Дар чанд ҷумла
Раҳмон ва Макрон дар бораи вазъи Афғонистон гуфтаанд. ВИДЕО
Раҳбарони Тоҷикистону Фаронса дар бораи вазъи Афғонистон суҳбат кардаанд. Мулоқоти Эмомалӣ Раҳмон ва Эммануэл Макрон 13-уми октябр дар Париж баргузор шуд.
Тоҷикистону Фаронса ба зидди эътирофи ҳукумати "Толибон" дар Афғонистон ҳастанд. Ду раиси ҷумҳурӣ дар суҳбатҳои худ дар бораи "Толибон" чӣ гуфтаанд, маълум нест, аммо оқои Раҳмон гуфтааст, "таъмини амният дар кишвари ҳамсоя омили муҳими суботи миллӣ ва тамоми минтақа аст."
"Зарур шумурда шуд, ки барои ҳалли мушкилоти сиёсӣ ва гуманитарӣ дар ин кишвар ҷомеаи ҷаҳон, давлатҳо ва созмонҳои бонуфуз аз қабили Созмони Милали Муттаҳид бояд бетараф набошанд”, - иқтибос овардааст дафтари матбуоти президент.
Гуруҳи "Толибон" 15-уми августи имсол Кобулро ишғол кард. Бо гузашти наздик ба ду моҳ ҳеч кишваре “аморати исломӣ”-и Афғонистонро ба расмият нашинохтааст.
Тоҷикистон аз аввалин кишварҳое буд, ки ошкоро эълон кард, ҳукумати ин гуруҳро ба расмият нахоҳад шинохт, то замоне ки ҳукумати фарогир бо ҷойгоҳи шоистаи тоҷикон ташкил нашавад.
Дар муқобил, муовини раиси ҳукумати "Толибон" 26-уми сентябр ба Тоҷикистон ҳушдор дод, ки ба корҳои дохилии Афғонистон дахолат накунад, вагарна "ҳар кор пайомад дорад."
Сафари Эмомалӣ Раҳмон ба Аврупо 10-уми октябр оғоз шуд ва 14-уми октябр ба поён мерасад. Дар остонаи сафари ӯ мухолифини тоҷик аз раҳбарияти Иттиҳоди Аврупо ва президенти Фаронса хостанд, ки чанд талаби онҳоро ба Эмомалӣ Раҳмон бирасонанд.
Кумитаи шаҳрвандии наҷоти гаравгонҳо ва зиндониёни сиёсӣ, қароргоҳаш дар Лаҳистон (Полша), аз мақомоти аврупоӣ, аз ҷумла Макрон хост, аз Эмомалӣ Раҳмон "озодии мухолифони сиёсӣ"-ро тақозо кунанд. Айни талаб дар гирдиҳамоиҳои 12 ва 13-уми октябр дар шаҳрҳои Вилнюс ва Варшава низ садо дод.
Ҳоло маълум нест, ин мавзуъ ба суҳбати Эмомалӣ Раҳмон ва Эммануэл Макрон роҳ ёфтааст ё не. Вале раиси ҷумҳурии Тоҷикистон дар назди хабарнигорон гуфт, ҷонибҳо асосан масъалаи ҳамкориро баррасӣ карданд ва ӯ аз Фаронса ба унвони ҳамкори муҳим, боэътимод ва санҷидашудаи Душанбе дар Аврупо ном бурд.
Ҳамаи хабарҳои имрӯзро дар инҷо бихонед
"Ду кас бистариянд." Ба кураи ҳавоӣ дар маркази Хуҷанд чӣ шуд?
Парвози иштибоҳии як кураи ҳавоӣ (пуфаки ҳавоӣ, баллон), ки аз Узбекистон овардаанд, дар маркази шаҳри Хуҷанд камаш се касро захмӣ ва боми ду хонаро вайрон кардааст.
Масъулони Идораи ҳолатҳои фавқулода дар маркази вилояти Суғд ҷузъиёт надоданд.
Ба иттилои ёфтаи Радиои Озодӣ, соҳиби кураи ҳавоӣ Рустам Саидалиев (аз Узбекистон) пас аз муоинаи пизишкон аз беморхона ҷавоб шуда, Фирӯза Турсунова, сокини Хуҷанд ва кӯдакаш дар шифохона бистарӣ ҳастанд.
