Кумиссиёни марказии интихоботи Қазоқистон гуфт, Нурсултон Назарбоев, раиси ҷумҳури феълӣ дар интихоботи рӯзи 26-уми апрел 97.7 дар сади раъйи мардумро ба даст овард ва ҳамингуна барои даври панҷум раиси ҷумҳури Қазоқистон мемонад. Қувондиқ Турганқулов, раиси Кумиссиёни марказии интихобот, рӯзи 27-уми апрел гуфт, ки дар интихобот 95.22 дар сади мардум ширкат кардаанд. Нурсултон Назарбоев, ки бештар аз 25 сол аст, ки дар Қазоқистон ҳукумат мекунад ва дар ин муддат рақибонашро канор зада ва матбуотро низ зери назорати сахт гирифтааст. Ду рақиби Назарбоев дар интихобот ҳам сиёсатмадороне буданд, ки сиёсатҳои ӯро дастгирӣ мекунанд. Нурсултон Назарбоев ҳангоми раъйдиҳӣ гуфт, ки интихоби ӯ, ба маънии идомаи суботу инкишофи Қазоқистон аст. Мухолифонаш мегӯянд, ки Нурсултон Назарбоев бо саркӯби дигарандешӣ, матбуоти мустақил ва тағйири «ғайриқонунии» конститутсия сари қудрат мондааст.

Ҳавошиносони тоҷик аз боронгариҳои сахт, омадани сел ва раъду барқ дар рӯзҳои 10-11 май ҳушдор доданд. Оҷонсии ҳавошиносии Тоҷикистон мегӯяд дар ин рӯзҳо дар бештари минтақаҳои кишвар ба ҷуз, шарқи ВМКБ, ҳавои номусоид пешбинӣ шудааст.

Аз ҷумла, боронгариҳои сахт дар Душанбе, Варзоб, Ҳисор, Рӯдакӣ, Ёвон, Ваҳдат, Файзобод, Рашт, Нуробод, Тавилдара, Лахш, Панҷакент, Данғара, Восеъ, Балҷувон, Темурмалик, Кӯлоб, Ховалинг, Муъминобод, Шамсиддин Шоҳин ва Дарвоз дар назар аст.

Ба иттилои Оҷонси ҳавошиносии Тоҷикистон, дар ин рузҳо бинобар боронгариҳои зиёд эҳтимол дорад сатҳи оби рӯдхонаҳои Зарафшон, Обихингов, Вахш, Ёхсу, Қизилсӯ ва дарёҳое, ки аз қаторкӯҳҳои Ҳисор ҷорӣ мешаванд, боло равад.

Оҷонсӣ ба мардум тавсия додааст, ки дар ин рузҳо аз чораҳои эҳтиётӣ кор бигиранд ва ҷуйбору селроҳаҳоро пок кунанд. Ба сокинони минтақаҳои куҳистонӣ тавсия шудааст, ки дар ин рӯзҳо аз рафтан ба ҷамъоварии ҳезум, алаф, гиёҳҳои шифобахш ва моҳигирӣ, худдорӣ кунанд.

Ҳушдори ҳавошиносон дар ҳолест, ки Тоҷикистон рӯзҳои 1-4 май шоҳиди боронҳои зиёд ва омадани сел буд. Дар пайи ин офати табиӣ ҳадди ақал 4 нафар ба ҳалокат расида, панҷ каси дигар бистарӣ шудаанд. Садҳо хонавода дар саросари кишвар зиёни моддӣ диҳанд.

Эмомалӣ Раҳмон, раисҷумҳури Тоҷикистон рӯзи 9 май дар Душанбе дар маросими таҷлил аз Рӯзи ғалаба иштирок кард. Ин маросим дар боғи Ғалабаи пойтахт доир шуд.

Тибқи иттилои расмӣ, дар ин маросим мақомоти давлатӣ, собиқадорони ҷанг, намояндагони ниҳодҳои дипломатии муқими Душанбе ва Пойгоҳи низомии 201-и Русия дар Тоҷикистон, иштирок доштанд.

Солҳои Ҷанги дуюми ҷаҳон аз Тоҷикистон тахминан 300 ҳазор нафар ба ҷанг сафарбар шуданд ва сеяки онҳо барнагаштанд. 65 зодаи Тоҷикистон унвони Қаҳрамони Иттиҳоди Шӯравиро гирифтаанд.

