Пайвандҳои дастрасӣ

Хабари нав

Хабарҳо

Таҷаммӯи зодагони Бадахшон дар назди сафорати Тоҷикистон дар Русия

Гирдиҳамоӣ дар назди сафорати Тоҷикистон дар Маскав, 25-уми ноябри 2021

Беш аз сад нафар аз бадахшониёни муқими Русия шоми 25-уми ноябр бо нишони эътироз дар назди сафорати Тоҷикистон дар Маскав таҷаммуъ карданд.

Онҳо аз амалиёти мақомоти қудратии Тоҷикистон дар минтақа норозӣ ҳастанд, ки дар пайи он рӯзи 25-уми ноябр як сокини Роштқалъа кушта шудааст. Мақомот мегӯянд, Гулбиддин Зиёбекови 29-сола ҳангоми амалиёти боздошт "муқобилият нишон дод ва захмӣ карда шуд".

Рӯзи 25-уми ноябр даҳҳо сокини шаҳри Хоруғ ва ноҳияи Роштқалъа низ дар маркази Вилояти Мухтори Кӯҳистони Бадахшон тазоҳурот карданд. Онҳо тобути Гулбиддин Зиёбековро бо худ ба назди ҳукумати маҳаллӣ оварда, хоҳони боздошт ва муҷозоти сабабгорони марги ӯ шуданд.

Яке аз эътирозгарон дар назди сафорати Тоҷикистон дар Маскав бе зикри номаш ба Радиои Озодӣ гуфт, онҳо аз ҳукумат талаб доранд, ки иртиботро бо Вилояти Мухтори Кӯҳистони Бадахшон барқарор карда, омилони марги сокини Роштқалъаро ҷазо диҳанд.

Ба гуфтаи онҳо, пас аз сар задани ҳодиса, иртибот бо Бадахшон қатъ шудааст ва Интернету симкортҳои телефонҳои мобилӣ кор намекунад.

Мақомоти Тоҷикистон мегӯянд, Гулбиддин Зиёбеков бо гумони даст доштан дар гаравгонгирии як корманди додситонии Роштқалъа як сол боз кофтуков мешуд ва "ҳангоми боздошт бо туфангча муқобилият нишон дод". Мақомот дар эъломияи расмӣ танҳо захмӣ шудани ӯро зикр кардаанд.

Эътирозгарон дар Маскав зоҳиран бо ин фарзия розӣ нестанд. Онҳо мегӯянд, дар сурати иҷро нашудани талабҳояшон ба эътироз идома хоҳанд дод.

Сафорати Тоҷикистон дар Русия дар мавриди тазоҳурот то ҳол чизе нагуфтааст. Масъулонаш ба тамосҳои батакрори Радиои Озодӣ то ин дам посух надоданд.

Ҳамаи хабарҳои имрӯзро дар инҷо бихонед

Қамчибек Тошиев: Вазъ дар марз бо Тоҷикистон "зери назорат аст"

Қамчибек Тошиев

Қамчибек Тошиев, раиси Кумитаи давлатии амнияти миллии Қирғизистон, гуфт, вазъ дар сарҳад бо Тоҷикистон "зери назорат аст". Вай дар ин бора рӯзи 2-юми декабр дар мусоҳиба бо шабакаи NUR-ТВ изҳори назар кард.

"Дар 3-4 рӯзи охир вазъ печида шуда, нигарониҳоро ба бор оварда буд. Рӯзи 1-уми декабр, нисфи шаб, музокироти дуҷониба дар деҳаи Куктош ба поён расид. Вазъ зери назорат аст, сарҳадҳо мустаҳкам карда шудаанд ва мо дар хидмат ҳастем," – афзудааст Тошиев.

Рӯзи якуми декабр сокинони деҳаи Сомониёни ҷамоати Чоркӯҳи Исфара дар бораи рабуда ва латукӯб шудани як омӯзгори 59-сола дар марз бо Қирғизистон хабар доданд. Раиси деҳаи Куктоши ноҳияи Бодканди Қирғизистон баръакс иддао кард, ки шаҳрвандони Тоҷикистон як сокини ин деҳаро ҳангоми ҷустуҷӯи чорво задаанд.

Хадамоти марзбонии Қирғизистон шаби 1-уми декабр гуфт, дар сарҳад "аз самти Тоҷикистон аз туфанги шикорӣ 7-8 тир холӣ карда шудааст". Мақомоти Тоҷикистон ҳанӯз дар мавриди ҳарду ҳодиса ва ҷузъиёти музокирот шарҳе надодаанд.

Ҷониби Қирғизистон мегӯяд, дар музокирот ҳокимони ноҳияҳои наздимарзӣ ва намояндагони ниҳодҳои қудратӣ иштирок доштанд ва ба ин натиҷа расиданд, ки аз 2-юми декабр минтақаҳои марзиро муштарак ё якҷоя посбонӣ мекунанд. Феълан вазъ дар сарҳад муътадил гуфта шудааст.

Марзи Тоҷикистону Қирғизистон солҳо боз ба далели номуайян будани бахше аз сарҳад доғ ва мояи ҷанҷолу задухӯрдҳост. Низои мусаллаҳонаи моҳи апрели имсол, ки аз ду ҷониб даҳҳо кушта ва захмӣ бар ҷой гузошт, робитаи ду кишвари болооби Осиёи Марказиро сарду печида кард. Ҳарду тараф ҳамвора якдигарро ба сар задани муноқиша ва кӯшиши ноором кардани вазъ гунаҳкор мекунанд.

Сафири Афғонистон "не"-и СММ-ро "оғози поёни ҳукумати Толибон" донист. ВИДЕО

Сафир дар Душанбе: "Ин поёни ҳукумати Толибон аст"
лутфан мунтазир бошед

Феълан кор намекунад

0:00 0:01:31 0:00

Гурӯҳе аз паноҳандагон ва сафиру мансабдорони ҳукумати барканоршудаи Афғонистон дар Тоҷикистон аз тасмими надодани курсии Кобул ба Толибон дар Созмони Милали Муттаҳид ситоиш карданд. Нишаст рӯзи 2-юми декабр дар Душанбе баргузор шуд.

Муҳаммад Заҳир Ағбар, сафири Афғонистон дар Душанбе, тасмими Созмони Милалро таърихӣ номид: "Ба ин бовар ҳастем, ки оғози шикасти Толибон аз ҳамин рӯзи таърихӣ шуруъ шуда. Мо як бори дигар аз тамоми ҳамкорон дар намояндагиҳои сиёсии Афғонистон ташаккур мекунем. Агар садое ҳам накашиданд, ақаллан парчами серанги Афғонистонро дар намояндагиҳои худ боло нигоҳ доштанд."

Сафири ҳукумати пешини Афғонистон аз посух додан ба суоли он ки шуморе аз паноҳандаггони афғонро аз Тоҷикистон ба Афғонистон бозпас фиристодаанд, худдорӣ кард. Ӯ гуфт: "Масоили баъдӣ шуда метавонад, ки як рӯзи дигар суҳбат кунем, салому алайкум."

Ҷаноби Ағбар дар робита ба даъвати СММ аз кишварҳои ҳамсояи Афғонистон, аз ҷумла Тоҷикистон, ки марзҳои худро барои паноҳандагон боз ва аз ихроҷи онҳо бозпас ба Афғонистон худдорӣ кунанд, чунин посух дод: "Ин тасмимгирии кишварҳост ва дар он кадом тарҳи мушаххас ва назари мушаххасе надорам."

