Пайвандҳои дастрасӣ

Хабари нав

Хабарҳо

Оташи олимпӣ аз Юнон ба Ҷопон расид

Акс аз бойгонӣ

Оташи олимпӣ тавассути ҳавопаймо аз Юнон ба префектураи шимолии шарқии Мияги, ба пойгоҳи Матсушимаи нерӯҳои ҳарбии ҳавоии худдифои Ҷопон расонида шуд. Дар ин бора шабакаи NHK хабар додааст.

Субҳи рӯзи ҷумъа оташи олимпӣ аз Афина ба префектураи Мияги дар ҷазираи Хоншу расонида шуд. Рамзи Бозиҳои олимпиро қаҳрамони секаратаи олимпӣ оид ба ҷудо Тадаҳиро Номура ва қаҳрамони секаратаи олимпӣ оид ба гуштии озод Саори Йошида пешвоз гирифтанд.

Оташ дар се префектураи кишвар - Мияги, Иватэ ва Фукусима намоиш дода мешавад. Эстафета 26-уми март дар Фукусима оғоз меёбад.

Маросими афрухтани оташи олимпӣ 12-уми март дар Юнон баргузор шуд. 19-уми март дар варзишгоҳи "Панатинаикос" маросими супурдани оташи олимпӣ ба кумитаи тадорукоти Бозиҳои олимпии соли 2020 дар Токио доир гардид. Бар асари пандемияи коронавирус чорабинӣ ба таври пӯшида сурат гирифт.

Тақдири Бозиҳои олимпии соли 2020 дар Токио дар робита бо паҳншавии коронавирус дар ҷаласаи кумитаи тадорукот моҳи майи соли равон ҳал хоҳад шуд. Ҳаруюки Такахаши, узви кумитаи тадорукот, эҳтимоли ба муҳлати як ё ду сол мавқуф гузоштани Бозиҳоро баён кард, вале дар ин ҳолат талафоти ҷиддии молиявиро ба ёд овард.

Дар ҳамин ҳол Кумитаи байналмилалии олимпӣ (IOC) тамоми талошҳоро мекунад, то Олимпиадаи соли 2020 дар Токио дар санаи қаблан тасдиқшуда, аз 24-уми июл то 9-уми август, баргузор карда шавад.

Чунин аст натиҷаи мусоҳибаҳои видеоӣ бо роҳбарияти федератсияҳои намудҳои тобистонаи варзиш ва кумитаҳои миллии олимпӣ. Кумитаи байналмилалии олимпӣ бо федератсияҳои байналмилалии варзишӣ машваратҳо доир намуд ва 17-уми март баёнияи расмӣ нашр кард.

Дар баёнияи IOC омадааст, Бозиҳои олимпӣ дар Токио тибқи нақшаи тасдиқшуда баргузор мешаванд, новобаста ба он ки бо сабаби авҷ гирифтани вируси COVID-19 бисёр мусобиқаҳои интихобии олимпӣ барҳам ё ба вақти дигар гузаронида шуданд.

"Вазъият дар мавриди вируси COVID-19 ба омодагӣ ба Бозиҳои олимпии Токио низ таъсир мерасонад ва ҳамарӯза тағйир меёбад. IOC то ҳоло комилан омодааст Бозиҳои олимпиро дар Токио дар соли 2020 гузаронад. Бо назардошти он ки қабл аз бозиҳо беш аз чаҳор моҳ мондааст, зарурати қабули ҳама гуна тасмимҳои радикалӣ дар ин марҳила ва ҳар гуна тахминҳо дар айни замон баръакс хоҳад буд",-омадааст дар баёнияи Кумитаи байналмилалии олимпӣ.

IOC ҳамаи варзишгаронро даъват кардааст, ки омодагиро ба Бозиҳои олимпӣ идома диҳанд. Дар умум, аз 11000 варзишгаре, ки бояд дар Бозиҳои олимпӣ ширкат кунанд, 57 дар садаш маълум гардидааст. IOC дар ҳамкорӣ бо федератсияҳои байналмилалӣ барои интихоби 43 дар сади боқимонда талош мекунанд.

Дар ин робита IOC гурӯҳи махсусро ташкил кардааст, ки дар ҳолатҳои зарурӣ вобаста ба системаи интихобӣ аз номи Кумитаи иҷроияи IOC қарори фаврӣ қабул кунад.

"Саломатӣ ва беҳбудии ҳамаи онҳое, ки дар омодагӣ ба Бозиҳои олимпии Токио иштирок мекунанд, нигаронии мост. Тамоми чораҳо барои таъмини амният ва ҳимояи манфиатҳои варзишгарон, мураббиён ва тимҳои миллӣ андешида шудаанд. Мо ҷомеаи олимпӣ ҳастем. Мо якдигарро дастгирӣ мекунем ва чунин ҳамбастагии олимпӣ моро ҳамчун як ҷомеа муайян мекунад, " - гуфтааст президенти IOC Томас Бах.

Ёдовар мешавем, то ҳоло ду муштзани тоҷик – Баҳодур Усмонов дар вазни то 63 кило ва Шаббос Неъматуллоев дар вазни то 81 кило – ба Бозиҳои олимпии соли 2020 дар Токио роҳхат гирифтаанд.

Ҳамаи хабарҳои имрӯзро дар инҷо бихонед

Сӯхтор дар фурӯшгоҳи "Ашан"-и Душанбе. ВИДЕО

Сӯхтор дар фурӯшгоҳи "Ашан". 7 июл, 2020.

Баъд аз зӯҳри 7-уми июл фурӯшгоҳи бузурги "Ашан" дар Душанбе оташ гирифт. Дар наворҳое, ки корбарон ба Радиои Озодӣ фиристоданд, дида мешавад, ки аз болои боми фурӯшгоҳ дуд мебарояд.

Корбарон мегӯянд, мошинҳои оташнишонӣ дертар ба ҷои ҳодиса расиданд. Сӯхтор хомӯш карда шудааст. Сабаби сӯхтор ва зарари расида ҳанӯз маълум нест.

Мақомоти умури дохилии шаҳри Душанбе гуфтанд, ки ҳаҷми сӯхтор хурд буд. Сӯхтори талафоти ҷонӣ дар пай надоштааст.

Фурӯшгоҳи "Ашан" моҳи июни соли 2016 ба фаъолият оғоз кард. Ба гуфтаи мақомот, барои бунёди он 13 миллион доллар сарф шудааст.

"Ашан" калонтарин фурӯшгоҳи фаронсавӣ дар пойтахти Тоҷикистон мебошад.

Навор аз ин сӯхторро инҷо тамошо кунед:

Бритониё 25 мақомдори русро аз рӯи қазияи Магнитский таҳрим кард

Аз чап ба рост: Никита ва Наталя Магнитскийхо - писар ва модари ҳуқуқшинос, Доминик Рааб, вазири хориҷаи Бритониё ва раҳбари Hermitage Capital ва як фаъоли зидди Кремлин Билл Браудер. 6 июли соли 2020, Лондон

Бритониё нисбати беш аз бист мақоми Русия дар робита бо куштори вакили дифоъ Сергей Магнитский таҳрим ҷорӣ кард. Лондон мегӯяд, ки бо сабаби амалҳои харобкоронаи Маскав равобити ду кишвар “номуайян” боқӣ мемонад. Дар феҳристи 25 мақоми таҳримшудаи Русия, ки рӯзи 6 июл нашр шуд, исми Александр Бастрикин, раиси Кумитаи тафтишотӣ ва як узви ҳалқаи афроди бисёр наздики президенти Русия Владимир Путин ва ҳам чанд додрасу додситон ворид шудааст. Вазири хориҷаи Бритониё Доминик Рааб, ки дар гузашта ҳомии ҳуқуқ будааст, рӯзи 6 июл дар Твиттер навишт, ки таҳримҳо “нафаронеро ҳадаф қарор додааст, ки даст ба нақзи бисёр ҷиддии ҳуқуқи башар задаанд” ва Бритониёро “ба як нирӯи аз ин қавитар барои амалҳои хуб дар ҷаҳон дар солҳои оянда” табдил медиҳад.