Дар гузашта мақомот дар Тоҷикистон таъкид кардаанд, ки ғалаба дар Ҷанги дуюми ҷаҳон бо баҳои ҷонсупориҳои даҳҳо ҳазор сарбоз аз Тоҷикистон ва дигар ҷумҳуриҳои шӯравии собиқ ҳам ба даст омадааст.

Эмомалӣ Раҳмон яке аз ширкатдорони доимии ҷашнҳои Рӯзи ғалаба дар Маскав ҳатто баъди шурӯи ҷанги Русия алайҳи Украина буд. Аммо ба иттилои манбаъҳо дар ҳукумати Тоҷикистон, ӯ имсол дар ҷашнҳои Рӯзи ғалаба дар Маскав иштирок намекунад.

Манбаъҳо дар вилояти Бадахшони Афғонистон мегӯянд, ки афроди ҳукумати Толибон бо мардуми маҳал бар сари тахриби киштзорҳои кӯкнор даргир шуданд. Ин даргирӣ рӯзи ҷумъа, 8 май дар деҳаи Отанҷилави ноҳияи Аргу, рух додааст.

Ба гуфтаи як манбаи Радиои Аврупои Озод/Радиои Озодӣ, даргирӣ замоне оғоз шуд, ки мардуми маҳал монеи тахриби киштзорҳои кӯкнор шуданд.

Як манбаи огоҳ дар маҳал, ки бинобар ҳассосияти мавзӯъ нахост номаш гирифта шавад, ба Радиои Озодӣ гуфт, ки дар ин даргирӣ як кӯдак кушта шудааст. Бархе расонаҳо ҳам аз кушта шудани як кӯдак дар ин даргириҳо навиштанд.

Мақомоти ҳукумати Толибон дар вилояти Бадахшон ба пурсиши Радиои Озодӣ дар мавриди ин ҳодиса посух надоданд.

Пеш аз ин ҳам мардуми маҳал дар ноҳияҳои мухталифи Бадахшон барои пешгирӣ аз тахриби киштзорҳои кӯкнор бо афроди Толибон даргир шуданд.

Чунин даргирӣ соли гузашта миёни афроди Толибон ва мардуми маҳал дар ноҳияи Хош рух дода буд. Масъулини Толибон он замон бе ироаи омори мушаххас тасдиқ карданд, ки ин даргириҳо талафоте доштааст.

Аммо манбаъҳои ғайрирасмӣ гуфтанд, ки дар ин даргириҳо дастикам 15 сокини маҳаллӣ кушта ва 60 нафар захмӣ шуданд.

Раҳбари Толибон дар моҳи апрели соли 2022 кишти кӯкнор, тавлид ва қочоқ тарёкро ғайриқонунӣ эълон кард.

Омори наве аз мизбони кишти кӯкнор дар Афғонистон нашр нашудааст. Аммо гузориши СММ нишон медиҳад, ки дар кишти кӯкнор дар ин кишвар дар соли 2025 нисбат ба соли қабли он 20 дарсад коҳиш ёфтааст.

Дар пайи ҳамлаи паҳпод ё ҳавопаймоҳои бесарнишин ба Ростови лаби Дон, кори 13 фурудгоҳ дар ҷануби Русия маҳдуд шуда, даҳҳо парвоз бекор шудааст.

Вазорати нақлиёти Русия гуфт, ин тасмим баъди ҳамлаи паҳподҳо ба идораи маъмурии корхонаи Аэронавигатсия дар ҷануби Русия гирифта шуд.

Ба ин тартиб, кори фурудгоҳҳои Астрахан, Владикавказ, Волгоград, Гелендҷик, Грозний, Краснодар, Махачқалъа, Магас, Минералние Водий, Налчик, Сочи, Ставропол ва Элиста муваққатан маҳдуд шуд. Дертар хабар расид, ки дар кори фурудгоҳи Внуковои Маскав ҳам мушкил пеш омадааст.

Ба иттилои Асотсиатсияи ширкатҳои сайёҳии Русия, дар пайи мушкил шудани кори фурудгоҳҳо дар ҷануби Русия, зиёда аз 80 парвоз бекор ё ба таъхир гузошта шуданд. Телеграм канали Mash, аз таъхири 184 парвоз хабар додааст.

