Сомон Маҳмадбеков танҳо варзишгарест Тоҷикистонро дар Ҷоми бози Аврупо оид ба ҷудо, ки рӯзҳои 2-3-юми феврал дар шаҳри Одивеласи Португалия баргузор мешавад, намояндагӣ мекунад.
Ба иттилои вебсайти Федератсиони байналмилалии ҷудо (IJF), дар Ҷоми бози Аврупо дар Одивелас ширкати беш аз 230 варзишгар (мардону занон) аз 35 кишвар дар назар аст. Сомон Маҳмадбеков дар рақобатҳо дар вазни зери 73 кило ширкат меварзад.
Ин варзишгари тоҷики муқими Русия, ки дар шаҳри Иркутск ба сар мебарад, таҳти раҳбарии мураббиёнаш Эргаш ва Фотеҳ Маҳмадбековҳо тамрин мекунад. Ӯ ҳамеша дар мусобиқоти байналмилалӣ Тоҷикистонро муаррифӣ менамояд.
Муҳаммадмурод Абдураҳмонов, сармураббии дастаи мунтахаби Тоҷикистон оид ба ҷудо ба Радиои Озодӣ гуфт, варзишгари ҷавону моҳир Сомон Маҳмадбеков ҳамроҳи паҳлавонони дигари тоҷик Беҳрӯзи Хоҷазода, Хайёмиддин Ҷабборов (ҳарду дар вазни -73 кг), Акмал Муродов, Ҷаҳонгир Маҷидов (ҳарду дар вазни -81 кг), Комроншоҳи Устопириён (-90 кг), Саидҷалол Саидов (-100 кг), Шакармамад Мирмамадов ва Темур Раҳимов (ҳарду дар вазни +100 кг) барои ба даст овардани роҳхат ба Олимпиадаи Токио-2020 мубориза мебарад.
Ӯ афзуд, Сомон Маҳмадбеков баъди ширкат дар Ҷоми бози Аврупо дар шаҳри Одивеласи Португалия, ҳамроҳи Беҳрӯзи Хоҷазода, Ҷаҳонгир Маҷидов, Комроншоҳи Устопириён, Саидҷалол Саидов ва Темур Раҳимов дар мусобиқаи пурнуфузи байналмилалии Paris Grand Slam 2019, ки рӯзҳои 9-10-уми феврал дар шаҳри Парижи Фаронса доир мегардад, ширкат хоҳад кард.
Сомон Маҳмадбеков алъон дар раддабандии ҷаҳонии Федератсиони байналмилалии ҷудо (IJF) дар вазни зери 73 кило дар миёни 502 варзишгари бузургсол бо 452 имтиёз дар мақоми 87-ум қарор дорад. Ӯ дар раддабандии олимпии инфиродии IJF дар вазни зери 73 кило дар миёни 267 варзишгар бо 226 имтиёз мақоми 43-юмро ишғол менамояд.
Охирин мусобиқоти байналмилалӣ, ки Сомон Маҳмадбеков ширкат намудааст, Ҷоми Осиё оид ба ҷудо буд, ки ибтидои моҳи декабри соли гузашта дар Ҳонгконг баргузор шуд. Сомон дар вазни зери 73 кило, ки ҳамагӣ 27 гуштигир ширкат дошт, ба рақобат аз даври дуюм шуруъ карда, нахуст бар Эрчаогету Аму аз Чин пирӯз шуд.
Баъдан дар чорякфинал бар Кеисеи Накано аз Филиппин ғолиб омада, ба нимфинал баромад. Ӯ дар даври ниманиҳоӣ Чоиҷилсурен Ганболди муғулро мағлуб намуда, ба финал роҳ пайдо кард. Сомон дар қувваозмоии ниҳоӣ Даичи Танакаи ҷопониро шикаст дод ва барои ҷойи аввал бо медали тилло сарфароз гашт.