Комиссариати олии Созмони Милал дар умури паноҳандагон як рӯз пеш аз он ибрози нигаронӣ кард, ки бозпас фиристодани афғонҳо аз Покистону Эрон ва Тоҷикистон пас аз тасарруфи Толибон "афзоиш ёфтааст". Он аз мақомоти ҳамаи кишварҳо даъват кардааст, ки депорти паноҳҷӯёни афғонистониро бас кунанд.

"Spirit of America" ва Сафорати ИМА ба мактаби афғонии "Сомониён" дар Душанбе кӯмак мекунанд

Як созмони ҷамъиятии амрикоӣ дар якҷоягӣ бо Сафорати ИМА дар Тоҷикистон, дар як соли оянда ба мактаби афғонии "Сомониён" дар Душанбе беш аз 80 ҳазор доллар кӯмак хоҳанд кард. Ҳадаф аз ин кӯмак, ҳифзи ин ягонаи мактаби афғонӣ дар Тоҷикистон ва идомаи фаъолияти он, гуфта шудаааст.

Дар пайи суқути ҳукумати пешини Афғонистон ва ба сари қудрат омадани Толибон, масъулини ин мактаб нигаронӣ карда буданд, ки бинобар мушкили молӣ, эҳтимол дорад ин мактаб аз фаъолият боз монад. Ин мактаб аз сӯи ҳукумати Афғонистон сармоягузорӣ мешуд. Мактаби "Сомониён" дар бинои хусусӣ ҷойгир буда, иҷораи моҳонаи он дувуним ҳазор доллар аст.

Сафорати Амрико дар Тоҷикистон рузи 2-юми декабр бо нашри як иттилоия гуфт, ки бо кӯмаки беш аз 80-ҳазордолларии Созмони хадамоти шаҳрвандии "Spirit of America" ва Сафорат, ин муассисаи таълимӣ барои донишомузони афғон муқими Тоҷикистон, боз хоҳад буд. Созмони хадамоти шаҳрвандии "Spirit of America хароҷоти иҷора, ҳамлу нақли донишомӯзон, харидории мебел, таъмири ҷузъӣ ва дастрасӣ ба интернети мактаби "Сомониён"-ро пардохт мекунад.

Ноҷия Зоҳир, мудири мактаби "Сомониён" бо қадрдонӣ аз ин кӯмаки "Spirit of America" гуфтааст, ки ин кӯмаки арзишманд воқеан зиндагии донишомузони онҳоро тағйир медиҳад.

Сафорати Амрико мегӯяд, ин кӯмаки молӣ илова ба ҳамкории "Spirit of America" ва Сафорати Иёлоти Муттаҳидаи Амрико барои ҳимоят аз се маркази ҷамъиятӣ дар Ваҳдат аст, ки бо забони англисӣ, фанноварӣ ва барномаҳои касбиро ба беш аз 2500 тоҷику афғон пешниҳод мекунанд.

Мактаби "Сомониён" ҳудуди 450 хонанда ва 30 омӯзгор дошта, пардохти ҳаққи хидмати коммуналӣ ва маоши муаллимон аз ҳисоби маблағи шартнома пешбинӣ шудааст. Таҳсил дар ин мактаб бо хат ва забони форсӣ, бар асоси барномаи таълими Афғонистон, сурат мегирад.

ФСБ-и Русия се украиниро ба ҷосусӣ муттаҳам кард, Киев рад намуд

Акс аз бойгонӣ

ФСБ ё Хадамоти федеролии амнияти Русия мегӯяд, се шаҳрванди Украинаро, ки ба ҳамкорӣ бо ниҳодҳои амниятии ин кишвар гумонбаранд, дастгир кардааст.

Мақомоти Русия 2-юми декабр гуфтанд, ду нафар аз боздоштшудаҳо шаҳрвандони Украина, Зиновий Ковал ва писараш Игор, ҳастанд, ки гуё “маълумоти махфиро ба Хадамоти амнияти Украина ҷамъ меоварданд”.

Дар изҳорот аз шахси севум Александр Тсилик аз Киев ном бурдаанд. Ба иттилои мақомоти Русия, Тсилик иқрор шудааст, ки агент ё ҷосуси низомии Украина буд ва қасд дошт, дар қаламрави Русия бо истифода аз маводи тарканда “амали террористӣ” анҷом диҳад.

Дар изҳорот кай ва дар куҷо боздошт шудани шахсони гумонбар ба ҷосусӣ зикр нашудааст.

Хадамоти амниятии Украина рӯзи 2-юми декабр иддаои ФСБ-ро рад намуд.

Киев ва ҳомиёни ҳуқуқ мегӯянд, Русия аз замони тасарруфи Қрим дар соли 2014 ва пуштибонӣ аз ҷудоиталабони мусаллаҳ дар шарқи Украина, чанд украиниро бо иттиҳомҳои сохта ва дорои ангезаҳои сиёсӣ боздошту зиндонӣ кардааст. Дар ҷангҳо дар шарқи Украина беш аз 13 ҳазору 200 кас кушта шудаанд.

Нилуфар Раҷабоваро ба ифротгароӣ гумонбар кардаанд

Нилуфар Раҷабова. Акс аз бойгонӣ

Духтари як узви зиндонии ҳизби дар Тоҷикистон мамнӯи наҳзати исломӣ ба ифротгароӣ гумонбар шудааст.

Нилуфар Раҷабова, духтари Раҳматуллои Раҷаб, гуфт, мақомоти Тоҷикистон ба зидди ӯ бар асоси моддаи "ифротгароӣ бо истифода аз Интернет" (қисми дуи моддаи 307(1)-и Кодекси ҷиноӣ) парванда кушодаанд. Ин банди қонун аз панҷ то даҳ сол ҷазоро дар назар дорад.

Хонум Раҷабова дар ҳоли ҳозир дар берун аз Тоҷикистон аст ва мегӯяд, мақомот пайвандонашро дар Душанбе бо парванда шинос кардаанд.

Мақомот барои шарҳи хабар то ин дам дастрас набуданд. Маълум нест, ки парванда дар робита ба кадом ҳодиса боз шудааст.

Нилуфар Раҷабова рӯзи 2-юми декабр гуфт, маъмурони амниятӣ ба бародару хоҳараш сабаби ифтитоҳи парвандаро ба суҳбатҳои ӯ дар шабакаҳои наздик ба мухолифин рабт додаанд. "Ба пайвандонам гуфтаанд, агар танҳо дар саҳифаи худаш навори суҳбатро мегузошт, гапе намешуд. Дар шабакаи "хоинҳо" баромад кардааст ва ин ҷиноят аст," – нақли қавл кард ӯ.

Хонум Раҷабова тасдиқ кард, ки рӯзи 18-уми ноябри имсол дар "Паём.нет", шабакаи марбут ба мухолифини тоҷик, дар бораи ба ШИЗО ё утоқи ҷаримавии маҳбас бурда шудани падараш, Раҳматуллои Раҷаб, суҳбат кардааст, аммо онро ғайриқонунӣ намедонад.

Додгоҳи олии Тоҷикистон шаш сол пеш фаъолияти ҲНИТ ва шабакаҳои марбут ба онро дар кишвар мамнуъ карда, ҳизбро террористӣ номид. Паймони Миллӣ, эътилофи созмонҳои мухолифин, низ дар рӯйхати созмонҳои мамнуъст. Мухолифин дар хориҷа ин айбномаро ҳамвора сохтаву бепоя ва баҳонае барои рондани онҳо аз саҳнаи сиёсии Тоҷикистон медонанд.