Вазорати корҳои хориҷии Чин хабар дод, ки президенти Тоҷикистон бо як сафари давлатӣ ба ин кишвар меравад.

Дар хабарномаи ин ниҳод рӯзи 8-уми май гуфта шудааст, ки сафар бо даъвати президенти Чин Си Ҷин Пин рӯзҳои 11 то 14-уми май сурат мегирад.

Дар ин хабар маълумоти бештаре дар бораи барномаи сафари президенти Тоҷикистон чизе гуфта нашудааст.

Мақомоти Тоҷикистон ҳам дар ин бора шарҳе надодаанд.

Чин аз сармоягузорони аслӣ ба иқтисоди Тоҷикистон ба шумор меравад ва қарзи Душанбе аз Пекин бештар аз 700 миллион долларро ташкил медиҳад. Қарзҳои зиёди Чин қаблан нигарониҳоеро ба миён овардааст.

Тоҷикистон ва Чин тақрибан 500 километр марзи муштарак доранд.

Абдуллобек Қувватбеков, маъруф ба Мавлавӣ Абдуллои Язгуломӣ, як рӯҳонии тоҷик, баъди панҷ сол аз зиндон озод шудааст.

Ду нафар аз пайвандони ин рӯҳонӣ 8-уми май ба Радиои Озодӣ гуфтанд, Мавлавӣ Абдуллои Язгуломӣ чор рӯз пеш озод шуд ва ҳоло дар назди пайвандонаш аст.

"Ӯ панҷ сол муҳлати ҷазоро пурра адо кард ва баъд озодаш карданд", - гуфт яке аз наздикони ин рӯҳонӣ.

Дар наворе, ки ба дасти Радиои Озодӣ расид дида мешавад, ки ин рӯҳониро шабона ба хонааш овардаанд.

Мавлавӣ Абдуллои Язгуломӣ моҳи июни соли 2021 дар шаҳри Душанбе боздошт шуд ва се моҳ пас додгоҳ ӯро барои “даъват ба ифротгароӣ тариқи интернет” ба панҷ сол зиндон маҳкум кард. Ду шогирди ин рӯҳонӣ чорунимсолӣ аз озодӣ маҳрум шуда буданд. Наздикони Мавлавӣ Абдуллоҳ он вақт ҳукмро ноодилона хонданд.

Мавлавӣ Абдуллои Язгуломӣ зодаи ҷамоати Язғуломи ноҳияи Ванҷ буда, дар ин ноҳия аз эътибори хос бархӯрдор аст. Наворҳои зиёде аз маъвизаҳои ӯ дар шабакаҳои иҷтимоӣ нашр шудааст, вале дар ниҳоят маълум нашуд, ки кадом аз онҳоро мақомот "даъват ба ифротгароӣ" унвон карданд.

Тайи солҳои ахир шумори зиёде аз зодагони Язгулом ба иттиҳоми "ифротгароӣ" маҳкум ба зиндон шудаанд.

Аз ҷумла, Додгоҳи олии Тоҷикистон дар моҳи декабри соли 2024-ум 31 нафарро аз ҷамоати Язгуломи ноҳияи Ванҷ аз 2 то 23 сол ҳабс маҳкум кард. 27 нафари онҳо дар ноҳияи Ванҷ дастгир шуда, чор тани дигарро аз хориҷ овардаанд.

Соли гузашта ҳам Додгоҳи ноҳияи Исмоили Сомонӣ беш аз 10 зодаи Язгуломро ба муҳлатҳои гуногун маҳкум ба зиндон кард.

Язгулом ҷамоате дар ноҳияи Ванҷ аст, вале баъзе аз зодагонаш дар пойтахт ва гӯшаҳои дигари Тоҷикистон кору зиндагӣ мекунанд.

Ҳамсари Абдусалом Мафтун, як овозхони шинохтаи маҳаллӣ дар вилояти Бадахшони Афғонистон субҳи 7 май аз сӯи афроди мусаллаҳ кушта шудааст. Абдусалом Мафтун аз пайвандон ва шогирдони маҳаллихони шинохтаи Афғонистон Мир Мафтун мебошад.

