Дар чанд ҷумла
Ҳукумати Қазоқистон ба истеъфо рафт, вале тазоҳурот идома дорад. ВИДЕО
Қосимҷомарт Тоқаев, раиси ҷумҳурии Қазоқистон, дар пасманзари эътирозҳои оммавӣ ба зидди болоравии нархи газ ҳукумати ин кишварро ба истеъфо фиристод. Бино ба хабари сомонаи президенти Қазоқистон, Алихон Исмоилов, ки қаблан муовини аввали раиси ҳукумат буд, иҷрокунандаи вазифаи сарвазири он кишвар таъйин шудааст.
Аъзои ҳукумати пешин то тасдиқи ҳайати ҳукумати нав вазифаҳои худро иҷро хоҳанд кард. Тоқаев ҳамчунин тағйироти кадриеро дар сатҳи муовинони раҳбарони идораҳо анҷом додааст. Аз ҷумла, муовини раиси дастгоҳи президент Мурат Нуртлеуро аз мақом барканор ва муовини аввали раиси Кумитаи давлатии амнияти миллӣ таъйин кардааст.
Президенти Қазоқистон гуфтааст, дар вазъи ба вуҷудомада, пеш аз ҳама вазорати энергетикаи ин кишвар, ширкатҳои "Қазмунайгаз" ва "Қазақгаз"-ро гунаҳкор кардааст, вале дақиқ нагуфтааст, ки чаро.
Аз он пеш Қосимҷомарт Тоқаев дар Алмаато ва Мангистау то 19-уми январ вазъи фавқулода ҷорӣ кард, аммо тазоҳуроти густардаи эътирозӣ дар чанд шаҳри Қазоқистон идома дорад.
Рӯзи 4-уми январ дар шаҳри Алмаато эътирозгарон кӯшиш карданд, ба қароргоҳи раиси шаҳр ворид шаванд. Пулис бо гази ашковар ва норинҷакҳои садоӣ эътирозгаронро пароканда кард. Тазоҳургарон мошини полисро вайрон карданд. Субҳи 5-уми январ шаҳрдории Алмаато бо пахши изҳороте исрор кард, ки вазъ таҳти назорат қарор дорад.
Гирдиҳамоиҳои эътирозӣ дар Қазоқистон рӯзи 2-юми январи имсол ба далели ба таври бесобиқа боло рафтани нархи гази моеъ оғоз шуд. Ҳоло норозиён ба решакан кардани фасоду ришвахорӣ, хешутаборбозӣ ва сохтмони корхонаҳову кам кардани сатҳи бекорӣ низ даъват доранд.
Дар гирдиҳамоиҳо шиори "Пирамард, бирав!" низ садо медиҳад, ки бештар нисбати Нурсултон Назарбоев, президенти собиқи Қазоқистон ва шахси ҳанӯз пурнуфузи он кишвар, баён мешавад.
Ҳамаи хабарҳои имрӯзро дар инҷо бихонед
Эмомалӣ Раҳмон ба духтараш Озода Раҳмон унвон дод
Эмомалӣ Раҳмон, раисҷумҳури Тоҷикистон, ба духтараш Озода Раҳмон, ки аз соли 2016 раиси Дастгоҳи иҷроияи президент аст, унвони фахрии Корманди шоиста додааст. Маросим рӯзи 25-уми август дар шаҳри Душанбе гузашт.
Дар ҳамин рӯз дар маҷмуъ ба дусад нафар унвону ҷоизаҳои давлатӣ додаанд.
Аз ҷумла, ҳунармандон Тӯрахон Аҳмадхонов ва Исфандиёр Ғуломзода унвони Ҳунарпешаи халқӣ, рӯзноманигор Латофат Кенҷаева унвони Шоири халқӣ ва Юнус Юсуфӣ унвони Нависандаи халқии Тоҷикистонро гирифтанд.
Вебсайти президент навишт, ки "23 нафар бо унвони фахрии Корманди шоиста... 3 нафар бо ордени Дӯстӣ, 1 кас бо ордени Шараф дараҷаи I, 11 нафар бо ордени Шараф дараҷаи II, 107 кас бо медали Хизмати шоиста ва 7 нафар бо Ифтихорномаи Ҷумҳурии Тоҷикистон сарфароз гардонда шуданд."
