Наздикони рӯҳонӣ ва аз чеҳраҳои шинохтаи ҷанги дохилии Тоҷикистон Саид Қиёмиддини Ғозӣ, ки соли гузашта дар ошӯб дар зиндони шаҳри Ваҳдат кушта шуд, мегӯянд, мақомоти интизомӣ якбора се писари ӯро дастгир кардаанд.

Мақомот дар бораи боздошту иттиҳоми бародарон расман чизе нагуфтаанд, вале ба қавли наздикон, Саидмуҳаммади 44-сола рӯзи 17-уми июл, Саидҳасани 33-сола ва Саидмуҳаммадии 25-сола рӯзи 19-уми июли имсол боздошт шудаанд.

Ду писари дигари хонавода – Саидҳусейни Ғозӣ ва Саидяҳёи Ғозиро пас аз як ҳафтаи бозпурсӣ раҳо кардаанд.

Раҷабгул Мусулмонова, ҳамсари Саид Қиёмиддини Ғозӣ, рӯзи 14-уми август ба Радиои Озодӣ гуфт, "барои фарзандон ба боздоштгоҳ хӯроку дору мебарем, вале дар бораи қазияи онҳо чизе намедонем. Мақомот моро низ даъват карда, дар бораи ҷойи зист ва шумораи телефонҳоямон пурсиданд. Мо ҷавоб додем. Аммо вақте пурсидем, ки писарон чӣ айб доранд, гуфтанд, ки ҳоло мефаҳмед."

Талошҳои мо барои маълум кардани иттиҳомҳо ба зидди писарони Саид Қиёмиддини Ғозӣ то ин дам бенатиҷа буд. Як намояндаи мақомоти интизомии Тоҷикистон бо шарти зикр нашудани номаш гуфт, "аллакай нисбат ба онҳо айб эълон шудааст", вале нахост ҷузъиётро ошкор кунад.

Ин ҳафта барои ҳимоят аз ҳуқуқи писарони боздоштшудаи Саид Қиёмиддини Ғозӣ вакили мудофеъ гирифтаанд, вале ба қавли наздикон, "ӯ ҳанӯз барои мулоқот вориди СИЗО нашудааст".

Саид Қиёмиддини Ғозӣ соли 2017 дар шаҳри Санкт-Петербург боздошт ва дар шароити мармуз ба Тоҷикистон оварда шуд. Ӯро ба 25 соли зиндон маҳкум карданд ва дар ошӯби тобистони соли гузашта дар зиндони шаҳри Ваҳдат кушта шуд.

Ӯ ар оғози ҷанги шаҳрвандии Тоҷикистон яке аз муҷриҳои майдони "Шаҳидон" буд. Пас аз шурӯи ҷанг ба Афғонистон паноҳанда шуда, дар ҳайати Иттиҳоди нерӯҳои мухолифини тоҷик фаъолият кард.

Бо имзои Созишномаи сулҳ, Саид Қиёмиддини Ғозӣ ба ватан баргашта, узви зеркомиссияи ҳуқуқии Комиссияи оштии миллӣ буд. То қатъи фаъолияти Комиссияи оштии миллӣ дар ин вазифа кор кард ва барои хизматаш дар татбиқи созишномаи сулҳ аз Ҳукумати Тоҷикистон бо ордени "Шараф" қадрдонӣ шудааст.

Мақомоти маҳаллӣ эълон карданд, ҳашт кӯдаки як то 14-сола рӯзи 19 апрел дар тирандозӣ дар шаҳри Шривпорти аёлати Луизиана кушта шуданд ва шахси гумонбар дар ҷараёни гурез бо мошинаш, аз сӯи пулис кушта шудааст.

Сухангӯи пулиси Шривпорт дар як нишасти хабарӣ гуфт, ки бархе аз ин кӯдакон бо гумонбар риштаи хешутаборӣ доштанд ва тирандозӣ дар се маҳали истиқоматӣ рух додааст.

Ӯ гуфт, дар маҷмӯъ дастикам 10 нафар ҳадафи тирандозӣ қарор гирифтаанд, аммо ҷузъиёте дар бораи вазъияти бозмондагон надод.