Як манбаъ бо фиристодани наворе аз маросими ҷанозаи ин зан гуфт, ки Лайламо бо кӯдаки хурдсолаш ба тарафи бозори вижаи занон дар ноҳияи Ишкошими Бадахшон дар ҳаракат буд, ки ҳадаф қарор гирифт ва пас аз интиқол ба бемористон, ҷон бохт. Кӯдаки ӯ аз ин ҳамла ҷони солим ба дар бурдааст.

Ба гуфтаи манбаъҳо, Лайламо дар ин бозор мудири як қаҳвахона ва масъули коргоҳи дӯзандагӣ буд, ки аз тарафи Бунёди Оқохон таъсис шуда буд.

То кунун ҳеч кас ё гурӯҳе масъулияти ин ҳодисаро ба ӯҳда нагирифтааст. Бархе расонаҳо навиштаанд, ки як нафар дар робита ба ин ҳодиса боздошт шудааст.

Ин ҳодиса дар ҳоле рух медиҳад, ки тибқи гузоришҳои СММ ва ниҳодҳои ҳуқуқи башар, хушунат алайҳи занон дар Афғонистони зери ҳокимияти Толибон ба таври қобили таваҷҷуҳ афзоиш ёфтааст.

Бар асоси гузориши ҳайати намояндагии СММ дар Афғонистон, ки ба муносибати Рӯзи ҷаҳонии мубориза бо хушунат алайҳи занон дар моҳи ноябри соли 2025 нашр шуд, хушунат алайҳи занон ва духтарон дар Афғонистон 40 дарсад афзоиш ёфтааст.

Мақомоти Русия расман тасдиқ карданд, ки рӯзи 9-уми май дастрасӣ ба интернети мобилӣ дар шаҳри Маскав пурра маҳдуд карда мешавад.

Вазорати рушди рақамии Русия дар хабарномае навишт, бо мақсади таъмини амнияти чорабиниҳои идона, дастрасӣ ба интернети мобилӣ ва ирсоли паёмак ё SMS дар Маскав муваққатан маҳдуд карда мешавад.

Дар иттилоияи расмӣ ҳамчунин таъкид шудааст, ки дар сурати пайдо шудани таҳдидҳо дар пойтахти Русия, рӯзҳои 7 ва 8-уми май низ мумкин аст интернет "ба таври фаврӣ" маҳдуд карда шавад.

Ширкатҳои мухобиротӣ ҳанӯз аз 4 май ба муштариён дар шаҳрҳои Маскав ва Санкт-Петербург ҳушдор дода буданд, ки аз 5 то 9-уми май мумкин аст иртиботи мобилӣ маҳдуд шавад.

Вазорати дифои Русия рӯзи 4-уми май аз оташбаси якҷониба барои рӯзҳои 8–9 май хабар дод. Президенти Украина Владимир Зеленский муҳлати оташбасро 6-уми май таъйин кард, ки ба гуфтаи Киев, аз ҷониби Русия нақз шуд.

Шаби 7-уми май Русия мавриди ҳамлаи густурдаи паҳподҳо қарор гирифт. Вазорати дифои Русия хабар дод, ки 347 паҳподи украинӣ нобуд карда шудаанд.

Ба гуфтаи шаҳрдори Маскав Сергей Собянин, нерӯҳои мудофиаи ҳавоӣ дар болои Маскав беш аз 20 паҳподро сарнагун кардаанд.

Дар се моҳи аввали имсол 6236 соҳибкор аз фаъолият даст кашидаанд ва ё ба кори дигаре машғул шудаанд. Дар ин бора Оҷонсии омор хабар додааст.

Ба иттилои манбаъ, аз шумори умумии соҳибкороне, ки корашонро бас карданд, 5400 нафарашон соҳибкорони инфиродӣ ва 800 каси дигар соҳибони хоҷагиҳои деҳқонӣ буданд.

Мақомот дар бораи сабабҳои қатъи кори беш аз 6200 соҳибкор дар се моҳ чизе нагуфтаанд.

Баъзе соҳибкорон пештар тафтишҳои зиёд ва баланд будани сатҳи молиёт ё андозро аз сабабҳои асосии қатъи фаъолият медонанд.

Мақомот, аз ҷумла намояндагони Кумитаҳои андоз ва сармоягузорӣ мегӯянд, аксари ин гуна соҳибкорон шева ё тарзи кори худро дигар карданд.