Рааб дар сӯҳбат бо оҷонсии Ройтерс гуфт:

“Ҳамеша одамон ваё гурӯҳи нафароне ҳастанд, ки барои нақзи бисёр ваҳшатноки ҳуқуқи инсон масъулият доранд. Ба ҳамин хотир, ба назари ман, дуруст аст, ки ба ҳайси як василаи сиёсати хориҷӣ, мо афроди масъул барои чунин қонуншиканиҳо – шиканҷа, кушторҳои худсарона ваё чизе монанд ба инро - муҷозот кунем, яъне дороиҳояшонро масдуд ва додани виза манъ шавад. Барои изҳори мавқеи байналмилалии мо дуруст мешавад, ки бигӯем, ки мо намехоҳем, ки ин афроди масъули ҷиноятҳои мудҳиш, онҳое, ки дасташон дар хун олуда шудааст, ба ин кишвар омада, дар Найтсбриҷ ваё Кингз Роуд харидҳои солинавӣ бикунанду тавассути муомилаҳои бонкиву хариди хона ба иқтисоди ин ҷо сармоягузорӣ бикунанд”.

Сергей Магнитский як ҳомии ҳуқуқи Уилям Браудер, сармоягузори зодаи ИМА ва шаҳрванди Бритониё буд, ки соли 2009 дар як боздоштгоҳи Маскав аз бемории номуайяне даргузашт. Ин қазия таваҷҷӯҳи зиёди байналмилалиро ҷалб кард.

Боздошти хабарнигори собиқи “Коммерсантъ” бо иттиҳоми "хиёнат ба давлат"

Иван Сафронови 30-сола аз моҳи маи соли ҷорӣ дар мақоми мушовири раиси корпоратсияи Роскосмос Дмитрий Рогозин оид ба сиёсати иттилоотӣ кор мекард

Дар Маскав собиқ хабарнигори нашрияҳои “Коммерсантъ” ва “Ведомости” Иван Сафронов бо иттиҳоми хиёнат ба давлат боздошт шуд. Дар ин бора Радио Свобода хабар медиҳад. Ӯ аз моҳи маи соли ҷорӣ дар мақоми мушовири раиси корпоратсияи Роскосмос Дмитрий Рогозин оид ба сиёсати иттилоотӣ кор мекард. Вале тавре кордиҳандааш ба вебсайти «Открытые медиа» гуфтааст, ин парванда ба Роскосмос рабте надорад. Оҷонсии РИА Новости аз қавли ФСБ (Хадамоти амнияти федеролӣ) менависад, ки дар ин сохтор бовар доранд, ки Сафронов як хадамоти вижаи кишвари узви НАТОро бо маълумоти сиррӣ оид ба ҳамкориҳои Русия дар бахши низомиву фаннӣ, дифоӣ ва амниятӣ таъмин мекард. Феълан маълум нест, ки гап дар бораи кадом кишвар меравад. Инчунин мавқеи худи Сафронов ба ин қазия маълум нест.

Сафронов 30 сол дошта, дар гузашта хабарнигори “Коммерсантъ” буд. Падари ӯ шореҳи низомӣ Иван Сафронов соли 2007 даргузашт. Моҳи маи соли 2019 Сафронови хурдӣ баъди нашри мақола оид ба эҳтимоли тарки мақом кардани раиси Шӯрои Федератсия Валентина Матвиенко аз кор дар нашрияи “Коммерсантъ” ронда шуд. Ин ҳолат дар редаксияи “Коммерсантъ” як бӯҳронро ба вуҷуд овард ва баъди ӯ тамоми кормандони шӯъбаи сиёсӣ ба истеъфо рафтанд. Июни соли 2019 ТАСС хабар дод, ки нисбати Сафронов барои матлабе дар “Коммерсантъ” парвандаи «эҳтимолан» маъмурӣ боз шудааст. Нашрияро мехостанд барои фош кардани маълумоти дорои хусусияти сиррӣ ба ҷавобгарӣ кашанд. Сабаби боз шудани парванда гуфта намешуд, вале дертар мақолае дар бораи он, ки бар асоси қарордод Миср соҳиби ҳавопаймоҳои ҷангии навъи Су-35 мешавад, аз вебсайти нашрия бардошта шуд. Баъди ин нашрияи The Bell навишт, ки котиби давлатии ИМА Майк Помпео ба Миср таҳдид кардааст, ки агар Қоҳира ба хариди ҳавопаймоҳои русӣ иқдом кунад, мавриди таҳрим қарор мегирад.

Раиси кулли “Коммерсантъ” Владимир Желонкин ба вебсайти «Открытые медиа» хабар дод, ки вақтҳои охир нашрия дар робита бо нашри хабар оид ба ҳавопаймоҳои ҷангӣ ҳеҷ мушкиле надошт. Ӯ гуфт, ки матни мақола наметавонад аз назари фош шудани сирри давлатӣ баррасӣ шавад.

Дар як соли гузашта Сафронов ҷузъиёти фоҷеаи киштии зериобии ҳастаии "Лошарик", тақдими махфии ҷоизаи Қаҳрамони Русия ба раҳбари Ростех Сергей Чемезов ва рӯй додани як ҳолати фавқулодда дар ҷараёни тамринҳои стратегии "Гром-2019"-ро хабар дода буд.

Моддаи “хиёнат ба давлат” то 20 соли зиндонро пешбинӣ мекунад.

Як хеши президенти Русия Владимир Путин ҳизберо барои муқобила бо фасод таъсис дод

Роман Путин писари амакбачаи президенти Русия Владимир Путин аст

Як хеши президенти Русия Владимир Путин барои раҳбарии ҳизби сиёсие интихоб шуд, ки мегӯяд, кораш аз мубориза бо фасод иборат хоҳад шуд. Роман Путин писари амакбачаи президенти Русия - Игор Путин аст. Ӯ рӯзи 5 июл раиси ҳизби сиёсии “Мардум бар зидди фасод” интихоб шуд. Роман Путин 42 сол дошта, собиқ афсари ФСБ (Хадамоти амнияти федеролӣ) аст. Путин солҳои 1990-ум раҳбарии ин сохторро ба ӯҳда дошт. Ӯ гуфт, ки ҳизбаш дар интихоботи минтақавии соли ҷорӣ ва интихоботи парлумонии соли оянда иштирок хоҳад кард. Мухолифони Русия Путинро дар он муттаҳам мекунанд, ки дар давоми бист соли кораш ба ҳайси президент ва нахуствазири Русия дар кишвар фасоду коррупсия фаровон шудааст. Аз миёни дӯстони Путин чанд нафарашон дар ин муддат миллиардер шудаанд.

Ашраф Ғанӣ аз афзоиши хушунатҳо дар Афғонистон нигаронӣ кард

Конфронси видеоӣ бо ширкати президенти Афғонистон Ашраф Ғанӣ ва фиристодаи ИМА барои Афғонистон Залмай Халилзод. Акс аз 2 июли соли 2020

Президенти Афғонистон Ашраф Ғанӣ ҳушдор дод, ки афзоиши хушунатҳои ҷангҷӯён дар кишвар ба ҷараёни сулҳ бо Толибон “хатари ҷиддӣ” эҷод мекунад. Рӯзи 6-уми июл зимни суханронӣ дар як конфронси онлайнӣ бо ширкати бархе раҳбарони байналмилалӣ, Ашраф Ғанӣ гуфт, ки мизони феълии хушунат дар қиёс бо соли гузашта хеле баланд аст ва ин дар ҳолест, ки кишвар дар ҷараёни омодагӣ ба шурӯи музокироти сулҳ қарор дорад. Ӯ гуфт, “агар Толибон ҷангҳоро идома диҳанд, ҷараёни сулҳи Афғонистон бо чолишҳои ҷиддӣ рӯбарӯ хоҳад шуд”.

