем, ки таҳқиқоти рӯзноманигориеро анҷом диҳем. Бинобар ин, аз шоҳидони ҳодиса ва корхонаҳое, ки дар онҷо ҷойгиранду дурбинҳои назоратӣ насб кардаанд, хоҳиш мекунам, ба мо наворҳоро бидиҳанд ва дар ин таҳқиқот кумак кунанд",-изҳор дошт вай.

Болот Темиров 9-уми январ, дар назди коргоҳи FactCheck.kg дар маркази шаҳри Бишкек мавриди ҳамла қарор гирифт. Идораи сомона хабар дод, ки се марди ношинос ба рӯзноманигор ҳамла ва телефони ӯро рабуданд.

Гуфта мешавад, мардҳое, ки Болот Темировро латту кӯб карданд, дар рӯзҳои охир дар наздикии идораи Factcheck.kg дида шудаанд. Моҳи декабри соли 2019 сомонаи Factcheck.kg баъди нашри таҳқиқоти рӯзноманигорие мавриди ҳамлаи ҳаккерӣ қарор гирифт.

Маликаи Бритониё ба шоҳзода ва ҳамсараш давраи гузаришро фароҳам кард

Малика Елизаветаи II розӣ шуд, ба шоҳзода Гаррӣ ва ҳамсараш Гарен Маркл "давраи гузариш"-еро фароҳам созад, ки дар давоми он онҳо метавонанд бо навбат дар Канада ва Бритониё зиндагӣ кунанд.

Малика гуфт, тасмими набераи хурдӣ ва ҳамсарашро дар бораи нақши нави иҷтимоияшон "пурра дастгирӣ мекунад", вале ба назари ӯ беҳтар аст, ки онҳо ҳамчун узви хонаводаи шоҳ бимонанд.

Елизаветаи II изҳор дошт, ки барои ба эътидол овардани муносибатҳои Гаррӣ ва Меган бо аъзои дигари хонаводаи шоҳ корҳои зиёдеро бояд анҷом дод, вале умедвор аст, тасмими ниҳоӣ дар ин бора рӯзҳои оянда гирифта хоҳад шуд.

Гаррӣ ва ҳамсараш ахиран эълом карданд, ки мехоҳанд аз мақоми узви хонаводаи шоҳ даст кашанд. Онҳо дар изҳороти худ гуфтаанд, ки мехоҳанд, вақти худро миёни Бритониё ва Амрикои Шимолӣ тақсим кунанд.

Ба гуфтаи Мегану Гаррӣ, онҳо ба хотири истиқлоли молӣ аз хонаводаи шоҳӣ корро оғоз карданианд.

Онҳо ҳамчунин хабар доданд, ки як бунёди нави хайрияро ташкил кардаанд, вале ҷузъиёти бештареро дар ин бора ироа накарданд.

Шоҳзода Гаррӣ ва ҳунарманди амрикоӣ Меган Маркл 19 майи соли 2018 издивоҷ карданд. Ин дувумин издивоҷи Меган Маркл аст. Онҳо 6 майи соли 2019 соҳиби писар шуданд.

Додгоҳ шикояти модари варзишкори кушташудаи қазоқро рад кард

Додгоҳи шаҳри Алматои Қазоқистон шикояти Оксана Тен, модари варзишкор Денис Тенро барои ба ҷавобгарӣ кашидани ду корманди пулисеро рад кард, ки тобистони соли 2018 шоҳиди қатли писараш шуда буданд.

Оксана Тен нозирон Одилбек Мусоев ва Азамат Нурпеисовро дар беамалӣ айбдор мекард. Онҳо 19 июли соли 2018 дар наздикии маҳалли куштор қарор доштанд. Ин ду корманди пулис дар доираи парвандаи куштор ба ҳайси шоҳид баёнот дода, гуфтанд, ки ҳодиса дар пеши чашми онҳо рух додааст. Вале маъмурони пулис замоне ба кумаки варзишкор шитобиданд, ки ӯ аллакай захмӣ буд.

Оксана Тен аз додгоҳ хост, амали кормандони пулис мушикофона таҳқиқ ва муайян карда шавад, ки он рӯз онҳо метавонистанд аз кушта шудани писараш пешгирӣ кунанд, ё не.

