Бино ба хабари “Азия-Плюс” мурофиаи парвандаи куштори Равшан Шарипов-корманди Бозрасии автомобилии роҳ ба таъхир андохта шудааст. Қарор буд ин мурофиа имрӯз шурӯъ шавад, вале онро ба рӯзи 19 январ гузоштанд. Ҳомид Маъмуров-вакили мудофеи ин парванда гуфт, сабаб ин будааст, ки гумонбарони куштор аз боздоштгоҳи шумораи 1 дар бинои додгоҳи ноҳияи Фирдавсӣ интиқол дода нашудаанд. Одинаев Озодбек ва Мирҷонов Саидмухтор барои зӯргӯӣ бар зидди корманди давлатӣ гунаҳгор дониста мешаванд.

Баъд аз таҳрими ду ширкати калони нафтии Русия аз сӯи Амрико, чанд ширкати бузурги чинӣ хариди нафтро аз Русия бас кардаанд. Дар ин бора пойгоҳи Bloomberg бо такя ба манобеаш хабар дод.

Ба гузориши манбаъ, худдории ширкатҳои чинӣ аз хариди нафти Русия боиси якбора паст шудани нархи нафти ESPO шуд.

Иёлоти Муттаҳида дар моҳи октябр ба далели ҷанги Русия дар Украина алайҳи ширкатҳои русии “Роснефт” ва “Лукойл” таҳрим ҷорӣ кард.

Ба гузориши пойгоҳи Bloomberg, калонтарин ширкатҳои коркарди нафти Чин, аз ҷумла Sinopec ва PetroChina аз хариди нафти Русия даст кашидаанд. Ин ширкатҳои чинӣ аз он тарс доранд, ки ба рӯйхати таҳримҳои Амрико ва Иттиҳоди Аврупо шомил шаванд.

Ахиран Иттиҳоди Аврупо ширкати чинии Shandong Yulong Petrochemical Co.-ро ба рӯйхати сиёҳ шомил кард. Ба ҳисоби Rystad Energy AS баъд аз худдории чанд ширкати калони чинӣ интиқоли нафт аз Русия ба Чин рӯзона то 400 ҳазор бушка дар рӯз кам шудааст.

Дар айни замони Bloomberg менависад, таҳримҳо натиҷаи баръакс ҳам додаанд. Аз ҷумла, ширкати Yulong, ки пештар аз сӯи Аврупо таҳрим шуда буд, пурра ба хариди нафти Русия гузаштааст.

Дар ҳамин ҳол, Туркия ҳам хариди нафтро аз Русия кам кардааст. Иёлоти Муттаҳидаи Амрико кам кардани хариди сӯзишвориро аз Русия бо шариконаш дар Осиё баррасӣ дорад. Русия таҳримҳои Ғарбро ғайриқонунӣ медонад.

Шумораи қурбониёни зилзилаи шаби 3-юми ноябр дар Афғонистон ба 27 нафар расид.

Хабаргузории “Бохтар”, ки зери назорати ҳукумати “Толибон” кор мекунад, гузориш додааст, ки дар пайи зилзила 735 кас осеб дид.

Теъдоди қурбониён ва захмиён метавонад ҳар соат бештар шавад.

Баъзе аз осебдидагон мегӯянд, ин заминларза сахт ва давомдор буд ва барои ҳамин талафоту вайрониҳои зиёде барҷой гузошт.

Забеҳулло Муҷоҳид, сухангӯи ҳукумати “Толибон”, дар шабакаи X навишт, ин заминларза талафоти густурдае дар пай доштааст, аммо оморе пешниҳод накард.

Шаби 2 ба 3-юми сентябр заминларзаи сахте Афғонистон, Тоҷикистон ва Узбекистонро такон дод. Маркази зилзила вилояти Балхи Афғонистон эълон шуд ва қувваи ларзиши замин дар инҷо 6-7 дараҷа эълон шуд.

