Дар чанд ҷумла
Сокинони Самарқанд бо бастани роҳ таъмини барқро талаб карданд
Дар ноҳияи Пахтачини вилояти Самарқанди Узбекистон сокинон бо талаби таъмини нерӯи барқ роҳи мошингардро бастаанд. Ҳодиса рӯзи 5-уми апрел рух дод.
Мақомоти пулиси Узбекистон гуфтанд, панҷ нафар аз сокинон боздошт шуда, нисбат ба онҳо чораҷӯйӣ хоҳад шуд. Ба иттилои шоҳидон, сокиноне, ки солҳо аз дарёфти гази табиӣ маҳрум буданд, пас аз 9 рӯзи бебарқӣ маҷбур шуданд, роҳи мошингардро банданд.
Дар рӯзи роҳбандӣ интиқоли барқ ба манзили сокинон ба роҳ монда шуд. Дар наворҳо дида мешавад, ки зиёда аз 30 нафар роҳи мошингардро бастаанд.
Мақомоти маҳаллӣ гуфтанд, ба далели боришҳои зиёд рӯзи 28-уми март интиқоли барқ ба маҳаллаи "Сарой"-и ноҳияи Пахтачин қатъ шуд.
"Дар натиҷаи боронҳои пай дар пай чанд трансформатор аз кор баромада, дар натиҷа интиқоли барқ қатъ шуд", -- гуфт як масъули ноҳияи Пахтачин.
Ҳамаи хабарҳои имрӯзро дар инҷо бихонед
Занеро, ки хостааст писарашро бифурӯшад, зиндонӣ кардаанд
Додгоҳе дар Узбекистон як занро, ки хостааст, писарашро дар ивази 3300 доллар ба ҷуфти дигаре фурӯшад, ба севуним сол зиндон маҳкум кардааст.
Ҳукми Додгоҳи шаҳри Тирмиз, маркази вилояти Сурхондарё, рӯзи 5-уми август содир шуд.
Ба гузориши расонаҳои Узбекистон, гумонзад ба ҷиноят бо харидор дар мавриди фурӯши кӯдак ба мувофиқа расидаанд ва харидор бояд дар аввал 20 миллион сӯм мепардохт ва бақияро пас аз қонунӣ кардани санадҳои кӯдак мефиристод.
Расонаҳои Узбекистон навиштаанд, ки зан дар додгоҳ ба гуноҳи худ иқрор шуда, гуфтааст, аз ночорӣ ва ба сабаби қарздорӣ, надоштани хона ва ҷудо шудан аз шавҳараш хостааст, ҷигарбанди худро ба каси дигар фурӯшад.
Вай аз додгоҳ хостааст, барои дур намондан аз ду кӯдаки дигари ноболиғаш ҳукми ӯро сабуктар кунанд.
Модари тифлро ҳангоми овардани писараш барои мулоқот ба пеши харидор ва гирифтани қисмате аз пул мақомоти интизомӣ дастгир кардаанд. Додгоҳ занро ба “одамфурӯшӣ” гунаҳкор донистааст.
Пештар аз ин, додгоҳе дар Фарғона зану шавҳареро барои талоши фурӯхтани кӯдаки навзодашон ба панҷсолии зиндон маҳкум карда буд. Ба иттилои Додгоҳи олии Узбекистон, ин зану шавҳар мехостанд, пули бадастомадаро барои пардохти қарзҳои бонкияшон сарф кунанд.
Нақшаи Тоҷикистон барои насби дастгоҳҳои “Starlink” дар гӯшаҳои дурдаст
Оҷонси инноватсияи Тоҷикистон аз баррасии “Харитаи роҳи ҳамкорӣ” бо масъулони ширкати “Starlink” хабар додааст. Ин мулоқоти бархат ё онлайнӣ 5-уми август гузашт.
Ба гузориши Оҷонсӣ, бар асоси ин нақша “истифодаи интернети моҳвораӣ барои муассисаҳои тандурустию маориф ва хидматрасониҳои давлатӣ дар минтақаҳои дурдаст” дар назар аст.