Ин ҳодиса якуми июн ва чанд лаҳза пеш аз барномаи ҳунарӣ дар пайванд ба Рӯзи ҷаҳонии ҳимоят аз кӯдакон рух дод.
Қарор буд, дар ин барнома ҳунармандони маъруф ба мардум ва бавижа кӯдакон хурсандӣ бахшанд, аммо парвози иштибоҳии кураи ҳавоӣ монеи баргузории консерт шуд.
Сабаби ҳодисаро боди шадид меноманд.
Нашри ба ҳаво бархостани кураи бодӣ ё ҳавоӣ ва ба бинову атрофиён бархӯрдани он рӯзи якуми июн дар шабакаҳои иҷтимоӣ зуд паҳн ва боис ба сарусадо гашт. Дар ҳамин наворҳо дидан мумкин аст, ки як нафар аз дохили он худро ба берун партофтааст.
Ширкати "Фаровон" аз созмондиҳандагони барномаи ҳунарӣ дар Хуҷанд ва масъули киро кардани кураи ҳавоӣ аз Узбекистон номбар мешавад.
Масъулони ин ширкат, ки ба истеҳсоли маҳсулоти ғизоӣ ва сохтмонӣ машғул аст, дар саҳифаи расмии худ аз рухдоди ҳодисаи ба гуфтаашон ногаҳонӣ маъзарат хоста, ваъда додаанд, ки барномаи консертиро ба зудӣ баргузор хоҳанд кард.
Солҳои охир дар чанд маъракаи идона дар Тоҷикистон аз кураи ҳавоӣ истифода шудааст.
Эъдоми ду нафар барои ширкат дар эътирозҳои Эрон
Мақомоти Эрон рӯзи якуми июн ду мардро дар пайванд бо эътирозҳои моҳи январи имсол дар ин кишвар эъдом карданд.
Меҳрдод Муҳаммадниё ва Ашкон Маликӣ дар ҳамла ба масҷид ва ташкили ошӯб гунаҳкор дониста шудаанд. Аз оғози амалиёти низомии Амрикову Исроил зидди Эрон дар Ҷумҳурии Исломӣ камаш 40 нафар эъдом шудаанд. Ин амал боис ба интиқоди гурӯҳҳои ҳомии ҳуқуқ аз таъқиби рӯзафзун дар Эрон гардид.
Чанде пеш Масъуд Пияҳу, нафаре, ки дар моҳи декабри соли 2025 аз эътирозҳо дар Эрон навор бардошта буд, ба даҳ сол зиндон маҳкум шуд. Ӯ дар як наворе, ки дар шабакаҳои иҷтимоӣ паҳн намуд, эътироф мекунад, ки наворро худаш бардоштааст, вале масъулияти пахши он бар дӯши ӯ нест.
Ҷумҳурии исломии Эрон эътирозҳои мардумиро, ки охири соли гузашта дар ҷавоб ба бадшавии босуръати вазъи иқтисодӣ ва таъқиби ҳукумат оғоз ёфта буданд, бераҳмона пахш кард. Ҳазорҳо нафар кушта ва ба ҳабс гирифта шуданд.
Гурӯҳҳои ҳомии ҳуқуқ таъкид мекунанд, ки Эрон дар давраи оташбас бо Амрикову Исроил ба таъқиби бесобиқаи сиёсиву амниятӣ рӯй овардааст.
Ҳомиёни ҳуқуқ мегӯянд, Эрон дар давраи оташбас бо Амрикову Исроил ба таъқиби бесобиқа рӯй овардааст.
Ҳамлаҳои вайронгари Русия ба пойтахти Украина
Дар шаҳри Киев, пойтахти Украина, рафъи пайомадҳои ҳамлаи вайронгари Русия идома дорад, ки шаби якум ба дуюми июн сурат гирифт ва камаш 13 нафарро кушт.
Нерӯҳои ҳавоии Украина рӯзи 2-юми июн гуфтанд, ки дар умум Русия ба ин кишвар бо 73 мушак ва бештар аз 650 паҳпод ё дрон ба 38 мавзеъ ва бахусус ба шаҳри Киев зарба задааст.
