Ҳазорон нафар рӯзи 31-уми август дар маркази шаҳри Маскав, пойтахти Русия, роҳпаймоӣ карданд ва бо ин ҳушдорҳои мақомотро ба фаъолони мухолифон нодида гирифтанд.

Эътирозгарон чанд километр дуртар аз Кремл шиор доданд, ки "Русия озод хоҳад шуд!".

Любов Собол, яке аз чеҳраҳои мухолифон, "Озодӣ ба зиндониёни сиёсӣ"-ро талаб кард.

Мухолифон аз он ки номзадҳои мустақил ва намояндагони оппозитсия барои иштирок дар интихоботи Маҷлиси Маскав сабтином нашудаанд, эътироз доранд.

Мақомоти Русия гуфтанд, номзадҳои мухолифин натавонистаанд имзои кофӣ ҷамъ биоранд ва аз ин рӯ имкони сабтиноми онҳо вуҷуд надорад. Вале раҳбарони оппозитсия бовар доранд, ки Кремл мехоҳад номзадҳои тарафдори ҳукумат дар ин интихобот бе рақиб монанд ва роҳашон то Маҷлис ҳамвор шавад.

Маҷлиси шаҳри Маскав аз 45 ҷой иборат аст. Интихоботи навбатӣ рӯзи 8-уми сентябри имсол баргузор мешавад.

Аъзои маҷлиси шаҳриро барои панҷ сол интихоб мекунанд.

Қонуни афв дар Тоҷикистон то 14-уми август нисбат ба тақрибан 21 ҳазор нафар татбиқ шудааст.

Ҳабибулло Воҳидзода, додситони кул, рӯзи 18-уми август дар мулоқот бо сокинону фаъолони ноҳияи Рӯдакӣ гуфтааст, танҳо 8 ҳазору 157 нафар аз зиндонҳо озод гаштанд.

Ҳарчанд ӯ ишорае накард, дар миёни озодшудаҳо ду хабарнигори мустақил Завқибек Саидаминӣ ва Абдусаттор Пирмуҳаммадзода ҳам мебошанд.

Онҳо дар соли 2022 бо гуноҳи, ба гуфтаи мақомот, ҳамкорӣ бо гурӯҳҳои фаъолияташон мамнуъ дар Тоҷикистон аз озодӣ маҳрум карда шуданд. Худашон ҳеч гоҳ ин иттиҳомро напазируфтанд.

Аммо бисёре аз зиндониён, ки парвандаашонро дорои ангезаи сиёсӣ медонанд, афв нагардиданд. Аз ҷумла, чеҳраҳои саршиноси иҷтимоию давлатӣ, ки соли 2025 дар доираи парвандаи "табаддулот" ба солҳои тӯлонии зиндон маҳкум шудаанд.

Қонуни афв рӯзи 16-уми июн дар пайванд ба 35 соли истиқлоли давлатии Тоҷикистон қабул шуд.

Додгоҳи олии Покистон рӯзи 18 август дастур дод, ки Имрон Хон, нахуствазири пешини ин кишвар, ки дар зиндон ба сар мебарад, барои муолиҷа ба як бемористон дар Исломобод интиқол дода шавад.

Ин тасмим пас аз он гирифта шуд, ки вакилони дифои ӯ дар бораи вазъияти номуносиби саломатии вай ибрози нигаронӣ карданд.

Додрас Шоҳид Ваҳид гуфт, Имрон Хон, ки аз соли 2023 то кунун дар зиндон ба сар мебарад, дар ҷараёни ду рӯзи оянда ба бемористон интиқол хоҳад шуд.

Ба хоҳар ва табиби ӯ иҷоза дода хоҳад шуд, ки дар ҷараёни дармон дар паҳлӯи ӯ бимонанд ва аъзои хонаводааш низ иҷоза хоҳанд дошт ҳафтае як бор бо ӯ мулоқот кунанд.

Имрон Хони 73-сола ва ҳамсараш Бушро Бибӣ дар як парвандаи фасод, ҳар яке ба 17 сол зиндон маҳкум шудаанд.

Имрон Хон ва Ҳизби Таҳрики инсофи Покистон мегӯянд, иттиҳомҳои воридшуда алайҳи онҳо ангезаи сиёсӣ дорад.