Мақомот мегӯянд, ин ҷоизаву унвонҳо дар остонаи 34-умин солрӯзи истиқлоли Тоҷикистон тақдим шуд ва ба касоне, ки "дар хизмати давлатӣ, рушди илму фарҳанг ва дигар бахшҳои иқтисоди миллӣ дастовардҳои баланди меҳнатӣ ва фаъолияти самарбахш" доштанд. Намояндагони мухолифин дар хориҷа тақдими баъзе аз ҷоизаҳоро ба маврид дониста, дурустии баъзеи дигарро зери шубҳа мегузоранд.
Озода Раҳмон, духтари раисҷумҳури Тоҷикистон, нуҳ сол боз раиси Дастгоҳи иҷроияи президент аст. Ӯ ба ҷуз унвони Корманди шоистаи Тоҷикистон, ордени "Шараф" (дараҷаи як), рутбаи мушовири давлатии адлия ва рутбаи дипломатии сафири фавқулода ва мухторро дорад.
Духтари 46-солаи президент Раҳмон дар гузашта дар сафорати Тоҷикистон дар Амрико ва дар мақоми муовини вазири корҳои хориҷӣ кор кардааст. Шавҳараш Ҷамолиддин Нуралиев дар гузашта муовини аввали раиси Бонки Миллии Тоҷикистон буд.
Дар ҳамлаи Исроил ба Ғазза чанд хабарнигор кушта шудааст
Дар пайи ҳамлаи артиши Исроил ба маҳалли Беморхонаи Носир дар Ғазза 19 кас, аз ҷумла чанд хабарнигор кушта шудаанд. Дар ин бора Вазорати тандурустии Ғазза хабар додааст, ки зери назорати "Ҳамос" аст.
Ба гузориши расонаҳо, дар ҳамлаи Исроил дастикам чор хабарнигоре кушта шудаанд, ки бо расонаҳои байнулмилалӣ ҳамкорӣ мекарданд.
Оҷонсии Ассошиэйтед Пресс аз марги Марям Дагга хабар додааст, ки бо ин оҷонсӣ ва дигар расонаҳо ҳамкорӣ мекард. Ҳусайн ал-Масрӣ, навобардори ҳамкори Ройтерз, Муҳаммад Салом, хабарнигори "Ал-Ҷазира" ва аксабардораш Муоз Абу Тоҳо низ дар ҳамлаи Исроил кушта шудаанд. Дар миёни журналистон захмиён низ ҳастанд.
Гузориш шудааст, ки неруҳои ҳавоии Исроил ба атрофи Беморхонаи Носир ду маротиба зарба задаанд. Артиши Исроил феълан ин хабарро шарҳ надодааст. Ба маълумоти рӯзномаи "Таймз Исроил", ба эҳтимоли зиёд ҳамла аз сӯи неруҳои заминӣ анҷом шудааст. Қаблан Исроил далели ин гуна ҳамлаҳоро ҳузури ҷангҷӯёни "Ҳамос" гуфта буд. Гуруҳи "Ҳамос" дар Амрико ва Иттиҳоди Аврупо созмони террористӣ шинохта шудааст.
Тибқи омори Кумитаи дифоъ аз хабарнигорон, баъд аз шурӯи ҷанг дар Навори Ғазза дар моҳи октябри 2023, зиёда аз 190 рӯзноманигор дар ин борика кушта шудаанд.
"Pamir Inside" аз марги як фаъоли дигари бадахшонӣ дар зиндон хабар дод
Вебсайти "Pamir Inside", ки ҳодисаҳои Вилояти Мухтори Кӯҳистони Бадахшонро бозтоб медиҳад, аз марги як фаъоли дигари бадахшонӣ дар зиндонҳои Тоҷикистон хабар дод. Ин расона рӯзи 24-уми август бо такя ба манбаъҳои худ навишт, ки Боғшо Иматшоеви 67-сола ҳанӯз моҳи феврали имсол даргузашта, хабари маргаш нав дастрас шудааст.
Ба навиштаи "Pamir Inside", Боғшо Иматшоев соли 2023 баъди бозгашт аз Русия дастгир ва бо иттиҳоми ҳамкорӣ бо созмонҳои фаъолияташон мамнуъ ба шаш сол ҳабс маҳкум шуда буд. Ӯро дар зиндони шаҳри Хуҷанд нигоҳ медоштанд.
