Дар чанд ҷумла
Содир Ҷабборов музокиротро роҳи ҳалли баҳсҳои марзӣ донист
Содир Ҷабборов, нахуствазир ва ҳамзамон иҷрокунандаи вазифаи президенти Қирғизистон, хостори ҳалли фаврии баҳсҳои марзӣ бо кишварҳои ҳамсоя, аз ҷумла Тоҷикистон, шудааст.
Ӯ рӯзи 26-уми октябр дар суҳбат бо раиси Хадамоти давлатии марзбонии Қирғизистон гуфтааст, ба зудӣ бо сафари корӣ ба вилоятҳои Бодканд ва Ӯшу Ҷалолобод рафта, бо мушкили марзӣ аз наздик ошно мешавад.
"Барои рух надодани ҳаргуна ҳодиса бояд ҳалли ин масъала кашол наёбад. Сокинони минтақаҳои наздимарзӣ бояд дар шароити оромӣ ва субот зиндагӣ кунанд", -- афзудааст ӯ.
Изҳороти Содир Ҷабборов баъд аз он садо дод, ки рӯзи 25-уми октябр дар марзи Тоҷикистону Қирғизистон тирпарронӣ шуд. Сокинони деҳаи Хоҷа Аълои шаҳри Исфара гуфтанд, лӯлаи оби ошомиданиро дар мавзеи Мулломалик таъмир карданӣ буданд, вале марзбонони қирғиз ба ҳаво тир кушода, монеи корашон шудаанд.
Мақомоти марзбонии ду кишвар фавран ба ин ҳодиса вокуниш карданд. Дафтари матбуотии Хадамоти марзбонии Қирғизистон дар як изҳорот гуфтааст, шаҳрвандони Тоҷикистон дар минтақаи баҳсӣ лӯлаи об мекашиданд.
Хабаргузории давлатии "Ховар" ба нақл аз маркази матбуотии нерӯҳои марзбони Кумитаи давлатии амнияти миллии Тоҷикистон навишт, "ин қитъа қаламрави ҷумҳурии Тоҷикистон аст".
Тоҷикистон ва Қирғизистон 976 километр марз доранд, ки то кунун 504 километри он муайян ва аломатгузорӣ шудааст. Ду тараф бо вуҷуди гузашти солҳо натавонистанд, сари минтақаҳои баҳсбарангез ба созиш расанд ва хатти марзро бикашанд. Аз ин рӯ, зуд-зуд дар ин минтақаҳои баҳсӣ муноқиша сар мезанад.
Содир Ҷабборов ба муайяну аломатгузории марз бо роҳи гуфтугӯ таъкид кардааст. Дафтари матбуоти ҳукумати Қирғизистон аз қавли ӯ навишт: "Ҳамаи мушкил роҳи ҳал дорад. Ҳамгуна масъалаҳоро мешавад бо роҳи гуфтугӯ ҳал кард."
Ҳамаи хабарҳои имрӯзро дар инҷо бихонед
Вакил гуфт, хоҳони ҷазои сангинтарин ба ҳамлагарони "Крокус" ҳастанд
Вакили ҷабрдидагони ҳамла ба толори "Крокус Сити Ҳол"-и Маскав гуфтааст, дар мурофиаи навбатӣ аз додрас талаб хоҳанд кард, ки ба ҳамаи муттаҳамон "ҷазои сангинтарин" дода шавад.
Людмила Айвар дар ин бора рӯзи 16-уми феврал ба хабаргузории расмии ТАСС мусоҳиба додааст. Аз рӯйи қонунҳои Русия ҳукми сангинтарин ҳабси абад аст.
Дар ҳамлаи террористӣ ба "Крокус" дар канори Маскав дар рӯзи 22-юми марти соли 2024-ум 149 нафар нафар кушта ва 609 кас маҷруҳ шуданд.
Муҳокимаи гумонбарон аз моҳи августи 2025 дар Додгоҳи дуюми ҳавзаи ғарбии низомӣ дар Маскав ҷараён дорад.
Дар курсии айбдорӣ 19 нафар нишастаанд, ки аксарашон зодагони Тоҷикистон ҳастанд. Онҳо ба тарҳрезиву мусоидат ва анҷоми ҳамлаи террористӣ муттаҳам мешаванд.
Мурофиа паси дарҳои баста мегузарад ва маълум нест, то куҷо ҳуқуқи гумонбаршудагони ҳамла ба “Крокус” риоя мешавад.
Нерӯҳои қудратии Русия ҳангоми боздошти гумонбарон даст ба азияту шиканҷаи бераҳмонаи онҳо заданд ва созмонҳои ҳомии ҳуқуқ ба мисли Human Rights Watch гуфтанд, ба эътирофи гумонбарон бовар кардан душвор аст.
Ифшои беш аз 240 миллион сомонӣ зарар танҳо дар як шуъбаи БДА
Танҳо дар як шуъбаи Бозрасии Давлатии Автомобилӣ дар Тоҷикистон беш аз 240 миллион сомонӣ, баробар ба 25 миллион доллар, зарари молӣ ошкор шудааст.