Раҳматуллои Раҷабро соли 2015 боздошт ва ба 28 сол зиндон маҳкум карданд. Ӯ моҳҳои охир ба камияш ду бор аз мақомоти Тоҷикистон бозбинии ҳукмашро хостааст.

Номи Нилуфар Раҷабова бори аввал соли 2019, замоне расонаӣ шуд, ки барои доштани рӯсарӣ боздошт шуда, ҷарима пардохт. Ӯ се фарзанд дорад ва дуи онҳо ба бемории шикасти устухон гирифторанд.

Созмонҳои байнулмилалӣ борҳо аз таъқибу бозпурсии пайвандони фаъолони сиёсӣ дар Тоҷикистон нигаронӣ карда, аз мақомот хостаанд, фишор болои онҳоро бас кунанд. Мақомот ҳамвора фишор ба хонаводаҳои фаъолони сиёсиро инкор кардаанд.

WTA ҳамаи мусобиқаҳои худро дар Чин бас кард

Пэн Шуай

Иттиҳодияи тенниси занон (WTA) рӯзи 1-уми декабр эълон кард, ки баргузории ҳама гуна мусобиқаҳои ин созмонро дар Чин, бо шумули Ҳонгконг, ба хотири нигарониҳо аз амнияти варзишгари чинӣ Пэн Шуай боз доштааст.

Пэн Шуай баъди гунаҳкор кардани мансабдори чинӣ дар озори ҷинсӣ чанд ҳафта мешавад, дар мазҳари ом пайдо намешавад.

Раҳбари WTA Стив Саймон, ки борҳо аз тақдири теннисбози чинӣ изҳори нигаронӣ кардааст, гуфт, "ба Пэн Шуай иҷозат намедиҳанд, ки озодона гап занад. Зоҳиран ба вай фишор меоранд".

Ба гуфтаи ӯ, иттиҳодия ҳанӯз ҳам намедонад, ки варзишгари чинӣ дар куҷо қарор дорад. Саймон хост, иттиҳоме, ки Пэн Шуай гуфтааст, шаффоф таҳқиқ карда шавад.

Мақомоти Чин мегӯянд, Пэн Шуай, ки муовини сарвазир Чжан Гаолиро ба озори ҷинсӣ айбдор кардааст, дар ҷойи амн қарор дорад.

Рӯзи 21-уми ноябр видеое дар Интернет нашр шуд, ки нишон медиҳад, варзишгар дар мусобиқае дар Пекин теннис бозӣ мекунад, вале рӯзноманигорон ва мухлисон имкони суҳбат бо ӯро надоштанд.

Гумонбари ҳамла ба сиёсатмадори мухолифи қирғиз боздошт шуд

Омурбек Текебоев

Пулиси шаҳри Бишкек шоми 1-уми декабр хабар дод, ки мардеро бо гумони ҳамла ба Омурбек Текебоев, раҳбари Ҳизби мухолифи "Ота Макон"-и Қирғизистон боздошт кардааст.

Ба хабари пулис, гумонбар сокини 23-солаи вилояти Чӯйи Қирғизистон аст. Ӯ телефони мобилиеро, ки аз Текебоев дуздида буд, ихтиёрӣ баргардонида, дар ҳоли ҳозир дар боздоштгоҳ қарор дорад.

Омурбек Текебоев гуфт, ҳамла 1-уми декабр дар тарабхонаи "Парк Отел"-и Бишкек сурат гирифт. Ба гуфтаи ӯ, тақрибан 70 марди ниқобпӯш ба онҷо рафта, се нафарашон ӯро задаанд.

Текебоев бовар дорад, ки ҳамла ба фаъолиятҳои сиёсии ӯ рабт мегирад. Президенти Қирғизистон Содир Ҷабборов (Содир Жапаров) ба Вазорати корҳои дохилии ин кишвар дастур додааст, ки ҳодисаро ҳамаҷониба санҷанд. Муовини сарвазири Қирғизистон Эдил Байсалов дар Твиттер навишт, "дар Қирғизистон ба хушунати сиёсӣ ҷой нест".

Ҳамла дар замоне сурат гирифт, ки ҳудуди 300 ҷонибдори Ҳизби "Ота Макон" ва чанд ҳизби дигари мухолиф дар назди Кумисюни марказии интихобот дар Бишкек ҷамъ шуда, ин ниҳодро ба тақаллуб гунаҳкор карданд. Онҳо хостанд, интихоботи нав баргузор карда шавад.

Базанов ва ҳамсарашро аз Ҷумҳурии Чех рондаанд

Владимир Базанов

Мақомоти Ҷумҳурии Чех раиси Федератсияи Футболи Беларус Владимир Базанов ва ҳамсарашро ба хотири амали хилофи қонунҳои давраи пандемияи COVID-19 аз ин кишвар берун кардаанд.

Рӯзи якуми декабр полиси Чехия гуфт, 30-юми ноябр ду шаҳрванди хориҷӣ дастур гирифтанд, ки то охири рӯз аз қаламрави минтақаи Шенген берун шаванд.

Полис афзудааст, тафтиши макони зисти ин ду нафар собит намуд, ки онҳо ҳангоми вуруд ба Чехия хилофи дастурҳои Вазорати тандурустии ин кишвар амал кардаанд.

Расонаҳои чехӣ аз қавли вазири корҳои Чехия Якуб Кулҳанек нақл мекунанд, ки рӯзи якуми декабр раводиди сафари Базанов ва ҳамсараш ба минтақаи Шенген беэътибор дониста шуд ва онҳоро аз боздошт раҳо карданд.

Тибқи суханони вазир онҳо имкон ёфтанд, ки фавран аз хоки Чехия берун шаванд.

Хабаргузории русии ТАСС навиштааст, якуми декабр Вазорати корҳои хориҷии Беларус дипломатҳои чехии мустақар дар ин кишварро даъват намуда, ба онҳо нотаи эътирозӣ супурдааст.

Вазорат гуфт, мавсими ҷалби ҷавонон ба артиш поён ёфт, аммо даъват идома мекунад

Акс аз бойгонӣ

Вазорати мудофиаи Тоҷикистон хабар дод, ки даъват ба артиш расман поён ёфтааст, аммо даъвати ҷавонон ба комиссариатҳои ҳарбии маҳалли зисташон давом хоҳад кард.

Сомонаи Вазорати мудофиаи Тоҷикистон рӯзи 1-уми декабр навишт, ҷавононро барои омӯзиш ва омодагӣ ба даъвати баҳорӣ ба комиссариатҳои ҳарбӣ даъват мекунанд.

Ҳар сол Вазорати мудофиа пеш аз муҳлат эълон мекард, ки даъвати ҷавонон ба артиш хотима ёфтааст. Ин бор нагуфт, ки нақша "сад дар сад иҷро шуд".

Пештар баъзе аз ҳамсуҳбатони Радиои Озодӣ низ тахмин зада буданд, ки эҳтимол даъвати ҷавонон ба артиш пурра иҷро нашудааст.

Ҳар сол тирамоҳу баҳор ҷавонони аз 18 то 27-соларо ба артиши Тоҷикистон даъват мекунанд. Мавсими тирамоҳии даъват ба артиш якуми октябр сар шуда, якуми декабр ба анҷом мерасад.

Ин дар ҳолест, ки рӯзи 1-уми декабр аз баъзе шаҳру ноҳияҳои Тоҷикистон хабар расид, ки “сарбозшикор” ё бо зӯр ба артиш бурдани ҷавонон идома дорад.

