Оҷонси байнулмилалии Moody’s рейтинги қарзии дарозмуддат ва кӯтоҳмуддати Тоҷикистонро бо асъори милливу хориҷӣ дар сатҳи "В3 рушди устувор" арзёбӣ кардааст. Баҳо ё рейтинги қарзии Тоҷикистон дар муқоиса бо арёзбиҳои қаблӣ тағйир накардааст.

Дар изҳроте, ки дафтари Moody’s дар шаҳри Сингапур нашр кард, чанд заъфи иқтисоди Тоҷикистон, аз ҷумла мизони ками “даромад бар сари аҳолӣ”-ро зикр карда, ҳамзамон гуфтаанд кишвар дар арсаи гидроэнергетика зарфияти бузурге барои рушд дорад.

Дар шароити буҳрони ба вуҷудомада аз коронавируси нав мақомдорон дар Тоҷикистон дар сатҳи соли қаблӣ боқӣ мондани рейтинги қарзии кишварро як дастоварди хуб арзёбӣ мекунанд.

Ҷамолиддин Нуралиев, муовини аввали раиси Бонки миллии Тоҷикистон, рӯзи 16-уми июл дар нишасти хабарии ин ниҳод гуфт, “новобаста аз таъсири пандемияи COVID-19 ба иқтисоди кишвар, рейтинги кредитии соҳибихтиёрии давлатӣ дар сатҳи солҳои гузашта (B3 аз ҷониби Moody’s) нигоҳ дошта шуд, ки ин низ аз дастовардҳои муҳим аст”.

Мақомоти Тоҷикистон мегӯянд интишори натиҷаҳои баҳодиҳии рейтинги кредитии соҳибихтиёрии кишвар яке аз талаботи асосии ворид шудан ба бозорҳои байналмилалии сармоя аст ва дар рушди сармоягузорӣ ва ҳамкорӣ бо ташкилоти молиявии байналмилалӣ, бонкҳои сармоягузорӣ ва шарикони рушд нақши мусбат дошта метавонад.

Баъд аз гузориши Радиои Озодӣ, мақомот дар шаҳри Ваҳдат монеи вайрон кардани манзили сокинон дар кӯчаи Наврӯз шудаанд. Соҳибони ҳафт хона дар инҷо рӯзи 21-уми июн шикоят доштанд, ки ширкати бинокории “Муҳиддин Суруш” бе ризояти онҳо ва пешниҳоди ҷуброн бо трактору булдозер ҷойи зисташонро вайрон мекунад. То кунун ду хона тахриб карда шудааст.

Сокинон рӯзи 24-уми ноябр ба Радиои Озодӣ гуфтанд, ки намояндагони ҳукумат баъд аз зуҳри ҷумъа ба назди онҳо омада, “аз тахриби панҷ манзили дигар пешгирӣ карданд”. Маълум нест, ин қарор доимист ё танҳо фурсатест барои музокироти байни ширкати бинокор ва соҳибони ҳавлиҳо.

Яке аз онҳое, ки хонааш вайрон карда шудааст, рӯзи душанбе гуфт, “намояндагони ҳукумат пурсиданд, ки розӣ будед, хонасоз манзилҳоятонро чаппа кунад? Мо ҳама дар ҷавоб гуфтем, ки розӣ нестем.”

Ин ҳамсуҳбати мо афзуд, “агар навор саривақт пахш намешуд, мумкин буд, манзилҳои дигарро ҳам вайрон мекарданд. Пас аз суҳбати намояндаҳои ҳукумати Ваҳдат то имрӯз касе наомадааст.”

Ба иттилои дарёфтии Радиои Озодӣ, ширкати бинокории “Муҳиддин Суруш” низ трактору булдозерҳояшро аз хонаҳои баҳсӣ берун баровардааст. Вале талоши мо барои гирифтани шарҳи намояндагони ширкат дар чаҳор рӯзи охир бенатиҷа буд.

Дар бораи “Муҳиддин Суруш” маълумоти кофӣ дар даст нест. Қарор аст, ин ширкат дар ҷойи ҳавлиҳо дар кӯчаи Наврӯзи шаҳри Ваҳдат бинои баландошёна бисозад, аммо мардум мегӯянд, ба онҳо на ҷуброни зарурӣ дода шуда ва на арзиши хонаашон пардохт шудааст.