Мақомоти Афғонистон ва Толибон ба шурӯи музокироти мустақими байниҳамдигарӣ барои хатми ҷанги қариб бистсолаи кишвар омода мешаванд. Вале мақомоти Афғонистон мегӯянд, баъди се рӯзи оташбас дар охири моҳи май, Толибон дар ҳафтаҳои ахир даст ба куштори садҳо нирӯҳои амниятӣ ва афроди мулкӣ задаанд. Вале Толибон аксари ин ҳамлаҳоро рад карда, танҳо ҳамлаҳо ба нирӯҳои амниятӣ дар манотиқи дурдастро эътироф кардаанд.

Конфронси видеоӣ бо ширкати раҳбарони Афғонистон ва намояндагони 20 кишвар – ИМА, Русия, Покистон, Ҳинд, Эрон, Чин, Қатар, Қазоқистон, Узбекистон ва Озарбойҷон баргузор шуд. Ба иттилои вазорати хориҷаи Тоҷикистон, дар ин конфронс Тоҷикистонро дипломатҳои тоҷик намояндагӣ карданд. Аз миёни созмонҳои байналмиллӣ СММ ҳам ширкат кард. Давоми ҳафтаи ҷорӣ Ғанӣ ду видеоконфронси дигарро ҳам баргузор хоҳад кард.

Ҳукумати рӯ ба ғарби Кобул дар чаҳорчӯби созиши миёни ҷангҷӯёну Вашингтон беш аз 4 ҳазор Толибонро аз зиндонҳо озод карданд. Бар асоси ин созиши моҳи феврал имзошуда Толибон ҳам 750 зиндонии ҳукуматиро озод кардаанд.

Созиши ИМА ва Толибон мегӯяд, то миёнаҳои моҳи июл шумори сарбозони амрикоӣ дар Афғонистон аз 12 ҳазор ба 8600 нафар коҳиш дода мешавад ва дар сурати иҷро шудани ҳама шартҳои созиш, то миёнаҳои соли 2021 нирӯҳои хориҷӣ пурра Афғонистонро тарк хоҳанд кард.

Оғози тафтишот зидди сарони бузургтарин ширкатҳои дорусозии Қирғизистон

Акс аз бойгонӣ.

Хадамоти давлатии мубориза бо ҷиноятҳои иқтисодии Қирғизистон хабар дод, ки зидди раҳбарони бузургтарин ширкатҳои дорусози ин кишвар тафтишотро оғоз кард.

Масъулони хадамот мегӯянд, дар пайи як санҷиш ҳолатҳои беасос боло бурдани нархи дору ва лавозимоти тиббиро дар ин кишвар ошкор кардаанд. Санҷиш дар асоси шикояти сокинон ва ду созмон сурат гирифтааст.

"Бо қарори додгоҳ ва додситонӣ тамоми санадҳои муҳосиботии ширкатҳо мусодира мешавад. Хадамот маҷбур аст, номи ширкату дорухонаҳоеро оммавӣ кунад, ки ҳолатҳои бидуни асос боло рафтани нархи доруву лавозимоти тиббӣ дар онҳо ошкор шудааст. Мардум бояд донад, ки кӣ аз вазъи пешомадаи эпидемиологӣ сӯистифода мекунад", - омадааст дар иттилоияи хадамот.

Вактҳои ахир корбарони шабакаҳои иҷтимоӣ дар Қирғизистон шикоят доранд, ки нархи дору ва лавозимоти тиббӣ дар ин кишвар боло рафтааст. Президенти Қирғизистон Сооронбой Ҷеенбеков дар мулоқот ба вазири тандурустии ин кишвар Собирҷон Абдикаримов дастур дод, ки ба мушкили норасоии дору ва болоравии беасоси нархҳо роҳ дода нашавад.

Интиқоди Мирзиёев аз фаъолияти бонкҳои тиҷории Узбекистон

Шавкат Мирзиёев, раиси ҷумҳури Узбекистон.

Президенти Узбекистон Шавкат Мирзиёев ба зарурати тезонидани раванди шакливазкунии бонкҳои тиҷорӣ дар ин кишвар таъкид кард.

Ӯ дар ин бора 6 июл дар ҷаласаи бахшида ба иҷрои Стратегияи ислоҳоти низоми бонкдорӣ дар Узбекистон барои солҳои 2020-2025 ва тезонидани раванди шакливазкунии бонкҳои тиҷорӣ изҳори назар кард.

Ба огаҳии хадамоти матбуотии президенти Узбекистон, дар ҳоли ҳозир танҳо 6 бонк -- "Ипотекабонк", "Саноаткурилишбонк", "Туронбонк", "Асакабонк", "Алоқабонк" ва "Агробонк" дар робита ба масоили ташхиси молӣ ва таҳияи стратегияи дарозмуддат бо созмонҳои байналмилалии молӣ ҳамкориро оғоз кардаанд. Вале ба гуфтаи Мирзиев, раванди шакливазкунии бонкҳои боқӣ хеле кунд пеш меравад.

Дар ин ҷаласа ҳамчунин решакан кардани фасодкорӣ дар низоми Бонкии Узбекистон ҳам баррасӣ шудааст. Мирзиев аз раҳбарони бонкҳо хостааст, ба хотири решакан кардани коррупсия чораҳои қатъӣ андешанд.

Баъди таъхири чандинмоҳа ҳайати СҶТ ба Туркманистони “бекоронавирус” ворид шуд

Оҷонсии Reuters менависад, баробари ба Туркманистон ворид шудани ҳайати СҶТ, ронандаҳои автобусҳои Ашқобод бо ниқоби тиббӣ дар рӯй сари кор дида шуданд

Як ҳайати Созмони ҷаҳонии тандурустӣ, ки муддатҳо пеш мехост вориди Туркманистон шавад, ниҳоят тавонист шоми 6 июл вориди Ашқобод шавад. Туркманистон ягона кишвар дар Осиёи Марказӣ аст, ки мегӯяд дар ин кишвар касе ба коронавирус гирифтор нашудааст.

Кетрин Смолвуд, раҳбари ҳайат гуфт, ки гурӯҳи ӯ бо мақомоти Туркманистон дар амри омодагӣ барои вокуниш дар қиболи COVID-19 ҳамкорӣ мекунад. Ӯ гуфт, ки ин омодагӣ аз ҳамоҳангиву назорати системаи миллӣ, вазъи эпидемиологиву назорати он, хадамоти лабораторӣ, мудирияти беморон, пешгирӣ аз сироятшавӣ ва назорату хатари муошират иборат хоҳад буд. Ҳайат бояд даҳ рӯзи ояндаро дар Туркманистон сипарӣ кунад. СҶТ давоми ду моҳ дар талоши ин буд, ки ба Туркманистон ворид шуда, иддаоҳои Ашқобод дар заминаи ин ки дар ин кишвар ҳеҷ як ҳодисаи гирифторӣ ба коронавирус ба қайд гирифта нашудааст, таҳқиқ бикунад. Сволвуд дар изҳороташ гуфт, ки мушкили сафари онҳо ба Туркманистон бо маҳдудияти парвоз дар давраи пандемияи коронавирус бастагӣ дошт.