Бо вуҷуди қабули қонун дар бораи хидмати алтернативӣ, ки бо супурдани маблағ ҷавононро аз уҳдадории ҳарбӣ озод мекард, имсол низ шикоятҳо аз "сарбозшикор" ё “облава” зиёд буд.

Мақомот аз он нигаронанд, ки баъзе аз ҷавонон бо ҳар баҳона аз хидмат сарпечӣ мекунанд. Намояндагони созмонҳои ҳомии ҳуқуқ далелашро ба вазъи нохуби қисмҳои ҳарбӣ ваз арбу лати наваскарон дар онҷо пайванд медиҳанд.

Тоҷикистон як зани афғонистонӣ ва 13 узви хонаводаашро "ба Толибон супурдааст" ВИДЕО

Паноҳҷӯёни афғон дар марзи Эрону Афғонистон. Акс аз моҳи августи 2021

Як зани рӯзноманигор аз Афғонистон иддао дорад, ки мақомоти Тоҷикистон ӯ ва 13 узви хонаводаашро ба Толибон супурдаанд.

Марзбонҳои тоҷик ҳодисаро тасдиқ ё рад намекунанд. Зан рӯзи 2-юми декабр дар тамос бо Радиои Озодӣ гуфт, онҳо аввали моҳи ноябр ба воситаи Ишкошим вориди хоки Тоҷикистон гардида, "пас аз як ҳафта" дубора ба Афғонистон пас гардонда шуданд. Номи зан ба далели амниятӣ нашр намешавад.

Пештар мақомоти Тоҷикистон гуфта буданд, ки дар шароити нохуби иқтисодӣ тавоноии пазироӣ аз паноҳҷӯёни бештарро надоранд.

Ин зани афғонистонӣ нақл кард, ки бо ворид шудан ба хоки Тоҷикистон ҳамчун паноҳҷӯ худро ба Идораи пулиси маҳаллӣ таслим карданд. Марзбонон ва пулис гуфтаанд, сарнавишти онҳо дар Душанбе ҳал мешавад.

“Бо ҳафт тифли хурди хонавода ва тағоям, ки корманди ҳукумати собиқ буд, вориди Тоҷикистон шуда будем. Баъди як ҳафта моро маҷбуран ба марз бурданд ва ба дасти сарҳадбонони Толиб супурданд,” -- иддао кард ӯ.

Видеоро дар инҷо бинед:

Тоҷикистон як зан ва хонаводаашро "ба Толибон супурдааст"
лутфан мунтазир бошед

Феълан кор намекунад

0:00 0:02:24 0:00

Мақомот ҳанӯз вокуниш накардаанд. Дафтари Комиссариати олии СММ дар умури паноҳандагон рӯзи 19-уми ноябр аз истирдоди паноҳҷӯёни афғонистонӣ аз Тоҷикистон бонги изтироб зада буд. Дар изҳороти созмон гуфта мешуд, ки мақомоти Тоҷикистон 11-уми ноябр 11 марду зан ва кӯдаконро ба Афғонистон “зӯран баргардониданд”.

Рӯзноманигори афғон гуфт, замоне онҳоро ба Толибон месупурданд, “марзбонони тоҷик ашк мерехтанд, вале гуфтанд, агар ин коррро анҷом надиҳанд, худашон зиндонӣ мешаванд”. Ӯ гуфт, бо вуруд ба Афғонистон тағояшро Толибон боздошт карданд ва ду ҳафта аст, ки аз сарнавишташ хабаре надоранд.

Толибон дар нимаи моҳи августи имсол Афғонистонро тасарруф карданд. Рӯзноманигорон ва фаъолони дигар аз тарси гуруҳи тундгарои "Толибон" ин кишварро тарк карданд.

Комиссариати олии Созмони Милали Муттаҳид дар умури паноҳандагон аз Тоҷикистон ва ҳамсояҳои дигари Афғонистон хостааст, марзҳои худро ба рӯйи паноҳҷӯёни афғон, ҳатто агар ҳуҷҷат ҳам надошта бошанд, бикушоянд. Ин ниҳод гуфт, марзҳои Покистону Эрон ба рӯйи афғонҳои соҳиби ҳуҷҷат ва раводид (виза) боз аст, вале сарҳади Тоҷикистону Узбекистон “комилан бастааст”.

Пештар мақомоти Тоҷикистон гуфта буданд, ки 15 ҳазор паноҳҷӯи афғонро қабул кардаанд. Намояндаи Комиссариати олии Созмони Милали Муттаҳид ду ҳафта пеш ин шумораро тақрибан 12 ҳазор нафар гуфт.

Савдогарони қади роҳро низ ба "бозори бародари президент" бурдаанд

Бозори "Каёнуш" дар ноҳияи Данғара

Даҳҳо савдогари канори роҳ ва кӯчаҳои марказии ноҳияи Данғараро, ки тиҷорати хурд доштанд, маҷбурӣ ба бозори "Каёнуш" бурдаанд. Пештар мақомоти Данғара тоҷирони мева ва гӯштро аз бозори марказӣ ба онҷо кӯчонда буданд.

Ин бозор аз маркази ноҳия се километр дур аст ва савдогарон нигаронанд, ки муштариёни худро аз даст медиҳанд. Қаблан мақомоти ноҳия гуфта буданд, ки барои беҳтар кардани шароити тоҷирон ва харидорон онҳоро ба ин бозор мефиристанд.

Баъзе аз соҳибкорон ва мансабдорони ноҳияи Данғара бозори “Каёнуш”-ро ба хонаводаи Нуриддин Раҳмон, бародари Эмомалӣ Раҳмон, президенти Тоҷикистон, марбут медонанд. Фармони кӯчондани соҳибкорон ба бозори “Каёнуш”-ро Исломиддин Раҳмон, раиси 38-солаи ноҳияи Данғара ва писари Нуриддин Раҳмон содир кардааст.

Ноҳияи Данғара дар маконе ҷойгир шудааст, ки мусофирон аз вилояти Мухтори Кӯҳистони Бадахшон ва ноҳияҳои минтақаи Кӯлоб аз ҳудуди он гузашта, ба шаҳри Бохтар, маркази вилояти Хатлон ва шаҳри Душанбе, пойтахти кишвар мерасанд.

Мақомоти ноҳияи Данғара мегӯянд, рӯзе аз 4 то 5 ҳазор нафар аз ҳудуди ин ноҳия мегузарад ва муштариёни аслии фурӯшандаҳо онҳо ҳастанд.

Саҳмияҳои Эрон, Тоҷикистон ва Лубнон дар Лигаи қаҳрамонҳои Осиё мушаххас шуд

Бозиӣ миёни "Истиқлол"-и Тоҷикистон ва "Ал-Ҳилол"-и Арабистони Саудӣ. Акс аз бойгонӣ.

Конфедератсияи футболи Осиё меъёри ҳузури Тоҷикистон ва Лубнонро дар Лигаи қаҳрамонҳои AFC-2022 тасдиқ кард. Ин дар ҳолест, ки чанд рӯз пеш дар расонаҳо хабаре пахш шуда буд, ки саҳмияҳои Тоҷикистону Лубнон барои ширкат дар Лигаи қаҳрамонҳои Осиё-2022 ба далели дер фиристодани аснод лағв шудаанд.