Манбаъ мегӯяд, бо ширкати “Starlink” “ба мувофиқа расиданд, ки корро дар бораи таҳия ва татбиқи Харитаи роҳ” идома диҳанд.
Ҷузъиёти бештар дар ин бора расонаӣ нашудааст.
Мақомдорони ҳукумати Тоҷикистон моҳи ноябри соли 2025 хабар доданд, ки дар ҷараёни сафари президент Эмомалӣ Раҳмон ба Амрико, бо ширкати “Starlink” созишномаи ҳамкорӣ имзо кардаанд.
“Starlink”, як бахши ширкати “SpaceX”-и триллионер Илон Маск аст, ки хадамоти интернети моҳвораӣ пешниҳод мекунад.
Исфандиёри Саъдулло, раиси Хадамоти алоқаи Тоҷикистон, моҳи июли имсол дар нишасти хабарӣ гуфт, бо ҳадафи таъмини дастрасӣ ба интернет дар минтақаҳои дурдаст ба ширкати “Starlink” иҷозатнома доданд.
Навор дар Инстаграм:
Нашри китоб дар бораи навраси кушташудаи тоҷик дар Русия
Як шоири тоҷик дар бораи Қобилҷон Алиев, навраси 10-солаи тоҷик, ки ҳашт моҳ пеш дар Русия ба таври ваҳшиёна кушта шуд, китоб навиштааст.
"Достони Қобилҷон"-и шоир Салоҳиддин Мирзозода дар нашриёти "Эр-Граф" бо теъдоди 200 нусха чоп шуд.
Нилуфар Сафоева, модари Қобилҷон Алиев, ба хабаргузории "Азия-Плюс" гуфтааст, китоб аз пешгуфтор ва достони шеърӣ дар бораи писараш иборат аст.
Қобилҷон Алиеви даҳсола рӯзи 16-уми декабри соли 2025 дар мактаби ноҳияи Одинтсово дар вилояти Маскав кушта шуд.
Ҳамлавари ноболиғ бо корд ба мактаб ворид шуда, аввал посбони мактаб ва сипас Қобилҷонро теғ зад.
Қатли навраси тоҷик вокуниши зиёдеро дар ҷомеа барангехт ва сабаб шуд, ки мақомоти баландпояи Тоҷикистон, аз ҷумла Вазорати умури хориҷӣ ин қазияро бо ҳукумати Русия дар миён бигузоранд.
Бо гузашти ҳашт моҳ то ҳол мурофиаи додгоҳии нафари муттаҳам ба қатли Қобилҷон Алиев оғоз нашудааст.
Сафари муҳоҷирон аз Тоҷикистон ба Русия кам шудааст
Сафари муҳоҷирони тоҷик ба Русия дар нимаи аввали соли равон ба таври назаррас кам шудааст.
Нашрияи русии "Ведомости" бо такя ба омори идораи марзбонии Русия навишт, аз моҳи январ то июни имсол 494 ҳазор тоҷикистонӣ бо ҳадафи кор ба Русия ворид шудаанд. Ин омор дар муқоиса ба ҳамин давраи соли гузашта 18 дарсад камтар будааст.
Мақомоти Тоҷикистон омори муҳоҷиронро намегӯянд. Ҷамшед Нурмуҳаммадзода, раиси Оҷонси омори Тоҷикистон моҳи июли имсол, дар як нишасти матбуотӣ танҳо гуфт, дар нимаи аввали имсол муҳоҷирати кории тоҷикон ба хориҷа 1,7 дарсад кам шуд.
Мақомоти Тоҷикистон аз аввали соли 2025 омори муҳоҷиронро пахш намекунанд. Раиси Оҷонси омор моҳи феврали соли гузашта тасдиқ карда буд, ки шумораи муҳоҷирон ба маълумоти махфӣ табдил ёфтааст. Мақомот далели инро ҳам шарҳ надоданд.