Навор дар Инстаграм:
Виталий Кличко, раиси шаҳри Киев гуфт, дар ҳамлаҳо 58 кас, бо шумули кӯдакон, захмӣ шуданд.
Ба қавли Владимир Зеленский, раисҷумҳури Украина, даҳҳо бинои истиқоматӣ ва иншооти сирф ғайринизомӣ дар ҳамлаҳо осеб диданд.
Пеш аз ин ҳамлаҳо, Русия ҳушдор дод, ки ба Киев, аз ҷумла “марказҳои тасмимгирӣ” зарба хоҳад зад ва аз шаҳрвандони хориҷӣ ва дипломатҳо хост, ин шаҳрро тарк кунанд.
"Як наврас ҷон бохт, панҷ кӯдак захмӣ". Ҳодиса дар канори "Баҳри тоҷик"
Дар пайи канда шудани батут (лимпопо) дар шаҳри Гулистони вилояти Суғд як навраси даҳсола ҷон бохта, панҷ каси дигар ҷароҳат бардоштаанд. Ҳодиса шоми 1-уми июн дар канори обанбори "Баҳри тоҷик" рух дод.
Дар дафтари матбуоти Кумитаи ҳолатҳои фавқулода рӯзи 2-юми июн ба Радиои Озодӣ гуфтанд, "бар асари вазидани шамоли сахт, батут (лимпопо), ки барои бозии кӯдакон насб гардида буд, канда шуда, ба тарафи баҳр афтодааст".
Мусоҳиби мо афзуд, "шаш ноболиғро бо ҷароҳатҳои гуногун ба беморхона бурданд, вале як нафари онҳо Манучеҳр Музаффарзодаи даҳсола ҷон бохт." Ин наврас аз шаҳри Конибодом будааст.
Ҷузъиёти бештари ҳодиса маълум нест.
Рӯзи 1-уми июн дар шаҳри Хуҷанд, маркази вилояти Суғд низ бар шамоли сахт як балон ё кураи бодӣ аз назорат баромад. Дар ин ҳодиса як зан бо кӯдакаш ҷароҳат бардошта, дар шифохона бистарӣ ҳастанд.
Тоҷикистон дар як моҳи охир шоҳиди офатҳои табиӣ, аз ҷумла бодҳои сахт буд. Рӯзи 27-уми июн шамоли сахт ба чанд бино ва нақлиёт дар шаҳри Душанбе зарар расонд.
Бо Аврупо ё АвруОсиё? Ҳушдори Русия ва шариконаш ба Ереван
Рӯзи 7-уми июн дар Арманистон интихоботи порлумонӣ баргузор мешавад, ки ба қавли бисёриҳо сарнавиштсоз хоҳад буд. Сарвазири Арманистон Никол Пашинян саъй дорад, бо ҳадафи узвияти кишвараш дар Иттиҳоди Аврупо ҳамкориҳоро бо ин созмон густариш диҳад.
Маскав бо ишора ба увзияти Арманистон дар Иттиҳоди иқтисодии АвруОсиё ин кӯшишҳоро ғайри қобили қабул шумурда, ба Ереван машварат додааст, ки узвияти ҳамзамон дар ду созмони ёдшуда имкон надорад.
Русия, Беларус, Қазоқистон ва Қирғизистон ба Арманистон ҳушдор додаанд, ки агар Ереван кӯшиши пайвастан ба Иттиҳоди Аврупоро бас накунад, узвияташ дар Иттиҳоди иқтисодии АвруОсиёро бозмедоранд.
Дар изҳороти раҳбарони ин кишварҳо, ки охири ҳафтаи гузашта дар Қазоқистон нашр шуд, таъкид гардидааст, ки омодагиҳои Арманистон ба узвият дар Иттиҳоди Аврупо "амнияти иқтисодӣ"-и аъзои дигари Иттиҳоди АвруОсиёро таҳдид мекунад. Дар ин санад аз Арманистон тақозо шудааст, ки ҳарчӣ зудтар "назархоҳии умумӣ" доир намуда, интихоб кунад, ки бо Иттиҳоди АвруОсиё аст ё Иттиҳоди Аврупо?