Ин рақамро намояндагони Оҷонси мубориза бо коррупсия рӯзи 13-уми феврал дар ҳузури хабарнигорон эълон карданд.
Фирӯз Камолзода, муовини раиси Оҷонси мубориза бо фасод, гуфт: "Нисбат ба масъулони шуъбаи бақайдгирии имтиҳоноти БДА-и Вазорати корҳои дохилии Тоҷикистон парвандаи ҷиноӣ оғоз карда шуд. Барои бе расмиятдарории гумрукӣ ба қайд гирифтан ва додани рақами воситаҳои нақлиёт."
Дар ҷараёни таҳқиқ, ба гуфтаи ӯ, "зиёда аз 253 миллион сомоние, ки барои надодани пардохтҳои гумрукӣ ба миён омада буданд, аз ҳисоби кормандони БДА ва соҳибкорони дигар пурра ба буҷа ворид карда шуд. Парванда нисбат ба онҳо ба суд (додгоҳ) фиристода шуд.”
Дар Оҷонсӣ ҷузъиёти дигар надоданд.
Тамосҳои батакрори мо ба Бозрасии Давлатии Автомобилӣ (ГАИ) бенатиҷа монд ва маълум нест вокуниши онҳо ба чунин иттиҳомот чист.
Навор дар Ютуб:
Зулфиқори Исмоилиён, коршиноси иқтисодӣ, шарҳ дод, ки садҳо миллион сомонӣ зиёни молӣ дар як шуъбаи Бозрасии Давлатии Автомобилӣ бозгӯйи чист.
“Ин нишондиҳандаи фасоди густурда аст дар Тоҷикистон. Ҳамин фасод дар тамоми соҳаҳои Тоҷикистон вуҷуд дорад. Тасаввур кун, ту меравӣ пеши духтур, пул надиҳӣ ягон кас туро нигоҳ намекунад. Дар кӯча агар милиса туро дошт, ронанда бошӣ, ҳатман пул медиҳӣ, дорӣ ё надорӣ,” – афзуд ӯ.
Ба иттилои расмӣ, соли 2025 дар Тоҷикистон зиёда аз 1900 ҷинояти коррупсионӣ ва иқтисодӣ ошкор карда шудааст. Як бахши он ба кори Бозрасии Давлатии Автомобилӣ бармегардад.
Дар гузашта интиқод аз ҳукумати Тоҷикистон бисёр зиёд буд, ки ба кормандони Бозрасии Давлатии Автомобилӣ дасти боз додааст, ки ҳарчӣ хоҳанд мекунанд ва аз ронандагон ҳар вақт хостанд, ришва мегиранд.
Эмомалӣ Раҳмон, раисҷумҳури Тоҷикистон, ду сол пеш фармон дода буд, то теъдоди нозирони роҳ ва ё кормандони Бозрасии Давлатии Автомобилиро 30 дар сад кам кунанд.
Гузориши видеоиро дар инҷо бинед:
Идомаи эътирозҳои ҳомиёни Имрон Хон дар Покистон
Ҷонибдорони Ҷунбиши инсофи Покистон (PTI) се рӯз боз роҳҳоро миёни Пешовар ва вилояти Панҷоб баста, ҳазорон мошини боркаш ва сабукрав дар нимароҳ мондаанд.
Аъзои ин ҳизб аз ҳукумати Покистон хостаанд, ки Имрон Хон, нахуствазири пешин ва бунёдгузори ин ҳизбро, ки дар зиндон бемор аст, ба шифохона интиқол диҳанд.
Тибқи гузоришҳо, биноии чашми рости Имрон Хон бинобар бемориаш 85 дарсад кам шудааст.
Тибқи гузоришҳо, гурӯҳе аз табибон барои дармони чашми Имрон Хон ба зиндон рафтаанд.
Ин дар ҳоле аст, ки 12-уми феврал Додгоҳи олии Покистон ба ҳукумати ин кишвар дастур дод, то пеш аз 16-уми феврал заминаи мулоқоти Имрон Хонро бо пизишкони чашм ва низ тамоси телефонии ӯро бо фарзандонаш фароҳам кунад.
Имрон Хон аз соли 2023 ба ин тараф дар зиндоне дар шаҳри Равалпиндӣ ба сар мебарад. Вай ба чанд иттиҳом, аз ҷумла, фасоди молӣ гумонзад аст. Имрон Хон худро бегуноҳ шумурда, ин иттиҳомотро дорои ангезаи сиёсӣ медонад.
Додситон: Баъзе гурӯҳҳо мехоҳанд робитаҳоро бо Чин вайрон кунанд
Додситони кулли Тоҷикистон мегӯяд, баъзе аз гурӯҳҳо дар Афғонистон мехоҳанд, бо ҳамла ба коргарони чинӣ муносибати Душанбе ва Пекинро вайрон кунанд.