Дар пойтахти Тоҷикистон ва шаҳрҳои дигар баҳсҳои вобаста аз манзили наву кӯҳна зиёд аст. Ҳар чанд вақт сокинон шикоят мекунанд, ки ширкатҳои бинокор манзилашонро тахриб карда ҷуброни ночиз пешниҳод мекунанд. Меъморон мегӯянд ягона роҳ ин аст, ки ширкати сохтмонӣ ва соҳибони манзил бар асоси нархи бозор ба тавофуқ расанд.

Масъалаи таъмини сокинон бо манзил аз мушкили рақами аввал дар Тоҷикистон дониста мешавад. Нархи як метри мураббаи хона дар бисёртабақаҳои шаҳри Душанбе аз 400 то 1800 долларро ташкил медиҳад. Коршиносон мегӯянд, агар онро ба даромади аҳолӣ муқоиса кунем, "фарқ байни замину осмон хоҳад буд" ва зоҳиран баҳсҳо барои хона ҳам беасос нест.

Дар Қирғизистон даҳ нафарро бо гумони омодагӣ ба ташкили бетартибиҳои оммавӣ боздошт кардаанд, ки дар миёни онҳо писар ва чанде аз шарикони раисҷумҳури собиқ Алмосбек Отамбоев низ ҳастанд.

Ба гуфтаи муфаттишон, “боздоштшудаҳо ният доштанд, пас аз эълони натиҷаҳои интихобот аввал дар ҷануб ва сипас дар шаҳри Бишкеку минтақаҳои дигари Қирғизистон як силсила гирдиҳамоиро ташкил кунанд.”

“Нақшаи онҳо мусодираи эҳтимолии биноҳои маъмурӣ, шабакаҳои телевизионӣ, иншооти нерӯҳои амниятӣ, аслиҳа ва муассисаҳои ислоҳиро дар бар мегирифт,” – гуфта шудааст дар баёнияи расмӣ.

Ба иттилои мақомот, нерӯҳои амниятии Қирғизистон ҳангоми кофтукоб аз гумонбарон “силоҳу муҳимоти ҷангӣ, норинҷак, васоили иртиботот, нақшаи чорабиниҳо, маводи мухаддир ва 150 ҳазор доллар пули нақд”-ро мусодира кардаанд.

Модари Темирлан Султонбеков, раҳбари Ҳизби сотсиал-демократ ва яке аз боздоштшудаҳо, гуфт, ҳангоми кофтукоб дар хонаи онҳо ба фарқ аз аксу наворҳое, ки Вазорати корҳои дохилӣ паҳну нашр кард, чизе ёфт нашудааст.

Додгоҳи шаҳри Бишкек шоми 23-юми ноябр ба ҳабси чанде аз гумонбарон иҷоза дод.

Аз ҷумла, раҳбари Ҳизби сотсиал-демократ Темирлан Султонбеков, ҷонибдори ӯ Қодирбек Отамбоев, вакили собиқ Шайлообек Атазов ва соҳибкор Урмат Бариқтабасов барои ду моҳи оянда дар боздоштгоҳи муваққатӣ хоҳанд монд.

Интизор меравад, интихоботи пеш аз мӯҳлати порлумонӣ дар Қирғизистон рӯзи 30-юми ноябри соли 2025 баргузор гардад.

Рӯзи 23-юми ноябр ҷасади ду зодаи Тоҷикистонро, ки зоҳиран дар ҷанги Украина кушта шудаанд, ба ватан оварданд.

Тобути Сабзалӣ Раҳмонов аз ноҳияи Восеъ ва Шарофиддин Саидов аз ноҳияи Варзобро аз шаҳри Ростови лаби Дон ба Тоҷикистон интиқол дода, ба наздиконашон супурданд.

Наворҳо аз лаҳзаи фиристодани ҷасадҳо ва ҳамчунин дафни онҳо дар зодгоҳашон дар шабакаҳои иҷтимоӣ мечархад. Дар видеоҳо иддао мешавад, ки ҳарду нафар дар ҷанги Украина кушта шудаанд. Рӯзи марги онҳо маълум нест.