Сволвуд дар изҳороташ гуфт, ки СҶТ ба Туркманистон дар амри бархӯрд бо паёмадҳои дарозмуддати пандемияи коронавирус мусоидат мекунад. Ӯ гуфт, “Туркманстон тавонист як гурӯҳи кории бисёрсохтории муқобила бо COVID-19-ро таъсис диҳад; нақшаи омодагӣ ва вокуниш ба COVID-19-ро тартиб дод; раҳамои ҷилавгирӣ, ташхис ва табобати COVID-19-ро таҳия намуд. Ҳоло ҳукумат иқдоми муҳиме дар самти тағири сохтории муассисаҳо ва кормандони тибби ҳама сатҳҳоро анҷом медиҳад. Ин кор истифодаи муассисаҳову тамрини кормандони тиб(-ро мутобиқ бо COVID-19) дар бар мегирад”.

Бо ин ки мақомоти Туркманистон расман мегӯянд, ҳеҷ ҳодисаи олудашавӣ ба коронавирус ба қайд гирифта нашудааст, гузоришҳои зиёд бар пояи иттилои ходимони тиб ва мақомоти беному сокинони маҳаллӣ аз он шаҳодат медиҳад, ки дар беморхонаҳои маҳаллӣ мардуми зиёд бо нишонаҳои COVID-19 табобат мегиранд.

Таҳлилгари саршиноси ироқӣ баъди таҳдидҳои ҷангҷӯёни Эронгаро кушта шуд

Ҳишам ал-Ҳошимӣ 47 сол дошт ва яке аз таҳлилгарони боэътибори мавзӯи гурӯҳҳои ҷангҷӯи мисли "Давлати исломӣ", Ал-Қоида ва ҳам гурӯҳҳои ҷангии мавриди ҳимояти Эрон дар Ироқ буд

Як сиёсатшиноси маъруфи ироқӣ баъди он ки аз ҷангҷӯёни мавриди ҳимояти Эрон чандин бор таҳдид шудааст, рӯзи 6 июл дар беруни хонааш дар шаҳри Бағдод кушта шуд. Афроди мусаллаҳи мотосиклсавор ба сӯи Ҳишам ал-Ҳошимии 47-сола тир холӣ карда, аз маҳалли ҳодиса фирор намуданд. Ҳошимӣ чанде баъд дар беморхона ҷон дод. Вай яке аз донишмандони бисёр мӯътабар дар масоили гурӯҳи “Давлати Исломӣ”, Ал-Қоида ва гурӯҳҳои ҷангҷӯ дар Ироқ буд. Ӯ як чеҳраи фаъоли телевизионӣ ҳам буд ва назару таҳқиқоти ӯро давлат, журналистон ва муҳаққиқон фаровон истифода мекарданд. Дар ин охирҳо ӯ бештар дар бораи ҷангҷӯёни мавриди ҳимояти Эрон ва фасод дар миёни элитаи сиёсии Ироқ назарҳо медод. То ҳол ҳеҷ гурӯҳ ё созмоне масъулияти ин ҳамларо ба дӯш нагирифтааст, вале ба гуфтаи оилаву дӯстонаш вақтҳои охир ба ӯ ҷангҷӯёни мавриди ҳимояти Эрон зиёд таҳдид мекарданд. Нахуствазири Ироқ Мустафо Козимӣ дар изҳороте гуфт, ки нирӯҳои амниятӣ “тамоми талошашонро ба харҷ медиҳанд”, ки қотилони таҳлилгари сиёсӣ пайдо шаванд. Козимӣ дар моҳи май, замони сари кор омаданаш ваъда дод, ки алайҳи ҷангҷӯёни рӯ ба Эрон, ки дар ҳамлаҳои мушакӣ ба низомиёни амрикоиву муассисаҳои дипломатӣ даст доранд, мубориза мебарад.

Полиси Австрия гузаштаи марди чечентабори кушташударо таҳқиқ мекунад

Мамихан Умаров дар солҳои охир блогнависӣ мекард

Полиси Австрия ба омӯзиши зиндагиномаи паноҳҷӯи чечентабори кушташуда дар ин кишвар пардохтааст. Полис исми қурбониро фош намекунад, вале ба иттилои хабарнигорони Радиои Аврупои Озод/Радиои Озодӣ ин шахс Мамихан Умарови 43-сола мебошад. Умаров рӯзи 4 июл дар як сӯиқасд дар канораҳои Вена ҳадафи тири туфанги ҳамлагаре қарор гирифт ва ҳоло полис мехоҳад мушаххас кунад, ки то куҷо ин куштор дорои ангезаҳои сиёсӣ мебошад. Дар робита бо куштор ду шаҳрванди чечентабори Русия боздошт шудаанд. Матбуоти маҳаллӣ гузориш дод, ки ҳамлагар аз дохили як фурӯшгоҳи таъмири мошин дар шаҳраки Герасдорф ба сӯи қурбонӣ панҷ бор тир кушод ва Умаров то омадани мошини ёрии таъҷилӣ даргузашт. Мамихан Умаров аз соли 2005 муқими Австрия буд ва ду сол баъд мақоми паноҳандагӣ гирифт. Умаров дар гузашта дар сафи ҷудоиталабони чечен хидмат карда, як мунаққиди президенти Чеченистон Рамазон Қодиров гардид. Ду гумонбари боздоштшуда бо гумони куштори Умаров ҳам оғози солҳои 2000-ум ба Австрия рафтаанд. Таҳқиқи қазияро муфаттишони ниҳодҳои таҳқиқоти ҷосусиву зиддитеррористӣ ба ӯҳда гирифтаанд. Гурӯҳҳои ҳуқуқи башар Қодировро, ки аз соли 2007 дар сари қудрат аст, дар ҳодисаҳои зиёди поймолшавии ҳуқуқи башар, шиканҷа, кушторҳои худсарона, нопадидшавиҳо ва кушторҳои ҳадафмандонаи шахсиятҳои сиёсиву рақибони хусусӣ ҳам дар Русия ва ҳам дар хориҷ аз он гунаҳгор мекунанд.

Сироятшиноси калони ИМА: Вазъ бо коронавирус "воқеан ҳам хуб нест"

Озмоишгоҳе дар Сан-Паоло, Бразилия

Дар пасманзари афзоиши ҳодисаҳои гирифтории нав ва бистаришавиҳои бештар дар ИМА сироятшиноси аршад дар ин кишвар гуфт, ки вазъи коронавирус ”вақеан ҳам хуб нест”. Энтони Фаучи рӯзи 6 июл гуфт, ИМА ҳанӯз дар умқи мавҷи аввали вирус аст, чун, ба фарқ аз Аврупову Осиё, ҳеҷ гоҳ ба таври ҷиддӣ хуруҷи бемориро назорат накарда иқтисодро хеле зуд боз кардааст. Президент Доналд Трамп хатари бемориро камтар нишон дода дар боз кардани иқтисод шитоб кард. Ин ҳам дар ҳоле буд, ки дар рӯзҳои наздик шумори олудашудаҳо ба коронавирус дар ИМА ба 3 миллион нафар баробар шуда, рӯзи 6 июл талафот аз 130 ҳазор нафар гузашт. Баъди ИМА кишвари Бразилия ҳам аз шадидан осебдидаҳои коронавирус мебошад. Ин ҷо талафоти инсонҳо 65,487 ва олудашудаҳо 1,6 миллион нафарро ташкил додааст. Баъди он ки бархе матбуот навишт, ки дар вазъи сиҳҳатии президенти Бразилия нишонаҳои олудагӣ ба коронавирус мушоҳида мешавад, Жаир Болсонаро гуфт, ки рӯзи 6 июл озмоиши компютерии шуш ва як тести дигари коронавирусро гузаштааст. Раҳбари популисти Бразилия хатари вирусро ҷиддӣ нагирифт ва дар мазҳари ом ҳам намоишкорона аз пӯшидани ниқоб худдорӣ ва бо тарафдоронаш мулоқотҳо доир кард.