Ҳабибулло Воҳидзода 13-уми феврал дар нишасти хабарӣ гуфт, "баъзе шаҳрвандон ва гурӯҳҳои ҷинояткор ҳастанд, ки тинҷию оромиро намехоҳанд ё мехоҳанд муносибати моро бо давлати Чин вайрон кунанд, вагарна роҳсоз чаро дар вақти корӣ паронда мешавад, махсусан, мардуми Чин?"
Додситони кулли Тоҷикистон аз ягон гурӯҳи мушаххас ном набурд ва танҳо гуфт, "ин куштор аз ҷониби шаҳрвандони Тоҷикистон амалӣ карда нашудааст".
Ба гуфтаи Ҳабибулло Воҳидзода, таҳқиқи ҳамла ба коргарони чинӣ дар марзи Тоҷикистон ва Афғонистон идома дорад.
Дар моҳҳои ноябр ва декабри соли гузашта дар пайи ҳамла аз хоки Афғонистон панҷ коргари чинӣ дар ноҳияҳои Шамсиддин Шоҳин ва Дарвози Тоҷикистон кушта шуданд.
Дар пайи ин ҳамлаҳо коргарони чинӣ аз минтақаҳои марзии Тоҷикистону Афғонистон хориҷ шуданд.
Муҳоҷирони тоҷик ташхиси тиббиро барои патент акнун дар Тоҷикистон месупоранд
Ҳукумати Русия ба муҳоҷирони тоҷик иҷозат додааст, ки ташхиси тиббиро дар Тоҷикистон супорида, санадҳои зарурии пизишкиро ҳаминҷо бигиранд.
Ин санад 9-уми октябри соли 2025 дар Душанбе имзо шуда, ҳафтаи гузашта ҳукумати Русия онро барои тасдиқ ба Думаи давлатӣ (порлумон) фиристод.
Баъзе аз расонаҳои русӣ бо такя ба Вазорати тандурустии Русия навиштанд, ташхиси тиббии муҳоҷирони тоҷик дар нуқтаи махсусе дар яке аз марказҳои тиббии Душанбе анҷом мешавад. Бо супоридани ташхис дар ватан, муҳоҷирони тоҷик дар Русия ташхиси такрорӣ намесупоранд.
Манбаъ мегӯяд, ин нуқтаи тиббӣ дар асоси қонунгузории Русия кор мекунад ва Тоҷикистон ин марказро аз супоридани андоз озод ва дигар пардохтҳои ҳатмӣ озод мекунад.
Ҳамчунин кормандони ин марказ ба махзани маълумот дар бораи гирифторони бемориҳои ВИЧ, гепатит, сил ва бемориҳои сироятии Тоҷикистон дастрасӣ пайдо мекунанд.
Ҳанӯз маълум нест, ки ин ташхиси тиббии муҳоҷирони тоҷик дар ватан дар кадом марказии тиббии Душанбе анҷом мешавад. Мақомоти Тоҷикистон дар ин бора шарҳе надодаанд.
Супоридани ташхиси тиббӣ барои гирифтани иҷозаи кор ё патент дар Русия ҳатмӣ аст.
Владимир Путин, раиси ҷумҳури Русия тирамоҳи соли гузашта эълон кард, ки беш аз як миллион муҳоҷири тоҷик дар он кишвар кор мекунанд.
Гузоришҳо дар бораи таҳқиру бадрафторӣ бо ин муҳоҷирон ва зери по кардани ҳуқуқи онҳо зиёд нашр мешаванд.
Кишварҳои аврупоӣ мегӯянд, Навалний бо заҳри қотиле кушта шудааст
Мақомоти панҷ кишвари аврупоӣ мегӯянд, Алексей Навалний, пешвои мухолифони Русия, ки рӯзи 16-уми феврали соли 2024 дар маҳбас даргузашт, бо моддае бо номи "эпибатидин" заҳролуд шудааст.
Сухан дар бораи як заҳри қотиле меравад, ки аз пӯсти қурбоққаи сокин дар Амрикои Ҷанубӣ ба даст меояд. Рӯзи 14-уми феврал вазоратҳои корҳои хориҷии панҷ кишвар Бритониё, Шветсия, Фаронса, Олмон ва Ҳолланд дар ин бора як изҳороти расмӣ нашр карданд.
Дар баёнияи ин кишварҳо омадааст, ки Навалний бо "токсини марговар" кушта шудааст ва ин хулоса бар асоси ташхисест, ки баъди марги Навалниё дар хориҷ анҷом додаанд. Дар ҳоле ки мақомоти Русия сабаби марги ӯро "табиӣ" мехонанд, кишварҳои Аврупо мегӯянд, Маскав васоил, ҳам ангеза ва ҳам имкони заҳролуд кардани ин сиёсатмадорро дошт.
Эпибатидин як навъи заҳрест, ки тамоми аъзои баданро аз кор меандозад ва инсон қобилияти нафасгириро ҳам аз даст медиҳад. Алексей Навалний рӯзи 16-уми феврали соли 2024 дар зиндони "Полярний волк" дар минтақаи Ямало-Ненетс даргузашт.