Ба гуфтаи ӯ, тирандозӣ каме пас аз соати шаши субҳи якшанбе ба вақти маҳаллӣ рух дод ва ҳамчун даргирии хонаводагӣ дар назар гирифта шудааст.

Ба гуфтаи сухангӯи пулис, гумонбар пас аз тирандозӣ як мошинро дузида ва дар пайи таъқиби кормандони интизомӣ ба як минтақаи ҳамҷавор паноҳ бурд ва аз тири милисаҳо ба ҳалокат расид.

Пулис дар ҳоли таҳқиқи ин ҳодиса аст.

Ба гуфтаи пулис, номи гумонбар пас аз расонидани иттилоъ ба хонаводаҳои қурбониён, нашр хоҳад шуд. "Мо медонем, ки бархе кӯдаконе, ки дар дохил буданд, аз бастагони ӯ буданд",-гуфт як мақоми маҳаллӣ.

Бар асоси омори "Бойгонии хушунатҳои мусаллаҳона", бе шумориши ҳодисаи ин охири ҳафта дар Шривпорт, имсол дастикам 119 тирандозии ҷамъӣ дар Амрико рух додааст, ки ба кушта шудани 117 нафар, аз ҷумла, 79 кӯдак ва захмӣ шудани 458 нафар анҷомид.

Расонаҳои Филиппин аз боздошти ду зодаи Тоҷикистон дар шаҳри Маравии он кишвар, хабар додаанд.

Бино ба навиштаи вебсайтҳои хабарии GMA News ва Филстар, шаҳрвандони 21 ва 22-солаи Тоҷикистон рӯзи 17 апрел дар пайи як амалиёти муштараки Идораи муҳоҷират ва пулиси ин кишвар, дастгир шуданд.

Аз онҳо Ҷомӣ Сафаров ва Абубакр Алимов ном бурда шудаааст ва бино ба ин гузоришҳо, онҳо чанд ҳафта боз дар шаҳри Марави иқомат доштаанд.

Мақомоти Филиппин гуфтаанд, ки боздошти ин ду ҷавон дар доираи чорабиниҳои зиддитеррористӣ сурат гирифта, ҳадафи он пешгирии фаъолиятҳои ифротгароӣ аст.

Дар бораи ин ду ҷавон сокинони маҳаллӣ ба мақомот хабар дода, хостори таҳқиқи сафару иқомати онҳо ба Филиппин шудаанд.

Ҳанӯз маълум нест, ки ин ду ҷавони тоҷик бо чӣ иттиҳоме боздошт шудаанд ва оё ҳузури онҳо дар ин минтақа ба гурӯҳҳои тундрав рабт дорад ё на.

Мақомоти Филиппин гуфтаанд, ки таҳқиқи қазия идома дорад.

Мавқеи худи ҷавонон ва мақомоти тоҷик дар ин бора маълум нест.

Ва низ маълум нест, ки оё онҳо бо вакили мудофеъ таъмин ҳастанд ё не.

Мақомоти Эрон шумораи умумии кушташудаҳо дар ҷанги 40-рӯза бо Амрико ва Исроилро эълон карданд.

Аҳмад Мусавӣ, муовини раиси ҷумҳур гуфт, дар ин ҷанг 3468 кас кушта шудаанд.

Ба иттилои Созмони пизишки қонунии Эрон, 2875 нафар аз кушташудагон мард ва боқӣ занон ҳастанд.

Омори ҷудогона дар бораи кушташудаҳо дар Эрон қаблан аз сӯи Ҳилоли Аҳмари ин кишвар пахш мешуд, аммо он пурра набуд.

Гурӯҳи мудофеи ҳуқуқи башар HRANA қароргоҳаш дар Амрико пештар шумораи кушташудагони ҷангро дар Эрон 3636 нафар эълон карда буд. Ин созмон навишт, 1701 қурбониён ғайринизомӣ ҳастанд ва аз онҳо 254 кӯдак мебошанд.