Бино ба омори расмии ҳукумат, соли 2025 аз Тоҷикистон бештар аз 702 ҳазор нафар ба муҳоҷирати корӣ ва аксаран ба Русия рафтаанд, ки дар муқоиса ба соли 2024 тақрибан сад ҳазор нафар камтар аст.
Семен Григорев, сафири Русия дар Тоҷикистон, 11-уми майи имсол дар мусоҳиба бо хабаргузории русии ТАСС гуфт, феълан дар Русия беш аз як миллион муҳоҷир аз Тоҷикистон кор мекунанд.
Ба гузориши "Ведомости", дар пайи зиёд шудани маҳдудиятҳо ва рейдҳои сахти пулис, таваҷҷуҳи муҳоҷирон аз Осиёи Марказӣ ба Русия камтар шудааст.
Ин манбаъ менависад, сафари муҳоҷирон аз Узбекистон, Тоҷикистон ва Қирғизистон ба Русия дар қиёс ба нимаи аввали соли гузашта тақрибан 15 дарсад коҳиш ёфтааст.
Баъди ҳамла ба толори "Крокус" дар соли 2024, ки шаҳрвандони Тоҷикистонро дар он гунаҳкор карданд, мақомоти Русия назорат аз болои муҳоҷиронро сахтар карданд.
Давоми ду соли ахир мақомоти Русия барои муҳоҷирон ва хонаводаҳои онҳо маҳдудиятҳои зиёде ҷорӣ карданд.
Дар пайи зиёд шудани фишор ва рейду санҷишҳои пулис дар Русия, муҳоҷирони тоҷик талош доранд ба кишварҳои дигар, аз ҷумла Аврупо ва Кореяи Ҷанубӣ барои кор раванд.
Ҳар сол ҳазорҳо сокини Тоҷикистон дар ҷустуҷӯйи кору маоши муносиб ба хориҷа мераванд. Ҳарчанд мақомот пули фиристодаи онҳоро намегӯянд, созмонҳои байнулмилалии молие ба мисли Бонки ҷаҳонӣ эътироф мекунанд, ки пули муҳоҷирон асоси рӯзгузаронии хонаводаҳо дар Тоҷикистон аст.
Навор дар Инстаграм:
Нархи нафт дар ҷаҳон се дарсад боло рафт
Рӯзи 6-уми август арзиши нафт дар ҷаҳон бори дигар афзоиш ёфт ва ба раванди болоравии худ идома дод.
Дар ҳоле ки бозорҳои ҷаҳонӣ дар интизори таҳаввулоти вобаста ба тангаи Ҳурмуз буд, қимати ҳар бушка нафти "брент" се дарсад боло рафт ва ба ҳудуди 82 доллар расид.
Нафти навъи West Texas Intermediate низ бо афзоиши 2,3-дарсадӣ ба тақрибан 77 доллар баробар шуд.
Афзоиши нархи нафт бахше аз хушбиниҳои ибтидоии ҳафтаро аз байн бурдааст. Аммо қиматҳо ҳамчунон нисбат ба як ҳафтаи пеш бисёр поинтар аст.
Ба гуфтаи коршиносон, эҳтиёти имрӯзи бозори нафт нишон медиҳад, ки бозор ба таъйиди Кохи Сафед ниёз дорад, ки ҳамаи инҳо воқеият аст ва ояндаи даст ёфтан ба созиш барои бозкушоии тангаи Ҳурмуз чандон рӯшан нест.
Аз оғози даври нави ҳамлаҳои Амрико ба Эрон пас аз имзои созишномаи Исломобод, қимати нафт беш аз 25 дарсад коҳиш ёфтааст.
Таҳхонаи биноҳои баландошёнаро паноҳгоҳ мекунанд
Як мансабдор дар вилояти Суғд гуфтааст, ширкатҳои сохтмонӣ ҳаққи фурӯши таҳхонаи биноҳоро надоранд ва ин маконҳо ҳамчун паноҳгоҳ дар ҳолати фавқулода истифода мешаванд.