Мақомоти зиндон иддао карданд, ки ӯ "баъди сайругашт худро бад ҳис кард ва аз ҳуш рафт". Муфаттишон ҷасади Навалнийро танҳо пас аз ҳашт рӯзи исрори модараш ба пайвандонаш доданд. Ӯро рӯзи 1-уми марти соли 2024 дар оромгоҳи Борисови шаҳри Маскав ба хок супурданд.
Сатҳи таваррум дар Тоҷикистон 3.5 дар садро ташкил додааст
Дар соли 2025 сатҳи таваррум дар Тоҷикистон, ки беқурбшавии асъори миллӣ ва гаронии нархи молу маҳсулотро нишон медиҳад, 3,5 дарсадро ташкил додааст. Ба иттилои Бонки миллӣ таваррум асосан аз ҳисоби болоравии нархи маҳсулоти хурока ва молҳои дигар ба амал омадааст.
Масъулини бонк рӯзи 11-уми феврал гуфтанд, сатҳи таваррум муътадил аст. Ин дар ҳоле аст, ки Оҷонсии омори Тоҷикистон аз афзоиши нархҳо дар бозорҳои кишвар хабар дод. Тибқи иттилои оҷонсӣ, дар соли 2025 нархи равғани офтобпараст то гӯшти гову гӯсфанд ва меваю сабзавот, маҳсулоте, ки ошхона ва дасторхони тоҷиконро бе онҳо тасаввур кардан мушкил аст, аз ҳафт то бисту ҳафт дарсад афзудааст.
Дар аввали соли 2026 дар кишвар арзиши об, нерӯи барқ ва андозаи нишондиҳанда барои ҳисобҳо низ боло рафт. Гаронии нархи маҳсулот ва дигар хидматрасониҳо дар ҳолест, ки дар Тоҷикистон музди миёнаи кормандон 2 ҳазору 727 сомонӣ, камтар аз 300 доллари амрикоиро ташкил медиҳад.
Паёми видеоии Эмомалӣ Раҳмон дар пасманзари овозаҳо дар бораи ӯ
Дафтари матбуоти раиси ҷумҳур дар талоши дигаре барои рафъи сару садо дар бораи сиҳатии Эмомалӣ Раҳмон паёми табрикӣ ва видеоии ӯ ба раҳбари Чинро нашр кардааст.
Дар ин паёми 3 дақиқаӣ, ки рӯзи 15-уми феврал дар вебсайт, канали телеграм ва саҳифаи президенти Тоҷикистон дар Фейсбук нашр шуд, Эмомалӣ Раҳмон бо табрики Си Ҷинпин, раиси ҷумҳурии Чин ба муносибати оғози Соли нави чинӣ аз муносибатҳои дуҷонибаи ду кишвар изҳори хушҳолӣ мекунад.
Ӯ дар ин видео мегӯяд: “Боиси фараҳмандист, ки муносибатҳои дуҷонибаи Тоҷикистону Чин дар қолаби шарикии ҳамаҷонибаи стратегӣ ҷараёни баланди рушдро касб кардаанд.”
Эмомалӣ Раҳмон дар ин видео ҳамчунин мегӯяд: “Бовар дорам, ки дар ҷараёни музокироту тамосҳои сатҳи олии дарпешистодаи соли равон робитаҳои байнидавлатии ду кишварро бо муҳтавои нави амалӣ боз ҳам ғанӣ хоҳем гардонид.” Маълум нест, ки ин музокирот кай ва дар куҷо сурат мегирад ва мӯҳтавои гуфтугуҳо низ чист.
Агарчӣ дар гузашта дафтари матбуоти раёсати ҷумҳурӣ паёмҳои табрикии Эмомалӣ Раҳмон ба раҳбарони кишварҳои ҷаҳонро катбӣ нашр кардааст, аммо паёмҳои табрикӣ ва видеоии ӯ ба раҳбарони хориҷӣ аҳёнан нашр шудаанд. Аз ин рӯ паёми нави ӯро талоше барои рафъи сару садо дар бораи сиҳатии Эмомалӣ Раҳмон медонанд, ки ҳафтаи гузашта дар шабакаҳои иҷтимоӣ зиёд шуд.
Дар байни ҷомеа ва ҳам телевизионҳои давлатӣ кам зоҳир шудани ӯ ҳадсу гумонҳои зиёдеро барангехт, ки ӯ гӯё бемор аст, вале баъзе манобеъ гуфтанд, ки барои истироҳат ба ҷазираи Ҳайнани Чин рафтааст. Эмомалӣ Раҳмон, ки қадам ба 74-солагӣ дорад, аз соли 1992 Тоҷикистонро раҳбарӣ мекунад ва барои ба даст гирифтани тамоми шохаҳои қудрат ва аъзои хонавода ва ҳампаймонҳои наздикашро дар мақомҳои калидӣ ҷой доданаш танқид мешавад.