Имрон Хон аз соли 2018 то 2022 нахуствазири Покистон буд ва бонуфузтарин раҳбари сиёсии мухолифи ҳукумати дар ин кишвар шинохта мешавад.

Сурия рӯзи 18 август аз ҳашт ҳамлаи ҳавоии Исроил ба пойгоҳи низомии "Абу Зуҳур" дар шимол-ғарби ин кишвар дар наздикии марзи Туркия хабар дод.

Телевизиони давлатии Сурия ба нақл аз як манбаи низомӣ гузориш дод, ки хатти парвози фурудгоҳ ва анборҳои ин пойгоҳ дар ин ҳамлаҳо ҳадаф қарор гирифтанд, аммо талафоти ҷонӣ надоштанд.

Артиши Исроил ва Вазорати дифои Сурия ҳанӯз дар ин бора баёния нашр накардааст. Аммо Томас Барак, фиристодаи вижаи Амрико дар умури Сурия, аз "ҳамлаҳои ҳавоии тасдиқшудаи Исроил" ба пойгоҳи ҳавоии "Абу Зуҳур" ибрози нигаронии шадид кард ва гуфт, ҳукумати Сурия вокуниши низомӣ нишон надода ва борҳо нишон додааст, ки хоҳони коҳиши таниш бо Исроил аст.

Пойгоҳи "Абу Зуҳур" дар ҳудуди 70-километрии марзи Туркия қарор дорад ва аз соли 2013 дигар ҳамчун фурудгоҳи низомии вижа, фаъол набудааст. Ин пойгоҳ дар ҷараёни ҷанги дохилии Сурия чандин бор миёни нерӯҳои Башор Асад ва гурӯҳҳои мухолиф даст ба даст шуд.

Ба гуфтаи як манбаи низомӣ, пас аз сарнагунии ҳукумати Башор Асад дар моҳи декабри соли 2024, ин пойгоҳ ба маркази омӯзишии артиши нави Сурия табдил шудааст.

Ба гузориши хабаргузории "Рейтерз", ҳамлаҳои нав дар шароит анҷом шудааст, ки ҳукумати нави Сурия дар талош барои бозсозии нерӯҳои мусаллаҳи ин кишвар аст ва Туркия низ нақши афзояндае дар омӯзиш ва таҷҳизи артиши Сурия дорад.

Анқара ва Димишқ пештар созише барои ҳамкории низомӣ имзо кардаанд, ки шомили омӯзиш ва машваратдиҳӣ барои нерӯҳои суриягӣ ва таъмини таҷҳизот мешавад.

Исроил дар моҳҳҳои гузашта низ шуморе аз пойгоҳҳо ва иншооти низомии Сурияро ҳадаф қарор дода ва борҳо ҳушдор додааст, ки иҷоза нахоҳад дод тавоноиҳои низомии Сурия ба шакле тақвият шавад, ки барои Исроил таҳдиде эҷод кунад.

Исроил дар бархе ҳамлаҳои пешини худ пойгоҳҳоеро ҳадаф қарор дода буд, ки Туркия имкони истифода аз онҳоро баррасӣ карда буд ва ин масъала ба афзоиши таниш миёни Анқара ва Телавив бар сари ояндаи амниятии Сурия доман задаааст.

Беш аз 71 дарсади кӯдаконе, ки ба мактабҳои миёнаи Қазоқистон дохил шудаанд, ба забони қазоқӣ таҳсил хоҳанд кард.

Дар ин бора Жулдиз Сулаймонова, вазири маорифи Қазоқистон, рӯзи 18-уми август дар ҷаласаи ҳукумат хабар дод.

Ӯ, инчунин, гуфтааст, дар барномаи таълим баъзе аз фанҳои нав ворид шуда, баҳогузории дониши хонандагон ҳам тағйир дода шуд.

Вазорати маорифи Қазоқистон гуфтааст, имсол беш аз 380 ҳазор кӯдак ба синфи аввал мераванд.

Беш аз 71 дарсади онҳо бо забони қазоқӣ таҳсил мекунанд, 26,6 дарсад бо забони русӣ ва 2,3 дарсад бо забонҳои дигар.