Ҷанг дар Ховари Миёна бо ҳамлаҳои Амрикову Исроил ба Эрон дар таърихи 28-уми феврал оғоз ёфт ва баъди 40 рӯз ҷонибҳо ба оташбаси дуҳафтаина розӣ шуданд. Ин ҷанг боис ба марги ҳазорҳо тан ва бехонаву ҷой шудани миллионҳо нафар дар Ховари Миёна шудааст.

Кумитаи давлатии сармоягузорӣ ва идораи амволи давлатӣ бинои филиалҳои ду бонки муфлисшударо дар минтақаҳои кишвар ба савдо гузоштааст.

Ба иттилои расмӣ, музояда барои хариди бинои филиалҳои "Тоҷиксодиротбонк" дар шаҳри Исфара, ноҳияҳои Мастчоҳ ва Куҳистони Мастчоҳ рӯзи 5-уми май баргузор мешавад.

Нархи аввали ин биноҳо аз 1 то 8 миллион сомонӣ таъин шудааст.

Ҳамчунин бинои филиали "Тоҷпромбонк" дар шаҳри Гулистон бо нархи аввали 1,7 миллион сомонӣ ба савдо гузошта шудааст.

Намояндагони Кумитаи давлатии сармоягузорӣ нагуфтаанд, ки чанд кас барои харидани биноҳои ин ду бонки муфлисшуда довталаб шудаанд. Баъди соли 2017 чор бонки калони кишвар "Тоҷпромбонк", "Фононбонк", "Тоҷиксодиротбонк" ва "Агроинвестбонк", муфлис шуданд.

Аз ин миён танҳо "Фононбонк" амонати мизоҷонашро пардохт ва муштариёни се бонки дигар то ҳол наметавонанд пулҳои худро аз бонкҳо бозпас бигиранд.

Намояндагони Бонки миллии Тоҷикистон борҳо ваъда додаанд, ки аз ҳисоби фурӯши амволи бонкҳои муфлисшуда маблағи мардум бозпас дода мешавад. Муштариён то ҳол нигарони амонатҳои гузоштаашон ҳастанд.

Дар пайи ҳамлаи марди ношинос ба роҳгузарон дар шаҳри Киев, ҳадди ақал 6 кас кушта ва чанд нафари дигар захмӣ шудаанд. Ҳодиса 18-уми апрел рух додааст.

Ба гуфтаи мақомоти Украина, ҳамлавар аввал хонаи худро дар яке аз баландошёнаҳои Киев оташ зада, сипас дар кӯча ба сӯи роҳгузарон оташ кушодаст. Ин марди 58-сола ҳамчунин чанд нафарро дар дохили маркази савдо асир гирифтааст. Чор нафар аз асиронро озод кардаанд.

Ҳамчунин хабар дода шудааст, ки бо сабаби сӯхтор дар хонаи марди ҳамлавар як кӯдаки чормоҳа аз газ заҳролуд шудаанд.

Дар навори сабткардаи шоҳидон дида мешавад, ки мард бо таппонча роҳгузари аз пешаш баромадаро мепарронад. Ҳанӯз ангезаи ӯ барои ин кор маълум нест. Фарди ҳамлавар дар ҷараёни амалиёти пулис кушта шудааст.

Гуфта шудааст, ки мард зодаи Маскав ва афсари пешини артиши пешин будааст, ки барои авбошӣ аз кор ронда шудааст. Расонаҳои украинӣ гузориш додаанд, ки мард тарафдори ақидаҳои миллатгароёна буд.

Эрон аз тасмими худ барои боз кардани тангаи Ҳурмуз даст кашид.

Сипоҳи посдорон 18-уми апрел эълон кард, ки то вақте Амрико муҳосираи дарёии Эронро қатъ ва равуои озоди киштиҳоро таъмин накунад, тангаи Ҳурмуз ба ҳолати қаблӣ бармегардад ва сахт назорат мешавад.

Хабаргузории Тасним, наздик ба Сипоҳи Посдорон 18-уми апрел навишт, равуои киштиҳо аз тариқи тангаи Ҳурмуз "таҳти мудирият ва назорати шадиди нерӯҳои мусаллаҳ қарор дорад".