Дар ҳамин ҳол, Оҷонсии омор гузориш додааст, ки дар моҳҳои январ-марти имсол зиёда аз 11 ҳазор "соҳибкори инфиродии навтаъсис бақайд гирифта шудааст".

Фазои номусоиди соҳибкорӣ ва мизони баланди андозҳо аз мушкилиҳоеянд, ки пайваста дар доираи тоҷирону коршиносон садо медиҳад.

Як зани 37-солаи сокини ҷамоати Ворухи Исфараро барои ба худкушӣ расондани ҳамсари бародараш ба чор сол зиндон маҳкум кардаанд.

Дар қарори додгоҳ омадааст, ин зан нисбати ҳамсари бародараш "муносибати дағалона нишон дода, ӯро мунтазам таҳқир мекард ва шаъну эътиборашро дар назди дигар аъзои оила паст мезад".

Зани маҳкумшуда иттиҳоми эълоншударо дар додгоҳ рад карда, худро бегуноҳ гуфтааст.

Аммо Додгоҳи шаҳри Исфара мегӯяд, санҷиши телефони зани фавтида нишон дод, ки ӯ аз муносибати бади хоҳаршӯй ба шавҳараш шикоят кардааст.

Бар асоси қарори додгоҳ, зани маҳкумшуда чор соли зиндонро дар зиндони низомаш умумӣ мегузаронад.

Ин бори аввал нест, ки занҳо дар пайи муносибати бади хушдоман ё дигар аъзои оилаи шавҳар қасди ҷони худ мекунанд.

Тибқи омори расмӣ, соли 2025 беш аз дусад зан дар Тоҷикистон қасд ба ҷони худ карда, бархе аз ҳаёт маҳрум ва чанде аз сӯйи наздикон наҷот дода шудаанд.

Ба иттилои расмӣ, соли гузашта беш аз 3600 шикоят аз хушунат дар хонаводаҳо сабт гаштааст. Ин 403 маврид зиёдтар назар ба соли 2024 мебошад.

Маҷлиси намояндагон, палатаи поёнии порлумони Тоҷикистон қонун "Дар бораи таъмини ҳуқуқ ва ҳифзи иҷтимоии шахсони маъюбиятдошта"-ро қабул кард. Ин қонун 6-уми май тасвиб шуд.

Таҳияи лоиҳаи қонун чанд сол аст, ки аз сӯи Вазорати тандурустӣ ва ҳифзи иҷтимоии аҳолӣ ва намояндагони ҷомеаи шаҳрвандӣ идома дошт.

Ҳадаф аз таҳияи ин санад, таъмини дастрасии баробар ба таълим, тандурустӣ ва ҷойи кор барои маъюбон гуфта шудааст.

Лоиҳаи ниҳоии ин қонун, ки аз сӯи вакилон тасдиқ шуд, ҳанӯз расман нашр нашудааст.

Қабули қонун дар бораи ҳуқуқи шахсони маъюб дар ҳолест, ки Тоҷикистон то ҳол Конвенсия оид ба ҳуқуқи маъюбонро тасвиб накардааст.

Конвенсия оид ба ҳуқуқи маъюбон ҳанӯз соли 2018 аз сӯйи раиси ҷумҳур Эмомалӣ Раҳмон имзо шуда, вале Тоҷикистон то ҳол онро пурра тасвиб накардааст.

Санади мазкур ҳамаи масоили марбут ба ҳуқуқи маъюбонро дар бар мегирад ва декабри соли 2006 аз тарафи Маҷмаи умуми СММ қабул шуд.

Баъди тасвиби Конвенсия оид ба ҳуқуқи маъюбон, кишварҳо муваззаф мешаванд барои ашхоси имконияти ҷисмониашон маҳдуд шароити хуб фароҳам кунанд.

Дар Тоҷикистон ҳудуди 170 ҳазор шахсони маъюб зиндагӣ мекунанд.

Вазорати корҳои дохилии Тоҷикистон аз як ҷинояти ғайриоддӣ дар вилояти Суғд хабар додааст ва дар бораи талоши фурӯши ғайриқонунии ду хирсбачаи малламӯи тиёншонӣ.

Вазорат имрӯз дар як баёнияи расмӣ гуфт, кормандони милиса як сокини 28-солаи ноҳияи Ҷаббор Расуловро дастгир карда ва ба зидди ӯ бо гумони шикори ғайриқонунӣ парвандаи ҷиноӣ боз кардаанд.