Манбаъҳои расона гуфтаанд, ки вазъи саломати Иматшоев рӯзи 26-уми январи имсол бад шуда, тақрибан як моҳ дар ҳолати беҳушӣ дар Бемористони вилояти Суғд буд ва дар ҳамон ҷо ҷон дод. Мақомот хабарро шарҳ надодаанд.
Дар ҳашт моҳи охир хабари марги панҷ фаъоли зиндонӣ аз Вилояти Мухтори Куҳистони Бадахшон дар маҳбасҳои Тоҷикистон расонаӣ гашт. Аз ин пеш дар бораи марги Қулмамад Паллаев, Аслан Гулобов, Музаффар Давлатмиров ва Эроншо Мамадраҳимов гузориш расида буд. Онҳо дар соли 2022 ва пас аз амалиёти нерӯҳои давлатӣ дар Рӯшону Хоруғ дастгир ва ба муҳлатҳои тӯлонӣ зиндонӣ шуда буданд. Мақомот онҳоро ба терроризму ҷиноятҳои дигар гунаҳкор карданд, вале наздиконашон хулосаи Додгоҳро напазируфтанд.
Хабари марги Боғшо Иматшоев дар ҳоле нашр шуд, ки пештар ҳашт созмони байнулмилалӣ, аз ҷумла Созмони ҷаҳонии зидди шиканҷа ва ҳамкорӣ барои ҳуқуқи башар марги зодагони Вилояти Бадахшонро дар зиндонҳои Тоҷикистон маҳкум карда, аз мақомот хоста буданд, ки таъқибу саркӯби помириҳоро бас кунанд.
Ҳомиёни ҳуқуқи башар дар изҳороти худ шароити номуносиби боздоштгоҳҳо, адами дастрасӣ ба ёрии пизишкӣ ва марги дастгиршудаҳоро аз мушкилиҳои идомадор дар Тоҷикистон номбар кардаанд. Вазири адлияи Тоҷикистон моҳи августи имсол гуфт, ки ба ҳама маҳбусони бемор дар зиндонҳои кишвар ёрии пизишкӣ расонда мешавад. Дарёфти иттилои алтернативӣ аз вазъи зиндониён дар Тоҷикистон хеле мушкил аст. Хабарнигорони мустақил имкони боздид аз зиндонҳоро надоранд.
Аз тоҷикон хостаанд, бо худ ба Русия ҳазориспанд набаранд
Додситонии кулли Тоҷикистон аз мардуми кишвар хостааст, ки ҳангоми сафар ба Русия бо худ рустании шифобахши “ҳазориспанд” набаранд, зеро мумкин аст ба зиндон маҳкум шаванд.
Додситонӣ рӯзи 21-уми август бо нашри баёнияе гуфт, “ҳазориспанд” аз моҳи феврали соли 2024 ба рӯйхати рустаниҳои дорои маводи мухаддир ва моддаҳое ворид карда шудааст, ки ба мағзи инсон таъсир мегузорад ва рафтору табъи ӯро тағйир медиҳад.
Ҳафтаи гузашта хабаре нашр шуд, ки мақомоти Русия ду зани тоҷикро барои бо худ доштани “ҳазориспанд” дастгир ва якеро ба 8 сол зиндон маҳкум кардаанд.
Маълум нест, ин шаҳрвандони Тоҷикистон кай ҷазо гирифтаанд.
Дар баёнияи Додистонии кул омадааст, ки бар асоси Кодекси ҷиноии Русия вобаста ҷазо барои бо худ бурдану ғайриқонунӣ нигаҳ доштани ҳазориспанд аз ҷаримаву ихроҷ аз Русия то ба зиндони якумрӣ таъйин шудааст.
Таври маълум дар Тоҷикистон ҳазориспандро ҳамчун василаи зиддиуфунӣ ё бар тибқи боварҳои кӯҳна барои дур кардани таъсири чашми бад истифода мебаранд.
Қатар ба сохтмони "Роғун" 50 миллион доллар медиҳад
Бунёд ё Хазинаи Қатар дар мавриди рушд барои идомаи сохтмони нерӯгоҳи "Роғун" 182 миллион риёли қатарӣ ($50 млн) ҷудо кардааст.
Ба гузориши расонаҳои қатарӣ, созишномаро Фаҳд Ҳамад Ал-Сулайтӣ, мудири Хазинаи Қатар оид ба рушд бо Вазири молияи Тоҷикистон имзо кардааст.