Кумитаи ҳолатҳои фавқулодаи Тоҷикистон гуфт, қувваи заминларза дар пойтахти Тоҷикистон ба 4 дараҷа ҷадвали Рихтер баробар буд. Мақомоти Тоҷикистон гуфтанд, зилзила ҳеч хисороте дар пай надошт. Иттилои алтернативӣ дар ин бора дастрас нест.

Беш аз 36 ҳазор ғайринизомӣ дар Судон аз шаҳрҳо ва деҳаҳои минтақаи Кордофан дар шарқи Дорфур фирор кардаанд.

Хабаргузории "Франс-Пресс" ба нақл аз Созмони Милал гузориш дод, ки ниманизомиён ҳушдор додаанд, нерӯҳояшон дар ҳоли таҷаммуъ дар хати пеши ҷанг ҳастанд.

Дар ҳафтаҳои охир минтақаи Кордофани Марказӣ ба майдони набарди нав дар ҷанги дусола миёни артиши Судон ва нерӯҳои ниманизомии Ҳимояти сареъ (RSF) табдил шудааст.

Кордофан марказе аст, ки аз аҳамияти стратегӣ бархӯрдор мебошад, зеро миёни вилояти Дорфур ва минтақаи атрофи Хартум, пойтахти Судон, ҷойгир аст.

Густариши доманаи ҷанг дар ин минтақа пас аз он сурат мегирад, ки нерӯҳои Ҳимояти сареъ назорати шаҳри Ал-Фошир ва охирин пойгоҳи артиши Судонро дар Дорфур ба даст гирифтанд.

Созмони байнулмилалии муҳоҷират вобаста ба Созмони Милал дар баёнияе эълон намуд, ки ҳудуди 36 ҳазору 825 нафар аз 26 то 31-уми октябр аз панҷ ноҳияи Кордофани Шимолӣ беҷо шудаанд.

Созмони ҳуқуқи башар ҳам нерӯҳои Ҳимояти сареъ ва ҳам артиши Судонро ба иртикоби ҷиноятҳои ҷангӣ муттаҳам мекунанд.

Баъди таҳрими ду ширкати калони нафтии Русия аз сӯи Амрико, чанд ширкати бузурги чинӣ хариди нафтро аз Русия бас кардаанд. Дар ин бора пойгоҳи Bloomberg бо такя ба манобеаш хабар додааст.

Ба гузориши манбаъ, худдории ширкатҳои чинӣ аз хариди нафти Руся боиси якбора паст шудани нархи нафти ESPO шуд. Моҳи октябр ИМА ба далели ҷанги Русия дар Украина алайҳи ширкатҳои русии “Роснефт” ва “Лукойл” таҳрим ҷорӣ кард.

Ба гузориши пойгоҳи Bloomberg, калонтарин ширкатҳои коркарди нафти Чин, аз ҷумла Sinopec ва PetroChina аз хариди нафти Русия даст кашидаанд. Ин ширкатҳои чинӣ аз он тарс доранд, ки ба рӯйхати таҳримҳои Амрико ва Иттиҳоди Аврупо шомил шаванд.

Ахиран Иттиҳоди Аврупо ширкати чинии Shandong Yulong Petrochemical Co.-ро ба рӯйхати сиёҳ шомил кард. Ба ҳисоби Rystad Energy AS баъди худдории чанд ширкати калони чинӣ, интиқоли нафт аз Русия ба Чин рӯзона то 400 ҳазор бушка дар рӯз кам шудааст.

Bloomberg менависад, таҳримҳо ҳамзамон натиҷаи баръакс ҳам додаанд. Аз ҷумла, ширкати Yulong, ки қаблан аз сӯи Аврупо таҳрим шуда буд, пурра ба хариди нафти Русия гузаштааст.

Дар ҳамин ҳол Туркия ҳам хариди нафт аз Русияро кам кардааст.

Иёлоти Муттаҳидаи Амрико кам кардани хариди сӯзишворӣ аз Русияро бо шариконаш дар Осиё баррасӣ дорад.

Русия таҳримҳои Ғарбро ғайриқонунӣ медонад.