Бар тибқи Қонуни асосӣ, агар раисҷумҳури Тоҷикистон ба таври муваққат ё доим вазифаашро иҷро карда натавонад, масъулияти раҳбарии кишварро раиси Маҷлиси миллӣ бар уҳда мегирад. Мақоме, ки ҳоло Рустами Эмомалӣ, писари Эмомалӣ Раҳмон, бар дӯш дорад.
Соли гузашта бештар аз 23 000 молиётсупорро ҷарима бастаанд
Дар соли 2025 барои напардохтани андоз ва риоят накардани қонунгузории андоз 23 716 молиётсупорро дар ҳаҷми 115 миллион сомонӣ ҷарима бастаанд. Ба гуфтаи Иброҳим Самадзода, намояндаи Кумитаи андоз аз ин ҳаҷм 100 миллион сомонӣ ба буҷа давлат рафтааст.
Аксари қонуншикании андоз сари вақт нарапдохтани молиёт, пинҳон нигоҳ доштани ҳаҷми даромад, пешниҳод накардани эъломия, сари вақт тартиб надодани сандаҳо, истифода накардани дастгоҳии назорати хазинавӣ мебошад.
Аз аввали соли 2026 ҳаҷми ҷаримаҳо барои қонуншиканӣ дар бахши андоз барои ҳама як баробар афзоиш дода шуд. Нусратулло Давлатзода, раиси Кумитаи андоз сабаби боло бурдани ҳаҷми ҷаримаҳоро бештар кардани масъулияти андозсупорандагон дар пардохти андоз ва риоят кардани талаботи қонуни андоз ва ҷилавгирӣ кардан аз иқтисоди пинҳонӣ ва такрор накардани қонуншиканӣ унвон кард.
Ӯ дар посух ба суоли он ки оё гароншавии ҳаҷми ҷаримаҳо боиси бештар шудани пинҳонкории иқтисодӣ ва гурехтан аз пардохти андоз намешавад, гуфт, баръакс ин масъулияти андозсупорандагонро барои риоят кардани талаботи андоз бештар мекунад.
Собиқадори футболи тоҷик Сулаймон Бобокалонов даргузашт
Собиқ бозигари дастаи “Помир”-и Душанбе ва сармураббии тими миллии футболи занонаи Тоҷикистон Сулаймон Бобокалонов дар синни 66-солагӣ дар шаҳри Челябински Русия даргузашт.
Сулаймон Бобокалонов ба ҳайси нимҳимоятгар фаъолияти худро соли 1978 дар дастаи «Пахтакор»-и Қӯрғонтеппа шуруъ намудааст. Ӯ дар ҳайати ин даста солҳои 1979-80 дар лигаи дуюми чемпионати СССР ҳунарнамоӣ кардааст.
Вай соли 1981 дар ҳайати «Помир»-и Душанбе дар 27 бозӣ иштирок карда, ду гол задааст. Баъди танаффуси дусола Бобокалонов соли 1984 боз ба «Помир» баргаштааст. Баъдан соли 1987 дар ҳайати «Вахш»-и Қӯрғонтеппа дар лигаи дуюми чемпионати СССР бозӣ кардааст.
Пас аз пошхӯрии СССР солҳои 1993-94 дар мусобиқоти қаҳрамонии Тоҷикистон узви дастаи “Шодмон”-и Ҳисор буд. Соли 1996 дар ҳайати тими «Ситора»-и Душанбе барандаи медали нуқраи қаҳрамонии Тоҷикистон гардидааст. Дар ҷараёни мавсим ӯ ба дастаи «Бофанда»-и Душанбе гузаштааст.
Вай соли 1993 дар ҳайати дастаи мунтахаби миллии Тоҷикистон чаҳор бозӣ анҷом додааст.
Фаъолияти мураббигии Сулаймонов дар футболи занона мақоми хоса дошт. Ӯ солҳои тӯлонӣ мураббии дастаи «Ласточка»-и Душанбе буда, тими миллии занонаи Тоҷикистонро роҳбарӣ кардааст. Ба шарофати талошҳои ӯ бисёре аз духтарон тавонистанд, ки малакаи худро сайқал дода, ҳамчун футболбози касбӣ фаъолият намоянд.
Эмомалӣ Раҳмон пас аз ним моҳи "камнамоӣ" пайдо шуд
Расонаҳои давлатии Тоҷикистон пас аз ним моҳи дида нашудани Эмомалӣ Раҳмон дар мазҳари ом аксу наворҳои мулоқоти ӯ бо раҳбари як бонки минтақавиро нашр карданд.
Эмомалӣ Раҳмон, президенти Тоҷикистон, бори охир рӯзи 28-уми январи имсол дар як ҷаласаи ҳукумат дида шуд ва баъд аз он, аз ҳузури ӯ дар чорабиниҳои давлатӣ ҳеч аксу наворе нашр накарданд.
Ин вазъ ва хомӯшии мақомот сабаби пайдо шудани сару садо дар бораи вазъи сиҳатии ӯ шуда буд.
