Толиб Айёмбеков, ки қаблан мақомот ӯро "аз саркардаҳои гурӯҳҳои ҷиноӣ дар Хоруғ" ном бурда буданд, аз "Амонатбонк" 177 ҳазор сомонӣ қарздор будааст.
Сироҷиддин Икромӣ, раиси "Амонатбонк" 23-уми июл дар ҳузури хабарнигорон гуфт, Ёдгор Мамадасламов, яке аз афроди таъсиргузор дар Вилояти Мухтори Кӯҳистони Бадахшон, ки ҳанӯз соли 2008-ум аз ин бонк 350 ҳазор сомонӣ гирифта буд, қарзҳояшро пурра дар назди бонк пардохт карда, аммо қарзи дигар Толиб Айёмбеков боқӣ мондааст.
Раиси "Амонатбонк" афзуд, худи Толиб Айёмбеков ва падари ӯ аз ин қарз огоҳ ҳастанд ва барои пардохти он саркашӣ низ намекунанд. "Агар онҳо имконият пайдо кунанд, қарзро пардохт мекунанд. Айёмбеков як тарабхонае дорад, ки 800 ҳазор сомонӣ арзиш дорад ва дар гарави бонк аст",-гуфт раиси "Амонатбонк".
Ин дар ҳолест, ки Руҳулло Ҳакимзода, раиси собиқи "Амонатбонк" ду соли пеш гуфта буд, ҳарчанд амволи Толиб Айёмбеков ба фурӯш гузошта шуд, аммо то ба ҳол харидоре пайдо накардааст. Дар соли 2015 Толиб Айёмбеков муваззаф шуда буд, ки то охири ҳамон сол боқимондаи қарзҳояшро ба "Амонатбонк" баргардонад, вагарна бонк амволи багаравмондаи ӯро ба фурӯш мегузорад. Толиб Айёмбеков ҳамроҳи писараш соли 2010 аз "Амонатбонк" 455 ҳазор сомонӣ қарз гирифта буданд.
Дар соли 2013 мақомоти "Амонтабонк" гуфта буданд, ки қарзи собиқ раҳбарони гурӯҳҳои мусаллаҳи Бадахшонро тариқи додситонӣ меситонад.
Номи Айёмбеков дар пайи куштори генерал Абдулло Назаров, сардори раёсати амнияти Бадахшон дар тобистони соли 2012 расонаӣ шуд ва мақомот дар аввал ӯро дар ин қазия муттаҳам карданд.
Эмомалӣ Раҳмон, раисиҷумҳури Тоҷикистон моҳи сентябри соли 2012 дар ҷараёни сафараш ба Бадахшон гуфта буд, ки Толиб Айёмбеков ва Ёдгор Мамадасламов қарзашонро ба "Амонатбонк" баргардонанд.