Аммо торнамои "Рейтинги футбол" бо нашри як хабари фаврӣ эълом кард, ки Конфедератсияи футболи Осиё ба бошгоҳҳои Тоҷикистон ва Лубнон иҷозаи ширкат дар ин мусобиқотро додааст. Ҳамин тариқ, бошгоҳи “Истиқлол”-и Тоҷикистон дар марҳилаи гурӯҳии Лигаи қаҳрамонҳои Осиё ҳузур хоҳад дошт. Инчунин дар Ҷоми AFC-2022 аз Тоҷикистон ва Лубнон дудастаӣ иштирок мекунанд.

Саҳмияҳои Эрон -- кишвари ҳамзабони Тоҷикистон дар Лигаи қаҳрамонҳои Осиё-2022 тибқи фасли пешин 2+2 мебошад. Аз ин рӯ, «Персеполис» ва «Фулод» ба далели пирӯзӣ мутаносибан дар Лигаи бартар ва Ҷоми Эрон ба сурати мустақим дар марҳилаи гурӯҳӣ ширкат хоҳанд кард. "Сипоҳон" ва "Истиқлол" бошанд, бояд дар марҳилаи плей-оффи Лигаи қаҳрамонҳои Осиё-2022 иштирок кунанд.

Бар асоси муқаррароти AFC, дар солҳои қаблӣ дар сурати лағви саҳмияҳои ин гуна кишварҳо, саҳмияҳои Эрон 3+1 буд, яъне “Сипоҳон” мустақиман дар сабқати гурӯҳии Лигаи қаҳрамонҳои Осиё-2022 ширкат меварзад.

Бар асоси ин хабар, саҳмияҳои Эрон дар Лигаи қаҳрамонҳои Осиё-2022 мисли пештара 2+2 боқӣ монд ва “Сипоҳон” аз шонси ширкат дар сабқати гурӯҳӣ маҳрум шуд. “Сипоҳон” ва бошгоҳи дигари эронӣ - “Истиқлол” - бояд дар даври плей-офф ширкат варзанд.

Мақомот: "Эътирозгарони Хоруғ ба ҷавобгарӣ кашида намешаванд, агар..."

Хоруғ, 26-уми ноябри 2021

Ҳукумати Бадахшон ва Раёсати корҳои дохилии ин вилоят эълон карданд, шахсоне, ки дар тазоҳуроти чоррӯза дар Хоруғ ширкат карданд ва ҷинояти дигаре содир накарданд, ба ҷавобгарӣ кашида намешаванд. Ин эълон шаби 1-уми декабр тавассути телевизиони маҳаллӣ пахш шуд.

Аз 25-ум то 28-уми ноябр дар шаҳри Хоруғ сокинон аз кушта шудани як сокини Роштқалъа эътироз карданд. Гулбиддин Зиёбеков, сокини деҳаи Тавдеми Роштқалъа, ки ба гаравгонгирӣ ва барангехтани маҳалгароӣ муттаҳам мешуд, рӯзи 25-уми ноябр дар натиҷаи як амалиёт кушта шуд.

Мақомоти маҳаллӣ бо эътирозгарон гуфтугӯ карданд ва талаби онҳоро пазируфтанд. Шарти эътирозгарон ин буд, ки парвандаи марги Гулбуддин одилона таҳқиқ шавад, эътирозгарон ба ҷавобгарӣ кашида нашаванд ва интернет дубора дар Бадахшон дастрас шавад.

Дар изҳороти аввали мақомот аз ҳеч шарте ёд нашуда буд. Шаби гузашта бори аввал расман мақомот эълон карданд, ки онҳое дар эътироз ширкат кардаанд ва ҷинояти дигар содир накардаанд, аз ҷавобгарӣ озоданд.

Дар Тоҷикистон бе иҷозати ҳукумат баргузории эътироз ҷиноят дониста мешавад. Дар 20 соли охир мақомот ягон бор иҷозати чунин эътирозро ба сокинон надодаанд.

Дар Қирғизистон истеъфои раиси Комиссияи интихоботиро талаб доранд

Эътироз ба натиҷаҳои интихоботи порлумонии Қирғизистон.

Гуруҳе аз сокинони Қирғизистон дар пасманзари нашри натиҷаҳои баҳсбарангези интихоботи порлумонӣ истеъфои раиси Комиссияи марказии интихобот ва раъйпурсии он кишвар (КМИР) Нурҷон Шайлдабековаро талаб мекунанд.

Ба гуфтаи муаллифони муроҷиатнома, "мардум бо вуҷуди ваъдаҳо барои баргузор кардани интихоботи шаффоф, ин бор низ ноумед шуданд".

Онҳо мегӯянд, интихоботи ахири порлумонии Қирғизистон бо қонуншиканиҳои зиёд баргузор шуда, масъулони КМИР натиҷаҳои интихоботро ба таври густурда сохтакорӣ кардаанд.

Муаллифони муроҷиатнома гуфтанд, ягона роҳи ҳифзи боварии мардум ба низоми интихоботӣ ва роҳ надодан ба нақзи тартиботи ҷамъиятӣ тағйири комили ҳайат ва раҳбарияти КМИР Қирғизистон мебошад.

Дар Қирғизистон 28-уми ноябр интихоботи порлумонӣ баргузор шуд. Ҳизбҳои мухолифи Қирғизистон натиҷаҳои пешакии интихоботи парлумонии ин кишварро, ки рӯзи якшанбе барпо шуд, рад карда, Комиссияи марказии интихоботро дар тақаллуб айбдор намуданд.

Шоми 28-уми ноябр дар як нишасти хабарӣ дар Бишкек раҳбарони чор ҳизби сиёсӣ – “Отамакон”, ҳизби “Озодӣ”, сотсиал-демократҳо ва ҳизби “Ваҳдати қавмҳо” аз мақомот талаб карданд, ки натиҷаҳои интихоботро бекор ва интихоботи навро барпо кунанд.

Мухолифон комиссияи интихоботро дар он муттаҳам карданд, ки дар 40 дақиқае, ки монитори ҳисобу китоби овозҳо аз кор монд, овозҳо “дуздидаву” “тақаллуб шудаанд”. Мақомоти интихоботӣ гуфтанд, ки 122 ҳазор ё наздики 10 фоизи бюллетенҳо беэътибор дониста мешаванд.

Москва талаб кард, қисме аз кормандони сафорати ИМА Русияро тарк кунанд

Бинои Сафорати Амрико дар Маскав.

Мақомоти Русия талаб карданд, ки то рӯзи 31-уми январи соли 2022 кормандони сафорати ИМА, ки бештар аз 3 сол дар Москва буданд, Русияро тарк кунанд. Дар ин бора рӯзи чаҳоршанбе Мария Захарова, сухангӯи Вазорати корҳои хориҷии Русия хабар дод.

Тасмими Москва посух ба қарори Вашингтон унвон шудааст, ки муҳлати будубоши дипломатҳои Русияро дар ИМА маҳдуд кард. Захарова гуфт, ин интихоби Русия нест - "бозиро ИМА шуруъ кардааст".

Пештар Вашингтон талаб кард, ки то рӯзи 30 январи соли 2022 27 дипломати Русия ИМА-ро тарк кунанд. Сафорати ИМА дар Москва ин қазияро ҳанӯз шарҳ надодааст.

Дар соли 2020 Департаменти давлатии ИМА ба таври якҷониба муҳлати будубоши кормандони сафорати Русияро дар Вашингтон ва консулгариҳои Русия дар Ню-Йорку Хюстон 3 сол муқаррар кард.