Сомонаи президенти Тоҷикистон рӯзи 14-уми феврал бо нашри аксу видео хабар дод, ки Эмомалӣ Раҳмон бо Тсзоу Ҷиай, раҳбари Бонки Осиёии Сармоягузориҳои Зерсохторӣ мулоқот намуда, дар бораи тарҳи сохтмони нерӯгоҳи Роғун ва бозсозии нерӯгоҳи Норак суҳбат кардаанд. Ҳадафи ин мулоқот ҷалби “маблағгузории дарозмуддат” номида шудааст.
Бонки Осиёии Сармоягузориҳои Зерсохторӣ дар Чин таъсис ёфтааст ва Тоҷикистон солҳо боз бо он ҳамкорӣ дорад.
Мақомот ҳеч шарҳе надоданд, ки Эмомалӣ Раҳмон ним моҳи ахир куҷо буд.
Баъзе аз манбаъҳои Радиои Озодӣ рӯзи 10-уми феврал гуфта буданд, ки “ӯ дар рухсатӣ аст” ва “дар хориҷ аз Тоҷикистон қарор дораду муолиҷа мегирад”. Камаш ду нафари онҳо дар бораи эҳтимол дар Чин будани ӯ хабар доданд.
Бино ба ёфтаҳо, ҳавопаймои президент рӯзи 28 ва 29-уми январ дар фазои Душанбе сабт шудааст, аммо дар бораи самти парвози он ва ҷойи фурудоӣ маълумот дастрас нест. Ҳавопаймо рӯзи 13-уми феврал ба Душанбе баргаштааст.
Дар рӯзҳои нонамоён будани президент писари калонии ӯ Рустами Эмомалӣ, раиси Маҷлиси миллӣ, рӯзи 6-уми феврал шӯро ва иҷлосияи панҷуми табақаи болоии порлумони Тоҷикистонро баргузор кард. Як акс аз ин ҷаласа, ки се раиси вилоят дар назди ӯ рост истодаанд, сарусадои бештареро дар бораи интиқоли қудрат аз падар ба писар ба миён овард.
Эмомалӣ Раҳмон аз соли 1992, ду соли аввал ба ҳайси раиси Шӯрои олӣ ва боқимонда дар мақоми президент, Тоҷикистонро раҳбарӣ мекунад.
Вай дар беш аз се даҳаи охир қудратро мутамарказ карда, бештар аъзои хонавода ва ҳампаймонҳои наздикашро дар мақомҳои калидӣ ҷой додааст.
Тибқи Қонуни асосӣ, агар раисҷумҳури Тоҷикистон ба таври муваққат ё доим вазифаашро иҷро карда натавонад, масъулиятро раиси Маҷлиси миллӣ бар уҳда хоҳад гирифт. Мақоме, ки ҳоло Рустами Эмомалӣ, писари Эмомалӣ Раҳмон, бар дӯш дорад.
Қоҳир Расулзода ва Содир Ҷабборов дар Бишкек аз чӣ гуфтанд?
Қоҳир Расулзода, нахуствазири Тоҷикистон, бо Содир Ҷабборов, раисҷумҳури Қирғизистон, ки кишвараш дар як ҳафтаи охир шоҳиди баъзе дигаргунӣ дар сохтори амниятӣ ва боздошту истеъфои чанд мансабдори баландпоя аст, ҳамкориҳои дуҷонибаро баррасӣ кардааст.
Дидору гуфтугӯйи онҳо рӯзи 13-уми феврал дар Бишкек гузашт. Ҷое, ки Расулзода барои ширкат дар Шӯрои байниҳукуматии Тоҷикистону Қирғизистон рафтааст.
"Зарурати муттаҳид намудани талошҳо барои мубориза бо таҳдидҳои фаромиллӣ, аз ҷумла терроризму ифротгароӣ, қочоқи маводи мухаддир ва ҷинояткории созмонёфта" аз ҷумлаи мавзъуҳои суҳбати ҷонибҳо будааст.
Тоҷикистону Қирғизистон 1006 километр марз дошта, барои таъйини хати он муддатҳо баҳсу задухӯрд доштанд. Танҳо дар солҳои 2021 ва 2022 аз ду ҷониб даҳҳо кас куштаву захмӣ ва даҳҳо хона сӯхтаву вайрон шудааст.
Ду кишвар моҳи марти соли 2025 созиши ба гуфтаашон таърихии ҳалли низоъро имзо карданд. Аз он ба баъд гузаргоҳҳои марзӣ боз ва додугирифт афзоиш ёфт.
Раиси Девони вазирони Қирғизистон Одилбек Қосималиев гуфтааст, соли гузашта Тоҷикистону Қирғизистон ба 36 миллион доллар додугирифт карданд, ки дар муқоиса ба соли 2024 қариб бисту чор маротиба бештар аст. Ду кишвар ният доранд, гардиши молро то 500 миллион доллар бирасонанд.
Қамчибек Тошиев баъди барканорияш ба Бишкек баргашт
Қамчибек Тошиев баъд аз се рӯзи барканорияш аз мақоми раиси Кумитаи давлатии амнияти миллии Қирғизистон шаби 13-уми феврал ба Бишкек баргашт. Тарафдоронаш мегӯянд, шояд ӯ нишасти хабарие барпо кардаву ба саволҳо дар бораи таҳаввулоти охирин посух диҳад.