Ҳангоми боз кардани тобути Сабзалӣ Раҳмонов аз ноҳияи Восеъ дар болои ҷасади ӯ либоси сабзи шабеҳи либоси низомиён дида мешавад. Кай ва чӣ гунаву аз куҷо ба ҷанги Украина рафтани ҳалокшудагон ҳоло маълум нест.

Хешовандони аксари онҳое, ки хабари маргашон дар ҷанги Русия дар Украина мерасад, мегӯянд, фарзандонашонро бо фиребу зӯр ба ҷанг бурдаанд.

Мақомоти Тоҷикистон то ин дам танҳо сад мавриди аз зиндонҳои Русия ба ҷанг бурда шудани шаҳрвандони Тоҷикистонро тасдиқ кардаанд.

Тарҳи давлатии Украина бо номи “Зистан мехоҳам” дар чанд моҳи охир номи наздик ба се ҳазор шаҳрванди Тоҷикистонро ҳамчун "зархарид" нашр кардааст, ки бархе аз онҳо дар ҷанги Украина кушта ё нопадид шудаанд.

Қонунҳои Тоҷикистон барои иштирок дар ҷангҳои хориҷӣ ҷазои сахтеро пешбинӣ мекунад, вале дар муддати тақрибан чаҳор соли ҷанг ҳеч додгоҳи кишвар ягон ширкатдори ҷанги Украинаро муҳокима накардааст.

Зикрулло Ҳайдарзода ва Толибшо Назризода, ду мансабдори пешин дар ҳукумати ноҳияи Ҷайҳун (вилояти Хатлон), ки ба ришваситонӣ ва қаллобӣ гумонзад буданд, бо пардохти ҷарима озод гаштаанд.

Ҳайдарзода муовини раис ва Назризода роҳбари дастгоҳи ҳукумати Ҷайҳун буд.

Оҷонси мубориза бо коррупсия дар Тоҷикистон парвандаи Толибшо Назризодаро ду моҳ пеш ба додгоҳ фиристод.

Радиои Озодӣ матни ҳукмро рӯзи 24-уми ноябр дид.

Тибқи он, ҳар кадом пас аз пардохти 102 ҳазор сомонӣ аз мақом ронда шудаанд. Аввалӣ акнун дар яке аз ҷамоатҳои ин ноҳия кор карда, дувумӣ машғули тиҷорат гаштааст.

Ришваситонии онҳо барои тақсими замин ва азхудкунии лӯлаҳои об дар бинои ҳукумати ноҳия дар замони корашон рабт доштааст. Назари онҳо ва вакилонашон ба ҳукм маълум нест, аммо дар парванда зикр шудааст, ки гумонзадҳо дар мурофиа ҷиноятро эътироф кардаанд.

Корбарони шабакаҳои иҷтимоӣ беҷазоӣ ё ҷазои сабукро сабаби густариши фасод дар Тоҷикистон медонанд.

Артиши Исроил эълон кард, ки дар ҳамлаи ҳавоӣ дар атрофи Бейрут, пойтахти Лубнон, Ҳайсам Алӣ Таботабоӣ, марди шумораи ду дар гурӯҳи "Ҳизбуллоҳ"-ро куштааст. "Ҳизбуллоҳ" як гурӯҳи ниманизомӣ ва ҳамчунин як ҳизби сиёсӣ аст ва дар порлумони Лубнон намояндагони худро дорад.

Амрико "Ҳизбуллоҳ"-ро созмони террористӣ муаррифӣ кардааст ва Иттиҳоди Аврупо танҳо шохаи низомии ин гурӯҳро шомили феҳристи сиёҳ кардааст.

Чанд соат пас аз ҳамлаи Исроил, ки баъд аз зуҳри 23 ноябр анҷом шуд, гурӯҳи "Ҳизбуллоҳ" дар баёнияе кушта шудани Ҳайсам Алӣ Таботабоиро, ки сардори Ситоди нерӯҳои мусаллаҳи ин гурӯҳ шинохта мешуд, тасдиқ кард.

Амрико қаблан барои маълумоте, ки боиси боздошти Таботабоӣ шавад, панҷ миллион доллар таъйин карда буд.