Варзишкори маъруфи қазоқ ва барандаи ду медали чемпионати ҷаҳон, аз ҷумла бозиҳои олимпии шаҳри Сочии Русия Денис Тени 25-сола 19 июли соли 2018 дар бемористони шаҳри Алмато вафот кард. Ӯ бо чанд захми корд ба бемористон интиқол ёфта буд. Ба ӯ афроде ҳамла карданд, ки мехостанд, шишаи мошинашро дузданд.

Додгоҳ гумонбарони ин куштор Арман Кудайбергенов ва Нуралӣ Киясовро 18-солӣ зиндонӣ кард. Муттаҳамон дар додгоҳ ба гуноҳашон иқрор, аммо куштори барқасдонаро рад карданд. Муттаҳами дигари парванда Жанар Толибоева бо айби иттилоъ надодан дар бораи ҷиноят 4 сол зиндонӣ шуд.

Музокироти сулҳи тарафҳои даргир дар Либия

Дар акс: Фоиз ал-Сарроҷ ва Халифа Ҳафтар

Вазорати корҳои хориҷии Русия мегӯяд, раҳбарони рақибони ҷангандаи Либия рӯзи 13-уми январ дар шаҳри Маскав гуфтугӯҳои сулҳро баргузор хоҳанд кард.

Дар ин гуфтугӯҳо Фоиз ас-Сарроҷ, ки ҳукумати миллии аз тарафи Созмони Миллал шинохташудро дар Триполи (Троблус) раҳбарӣ мекунад ва Халифа Ҳафтар, фармондеҳи Артиши Миллии Либия иштирок хоҳанд кард.

Сухангӯи Вазорати корҳои хориҷии Русия Мария Захарова дар саҳифааш дар Фейсбук навишт: “Имрӯз барвақттар вазирони корҳои хориҷӣ ва дифои Русия ва Туркия “ҷаласаро бахшида ба ҳалли низоъи Либия” оғоз карданд.”

Захарова афзуд: "Намояндагони ҷонибҳои Либия омадаанд ва ба зудӣ ба гуфтугӯҳо ҳамроҳ хоҳанд шуд."

Сардори Шӯрои олии давлатии Либия Холид ал-Мешрӣ дар як шабакаи хабарии маҳаллӣ гуфт, Сироҷ ва Ҳафтар нақша доштанд, ки созишномаи оташбасро имзо кунанд. Роҳбари гурӯҳи ҳамоҳангсози Русия дар Либия Лев Денгов ба “Интерфакс” гуфт, ки ҷонибҳо "имзои созишнома ва ҷузъиёти ин санадро баррасӣ хоҳанд кард."

Оташбас ба ҷангҳои сахт ва ҳамлаҳои ҳавоӣ хомӯшӣ овард. Тарафҳо ҳамдигарро дар вайрон кардани созишнома айбдор карданд, зеро дар атрофи пойтахт тирпаррониҳо идома ёфтанд.

Бисёре аз нозирон мегӯянд, нигоҳ доштани оташбас бо хусусиятҳои бесуботӣ ва ноустувории гурӯҳҳои низомии Либия душвор хоҳад буд.

7 ҳазор тоҷикистонӣ дар зиндонҳои Русия адои ҷазо мекунанд

Дар ҳоли ҳозир дар зиндонҳои Русия 7 ҳазор шаҳрванди Тоҷикистон муҳлати ҳабси худро адо мекунанд. Дар ин бора хабаргузории русии ТАСС рӯзи 12-уми январ бо истинод ба ФСИН -- Хадамоти федеролии иҷрои ҷазо дар Русия хабар додааст.

Ба иттилои ин ниҳод, бисёре аз шаҳрвандони Тоҷикистон, ки дар зиндонҳои Русия ҳастанд, дар чаҳорчӯбаи хизматрасонии "ФСИН-нома", аз наздиконаш дар Тоҷикистон номаҳои электронӣ мегиранд.

Александр Полкин, мудири умумии ширкати "Системаи электронии хос" ба ин хабаргузорӣ гуфтааст, дар маҷмӯъ, 80 дарсади муассисаҳои ислоҳӣ дар Русия ба ин система пайваст ҳастанд ва дар Соли нав маҳбусон беш аз 135 ҳазор нома дарёфт карданд, ки миёни онҳо шаҳрвандони Тоҷикистон низ ҳастанд.