Дидбони Ҳуқуқи Башар (Human Rights Watch) аз ширкатдорони нишасти президентҳои Осиёи Марказӣ ва Амрико даъват кард, ки дар баробари ҳамкориҳои иқтисодию амниятӣ, ба беҳбуди вазъи ҳуқуқи башар дар ин кишварҳо низ тамаркуз кунанд.

Даъвати ин созмон рӯзи 3-юми ноябр, се рӯз пеш аз баргузории дидори президентҳои Тоҷикистон, Узбекистон, Қирғизистон, Қазоқистон ва Туркманистон бо раисҷумҳури Амрико Доналд Трамп дар Вашингтон нашр шуд.

Дидбони Ҳуқуқи Башар (Human Rights Watch) мегӯяд, ҷаласа дар чаҳорчӯби С5+1 дар ҳоле барпо мешавад, ки кишварҳои ширкатдор “саркӯби мухолифону матбуот ва қасосгирӣ аз мунтақидонро дар дохилу беруни кишварҳояшон афзоиш додаанд”.

Ҳю Уилямсон, раҳбари бахши Аврупо ва Осиёи Марказӣ дар Дидбони Ҳуқуқи Башар (Human Rights Watch) мегӯяд, “ҷаласаи Осиёи Марказӣ ва Амрико бояд мавзӯи ҳуқуқи инсонро ба бахши калидии ин нишаст табдил диҳад, чун саркӯбҳо дар саросари ОМ дар ҳоли афзудан аст”.

Уилямсон ёдовар шудааст, ки гузориши Департаменти давлатии Амрико дар бахши ҳуқуқи инсон (2025) аз бадтар шудани вазъи ҳуқуқи одамон дар кишварҳои Осиёи Марказӣ, бадрафторӣ бо зиндониҳо, шиканҷа, боздоштҳои худсарона ва ҳабсу фишори кормандони матбуот ва ҷомеаи шаҳрвандӣ изҳори нигаронӣ мекунад.

Дар ин изҳорот дар бораи Тоҷикистон гуфта шудааст, ки садҳо созмони иҷтимоӣ баста шуда, даҳҳо блогеру рӯзноманигор ва фаъолони маданӣ зиндонӣ шудаанд; чанд созмони сиёсӣ, аз ҷумла ҲНИТ ва Гурӯҳи 24 баставу мамнӯъ ҳастанд; мақомот эътирозҳои осоиштаро дар ВМКБ дар солҳои 2021 ва 2022 бераҳмона саркӯб намуданд.

Ба навиштаи Дидбони Ҳуқуқи Башар (Human Rights Watch), давоми соли 2025 панҷ эътирозгари зиндонӣ дар маҳбас ҷон додаанд.

Бар асари зилзилаи шаби 2 ба 3-юми ноябр дар Афғонистон беш аз бист нафар ҷон бохта, садҳо тани дигар маҷруҳ шудаанд.

Сухангӯйи Вазорати беҳдошти ҳукумати “Толибон” дар Афғонистон теъдоди қурбониёнро дар вилоятҳои Балху Самангон камаш 20 нафар ҳисоб кард.

Хабарнигори “Франс-Пресс” дар Мазори Шариф, маркази маъмурии вилояти Балх, мегӯяд, зилзилаи баробар бо 6,3 дараҷа сокинони шаҳрро ба даҳшат овард ва бисёриҳо ба кӯча баромаданд.

Масҷиди Кабуди Мазори Шариф, ки дар асри 15 бунёд шудааст, зиён дид. Пораҳои бинои масҷид ва манораҳояш фурӯ рехтаанд.

Дар гузашта мухобироти заиф ва душвории равуо дар минтақаҳои кӯҳии Афғонистон амалиёти наҷоти қурбониҳоро душвор карда буд.

Моҳи августи имсол дар натиҷаи зилзилаи қавӣ дар шарқи Афғонистон беш аз 2200 нафар ҷон бохта, наздик ба 4000 тани дигар захмӣ шуданд.