Мария Захарова, сухангӯйи Вазорати корҳои хориҷии Русия, дар остонаи нишасти Қазоқистон гуфт: “Кишварҳои ғарбӣ зидди Русия ҷанги ниёбатӣ ё худ гибридӣ эълон намуда, расман иброз доштаанд, ки ҳадафи онҳо шикасти стратегии Русия аст. Пас, Арманистон бо кӣ санадҳои стратегии худро имзо мекунад? Бо онҳое, ки мехоҳанд ба Иттиҳоди АвруОсиёи мо зиён расонанд?"
Сарвазири Арманиcтон Никол Пашинян ба нишасти Қазоқистон ба ҷойи худ муовинаш Мҳер Григорянро фиристод. Дипломатҳо ин иқдомро ҳамчун бойкот арзёбӣ намуданд. Пашинян таъкид кард, ки бо вазифаҳои дохилӣ ва маъракаи интихоботи порлумонии 7-уми июн банд аст.
Дар ҳамин ҳол, ниҳодҳои давлатии Русия воридоти маҳсулоти кишоварзӣ, аз ҷумла помидор, мева ва машруботи Арманистонро манъ карданд. Собиқ дипломати қазоқ Жарас Ормантай бар ин назар аст, ки монеагузориву фишорҳои Маскав метавонад натиҷаи баръакс диҳад.
Ӯ афзуд, феълан Кремл болои Арманистон нуфузи бузурги сиёсиву иқтисодӣ дошта, имкон дорад, ки Ереванро дар мақоми ҳозирааш нигаҳ дорад. Аммо агар кӯшишҳои Маскав ноком гарданд, мақому манзалати Русияро дар чорчӯби Иттиҳоди иқтисодии АвруОсиё барҳам мезанад.
Талошҳои фирори Ереван аз зери назари Маскав замоне сурат мегирад, ки сарвазир Пашинян аз пуштибонии президенти Амрико Доналд Трамп низ бархӯрдор аст.
Ҳафтаи гузашта баъд аз сафари котиби давлатии Амрико Марко Рубио ба Арманистон, Трамп дар шабакаҳои иҷтимоӣ навишт, ки дар интихоботи порлумонии Арманистон аз номзадии Пашинян дастгирӣ мекунад.
Парванда ба зидди омӯзгоре, ки аз латукӯб шуданаш шикоят дошт
Мақомоти ноҳияи Нуробод ба зидди омӯзгоре, ки аз латукӯб шуданаш шикоят дошт, парвандаи маъмурӣ боз кардаанд. Муҳимҷон Раҳмонов пештар ба Радиои Озодӣ шикоят карда буд, ки рӯзи 8-уми май бародари як хонанда ӯро задааст.
Ду манбаи огоҳ аз қазия 2-юми июн ба Радиои Озодӣ гуфтанд, нисбат ба омӯзгор Муҳимҷон Раҳмонов бо иттиҳоми иҷро накардани ӯҳдадорӣ дар мавриди таълиму тарбияи кӯдак (моддаи 90-и Кодекси ҳуқуқвайронкунии маъмурӣ) парванда боз шудааст.
Мақомот расман шарҳ надодаанд, ки чаро нисбат ба омӯзгоре, ки аз латукӯб шуданаш шикоят дошт, боз парванда шуд.
Манобеи огоҳ ба Радиои Озодӣ гуфтанд, омӯзгор ба он муттаҳам мешавад, ки нисбати хонандае, ки бародараш омӯзгорро зад, гуё алфози қабеҳ истифода бурда бошад. То ҳол маълум нест, ки нисбат ба соҳибкор Миралӣ Орзуев, ки ба латукӯб шудани омӯзгор гумонбар аст, чӣ чора андешида шудааст.
Радиои Озодӣ барои гирифтани ин суол ба ҳукумати ноҳия ва Шуъбаи маорифи Нуробод муроҷиат кард, аммо дар ҳарду ниҳод гуфтанд, санҷиш идома дорад.
Навор дар Инстаграм:
Қарор буд, Додгоҳи ноҳияи Нуробод 1-уми июн парвандаи маъмурӣ нисбат ба омӯзгорро баррасӣ кунад, аммо бо сабаби дар сафари корӣ будани муовини раиси ноҳия ва мудири шуъбаи маориф мурофиа ба рӯзҳои баъдӣ гузошта шуд.