Шаҳрвандони Тоҷикистон, ки дар маҷмӯъ ба ҳадафи дарёфти ризқу рӯзӣ ба шаҳрҳо ва минтақаҳои Русия сафар мекунанд, гоҳе барои ҷинояткорӣ боздошт мешаванд. Ба иттилои ин хабаргузорӣ, агар дар 15-20 соли пеш шаҳрвандони Тоҷикистон дар умум ба иттиҳоми қочоқи маводи мухаддир муттаҳам дониста мешуданд, дар солҳои ахир барои нақзи қонунҳои муҳоҷират пушти милаҳои зиндон мераванд.

Ҳолатҳои ҳам кам нестанд, ки шаҳрвандони Тоҷикистон дар Русия барои фаъолиятҳои экстремистӣ муттаҳам мешаванд. Бо ин ҳол, бисёре аз маҳкумшудагон дар додгоҳҳое, ки ҳуқуқи онҳо ба шиддат нақз шудааст, аз қарорҳои ноодилона шикоят мекунанд.

Фаъолони ҳуқуқ башар мӯътақиданд, ки дар амал ниҳодҳои додгоҳии Русия дар робита ба шаҳрвандони Тоҷикистон ва дигар кишварҳои Осиёи Марказӣ аз равиши сохтакории иттиҳомот, истифода мекунанд.

Фақат шумори каме бо кӯмаки наздиконашон баъдан метавонанд ба ватани худ баргарданд. Ҷое, ки онҳо ҳамчунон ҳукми худро дар онҷо адо мекунанд ва ҳаққ доранд бо хешовандони худ бештар мулоқот дошта бошанд.

Русия кишвари аслии муҳоҷирпазир аз Тоҷикистон аст ва солона садҳо ҳазор нафар бинобар набуди ҷойи кор дар ватан ба он кишвар мераванд.

Сарвазири Канада мегӯяд, дар ҷустуҷӯи адолат хоҳад буд

Ҷастин Трюдо, сарвазири Канада

Сарвазири Канада Ҷастин Трюдо мегӯяд, барои касони кушташуда дар ҳавопаймои мусофирбари украинӣ, ки ҳафтаи гузашта аз сӯи Эрон сарнагун карда шуд, дар ҷустуҷӯи адолат хоҳад буд.

"Ҳамаи оилаҳо ва кандагиҳоро бовар мекунонам, то вақте ки ҷавобе пайдо накунем, осуда нахоҳем буд", -- гуфт Трюдо рӯзи 13-уми январ дар Эдмонтон, Алберта, дар маросими ёдоварии 57 шаҳрванди кушташудаи Канада.

Пас аз он ки мансабдорони Эрон сарнагун кардани ҳавопайморо пазируфтанд, эътирозҳои зиддиҳукуматӣ дар Эрон оғоз ёфтанд.

Нирӯҳои низомии Эрон гуфтанд, нерӯҳои дифои ҳавоӣ рӯзи 8-уми январ ҳавопаймои “Боинг 737-800”-ро нохост зада, сарнагун карданд, ки 176 нафари дар ҳавопаймо буда ҷон бохтанд.

Фоҷиа чанд соат пас аз ҳамлаи мушакии Эрон ба пойгоҳҳои низомии нерӯҳои амрикоӣ дар Ироқ рӯй додааст. Пас аз пазириши Эрон, 11-уми январ дар Теҳрон ва шаҳрҳои дигар норозигиҳои мардум сар заданд.

Эътирозгарон ба зидди роҳбарии Эрон шиорҳо пахш карданд ва дар бораи задухӯрдҳо бо полис гузоришҳо расиданд. Видеои дар интернет пахшшуда нишон медиҳад, ки шаби 12-уми январ дар майдони "Озодӣ"-и Теҳрон аз сӯи полис ва нерӯҳои амниятӣ барои пароканда кардани тазоҳургарон тирҳои ҷангӣ ва гази ашковар истифода мешуданд.

Барканории сафири Тоҷикистон дар Қирғизистон ва идомаи тағйирот

Рӯзи 13-уми январ дар чанде аз идораҳои давлатии Тоҷикистон ва ҳукуматҳои маҳаллӣ тағйироти кадрӣ сурат гирифт. Мунтақидон онро "ҷойивазкунӣ"-и мансабдороне меноманд, ки солҳо боз аз як мақом ба мақоми дигар мегузаранд.

