Пайвандҳои дастрасӣ

Хабари нав

Убайдуллоев: Манъи сохтмон маънои пешгирӣ аз рушди меъмориро надорад


Муҳаммадсаид Убайдуллоев
Муҳаммадсаид Убайдуллоев

Муҳаммадсаид Убайдуллоев, шаҳрдори Душанбе, баъд аз тақрибан ду моҳи қарораш дар бораи қатъи муваққатии сохтмонҳо дар маҳалҳои аҳолинишини Душанбе тасмимашро шарҳ дод.

Муҳаммадсаид Убайдуллоев, шаҳрдори Душанбе гуфтааст, ки тасмимаш дар робита ба мавқуф гузоштани сохтмонҳо дар пойтахт "ба ҳеч ваҷҳ маънои пешгирӣ аз рушди меъмории шаҳрро надорад". Ӯ ин нуктаро рӯзи 24 декабр ҳангоми баргузории иҷлосияи маҷлиси Душанбе баён кардааст.

Дар моҳи октябри соли ҷорӣ иҷозаи сохтмон ва додани қитъаи замин барои бунёди иншооти гуногун дар маҳалҳои аҳолинишини Душанбе қатъ гардид. Шаҳрдори Душанбе ҳадаф аз ин тасмимро "беҳбуд бахшидан ба раванди муттасили таъмини маҳалҳои аҳолинишини пойтахт бо иншооти инфрасохторҳои муҳандисӣ, нақлиётӣ ва иҷтимоӣ” медонад.

Муҳаммадсаид Убайдуллоев дар ҷаласаи рӯзи панҷшанбе гуфтааст, дар соли оянда ҳамагуна дӯкону хаймаҳоеро, ки низ худсарона ва ғайриқонунӣ бунёд шудаанд, аз байн хоҳанд бурд. "Минбаъд, ҳангоми дар ҳудуди бозорҳо, марказҳои савдо, мағоза ва дигар иншооти истеҳсолию тиҷоратӣ ошкор намудани ҳолатҳои фаъолияти соҳибкории ғайрирасмӣ ё риоя нагардидани талабот ва муқаррароти қонунгузорӣ нисбат ба роҳбарону соҳибмулкони онҳо чораҳои мушаххас татбиқ карда мешаванд," -- таъкид кардааст Убайдуллоев.

Изҳори назари шаҳрдори Душанбе дар робита ба мавқуф гузоштани сохтмон дар пойтахт пас аз ду моҳи тасвиби ин қарор сурат мегирад. Дар қарори Муҳаммадсаид Убайдуллоев омада буд, ки "аз 12 ноябр ва то анҷоми тасҳеҳи нақшаҳои муфассали банақшагирӣ, баррасии дархости шахсони воқеӣ ва ҳуқуқӣ оид ба масъалаҳои ҷудо намудани қитъаҳои замин, иҷозати сохтмони иншоот ва иншооти истиқоматию ғайриистиқоматӣ... мавқуф гузошта шавад." Ин қарор ҳанӯз 28 октябр тасвиб шуд, вале дар сомонаи расмии шаҳрдории Душанбе рӯзи 10 ноябр нашр гардид.

Як масъули шаҳрдории Душанбе қаблан дар сӯҳбат бо Радиои Озодӣ гуфт, ҷудо кардани қитъаҳои замин барои сохтмони биноҳои баландошёна то замони таҳия ва тасвиби таҳрири нави Нақшаи генералӣ мавқуф гузошта мешавад: “Таҳрири нави Нақшаи генералӣ таҳия шудааст ва ҳоло дар дасти баррасӣ қарор дорад. Ҷудо кардани қитъаҳои замин барои сохтмонҳои нав ба биноҳое, ки дар чорчӯби Нақшаи генералии кунунӣ дар хиёбони Рӯдакӣ ва кӯчаҳои Нодира, Говоров,4, Айнӣ, Дониш ва Титов анҷом мешаванд, ва ҳамин тавр, ба сохтмони биноҳои истиқоматии шахсӣ ва корхонаҳои истеҳсолӣ дахл надорад.”

Ҳамсӯҳбати мо гуфт, масъала танҳо дар тасвиби таҳрири нави Нақшаи генералист ва рабте ба иқтидори шабакаҳои мавҷудаи обу корез(канализатсия)-и шаҳр надорад.

Вале қарори ба мавқуф гузоштани ироаи қатъаҳои замин барои сохтмони биноҳои нав дар шаҳри Душанбе дар ҳоле нашр шуд, ки ҳамзамон бо истиқболҳо аз рушди сохтмон ва қомат афрохтани биноҳои навбанав дар пойтахт, ки симои шаҳрро хелетағйир дод, нигарониҳое низ зиёд шудаанд, ки оё шабакаҳои мавҷудаи обу корези Душанбе то куҷо тавони бардоштани бори ин ҳамаро доранд?

Қарори маълум, ширкатҳои сохтмоние, ки дар Душанбе биноҳои нав месозанд, ин биноҳоро ба шабакаҳои мавҷудаи обу корез пайваст мекунанд ва то ҳол ҳеҷ кадоми онҳо барои сохтани шабакаи нави обу корез барои таъмини биноҳое, ки тоза дар Душанбе қомат меафрозанд, иқдом накардааст. Ин дар ҳолест ки шабакаи обу корези Душанбе мероси замони Шӯравӣ буда, аз лиҳози иқтидор барои шаҳре сохта шудааст, ки ним миллион аҳолӣ дорад. Вале аҳолии Душанбе дар ду даҳаи охир қариб ду маротиба афзоиш ёфт ва бино ба бархе оморҳо, ба 1 миллион нафар наздик мешавад.

Мушкили дигар роҳҳои Душанбест, ки низ аксаран дар замони Шӯравӣ ва барои як шаҳри ниммиллионнафарӣ бунёд шудаанд.

Ба ҳамин далел, Муҳаммадсаид Убайдуллоев ба Сарраёсати меъморӣ ва шаҳрсозии шаҳри Душанбе амр додааст, то лоиҳаи тасҳеҳшудаи Нақшаи генералии шаҳри Душанберо омода кунад. Дар қарор аз ин идора хоста шудааст, бо ҳамроҳ бо корхонаҳое, чун идораҳои обу корез ва газу барқи Душанбе, ҳамчунин бо шабакаи гармидиҳӣ ва раёсати сохтмони роҳу кӯпрукҳо рӯи “тасҳеҳ”и нақшаи генералии пойтахти Тоҷикистон кор кунанд.

Нақшаи генералии рушди Душанбе соли 1983 таҳия шуда, таҳрири охиринаш дар соли 2006 тасвиб шуда буд.

XS
SM
MD
LG