Вазорати тандурустии Лубнон гуфтааст, ки дар ҳамлаи Исроил ба як бинои истиқоматӣ дастикам панҷ нафар кушта ва 27 тани дигар захмӣ шуданд.

Дар шаҳри Санкт-Петербург, дуюмин шаҳри калонтарини Русия, маҳдудияти кор кардани муҳоҷирон дар бахши бурдарасонӣ ё курйер эътибор пайдо кард.

Сар аз 22-юми ноябр хориҷиёне, ки иҷозаи кор ё патент ҳам доранд, дигар наметавонанд дар бахши хидматрасонии курйерӣ кор кунанд.

Бар асоси қарори волии Санкт-Петербург, ки моҳи август ба имзо расид, расондани ғизо ва тамоми намуди молу коло барои муҳоҷирон манъ аст.

Мақомоти Санкт Петербург ҳадаф аз қабули ин қарорро "мубориза бо кори пиҳонӣ, беҳтар кардани хадамот дар бахши колорасонӣ ва таъсиси ҷойҳои нави корӣ барои шаҳрвандони Русия, пеш аз ҳама ҷавонон ва донишҷӯён", гуфтаанд.

Расондани молу коло ё курйер як кори даромаднок барои муҳоҷирон гуфта мешуд. Ба гуфтаи ширкатҳои хидматрасонии курйерӣ, Санкт-Петербург ба шаҳре табдил меёфт, ки курйерҳои он дар Русия назар ба ҳамкоронашон дар дигар шаҳрҳо "пули аз ҳама бештар мегирифтанд".

Дар ҳамин ҳол, ба навиштаи "Фонтанка", дар рӯзи аввали маҳдудият, нархи бурдарасонӣ дар бархе аз минтақаҳои Санкт-Петербург беш аз 40 дарсад афзоиш ёфтааст.

Пеш аз ин ҳукумати Санкт-Петербург аз 8-уми ноябри имсол шаҳрвандони хориҷиро аз ҳаққи рондани таксӣ маҳрум кард. Бар асоси ин қарор, ҳоло ҳазорон муҳоҷир, бахусус аз Тоҷикистон, Озарбойҷон, Узбекистон, Молдова ва Украина бекор мондаанд.

Мақомоти Русия дар солҳои ахир маҳдудиятҳо барои муҳоҷирони кориро бештар карда, кор кардани шаҳрвандони хориҷиро дар чандин соҳаҳо манъ кардаанд.

Ин ниҳод рӯзи 21-уми ноябр дар саҳифааш дар Фейсбук хабар додааст, ки писари ноболиғи сокини ноҳияи Шоҳмансури шаҳри Душанбе ба оворагардӣ машғул буд.

Ба гуфтаи пулис, ин зан “писари хурдсоли худро ба савдо дар маконҳои номуайяншуда ва оворагардӣ водор намуда, аз таҳсилоти ибтидоӣ дур сохтааст.”

Назари ин зан ба изҳороти пулис маълум нест, вале дар гузашта сокинон гуфта буданд, ки аз нодориву ночорӣ фарзандони хурдсолӣ худро ба кор ҷалб мекунанд.

Пулиси Душанбе гуфтааст, ки бар асоси моддаи 73-и Кодекси оила бемаҳрум сохтан аз ҳаққи модарӣ фарзанди ин зан ба таҳсил ҷалб шудааст.

Маъмулан, ин модда нисбат ба падару модароне татбиқ мешавад, ки бо сабаби беморӣ, нодорӣ, гирифторӣ ба бемории рӯҳӣ ё майзадагӣ имкони тарбияи фарзандро надоранд ва онҳоро дар хатар мегузоранд.

Дар гузорише, ки 22-юми ноябр дар телевизиони давлатии Тоҷикистон нашр шуд, гуфта мешавад, ки ҳафт нафар кочоқбар пас аз убури марзи Афғонистон бо Тоҷикистон мавриди ҳамла қарор гирифтанд.