Ин хабар дар ҳолест, ки Вазири корҳои хориҷии Эрон 17-уми апрел аз пурра боз шудани тангаи Ҳурмуз барои равуои киштиҳои тиҷоратӣ хабар дода буд.

Муҳаммадбоқир Қолибоф, раиси Маҷлиси Шӯрои исломӣ субҳи шанбеи 18-уми апрел дар вокуниш ба ҳарфҳои Доналд Трамп таҳдид кард, ки агар Иёлоти Муттаҳида ба муҳосираи дарёии бандарҳои Эрон идома диҳад, тангаи Ҳурмуз бори дигар баста хоҳад шуд.

Пеш аз он, раиси ҷумҳури Амрико бо истиқбол аз боз шудани тангаи Ҳурмуз гуфта буд, дастёбӣ ба як тавофуқи сулҳ "бисёр наздик" аст.

Ҳар рӯз ба воситаи тангаи Ҳурмуз то 20 миллион бушка ё 20 дарсад аз нафти ҷаҳон ва наздик ба 30 дарсад гази моеъ мегузарад.

Оҷонсии зидди фасод аз ошкор шудани дуздии беш аз ним миллион сомонӣ дар муассисаҳои кумаки аввалияи тиббии шаҳри Норак хабар додааст.

Ба иттилои Оҷонсӣ, сармуҳосиб ва мудири анбори ин корхона аз тариқи сохтани "супоришномаҳои пулгузаронии таҳрифшуда" 530 ҳазор сомониро азхуд кардаанд. Ин маблағ дар санадҳо ба номи Иттифоқҳои касаба навишта шуда, вале ба гуфтаи Оҷонсии зидди фасод аз сӯи сармуҳосиб ва мудири анбор азхуд шудааст.

Назари ин афрод ба қазия маълум нест.

Алайҳи ин ду корманди муассисаҳои кумаки аввалияи тиббии шаҳри Норак бо иттиҳомҳои азонихудкунӣ ва сохтакории хизматӣ парванда боз шудааст. Ин иттиҳомҳо ҷарима ва ё то 12 сол зиндонро пешбинӣ мекунад.

Идораи Кумаки аввалияи тиббию санитарӣ (КАТС) фаъолияти дармонгоҳҳоро назорат мекунад

Фасод аз мушкилиҳои асосии Тоҷикистон гуфта мешавад.

Доналд Трамп мегӯяд, агар то рӯзи чоршанбеи 22-юми апрел Амрико ва Эрон ба тавофуқ нарасанд, мумкин аст ҷанг дубора оғоз шавад.

Раиси ҷумҳури Амрико ба хабарнигорон гуфт, дар сурати ба даст наомадани созиш, "шоҳиди муҳосира хоҳед буд ва мутаассифона ночор ба аз сар гирифтани бомборон хоҳем шуд".

Трамп афзуд, муҳосираи бандарҳои Эрон ҳамчунон идома хоҳад дошт.

Оташбаси дуҳафтаина байни Исроил ва Амрико бо Эрон, ки бо талоши Покистон ҳосил шуд, чоршанбе ба поён мерасад.

"Бист дақиқа пеш хабарҳои хеле хуб доштем. Ба назар мерасад шароит бо Эрон хеле хуб пеш хоҳад рафт", - гуфт Доналд Трамп, аммо ишорае ба муҳтаво ё манбаи ин ахбор накард.

Доналд Трамп ҳамзамон таъкид кард, ки Эрон силоҳи ҳастаӣ нахоҳад дошт ва таҳти ҳеҷ шароите наметавонад аз киштиҳои убуркунанда аз тангаи Ҳурмуз, таърифа (боҷ) дарёфт кунад.

Президенти Амрико бори дигар таъкид кард, ки урани ғанишуда дар Эрон аз ин кишвар хориҷ карда мешавад. "Ё бо ҳамроҳии эрониҳо ё бо роҳи ғайридӯстона ин корро анҷом хоҳем дод", - афзуд Доналд Трамп.