Барои синфҳои аз 5 то 7-уми мактабҳои миёнаи Қазоқистон фанни ҳатмии “Асосҳои Конститутсия”, барои талабаҳои синфҳои аз 8 то 11-ум дарси “Қонун ва тартибот” ҷорӣ мешавад. Барои синфҳои аз 5 то 11 дарси “Амнияти шахсӣ” ҳатмӣ хоҳад гашт.

Қоидаи ҳатмии дигар – манъи истифодаи телефонҳои ҳушманд дар дарсҳо будааст, ба истиснои барномаҳои таълимие, ки бар асоси нақшаи дарсӣ пешбинӣ шудааст.

Мақомоти Амрико гуфтанд, як шаҳрванди Тоҷикистон, ки бемори рӯҳист, аз ин кишвар фирор кардааст.

Вебсайти "Fox5" рӯзи 17-уми август навишт, Абдулло Тошпӯлодзода соли 2019 ба куштани соҳибхонааш дар Амрико гунаҳкор, аммо бо сабаби бемории равонӣ дар шифохонаи Вирҷинияи Шимолӣ бистарӣ шуда буд.

Дар як санади расмӣ аз 5-уми август гуфта шудааст, ки Тошпӯлодзода бо истифода аз таътили кӯтоҳмуддат аввал ба Истанбул ва аз он ҷо ба Душанбе рафт. Ин дар ҳолест, ки додгоҳ ҳанӯз моҳи июни имсол гуфтааст, “ӯ бе қарори додгоҳ набояд бемористонро тарк кунад”.

Қонунҳои Вирҷиния барои гурӯҳи муайяни беморони рӯҳӣ, аз ҷумла онҳое, ки даст ба куштор задаанд, як ё ду рӯз имкони берун шудан аз беморхонаро медиҳад.

Ҳатто додситон соли 2024 ба Абдулло Тошпӯлодзода иҷозат дода будааст, ки ба Вашингтон рафта, шиносномаашро бигирад. Намояндагии расмии Тоҷикистон дар Амрико дар ин шаҳр ҷойгир аст.

Бар асоси санадҳои расмӣ, Тошпӯлодзода рӯзи 6-уми июл, замоне ки бо иҷозатномаи муваққатӣ аз беморхона берун шуда буд, аз фурудгоҳи “Даллас” ба воситаи Истанбул ба Душанбе рафтааст.

Муфаттишон гуфтаанд, билет яктарафа буд ва ширкати ҳавопаймоии “Turkish Airlines” парвози ӯро тасдиқ кард. Зоҳиран билетро барои Тошпӯлодзода шахси дигаре харидааст.

Сомонаи "Fox5" менависад, хешовандони Абдулло Тошпӯлодзода нахостанд дар ин бора бо матбуот суҳбат кунанд. Маълум нест ҳоло ӯ дар куҷост ва оё ин қазия аз ҷониби ниҳодҳои Тоҷикистон ҳам пайгирӣ мешавад ё на.

Сухангӯйи Вазорати корҳои хориҷии Эрон даст доштани ин кишварро дар ҳамлаи паҳподӣ ба дафтари нахуствазири иқлими Курдистони Ироқ ва раиси истихбороти ин иқлим рад кард.

Ба гузориши хабаргузории ИРНА, Исмоил Бақоӣ бо машкук хондани ин ҳамлаҳо, хоҳони "ҳушёрии беш аз пеши ҳама тарафҳо дар ин робита" шуд.

Дар ҳамин ҳол, расонаҳои Эрон аз гуфтугӯйи телефонии вазири корҳои хориҷии Эрон бо ҳамтои ироқиаш хабар доданд, ки дар он Аббос Ароқчӣ ба Фуод Ҳусейн гуфтааст, "ҳеч маълумоте дар бораи оғози ин ҳамлаҳо аз дохили хоки Эрон вуҷуд надорад".

Ҳамзамон, Алӣ Аз-Зайдӣ, нахуствазири Ироқ, дастури ташкили як кумитаи таҳқиқ дар бораи ин ҳамларо содир кардааст.