Ҳинд ҳам шоҳиди афзоиши ҳодисаҳои гирифторӣ ба вируси нав шуда, омори гирифорони наваш аз Русия пеш гузаштааст. Дар ин кишвар, ки сеюм дар ҷаҳон шуд, шумори олудашудаҳо 700 ҳазор ва марги инсонҳо 20 ҳазор нафарро ташкил додааст. Вале боз ҳам бовар меравад, ки дар ин кишваре бо 1,3 миллиард ҷамъият омори воқеии олудашавиҳову талафот бештар буда метавонад.

Ҳайати СҶТ оид ба COVID-19 озими Туркманистон шуд

Бахши Созмони ҷаҳонии тандурустӣ (СҶТ) оид ба коронавирус ё худ СOVID-19 рӯзи 6-уми июл озими Туркманистон шуд. Дар ин бора раҳбари Дафтари минтақавии СҶТ дар Аврупо Ханс Клюге дар Твиттер хабар дод.

Як рӯз пеш аз он намояндаи Дафтари минтақавии СҶТ дар Аврупо оид ба ҳолатҳои изтирорӣ Катерине Смоллвуд (Catherine Smallwood) дар суҳбат бо сомонаи расмии СММ гуфта буд, ки маъмурияти созмон ба хотири ҳамкорӣ бо мақомоти Туркманистон дар робита ба омодагӣ ва вокуниш ба вируси ҳамагир озими шаҳри Ишқобод мешавад.

Ҳайат дар ҷараёни сафари даҳрӯзааш талош мекунад ба хотири арзёбии хатару коркарди механизми вокуниш ба вазъ бо мақомҳои баландпоя ва коршиносони Туркманистон дар умури саломатии аҳолӣ мулоқот карда, аз бемористону озмоишгоҳҳои ин кишвар дар минтақаҳо боздид намояд.

Туркманистон аз зумраи кишварҳои ангуштшуморе мемонад, ки иддао дорад, коронавирус ба он роҳ наёфтааст. Ин иддаои раҳбарияти Туркманистон дар ҳолест, ки шумори гирифторони бемории илтиҳоби шуш дар ин кишвар афзоиш ёфтааст.

Дарҳои осорхонаи Луври Порис баъди 4 моҳ дубора боз шуданд

Осорхонаи Луври шаҳри Порисро, ки моҳи марти соли равон ба иллати коронавирус баста шуда буд, дубора боз карданд.

Вале дар осорхона чанд муддати дигар низ баъзе аз маҳдудиятҳо боқӣ мемонанд. Ворид шудан бидуни ниқоб манъ буда, шумори тамошобинон ва ҷойгиркунии онҳо дар толорҳо сахт назорат мешавад.

Лувр, ки аз 13 март баста шуда буд, тақрибан 40 миллион евро зарар дидааст. "Шонси мо омад, ки осорхона давлатӣ аст", - изҳор дошт мудири осорхона Жан-Люк Мартинес.

Рӯзи душанбе дар назди осорхонаи мазкур роҳбаладони ҷаҳонгардон даст ба эътироз зада, гуфтанд, мақомот барои пуштибонии кормандони соҳаи ҷаҳонгардӣ ба андозаи кофӣ талош намекунанд.

Президенти Фаронса Эммануэл Макрон моҳи июн аз "пирӯзии нахустин" бар коронавирус хабар дода буд. Вале маҳдудиятҳое, ки дар ин кишвар роҷеъ ба коронавирус ҷорӣ шудаанд, ҳанӯз бекор нагаштаанд.

Кумаки башардӯстонаи навбатии Узбекистон ба Қирғизистон

Узбекистон барои мубориза бо коронавирус ба Қирғизистон 8 тонна кумаки башардӯстонаи дигар фиристод. Дар ин бора ҳукумати Қирғизистон иттилоъ дод.

Ба иттилои манбаъ, Узбекистон аз ҷумла, дастгоҳҳои сайёри оксиген фиристодааст.

Ҳукумати Қирғизистон ба ҳукумати Узбекистон барои кумак миннатдорӣ баён кардааст.

Аз моҳи марти соли равон ба ин сӯ, ин бори севум аст, ки Узбекистон ба Қирғизистон кумаки башардӯстона мефиристад. Қирғизистон низ дар навбати худ ба Узбекистон кумак кардааст.

Дар Қирғизистон то 6 июли соли равон ҷамъан 7691 кас ба коронавирус мубтало шуда, 92 кас ҷон бохтааст.

Дар Қазоқистон ба хотири коронавирус карантини сахттар ҷорӣ шуд

Нашрияи The New York Times ҷадвалеро таҳия кардааст, ки суръати паҳн шудани коронавирус дар ҷаҳонро дар давоми 14 рӯзи ахир нишон медиҳад. Қазоқистон дар миёни кишварҳои пешгом ҷой дода шудааст.

Дар шаҳри Алматои Қазоқистон 7 июл нақлиёти ҷамъиятӣ пурра аз фаъолият боз монда, тамоми онҳо зиддиуфунӣ мешаванд.

Хабарнигорони бахши қазоқии Радиои Озодӣ бо истинод ба табибон менависанд, ки омори расмӣ -- 48, 5 ҳазор мубтало вазъи воқеии кунуниро бозгӯ карда наметавонад. Дар ҳоли ҳозир дар Қазоқистон мушкили норасоии тестҳои санҷиши вирус, навбатпоиҳои тӯлонӣ дар пушти дари беморхонаву озмоишгоҳҳо ба миён омадааст.

Дар Қазоқистон шумори мубталоён ба коронавирус баъди бекор кардани карантин якбора афзоиш ёфт. Мақомоти ин кишвар маҷбур шуданд, дубора аз 5 июл ба муҳлати 14 рӯз карантини сахттар ҷорӣ кунанд.

Вале ин карантини сахт ба таҷлили Рӯзи пойтахти Қазоқистон, ки бо рӯзи зодрӯзи президенти нахустини ин кишвар Нурсултон Назарбоев рост меояд, дахл накард. Дар кӯчаҳои шаҳри Нурсултон маконҳо барои баргузории барномаҳои консертӣ ва намоишгоҳҳо омода шудаанд. Мақомот дар навбати худ мегӯянд, касеро ба чорабиниҳо даъват намекунанд ва сокинон онлайнӣ тамошо хоҳанд кард.

Дар Қазоқистон шумори расмии умумии мубталоёни коронавирус то ба имрӯз ба 48 ҳазору 574 расида, 232 кас ҷон бохтааст. Дар ҳамин ҳол дар ин кишвар беморони илтиҳоби шуш низ зиёд шуда, танҳо дар моҳи июн 628 кас бар асари он ҷон бохтаанд.

Беморхонаҳои Қирғизистон аз мубталоёни коронавирус "лабрез" шудаанд. ВИДЕО

Президенти Қирғизистон Сооронбой Ҷеенбеков дар ҷаласаи Шӯрои амнияти миллии ин кишвар ба ҳукумат пешниҳод кард, ки манъи равуо миёни вилоятҳоро баррасӣ кунад. Беморхонаҳои шаҳри Бишкек пур шуда, коронавирус ба дигар минтақаҳои Қирғизистон низ паҳн мешавад.

Муовини шаҳрдори Бишкек дар Твиттер навишт, ки дар беморхонаҳои пойтахти Қирғизистон дигар ҷойи холӣ намондааст. Сардухтури ёрии таъҷилии пойтахти ин кишвар низ бо тасдиқи хабар гуфт, намедонанд беморонро ба куҷо баранд.

Толорҳои бузурги варзишӣ ба беморхона табдил дода шудаанд ва ба иллати набудани ҷой дар беморхона ҳатто беморони вазнинро ба чунин беморхонаҳо мебаранд. Дар рӯзи аввали кори бемористонҳои нав дар толорҳои варзишӣ се нафар ҷон бохтанд. Ихтиёриён, ки ба табибон кумак мерасонанд, мегӯянд, либосҳои муҳофизатӣ, ниқоб ва дастпӯш ба таври фоҷеавӣ намерасанд.