Иззатулло Шарифзода, маъруф бо лақаби "Зорро", сардори пешини Идораи зиндонҳо дар Тоҷикистон, дар 72-солагӣ даргузаштааст.

Дар ин бора Раёсати умури дохилии шаҳри Душанбе, ки аз соли 1997 то 2005 раҳбарияшро бар уҳда дошт, рӯзи 3-юми ноябр хабар дод.

Иллати марги Шарифзода расман эълон нашудааст.

Ӯ дувоздаҳ сол дар мақоми сардори Идораи зиндонҳо, як ниҳоди тобеи Вазорати адлия кор кард. Соли 2018 ва пас аз чанд моҳи ошӯби хунин дар зиндони шаҳри Хуҷанд, ки зиёда аз бист кушта барҷой гузошт, аз мансаб барканор шуд.

Дар замони раҳбарии Иззатулло Шарифзода шикоят аз фасод дар зиндонҳо ва шиканҷаи маҳбусон зиёд расонаӣ гаштааст. Марги Ҳамза Икромзода дар соли 2012 дар маҳбас ин баҳсро доғ кард.

Пайвандони Икромзода гуфтанд, ки дар бадани ӯ осори марги маҷбурӣ бо истифода аз уту ё дарзмоли тафсон мушоҳида шудааст. Ҳарчанд Иззатулло Шарифзода гуфта буд, "кор бе камбуд намешавад", шиканҷаи зиндониёнро бо нерӯи барқ рад кард.

Вай аз соли 2018 бознишаста буд.

Аваз Назарзода, додситони вилояти Хатлон, бо иттиҳоми "кирдоре, ки шаъну шарафи корманди мақомоти ҳифзи ҳуқуқро паст мезанад", аз мансаб озод ва аз мақомоти Прокуратура (Додситонӣ) ронда шудааст.

Дафтари матбуоти президенти Тоҷикистон рӯзи 3-юми ноябр "риоя накардани санадҳои меъёрию ҳуқуқии соҳавӣ"-ро аз далелҳои дигари тасмим донист.

Маълум нест, ки Назарзода бо чӣ кор ё рафторе шаъну эътибори мақомоти ҳифзи ҳуқуқро дар Тоҷикистон паст задааст, аммо дар гузашта баъди ингуна тасмимҳо чанд додрас барои ришвахорӣ ба додгоҳ кашида шуда, ҷазо гирифтаанд.

Аваз Назарзода дар моҳи январи соли 2024 додситони вилояти Хатлон таъйин шуда буд. Аз он пеш дар мақоми додситони Вилояти Мухтори Кӯҳистони Бадахшон кор кардааст. Пеш аз он додситони шаҳрҳои Панҷакент ва Хуҷанд буд.

Назарзода баъд аз он додситони Хатлон таъйин шуд, ки ​бо амри президенти Тоҷикистон роҳбарони ниҳодҳои қудратии вилояти Хатлонро барои бесалоҳиятӣ аз кор ронданд.

Рӯзи 3-юми ноябр ҳамчунин додситонҳои вилоятҳои Бадахшон, Суғд ва шаҳру ноҳияҳои Хоруғ, Хуросон, Балҷувон, Шаҳритус, Зафаробод, Спитамен, Деваштич, Рашт, Файзобод ва додситони ҳарбии минтақаи Рашт иваз шуданд.

Бо қарорҳои ҳукумат раиси Оҷонси меҳнат ва шуғли аҳолӣ низ барканор шуда, муовини вазири энергетика, ду муовини Хадамоти алоқа ва ректорони чанд донишгоҳ нав шуданд.

Роҳбарони вилоятҳои Суғди Тоҷикистон ва Бодканди Қирғизистон 3-юми ноябр як роҳро дар марзи байни ду кишвар боз карданд. Роҳе, ки ҷамоатҳои Зумрад ва Сурхи Исфараро пайваст мекард, қаблан аз миёни деҳаи Қаробоғи Қирғизистон мегузашт.