Дар гузориш гуфта мешавад, ки ҳодиса шаби 20-уми ноябр дар марзи ноҳияи Ҳамадонӣ бо Афғонистон рух додааст ва субҳи он рӯз, ҷасади ду тан аз қочоқбарон, Шероғо валади Аввалмир ва Ҷумъагул валади Ҳаким, зодагони улусволии Дарқади вилояти Тахори Афғонистон онҷо пайдо шудаанд.

Ба гуфтаи мақомоти КДАМ, дар ин маҳал “116 бастаи маводи мухаддир дар панҷ халта дарёфт ва мусодира шудааст.”

Мақомоти КДАМ дар ин гузориш нагуфтаанд, ки панҷ нафари дигар аз қочоқбарон куҷо шудаанд.

Маълум нест, ки "бесарнишинҳои сохти ватанӣ" кай ва аз ҷониби кадом ширкат дар Тоҷикистон сохта шудаанд.

Тоҷикистон бо Афғонистон беш ҳазор километр хатти марз дорад. Мақомот ҳамеша аз боздошт ё занозанӣ бо кочоқбарон дар ин хатти марз хабар медиҳанд.

Мухолифони ҳукумат иддао мекунанд, ки дар интиқоли маводи мухаддир аз Афғонистон ба Тоҷикистон бархе мансабдорони тоҷик даст доранд, аз ин рӯ, интиқолу фурӯши он дар дохили кишвар коҳиш намеёбад.

Мақомот ин иддаоро рад карда, мегӯянд, бо “гардиши ғайриқонунии маводи мухаддир муборизаи беамон мебаранд.”

Дар як изҳороти эҳтиёткорона Иттиҳоди Аврупо гуфтааст, ки тағйири марзҳо бо истифода аз нерӯи низомиро қабл надоранд.

Зоҳиран, ин ишора ба банди тарҳест, ки ба ихтиёри Русия гузоштани минтақаи Донбасро пешниҳод мекунад.

Рӯзи 20-уми ноябр ҷузъиёти тарҳи ИМА барои хатми ҷанг дар Украина расонаӣ шуд, ки вокунишҳои мухталиферо дар саросари ҷаҳон ба бор вард. Дар ин тарҳ зикр шудааст, ки Украина минтақаи Донбасро пурра бояд ба Русия диҳад. Нисфи ин минтақаро феълан Русия ишғол кардааст, вале муаллифони тарҳ гуфтаанд, ки агар ҷанг ба чунин шева идома кунад, онро Русия пурра ишғол хоҳад кард. Дар ин тарҳ инчунин гуфта шудааст, ки Украина ба НАТО нахоҳад пайваст, вале ҳақ дорад, ба Иттиҳоди Аврупо бипайвандад. Амрико ваъда кардааст, ки Қрими ишғолиро ҳамчун қаламрави Русия ба расмият мешиносад ва ба Украина ваъдаи ҳимоят дар сурати ҳамлаи эҳтимолӣ дар ояндаро хоҳад дод.

Дар изҳороти Комиссияи Иттиҳоди Аврупо гуфта шудааст, ки дар тарҳи иборат аз 28 банд ҷузъиёти расидан ба як сулҳи давомдор вуҷуд дорад, вале ин тарҳ ҳанӯз комил ба назар намерасад. Дар ин изҳорот гуфта шудааст, ки Иттиҳоди Аврупо аз тағйири марзҳо бо истифода аз зӯрро пуштибонӣ намекунад.

Иттиҳоди Аврупо таъкид кардааст, ки ба кумакаш ба Украина идома хоҳад дод.

Нашрияи олмонии Bild навиштааст, ки раҳбарони кишварҳои аврупоӣ мехоҳанд, ки ҳадди ақал чор банди тарҳи пешниҳодии Доналд Трампро тағйир диҳанд.

Ба навиштаи ин нашрия, ба раҳбарони ИА эътирофи Қрим ҳамчун хоки Русия ва супурдани Донбас ба ин кишвар, коҳиши теъдоди сарбозони артиши Украина ва шеваи додани тазмини амниятӣ ба Украина қобили қабул нест.

Доналд Трамп, президенти ИМА дар охириин суҳбати худ гуфтааст, ки имкон дорад, ин тарҳ такмил шавад.

Гуфта мешавад, ки ин тарҳ ба Русия, Украина ва кишварҳои Иттиҳоди Аврупо барои баррасӣ пешниҳод шудааст.