Вазорати тандурустии Қирғизистон иттилоъ дод, ки дар шаҳри Бишкек ҳар севумин табиб бемор аст ва табибони боқӣ бо охирин нерӯи худ кор мекунанд. Донишҷӯёни соҳаи тиб низ ба кор ҷалб шудаанд.

"Дар Бишкек 2062 кати иловагӣ омода мешавад. Ҷой холӣ мегардад, вале зуд банд мешавад. Ниёзмандон хеле зиёданд", - изҳор дошт муовини вазири тандурустии Қирғизистон Мадамин Каратаев.

Бештари Қирғизистониҳо аз кори мақомот дар давраи буҳрон норозиянд. Ҳатто сарояндаҳову ситораҳои дигар вазорати тандурустӣ, вакилон ва президентро интиқод мекунанд. Бархе аз онҳо аз мардум узр мепурсанд, ки замоне ҳизби ҳоким ва номзадҳои онро таблиғ кардаанд.

Дар Қазоқистон дар як рӯз 1 403 кас ба коронавирус мубтало шудааст

Дар Қазоқистон давоми як шабонарӯзи ахир 1 403 ҳолати нави мубталошавӣ ба коронавирус ба қайд гирифта шудааст. 814 мубталошуда нишонаҳои бемориро надоранд.

Ҳолатҳои нав аз ҳама бештар дар вилояти Атирау ошкор шудааст. Рӯзи севум аст, ки дар ин минтақаи Қазоқистон рӯзона беш аз 300 ҳолати нав ошкор мешавад. Рӯзи якшанбе дар ин вилоят 325 бемори навро ба қайд гирифта буданд. Атирау аз нигоҳи шумори мубталоён баъди шаҳрҳои Алмато ва Нурсултон дар мақоми севум аст. Дар ин вилоят ҷамъан 5791 кас ба вируси корона гирифтор шудаанд.

Шумори расмӣ ва умумии мубталоёни коронавирус дар Қазоқистон то ба имрӯз ба 48 ҳазор расида, 232 кас ҷон бохтаанд.

Дар Қазоқистон беморони илтиҳоби шуш давоми ҳафтаҳои ахир афзоиш ёфта, санҷиши вируси онҳо манфӣ нишон медиҳад. Мақомот ва табибон мегӯянд, эҳтимол дорад, авҷи бемории илтиҳоби шуш ба паҳн шудани коронавирус рабт дошта бошад.

Мухолифи узбек Бахтиёр Каримро иҷборан карантин карданд

Бахтиёр Карим, яке аз ташаббускорони таъсиси ҳизби нави сотсиал-демократии "Адолат ва рушд" дар Узбекистон ва ҳамзамон сармуҳаррири нашрияи "Адабиёт" ба коронавирус мубтало шудааст.

Мубталошавии сармуҳарири 61-солаи "Адабиёт" ба коронавирус 3-юми июл, баъд аз як моҳи иҷборан фиристодани ӯ ба карантин тасдиқ шудааст. Дар ин бора худи рӯзноманигор ба бахши узбекии Радиои Озодӣ хабар дод.

Ёдрас мешавем, Бахтиёр Каримро ҳамроҳи хонаводаш рӯзи 6-уми июн, баъди он ки маълум шуд ҳамкорони писараш ба коронавирус мубтало шуданд, иҷборан ба макони карантин дар деҳаи "Уртасарой"-и вилояти Тошканд бурданд. Дертар, баъди 11 рӯз ӯро аз хонаводааш ҷудо карда, ба беморхонаи касалиҳои пусти Тошканд бурданд, ки феълан ба макони карантин табдил дода шудааст.

Худи Бахтиёр Карим гуфта буд, бо ангезаҳои сиёсӣ дар карантини иҷборӣ қарор дорад ва нигарон аст, ки онҷо ба коронавирус мубтало хоҳад шуд. "Пештар гуфта будам, ки инҷо одами солим бемор мешавад. Давоми як моҳи карантин ман панҷ бор озмоиш супоридам. Ҳамаи натиҷаҳо, ба ҷуз аз озмоиши ахир манфӣ баромада буданд", - гуфт ӯ.

Бахтиёр Карим мегӯяд, яке аз ҳамоҳангсозони таъсиси ҳизби "Адолат ва рушд" дар Узбекистон мебошад ва гуфтугӯҳо дар робита ба масоили созмондиҳиро вай пеш мебарад. Яке аз ташаббускорони дигари таъсиси ҳизб бо номи Хидирназар Аллақулов ҳам рӯзи 26-уми июн гуфт, карантини иҷбории Бахтиёр Карим ба фаъолиятҳои сиёсияш рабт дорад.

Дар робита бо куштори Мамихан Умаров дар Вена ду нафар боздошт шуд

Мамихан Умаров баъди паноҳанда шудан дар Австрия блогнависӣ мекард

Дар Австрия дар робита бо куштори шаҳрванди чечентабори Русия Мамихан Умаров ду нафар - Сарали Ахтаев ва Салмон Магамадов боздошт шуданд. Дар ин бора вебсайти "Кавказ.Реалии" бо такя ба иттилои яке аз диаспораҳои воқеъ дар Аврупо хабар додааст. Нашрияи Österreich менависад, ки нафаре бо номи Sar Ali A. метавонад иҷрокунандаи куштор бошад. Сарали Ахтаеви 47-сола соли 2002 ва Салмон Магамадови 37-сола дар соли 2004-ум ба Аврупо кӯчиданд. Ҳардуи онҳо мақоми паноҳандагӣ доштанд. Дар бораи эҳтимоли иртиботи онҳо бо мақомоти Чеченистон иттилое дар даст нест, вале гуфта мешавад, ки дар гузашта Магамадов дар маркази зиддитеррористии шаҳри Урус-Мартан кор мекард. Полис гуфт, ки ин ду нафар дар робита бо куштори Умаров дар канораҳои Вена боздошт шуданд. Оҷонсии АРА хабар дод, ки шоми шанбе дар шаҳри Линс марди чечентабори 47-сола боздошт шуд ва ӯро ходимони ҳифзи қонун иҷрокунандаи куштор меҳисобанд. Рӯзи якшанбе гумонбари дуюм боздошт шуд. Ӯ дар ҷои куштор қарор дошт ва нахуст ба унвони як шоҳид бозпурсӣ гардид. Додситонҳо дар баёноти ӯ ихтилофе дарёфтанд ва қарор карданд, ки ӯро аз як шоҳид ба унвони як гумонбар дар даст доштан дар куштор дастгир мекунанд.

Рӯзи 6 июл полиси Австрия гуфт, ки марди кушташуда аз ҳимоят даст кашида буд, вале нагуфт, ки чунин пешниҳод ба Умаров кай карда шуд. Матбуот мегӯяд, ки феълан сабабҳои куштор маълум нест, вале дар миёни фарзияҳо ангезаҳои сиёсӣ доштани ин ҳодиса бештар ба ҳақиқат наздик аст. Дар таҳқиқи ин қазия кормандони идораи ҷосусии маҳаллӣ ва зидди террористӣ ҷалб шудаанд.

Мамихан Умаров, ки аз соли 2007 дар Австрия зиндагӣ мекард, бо лақаби "Анзори венагӣ" ҳам маъруф ва бо блогнависӣ машғул буд. Ӯ чандин бор Рамазон Қодировро интиқод карда ходимони ҳифзи қонуни Русияро дар гӯё даст доштанашон дар куштори ҷудоиталабони чечен дар Аврупо гунаҳкор кардааст. Умаров 4 июл дар шаҳри Герасдорфи канори Вена аз тире, ки ба сараш зада шуд, даргузашт. Ин ҳамла дар тавқифгоҳи мошинҳои назди як маркази тиҷоратӣ рух дод.