Рӯзи душанбе Муҳаммадраҳим Юсуфӣ – раиси ноҳияи Фирдавсӣ, Азиз Гиёзода – раиси ноҳияи Шуғнон, Ғайрат Азиззода – раиси ноҳияи Мастчоҳ ва Зафар Файзуллозода -- раиси ноҳияи Қубодиён аз мақомҳои худ озод шудаанд. Дар фармони раиси ҷумҳур барканории онҳо гузаштан ба кори дигар гуфта шудааст, аммо ҷузъиёташ нест. Вале номзадии бархе аз ин афрод аз тарафи ҳизби ҳокими халқӣ - демократӣ ба интихоботи порлумонии моҳи март пешниҳод шудааст ва эҳтимол тағйирот ба иин рабт дорад.

Раиси ҷумҳури Тоҷикистон рӯзи 13-уми январ сафири кишвар дар Қирғизистон Сӯҳроб Олимзодаро низ "барои ба кори дигар гузаштан" аз мақом барканор кард ва ба ҷойи ӯ Назирмад Ализодаро таъйин намудааст. Дар ин бора дафтари матбуоти раёсати ҷумҳури Тоҷикистон иттилоъ дод.

Хадамоти матбуоти президенти Тоҷикистон ҳамзамон хабар дод, ки Низом Мирзозода бо қарори ҳукумат аз вазифаи муовини раиси Кумитаи сохтмон ва меъмории Тоҷикистон озод ва муовини раиси вилояти Хатлон таъйин шудааст.

Манбаъ аз тағйироти кадрӣ дар Вазорати маориф ва илм, дастгоҳи марказӣ ва сохторҳои Додситонии кул дар ВМКБ, вилоятҳои Суғду Хатлон ва шаҳри Душанбе хабар додааст.

Шоҳиди ҳодисае шудед, ё аксе видеое доред, лутфан, ба ин шумораҳо ва ба воситаи Вотсап, Вайбер, Телеграм ва ё ИМО бифристед: (+420) 607 900 808; (+420) 724 056 681; (+420) 724 053 959; (+992) 980 15 10 10

Таҳдиди ҷаримаву зиндон барои консерти Юлдуз Усмоноваи "қалбакӣ"

Ба зидди як сокини шаҳри Истаравшани вилояти Суғд барои ташкили консерти дурӯғини Юлдуз Усмонова, овозхони машҳури узбек, парвандаи ҷиноӣ кушодаанд. Мақомот гуфтанд, Саидҷон Ғаниев ба қаллобӣ муттаҳам аст. Вале феълан назари ӯ ва ё пайвандонаш ба ин иттиҳом маълум нест.

Мақомоти милисаи Истаравшан рӯзи 13-уми январ ба Радиои Озодӣ гуфтанд, ки Саидҷон Ғаниев бо эълони баргузории консерти Юлдуз Усмонова ба мардум билет фурӯхта, вале шахси дигарро ҳамчун Юлдуз ба саҳна баровардааст.

Консерт бо иштироки гӯиё Юлдуз Усмонова рӯзи 25-уми декабри соли 2019 дар тарабхонаи "Садбарг"-и шаҳри Истаравшан баргузор шуда буд. Даҳҳо мухлиси Юлдуз Усмонова баъд аз консерт гуфтанд, онҳоро фиреб додаанд. Чун ба гуфтаи сокинон дар саҳна на Юлдуз Усмонова, балки нафаре монанд ба ӯ ҳозир шуда, овозхонӣ кардааст.

Мақомот дар пайи расонаӣ шудани хабар ҳодисаро таҳқиқ карданд.

Намояндаи Юлдуз Усмонова ҳам иштироки овозхони машҳурро дар консерте дар Истаравшан рад карда буд.

Масъулони дафтари матбуоти Раёсати корҳои дохилӣ дар вилояти Суғд гуфтанд, ба зидди Саидҷон Ғаниеви 43-сола бар асоси қисми дуи моддаи 247-и Кодекси ҷиноӣ (қаллобӣ аз ҷониби гурӯҳе бо маслиҳати пешакӣ ва расонидани зарари ҷиддӣ ба шаҳрвандон) парванда боз кардаанд. Дар сурати исботи ҷурм Саидҷон Ғаниев мумкин аст то 52 ҳазор сомонӣ ҷарима ва ё то 5 сол зиндонӣ шавад.