UNHCR аз Тоҷикистону ҳамсояҳои дигари Афғонистон хост, марзҳои худро бикушоянд

Паноҳҷӯёни афғон дар Эрон

Комиссариати олии Созмони Милали Муттаҳид дар умури паноҳандагон (UNHCR) аз кишварҳои ҳамсояи Афғонистон хостааст, ки марзҳои худро ба рӯйи афғонҳои паноҳҷӯ, ҳатто агар ҳуҷҷат ҳам надошта бошанд, бикушоянд.

Созмон рӯзи 1-уми декабр гуфт, сарҳади Покистону Эрон дар ҳоли ҳозир танҳо барои афғонҳое, ки шиноснома ва виза доранд, кушода буда, сарҳади Тоҷикистону Узбекистон “пурра бастааст”.

Идораи СММ гуфт, аз афзоиши хатарҳо ба афғонҳои дар ҳоли фирор ба кишварҳои ҳамсоя “амиқан нигарон аст”. Дар ҳоле ки, ба қавли масъулонаш, вазъ дар Афғонистон баъди ишғоли Толибон дар моҳи августи имсол ҳамчунон дар ҳоли бадшавӣ аст.

Созмон маҳдудияти таҳсили духтарон, аз кор маҳрум шудани занон, фишор ба ақаллиятҳои мазҳабиву миллӣ, ҳамчунин, тарсондану куштани ҳомиёни ҳуқуқро монеа барои зиндагии одӣ дар Афғонистон арзёбӣ кардааст.

Идораи умури паноҳандагони СММ ҳамзамон аз тон ибрози нигаронӣ кардааст, ки бозпас фиристодани афғонҳо аз Покистону Эрон ва Тоҷикистон пас аз тасарруфи Толибон “афзоиш ёфтааст”.

UNHCR аз мақомоти ҳамаи кишварҳо даъват кардааст, ки бозпас фиристодани маҷбурии афғонҳоро бас кунанд.

Ҳамла ба Омурбек Текебоев, раҳбари ҳизби мухолиф дар Қирғизистон

Омурбек Текебоев

Як гуруҳи ношинос ба раҳбари ҳизби мухолиф дар Қирғизистон, ки натиҷаҳои интихоботи порлумонии охири ҳафтаи гузаштаро напазируфт, ҳамла кардаанд.

Омурбек Текебоев, раҳбари Ҳизби "Ота Макон", гуфт, ҳамла рӯзи 1-уми декабр дар тарабхонаи "Парк Отел"-и Бишкек сурат гирифт. Вай гуфт, тақрибан 70 марди ниқобпӯш ба онҷо рафта, се нафарашон ӯро задаанд.

Текебоев бовар дорад, ки ҳамла ба фаъолиятҳои сиёсии ӯ рабт мегирад. Ҷонибдоронаш аз Кумитаи давлатии амнияти миллии Қирғизистон хостаанд, ҳодисаро фавран таҳқиқ карда, ҳамлаваронро ҷазо диҳад.

Президенти Қирғизистон, Содир Ҷабборов (Содир Жапаров), ба Вазорати корҳои дохилии ин кишвар дастур додааст, ки ҳодисаро ҳамаҷониба санҷанд. Муовини сарвазири Қирғизистон, Эдил Байсалов, дар Твиттер навишт, "дар Қирғизистон ба хушунати сиёсӣ ҷой нест".

Ҳамла дар замоне сурат гирифт, ки ҳудуди 300 ҷонибдори Ҳизби "Ота Макон" ва чанд ҳизби дигари мухолиф дар назди Кумисюни марказии интихобот дар Бишкек ҷамъ шуда, ин ниҳодро ба тақаллуб гунаҳкор карданд. Онҳо хостанд, интихоботи нав баргузор карда шавад.

Нурҷон Шайлдабекова, раиси Кумисюни марказии интихоботи Қирғизистон, рӯзи 1-уми декабр гуфт, ба дурустии натиҷаҳои интихобот шубҳае вуҷуд надорад. Шайлдабекова афзуд, ҳоло шумориши пурраи баргаҳои рой ба охир расидааст ва натиҷаҳои ниҳоӣ пас аз ворид шудани маълумот ба системаи электронӣ эълон хоҳад шуд.

Интихоботи порлумонии Қирғизистон рӯзи 28-уми ноябр баргузор шуд.

Пули нав бо расми Назарбоев ба муомилот бароварда шуд

Бонки миллии Қазоқистон эълон кард, ки дар ин кишвар пули нав бо расми президенти пешин Нурсултон Назарбоев ба муомилот бароварда шуд.

Пули 20-ҳазортангаӣ, ки дар ҳар ду тарафаш расми Назарбоев омадааст, бахшида ба 30-солагии истиқлоли давлатии Қазоқистон нашр гашт.

Ба иттилои бонк, ин пул аз 1-уми декабри соли 2021 - Рӯзи президент дар Қазоқистон ба муомилот бароварда шудааст.

Расми Назарбоев дар пули қазоқӣ бори аввал соли 2016 нашр шуда буд. Бонки миллии ин кишвар он замон низ 10-ҳазортангаии қазоқиро бо расми Назарбоев бахшида ба рӯзи президент нашр карда буд.

​Назарбоев 19-уми марти соли 2019, баъди 30 соли раҳбарии Қазоқистон аз мақомаш истеъфо дод. Вақтҳои охир ӯ дар маҳзари ом ҳозир намешавад. Ӯ дар ҳоли ҳозир раиси Шӯрои амнияти Қазоқистон буда, ҳамчунин аз унвони "Элбаси" ё "Пешвои миллат" бархурдор мебошад, ки ӯро аз ҳама гуна таъқибҳо эмин нигаҳ медорад.

Дар Қазоқистон номи пойтахт, фурудгоҳи байналмилалии он, кӯчаҳои марказии вилоятҳоро ба номи Назарбоев гузоштаанд. Яке аз хиёбонҳои марказии шаҳри Алмато низ номи ӯро гирифта, то ба ҳол дар ин кишвар чанд муҷассамаи Назарбоев қомат афрохтааст.

НАТО: Русия барои ҳама гуна ҳамла ба Украина "посух" хоҳад дод

Йенс Столтенберг, дабири кулли НАТО

НАТО дар пасманзари нигарониҳо аз афзоиши тавонмандии низомии Русия дар марз бо Украина ба Маскав ҳушдор додааст, ки барои ҳама гуна таҷовузи низомӣ зидди ин ҳамсоякишвари худ "баҳои баланд" хоҳад пардохт.

Ин ҳушдори Ғарб ба Кремл 30-юми ноябр дар мулоқоти вазирони корҳои хориҷии кишварҳои узви НАТО дар Рига садо дод. Дар мулоқот таҳдидҳои бархоста аз Русия баррасӣ шудаанд.

Украина мегӯяд, Маскав даҳҳо ҳазор низомӣ ва техникаҳои вазнини ҳарбиро баъди як размоиш дар ғарби Русия ва дар наздикиҳои марзи ин кишвар ҷойгир кардааст. Дар Киев нигаронанд, ки эҳтимол дорад, Русия ба ин кишвар ҳамла кунад.

Русия, ки соли 2014 нимҷазираи Қрими Украинаро ишғол карда, ҷудоиталабонро дар шарқи ин кишвар дастгирӣ мекунад, иддаои Киевро рад кардааст. Русия Украина ва шарикони ғарбияшро ба ангехтани ташаннуҷ гунаҳкор мекунад.

