Қирғизистон тасмим дорад, пас аз соли 2023 ба воситаи тарҳи CASA-1000 бо нархи 5,5 сент ба хориҷ нерӯи барқ содир кунад. Дар ин бора муовини раиси Кумитаи давлатии саноат ва энержии Қирғизистон Айтмамат Қодиров дар ҷаласаи кумитаи порлумони ин кишвар дар умури молӣ ва будҷа иттилоъ дод.

Қодиров дар посух ба суоли вакилон гуфт, тарҳи мазкур соли 2023 ба кор даромада, ҷониби Қирғизистон дар ҳоли ҳозир тамоми талаботи ҷадвалро иҷро мекунад. "Аз соли 2023 тарҳи CASA-1000-ро иҷро мекунем. Пештар ҳам гуфта будем ва ҳамаи шумо хуб медонед, ки як киловатт соат нерӯи барқро 5,5 сент мефурӯшем. Ҳамчунин пас аз бозсозии нерӯгоҳ 430 мегаватт нерӯи барқи изофӣ хоҳем дошт. Имкони ба даст овардани то 6 млрд соми дигар фароҳам мешавад",-афзуд ӯ.

Тарҳи CASA-1000 як тарҳи байналмилалиест, ки чанд сол пеш иҷрои он бо кумаки Бонки Ҷаҳонӣ оғоз ёфт ва арзиши он беш аз 1 миллиарду 100 миллион долларро ташкил медиҳад. Бар асоси ин тарҳ, хатти баландшиддати барқи 750-километрие сохта мешавад, ки аз тариқи қаламрави Афғонистон мегузарад ва ба Покистон мерасад.

Нерӯи барқи Қирғизистон ба ин шабака аввал аз тариқи Хуҷанд ва сипас ба воситаи ҳалқаи ягонаи барқии Тоҷикистон бояд бирасад. CASA-1000 қодир хоҳад буд, 1000 мегават нерӯи барқро ба Покистон ва 300 мегаватро ба Афғонистон бирасонад.

Мақомоти Тоҷикистон мегӯянд, "CNPC" ё ширкати миллии нафту гази Чин, натиҷаи корҳои саҳроии худро дар Тоҷикистон ҷамъбаст мекунад. Ин ширкати чинӣ дар чанд минтақаи вилояти Хатлон нафту газ меҷӯяд.

Намояндагони Вазорати энергетика ва захираҳои об 10-уми июл гуфтанд, дар нимаи аввали имсол ҳамкорӣ бо ин ширкати чинӣ "дар самти ҷустуҷӯ, иктишоф, истихроҷ ва кашфи конҳои нафту газ идома дода шуд."

Мақомот бидуни овардани ҷузъиёти бештар гуфтанд, "ширкат ба ҷамъбасти натиҷаҳои корҳои саҳроӣ ва интерпретатсия (таҳлили маълумот) машғул мебошад".

Пештар намояндагони Идораи геологияи Тоҷикистон гуфта буданд, ба ширкати CNPC парвона ё иҷозаномаи кор то соли 2033 дода шудааст. Бар асоси ин санад, ширкат ҳақ дорад дар 57 майдон дар ҷануб-ғарби Тоҷикистон нафту газ ҷустуҷӯ кунад.

Тибқи омори Саридораи геология, дар Тоҷикистон беш аз 2 миллион тонна захираи нафт ва 3,4 миллиард метри мукааб газ муайян шудааст.

Талошҳо барои пайдо ва истихроҷи нафту гази Тоҷикистон камҳосил будаанд. Аз ҷумла, ширкатҳои "Газпромнефт", "Total" ва "Тетрис Петролиум" талош карданд, ки дар Тоҷикистон нафту газ истихроҷ кунанд, аммо дертар аз кишвар рафтанд.

Дар як соли ахир қарзи аҳолии Тоҷикистон аз барқ ҳудуди 600 миллион сомонӣ коҳиш ёфтааст.

Тибқи омори ахир, ки Вазорати энергетика ва захираҳои об 10-уми июл нашр кард, аҳолии Тоҷикистон аз истифодаи барқ 1,1 миллиард сомонӣ қарздор ҳастанд. Як сол пеш қарзи аҳолӣ аз барқ 1,7 миллиард сомонӣ эълон шуда буд.