Фурқат Шодизода, сардори Идораи ҳолатҳои фавқулода дар вилояти Суғд, 5-уми август дар нишасти хабарӣ гуфт, дар хулосаи додаашон ба ширкатҳои сохтмонӣ ин нуктаро дарҷ мекунанд, ки “таҳхонаро ба шаҳрвандон нафурӯшанд.”
Ба гуфтаи Шодизода, мақомот ҳақ доранд дар ҳолатҳои фавқулода таҳхонаи биноро гирифта, ҳамчун паноҳгоҳ барои сокинон истифода баранд.
Навор дар Инстаграм:
Изҳороти ин мансабдор дар ҳоле садо медиҳад, ки чанде пеш пулиси Душанбе ҳам аз ошкор шудани ҳолатҳое хабар дод, ки таҳхонаи биноҳо ғайриҳадафмандона истифода мешаванд. Мақомот гуфтанд, ташкили фурӯшгоҳ ё дигар марказҳои хидматрасонӣ дар таҳхонаи биноҳо манъ аст.
Боздошти ду афвшуда бо гумони дуздӣ
Пулиси Душанбе мегӯяд, ду мардеро боздошт кардааст, ки бар асоси қонуни афв озод шуда, лекин боз даст ба ҷиноят заданд.
Дар хабарномаи расмӣ омадааст, Дилшод Раҳматуллоев ва Шокир Исамуддинов ҳамагӣ баъди се рӯз баромадан аз зиндон, ба хонаи як сокини Душанбе даромада, "маблағҳои пулӣ ва дигар ашёи қиматбаҳоро рабудаанд".
Назари ин ду марди боздоштшуда ва наздиконашон ба иттиҳом маълум нест.
Раёсати корҳои дохилии Душанбе гуфтааст, алайҳи ин афрод бо иттиҳоми дуздӣ парвандаи ҷиноӣ боз кардааст. Банди 244-и Кодекси ҷиноии Тоҷикистон барои ин иттиҳом ҷарима ва ё то панҷ сол зиндонро пешбинӣ мекунад.
Қонуни нави афв дар Тоҷикистон, ки 16-уми июни имсол имзо шуд ва ба иҷро даромад, нисбат ба 18 ҳазор нафар, аз ҷумла зиндониён ва онҳое, ки парвандаашон дар ҳоли баррасист, татбиқ хоҳад шуд.
Тибқи омори расмӣ, то охири июл бар асоси қонуни афв 8 ҳазору 8 нафар аз зиндонҳои Тоҷикистон озод шудаанд.
Навор дар Инстаграм:
Даҳ миллион евро барои кам кардани талафоти барқ дар Кӯлоб
Бонки аврупоии таҷдид ва рушд барои нав кардани иншоотҳои энергетикӣ дар шаҳри Кӯлоб ва кам кардани талафоти барқ, ба Тоҷикистон 10 миллион евро қарз медиҳад.
Созишномаи мазкур 5-уми август дар Душанбе имзо шуда, аммо шарту шароити қарз эълон нашудааст.
Дар хабарномаи Вазорати молия омадааст, ин маблағ барои таҷдиди шабакаҳои барқ, ҷорӣ намудани низоми муосири баҳисобгирӣ ва биллинг, инчунин насбу васли ҳисобкунакҳои ҳушманд сарф мешавад.
Бонки аврупоии таҷдид ва рушд ҳам дар гузорише навишт, вазифаи асосии лоиҳа қонеъ гардонидани эҳтиёҷоти кишвар "дар иваз намудани зерсохтори кӯҳнашуда" аст.
Навор дар Инстаграм:
Талафоти барқ аз мавзуъҳои нигаронкунанда дар бахши энергетикии Тоҷикистон гуфта мешавад. Мутахассисони соҳа куҳна шудани дастгоҳ ва хатҳои барқро аз сабабҳои асосии талафот мегӯянд.