Пештар Идораи мубориза бо терроризми иқлими Курдистон эълон карда буд, ду паҳподе, ки шоми 16-уми август аз дохили хоки Эрон партоб шуда буданд, дафтари Масрур Боризонӣ, нахуствазири Курдистони Ироқ, ва ҳамчунин манзили раиси истихбороти ин минтақаи худмухторро ҳадаф қарор доданд. Ба гуфтаи мақомҳо, ин ҳамлаҳо талафоте надошт.

Як узви Маҷлиси Эрон барои изҳороташ дар бораи марги Маҳсо Аминӣ аз волидони ӯ маъзарат хост.

Аҳмад Ориёинажод, узви Маҷлиси Эрон, дар як мубоҳисаи охири телевизионӣ гуфт, Маҳсо Аминӣ “ба ҷаҳаннам рафтааст” ва марги ӯ боис ба “ошӯб” шуд.

Маҳсо Аминӣ соли 2022 аз сӯйи пулиси ахлоқ ва бо иттиҳоми риоя накардани ҳиҷоб дар Эрон дастгир шуда, дар шароити мармуз ҷон дод.

Ин ҳолат хашми ҷомеаро ба бор овард ва боис ба эътирози густурдаи “Зан, Зиндагӣ, Озодӣ” гардид. Мақомот эътирозҳоро бераҳмона саркӯб карданд.

Ориёинажод дар наворе баъд аз мубоҳисаи телевизионӣ гуфт, ки “нохудгоҳ” алфози “ғайри қобили қабуле” ба забон овард ва аз волидони Аминӣ хост, узри ӯро бипазиранд.

Волидони Маҳсо Аминӣ рӯзи 15-уми август дар вокуниш гуфтанд: “Бигзор забонаш барои тамоми кишварро ба ҷаҳаннам табдил додан бурида шавад”.

“Исми духтари мову ҳазорҳо мардуми бегуноҳ дар таърихи ин кишвар ҷовидон хоҳад монд”, -- гуфтанд волидони Маҳсо Аминӣ дар поёни паёмашон.

Додгоҳе дар Русия муовини раиси ҳизби "Яблоко" Лев Шлосбергро ба 11 солу 1 моҳ ҳабс маҳкум намуд.

Ӯро ба таҳқири батакрори артиш ва нашри маводи дурӯғин дар бораи нерӯҳои мусаллаҳи Русия гунаҳкор донистанд.

Додгоҳи шаҳри Пскови Русия гуфт, ин қарор бо назардошти ҳукми пешини Шлосберг дар бораи кори ҳатмии 420-соата содир шудааст. Дар мавриди аввал ӯро ба иҷро накардани масъулиятҳои ба истилоҳ “агенти хориҷӣ” гунаҳкор карда буданд.

Ҳукми нави додгоҳ нисбат ба Лев Шлосберг рӯзи 17-уми август бе ҳузури вакили мудофеи ӯ содир шуд.

Инчунин, ба маҳкумшуда ҳаққи баёни мавқеаш дар робита бо ин парванда дода нашуд. Танҳо баёноти хатии ӯро, ки дар ҷараёни тафтишот додаанд, хонданду бас.

Худи сиёсатмадор гуфтааст, дар ҷараёни мурофиа ҳаққи ӯ барои дифоъ чандин бор пйомол шуд. Вай дар сухани охиринаш бори дигар ба поён додан ба ҷанг дар Украина даъват намуд.

Шлосберг як сиёсатмадори муътабар буда, дар гузашта вакили маҷлиси вилоятии Псков буд. Ӯ аз оғоз мухолифи ҷанги Русия дар Украина мебошад ва ошкоро гуфтааст, ки аз Русия берун рафтанӣ нест.

Раҳбарони ҳизби "Яблоко" Николай Рибаков ва Григорий Явлинский гуфтанд, барои таъмини мурофиаи одилонаи додгоҳӣ барои Шлосберг мубориза хоҳанд бурд.

Чор давлати дигари Иттиҳоди Аврупо гуфтанд, ба зудӣ аз қабули шиносномаҳои хориҷии Русия, ки муҳлати истифодаашон панҷ сол аст, вале дохилаш маълумоти биометрӣ надорад, даст мекашанд.