Омори мақомот дар бораи қарздории аҳолӣ аз барқ солҳост, ки шубҳаву гумонҳоеро ба миён овардааст.

Хабарнигорон борҳо ин мавзӯъро бо намояндагони ширкати "Барқи тоҷик" баҳс кардаанд. Намояндагони "Шабакаҳои тақсимоти барқ" пештар гуфта буданд, беш аз 1 миллиард сомонӣ, қарзе мебошад, ки солҳои гузашта ҷамъ шудааст. Мустақилона тасдиқ кардани ин ҳарфҳо мушкил аст.

Ба гузориши ахири Вазорати энергетика, баъди аҳолӣ калонтарин қарздор аз барқ "Ширкати Алюминийи Тоҷик" мебошад, ки қарзаш ба 991 миллион сомонӣ расидааст. Як сол пеш қарзи ин корхона аз барқ 718 миллион сомонӣ буд.

Оҷонсии беҳдошти замин ва обёрӣ бо 322 миллион сомонӣ, ташкилоту муассисаҳои буҷетӣ бо 100 миллион ва Корхонаҳои обу корез бо 126,4 миллион сомонӣ, аз қарздорони калон дар назди идораи барқ будаанд.

Таҳлили омори расмӣ нишон медиҳад, ки дар як соли ахир ба ҷуз корхонаҳои буҷетӣ, қарзи Оҷонсии беҳдошти замин ва корхонаи обу корез ба таври назаррас зиёд шудааст.

Хабарнигорон номи беш аз 3,5 ҳазор хориҷиро муайян кардаанд, ки аз тарафи Русия зидди Украина ҷангида, кушта шудаанд.

Таҳқиқи Би-би-си ва пойгоҳи "Медиазона" нишон дод, ки бештари хориҷиёни ҳалокшуда ё 2304 нафар шаҳрвандони Кореяи Шимолӣ ҳастанд.

Дар ин рӯйхат ҳамчунин номи 1285 нафар аз 40 кишвар зикр шудааст. Аз ҷумла номи 339 қазоқистонӣ, 229 узбекистонӣ, 199 тоҷикистонӣ ва 89 шаҳрванди Қирғизистон ҳам дар миёни кушташудагон ҳастанд.

Дар таҳқиқот омадааст, беш аз нисфи шаҳрвандони Тоҷикистон ва Узбекистон, ки кушта шуданашон тасдиқ шудааст, аз зиндонҳои Русия ба ҷанг бурда шудаанд.

Омори расмии тоҷикон дар ҷанги Русия алайҳи Украина маълум нест. Мақомот дар ин бора ҳеч иттилоъ намедиҳанд, вале дар бештар аз чаҳор соли ҷанг хабари кушта ва нопадид шудани даҳҳо шаҳрванд ва зодаи Тоҷикистон расонаӣ шуд.

Тарҳи давлатии “Зистан мехоҳам” дар Украина дар як соли охир номи зиёда аз се ҳазор зодаи Тоҷикистонро нашр кардааст, ки дар ҷанги Русия бар зидди Украина ширкат карда, бархе кушта ё нопадид шудаанд.

Хабарнигорони Би-би-си ва пойгоҳи “Медиазона” пайваста номи кушташудагон аз тарафи Русияро аниқ мекунанд. Хабарнигорон то ин дам номи 233 ҳазор сарбози фавтида аз тарафи Русияро муайян кардаанд.

Ба маълумоти НАТО, қариб 24 ҳазор хориҷӣ аз 44 кишвар ба артиши Русия ҷалб шуда, зидди Украина меҷанганд. Ин маълумотро ахиран бахши русии Би-би-си дар ҳошияи ҷаласаи сарони кишварҳои узви НАТО дар Анқара нашр кард.

Бар асоси қонуни афв 273 зиндонӣ аз маҳбаси шаҳри Ваҳдат озод шудаанд. Ин хабарро 10-уми июл расонаҳои давлатии Тоҷикистон нашр карданд.

Дар гузориши расмӣ, ҷузъиёти бештар дар бораи зиндониёни озодшуда, аз ҷумла иттиҳоми онҳо зикр нашудааст. Гурӯҳе аз сиёсатмадорону мансабдорони собиқ, ки соли 2025 дар доираи парвандаи "табаддуллот" зиндонӣ шудаанд, дар зиндони шаҳри Ваҳдат адои ҷазо мекунанд.