Мақомот дар оғози таҳқиқи ҳодиса ӯро боздошт карда буданд, аммо феълан маълум нест, ки ҳанӯз дар боздошт аст ё муваққатан озод шудааст.

Ҳаҷми зарари расондаи Ғаниев ба шаҳрвандон низ расман эълон нашудааст. Ташкилкунандагони консерт гуфта буданд, 100 билетро бо қимати то 350 сомонӣ фурӯхтаанд.

Юлдуз Усмонова, овозхони узбекистонӣ дар Тоҷикистон ҳам ҳаводорони зиёд дорад.

Ахиран маълум шуд, ки рӯзи 25-уми декабри соли 2019 ба ҷойи Юлдуз Усмонова назди мухлисони тоҷики ӯ на зан, балки як мард овозхонӣ кардааст. Ӯ тақлидкори узбекистонӣ Рустамхоҷа Усмонов будааст. Усмонов дар сафҳаи "Инстаграм"-аш эълон кардааст, ки ӯро нафаре бо номи Ҷамшед фиреб дода, ба як шабнишинӣ ба Истаравшан даъват кардааст. Тақлидкор гуфтааст, ӯ фикр намекард, ки иштирокдорони барнома Юлдуз Усмоноваи воқеиро интизоранд.

Юлдуз Усмонова соли гузашта чанд дафъа бо барномаҳои ҳҳунарӣ ба Тоҷикистон омадааст. Ӯ моҳи марти соли 2018 дар консерти муштараки овозхонҳои Тоҷикистону Узбекистон дар Душанбе низ иштирок карда буд.

Тафсилоти консерти Юлдуз Усмоноваи "қалбакӣ" дар инҷост:

Таҳқиқи консерти Юлдуз Усмоноваи "қалбакӣ" дар Истаравшан. Ду нафар бозпурсӣ шуд. САДО

Шоҳиди ҳодисае шудед, ё аксе видеое доред, лутфан, ба ин шумораҳо ва ба воситаи Вотсап, Вайбер, Телеграм ва ё ИМО бифристед: (+420) 607 900 808; (+420) 724 056 681; (+420) 724 053 959; (+992) 980 15 10 10

Бишкек. Талаби озодии боздоштшудаҳои низои ахир дар марз бо Тоҷикистон

Иддае аз сокинони шаҳри Бишкек рӯзи 13-уми январ дар назди бинои порлумони Қирғизистон ҷамъ шуда, озодии чаҳор нафареро талаб карданд, ки дар ҷараёни таниши ахири марзӣ бо Тоҷикистон дар вилояти Бодканд дастгир шуданд.

Иқдоми эътирозиро созмони ҷамъиятии "Марз" ташкил кард. Ташкилкунандагон гуфтанд, пулис касонеро боздошт кардааст, ки "зидди фитнаангезии шаҳрвандони Тоҷикистон садо баланд кардаанд".

"Мо талаб мекунем, ки чаҳор боздоштшуда раҳо карда шаванд. Боздошти онҳо фишори равонӣ ба сокинони Бодканд аст", - гуфт Бекназар Айталиев, раиси созмони "Марз".

Шаби 10-уми январ дар марзи Тоҷикистон бо Қирғизистон низоъ сар зад. Он шаб садои тир шунида шуда, сокинони наздимарзӣ сӯи мошинҳои якдигар сангпартоӣ карданд. Ба иттилои мақомоти қудратӣ, чаҳор сокини Қирғизистон ба далели иғвогарӣ боздошт шудаанд.

Сокинони маҳаллӣ рӯзи 11 январ то нисфи рӯз роҳи мошингарди Ӯш-Бодканд-Исфанаро баста, раҳоии боздоштшудагонро талаб карданд.

Сарҳадбонони Тоҷикистону Қирғизистон рӯзи 12-уми январ гуфтанд, авзоъ дар марзи ду кишвар мураккаб, вале зери назорат боқӣ мемонад ва дигар садои тирандозӣ ба гӯш намерасад. Сарраёсати нерӯҳои марзбонии Тоҷикистон ва Кумитаи марзбонии Қирғизистон гуфтанд, ки посбонон аз ду тарафи марз гаштзаниро идома медиҳанд ва ҷанҷолу кашмакаш дигар дида намешавад.