Ин давлатҳо Белгия, Люксембург, Нидерландия ва Шветсия мебошанд.

Кумисюни Аврупо рӯзи 17-уми август дар изҳорот гуфт, қарори мазкур аз 1-уми октябр ба иҷро медарояд.

Шветсия гуфтааст, агар дар дохили шиносномаҳои панҷсолаи шаҳрванди Русия визаи ё ҳаққи зисти муваққат бошад, ин санадро қабул хоҳад кард.

Расонаи "Мавҷи Олмон" навишт, баъд аҳ ин шумори кишварҳои ҳавзаи Шенген, ки аз эътирофи шиносномаҳои панҷсолаи Русия даст мекашанд, ба 15 расид.

Дар миёни онҳо Фаронса, Олмон, кишварҳои соҳили Балтика, Чехия, Полша ва давлатҳои дигар мебошанд. Аксари ин кишварҳо барои шаҳрвандони Русия маҳдудияти виза ҷорӣ кардаанд.

Дар Русия ду намуд шиносномаи хориҷӣ амал мекунад, яке барои 10 сол бо маълумоти биометрӣ ва дигаре барои 5 сол ва бе чунин маълумот. Шиносномаи ғайрибиометриро ба даст овардани шаҳрвандон осонтар буда, айни замон хатари таҳияи нусхаи тақаллубии он ҳам бештар аст.

Ба гузориши бахши дарии Радиои Озодӣ, Ҷумъахон Фотеҳ, фармондеҳи норозии "Толибон" ва ҳамроҳони ӯ, аз даргирӣ дар вилояти Бадахшони Афғонистон, ҳаммарз бо Тоҷикистон, даст кашида, силоҳҳои худро супурдаанд.

Расонаҳои вобаста аз "Толибон" рӯзи 16-уми август бо нашри чанд навор иддао карданд, ки Ҷумъахон Фотеҳ таслим шудааст.

Ҷумъахон Фотеҳ ва афроди мусаллаҳи зери итоати ӯ чанд рӯз пеш дар ноҳияи Нусай дар вилояти Бадахшони Афғонистон ва минтақаҳои канори он, дар баробари нерӯҳои "Толибон" даст ба эътироз заданд.

Бар асоси гузоришҳо, "Толибон" барои боздошти ӯ шумори зиёде аз нерӯҳои худро аз Кобул ва гӯшаҳои дигар ба Бадахшон фиристода буданд.

Ҷумъахон Фотеҳ қаблан дар як паёми аудиоӣ ё савтӣ шикоят кард, ки нерӯҳои "Толибон" дар Нусай хонаҳои мардуми одиро кофтукоб карда, ба қавли ӯ, "чанд фарди бегуноҳро куштанд".

ИНЧУНИН, БИХОНЕД:

"Аз тири силоҳбадастон." Вокуниши расмӣ ба кушта шудани як зан дар Дарвоз

Дар канори даргириҳои дохилӣ дар Бадахшон, гурӯҳҳои мухолифи мусаллаҳи "Толибон", аз ҷумла "Ҷабҳаи Озодии Афғонистон", низ гуфтаанд, ки чанд рӯз боз дар Зебок бо нерӯҳои "Толибон" даргир ҳастанд.

Як муҳоҷири 39-солаи тоҷик дар натиҷаи сӯхтор дар вилояти Омски Русия ба ҳалокат расидааст. Дар ин бора додситонии Омск хабар додааст.

Ба иттилои манбаъ, субҳи 15-уми август дар сохтмони як бинои баландошёна сӯхтор сар зад. Гуфта мешавад, ҳангоми корҳои кафшергарӣ маводи гармидиҳанда оташ гирифтааст.

Дар ин ҳодиса 11 нафар захмӣ шуда, як нафарашон, ки шаҳрванди Тоҷикистон буд, ба ҳалокат расид. Ҳамчунин ду муҳоҷири узбекистонӣ низ осеб дидаанд.

Аз шаҳрванди фавтидаи Тоҷикистон ном бурда нашудааст. Танҳо гуфта шудааст, ки 90 дарсад бадани ӯ сӯхта буд ва табибон натавонистанд наҷоташ диҳанд.