Манобеи огоҳ қаблан ба Радиои Озодӣ гуфта буданд, ин афрод шомили қонуни афв нашуданд, чун дар парвандаашон банди 306-и Кодекси ҷиноӣ ё талоши ғасби қудрат ҷой дорад.

Қонуни нави афв дар Тоҷикистон, ки 16-уми июни имсол имзо шуд ва ба иҷро даромад, нисбат ба 18 ҳазор нафар, аз ҷумла зиндониён ва онҳое, ки парвандаашон дар ҳоли баррасист, татбиқ хоҳад шуд.

То кунун беш аз чаҳор ҳазор нафар, аз ҷумла қариб сесад зан аз зиндонҳои Тоҷикистон озод карда шудаанд.

Вазири маориф ва илми Тоҷикистон ба танқидҳо дар бораи ҳимоя накардан аз ҳуқуқи омӯзгор Муҳимҷон Раҳмонов посух дод.

Раҳим Саидзода 10-уми июл дар посух ба суоли хабарнигори Радиои Озодӣ гуфт, омӯзгор Муҳимҷон Раҳмонов "нисбати хонанда аз таҳқир истифода бурдааст ва ин исбот ва алайҳаш чораҷӯйӣ шуд".

Ба гуфтаи Саидзода, намояндагони Иттифоқи касаба дар мурофиаи додгоҳӣ ширкат карданд.

Муҳимҷон Раҳмонов, омӯзгор аз ноҳияи Нуробод пештар шикоят кард, ки рӯзи 8-уми май бародари як хонанда ӯро задааст. Додгоҳ 3-юми июн омӯзгорро дар иҷро накардани ӯҳдадорӣ дар мавриди таълиму тарбияи кӯдак, гунаҳор карда, 1560 сомонӣ ҷарима баст. Фарде, ки ба латукӯби омӯзгор муттаҳам мешуд, барои майдаавбошӣ ба панҷ шабонарӯз ҳабс маҳкум шуд.

Баъди содир шудани ҳукм омӯзгор гуфт, аз ин қарор розӣ нест ва аз кор дар мактаб даст мекашад. Ин мавзуъ дар шабакаҳои иҷтимоӣ вокунишҳои зиёдеро ба миён овард.

Нурулло Саидов – бародар, Муҳибулло Нуриддинов ва Нусратулло Саидов – бародарзодаҳои Саид Абдуллоҳи Нурӣ, раҳбари пешини Иттиҳоди нерӯҳои мухолифини тоҷикро аз зиндон озод кардаанд.

Ҳарсеи онҳо соли 2022 бо ҷурмҳои гуногун, аз ҷумла барои гирифтани пул аз намояндагони мухолифон, ки мақомот ғайриқонунӣ медонанд, аз панҷ то панҷуним сол аз озодӣ маҳрум шуда буданд. Чизе, ки Муҳаммадҷони Нурӣ, писари Саид Абдуллоҳи Нурӣ, соли 2022 “қасосгирӣ” номид.

Дар ҳоле мақомот дар бораи озодии се хешованди Саид Абдуллоҳи Нурӣ ягон шарҳ намедиҳанд, як манбаи огоҳи Радиои Озодӣ рӯзи 10-уми июл гуфт, "нисбат ба онҳо қонуни нави афв татбиқ шуд".

Абдусаттор Бобоев, раиси Кумитаи шаҳрвандии наҷоти гаравгонон, қароргоҳаш дар Лаҳистон (Полша), ки бо шахсони наздик ба хонаводаи зиндониён дар Тоҷикистон дар тамос будааст, рӯзи 10-уми июл хабарро тасдиқ кард.

Вай гуфт, ба иттилои ёфтаи онҳо, Муҳибулло Нуриддинов ва Нусратулло Саидови 67-сола рӯзи ҷумъа аз маҳбаси Хуҷанд озод шуда, "дар роҳ ба тарафи вилояти Хатлон ҳастанд".

"Нурулло Саидов, додарзодаи дигари Саид Абдуллоҳи Нурӣ, аз маҳбаси "Якум Советский” дар Душанбе баромад," – афзуд ӯ.

Қонуни нави афв дар Тоҷикистон, ки 16-уми июни имсол имзо шуд ва ба иҷро даромад, нисбат ба 18 ҳазор нафар, аз ҷумла зиндониён ва онҳое, ки парвандаашон дар ҳоли баррасист, татбиқ хоҳад шуд.