Номи ин ҷавони 28-соларо набурдаанд, вале гуфтаанд, ки ӯ охири моҳи марти имсол дар минтақаи "Қизилтайгӣ" воқеъ дар ҷангалзори Кӯҳсовлисои ноҳияи Шаҳристон ду хирсабачаро гирифта ва бо ҳадафи фурӯш дар хонааш нигаҳ доштааст.

Хирси малламӯй аз ҷонварҳои нодири Тоҷикистон ба шумор меравад ва дар Китоби сурхи кишвар ворид шудааст.

Дар баёния омадааст, ки шикорчиро ҳангоми фурӯши хирсбачаҳо дастгир кардаанд. Маълум нест, муштариёни ин ҷонварони зебо кӣ будаанд ва оё нисбат ба онҳо низ чорае андешида мешавад, ё на.

Ба қавли вазорати корҳои дохилии Тоҷикистон, гумонбар ба ҷиноят бо ин кори худ ба давлат 85 ҳазор сомонӣ зиён расонидааст ва акнун бояд барои ин кораш посух бигӯяд.

Бар асоси Кодекси ҷиноӣ дар Тоҷикистон барои шикори ғайриқонунӣ ҷаримаи бузург ва зиндони шартӣ пешбинӣ шудааст

Ҷасади Шаҳбоз Ҷонмаҳмадзода, як сарбози Вазорати мудофеаи Тоҷикистон, ки 10 рӯз пеш худро ба дарёи Кофарниҳон партофта буд, аз марзи Узбекистон пайдо шудааст.

Яке аз наздикони ин хонавода рӯзи 6 май ба Радиои Озодӣ гуфт, ки ҷасади Шаҳбоз имрӯз дар марзи Регар бо вилояти Сурхондарёи кишвари ҳамсоя пайдо шуд.

Ба гуфта ӯ, тобути Шаҳбозро падараш тавассути қаламрави Узбекистон ба Тоҷикистон овард. Ҷасадро имрӯз дар шаҳраки Файзободи ноҳияи Файзобод, ба хок супурдаанд.

Ин сарбози 23-сола рӯзи 27-уми апрел худро ба дарё партофт. Қурбонгул Ашурова, модари Шаҳбоз Ҷонмаҳмадзода рӯзи 29-уми апрел дар суҳбат бо Радиои Озодӣ гуфт, писараш пеш аз оне, ки худро ба об афканад, ба ӯ занг зада буд. Ӯ ба модараш гуфтааст, агар хатое карда бошад, узр мехоҳад.

Ҳанӯз сабабҳои марги ӯ маълум нест. Як манбаи огоҳ аз тафтишот ба Радиои Озодӣ гуфт, ду фарзия; бадрафторӣ дар қисми ҳарбӣ ва мушкили хонаводагӣ ҳамчун сабабҳои эҳтимолии даст ба худкушӣ задани сарбоз таҳқиқ мешаванд.

Ба гуфтаи наздиконаш, Шаҳбоз Ҷонмаҳмадзода дар яке аз қисмҳои ҳарбии Вазорати мудофиа дар канори Душанбе хизмат мекард ва барои даҳ рӯз рухсатӣ гирифта, ба хонаашон дар ноҳияи Файзобод рафта буд.

Ин сарбоз 28-уми апрел мебоист ба маҳалли хидматаш бармегашт, аммо як рӯз пеш бо баҳонаи ороиши мӯйи сар аз хона баромада ба шаҳри Ваҳдат омад ва худро ба рӯдхона партофт.

Шаҳбоз Ҷонмаҳмадзода соле пеш издивоҷ карда, як тифли панҷмоҳа дорад.

Маргумири сарбозон дар қисмҳои ҳарбии Тоҷикистон моҳи апрел доғ шуд. Дар як моҳи ахир ҳадди ақал марги се сарбоз расонаӣ шуд.

Ба дунболи ин, Эмомалӣ Раҳмон, раиси ҷумҳури Тоҷикистон аз мақомоти интизомӣ ва бахусус фармондеҳони нерӯҳои мусаллаҳ, хост, масъалаи тартибу низом дар воҳидҳои низомиро бисёр ҷиддӣ бигиранд.