Тибқи иттилои расмӣ, дар нимаи аввали соли равон дар низоми энергетикии кишвар 1,6 миллиард киловат соат талафоти барқ сабт шудааст, ки 12,9 дарсади барқи умумии тавлидшударо дарбар мегирад.
Туркия барои интиқоли нафти Ироқ ва Халиҷи Форс роҳҳои нав меҷӯяд
Вазири энержии Туркия бо ишора ба бӯҳрони убур ва мурури киштиҳо дар тангаи Ҳурмуз гуфт, таҳаввулоти моҳҳои ахир нишон дод, ки ҷаҳон ҳамчунон ба масирҳои ҷойгузин барои интиқоли нафт ниёз дорад ва Анқара дар ҳоли гуфтугӯ бо Ироқ барои тавсеаи масирҳои нави содироти энержӣ аст.
Алпарсалон Байрактар дар гуфтугӯ бо шабакаи телевизиони давлатии TRT гуфт, "Туркия ва Ироқ дар бораи бунёди лӯлаи газ аз марзҳои Силопи ва Хобур то Басра гуфтугӯ мекунанд, то бахше аз нафти Ироқ ва ҳамчунин нафти кишварҳои Халиҷи Форс бе вобастагии комил ба тангаи Ҳурмуз, ба бозорҳои ҷаҳонӣ интиқол ёбад".
Ӯ гуфт, дар марҳилаи аввал, рӯзона 750 ҳазор бушка нафти Ироқ метавонад аз тариқи хати лӯлаи мавҷуди Ироқ-Туркия ба бандари Ҷайҳон мунтақил шавад.
Ба гуфтаи вазири энержии Туркия, зарфияти феълии ин масир як миллиону 500 ҳазор бушка дар рӯз аст ва Туркия пешниҳод додааст, ки бо такмили ин зерсохт ва дарозии то Басра, зарфияти интиқол ба ду то дувуним миллион бушка дар рӯз афзоиш ёбад.
Байрактар афзуд, "рӯзона ҳудуди 20 миллион бушка нафт аз тангаи Ҳурмуз убур мекунад ва идомаи танишҳо дар ин оброҳа, зарурати эҷоди масирҳои ҷойгузин ва мутмаин барои содироти энержиро беш аз пеш ошкор кардааст".
Ӯ афзуд, ин масир метавонад дар оянда илова бар нафти Ироқ, барои содироти нафти Кувайт ва дигар кишварҳои ҳавзаи Халиҷи Форс низ мавриди истифода қарор гирад.
Вена талаби Тоҷикистонро дар бораи Шавкати Муҳаммад рад кардааст
Додгоҳи парвандаҳои ҷиноӣ дар Вена, маркази Австрия, дархости мақомоти Тоҷикистонро дар бораи истирдоди намояндаи мухолифини тоҷик Шавкати Муҳаммад (Шавкатҷон Шарифов) ва модару бародараш рад кардааст.
Хулосаи додгоҳ рӯзи 5-уми август эълон шуд.
Муҳиддин Кабирӣ, раиси Ҳизби дар Тоҷикистон мамнӯи наҳзати исломӣ, ки дар мурофиа ҳузур доштааст, ба Радиои Озодӣ гуфт, "Додгоҳи Вена талаби истирдодро ғайриқонунӣ донист ва напазируфт."
"Суолу ҷавобҳо кӯтоҳ буданд. Додрас фиристодани ҳарсеи онҳоро ба Тоҷикистон рад кард," -- гуфт Муҳаммадсобири Абдуқаҳҳор, як намояндаи мухолифин. Ӯ низ дар мурофиа ширкат дошт.
Вазорати корҳои дохилии Тоҷикистон моҳи апрели имсол аз Австрия хостааст, 18 нафар, аз ҷумла Шавкати Муҳаммад, модараш Шарофат Шарифова ва бародараш Билолиддинро дастгир ва ба Душанбе таслим кунад.