То кунун беш аз чаҳор ҳазор нафар, аз ҷумла қариб сесад зан аз зиндонҳои Тоҷикистон озод карда шудаанд.

Дар ин миён қонуни афв ба баъзе аз мухолифон, фаъолони маданӣ ва сиёсатмадорони зиндонӣ, ки ба ҷиноятҳое чун хиёнат ба давлат, таҷовуз ба номус ё қаллобӣ ба миқдори махсусан калон айбдор шудаанд, сабукӣ нахоҳад дод. Ҳарчанд ин афрод ҳукми додгоҳро бепоя ва бештар дорои ангезаҳои сиёсӣ медонанд.

Тоҷикистон дар нимаи аввали имсол ба хориҷи кишвар қариб 1,5 милиард киловат соат барқ содир кардааст, ки дар қиёс ба ҳамин давраи соли гузашта 7 дарсад камтар будааст.

Ба гузориши Вазорати энержӣ ва захираҳои об, бахши асосии барқ (702 миллион киловат соат) ба Афғонистон ва 338 миллион киловати дигар ба Узбекистон содир шудааст.

Манбаъ мегӯяд, маблағи барқи фурӯхташуда 292,2 миллион сомонӣ ($ 31,6 млн) аст.

Дар Вазорати энержӣ ва захираҳои об гуфтанд, 90 дарсади барқ "дар давраи зиёд гардидани резиши об дар дарёҳо, яъне моҳҳои апрел-июн содирот шудааст".

Радиои Озодӣ мустақилона ин маълумотро тасдиқ карда наметавонад.

Шарҳи мақомот дар бораи содир шудани барқ танҳо дар давраи тобистон қаблан шубҳаву гумонҳоеро ба миён оварда буд.

Далер Ҷумъа, вазири энергетика 10-уми июл дар посух ба суоли Радиои Озодӣ гуфт, созишномаи нави фурӯши барқ бо ширкати "Брешно"-и Афғонистон имзо шудааст. Вазир бидуни овардани ҷузъиёти бештар гуфт, муқаррароти ин созишнома аз санадҳои қаблӣ фарқи зиёд надорад.

Интиқоли барқ ба хориҷ дар шароите, ки мардуми Тоҷикистон дар фаслҳои тирамоҳ ва зимистон бо маҳдудият барқ мегиранд, танқидҳоеро ба миён оварда буд.

Бештар аз 70 дарсади аҳолии Тоҷикистон, ки дар минтақаҳо зиндагӣ мекунанд, дар фаслҳои тирамоҳ ва зимистон то 6-8 соат барқ мегиранд.

Мақомоти Тоҷикистон мегӯянд, ки то соли 2028 дар кишвар барои коркарди батареяи мошинҳои барқӣ корхонаи махсус сохта мешавад.

Исфандиёр Шукурзода, муовини аввали раиси Кумитаи ҳифзи муҳити зист 9-уми июл зимни нишасти хабарӣ гуфт, ин корхона бояд дар яке аз ноҳияҳои атрофи Душанбе бунёд гардад.

Шукурзода афзуд, онҳо пешниҳод кардаанд, ки то сохтани ин корхона, батареяи мошинҳои барқӣ дар анбори махсусе дар Душанбе ҷамъоварӣ шаванд.

Ба гуфтаи муовини раиси Кумитаи ҳифзи муҳити зист, феълан мушкилоти ҷиддии экологӣ бо батареяи мошинҳои барқӣ вуҷуд надорад, вале баъди чанд сол метавонад ин масъала муҳим шавад.

Овардани мошинҳои барқӣ аз хориҷ, бахусус аз Чин ба Тоҷикистон давоми се соли ахир ба таври назаррас зиёд шуд.

Феълан ҳамаи мошинҳои таксӣ дар шаҳри Душанбе аз мошинҳои барқӣ иборат аст. Батареяи ин мошинҳо ва роҳҳо нобуд кардани он қаблан нигаронии ҳомиёни муҳити зистро ба миён оварда буд.

Тибқи иттилои дарёфтии Радиои Озодӣ, субҳи 10-уми июл беш аз ҳазор маҳбусро бар асоси қонуни афв аз маҳбаси маъруф ба "Якум советский"-и шаҳри Душанбе озод карданд.