Дар Қазоқистон аз эҳтимоли сирояти “омикрон” нигаронанд. ВИДЕО

Дар Қазоқистон аз сирояти омикрон нигаронанд
лутфан мунтазир бошед

Феълан кор намекунад

0:00 0:01:30 0:00

Табибон дар Қазоқистон аз он нигаронанд, ки навъи ҷадиди коронавирус ё омикрон ба ин кишвар ҳам сироят хоҳад кард. То ҳол мавҷудияти омикрон дар Қазоқистон расман тасдиқ нашудааст.

Президенти он кишвар, Қосимҷомарт Тоқаев, баъди мулоқоташ бо масъулони Созмони Ҷаҳонии Тандурустӣ рӯзи 29-уми ноябр гуфт, дар муқобила бо сирояти коронавирус аҳли олам бояд аз як гиребон сар бароранд.

Дар ҷараёни боздид аз Швейтсария, президенти Қазоқистон бо раҳбарони Созмони Ҷаҳонии Тандурустӣ мулоқот кард ва дар бораи иқдомҳои кишвараш дар муқобили пандемияи коронавирус ва ҷонибдории ин кишвар ба дастрасии умум ба ваксина маълумот дод.

Раҳбари Қазоқистон ҳамчунон дар бораи тавлиди ваксинаи ватании зидди коронавирус маъруф бо номи “Қазковак” тафсилот дода, аз аҳли олам даъват кард, ки дар ҳамоҳангӣ ба ин вабои аср муқовимат кунанд.

Тибқи итилои табибони қазоқ, дар ин кишвар суръати сирояти коронавирус сусттар шудааст, вале дар муқобили сирояти шакли нави он, яъне омикрон имкони зиёди ҳимоят надорад. Онҳо ишора ба он мекунанд, ки Қазоқистон ба монанди Исроил ё кишварҳои дигар марзҳояшро набастааст.

Дар ҳамин ҳол, мақомдорони бонки миллии Қазоқистон иброз доштанд, ки низоми молии ин кишвар аллакай зарбаи нақши нави коронавирусро эҳсос кард. Хавфи сирояти омикрон бозорҳои ҷаҳонӣ ва нархи нафти хомро поин бурд. Дар натиҷа, 29-уми ноябр қурби пулии милли Қазоқистон, ки кишвари содиркунандаи нафт аст, то 433,5 танга дар муқобили як доллари Амрико коҳиш ёфт.

Амрико аз расонидани ёриҳои башарӣ ба Афғонистон пуштибонӣ мекунад

Беҷошудагон дар Афғонистон. Кобул, октябри 2021

Намояндагони Амрико ваъда додаанд, ки ба пуштибонии худ аз раванди кумакрасонии Созмони Милали Муттаҳид ва ниҳодҳои башарӣ ба мардуми Афғонистон дар зимистони дар пешистода идома медиҳанд. Онҳо ҳамзамон дар мулоқоти худ бо Толибон дар Қатар, ба ин гурӯҳи ҳоким бар Афғонистон ҳушдор додаанд, ки аз ҳуқуқи башар ҳимоят кунанд.

Рӯзҳои 29-30-юми ноябр ду ҷониб барои аввалин бор пас аз ба қудрати расидани Толибон гуфтугӯ карданд. Таҳримҳои молии Амрико ва лағви ногаҳонии аксар кумакҳои хориҷӣ, иқтисоди ин кишвари ҷангзадаро ба варшикастагӣ рӯбарӯ кардааст. Дар ҳамин ҳол захираҳои Бонки марказии Афғонистон дар хориҷ аз кишвар масдуд шудаанд.

Дар натиҷа Созмони Милали Муттаҳид гуфт, Афғонистон дар остонаи як фоҷеаи башарӣ қарор дорад ва беш аз нисфи мардуми ин кишварро дар зимистон хатари гуруснагӣ таҳдид мекунад.

Ҳайатҳои ду кишварро дар музокироти Қатар намояндаи вижаи Амрико барои Афғонистон Томас Вест ва сарпарасти Вазорати корҳои хориҷии Толибон Амирхон Муттақӣ раҳбарӣ карданд.

Абдулқаҳҳор Балхӣ, сухангӯи Вазорати корҳои хориҷии ҳукумати Толибон, рӯзи 30-юми ноябр дар "Твиттер" навишт, дар ин мулоқот роҷеъ ба масоили сиёсӣ, тандурустӣ, маориф ва амният гуфтугӯҳо сурат гирифт. Ӯ афзуд, Толибон аз намояндагони Амрико хостаанд, дороиҳои бандмондаи Афғонистонро озод кунад ва масоили сиёсиро бо масоили башарӣ омехта насозад.

Аммо дар эъломияи Вазорати корҳои хориҷии Амрико дар пайванд ба озодсозии пулҳои бандмондаи Афғонистон дар бонкҳои ғарбӣ чизе гуфта нашудааст.

Муҳлати ҳабси хабарнигори зиндонӣ Муҳаммадюсуф Исмоиловро 3 моҳ кам карданд

Муҳаммадюсуф Исмоилов. Акс аз соли 2011

Бар асоси қонуни нави афв дар Тоҷикистон муҳлати ҳабси хабарнигори зиндонӣ Муҳаммадюсуф Исмоиловро 3 моҳу 18 рӯз кам кардаанд.

Дар ин бора Раёсати зиндонҳои вилояти Суғд дар посух ба дархости Анҷумани миллии расонаҳои мустақили Тоҷикистон хабар додааст. Интизор меравад, ӯро моҳи апрели соли 2022 аз зиндон раҳо кунанд.

Муҳаммадюсуф Исмоилов беш аз ҳашт сол боз дар маҳбаси низомаш сангин аст. Ӯро бо гуноҳи "тамаъҷӯӣ" ва "қаллобӣ" даҳуним сол аз озодӣ маҳрум карда, соли 2019, бар асоси қонуни афв, 1 солу 4 моҳи онро "буриданд".

Исмоилов аз оғоз ҳабсашро ниқоргирии мансабдорон барои нашри мақолаҳои танқидӣ ва фош кардани камбудиҳои онҳо дар ноҳияи Ашти вилояти Суғд медонад. Ӯро соли 2011 низ барои нашри мақолаи танқидӣ бо номи "Ашт валангор мегардад" бо парвандаи "туҳмат, таҳқир, тамаъҷӯӣ ва маҳалгароӣ” 11 моҳ дар маҳбас нигоҳ доштанд.

Вакили мудофеъ Муҳаббат Ҷӯраева рӯзи 1-уми декбар гуфт, "аз нисф гузаштани муҳлати ҳабс, бемориву корношоямӣ, пардохти зарари молӣ аз рӯи қонун ба Исмоилов имтиёзҳое медиҳад, ки метавонистанд пештар ҷазои ҳабси ӯро ҳадди ақал ба режими сукунат иваз кунанд, аммо ин корро накарданд."

Моҳи феврали соли гузашта Мирзои Салимпур, муассис ва сардабири сомонаи "Бомдод", қароргоҳаш дар Прага, барои ба маҳбаси низомаш сукунатӣ гузаронидани Исмоилов 5 ҳазор сомонӣ пардохта буд, аммо шароити нигаҳдории ӯ бетағйир монд. Мақомот далели чунин рафтори худро шарҳ надодаанд.

Муҳаммадюсуф Исмоиловро дар маҳбаси рақами сеи шаҳри Хуҷанд нигоҳ медоранд. Вай 63-сола, маъюби гурӯҳи дуюм ва падари ду фарзанд аст.