Русия мизбони ҳудуди як миллион муҳоҷири тоҷик аст ва солона бар асари ҳодисаҳои нохуш ва беморӣ даҳҳо муҳоҷир мефавтанд.

Шумораи қурбониёни зилзилаи рӯзи 15 август дар шарқи Индонезия аз панҷоҳ нафар гузашт.

Раиси Кумитаи ҳолатҳои фавқулодаи Индонезя эълон кард, ки ду нафар низ ба шиддат ва 11 нафар ба таври сабук захмӣ шудаанд ва ҳудуди ду ҳазор нафар минтақаҳои осебдидаро тарк кардаанд.

Ин заминларза субҳи шанбе дар наздикии ҷазираи Флорес рӯй дод. Маркази заминшиносии ИМА эълон кард, маркази он дар умқи 10-километрии замин ва дар ҳудуди 70-километрии шимол-шарқи шаҳри Энде, дар бахши марказии Флорес будааст.

Тибқи гузоришҳо, хонаҳо ва биноҳои зиёде дар минтақаи зилзилазада осеб дидаанд ва амалиёти ҷустуҷӯ ва имдодрасонӣ идома дорад. Мақомҳои маҳаллӣ ҳамчунин пештар аз гирифтор шудани шуморе аз афрод дар зери вайронаҳо хабар дода буданд.

Мақомҳои Индонезия пас аз рух додани зилзила, ҳушдори сунами содир карданд, аммо ин ҳушдор баъдан бекор шуд. Чандин пасларза низ минтақаро ларзонд, ки қувваи дутои онҳо 5,9 ва 6,1 дараҷа эълон шудааст.

Тибқи иттилои Маркази заминшиносии ИМА, ҳудуди якуним миллион нафар дар минтақаҳое зиндагӣ мекунанд, ки ларзиши сахти заминро эҳсос кардаанд.

Дар 12 декабри соли 1992 низ, зилзилаи 7,8-дараҷаи ҷазираи Флоресро ларзонд, ки бар асари он ҳудуди 2,500 нафар аз сокинон ба ҳалокат расиданд.

Додгоҳи олии Эрон рӯзи 16-уми август эълон кард, ки боз як ширкатдори эътирозҳои моҳи январи имсол эъдом ё қатл карда шудааст.

Шаҳром Содиқӣ дар расонаҳои ҳукуматии Эрон муттаҳам шуда буд, ки дар ҷараёни эътирозҳои моҳи январи соли 2026 чанд корманди пулисро бо мошинаш пахш кардааст.

Тибқи гузориши расонаҳои Эрон, дар пайи ин ҳодиса, ҳафт корманди пулиси Эрон "аз сар, пой, даст ва чашм" захмӣ шудаанд.

Бо ин ҳол, дар бораи чигунагии баргузории муҳокимаи Шаҳром Содиқӣ ва раванди расидагӣ ба парвандаи ӯ, санадҳои мустақил нашр нашудааст.

Тибқи гузориши Созмони Милали Муттаҳид, аз нимаи дувуми моҳи марти имсол то кунун дастикам 52 нафар ба иттиҳоми ҷиноятҳои вобаста ба амнияти миллӣ дар Эрон эъдом шудаанд. 27 нафари онҳо дар иртибот бо эътирозҳои моҳи январ будаанд.

Эрон аз Қатар хостааст се халабони эрониро озод кунад, ки ба гуфтаи Теҳрон, пас аз сарнагунии ҳавопаймоҳояшон дар моҳи марти имсол, аз сӯи нерӯҳои қатарӣ боздошт шудаанд.

Яке аз фармондеҳони нерӯҳои мусаллаҳи Эрон гуфтааст, ки ин се халабон, Ҷавод Солеҳӣ, Абдулмаҷид Даштиён ва Имрон Беҳрушиён ном доранд ва ҳудуди шаш моҳ мешавад, ки дар боздошти Қатар ба сар мебаранд.

Аммо Қатар ин иддаоро ба шиддат рад карда ва гуфтааст, ки ҳеч халабони эрониро боздошт накардааст.