Акнун он бе гузаштан аз ҳудуди ин деҳа ду минтақаро ба ҳам мепайвандад.

Сокинони ҷамоатҳои Чоркуҳ, Сурх ва Ворух то соли 2014 аз ин роҳ мегузаштанд, вале баъди як даргирии марзӣ он барои шаҳрвандони Тоҷикистон баста шуд.

Тоҷикистону Қирғизистон баъди чандин ҷангу муноқиша дар марз моҳи марти имсол бар сари хатти он ба созиш расиданд.

Мақомоти тоҷик ҷузъиёти созишномаи марзиро бо Қирғизистон ошкор намекунанд, вале бархе аз мақомдорони Қирғизистон қисман ин масъаларо шарҳ дода, гуфта буданд, ҷонибҳо ба хулосае омадаанд, чанд роҳу деҳаи аҳолинишнро бо ҳам иваз карданд.

Дар пайи заминларзаи субҳи 3-юми ноябр хатҳои интиқоли барқ аз Узбекистон ва Тоҷикистон ба Афғонистон хароб шуда, чанд вилояти Афғонистон бе барқ мондаанд.

Хабаргузории "Хома" аз қавли ширкати "Брешно" навишт, хати интиқоли барқ аз Тоҷикистон ба Кундуз тахриб шуда, сокинони шаҳри Кобул ҳам феълан барқ надоранд.

Кумитаи ҳолатҳои фавқулодаи Тоҷикистон шиддати заминларзаро дар шаҳри Душанбе 4 дараҷа гуфт, аммо дар мавриди пайомадҳои он, аз ҷумла вайрон шудани хати интиқоли барқ чизе нагуфт. Намояндагони ширкати "Барқи тоҷик" ҳам дар ин бора чизе нагуфтаанд.

Ширкати "Брешно" гуфтанд, бо вуҷуди талошҳои зиёди мутахассисон хатҳои интиқоли барқ барқарор нашуданд.

Шаби 2 ба 3-юми ноябр заминларзаи сахте Афғонистон, Тоҷикистон, Узбекистон ва Покистонро такон дод. Маркази ин заминларза шаҳри Балхи Афғонистон эълон шуд ва қувваи зилзила дар инҷо ба 6-7 балл будааст. Заминларза сабаби марги чанд кас дар Афғонистон шуд.

Афғонистон як бахши асосии барқи мавриди ниёзашро аз Узбекистон ва Тоҷикистон мехарад. Фурӯши барқ ба Афғонистон интиқодро дар дохили Тоҷикистон ба миён овардааст, чун бештари сокинон дар тирамоҳу зимистон бо маҳдудият барқ мегиранд. Мақомоти Тоҷикистон гуфтанд, асосан дар фасли тобистон ва замони фаровон будани об дар обанборҳои Тоҷикистон ба Афғонистон барқ медиҳанд. Назаре, ки бархеҳо ба он шубҳа доранд.

Шаби 2 ба 3-юми ноябр заминларзаи сахте Тоҷикистон ва чанд кишвари минтақаро такон дод.

Ба иттилои Хадамоти геофизикии Академияи илмҳои Тоҷикистон, зилзила соати 1:29 ба вақти Душанбе рух дода, қувваи заминларза дар пойтахт 4 ва дар Панҷакент 3 баллро ташкил дод.

Манбаъ мегӯяд, маркази заминларза дар ҳудуди Афғонистон буд. Қувваи заминларза дар марказаш 6-7 балл гузориш шудааст.

Маркази заминшиносии Амрико навиштааст, маркази зилзила вилояти Балхи Афғонистон буд. Ларзиши замин дар Афғонистон, Тоҷикистон, Узбекистон, Туркманистон ва Покистон ҳам сабт шудааст.

Баъзе сокинони шаҳри Душанбе аз тарси такрори заминларза нимашаб ба берун баромадаанд. Сокинон мегӯянд, дар чанд соли ахир чунин заминларзаи сахтеро надида буданд. Кумитаи ҳолатҳои фавқулодаи Тоҷикистон навиштааст, ин ҳодиса хисорот ва талафот дар пай надошт.