Дар наворҳое, ки ба дасти Радиои Озодӣ расид, дида мешавад, ки наздикони даҳҳо зиндонӣ барои пешвози наздиконашон ба назди зиндон омадаанд.

Мақомот озодии зиндониён аз ин маҳбаси Душанберо шарҳ надодаанд.

Дар маҳбаси маъруф ба "Якум советский" чанд хабарнигору блогери зиндонӣ, аз ҷумла Далери Имомалӣ, Абдуллоҳ Ғурбатӣ, Завқибек Саидаминӣ ва Аҳмади Иброҳим адои ҷазо мекунанд.

Пештар наздиконашон гуфтанд, ки бар асоси қонуни афв се сол аз муҳлати боқимондаи ҳабси ин хабарнигорон кам карда мешавад.

Ба гуфтаи манбаъҳои Радиои Озодӣ, имрӯз, 10 июл аз маҳбасҳои шаҳри Хуҷанд низ шуморе аз зиндониён раҳо шудаанд.

Пеш аз ин, дар рӯзи 6-уми июл 2 ҳазору 979 тан, аз ҷумла тақрибан сесад занро аз зиндонҳои Тоҷикистон озод карда буданд.

Мақомот баръакси дафъаҳои гузашта маросими озодии зиндониёнро бе эълони пешакӣ ва асосан бо ҳузури хабарнигорони давлатӣ гузаронданд.

Қонун дар бораи афв рӯзи 16-уми июн аз ҷониби Эмомалӣ Раҳмон, раисҷумҳури Тоҷикистон имзо шуд.

Бар асоси он, бояд 18 ҳазор кас аз боздоштгоҳу зиндон ё аз ҷавобгарии ҷиноӣ озод шаванд.

Элизабет Стикни, сухангӯйи Департаменти давлатӣ ё Вазорати умури хориҷии Амрико, дар суҳбат бо Радиои Озодӣ натиҷаи нишасти раҳбарони НАТО дар Туркия ва рушди ҳамкориҳои Тоҷикистону Иёлоти Муттаҳидаро хулоса кард.

Ӯ рӯзи 9-уми июл гуфт: "Ба қавли президент Доналд Трамп, нишасти НАТО бисёр муваффақ буд. Мо мехостем, ки кишварҳои узв харҷи дифоиашонро афзоиш бидиҳанд ва ҳамаи онҳо тааҳҳуд карданд, ки ҳазинаҳои дифоиашонро бештар мекунанд."

Радиои Озодӣ: Мешавад гуфт, ки дар ин ҷаласа, онгуна, ки пешбинӣ мешуд, дар робита бо ислоҳоти стратегии ояндаи НАТО иттифоқи назаре ба даст омад?

Элизабет Стикни: "Эътилофи НАТО бояд ба ҳар навъ таҳдид омода бошад. Муҳим аст, ки барои расидан ба ин ҳадаф мо бештар ҳамкорӣ кунем. Бинобар ин, ҳамаи кишварҳои узви НАТО ба ин ҳамкорӣ тааҳҳуд карданд."

Радиои Озодӣ: Ҳафтаи гузаша дар Вашингтон ҷаласаи муҳими вазирони корҳои хориҷии Тоҷикистон ва ИМА - Сироҷиддин Муҳриддин ва Марко Рубио барпо шуд. Изҳороти расмиро мо дидем, вале чунин ба назар мерасад, ки ҳамкорӣ дар соҳаи истихроҷи маъдан дар ин гуфтугӯҳо муҳимтарин бахш буд ва аз ҷумла, баъзе матолибе ҳам нашр шуд, ки тарафҳо дар заминаи истихроҷи сурма ба мувофиқате омаданд. То куҷо ин дуруст аст?

Элизабет Стикни: "Вақте дар бораи Тоҷикистону Амрико сӯҳбат мекунем, мо дар бораи фурсатҳои ҳамкорӣ гап мезанем. Ва ҳамон қисме, ки шумо гуфтед, ҳафтае пеш вазири корҳои хориҷӣ оқои Рубио бо вазири корҳои хориҷии Тоҷикистон дар Вашингтон дидор кард. Онҳо дар мавриди густариши фурсатҳо сӯҳбат карданд. Кишварҳои мо ба густариши ҳамкории тиҷҷорӣ, ҳамкории амниятӣ ва ҳамкории беҳдоштӣ алоқаманд ҳастанд. Ва ҳам мавзӯи маъданҳо матраҳ шудааст. Вале беҳтар аст, ки дар мавриди ҷузъиёти ин гуфтугӯҳо сӯҳбат накунам."