Вазорати молияи Тоҷикистон ҳам бо нашри ин хабар гуфтааст, 50 миллион доллар қарзи боимтиёз аст. Муҳлат ва шарту шароити ин қарз эълон нашудааст.
Дар хабари Вазорати молия танҳо омадааст, ҳадафи лоиҳа "саҳм гузоштан ба амнияти миллии энергетикӣ ва дастгирии рушд" дар Тоҷикистон аст.
Мудири Хазинаи Қатар оид ба рушд дар ҷараёни сафараш ба Тоҷикистон аз неругоҳи "Роғун" низ дидан кардааст.
Ҳукумати Тоҷикистон талош дорад барои то охир сохтани нерӯгоҳи "Роғун" аз хориҷ сармоя дарёфт кунад. То ин вақт Бонки Ҷаҳонӣ, Бонки исломии рушд ва баъзе кишварҳо аз сармоягузорӣ ба сохтмони "Роғун" хабар доданд.
Русия ва Украина даҳҳо асирро иваз кардаанд
Русия ва Украина рӯзи якшанбеи 24-уми август гуруҳи нави асиронро иваз карданд. Ба гузориши Вазорати дифои Русия, табодули асирон аз рӯи усули "146 ба 146" анҷом шуд. Имороти Муттаҳидаи Араб барои иваз кардани асирон миёнаравӣ кардааст.
Ба ҷуз асирон, инчунин Русия ва Украина чанд шаҳрванди мулкиро низ иваз кардаанд. Ба гуфтаи Омбудсмени Русия, 8 сокини вилояти Курск баргардонда шуданд. Татяна Москалкова гуфт, ин нафарон аз моҳи феврали соли 2025 дар Украина нигоҳ дошта мешуданд.
Президенти Украина Владимир Зеленский низ табодули асиронро тасдиқ кардааст. Гузориш шудааст, ки ба ҷуз низомиён инчунин рӯзноманигор Дмитрий Хилюк ва собиқ волии Херсон низ ба Украина бозгардонда шудаанд. Ин нафарон соли 2022 аз сӯи неруҳои Русия боздошт шуда буданд.
Бритониё як бонки Қирғизистонро барои кумак ба Русия таҳрим кард
Британияи Кабир "Капитал Бонк”-и Қирғизистон ва мудири онро ба далели кумак ба Русия таҳрим кардааст.
Мақомоти Бритониё гуфтанд, Русия барои хариди маҳсулоти ҳарбӣ ин бонки Қирғизистонро истифода бурдааст. Намояндагони "Капитал Бонк" гуфтанд, онҳо дар давр задани таҳримҳо ба Русия кумак накардаанд ва фаъолияташон дар асоси қонунгузории Қирғизистон аст.
Бритониё ҳамчунин бозори асъори рақамии Grinex--ро таҳрим кард, ки дар Қирғизистон сабти ном шудааст. Амрико ҳам пештар ин бозори асъори рақамӣ ё криптавалютаро ба рӯйхати сиёҳ ворид карда буд.
Маҷаллаи бритониёии Financial Times ҳанӯз охири моҳи июни имсол навишта буд, ки ба воситаи бозори асъори рақамии Grinex амалиётҳо ба маблағи 9 миллиард доллар анҷом шудаанд.
Чанд ширкатҳои хусусии Қирғизистон, аз ҷумла Tengricoin, Old Vector, Altair Holding SA низ ба рӯйхати сиёҳи Бритониё ворид шуданд.
Таркиш дар мағозаи кӯдаконаи Маскав. Як нафар ҳалок шуд
Дар пайи таркиши балони газ дар мағозаи марказии бачагонаи шаҳри Маскав як нафар ба ҳалокат расида, се каси дигар маҷруҳ шудаанд. Дар ин бора оҷонси Маскав хабар додааст. Ҳодиса 24-уми август рух додааст.
Ба гузориши телеграм-канали Mash, таркиш дар ошёнаи сеюм ва дар наздикии қаҳвахонаи "Шоколаднитса" рух додааст. Хадамоти оташнишонии Русия гуфтааст, ягон аломати қасдан оташ задани ин ҷойро наёфтаанд.