Дар ҳамин ҳол мақомдорони эронӣ Теҳрон таҳдид карданд, ки агар Иёлоти Муттаҳида муҳосираи бандарҳои Эронро идома диҳад, тангаи Ҳурмуз бори дигар баста хоҳад шуд. Вазири корҳои хориҷии Эрон 17-уми апрел гуфт, дар замони оташбаси байни Лубнон ва Исроил гулӯгоҳи муҳими Ҳурмуз "пурра боз" хоҳад монд.

Эрон дар охири моҳи феврал ва дар посух ба ҳамлаи Исроилу Амрико равуои киштиҳоро дар гулӯгоҳи Ҳурмуз, ки иқтисоди ҷаҳонӣ аз ин гузаргоҳи борики обӣ вобастагии зиёд дорад, маҳдуд кард.

Субҳи 18-юми апрел ду заминларза чанд минтақаи Тоҷикистон, аз ҷумла пойтахтро такон дод. Як зилзила соати 7:54 ва дуввумӣ соати 8:16 сабт шудааст.

Ба иттилои Хадамоти геофизикии Академияи илмҳои Тоҷикистон, қувваи зилзила дар шаҳри Душанбе ва Вилояти Мухтори Куҳистони Бадахшон 2-3 ва дар ноҳияи Тоҷикобод 2 дараҷаро ташкил медиҳад.

Кумитаи ҳолатҳои фавқулодаи Тоҷикистон мегӯяд, "дар натиҷаи ин ҳодиса хисорот ва талафоти ҷонӣ ба қайд гирифта нашудааст".

Маркази ҳарду зилзилаи субҳи 18-уми апрел ҳудуди Афғонистон гузориш шудааст. Баъзе расонаҳои форсизабон, аз ҷумла "Афғонистон интернешнл" гузориш доданд, ки қувваи заминларза дар Афғонистон ба 5,3 дараҷа баробар аст. Маълум нест, ки ин ҳодиса чӣ хисороте дар пай доштааст.

Тоҷикистон ва Афғонистон аз ҷумлаи кишварҳое мебошанд, ки дар баробари зилзила осебпазир мебошанд. Аввали моҳи апрели имсол бар асари зилзила ҳашт нафар дар вилояти Кобули Афғонистон ҷон бохтаанд. Дар ин зилзила 22 хона дар минтақаи Рашти Тоҷикистон зарар дид.

Вазири корҳои хориҷии Эрон гуфт, дар замони оташбаси байни Лубнон ва Исроил гулӯгоҳи муҳими Ҳурмуз "пурра боз" хоҳад монд.

Аббос Ароқчӣ рӯзи 17-уми апрел дар шабакаи иҷтимоии "Х" навишт: "Дар пайи эълони оташбас дар Лубнон, убуру мурури тамоми киштиҳои тиҷорӣ аз тариқи тангаи Ҳурмуз барои боқимондаи давраи оташбас ба таври комил озод эълон мешавад."

Сипас Доналд Трамп, раисҷумҳури Амрико, дар паёме бо ибрози "ташаккур" гуфт, муҳосираи бандарҳои Эрон то замони ба даст омадани созиши Вашингтон ва Теҳрон барои поён бахшидан ба ҷанг идома хоҳад ёфт.

"Эрон ҳамин ҳоло эълон кард, ки гулӯгоҳ комилан боз шудааст ва омодаи убуру мурури озодона аст. Ташаккур," – навишт ӯ.

Эрон дар охири моҳи феврал ва дар посух ба ҳамлаи Исроилу Амрико равуои киштиҳоро дар гулӯгоҳи Ҳурмуз, ки иқтисоди ҷаҳонӣ аз ин гузаргоҳи борики обӣ вобастагии зиёд дорад, маҳдуд кард.

Навор дар Инстаграм:

Ин оброҳа Халиҷи Форсро бо Халиҷи Умон ва бо Уқёнуси Ҳинд мепайвандад. Соҳили шимолӣ аз сӯи Эрон ва соҳили ҷанубӣ аз сӯи Умон ва Имороти Муттаҳидаи Арабӣ назорат мешавад.