Мақомот ҳарсеро ба тундгароӣ муттаҳам кардаанд, аммо худи онҳо дорои ангезаи сиёсӣ медонанд.
Шавкати Муҳаммад 48-сола ва сухангӯи Паймони миллӣ, як созмони мухолифи ҳукумати Тоҷикистон, аст. Дар гузашта раиси дафтари Ҳизби ҳоло мамнӯи наҳзати исломӣ дар ноҳияи Ашти вилояти Суғд буд. Беш аз даҳ сол боз дар хориҷа қарор дорад ва дар навиштаву барномаҳои видеоияш дар шабакаҳои иҷтимоӣ сиёсатҳои ҳукумати Тоҷикистонро башиддат танқид мекунад.
Модараш, Шарофат Шарифова, 77-сола аст ва аз соли 2022 дар хориҷ аз Тоҷикистон қарор дорад. Бародараш, Билолиддин Шарифов, низ дар Аврупост.
Аз ин пеш, Додгоҳи парвандаҳои ҷиноии Вена дархости Душанберо дар бораи таслими се нафари дигар, аз ҷумла як узви “Гурӯҳи 24” (ҷунбиши мухолифи ҳукумати Тоҷикистон) напазируфта буд.
Ҳаводории арманиҳо аз размикори тоҷик, машҳур бо лақаби “Ҷаллод”
Пирӯзии Сулаймон Маҳмадов, размикори тоҷик бо лақаби "Ҷаллод", дар набард бо рақиби чеченаш дар Арманистон дар сархати хабарҳои муҳим дар ин кишвар қарор гирифт ва баҳси зиёдеро барангехт.
Сулаймон Маҳмадов рӯзи 1-уми август дар набарде дар шаҳри Ереван рақибаш Умар Давлатмирзоевро шикаст дод.
Азбаски ӯ дар даст парчами Арманистону Тоҷикистон ва бар тан либоси низомиёни арманиро дошт, бо истиқболи гарми мардуми ин кишвар рӯ ба рӯ шуд.
Вай дар як суҳбат бо Радиои Озодӣ дар Ереван гуфт: "Дар мусобиқаи Hype Fighting ҳарифи чечени худро шикаст додам. Сипас байрақи Арманистон ва байрақи Тоҷикистонро бардоштам. Ин корро ба хотири дӯстам кардам, ки соли 2020 дар ҷанги Қаробоғи Кӯҳӣ ҳалок шуд. Рафиқе, ки якҷоя калон шудем, хӯрок хӯрдем, тарбия ёфтем, таҳсил кардем. Пирӯзии худамро ба ӯ бахшидам."
Корбарони зиёди арманӣ дар саҳифаи Сулаймон Маҳмадов дар Инстаграм ба ӯ барои бардоштани парчами Арманистон ва ба бар кардани либоси сарбозони арманӣ ибрози сипос ва эҳтиром кардаанд.
Вай, ки дар мусобиқоти гуногуни вилоятиву шаҳрӣ, аз ҷумла мусобиқоти гуштӣ дар Русия ҳам пирӯз шудааст, дар бораи рақобатҳояш дар ҳалқаи муҳорибаҳои омехта чунин гуфт:
"Соли 2015 барои хондан аз Тоҷикистон ба Ростови Русия рафтам. Дар онҷо он ҷо омӯзишгоҳро хатм карда, сипас ба донишгоҳ қабул шудам. Бори якум соли 2023 ба Арманистон омада будам. Мардуми тоҷик, мардуми Арманистон маро хеле дӯст доштанд. Дар он ҷо ҳам ҳам байрақи Арманистон ва ҳам байрақи Тоҷикистонро бардоштам."
Путин қонунҳои сахтгиронаро дар бораи муҳоҷирон имзо кард
Владимир Путин, раисҷумҳури Русия, бо имзои чанд қонуни нав иҷозат додааст, ки назорат ба кор ва зиндагии хориҷиён дар ин кишвар сахттар шавад. Ҷое, ки садҳо ҳазор шаҳрванди Тоҷикистон низ бо умеди ёфтани маоши муносиб ва зиндагии беҳтар қарор доранд.