Мақомоти Амрико шаҳрванди 42-солаи Узбекистон Беҳзод Асроровро бо гумони содир кардани садама ё тасодуфи роҳ, ки боис ба марги як нафар шудааст, дастгир карданд.

Садама рӯзи панҷуми июл дар Оҳайо рӯй дода, дар ин ҳодиса Тобиас Форсайт, донишҷӯи 21-сола ва дарвозабони тими донишгоҳи Массачусетс, ҷон бохтааст.

Расонаҳои Амрико навиштанд, ки Беҳзод Асроров мошини борбар меронд.

Ӯро ҳамзамон ба сохтакорӣ гумонбар медонанд.

Ба иттилои мақомот, Беҳзод Асроров баъди ҳодиса дастгоҳи сабти ҳаракат дар роҳро дар ҷайбаш пинҳон кардааст.

Матбуот гуфт, "ӯ забони англисиро намедонад ва бо пизишкону ходимони полис ба воситаи Google Translate суҳбат намуд".

Полис ӯро дар маҳбаси Мэдисон ҷой намудааст.

Дар вокуниш ба канда шудани гӯшае аз як бинои баландошёнаи нимсохт дар Хуҷанд, сармеъмори ин шаҳр ва намояндаи Хадамоти назорат дар соҳаи сохтмон аз мансаб ронда шудаанд.

Раиси Кумитаи сохтмон рӯзи 9-уми июл дар нишасти матбуотӣ гуфт, ин ниҳод дар ҳайати 10 тан як кумисюни вижа ташкил карда, барои санҷиш ба вилояти Суғд фиристод. Низом Мирзозода ҳамзамон гуфт, видеои канда шудани гӯшае аз як бино махсус сабт шудааст ва онро рақобат миёни ширкатҳои сохтмонӣ донист.

"Дар он ҷо як чизи дигар аст. Агар аҳамият дода бошед, ду шахс нишастаанд ва навор гирифта ва гуфта истодаанд, ки ҳоло ҳамон девор чаппа мешавад. Савол пайдо мешавад, ки онҳо аз куҷо медонанд, ки ҳамин девор чаппа мешавад?" -- гуфт раиси Кумитаи сохтмон.

Ҳарчанд Низом Мирзозода аз гуфтани ҷузъиёти рақобат, номи ширкатҳои сохтмонӣ ва ҳувияти соҳибони онҳо худдорӣ кард, аммо гуфт, ин ҳодисаро мақомоти ҳифзи ҳуқуқ ҳам таҳқиқ доранд. То кунун назари ширкати сохтмонӣ ба ин ҳодиса ва гуфтаҳои раиси Кумитаи сохтмон маълум нест.

Навор дар Инстаграм:

Сифати сохтмонҳои нав, хусусан биноҳои маскунӣ дар солҳои охир яке аз баҳсҳои доғ дар миёни мардум дар Тоҷикистон аст.

Рӯзи 19-уми июн дар пайи шамоли сахт порае аз девори як бинои нимсохт дар шаҳри Хуҷанд канда шуд ва наворҳои он лаҳза дар шабакаҳои иҷтимоӣ баҳси сифати биноҳои навро дубора доғ кард.

Радиои Озодӣ он замон маълум карда буд, ки ин бинои нимсохт дар маҳаллаи 32-юми шаҳри Хуҷанд ҷойгир буда, аз сӯйи ширкати “Каскад” бунёд мешавад. Намояндагони ин ширкат шарҳе надоданд.

Ба омори Кумитаи сохтмон ва меъморӣ, дар шаш моҳи соли 2026 дар сохтмони беш аз ҳазору сад бино зиёда аз се ҳазору ҳафтсад камбудӣ ошкор гашта, навад нафарро дар умум 300 ҳазору 254 сомонӣ ҷарима бастаанд.

Вазорати тандурустии Эрон эълон кард, ки дар ҳамлаҳои ду рӯзи ахири Амрико ба ин кишвар, дастикам 14 нафар кушта ва 78 тани дигар захмӣ шудаанд.