Нуқтаи бориктарини гузаргоҳ наздики 33 километр паҳнӣ дорад. Долонҳои киштигард аз ин ҳам бориктаранд: 2-3 километр дар ҳар кадом самт. Ҳар рӯз ба воситаи он то 20 миллион бушка ё 20 дарсад аз нафти ҷаҳон ва наздик ба 30 дарсад гази моеъ мегузарад.

Арабистони Саудӣ, Ироқ, Иморот ва Қатар аз содиркунандагони асосии нафту газ тариқи гулӯгоҳи Ҳурмуз ҳастанд. Ин маҳсулот ба Чин, Ҳинд, Ҷопон, Куриёи Ҷанубӣ ва кишварҳои аврупоӣ фиристода мешаванд.

Ба иттилои хадамоти бритониёии амнияти баҳрӣ, то миёнаи моҳи март ҳудуди 25 киштӣ дар минтақа зарар дидаанд ё ба онҳо ҳамла шудааст. Бисёре аз ширкатҳои соҳиби киштӣ гардишро дар танга ё гулӯгоҳи Ҳурмуз манъ карда буданд.

Фарзонаи Эмомалӣ, духтари раисҷумҳури Тоҷикистон Эмомалӣ Раҳмон, ки соли гузашта дар Вазорати тандурустӣ мансаб гирифт, унвони номзади илми тибро соҳиб шудааст.

Маркази матбуоти вазорат рӯзи 17-уми апрел бо нашри баёнияи расмӣ дар Фейсбук гуфт, ӯ номзадиро дар мавзӯи “Ҷанбаҳои муосири хидматрасониҳои тиббӣ-иҷтимоӣ ба кӯдакон ва наврасон дар марказҳои саломатӣ” ҳимоя намуд.

Маълум нест, маросими дифои номзадии Фарзонаи Эмомалӣ кай ва чӣ гуна сурат гирифтааст.

Ӯ 27 сол дорад ва ба гуфтаи мақомот Донишгоҳи давлатии тиббӣ ва Академияи идораи давлатии Тоҷикистонро хатм кардааст.

Эмомалӣ Раҳмон, 7 духтар ва 2 писар дорад ва мухолифон ӯро барои таъйини фарзандону хешовандонаш ба мақомҳои баланд танқид мекунанд.

Яке аз духтаронаш Озода Раҳмон раиси Дастгоҳи иҷроияи президент ва писараш Рустами Эмомалӣ шаҳрдори Душанбе ва ҳамзамон раиси Маҷлиси Миллӣ, палатаи болоии порлумони Тоҷикистон аст.

Рухшона Эмомалӣ, духтари дигари президент, сафири Тоҷикистон дар Бритониё ва Ирландияи Шимолист. Шавҳари ӯ, Шамсулло Соҳибов, дар ҳуҷҷатҳои расмӣ молики чанд ширкати калон зикр шудааст, ки тиҷорати сӯзишворӣ ва хидматрасониҳои дигарро зери назорат дорад.

Парвина Раҳмонова ширкатеро назорат мекунад, ки ҳамагӣ дар шаш сол бо ёрии робитаҳои сиёсияш ба тоҷири пештози бозори доруи Тоҷикистон табдил ёфтааст. Ширкати "Сифат фарма" аз замони таъсисёбияш дар соли 2017 тендерҳои чандмиллиондолларии давлатиро аз худ мекунад ва шабакаи иборат аз қариб 20 дорухонаро дар пойтахти Тоҷикистон, шаҳри Душанбе, соҳиб аст. Шавҳари ӯ, Ашрафҷон Гулов, сафири Тоҷикистон дар Имороти Муттаҳидаи Араб аст.

Зарина Раҳмон, духтари дигари президент Эмомалӣ Раҳмон, муовини аввали раиси "Ориёнбонк" аст. Раҳбарии “Ориёнбонк”-ро Ҳасан Асадуллозода, додарарӯси раисҷумҳур ба уҳда дорад.

Таҳмина Раҳмон, духтари дигари раисҷумҳур, ҳамроҳи шавҳараш Зарифбек Давлатов машғули тиҷоратанд.