Мақомоти Русия гуфтаанд, боздошти се муҳоҷирро дар Иркутск таҳқиқ мекунанд

Гӯшае аз Иркутск

Мақомоти вилояти Иркутски Русия ҳайати сафорати Тоҷикистонро қабул карда, таҳқиқи қазияи боздошти се муҳоҷирро ваъда додаанд. Ба гуфтаи манобеи Радиои Озодӣ, ин ҳайат як ҳафта пеш ба Иркутск рафта буд, вале дар ду рӯзи аввал мақомоти ин шаҳр бо онҳо суҳбат накарданд.

Рӯзи 25-уми ноябр Сироҷиддин Муҳриддин, вазири корҳои хориҷии Тоҷикистон, бо ҳамтои русаш Сергей Лавров дар бораи ин қазия суҳбат кард. Манбаъҳои Радиои Озодӣ гуфтанд, пас аз ин суҳбат мақомоти тафтишотӣ бо ҳайати сафорат суҳбат карда, онҳоро бо парванда шинос кардаанд.

Мақомоти Русия дар пайи оташ зада шудани вагони зисти муҳоҷирон дар деҳаи Заларии вилояти Иркутск, ки шаби 12-уми ноябр боис ба марги ду нафар шуд, се шаҳрванди Тоҷикистонро дастгир карданд. Наздикони онҳо ва мақомоти тоҷик мегӯянд, муҳоҷирон ҷабрдидаанд ва ба ҷойи ҷазо додани онҳое, ки вагонро оташ задаанд, онҳоро боздошт намудаанд.

Мақомоти Русия дар ин бора шарҳ надодаанд ва танҳо гуфтанд, ки ҳодисаро таҳқиқ мекунанд.

Ҳамсуҳбатони Радиои Озодӣ гуфтанд, ки мақомоти Иркутск ҳеч далели қонеъкунанда барои гунаҳкор донистани се муҳоҷир пешниҳод карда натавонистанд. Онҳо умед доранд, ки муҳоҷрони боздоштшуда ба зудӣ озод мешаванд.

Дар ҳодисаи шаби 12-уми ноябр Насимҷон Сайдалии 21-сола ва Сироҷиддин Гулзодаи 19-сола, сокинони ноҳияи Файзободи Тоҷикистон ҳалок шуданд. Мақомоти Русия се муҳоҷир – Қурбонмад Содиқов ва Далер Ҳасановро ба гумони "қасди куштор" ва Ҷумъабой Искандаровро ба гумони "авбошӣ" боздошт карданд. Аз ҷониби сокинони маҳаллӣ танҳо як нафар боздошт шудааст.

Ҷанҷол миёни муҳоҷирон ва сокинони маҳаллӣ рӯзи 12-уми ноябр дар назди мағоза оғоз шудааст. Сипас, як гурӯҳ шабона вагони зисти ҳафт муҳоҷири тоҷикро оташ задаанд. Аз ин рӯ, аксарият боздошти муҳоҷиронро баръакси воқеият дониста, аз мақомоти тоҷик хостаанд, ба муҳоҷирон кумак кунанд.

Модари Гулбиддин Зиёбеков хоҳони суҳбат бо президенти Тоҷикистон шуд

Певистамо Абдулмуминова мегӯяд, арзашро дар ҳукумати Бадахшон нашуниданд

Модари Гулбиддин Зиёбеков, ҷавони 29-сола, ки ҳангоми амалиёти мақомоти интизомӣ дар ноҳияи Роштқалъаи вилояти Бадахшон кушта шуд ва марги ӯ боиси эътирози чоррӯза дар Хоруғ гардид, хоҳони суҳбат бо раиси ҷумҳурии Тоҷикистон аст.

Певистамо Абдулмуминова, модари Гулбиддин, рӯзи 1-уми декабр дар суҳбат бо Радиои Озодӣ гуфт, мақомоти Бадахшон арзашро нашунидаанд ва мехоҳад, додашро ба президент расонад.

Гулбиддин Зиёбеков рӯзи 25-уми ноябри имсол дар деҳаи Тавдеми Роштқалъа кушта шуд. Мақомот гуфтанд, ӯ тақрибан як сол пеш ёвари додситони ноҳияро гаравгон гирифта буд ва бо гумони гаравгонгирӣ ва барангехтани маҳалгароӣ ҷустуҷӯ мешуд, вале дар амалиёти боздошт бо силоҳ муқобилият нишон дод ва захмӣ карда шуд. Дар хабарномаҳои расмӣ дар бораи кушта шудани ӯ чизе нагуфтанд.

Певистамо Абдулмуминова, модари Гулбуддин Зиёбеков дар суҳбат бо Радиои Озодӣ гуфт: "Қасам ба номи Худо, қасам ба арвоҳи писари навгузаштаам, ки ӯ силоҳ надошт. Вай хидмат ҳам накарда буд, таппончаро намедонист. Бачаи ман ҳатто сигарет накашида буд. Вай ба ягон кас ягон зарар нарасонида буд.”

Баъзе аз шоҳидон мегӯянд, он рӯз дар дасти Гулбуддин Зиёбеков силоҳ надида буданд. Дар телевизиони давлатии "Бадахшон" ҳамчун далел як таппончаро бо тиру тирдонаш намоиш дода, гуфтанд, ки ӯ ба Гулбиддин Зиёбеков тааллуқ дорад.

Певистамоҳ Абдулмуминова пойфишорӣ дорад, ки писараш ҳеч гоҳ дар даст силоҳ надошт. Вай гуфт, давоми даҳ моҳи охир, баъди онки гаравгонгирии додситон рӯй дод, касе писарашро суроғ накарда ва "ҳатто барои бозпурсӣ ба ӯ даъватнома нафиристода буд".

Ба бовари ӯ, дар ҳар сурат, имкони зинда дастгир кардани писараш вуҷуд дошт, аммо барояш муаммо мондааст, ки чаро ӯ кушта шуд. Абдулмуминова мегӯяд, бо гузашти рӯзҳо ба ин ва суолҳои дигар посух наёфтааст. Мақомот ҳамвора таъкид доранд, ки Зиёбеков ҳангоми амалиёти боздошт муқобилият нишон дод ва бо тири ҷавобӣ маҷруҳ карда шуд.

Хабарнигорони Радиои Озодӣ бо шоҳидон, мақомот ва таҳлилгарон дар бораи ин ҳодиса суҳбат карданд.

Амалиёти боздошти Гулбиддин чӣ гуна сурат гирифт?

Чӣ тавр мардум дар майдони марказии Хоруғ ҷамъ шуданд?

Посух ба ин суолҳоро давоми рӯз дар сомонаи Радиои Озодӣ хоҳед хонд. Бозгашт ба саҳифаро фаромӯш накунед.

Марги 2 миллиону 400 ҳазор кас дар як сол дар Русия

Дар ду моҳи охир ҳамарӯза дар Русия беш аз ҳазор нафар аз коронавирус мефавтанд

Дар як соли охир дар Русия 2 миллиону 400 ҳазор нафар фавтидаанд, ки ба гуфтаи мақомоти ин кишвар чунин омор танҳо дар замони Ҷанги дувуми ҷаҳонии солҳои 1941-1945 сабт шуда буд. Ҳамчунин аҳолии Русия имсол наздик ба як миллион кам шудааст, ки дар 20 соли охир чунин набудааст. Сабаби марги аксари фавтидагон гирифторӣ ба коронавирус, бемориҳои сироятӣ ва майзадагӣ гуфта мешавад. Дар ду моҳи охир ҳамарӯза дар Русия беш аз ҳазор нафар аз коронавирус мефавтанд.

Ёфтҳои бештар

XS
SM
MD
LG