Вазири корҳои хориҷии Чин дар идомаи сафарҳояш ба кишварҳои Осиёи Марказӣ ба Тоҷикистон омадааст.

Дафтари матбуоти президенти Тоҷикистон хабар дод, ки Ван И рӯзи 22-юми ноябр бо Эмомалӣ Раҳмон вохӯрдааст.

Ба гуфтаи манбаъ, дар ин вохӯрӣ додугирифти ду кишвар, мубориза бо терроризм, ифротгароӣ, тундгароии динӣ, ҷинояткории киберӣ ва қочоқи маводи мухаддир баррасӣ шудааст.

Тибқи иттилои расмӣ, Тоҷикистону Чин дар даҳ моҳи соли равон зиёда аз ду миллиард доллар додугирифт доштанд.

Вазорати корҳои хориҷии Тоҷикистон мегӯяд, ҳадаф аз сафари Ван И ширкат дар аввалин Муколамаи стратегии Тоҷикистону Чин аст. Дар дидор бо вазири корҳои хориҷии Тоҷикистон Сироҷиддин Муҳриддин Ван И гуфт, ки Афғонистон ҳамчун ҳамсояи муштараки Чин ва Тоҷикистон барои пешбурди сулҳ, субот ва талошҳои барқарорсозии минтақавӣ ба ҳамоҳангии доимии байни ду кишвар ниёз дорад.

Вазири корҳои хориҷии Чин пеш аз ин дар Қазоқистон, Узбекистон ва Қирғизистон буд.

Сафари Ван И дар ҳоле анҷом мешавад, ки роҳбарони панҷ кишвари Осиёи Марказӣ дар як нишасти камсобиқа бо раиси ҷумҳури Амрико ширкат карданд. Мавзӯи асосии ин нишаст маъданҳои камёби ин кишварҳо буд. Чин солҳо боз ба маъданҳои Осиёи Марказӣ таваҷҷуҳ дорад ва то кунун чандин конҳоро дар Тоҷикистон дар ихтиёр дорад.

Ҳукумати Тоҷикистон барои сохтани роҳи “Хоҷаи Аъло-Ворух” ва обод кардани чорроҳаи "Исфара-Ворух-Раззоқов" имтиёз ё сабукӣ пешниҳод кардааст.

Дар лоиҳаи қонуни буҷаи соли 2026, ки Радиои Озодӣ 22-юми ноябр бо он шинос шуд, ин ду роҳ "иншоотҳои махсусан муҳим" зикр шудаанд.

Бар асоси лоиҳаи қонуни буҷа, фармоишгар ва паймонкор (иҷрокунанда)-и сохтмони роҳи "Хоҷаи Аъло-Ворух" ва навсозии чорроҳаи "Исфара-Ворух ва Ош-Раззоқов" аз пардохти нисфи молиёт (андоз) аз арзиши иловашуда (НДС) ва андоз аз даромади шахсони ҳуқуқӣ озод мешаванд.

Ҳамчунин ворид кардани молу маҳсулот барои сохтани ин ду роҳ пурра аз боҷи гумрукӣ озод буда, фақат нисфи молиёт аз арзиши иловашударо месупоранд.

Мақомот то ҳол нагуфтаанд, ки сохтмони роҳи нави "Хоҷаи Аъло-Ворух" ва навсозии чорроҳаи "Исфара-Раззоқов" кай оғоз мешавад. Музаффар Носирзода, сардори Идораи роҳҳои мошингарди вилояти Суғд моҳи августи имсол гуфт, барои бунёди роҳи алтернативии Ворух бо Қирғизистон ба созиш расидаанд ва сохтмонаш ба зудӣ оғоз хоҳад ёфт.

Ба гуфтаи Носирзода, барои сохтани роҳ ба Ворух лоиҳае тартиб додаанд, ки арзиши он 255 милион сомонӣ аст. "Намояндагони ширкатҳои чинӣ, туркӣ ва эрониро ба онҷо бурдем, масоҳати дарёро танг карда, ба болояш бетон мекунем ва роҳи нав месозем. Барои рафту омади бемалол", - гуфта буд намояндаи идораи роҳсозии Суғд.