Ҳусейн Кирмонпур, раиси Маркази робитаҳои умумии Вазорати тандурустии Эрон 9 июл гуфт, ки нерӯҳои амрикоӣ то кунун панҷ вилояти Эронро ҳадафи ҳамла қарор додаанд.

Ба гуфтаи ӯ, аз миёни захмиён 47 нафар ҳамчунон дар бемористонҳо бистарӣ ҳастанд ва дигар маҷрӯҳон пас аз дарёфти хадамоти тиббӣ, рухсат шудаанд.

Ин мақоми вазорати тандурустии Эрон мушаххас накардааст, ки омори талафоти эълоншуда шомили нерӯҳои низомӣ мешавад ё танҳо марбут ба ғайринизомиён аст.

Пеш аз ин артиши Эрон аз кушта шудани ҳашт низомӣ ва Сипоҳи посдорон аз кушта шудани яке аз нерӯҳои худ дар ҳамлаҳои шаби нахусти Амрико, хабар дода буданд.

Раҳбарони кишварҳои узви паймони НАТО бо нашри эъломияи муштарак дар поёни нишасти дурӯзаи худ, рӯзи 8 июл ӯҳдадор шуданд, ки дар соли 2026, ҳафтод миллиард евро (ҳудуди 82 миллион доллар) таҷҳизоти низомӣ, кӯмаки амниятӣ ва омӯзиши низомӣ дар ихтиёри Украина қарор диҳанд ва бар идомаи ҳимоят аз Киев таъкид карданд.

Ҳамзамон бо баргузории нишасти НАТО дар Анқара, Русия субҳи 8 июл ҳамлаҳои наверо алайҳи Украина анҷом дод, ки дар натиҷа дастикам ҳафт нафар кушта шуданд. Украина низ ба ин ҳамлаҳо посухи мутақобил дод.

Тибқи гузоришҳо, Русия ҳафтаи гузашта тақрибан ҳар рӯз бо истифода аз паҳподҳо ва мушакҳои баллистикӣ, минтақаҳои гуногуни Украинаро ҳадаф қарор додааст, ки бар асари он беш аз 50 тан кушта шудаанд.

Қазоқистон бо ҳадафи пешгирӣ аз берун бурда шудани маводи сӯхт, дар убуру мурури нақлиёт аз кишварҳои ҳамсояаш маҳдудият ҷорӣ кардааст.

Дар ин бора муовини нахуствазири Қазоқистон Кайирхон Туткишбоев рӯзи 7-уми июл дар як нишасти матбуотӣ хабар дод.

Ӯ гуфт, бар асоси муқаррароти нав, мошинҳои сабукраву борбар, ки аз кишварҳои ҳамсоя меоянд, дар шабонарӯз танҳо як бор ҳақ доранд аз сарҳад гузаранд. “Аз ин роҳ метавон тавозунро дар истифодаи маводи сӯхт таъмин кард,” – афзуд Туткишбоев.

Муовини сарвазири Қазоқистон гуфт, чунин қарор ба ҳамаи гузаргоҳҳои сарҳадии кишвар марбут аст. Илова ба ин, Вазорати энержии Қазоқистон дар ҳамкорӣ бо ширкатҳои миллӣ як захирагоҳи маводи сӯхтро тартиб дода, тавозуни истифодаи онро дар бозори дохилӣ назорат мекунад.

Вай афзуд, вақтҳои охир ба ҳисоби онҳо “истифодаи маводи сӯхт дар минтақаҳои сарҳадии Қазоқистони Ғарбӣ, Оқтеппа ва Павлодар якбора боло рафтааст”.

Дар нуқтаҳои фурӯши сӯзишвории Қазоқистон дар сарҳад бо Русия навбатпоиҳои калон мушоҳида мешавад.

Дар Русия аз охири моҳи июн як бӯҳрони маводи сӯзишворӣ мушоҳида мешавад. Далелаш ҳамлаҳои Украина ба корхонаҳои истеҳсоли нафти Русия дар посух ба ҳуҷумуҳои пурқурбонии Маскав ба мавзееъҳои аҳолинишини Украина мебошад.

Рӯзи 6-уми июл корхонаи коркарди нафти Омск, ки дар 2500-километрии сарҳади Украина ҷойгир аст, мавриди ҳамлаи паҳподҳои украинӣ қарор гирифт. Баъди ин, корхонаи Омск, ки соле 21 миллион тонна нафт истеҳсол мекард, корашро боздошт.