Тошиев дар Олмон буд ва ҳамроҳонаш гуфтанд, ӯ дар ин кишвари аврупоӣ табобат мегирифт.
Содир Ҷабборов, президенти Қирғизистон, рӯзи 10-уми феврал фармони аз мақоми раиси Кумитаи давлатии амнияти миллӣ озод кардани ин ҳампаймонашро имзо кард. Вай гуфт, қарори барканории Тошиев бо мақсади “пешгирӣ аз ҷудоиандозӣ дар ҷомеа ва миёни сохторҳои ҳукуматӣ” қабул шуд.
Худи Ҷабборов, ки бори аввал ин мавзуъро рӯзи ҷумъа барои нашрияи Kabar.kg шарҳ дод, гуфт, пеш аз қабули ин қарор бо Тошиев телефонӣ гап зада, сипас онро имзо намуд. Вале Тошиев дар изҳороте аз Олмон барканориашро як қарори “ногаҳонӣ” номида буд.
Дар пайи ин, се муовини Тошиев ҳам аз мақом маҳрум шуда, дар Кумитаи амният дигаргунии сохторӣ сурат гирифт. Рӯзи панҷшанбе раиси порлумон Нурланбек Турғунбек уулу, ки ӯро як шахси наздик ба Тошиев меномиданд, аз мақомаш канор рафт.
Содир Ҷабборов гуфт, баъзе аз одамон “пушти номи Тошиев пинҳон шуда” ба сиёсатмадорон, ходимони иҷтимоӣ ва рӯшанфикрон занг задаву “ба тарафдорӣ аз генерал” даъват кардаанд.
Аз 75 имзогузори нома ба президенти Қирғизистон дар бораи барпо кардани интихоботи пеш аз муҳлати президентӣ панҷ нафар дастгир шудаанд. Ин панҷ нафарро, ки дар байни онҳо собиқ муовини нахуствазир, муовини пешини вазири умури дохилӣ, вакили собиқ ва дигарҳо ҳастанд, дар талоши ташкили бетартибиҳои оммавӣ гумонбар медонанд.
Баъзе аз коршиносон мегӯянд, ки давоми панҷ соли гузашта Ҷабборов ва Тошиев як навъ тавозуни нерӯ дар қудрат ва раҳбарии кишварро таъмин мекарданд.
Парванда ба зидди модар. Ҷузъиёти марги се узви як хонадон дар Исфара
Додситони вилояти Суғд баъди беш аз ду моҳ ҷузъиёти марги Искандар Шафеиён (Маликӣ) ва ҳамсару як фарзандашро дар шаҳри Исфара шарҳ дод. Ҳусейн Давлатзода рӯзи 13-уми феврал дар нишасти матбуотӣ гуфт, онҳо аз заҳролудшавӣ аз газ ҷон додаанд.
"Искандар Шафеиён, ҳамсараш Муаттархон Муҳаммадиева ва фарзанди ноболиғашон Сумаяхон Искандарзода шаби 7 ба 8-уми декабри соли 2025 ба ҳалокат расида, ноболиғ Рухшона Искандарзода дар ҳолати вазнин дар беморхона бистарӣ карда шуд," -- афзуд ӯ.
Пештар баъзе аз ҳамсоягон сабаби марги се узви ин хонадонро хӯроки заҳролуд гуфта буданд. Дертар бархе аз пайвандони ҳамсари Искандар Шафеиён (Маликӣ) бо фиристодани чанд аксу навор изҳор доштанд, ки "ҳолатҳои шубҳаовар дар марги онҳо ва бемор шудани кӯдакон вуҷуд дорад".
Додситони вилояти Суғд рӯзи ҷумъа гуфт, дар ҳоли ҳозир нисбат ба модари Искандар Шафеиён (Маликӣ) танҳо барои даъват накардани "Ёрии таъҷилӣ" ва "дар хатар гузоштани ҳаёти наздикон" парванда боз шудааст.
"Ҳикмат Шодиева, модари марҳум Шафеиён, дар хонаи писараш қарор дошта, ба беморон ягон ёрӣ нарасондаст. Бинобар ин, 23-юми январи соли 2026 нисбат ба ӯ бо моддаи 127, қисми 3, банди А-и Кодекси ҷиноӣ парванда оғоз карда шуд," – гуфт Ҳусейн Давлатзода. Ин банди қонун аз 2 то 7 сол зиндонро пешбинӣ мекунад.
Назари Ҳикмат Шодиева ба иттиҳом маълум нест. Кӯшишҳои мо барои тамос бо модари Искандар Шафеиён (Маликӣ), ки шоҳиди ҳодиса дониста мешавад, то ин дам натиҷа надод.