Расонаҳо аз марги 7 нафар дар Афғонистон гузориш додаанд. Мақомоти Толибон гуфтанд, омор дар бораи талафотро давоми рӯз нашр мекунанд.

Баъзе сокинон аз тарс ба берун баромадаанд:

Тоҷикистон дар яке аз минтақаҳои зилзилахези қораи Осиё ҷойгир аст. Ҳар сол дар кишвар садҳо заминларза сабт шуда, дар натиҷаи он баъзе аз манзили сокинон вайрон мешавад.

Аз ҷумла, бар асари зилзилаи рӯзи 13-уми апрели имсол дар ноҳияҳои Рашт ва Тоҷикобод 94 хона пурра ва 50 хона қисман вайрон шуда, ба 61 манзил осеби сабук расид.

Инчунин, се мактаб ва тақрибан дусад иншооти иҷтимоӣ, аз ҷумла чойхонаву бунгоҳи тиббӣ зарар дидаанд. Як сокини хурдсоли ноҳияи Рашт дар ин ҳодиса ҷон бохт.

Хабар давоми рӯз такмил мешавад:

Украина барои ҳимоят аз фазои худ аз Олмон низоми зиддимушакии "Патриот" дарёфт кардааст.

Президент Владимир Зеленский 2-юми ноябр дар як паёми видеоӣ аз садри аъзами Олмон Фридрих Мертс миннатдорӣ кард.

Ба гуфтаи Зеленский, гуфтугуҳо барои мустаҳкам кардани низоми зиддиҳавоии Украина ҳам дар сатҳи сиёсӣ ва ҳам бо тавлидкунандагон идома дорад.

Рӯзи 1-уми ноябр лоиҳаи "Кӯмаки Олмон ба Украина" дар шабакаи X навишт, Украина "дар рӯзҳои наздик" ду низоми зиддимушакии "Патриот" мегирад. Маблағи ин низоми дифои ҳавоиро Дания, Литва ва Норвегия пардохт кардаанд.

Моҳи июли имсол Борис Писториус, вазири дифои Олмон гуфта буд, Украина ба панҷ низоми дифои ҳавоии "Патриот" эҳтиёҷ дорад.

Раиси ҷумҳури Украина тобистони имсол аз ИМА хоста буд, ба Киев 10 низоми зиддимушакии "Патриот" бидиҳад. Президенти Амрико аз омодагии кишвараш барои интиқоли 17 низоми "Патриот" ба Украина хабар дод, вале гуфт маблағи онро кишварҳои аврупоӣ мепардозанд.

Мақомоти Тоҷикистон канда шудани пораи азиме аз як пиряхи бузург дар қаторкӯҳҳои Исмоили Сомониро шарҳ доданд. Ҳодиса 25-уми октябр дар ҳудуди ноҳияи Тоҷикобод рух дод.

Намояндагони Оҷонсии ҳавошиносии Тоҷикистон 31-уми октябр дар нишасти хабарӣ бо ҳузури намояндагони расонаҳои ҳукуматӣ гуфтаанд, сабаби асосии канда шудани пирях "баландшавии ҳарорати ҳаво ва набудани боришот дар давраи тӯлонӣ мебошад".

Мутахассисон гуфтаанд, ин ду омил "ба обшавии шадиди пирях ва тағйири тавозуни обӣ оварда расонидааст".

Дар Оҷонсии ҳавошиносии Тоҷикистон гуфтаанд, дарозии пиряхи ҷудошуда 1,5 километр буда, баландиаш 50 метр буд.

Дар шабакаҳои иҷтимоӣ наворҳои видеоӣ аз ҳаракати ин пирях нашр шуд.

Ба иттилои мақомоти тоҷик ин ҳодиса талафоти ҷонӣ ва хисороти дигар дар пай надоштааст. Аммо ба гуфтаи мутахассисон, бар асари бориши боронҳои сахт ва такроран кандани пирях аз баданаи пиряхи бузург, он метавонад ба бархе деҳаҳои ҷамоати деҳоти Қалъаи Лаби Об хатар дошта бошад.