Тарҳи нави Кодекси маъмурии Русия яке аз қонунҳоест, ки Путин 4-уми август имзо кард. Танҳо ин кодекс 45 моддае дорад, ки дасти мақомоти Русияро барои ихроҷи муҳоҷирон бозтар мекунад.
Аз ҷумла, бо гуноҳи сарпечӣ аз талаботи пулис, ба ҳам задани тартиботи ҷамъиятӣ, бадном кардани нерӯҳои мусаллаҳ ва даъват ба таҳримҳои зидди Русия.
Пас аз оғози ҷанги Русия дар Украина дар соли 2022, мансабдорони рус муҳоҷирати кориро дар он кишвар сахттар карданд. Аз он замон то кунун мавридҳои зиёди боздошту ҳабс ва ихроҷи муҳоҷирон, аз ҷумла аз Тоҷикистон, сабт шудааст.
Чанде аз муҳоҷирон қаблан бо шарти фош нашудани ном гуфта буданд, ки аз аксари онҳо хоста шудааст, бо артиши Русия қарордод баставу ба майдони даргирӣ раванд ва дар иваз аз ҷавобгарӣ озод ва ҳам соҳиби шаҳрвандии он кишвар шаванд.
Раиси Думаи давлатии Русия мегӯяд, танҳо дар шаш моҳи аввали соли 2026 аз ин кишвар ҳудуди 44 ҳазор муҳоҷирро берун карданд.
"Амалиёт"-и зидди либоси “бегона” дар Панҷакент
Намояндагони ҳукумат ва маъмурони милиса дар шаҳри Панҷакент (вилояти Суғд) ба зидди, ба гуфтаашон, либоси “бегона” маърака баргузор кардаанд.
Бино ба чанд аксе, ки дафтари Ҳизби ҳокими халқии демократӣ дар Панҷакент рӯзи 4-уми август нашр кард, асосан занон ва духтарони ҳиҷобдор ҳадаф қарор гирифтаанд.
Дар ин тасвирҳо дидан мумкин аст, ки мақомот бо занону духтарони ҳиҷобдор “суҳбат” мекунанд ва як маъмури милиса низ дар канорашон аст.
Мақомот ҳадафро “пешгирӣ аз фарҳанги бегона, ҳифзи асолат ва арзишҳои миллӣ” номида, аммо нагуфтаанд, ки амалиёт чанд нафарро фаро гирифт.
Ҳамчунин дақиқ нест, ки ба занон чӣ гуфта ва аз онҳо чӣ хоста шудааст.
Баъзе аз занони ҳиҷобдор, ки то кунун аз суҳбати мақомот гузаштаанд, аз тарси пеш наомадани мушкил дар кор ва зиндагияшон аз додани тафсилот ба мо худдорӣ карданд.
Аз ин пеш, дар моҳи май, Идораи кор бо занон дар ноҳияи Рӯдакӣ маъракаеро бо номи “Деҳа ба деҳа” баргузор карда, баҳси пӯшидани либоси “худӣ” ва “бегона”-ро барои занону духтарон доғ карда буд.
Намояндагони мухолифон чунин рафторро танқид карданд ва баъди баҳсҳои тунд аксҳои як рӯзи ин “корҳои фаҳмондадиҳӣ”, ки асосан ҳиҷобдорон мавриди суҳбат буданд, аз саҳифаи Идораи занони ноҳияи Рӯдакӣ пок карда шуд.
Аз моҳи июни соли 2024 “овардан, фурӯхтан ва пӯшидану таблиғи либоси ба фарҳанги миллӣ бегона” дар Тоҷикистон манъ аст. Барои риоя накардани он ҷазо таъйин шудааст.