Дафтари матбуоти раёсати ҷумҳурӣ рӯзи 4-уми май гуфт, дар ҷаласаи Шӯрои амнияти миллии Тоҷикистон, дар баробари дигар масъалаҳо, ҳамчунин "рафти даъвати баҳорӣ ба хизмати ҳарбӣ, риояи тартиботи ҳуқуқӣ ва оинномаҳои низомӣ дар ҷузъу томҳои Қувваҳои Мусаллаҳ ва дигар воҳидҳои ҳарбӣ" баррасӣ шудааст.

Ҷузъиёти дигареро аз нишаст нагуфтаанд, вале зоҳиран марги пурсарусадои се сарбоз дар моҳи апрел сабаби матраҳ шудани масъалаи бадрафторӣ дар ҷаласаи Шӯрои амнияти миллии Тоҷикистон шудааст.

Наздикони бархе аз ин сарбозон аз шароити нохуб дар қисмҳои ҳарбӣ ва озори сарбозон шикоят карданд. Мақомот мегӯянд, вазъ дар қиёс ба солҳои пеш беҳтар шудааст, аммо хабарҳои ахир ин иддаоро зери суол мебаранд.

Аббос Ароқчӣ, вазири корҳои хориҷии Эрон ва ҳамтои чиниааш Ванг И, рӯзи чоршанбе, 6 май дар Пекин мулоқот карданд.

Дар баёнияе, ки Вазорати корҳои хориҷии Чин аз музокироти ин ду дипломати баландпоя нашр кард, гуфта шудааст, вазири корҳои хориҷии Чин хостори поёни танишҳо дар Ховари Миёна ва бозкушоии тангаи Ҳурмуз "дар зудтари вақт" аз сӯи Эрон ва Амрико шуд.

Дар баёния аз ҷумла омадааст, "Чин ба ин бовар аст, ки даргириҳо бояд бе таъхир ва ба сурати комил қатъ ёбад. Оғози дигарбораи таниш ғайри қобили қабул аст ва идомаи музокирот ҳамчунон зарурӣ мебошад".

Дар ин баёния ҳамчунин омадааст, ки Чин аз "ҳаққи машруъ"-и Эрон барои "истифодаи сулҳомез аз энержии ҳастаӣ", дифоъ мекунад.

Шаби гузашта Марко Рубио, вазири корҳои хориҷии Амрико дар вокуниш ба сафари Аббос Ароқчӣ ибрози умедворӣ карда буд, ки Пекин мустақиман ба Теҳрон бигӯяд, ки иқдомоти Эрон дар тангаи Ҳурмуз боиси дар инзивои ҷаҳонӣ қарор гирифтани ин кишвар мешавад.

Вазири корҳои хориҷии Амрико ҳамчунин ҳушдор дод, агар ширкатҳо ё ниҳодҳои чинӣ таҳримҳои Амрико алайҳи Эронро нодида бигиранд, мумкин аст бо таҳримҳо рӯбарӯ шаванд.

Дар пайи ҳамлаи Русия ба шаҳри Запорожеи Украина 12 нафар ҳалок шудаанд. Волии вилоят ҳамчунин аз захмӣ шудани 40 каси дигар хабар дод. Ин ҳамла сешанбеи 5-уми май анҷом шудааст.

Иван Федоров, волии Запороже дар шабакаҳои иҷтимоӣ навишт, Русия бо бомбҳои ҳавоӣ ба ин минтақа ҳамла кардааст.

Хадамоти ҳолатҳои фавқулодаи Украина хабар дод, ки равоншиносон ба 40 нафар, аз ҷумла 6 кӯдак кумак мерасонанд. Ин ниҳод ҳамчунин аз идомаи амалиёти наҷот хабар додааст.

Рӯзи 5-уми май неруҳои Русия ҳамчунин ба шаҳри Краматорск ҳамла кардаанд, ки дар натиҷа дастикам 6 кас кушта шудааст. Волии вилояти Донетск аз захмӣ шудани панҷ каси дигар хабар додааст.

Ҳамчунин дар ҳамлаи неруҳои Русия ба шаҳри Днепр 4 кас кушта ва 16 нафари дигар захмӣ шудаанд.

Ба ин тартиб, дар шабонарӯзи ахир дар пайи ҳамлаҳои артиши Русия зиёда аз 20 шаҳрванди одӣ дар Украина кушта шудаанд.