Намояндагони мағозаи марказии кӯдакон гуфтанд, ки таркиш дар мағозаи яке аз иҷорашинон рух додааст.
Сергей Собянин, шаҳрдори Маскав гуфт, мақомоти тафтишотӣ қазияро таҳқиқ доранд. Ба гуфтаи Собянин, тибқи маълумоти пешакӣ сабаби таркиш корношоям шудани таҷҳизот аст.
Паҳподҳои Украина ба чанд минтақаи Русия ҳамла кардаанд
Паҳпод ё ҳавопаймоҳои бесарнишини Украина шаби 23-юми август ба чанд минтақаи Русия ҳамла кардаанд. Волии вилояти Самара гуфт, як корхонаи саноатӣ ҳадафи ҳамлаи паҳподҳо қарор гирифт. Гузориш шудааст, ки неруҳои украинӣ ба корхонаи коркарди нафти Сизрани зарба задаанд.
Паҳподҳои украинӣ ҳамчунин ба бандари Уст-Луга дар вилояти Ленинград ҳамла кардаанд. Александр Дрозденко, волии минтақа гуфт, ки дар пайи афтидани пораҳои паҳпод, дар яке аз терминалҳои ширкати НОВАТЭК сӯхтор сар задааст. Ин ширкат ба истихроҷи гази моеъ машғул аст. Дар ин ҳодиса касе осеб надидааст.
Ҳамчунин дар ҳудуди Нерӯгоҳи барқи атомии Курск як ҳавопаймои бесарнишин ба трансформатори назди истгоҳ осеб расондааст.
Вазорати дифои Русия аз сарнагун кардани 57 паҳподи украинӣ хабар додааст.
Дар пайи ҳамлаи паҳподҳои украинӣ ҳамчунин дар кори фурудгоҳҳои чанд шаҳри Русия маҳдудият ҷорӣ шудааст. Аз ҷумла фурудгоҳи Шереметово дар Макав, Пулково дар Санкт-Петербург ва фурудгоҳҳои Пенз, Қазон, Ижевск, Самара, Тамбов, Нижнекамск ва Нижний Новгород бо мушкил рубарӯ шуданд.
Се кӯдаки бепарасторро аз Русия ба Тоҷикистон фиристодаанд
Се кӯдаки бепарастори тоҷикро аз шаҳри Санкт-Петербург ба Тоҷикистон фиристодаанд. Дар ин бора Консулгарии Тоҷикистон хабар додааст.
Намояндагони консулгарӣ бе овардани ҷузъиёти бештар танҳо гуфтаанд, ки ин 3 кӯдак дар Русия бепарастор монданд ва бар асоси як созишнома миёни кишварҳои ИДМ ба Тоҷикистон фиристода шуданд.
Феълан маълум нест, ки ин кӯдакон чигуна дар Русия аз парастор маҳрум шудаанд. Дар аксе, ки консулгарӣ нашр кардааст дида мешавад, ки яке аз кӯдакон тақрибан сесола ва ду нафари дигар камтар аз як сол син доранд.
Ҳафтаи гузашта низ се кӯдаки бепарастори тоҷикро аз шаҳри Маскав ба Тоҷикистон фиристода буданд.
Русия макони кору зиндагии ҳудуди як миллион муҳоҷир аз Тоҷикистон аст.
Таҳдиди Трамп ба ҷорӣ кардани таҳримҳои нав алайҳи Русия
Доналд Трамп, раиси ҷумҳури Амрико бори дигар таҳдид кардааст, ки дар сурати ба даст наомадани пешравӣ дар музокироти сулҳ дар Украина, алайҳи Русия таҳримҳои нав ҷорӣ мекунад. Ҳушдори Трамп як ҳафта пас аз дидораш бо Владимир Путин дар Аляска садо дод.
Президенти Амрико 22-юми август дар Кохи Сафед ба хабарнигорон гуфт, "қарор аст тасмим бигирам, ки чӣ корро анҷом диҳам ва ин тасмими бисёр муҳим хоҳад буд. Инки оё таҳримҳои густурда (алайҳи Русия) ҷорӣ кунам ё таърифа (боҷ)-ҳои сангин ё ҳарду, ё инки ҳеч кор накунам ва бигӯям, ки ин ҷанги худатон аст."