Омӯзгор Муҳимҷон Раҳмонов даъво дорад, ки бародари яке аз шогирдонаш ӯро латукӯб ва ҳам таҳдиди куштан кардааст. Ба гуфтаи ӯ, сабаби бадрафторӣ бо ӯ танҳо сарзаниши хонанда барои гапгардонӣ будааст. Ташхиси пизишкӣ осеб дидани омӯзгорро тасдиқ кардааст.
Миралӣ Орзуев дар суҳбат ба Радиои Озодӣ гуфт, омӯзгорро назада, балки танҳо суҳбат карданд.
Дар видеои суҳбати муаллим, ки дар шабакаҳои иҷтимоӣ аз ҷумла "Фейсбук" васеъ паҳн шуд, Муҳимҷон Раҳмонов мегӯяд, фарде, ки ба ӯ дарафтод, ҳамчунин гуфтааст, "падару модаратро фалон мекунам" ва сипас "ба рӯям туф кард".
Идомаи даргирӣ миёни Исроил ва "Ҳизбуллоҳ"-и Лубнон
Бо вуҷуди эълони оташбас миёни Исроил ва "Ҳизбуллоҳ"-и Лубнон, ҳамлаҳои ду тараф ҳамчунон идома дорад.
Баъд аз эълони "Ҳизбуллоҳ" дар бораи ҳамла ба нерӯҳо ва тонкҳои Исроил, хабаргузории расмии Лубнон ҳам аз зарбаҳои нави Исроил ба ҷануби Лубнон хабар дод.
Ин гузориш ҳамчунин аз вуқӯи инфиҷор ё таркиши сахт дар шаҳраки "Даббин" хабар дод.
Аз сӯи дигар, артиши Исроил дар соатҳои аввали сешанбеи 2-юми май аз нобуд кардани ду паҳпод аз сӯи Лубнон хабар дод.
"Ҳизбуллоҳ" як гурӯҳи ниманизомӣ ва ҳизби сиёсӣ аст, ки бахши калоне аз ҷануби Лубнонро зери назар дорад. Амрико ин гурӯҳро созмони террористӣ медонад ва Иттиҳоди Аврупо танҳо шохаи низомии онро дар феҳристи сиёҳ қарор додааст.
Ин ҳамлаҳо дар ҳоле анҷом мешаванд, ки Доналд Трамп ва сафорати Лубнон дар Вашингтон шоми 1-уми июн аз мувофиқати "Ҳизбуллоҳ" аз оташбас бо Исроил хабар доданд.
Тиҷорат миёни Тоҷикистону Узбекистон 50% зиёд шудааст
Тиҷорат миёни Тоҷикистон ва Узбекистон дар чор моҳи аввали имсол ба таври назаррас боло рафтааст. Ба иттилои Кумитаи миллии омори Узбекистон, Душанбе ва Тошканд дар моҳҳои январ-апрели имсол дар ҳаҷми 284,3 миллион доллар додугирифт доштаанд, ки дар қиёс ба ҳамин давраи соли гузашта 50,7 дарсад бештар аст.
Ба иттилои расмӣ, аз Тоҷикистон ба Узбекистон бештар маъдан, нерӯи барқ, ангишт, алюминий, нахи пахта ва маҳсулоти кишоварзӣ содир шудааст. Аз Узбекистон ба Тоҷикистон бошад, гази табиӣ, маҳсулоти нафтӣ, нерӯи барқ, масолеҳи сохтмон, техникаи маишӣ ва маҳсулоти фулузотӣ оварда шудааст.
Додугирифти солонаи Душанбеву Тошканд ҳудуди як миллиард долларро ташкил медиҳад. Моҳи март дар ҷараёни сафари президент Эмомалӣ Раҳмон ба шаҳри Тошканд, мақомоти Тоҷикистону Узбекистон гуфта буданд, ки мехоҳанд, дар чор соли оянда, яъне то соли 2030 додугирифтро ба ду миллиард доллар расонанд.
Равобити Тоҷикистону Узбекистон, ки дар гузашта ба далели баҳси роҳу обу нерӯгоҳ ба сардӣ печида буд, баъд аз марги Ислом Каримов ва ба қудрат омадани Шавкат Мирзиёев беҳтар шуд.