Дар чор соли баста будани марзҳои ду кишвар ин минтақа шоҳиди задухӯрдҳои шадид гашт. Ҷанҷол ҳам ин ҷо асосан сари истифодаи роҳи муштарак сурат мегирифт.

Президенти Амрико Доналд Трамп гуфт, омода аст алайҳи Русия "таҳримҳои бисёр сахт" ҷорӣ кунад.

Хабарнигори Fox News зимни мусоҳиба аз Трамп пурсид, ки баъди пешниҳоди тарҳи сулҳ барои Украина оё раиси ҷумҳури Амрико таҳримҳои Русияро лағв мекунад?

Доналд Трамп гуфт, ӯ нияти аз байн бурдани таҳримҳои зидди Русияро надорад ва баръакс омода аст алайҳи Маскав маҳдудиятҳои нав ҷорӣ кунад.

Изҳороти Трамп дар ҳолест, ки маҷаллаи The Wall Street Journal навишт, тарҳи пешниҳодкардаи Амрико барои поёни ҷанг дар Украина, имкони лағви таҳримҳои зидди Маскав ва бозгашти Русия ба ҳаштгонаи бузургро дар назар дорад.

Бо вуҷуди эътирози соҳибони ҳафт манзил (ҳавлӣ) дар кӯчаи Наврӯзи шаҳри Ваҳдат, тавре дар аксу видеоҳо дида мешавад, намояндагони мақомот рӯзи 21-уми ноябр бо трактору булдозер ба тахриби хонаи онҳо шуруъ кардаанд.

Қарор аст, дар ҷойи ҳавлиҳо бинои баландошёна сохта шавад. Мавқеи ширкати бинокор маълум нест. Сокинон мегӯянд, ин кор бе ризояти онҳо ва бе пардохтани ҷуброни кофӣ сурат мегирад.

Дар наворҳои видеоие, ки ба дасти Радиои Озодӣ расид, дида мешавад, намояндагони пулис ва идораҳои дигари интизомӣ дарвозаи манзили онҳоро бо зӯр боз намуда, талаб мекунанд, ки ҷойро барои ширкати бинокории "Муҳиддин Суруш" холӣ кунанд. Онҳо худро "намояндагони қонун" муаррифӣ мекунанд.

"Ман панҷ кӯдак дорам. Хонасозро бигӯед, ба назди мо биояд. Ман бо кӯдакҳоям ба куҷо равам? Ман соҳиби хона ҳастам. Намегузорам, ки дарвозаамро кананд. Нигоҳ кунед, кӯдакҳои маро тарсонданд. Ба ман хона дода, бурда шинонанд, баъд чаппа кунанд," – гуфтааст як зан дар видео.

Соҳибони ҳавлиҳо мегӯянд, аз соли 2022 ба ин тараф ширкати "Муҳиддин Суруш" берозигии онҳо қарори ҳукумати шаҳри Ваҳдатро барои сохтмон дарёфт карда, бо такя ба он талош дорад онҳоро аз хонаашон берун кунад.

Суруш Одинаев, раиси ширкати "Муҳиддин Суруш", ба зангҳои мо ҷавоб надод. Дертар соҳибони манзилҳои баҳсӣ ба Радиои Озодӣ хабар доданд, ки гуё ӯ ваъда додааст, то замони омода шудани хонаҳои нав онҳоро дар манзили иҷора ҷой карда, пули кирояро худаш хоҳад дод.

Дар бораи ширкати "Муҳиддин Суруш" маълумоти кофӣ дар даст нест.

Дар пойтахти Тоҷикистон ва шаҳрҳои дигар баҳсҳои вобаста аз манзили наву кӯҳна кам нест. Ҳар чанд вақт сокинон шикоят мекунанд, ки ширкатҳои бинокор манзилашонро тахриб карда ҷуброни ночиз пешниҳод мекунанд. Меъморон мегӯянд ягона роҳ ин аст, ки ширкати сохтмонӣ ва соҳибони манзил бар асоси нархи бозор ба тавофуқ расанд.