Доналд Трам ҳамчунин гуфт, аз ҳамлаи маргбори неруҳои Русия ба як корхонаи амрикоӣ дар Украина дар ҳамин ҳафта норозигӣ аст. "Аз ин мавзуъ хушҳол нестам. Аз ҳар чизе, ки марбут ба ин ҷанг бошад хушҳол нестам", - афзуд Трамп.
Аз сӯи дигар Владимир Зеленский, раиси ҷумҳури Украина 22-юми август гуфт, Русия тамоми талошашро мекунад то монеи дидори ӯ бо Владимир Путин шавад. Пештар Сергей Лавров, вазири корҳои хориҷии Русия гуфта буд, ки барномаи дидори роҳбарони Русия ва Украина ҳанӯз омода нест.
Владимир Зеленский вохӯрӣ бо Владимир Путинро ягона роҳи поёни ҷанг медонад.
Тамоси телефонии Ароқчӣ бо вазирони хориҷии Олмон, Бритониё ва Фаронса
Вазири корҳои хориҷии Эрон пас аз тамос бо ҳамтоёни фаронсавӣ, бритониёӣ ва олмонӣ ва масъули сиёсати хориҷии Иттиҳоди Аврупо, эълон кард, ки даври нави гуфтугӯҳо дар бораи парвандаи ҳастаӣ, 26 август байни муовинони ӯ ва дипломатҳои аврупоӣ, баргузор хоҳад шуд.
Аббос Ароқчӣ ин хабарро рӯзи 22 август дар ҳоле эълон кард, ки се кишвари аврупоӣ дар ҳоли баррасии баргардонидани таҳримҳои СММ алайҳи Эрон ҳастанд.
Ин механизм раванде аст, ки бар асоси он, дар сурате, ки иддао шавад Эрон ӯҳдадориҳои худ дар масъалаи барномаи ҳастаиро иҷро накардааст, таҳримҳои бекоршудаи Шӯрои Амният алайҳи Теҳрон ба таври худкор ё автоматикӣ, фаъол мешаванд.
Жан-Ноэл Барро, вазири корҳои Фаронса бо нашри паёме дар шабакаи Х хабари гуфтугӯи ҳафтаи ояндаро тасдиқ кард ва ҳушдор дод, ки "вақт дар ҳоли тамом шудан аст".
Ӯ тамоси телефонии рӯзи ҷумъа бо Аббоср Ароқчиро "муҳим" хонд ва гуфт, ки тарафҳои аврупоӣ дар бораи барномаи ҳастаии Теҳрон ва таҳримҳое, ки дубора омодаи амалӣ шудан алайҳи Эрон ҳастанд, гуфтугӯ карданд.
Аз сӯи дигар, Кая Каллас, масъули сиёсати хориҷии Иттиҳоди Аврупо низ бо ишора ба ин, ки тамоси муҳиме бо дипломати баландпояи Эрон барқарор шуд, эълон кард, ки "Аврупо ӯҳдадор ба ёфтани роҳҳали дипломатӣ барои масъалаи ҳастаӣ аст".
Вазири корҳои хориҷии Эрон баъд аз тамос дар баёнияе гуфт, ба ҳамтоёни аврупоии худ гуфтааст, ки се кишвари аврупоӣ "салоҳияти қонунӣ ва ахлоқӣ" барои фаъол кардани ин механизмро надоранд ва ҳамчунин дар бораи "паёмадҳо"-и ин иқдом ҳушдор дод.
Боздошти раҳбари як ширкати сохтмонӣ ба гумони аз худ кардани 50 млн сомонӣ
Раҳбари як ширкати сохтмонӣ дар Душанбе ба иттиҳоми "қаллобӣ дар ҳаҷми махсусан калон", боздошт шудааст.
Пулиси Душанбе рӯзи 22 август хабар дод, ки Содиқ Одинаев, раҳбари ширкати сохтмонии "Ҷамол-Басир" аз беш аз 160 нафар барои таъмин намудани онҳо бо хонаи истиқоматӣ пул гирифта, маблағҳоро аз худ кардааст.
Ба иттилои манбаъ, раҳбари ин ширкат як манзили истиқоматиро ба 3 то 7 нафар фурӯхтааст. Раёсати корҳои дохилии шаҳри Душанбе зарари ба шаҳрвандон расонидаи Содиқ Одинаевро наздики 50 миллион сомонӣ гуфтааст.