Дар Тоҷикистон беш аз 14 ҳазор пирях вуҷуд дорад. Тоҷикистони кӯҳистонӣ бо пиряхҳои хурду бузургаш манбаи аслии об дар Осиёи Марказӣ аст, вале дар 30 соли ахир ба сабаби гармоиши курраи Замин бештар аз 1000 пирях комилан аз байн рафтаанд.

Мақомоти низомии Украина гуфтанд, ки нерӯҳои ин кишвар то ҳол ба ҳамлаҳои шадиди сарбозони Русия дар Покровск дар шарқи Украина муқовимат мекунанд.

Фармондеҳи нерӯҳои мусаллаҳи Украина Александр Сирский рӯзи 1-уми ноябр дар саҳифааш дар Фейсбук навишт, амалиёти фарогир барои берун кардани нерӯҳои душман аз Покровск идома дорад.

Ин изҳорот як рӯз баъди он садо дод, ки раисҷумҳури Украина Владимир Зеленский муборизаро барои шаҳри Покровск муҳим хонд.

Вай рӯзи 31-уми октябр гуфт, русҳо мехоҳанд он кореро, ки ба Покровск, Копянск ва шаҳру вилоятҳои дигар раво диданд, ба тамоми Украина бикунанд.

Бино ба ҳисобҳо, дар ҳоли ҳозир аз 200 то 400 сарбози рус дар канораҳои шарқии шаҳри Покровски вилояти Донетск ҷойгир шудаанд. Онҳо бо истифода аз муҳити шаҳр, зерзаминҳо ва либоси шаҳрвандӣ талош доранд, ки аз дасти нерӯҳои украинӣ дар амон монанд.

Покровск ба мисли шаҳрҳои дигари бузурги Украина аҳамияти зиёди низомӣ дорад. Таҳлилгарон ҳушдор додаанд, ки вожгунии ин шаҳр метавонад роҳро барои нерӯҳои Русия ба ғарби Украина боз кунад ва ҷануби Украинаро зери хатар бигузорад.

Додгоҳи ноҳияи Октябр дар вилояти Рязани Русия хабарнигори таҳқиқгар Сергей Ежовро дар ғайбаш ба шаш сол зиндон маҳкум кард.

Мақомоти Русия ӯро барои сарпечӣ аз иҷрои қонуни "агентҳои хориҷӣ" ва ширкат дар фаъолияти созмонҳои ифротгаро ва сармоягузории экстремизм гунаҳкор донистаанд.

Манзури мансабдорони Русия аз "фаъолиятҳои экстремистӣ" ишора ба Бунёди мубориза бо фасоди молӣ аст, ки Сергей Ежов бо он ҳамкорӣ дорад.

Ҳамзамон ба навиштаи хабаргузории расмии "РИА Новости", ӯ гуё аз Эстония паноҳандагии сиёсӣ дархост кардааст.

Ежов дар суҳбат бо телевизиони "Настояшее Время", як тарҳи Радиои Аврупои Озод/Радиои Озодӣ гуфт, аз Эстония паноҳандагӣ напурсидааст ва бо ин кишвар ҳеч пайванд надорад.

Ӯ ба ҷуз аз Бунёди мубориза бо фасоди молӣ, инчунин, бо пойгоҳи таҳқиқотии The Insider ҳамкорӣ мекунад ва блоги шахсии худро низ дорад.

Ин хабарнигори дигарандеш дар матлабҳояш дар бораи кормандони ниҳодҳои ҳифзи ҳуқуқ ва Вазорати адлияи Русия низ гап мезанад, ки ба таҳияи номгӯйи "агентҳои хориҷӣ" машғул ҳастанд.

Вазорати адлияи Русия Сергей Ежовро дар моҳи июли соли 2024 ба феҳрасти “агентҳои хориҷӣ” ворид кардааст.