Ба писари 18-солаи Рамазон Қодиров боз ҷоиза додаанд
Мақомоти Чеченистон гуфтанд, ба Одам Қодиров, писари 18-солаи Рамазон Қодиров, раҳбари ин ҷумҳурии Русия, барои саҳм гузоштан дар "амалиёти махсуси низомӣ" дар Украина медал ё нишони фахрӣ доданд. Русия таҷовузи низомияшро ба Украина, ки моҳи феврали соли 2022 оғоз кард, расман "амалиёти махсус" меномад.
Аҳмад Дудаев, муовини раиси ҳукумати Чеченистон, рӯзи 1-уми июн навишт: "Ҷоизаи олӣ эътирофи саҳми сазовори Одам Рамазанович дар таъмини амният ва пуштибонӣ аз амалиёти махсуси низомӣ аст."
Ба гуфтаи Аҳмад Дудаев, писари Рамазон Қодиров ба ҳайси ҳамоҳангсози Донишгоҳи нерӯҳои махсуси ба номи Путин дар шаҳри Гудермес "дар рушди яке аз муҳимтарин марказҳои омодасозии ҳомиёни Ватан фаъолона саҳм мегузорад".
Нашрияи таҳқиқотии "Вёрстка" соли 2025 навишт, ки аз моҳи феврали соли 2022 инҷониб ба Одам Қодиров камаш 16 ҷоиза ва нишони фахрӣ додаанд.
Одам Қодиров дар Чеченистон чанд мансабро бар уҳда дорад ва мақомоти ин ҷумҳурӣ ӯро "лейтенанти хурд" эълон кардаанд.
Чанде аз ҷоизаҳоро ба писари раҳбари Чеченистон дар замони ноболиғ буданаш супурдаанд ва пас аз он ки ӯ дар як боздоштгоҳи шаҳри Грозний Никита Журавел, як муттаҳам ба оташ задани китоби Қуръонро латукӯб кард.
Озодии Набиев ва Ғайратов, ду мақоми пешини ҲНИТ аз зиндон
Муҳаммадшариф Набиев ва Абдусамад Ғайратов, ду мақоми баландпояи Ҳизби ҳоло дар Тоҷикистон мамнӯи наҳзати исломӣ, аз зиндон озод шудаанд.
Яке аз пайвандони онҳо бо шарти фош нашудани номаш рӯзи 1-уми июн ба Радиои Озодӣ гуфт, "ҳамин субҳ аз маҳбас баромаданд. Ёздаҳ сол дар боздоштгоҳ ва зиндон буданд."
Дар аксҳое, ки ба дасти Радиои Озодӣ расид, Муҳаммадшариф Набиев дар ҳалқаи наздикон ва берун аз дарвозаи зиндон тасвир ёфтааст.
Муҳаммадашариф Набиев, раиси пешини дафтари ҲНИТ дар минтақаи Кӯлоб ва Абдусамад Ғайратов, узви пешини раёсати олии Ҳизби наҳзати исломӣ соли 2015 дастгир ва дертар ба 14-солии зиндон маҳкум карда шуданд.
Як иттиҳоми асосӣ алайҳи ин аъзои баландпояи ҳизби мамнӯи наҳзати исломӣ ва ҳамроҳонашон кӯшиши ғасби қудрат ва ҳамдастӣ дар ошӯби генерал Абдуҳалим Назарзода (Ҳоҷӣ Ҳалим), муовини пешини вазири дифои Тоҷикистон дар моҳи сентябри соли 2015 гуфта мешуд.
Гурӯҳи кории таҳқиқи боздоштҳои худсарона дар Созмони Милал соли 2020 дар як арзёбияш гуфт, ҳукумати Тоҷикистон аъзои баландпояи ҲНИТ-ро бар хилофи қонун ва уҳдадориҳои байнулмилалиаш дар бораи ҳуқуқи инсон зиндонӣ кардааст.
Ҳизби наҳзати исломӣ то қатъи фаъолият дар Тоҷикистон, ба гуфтаи саронаш, бештар аз 40 ҳазор узв дошт ва баъди Ҳизби ҳокими халқии демократӣ дувумин созмони умдаи сиёсӣ ба ҳисоб мерафт.