Дар як задухӯрд дар сарҳади Тоҷикистон бо Афғонистон ду кас кушта шудааст. Нерӯҳои марзбонии Тоҷикистон аз онҳо “қочоқбарони маводи мухаддир аз Афғонистон” ном гирифт. Мавқеи тарафи дигар маълум нест.

Ҳодиса шаби 17-уми апрел дар ҳудуди ноҳияи Фархори вилояти Хатлон рӯй дода, як шаҳрванди дигари Афғонистон “бо истифода аз торикӣ фирор кардааст”.

Нерӯҳои марзбонии Кумитаи давлатии амнияти миллии Тоҷикистон дар изҳороте се шаҳрванди Афғонистонро ба убури ғайриқонунӣ аз сарҳад муттаҳам кард.

“Қочоқбарон ба амри сарҳадбонон барои таслим шудан итоат накарда, муқовимати мусаллаҳона нишон доданд. Аз ҷойи ҳодиса ҷасади ду қочоқбари афғон, ду “Калашников”, ду тирдон бо 35 дона тир, як камони шикорӣ ва ду борхалта бо 25 бастаи маводи мухаддир дарёфт ва мусодира карда шуд,” – гуфта шудааст дар изҳорот.

Дар Оҷонси мубориза бо маводди мухаддир дар Тоҷикистон хулоса додаанд, ки маводи мусодирашуда дар марз бо Афғонистон “ҳашиш” аст ва вазнаш 25 кило.

Ҷониби Тоҷикистон дар пайванд ба ин ҳодиса бар асоси чор банди Кодекси ҷиноӣ, аз ҷумла “ғайриқонунӣ соҳиб шудан ва ба дигарон додани лавозимоти ҷангӣ ва моддаҳои тарканда” парванда боз кардаанд.

Дар марзи тӯлонӣ ва назораташ гоҳе душвори Тоҷикистон бо Афғонистон зуд-зуд задухӯрд рух медиҳад. Мақомот аксари онҳоро "узви гурӯҳҳои террористӣ" ва "қочоқбари маводи мухаддир" меноманд. Тасдиқи мустақилонаи он аз манобеи дигар имконпазир нест.

ИНЧУНИН, БИХОНЕД:

Марзро бо Афғонистон бо "деворҳои худӣ" мустаҳкам мекунанд

Доналд Трамп, раисҷумҳури Амрико эълон кард, ки баъди суҳбати телефонӣ бо президенти Лубнон ва нахуствазири Исроил, ин ду кишвар аз шомгоҳи 16-уми апрел ба муддати 10 рӯз оташбас мекунанд.

Трамп дар шабакаи иҷтимоии худ Truth Social навишт, баъд аз суҳбатҳои ахир “ин ду раҳбар барои дастёбӣ ба сулҳ миёни кишварҳояшон” ба оташбас розӣ шудаанд.

Доналд Трамп афзуд, ба Ҷей Ди Венс, муовини раисиҷумҳур, Марко Рубио, вазири умури хориҷӣ ва Ден Кейн, раиси ситоди муштараки Амрико дастур додааст, ки “бо Исроил ва Лубнон барои дастёбӣ ба як сулҳи пойдор ҳамкорӣ кунанд.”

Раисҷумҳури Амрико дар паёми дигар аз раҳбарони Лубнон ва Исроил даъват кард, барои музокира ба Кохи Сафед раванд.

Баъди ҳамлаи Амрико ва Исроил ба Эрон дар охири моҳи феврали имсол, гуруҳи “Ҳизбуллоҳ”-и Лубнон ҳамлаҳо ба хоки Исроилро оғоз кард. Артиши Исроил ҳам дар посух мавзеъҳои “Ҳизбуллоҳ”-ро бомбаборон намуд.

"Ҳизбуллоҳ"-и Лубнон, ки як гурӯҳи ниманизомӣ аст, аз сӯи Эрон ҳимоят мешавад ва Амрикову Исроил онро гурӯҳи террористӣ медонанд. Ин гурӯҳ дар порлумони Лубнон намояндагони худро дорад.

Таваққуфи ҳамлаҳо ба мавзеъҳои “Ҳизбуллоҳ” аз талабҳои асосии Эрон барои оташбас аст. Амрико ва Исроил эълон кардаанд, ки ин созиш шомили Лубнон намешавад.