Либоси “бегона” дар Тоҷикистон шарҳи ягона надорад, аммо мақомот бештар пӯшиши исломиро ба мисли ҳиҷобу чодари сиёҳи занон ҳадаф гирифтаанд. Шӯрои уламои Маркази исломии Тоҷикистон қаблан аз занону духтарон хоста буд, ки либоси “тангу сиёҳ ва ҳарир” низ напӯшанд.
Боздошти хориҷиён ба гумони ташкили фоҳишахона дар Душанбе
Пулиси Душанбе аз боздошти шаҳрвандони хориҷӣ бо гумони ташкили фоҳишахона хабар дод.
Ин ниҳод бо нашри наворе гуфт, як гурӯҳ шаҳрвандон аз кишварҳои ҳамсоя, ошёнаи дуюми меҳмонхонаеро дар пойтахт ҳамчун маркази дилхушӣ ё караоке ба иҷора гирифта, онро ба фоҳишахона табдил додаанд.
Маълум нест ин гумонбарон аз кадом кишваранд ва мақомот ҳам дар ин бора чизе нагуфтааст. Аммо дар наворҳои мақомот аз макони ҳодиса, навиштаҷот бо хатти чинӣ дида мешавад
Ба иттилои Раёсати ВКД дар Душанбе, гумонбарон гурӯҳе аз ҷавондухтарони хориҷиро ба анҷоми амалҳои шаҳвонӣ ҷалб намудаанд.
Нисбати боздоштшудаҳо бо моддаи 239-и Кодекси ҷиноии Тоҷикистон, парванда оғоз гардидааст. Ин банди қонун барои "ташкил ё нигаҳдошти фоҳишахона", ҷарима ва ё маҳрум намудан аз озодиро пешбинӣ мекунад.
Маълум нест, ки оё афроди дастгиршуда ва занони гумонзад ба сабукпойӣ, бо вакили дифоъ таъмин ҳастанд ва ба ин иттиҳом чӣ назар доранд. Ба иттилои пулис, занҳо аз қаламрави кишвар ихроҷ мешаванд.
Ин барои бори аввал нест, ки дар Тоҷикистон хориҷиҳо ба иттиҳоми ташкили фоҳишахона боздошт мешаванд.
Дар моҳи октябри соли 2025 Раёсати Вазорати корҳои дохилӣ дар шаҳри Душанбе як шаҳрванди дигари хориҷиро, бо иттиҳоми ташкили фоҳишахона бо ҷалби хориҷиён, боздошт карда буд.
Пизишкиён овозаҳо дар бораи истеъфояшро рад кард
Масъуд Пизишкиён, раисҷумҳури Эрон мегӯяд, қасди ба истеъфо рафтан надорад ва овозаҳоеро, ки дар рӯзҳои ахир дар бораи барканории ӯ нашр шуд, рад кард.
Пизишкиён дар навори видеоие, ки шуморе аз хабаргузориҳои Эрон нашр карданд, гуфтааст, ҳар замоне, ки тасмим ба истеъфо бигирад, онро ба таври расмӣ эълон хоҳад кард.
Ӯ ҳамчунин овозаҳоеро, ки гӯё миёни вай ва Оятуллоҳ Муҷтабо Хоманаӣ, раҳбари Эрон, ихтилоф ба вуҷуд омадааст, рад кард.
Пизишкиён гуфт, "онҳо мехоҳанд чунин вонамуд кунанд, ки гӯё ихтилофе вуҷуд дорад. Раҳбарӣ чизе мегӯяд ва онҳо иддао мекунанд, ман чизи дигаре мегӯям".
Қарор аст ин видео, ки "Гузориш ба мардум" ном дорад, дар рӯзҳои оянда ба таври пурра нашр шавад.
Муҷтабо Хоманаӣ пас аз онки ба унвони ҷойнишини падараш Оятуллоҳ Алии Хоманаӣ раҳбари олии Эрон эълон шуд, то кунун дар маҳзари умум дида нашудааст.