Мақомоти Тоҷикистон аз соли 2015 ба ин тараф ин ҳизбро ҳамвора ба кӯшиши сарнагунии ҳукумат, тарҳрезии ошӯб ва куштор муттаҳам мекунанд, вале раёсати ҳизб дар хориҷа ин айбномаҳоро намепазирад.
То кунун барои пайравӣ аз ҲНИТ даҳҳо нафар дар зиндон ҳастанд ё таҳти пайгарди байнулмилилӣ қарор доранд.
Додгоҳ як ронандаро барои пахши ноболиғ 6 сол ҳабс кард
Додгоҳи ноҳияи Шоҳмансури Душанбе як ронандаро барои пахши ноболиғ ба шаш сол зиндон маҳкум кардааст.
Раёсати корҳои дохилии Душанбе гуфт, Раҷаҳмад Рафиев, 4-уми апрели имсол як навраси 8-соларо пахш кардааст ва ин ноболиғ дар ҷойи ҳодиса ба ҳалокат расидааст.
Дар ҳоле, ки назари ронандаи маҳкумшуда ба қазия маълум нест, пулиси Душанбе гуфтааст, ӯ "дар ҳолати сархушӣ" ва зери таъсири доруи "лирика", қарор дошт.
Додгоҳи Раҷаҳмад Рафиевро дар вайрон кардани қоидаи ҳаракат, ки боиси марги инсон мешавад, гунаҳкор дониста, ӯро 6 сол зиндонӣ кард. Ҳамчунин ин мард баъди озод шудан даҳ сол ҳаққи ронандагӣ надорад.
Маълум нест, ки Рафиев дар додгоҳ то куҷо гуноҳашро эътироф кардааст.
Раёсати корҳои дохилии Душанбе бо нашри ин хабар аз сокинон талаб кардааст, ки "ҳеҷ гоҳ дар ҳолати сархушӣ ё зери таъсири маводи нашъадор" ронандагӣ накунанд.
Солона дар садамаҳои нақлиётӣ дар Тоҷикистон садҳо кас кушта ва маъюби якумрӣ мешаванд. Тибқи иттилои расмӣ, соли 2025 дар пайи садамаҳои нақлиётӣ дар Тоҷикистон 643 нафар ҷон бохтаанд.
Хадамот гуфт, мушкили камбуди семент "дар як шабонарӯз" ҳал шуд
Намояндагони Хадамоти зиддиинҳисории Тоҷикистон муддаӣ шудаанд, ки мушкили камбуди семент ва боло рафтани нархи ин маҳсулот "дар як шабонарӯз" ҳал шудааст.
Ба гузориши Хадамот, аз нимаи дуюми моҳи май "камчинии маҳсулоти семент дар бозорҳои ҷумҳурӣ мушоҳида гардида", нархи як халта семент аз 70 то 85 сомонӣ ба фурӯш гузошта шуд.
Дар иттилои расмӣ омадааст, 29-уми май нархи як халта семент дар минтақаҳои кишвар мутаносибан аз 54 то 65 сомонӣ аст. Радиои Озодӣ мустақилона ин маълумотро тасдиқ карда наметавонад.
Аммо намояндагони Хадамоти зиддиинҳисорӣ нагуфтаанд, ки чаро нархи семент якбора боло рафт?
Дар Хадамот бидуни шарҳи бештар гуфтанд, гурӯҳи кории ин ниҳод то пурра ба эътидол омадани вазъ корашро давом медиҳад.
Мақомот дар гузашта ҳам талош кардаанд, ки нархи баъзе маҳсулот, аз ҷумла гӯштро назорат кунанд, аммо дар ниҳоят нарх боз боло рафт.
Рӯзи 28-уми май дар ҷаласаи ҳукумат масъалаи камбуди семент дар кишвар баҳс шуд ва раиси ҷумҳур аз ин вазъ интиқод кард.
Дар ҷаласа гуфта шудааст, ки баъзе корхонаҳои истеҳсолӣ дар мавсими фаъоли сохтмон аз кор монда, фаъолияти миёнаравҳо дар баъзе ҳолатҳо ба болоравии нархи маҳсулот таъсир расондааст.