Искандар Шафеиён (Маликӣ) солҳои дароз дар идораҳои давлатии вилояти Суғд кор кардааст. Вазифаи охиринаш мудири шуъбаи ташкилӣ ва кор бо кадрҳои дастгоҳи ҳукумати Исфара буд. Ӯ тақрибан ду сол пеш аз ин вазифа ронда шуд ва тибқи иттилои дарёфтӣ соҳибкорӣ мекард.
Шафеиён ҳангоми муноқишаи шаби 28 ба 29-уми январи соли 2022 дар марзи Тоҷикистону Қирғизистон сахт захмӣ шуда буд.
922 млн. сомонии дигар. Сабаби раҳоии Исматулло Абдуллозодаро гуфтанд
Раиси Оҷонси мубориза бо фасод ё коррупсия гуфт, ба номи хешу табораш будани бахше аз дороиҳои Исматулло Абдулллозода, раиси пешини Фурудгоҳи Байнулмилалии Душанбе, барқарории зиёни молиро мушкил гардонд ва бино бар ин ӯро аз ҳабс раҳо карданд. Ӯ ба тасарруфи миллионҳо доллар пули давлат гумонзад аст, вале худаш то ҳанӯз дар ин бора ҳарф назадааст.
Сулаймон Султонзода, раиси Оҷонси мубориза бо коррупсия дар Тоҷикистон, рӯзи 13-уми феврал гуфт, Абдулллозода то ҳол 94,3 миллион сомонӣ зарарро ҷуброн карда, бештар аз 922 миллион сомонии дигар мондааст.
Вай афзуд, раҳоии Исматулло Абдулллозода аз ҳабси пешакӣ бо гирифтани забонхату набаромадан аз ҷойи истиқомат ва фурӯши амволу барқарории зарар рабт дорад.
"Амволе, ки мақомоти тафтишотӣ пешниҳоду ошкор карданд, ба ҳабс гузоштем. Аксарият ба номи худаш, ба номи хешутаборонаш ба расмият дароварда шудаанд. Ҳангоми фурӯхтан фарзандонаш ҳамин имкониятро пайдо накарданд, лозим шуморидем чораи пешгирияшро иваз кунем," -- афзуд раиси Оҷонсӣ.
Ба қавли ӯ, ҳоло таҳқиқи парвандаи Исматулло Абдулллозода ба анҷом расида, рӯзҳои наздик ба додгоҳ фиристода хоҳад шуд. Ба иттилои Оҷонси мубориза бо коррупсия, дар пайванд ба қазияи раиси пешини Фурудгоҳи Байнулмилалии Душанбе, парвандаи 20 тани дигарро марҳила ба марҳила ба додгоҳ фиристодаанд.
Рӯзи 12-уми феврал дар нишсти хабарии Додгоҳи олӣ гуфтанд, 14 нафари онҳо бо пардохти 217 миллион сомонӣ ҷуброни зарар озод шуданд.
Исматулло Абдулллозода, ки яке аз наздикони Ҳасан Асадуллозода, бародарарӯси президенти Тоҷикистон ном бурда мешавад, 9 сол раиси Фурудгоҳи Душанбе буд. Ӯро моҳи майи соли 2025 аз мақомаш барканор ва дастгир карданд.
Дафтари матбуоти президенти Тоҷикистон он рӯз навишт, ки Абдуллозода ва муовинони ӯ "дар робита ба санҷиши молиявӣ ва ошкор шудани камбудиҳои ҷиддӣ дар фаъолияташон аз вазифаҳо озод карда шуданд". Оҷонси мубориза бо коррупсия чанд моҳ баъд гуфт, Абдуллозода ва чанд зердасти собиқаш ба тасарруфи 1 миллиарду 245 миллион сомонӣ, муодили беш аз сад миллион доллар, гумонзад ҳастанд.
Сулаймон Султонзода, раиси оҷонс гуфта буд, ки 961 миллион сомониро худи Исматулло Абдуллозода тасарруф кардааст.” Ба қавли ӯ: “Ин кор тавассути истифодаи ширкатҳои якрӯза, нақдикунонӣ ва тасарруфи маблағҳои фурудгоҳ бо баҳонаи харид ва таъмини молу маводи зарурӣ сурат гирифтааст.”
Ба иттилои расмӣ, алайҳи ин афрод бо ду банди Кодекси ҷиноии Тоҷикистон – “Азонихудкунӣ ё исрофкорӣ ба миқдори махсусан калон” (аз пардохти ҷарима то шаш сол зиндон) ва “сохтакории такрорӣ бо маслиҳати пешакӣ аз ҷониби гурӯҳи одамон” (аз панҷ то ҳафт сол зиндон) айбнома эълон шуд.
Раҳоии Исматулло Абдуллозода, раиси пешини Фурудгоҳи Байнулмилалии Душанбе, ҳамроҳи чанде аз зердастони собиқаш баҳсҳоеро дар ҷоемаи Тоҷикистон, аз ҷумла миёни корбарони шабакаҳои иҷтимоӣ ба миён овард. Бархе онро иҷрои одилонаи қонун ва баъзеи дигар бесобиқа ва зидди усули адлия номиданд.