Вазири пешини тандурустии Қирғизистон ба бозпурсӣ даъват шуд

Вазири пешини тандурустии Қирғизистон Космосбек Чолпонбоев барои бозпурсӣ ба Хадамоти давлатии мубориза бо ҷиноятҳои иқтисодии ин кишвар даъват шуд. Дар ин бора дафтари матбуотии хадамот иттилоъ додааст.

Бозпурсӣ дар доираи парвандае сурат мегирад, ки зидди мансабдорони Вазорати тандурустии Қирғизистон барои фасодкорӣ ва ҳимояти манфиатҳои ширкатҳои алоҳидаи дорусозӣ боз шудааст.

Расонаҳо пештар хабар дода буданд, ки Хадамоти давлатии мубориза бо ҷиноятҳои иқтисодӣ бо дастури президенти Қирғизистон Сооронбой Ҷеенбеков баргузории озмун барои харидории лавозимоти муҳофизатӣ ва ниқобҳои тиббиро дар моҳи феврали соли равон таҳқиқ кард. Бар асоси хулосаи тафтишот зидди мансабдорон парванда боз гашт.

Рӯзномаи "ПолитКлиника" рӯзи 1-уми июл бо нашри як матлаб навишт, ки мақомоти тандурустии Қирғизистон аз вазъи изтирорӣ сӯистифода карда, ниқобу либосҳои муҳофизатиро 10 баробар гаронтар аз нархи бозор харидаанд.

Тавре рӯзноманигорон муайян кардаанд, ширкати "Фарватер" ниқобҳои тиббиро бо нархи 400 сом (ҳудуди 5 доллар) дастрас кардааст. Дар ҳоле ки ин ниқобҳоро дар Бишкек метавон бо нархи аз 30 то 150 сом харид. Ниқобҳои якдафъаина 25-сомӣ харидорӣ шуда, дар ҳоле ки дар бозор 10 сом фурӯхта мешавад. Дастгоҳҳои нафаси сунъӣ низ гаронтар аз нархи бозор харидорӣ шудаанд. Як дастгоҳи нафаси сунъиро мақомоти қирғиз 2,5 миллион сом харидаанд. Дар ҳоле ки он дар фурӯшгоҳҳои интернетӣ 1 миллион сом арзиш дорад.

Узбекистон аз муҳоҷирон хост, ба хабари боз шудани марзҳо бовар накунанд

Сафорати Узбекистон дар шаҳри Маскав аз шаҳрвандони кишвари худ даъват кард, ба сухани қаллобоне бовар накунанд, ки бар ивази маблағи муайян гузаронидан аз марзи Русия ва Қазоқистонро ваъда медиҳанд.

Бино ба огаҳии сафорат, афроди алоҳидае бо нашри эъломҳо ба муҳоҷирон ваъда медиҳанд, ки бар ивази маблағ то ба марзи Русияву Қазоқистон бурда, дар гузаштан аз марз низ кумак менамоянд.

Вале ба гуфтаи масъулони сафорат, ин гуфтаҳо дуруғ буда, марзҳои Русия, Қазоқистон ва Узбекистон ҳамоно бастаанд.

"Имрӯзҳо дар деҳаи "Болшая Черниговка"-и вилояти Самара, ноҳияи Бузулук ва шаҳри Сол-Илетски вилояти Оренбурги Русия ҷамъшавии дубораи узбекистониҳое мушоҳида мешавад, ки ба хабарҳои беасос дар бораи имкони гузаштан аз марзи Русия ва Қазоқистон бовар карда, аз минтақаҳои гуногун ба онҷо рафтаанд", - афзудааст сафорат.

Сафорати Узбекистон ба муҳоҷирон ҳушдор додааст, ки ҷамъшавии онҳо дар як макон хатари мубталошавӣ ба вирусро бештар хоҳад кард.

Исроил дар бораи маҳвораи наве барои “назорати Эрон” хабар дод

Ofek 16 cубҳи 6 июл аз як маҳалле дар маркази Исроил партоб шуд

Вазорати дифои Исроил эълон кард, ки як маҳвораи нави ҷосусиро роҳандозӣ кардааст ва он тавони анҷоми назорати босифати низомиро хоҳад дошт. Исроил фанновариҳои худро ба хотири назорат аз кишварҳои мисли Эрон, ки барномаи ҳастаии онро як хатар арзёбӣ мекунад, тақвият медиҳад. Вазорати дифои Исроил гуфт, ки маҳвораи навъи Ofek-16 соати 4-и субҳи 6 июл аз маркази Исроил тавассути мушаки “Шавит” партоб шуд. Вазири хориҷаи Исроил Габи Ашкенази тасдиқ кард, ки рӯзи 6 июл Исроил барои хатми таҳдидҳои ҳастаии Эрон иқдом кард. Нашрияи Jerusalem Post дар нақли қавл аз вазир гуфт: “Мо як сиёсати дарозмуддате дорем, ки нагузорем Эрон дорои фанновариҳои ҳастаӣ шавад”. Ӯ афзуд, ки бархе корҳое анҷом шудааст, ки ба гуфтааш, “беҳтараш ногуфта бимонад”. Эрон дар гузашта ҳамеша гуфтааст, ки барномаи ҳастаиаш ҳадафҳои сулҳомез дорад.

Ҳукми Светлана Прокопева: 500 ҳазор рубл ҷарима барои "сафед кардани терроризм"

Светлана Прокопева дар додгоҳи Псков. 6 июли соли 2020

Додгоҳе дар Русия рӯзи 6 июл журналисти муттаҳам дар “сафед кардани терроризм”-ро гунаҳгор ва ӯро ба пардохти 500 ҳазор рубл ҷарима муваззаф кард. Ба Светлана Прокопева наздики 7 соли зиндон таҳдид мекард. Хабарнигори маҳкумшуда гуфт, ки аз болои он шикоят хоҳад кард.

Мурофиаи Прокопева мавриди интиқоди ҷомеаи журналистӣ шуд, ки аз мақомот талаб доштанд Светлана Прокопева сафед ва озод шавад.

Худи Светлана Прокопева дар сӯҳбати баъди ҳукми додгоҳ ба Радиои Озодӣ гуфт:

«Ман хушҳолам, ки дар озодӣ ҳастам ва ин як сабукии воқеӣ аст. Медонед, ба зиндон ҷамъ кардани ҷомадон кори чандон хушоянд нест. Ин ки мӯҳлати воқеии зиндон надоданд, ин як муаффақият ва пирӯзӣ аст ва ман барои ин ман бояд ба онҳое, ки дар пушти дари додгоҳ истода интизоранд, сипосгузор бошам».

Прокопева барои шарҳаш дар заминаи сабабҳои як худкушӣ дар назди идораи ФСБ-и Архангелск соли 2018 дар “сафед кардани терроризм” муттаҳам шуд. Додситонҳо мехостанд, ки Прокопева ба то ҳафт соли зиндон маҳкум шуда, давоми чор сол аз ҳақи кор ба ҳайси журналист маҳрум шавад. Прокопева ҳамчунин бо Радиои Аврупои Озод/Радиои Озодӣ ҳамкорӣ мекард. Ӯ дар додгоҳ гуфт, ки худро бегуноҳ мешуморад ва қазияашро ҳамчун талоши “куштори озодии баён” қаламдор кард. Рӯзи 3 июл дар сухани охиринаш дар додгоҳ Прокопева гуфт: “Ман аз танқид кардани ҳукумат наметарсам”. Ӯ афзуд: “Ман аз интиқод кардани сохторҳои қудратӣ ваё ба онҳо гуфтан, ки шумо хато мекунед, наметарсам. Чаро ки медонам, агар нагӯям, агар дигарҳо нагӯянд, хеле бад мешавад”. Ӯ аз додрас хост, ки вақти ҳал кардани сарнавишти ӯ “принсипҳои бунёдии ҷомеа” фаромӯш намешавад. “Манзури ман озоди баён, мавқеи журналист ва рисолати мабуот аст”, гуфт ӯ. Прокопева гуфт, “Ман кори худро иҷро кардам. Ман кореро, ки берун аз чаҳорчӯби вазифаҳои касбиам бошад, накардаам. Ин ҷиноят нест”.