Барқарор шудани парвозҳо аз Теҳрон ба Душанбе
Баъди се моҳ таваққуф, парвозҳо дар хатсайри Теҳрон-Душанбе азсар гирифта шудаанд. Ҳавопаймои ширкати эронии "Вориш" зуҳри 31-уми май дар Фурудгоҳи байнулмилалии Душанбе нишаст.
Тибқи нишондоди онлайн-таблои Фурудгоҳи Душанбе, ҳавопаймои ширкати "Вориш" соати 12 ба Душанбе расида, баъди ду соат ба Теҳрон баргашт.
Парвозҳо дар хатсайри Теҳрон-Душанбе баъди ҳамлаи Амрико ва Исроил ба Эрон дар охири моҳи феврали имсол қатъ шуда буд. Бо эълони оташбас дар моҳи апрел парвозҳо дар ин масир барқарор нашуд ва манобеи огоҳ ба Радиои Озодӣ гуфта буданд, Туркманистон барои убури ҳавопаймои эронӣ иҷозат надодааст.
Дар хатсайри Теҳрон-Душанбе ҳавопаймоҳои ширкати тоҷикистонии "Сомон Эйр" ҳам то охири феврал парвоз мекарданд. Ин ширкат дар бораи барқарории парвозҳо ҳанӯз хабар надодааст.
Ҳамлаи густурдаи Исроил ба ҷануби Лубнон
Артиши Исроил рӯзи якшанбеи 31-уми май аз амалиёти густурдаи заминӣ дар ҷануби Лубнон хабар дод.
Дар баёнияи артиш омадааст, неруҳои исроилӣ барои таҳкими мавқеашон аз рӯди Литонӣ убур кардаанд. Ин рӯд тақрибан дар 30 километрии марзи Исроил ва Лубнон ҷойгир аст.
Дар ҳамин ҳол Исроил Катс, вазири дифои Исроил эълом кард, ки артиши ин кишвар қалъаи Шақиф (Бофур), як қалъаи стратегии асримиёнагӣ дар ҷануби Лубнонро тасарруф карда, парчами Исроилро болои он барафроштааст.
Артиши Исроил ҳамчунин рӯзи якшанбе ба ғайринизомиёни лубнонӣ дар ҷануби рӯди Заҳронӣ ҳушдор дод, ки фавран ба шимоли ин рӯдхона раванд. Исроил аз сахтар шудани амалиёти алайҳи гуруҳи Ҳизбуллоҳ хабар дод.
Шохаи низомии "Ҳизбуллоҳ"-ро ИМА ва Иттиҳоди Аврупо террористӣ медонанд. Ин гурӯҳ дар порлумони Лубнон намояндагони худро дорад.
Оташбас миёни Исроил ва Ҳизбуллоҳ аз 17-уми апрел расман барқарор шудааст, аммо он дар амал риоя нашуд. Ҳарду тараф якдигарро ба нақзи он муттаҳам мекунанд.
Бетартибиҳо ҳангоми таҷлили пирӯзии ПСЖ дар Фаронса
Дар Париж ва дигар шаҳрҳои Фаронса дар ҷараёни нооромиҳо пас аз пирӯзии ПСЖ дар Лигаи қаҳрамонҳо, беш аз 300 нафар боздошт шуданд.
Дар пойтахти Фаронса даҳҳо ҳазор мухлис барои тамошои ин бозӣ дар варзишгоҳи "Парк де Пренс"-и ПСЖ ҷамъ омаданд. Аз чаҳор то панҷ ҳазор нафар дар беруни варзишгоҳ буданд, ки бархе аз онҳо ба сӯи пулис ашёву оташбозиҳои гуногун партофтанд.
Ба гузориши хабаргузории Франс Пресс, бо истинод ба изҳороти пулис, ҳудуди 150 нафар "кӯшидаанд аз дарвозаи варзишгоҳ рахна шаванд", аммо ба ақиб ронда шуданд.
Бошгоҳи ПСЖ (Пари Сен-Жермен)-и Фаронса 30-юми май дар бозии ниҳоии Лигаи қаҳрамонҳои УЕФА тими "Арсенал"-и Англияро шикаст дод ва барои дувумин бор паёпай ба унвони қаҳрамони ин мусобиқот мушарраф гардид.