Аз қасри Гулнора Каримова дар Женева 70 ашёи ҳунариро ба Узбекистон бармегардонанд

Додситонии кулли Узбекистон рӯзи 11-уми январ хабар дод, ки мақомоти ин кишвар ҳамроҳ бо мақомоти Швейтсария, Фаронса, Русия, Латвия ва дигар кишварҳо дар мавриди баргардонии дороиҳои Гулнора Каримова ҳамкорӣ доранд.

"Ҳамроҳ бо додситонии федеролии Швейтсария, бо ҷалби коршиносон аз Узбекистон муайян кардани тааллуқ доштани мероси миллӣ ва баргардонии 70 ашёи ҳунарӣ (расмҳо, ашёи санъатӣ ва ғайра) ба Узбекистон идома дорад, ки дар қасри марбут ба Гулнора Каримова дар шаҳри Женева пайдо шуда буданд",-омадааст дар хабари додситонии Узбекистон.

Пештар аз ин расонаҳо хабар доданд, ки дар манзилҳои марбут ба Каримова дар Узбекистон 985 ашёи ҳунарӣ (расмҳо, сузаниҳо, ороишот, ҷавоҳирот ва ғайра) пайдо шуд, ки мероси миллии фарҳангӣ эътироф шудаанд.

Ҳамаи ин ашё мусодира ва ба ихтиёри давлат супорида шуд.

Додситонии кулли Узбекистон моҳи гузашта хабар дод, ки зидди Гулнора Каримова бо гумони дуздии пули давлат, созиш алайҳи манфиатҳои кишвар ва азхудкунии амволи ғайр ба андозаи махсусан калон парвандаи нав боз шудааст.

Бо қарори додгоҳи вилояти Тошканд аз 18 декабри соли 2017 Гулнора Каримова 10 сол зиндонӣ шуд. 1 июли соли 2018 муҳлати ҳукми вай 5 сол кам шуд.

Ширкатҳои Telia, VimpelCom ва МТС дар маҷмуъ барои ворид шудан ба бозори мобилии Узбекистон ба Гулнора Каримова тақрибан 1 млрд доллар пора додаанд.

Вазорати адлияи ИМА низ Гулнора Каримоваро расман дар порагирӣ ва пулшӯӣ айбдор кард.

Сарвазири Малта ба хотири куштори рӯзноманигор ба истеъфо рафт

Сарвазири Малта Ҷозеф Мускат дар пайи тафтиши пурмоҷарои куштори рӯзноманигор Дафне Каруана Галисия расман аз мақомаш истеъфо дод.

Дафне Каруана Галисия ба таҳқиқи фасодкориҳо машғул буд ва соли 2017 ӯро куштанд. Мошини рӯзноманигор замоне таркид, ки ӯ пушти фармон нишаста буд.

Дар робита ба ин куштор се кас боздошт шуд. Охирҳои соли гузашта соҳибкори маъруфи Малта Йорген Фенекро низ бо гумони даст доштан дар қатли рӯзноманигор дастгир карданд.

Сарвазири ҳамакнун пешини Малта Ҷозеф Мускат ҳанӯз як моҳ пеш гуфта буд, ки моҳи январ аз мақоми худ истеъфо медиҳад. Пештар аз ин сокинон бо талаби истеъфои ӯ даст ба тазоҳурот зада буданд.

Ҳизби ҳокими Малта Роберт Абел, писари сарвазири пешин Ҷорҷ Абелро, ки солҳои 2009-2014 ҳукумати ин кишварро раҳбарӣ кардааст, сарвазири нав интихоб намуд.

Ёфтҳои бештар

Чаро нархи тухми мурғ дар Тоҷикистон гарон шуд?
лутфан мунтазир бошед

Феълан кор намекунад

0:00 0:03:22 0:00
Гузоришҳои радиоӣ
ПОДКАСТ
Чаро нархи тухми мурғ дар Тоҷикистон гарон шуд?
Гузоришҳои радиоӣ

Гузоришҳои видеоӣ

Паёмади мушакборони пойгоҳи амрикоӣ дар Ироқ
лутфан мунтазир бошед

Феълан кор намекунад

0:00 0:00:56 0:00
XS
SM
MD
LG