Аз ин баъд марзбонони Русия ҳақ доштаанд, ки ҳангоми даромадан ба ин кишвар телефон, компютер ва дастгоҳҳои дигари электронии ҳар нафарро тафтиш кунанд.

Дар ин бора намояндагии Вазорати меҳнат, муҳоҷират ва шуғли аҳолии Тоҷикистон дар Русия 16-уми апрел хабар дод.

Ба қавли манбаъ, дар сурати боз накардани дастгоҳ ва пешниҳод накардани он барои санҷиш, шаҳрванди хориҷӣ метавонад барои итоат накардан ба амри корманди мақомоти қудратӣ, ҷазо гирад.

"Барои чунин амал аз 5 то 7 ҳазор рубл ҷарима ё ҳабси маъмурӣ ба муҳлати то 15 шабонарӯз пешбинӣ шудааст. Бо назардошти ин, ба шаҳрвандоне, ки ба Русия сафар менамоянд, тавсия дода мешавад, ки ин талаботро ба инобат гиранд, то ҳангоми гузаштани сарҳад ба мушкилот рӯ ба рӯ нашаванд",-омадааст дар хабарномаи Намояндагии Вазорати меҳнат, муҳоҷират ва шуғли аҳолии Тоҷикистон.

Мақомоти Русия пештар гуфтанд, ҳадаф аз тафтиши телефони муҳоҷирон, таъмини амният ва муқовимат бо ифротгароӣ аст.

Муҳоҷирони тоҷик мегӯянд, баъди ҳамла ба толори "Крокус" дар соли 2024, тафтиши телефон дар сарҳади Русия амри маъмулӣ шудааст.

Баъзе муҳоҷирон дар шабакаҳои иҷтимоӣ аз он шикоят карданд, ки баъди тафтиши телефон, онҳоро аз марз пас гардонданд.

Дар Тоҷикистон, ки бештар аз 10 миллион аҳолӣ дорад, дарёфти кору маоши муносиб осон нест ва ҳар сол садҳо ҳазор муҳоҷир ба Русия ва кишварҳои дигар мераванд.

Владимир Путин, раисҷумҳури Русия, моҳи октябри соли 2025 дар як нишасти хабарӣ дар Душанбе гуфт, бештар аз як миллион шаҳрванди Тоҷикистон дар Русия кору зиндагӣ мекунанд.

Эмомалӣ Раҳмон, президенти Тоҷикистон, ба ин омор эътироз накард, вале ӯ соли 2022 гуфта буд, ки Тоҷикистон ин қадар муҳоҷири корӣ надорад.

Ҳукумати Тоҷикистон меъёри пардохти экологиро барои овардани маводи сӯхт муқаррар кардааст.

Бар асоси қарори ҳукумат, ки Радиои Озодӣ 17-уми апрел бо он шинос шуд, минбаъд аз ҳар тонна бензин, сӯзишвории дизелӣ ва газ 30 евро пардохти экологӣ ситонида мешавад.

Дар санад омадааст, "пардохти экологии мазкур як маротиба зимни воридот бидуни минбаъд ситонидани маблағ барои истифодаи сӯзишворӣ", ситонида мешавад.

Ҷорӣ кардани пардохти экологӣ барои маҳсулоти нафтиро ҳафтаи гузашта Маҷлиси намояндагон, палатаи поёнии порлумони Тоҷикистон низ тасдиқ кард.

Феълан ҳангоми ворид кардан ба Тоҷикистон аз ҳар тонна маҳсулоти нафтӣ 70 евро андози аксиз ситонида мешавад.

Ба ин тартиб акнун аз ҳар тонна маҳсулоти нафтӣ 100 евро молиёт ё андоз мегиранд.

Дақиқ нест, ки 30 евро зам шудани пардохти нав барои ҳар тонна маҳсулоти нафтӣ ба нархи сӯзишворӣ дар дохили кишвар чӣ қадар таъсир мерасонад.

Тоҷикистон қариб ҳамаи сӯзишвории мавриди ниёзашро аз Русия ва Қазоқистон меорад.