Прокопева дар робита бо як шарҳаш, ки моҳи ноябри соли 2018 дар радиои “Эхо Москвы в Пскове” ва баъдан дар блогаш нашр карда буд, муҳокима шуд. Матбуоти русӣ гузориш дод, ки марди дар назди идораи ФСБ-и Архангелск таркида дар шабакаҳои иҷтимоӣ ФСБ-ро барои қонуншиканиҳо муттаҳам мекард. Дар шарҳаш Прокопева ин мавқеи ноболиғи худкушикардаро ба фазои сиёсии давраи президент Владимир Путин рабт дод. Ӯ тахмин кард, ки фаъолиятҳои сиёсӣ дар кишвар маҳдуд шуда мардумро ноумед мекунад.

Андрей Пивоваров, ҳамоҳангсози маркази ҳимоят аз ҳуқуқи башари “Русияи боз” баъди эълон ҳукм гуфт, ки онҳо аз болои ҳукми имрӯзаи додгоҳ шикоят хоҳанд кард:

“Албатта, мо хурсандем, ки ҷарима эълон карданд. Вале дар робита бо тамоми ин қазия, мисли Голунов, бояд пурра сафед мешуд ва онҳое, ки парвандаи ҷиноӣ боз карданд, ба ҷавобгарӣ кашида мешуданд. Мо дар бораи ҷарима ёд дорему фаромӯш кардем, ки беш аз як сол ин инсон зери фишор қарор дошт: хонааш кофтукоб шуду мавод мусодира гардад ва Светлана таҳти фишори зиёд зиндагӣ мекард. Дар маҷмӯъ ба назарам, ин ки одами бисёр омад, ба ҳукм таъсиргузор шуд, мақомоти маҳаллӣ бешак дар ҳайратанд, онҳо интро интизор набуданд. Вале бояд то охир рафт ва фишор овард, ки парванда бозбинӣ ва пурра баста шавад ва кормандони ҳифзи қонун, ки ба чунин бебандуборӣ иҷоза медиҳанд, бояд ҷавобгар шаванд”

Дейзи Синделар, иҷрокунандаи вазифаи президенти РАО/РО рӯзи 3 июл дар як изҳороташ гуфт, “мо аз он нигаронем, ки мақомоти русӣ омода ҳастанд бо як хабарнигори маъруф, ки зимнан дар баръакси он чи ки гунаҳгораш мекунанд, кардааст, бераҳмӣ нишон диҳанд. Назари Светлана талоши дарки сабабҳои фоҷеа буд. Назари ӯро ба унвони “сафед кардани терроризм” мурраифӣ кардан – ин нақзи донистаи ҳақиқат ва як амали дорои ангезаҳои сиёсӣ аст, ки ҳадафаш пахши садои интиқод мебошад”.

Ба ҳимояти Прокопева ва талаби озод кардани ӯ беш аз 30 журналист садо баланд карда изҳорот нашр намуданд.

Дар изҳороти рӯзи 3 июл сухангӯи Иттиҳоди Аврупо Петер Стано тақозо кард, ки парвандаи Прокопева бекор шавад ва ин қазияро ҳамчун баёнгари “фазои торафт маҳдудшавандаи кор барои журналистони мустақил ва ҷомеаи мадании Русия” интиқод кард.

Human Rights Watch гуфт, ки таъқиби Прокопева нақзи озодии баён аст ва на танҳо ба ӯ рабт мегирад. Дафтари воқеъ дар Ню-Йорки ин созмон бо пахши изҳороте гуфт: “Ин як пайғоми сӯзандае мефиристад, ки дар Русия матраҳ кардани саволҳои нохушоянд ҷазои сангин хоҳад дошт ва ин ҳамон дарсест, ки мақомот чандин сол аст мехоҳанд ба матбуот бидиҳанд”.

Парвандаи Прокопеваро Созмони амният ва ҳамкорӣ дар Аврупо, Гузоришгарони бидуни марз, Кумитаи дифоъ аз журналистон ва ва Федератсияи аврупоии журналистон интиқод карданд.

Марги рекордӣ бар асари COVID-19 дар Эрон

Машҳад, 11 апрел. Дар фурӯшгоҳи телефонҳои мобил муштариҳо бо васоили ҳифозатӣ қарор доранд

Дар Эрон як рӯзи рекордии марг бар асари вируси нав ба қайд гирифта шуд. Рӯзи 5 июл дар давоми 24 соат фавти инсонҳо бар асари COVID-19 163 нафарро ташкил дод. Рекорди охир 29 июн ва 162 ҳолатро ташкил дода буд. Шумори олудагиҳои нав дар як шабонарӯзи ахир дар Эрон 2560 ҳолатро ташкил додааст. Дар маҷмӯъ дар Эрон 240,438 нафар ба коронавирус гирифтор шуда, шумори талафот 11,571 нафар мебошад. Эрон дар тамоми минтақа кишвари шадидан осебдида бар асари коронавирус ба шумор меравад. Дар ҳафтаҳои ахир дар Эрон афзоиши ҳодисаҳои олудагӣ ба коронавирус мушоҳида мешавад. Президент Ҳасани Рӯҳонӣ рӯзи 4 июл гуфт, ба эрониҳое, ки ниқоби тиббӣ намепӯшанд, хадамоти давлатӣ фароҳам нахоҳад шуд.

Марди дар канори Вена кушташуда эҳтимолан аз мунаққидони Қодиров буд

Мамихан Умаров - акс аз шабакаи YouTube бо "Чеченҳои Австрия"

Як марди паноҳҷӯи дар беруни шаҳри Вена, пойтахти Австрия кушташуда собиқ ҷангии нирӯҳои ҷудоиталаби чечен ва мунаққиди раҳбари Чеченистон Рамазон Қодиров будааст. Дар ин бора ба Радиои Озодӣ манобеи ҷомеаи чечентаборҳои Австрия хабар доданд. Ба иттилои ҳамин манбаъҳо, марди кушташуда Мамихан Умаров буд, ки бо лақаби Анзори венагӣ машҳур мешинохтанд. Мақомот дар Вена ҳуввияти ӯро танҳо чун марди 43-солаи паноҳҷӯ аз Русия муаррифӣ карданд. Ба иттилои онҳо, ин мард дар як тавқифгоҳи мошинҳои марбут ба маркази тиҷоратии воқеъ дар шаҳри Герасдорф ҳадафи тири ҳамлагар қарор гирифт. Тибқи иттилои аввалия, тири туфанд ба сари Умаров расида, ӯ то омадани ёрии таъҷилӣ ҷон дод. Қотили гумонбар чанд соат баъди ин ҳодиса дар як амалиёти вижаи полис дар 200-километрии ғарби Вена дар шаҳри Линс боздошт шуд. Мақомот гуфтанд, ки боздоштшуда як шаҳрванди Русия аст. Полис ва муфаттишон талош доранд сабабҳои ин кушторро муайян кунанд. Сухангӯи сафорати Русия дар Вена ба хабаргузории ТАСС гуфтааст, ки касе бо сафоратхона дар робита бо ин ҳодиса дар тамос нашудааст.

Ёфтҳои бештар

XS
SM
MD
LG