Моҷид Ал-Ансорӣ, сухангӯи Вазорати корҳои хориҷии Қатар гуфтааст, пас аз вуруди ҷангандаҳои эронӣ ба ҳарими ҳавоии он кишвар ва тасдиқи масири ҳамла, бо онҳо тамос барқарор шуд, аммо пас аз онки ба талошҳо барои барқарории иртибот посух надоданд, Қатар бар асоси қоидаҳои даргирӣ, "иқдомоти лозим барои дифоъ аз қаламрави худ" анҷом дод.

Мақомҳои қатарӣ мегӯянд, нерӯҳои наҷоти ин кишвар танҳо ҷасади як халабонро пайдо кардаанд ва Эрон то кунун ба даъвати Қатар барои баррасии амалиёти ҷустуҷӯ ва наҷот посух надодааст.

Ин халабонҳои ҷангандаи "СУ 24" дар рӯзҳои аввали ҳамлаи Амрико ва Исроил ба Эрон, ба пойгоҳи амрикоии "Ал-Удайд" дар Қатар ҳамла карданд. Ба гуфтаи мақомоти эронӣ, ин пойгоҳ дар ҳафтаи аввали ҷанг дар моҳи март, чанд бор ҳадафи ҳамлаҳои мушакии Эрон қарор гирифт.

Сабаби қатъи саросари барқ дар бархе аз кишварҳои Осиёи Марказӣ, аз кор мондани фаъолияти ду чархаи нерӯгоҳи барқӣ-обии "Токтогул" дар Қирғизистон будааст.

Нимаи дувуми рӯзи 14 август нерӯи барқ барои наздик ба се соат дар бисёре аз минтақаҳои Қирғизистон, Тоҷикистон ва Қазоқистон қатъ шуд. Вазорати энержӣ ва захираҳои оби Тоҷикистон дар пайи ин ҳодиса, садама дар нерӯгоҳи "Норак"-ро, ки манбаи асосии таъмини барқ дар кишвар мебошад, рад кард ва гуфт, мутахассисон сабабро месанҷанд.

Ин вазорат рӯзи 15 август сабаби асосии ин ҳодисаро, қатъ гардидани фаъолияти ду чархаи нерӯгоҳи "Токтогул"-и Қирғизистон бо иқтидори умумии 600 МВт, гуфт.

Вазорати энержӣ ва захираҳои оби Тоҷикистон пас аз таҳқиқи сабабҳои садама бо нашри як хабарнома гуфт, дар натиҷа, сарбории чархаҳои аз кор бозмонда ба хати интиқоли барқи 500 кВ-и самти шимол–ҷануби Қазоқистон гузашт ва ин афзоиш боиси ба таври худкор ё автоматикӣ хомӯш гардидани хатҳои интиқоли барқи 500 кВ ва дар пайи он, халалдори шудани кори Низоми ягонаи энержии Осиёи Марказӣ гардид.

Вазорати энержӣ ва захираҳои оби Тоҷикистон мегӯяд, ки бо дарназардошти вазъи пешомада, соати 14:43 ба вақти маҳаллӣ, низоми энергетикии кишвар аз ин низоми ягона дар Осиёи Марказӣ ҷудо шуд ва кори як қатор чархаҳо дар нерӯгоҳҳои дохил қатъ гардид, ки боиси қатъи саросарии барқ дар Тоҷикистон шуд.

Мақомоти тоҷик мегӯянд, ки барқ соати 16:40 қисман ва то соати 19:30 пурра барқарор шуд ва Тоҷикистон ба низоми ягонаи энергетикии Осиёи Марказӣ дубора пайваст гардид.

Ба иттилои Вазорати энержӣ ва захираҳои об, вазъи пешомада ба таҷҳизоти барқии низоми энержии кишвар ягон зарар нарасонида, онҳо дар ҳолати коршоямӣ боқӣ монданд.

Дар ҳамин ҳол, бархе сокинони кишвар ба Радиои Озодӣ гуфтанд, ки аз шиддати зиёди барқ, телевизонҳояшон аз кор монданд ва чароғҳояшон сӯхтанд.

Дар гузашта баъди рух додани садама дар нерӯгоҳи “Норак” чанд соат саросари Тоҷикистон, ба истиснои Вилояти Мухтори Куҳистони Бадахшон, бе барқ монда буд.