Назари раиси "Ҷамол-Басир" ва наздиконаш ба ин иттиҳом рӯшан нест ва маълум нест, ки оё ӯ ба вакили дифоъ таъмин аст ё не.
Мақомот ҳоло нисбати Содиқ Одинавев бо моддаи 247, қисми 4-и Кодекси ҷиноии Тоҷикистон парванда боз кардаанд.
Ин банди Кодекси ҷиноӣ ҷарима ба андозаи аз як ҳазору чорсаду шаст то ду ҳазору яксаду навад нишондиҳанда барои ҳисобҳо (як нишондиҳанда 75 сомонӣ аст) ва маҳрум сохтан аз озодӣ ба мӯҳлати аз ҳашт то дувоздаҳ солро пешбинӣ мекунад.
Толибон ҳузури гурӯҳҳои террористӣ дар Афғонистонро рад кард
Ҳукумати Толибон ба нигарониҳои кишварҳои минтақа дар мавриди ҳузури гурӯҳҳои террористӣ дар Афғонистон, вокуниш кард.
Аввали ҳафтаи ҷорӣ намояндагони Чин, Покистон ва Эрон дар Шӯрои Амнияти Созмони Милали Муттаҳид ҳузури гурӯҳҳои террористӣ, монанди ДОИШ, "Ал-Қоида" ва Таҳрики Толибони Покистонро як таҳдиди ҷиддӣ барои амнияти Афғонистон, кишварҳои минтақа ва ҷаҳон хонданд.
Дар гузориши Созмони Милали Муттаҳид гуфта шудааст, ки ҳудуди ду ҳазор ҷангҷӯи ДОИШ ва ҳудуди шаш ҳазор ҷангҷӯи Таҳрики Толибони Покистон дар Афғонистон ҳузур доранд.
Аммо Забеҳуллоҳ Муҷоҳид, сухангӯи ҳукумати Толибон ин нигарониҳо рад кардааст. Ӯ рӯзи 22 август дар шабакаи Х навишт, ки бояд аз талошҳо барои бесубот нишон додани Афғонистон худдорӣ шавад.
Ӯ гуфтааст, ки ин иттиҳом "беасос" аст ва ҳеч санаде барои исботи он вуҷуд надорад.
Дар чаҳор соли гузашта пас аз бозгашти дубораи Толибон ба Кобул, гурӯҳи ДОИШ масъулияти силсилае аз ҳамлаҳои хунинро дар Афғонистон ба ӯҳда гирифтааст.
Панҷ афсари пулис дар Систон ва Балучистон кушта шуданд
Мақомоти пулис дар Эрон хабар доданд, ки дар ҷараёни ҳамлаи мусаллаҳонаи рӯзи 22 август ба ду гашти интизомӣ дар постгоҳи "Доман" дар Эроншаҳри вилояти Систон ва Балучистон, панҷ маъмури интизомӣ кушта шуданд.
Тибқи гузоришҳо, мошинҳои кормандони пулис дар роҳи минтақаи Хош ба Эроншаҳр мавриди ҳамлаи қарор гирифтанд. Ҳамлаварон аз ҷойи ҳодиса фирор кардаанд.
Чанд соат баъд аз ин ҳодиса, гурӯҳи "Ҷайш-ул-Адл" масъулияти ин ҳамларо ба ӯҳда гирифт ва иддао кард, ки бо ҳамла ба маъмурони интизомӣ, силоҳҳои онҳоро "ғанимат" гирифтааст. Ин гурӯҳ ҳамчунин иддао кардааст, ки ҳамаи касонеро, ки савори ин ду мошини нерӯҳои интизомӣ буданд, куштааст.
"Ҷайш-ул-Адл", ки аз сӯи Эрон ва Амрико созмони террористӣ шинохта шудааст, иддао мекунад, ки барои ҳуқуқи ақалияти балуч бо Эрон мубориза мекунад.
Ин гурӯҳ то кунун борҳо бо нерӯҳои Сипоҳ ва марзбонони Эрон дар вилояти Систон ва Балучистон даргир шуда ва шуморе аз онҳоро гаравгон гирифта ё ба қатл расондааст.
Ин гурӯҳ рӯзи 26 июли имсол ба бинои Додгоҳи вилояти Систон ва Балучистон дар шаҳри Зоҳидон ҳамла кард ва 6 танро кушта ва 22 нафари дигарро захмӣ намуд.