Масъалаи таъмини сокинон бо манзил аз мушкили рақами аввал дар Тоҷикистон дониста мешавад. Нархи як метри мураббаи хона дар бисёртабақаҳои шаҳри Душанбе аз 400 то 1800 долларро ташкил медиҳад. Коршиносон мегӯянд, агар онро ба даромади аҳолӣ муқоиса кунем, "фарқ байни замину осмон хоҳад буд" ва зоҳиран баҳсҳо барои хона ҳам беасос нест.

Дар Чеченистон, ҷумҳурии Қафқози Шимолии Русия, ки солҳо боз зери итоати Рамазон Қодиров қарор дорад, тарзи либоспӯшии занонро маҳдуд кардаанд.

Вазорати фарҳанги Чеченистон дастур додааст, ки занону духтарони маҳаллӣ дар кӯча ва ҷойҳои дигари ҷамъиятӣ бе рӯсарӣ ё рӯймол нагарданд.

Дар дастури дигар пӯшидани либосҳое ба занон манъ шудааст, ки унсурҳои либоси мардона доранд. Масалан, дар ҷомаҳои мардонаи мардуми Қафқоз, ки бо номи черкеска маъруф аст, як раҳ барои тирмонӣ дӯхта мешавад, чун аз он дар давраи ҷанг истифода мекарданд.

Вазорати фарҳанги Чеченистон рӯзи 15-уми ноябр ба тарроҳони либоси миллӣ дар Чеченистон ҳушдор додааст, ки дар таҳияи либосҳои замонавии занона аз ингуна унсурҳо истифода накунанд.

Созмони иҷтимоии “Марем”, ки аз ҳуқуқи занон дар Қафқози Шимолӣ ҳимоят мекунад, гуфт, беҳтар буд кормандони давлатӣ барои даст кашидан аз куштору хушунат мубориза мебурданд.

Дар Чеченистон баъзе қонунҳои исломӣ амал мекунад.

Ҳукумати Русия чанд тарҳи қонунро ба Думаи давлатӣ ё порлумони ин кишвар фиристодааст, ки эҳтимол ҳадафаш ҷалби бештари хориҷиён ба артиш ва сафарбарии онҳо ба ҷанг дар Украина аст.

Муҳтавои ин тарҳҳо рӯзи 20-уми ноябр расонаӣ шуд.

Бар асоси яке аз санадҳо, онҳоеро, ки бар асоси қарордод дар сафи нерӯҳои мусаллаҳи Русия хидмат кардаанд, дар сурати қонуншиканӣ дигар аз кишвар ихроҷ намекунанд, балки ҷарима мебанданд. Ҳаҷми ҷарима аз ҳазор то панҷоҳ ҳазор рубл аст ва ё то дусад соат кори маҷбурӣ.

Дар тарҳи дигар гуфта шудааст, касонеро, ки ба таври қарордодӣ дар артиши Русия хидмат ва ё дар амалиёти ҷангии ин кишвар иштирок кардаанд, ба давлати хориҷӣ таслим накунанд.

Русия дар ҷанги зидди Украина, ки аз моҳи феврали соли 2022 идома дорад, бо зорӣ, зӯрӣ ё зар аз нерӯи хориҷиён, аз ҷумла тоҷикистониҳо, ба таври фаровон истифода кардааст. Наздикони баъзе аз ин афрод ба Радиои Озодӣ шикоят карданд, ки онҳо бо ваъдаи озодӣ ва тақдими шиноснома аз зиндон ё боздоштгоҳ ба майдони даргирӣ бурда шудаанд.

Бино ба омори тарҳи “Зистан мехоҳам” дар Украина, ҳазорҳо шаҳрванди Тоҷикистон аз тарафи Русия дар ҷанг иштирок карда, то кунун марги беш аз панҷсад нафари онҳо тасдиқ шудааст.

Мақомоти Тоҷикистон ҳарчанд иштироки шаҳрвандонро дар “ҷанги бегона” ҷиноят медонанд, дар се соли гузашта касеро барои ширкат дар ҷанги Украина дастгиру муҳокима накардаанд.

ИНЧУНИН, БИХОНЕД:

Дар ҷанги бегона. Рӯйхати ҷонбохтагони ҷанги Украина, ки ба Тоҷикистон нисбат дода мешаванд