Президенти нахустини Қазоқистон Нурсултон Назарбоев дороиҳоеро ба маблағи 7,8 миллиард доллар тавассути бунёдҳои хайрия идора мекунад.

Дар ин бора дар таҳқиқоти муштараки Маркази таҳқиқоти ҷиноятҳои созмонёфта ва фасод (OCCRP) бо расонаҳои "Vласт" ва "Kloop" гуфта шудааст.

Муаллифони таҳқиқот мегӯянд, Назарбоев дар давоми президентии худ дар Қазоқистон чаҳор бунёди хайрияро таъсис додааст, ки номҳояшон ба ҳам монанд буда, дар фаъолияташон низ шаффофият дида намешавад.

Сухан аз "Бунёди Назарбоев", "Бунёди Нурсултон Назарбоев", "Бунёди Демеу" ва "Бунёди Пешво" меравад.

Ин бунёдҳои хайрия дар Қазоқистон, Қирғизистон ва Русия бонк, телевизион, меҳмонсаро, марказҳои савдо, корхона, анбор, ҳавопаймои хусусии беш аз 100-миллиондолларӣ ва майдони голфбозӣ доранд.

Ин дороиҳо расман ба Назарбоев тааллуқ надоранд, вале ӯ онҳоро ҳамчун асосгузори бунёдҳо идора мекунад.

Намояндагони Назарбоев дар се бунёд аз шарҳи таҳқиқот худдорӣ карданд. Танҳо дар як бунёд гуфтанд, ки президенти нахустини Қазоқистон аз фаъолияти он ҳеч даромаде ба даст намеорад.

Дар Қрими ишғолӣ ҳавопаймои ҷангии навъи Су-30-и Русия суқут кардааст.

Хабаргузории русии "Интерфакс" бо такя ба Вазорати мудофиаи Русия навиштааст, ки ҳавопаймои ҷангӣ соати 11:00-и рӯзи 3-юми апрел ҳангоми парвози таҳрезишудаи омӯзишӣ ба садама дучор шудааст.

Ба иттилои ин ниҳод, парвоз бидуни лавозимоти ҷангӣ сурат гирифтааст. Сарнишинон бо васоили хос, ки маъмулан ҳангоми рух додани садама истифода мешаванд, худро ба замин андохта, наҷот ёфтаанд.

Аз ин пеш, рӯзи 31-уми март низ дар Қрими ишғолӣ ҳавопаймои низомии боркаши Ан-26-и Русия суқут карда буд. Расонаҳо навиштаанд, ки дар дохили он 30 нафар, ҳафт сарнишин ва 23 мусофир будаанд, ки ҳалок шудаанд. Ба навиштаи расонаҳо, ин ҳавопаймо ба кӯҳпора бархӯрдааст. Мақомоти Русия сабаби садамаро "нуқси техникӣ" номидаанд.

Бахши русии Би-би-си навиштааст, ки дар миёни кушташудагон эҳтимол генерал-лейтенант Александр Отрошенко низ будааст.

Қрим, як бахше аз хоки Украина буд, ки аз ҷониби Русия ишғол шудааст.

Донишгоҳҳои Русия ӯҳдадор шудаанд, ки тибқи нақшаи муайяншуда донишҷӯёнро бо ҳадафи ширкат дар ҷанг бо Украина ба артиш сафарбар кунанд.

Бино ба навиштаи нашрияи Faridaily, ҳар як Донишкадаву Донишгоҳ вазифадор шудааст, ки камаш ду дарсади донишҷӯёнро ба бастани қарордод барои рафтан ба артиш водор созад.

Хабарнигорони нашрия ба нақл аз дӯстони ректори яке аз таълимгоҳҳои Маскав навиштаанд, дар оғози соли равон вазири илм ва таҳсилоти олии Русия Валерий Фалков дар ҷаласае эълон кардааст, ки ду дарсади донишҷӯён аз Донишгоҳҳо ҳадди аққал барои як сол бояд бо Вазорати дифоъ қарордод банданд.

Хабарҳо дар бораи ҷалби фаъолонаи донишҷӯён дар Русия аз охири соли гузашта расонаӣ шуда буд. Ба донишҷӯёнӣ мактабҳои олӣ ва омӯзишгоҳҳои касбӣ пешниҳод доранд, ки рухсатии академикӣ гирифта, ба ҷанг раванд. Мақомот кӯшиш доранд, ки донишҷӯёнро дар бахши идоракунии бесарнишинҳо ҷалб кунанд.

Мақомоти Эрон хабар доданд, ки барои ҳифзи амнияти кишвар ба ҷалби ихтиёриён, аз ҷумла наврасони болотар аз сини 12-сола, оғоз кардаанд.

Дар пасманзари кушта шудани як писарбачаи 11-сола дар Теҳрон дар пайи ҳамлаи ҳавоӣ таваҷҷӯҳи ҷомеаи ҷаҳонӣ ба ин мавзӯъ равона шуд.

Расонаҳои маҳаллӣ навиштанд, ки Алиризо Ҷаъфарии наврас ҳангоми навбатдорӣ дар як блокпост ё дидбонгоҳ ҳамроҳ бо падараш ҳадафи ҳамлаи бесарнишин қарор гирифт.

Ба далели камбуди нерӯ дар ин нуқта падараш ӯро ба кор ҷалб кардааст.

Дар ҳамин ҳол Сипоҳи посдорони инқилоби исломӣ, аз оғози барномаи нави низомии “Ҳомии ватан. Барои Эрон” хабар дод. Тибқи ин барнома, наврасони аз 12-сола боло низ метавонанд ба хидмат ҷалб шаванд.

Ба иттилои Сипоҳи посдорон, сарбозони наврас барои навбатдорӣ дар дидбонгоҳҳои назоратӣ ҷалб хоҳанд шуд.

Шоҳидон дар Теҳрону Караҷ мегӯянд, дар роҳҳо наврасони силоҳбадаст мушоҳида мешаванд.

Созмонҳои ҷаҳонии ҳомии ҳуқуқ ин амали Эронро шадидан маҳкум намуда, онро “нақзи ҳуқуқи кӯдак” ва “ҷинояти ҷангӣ” номидаанд.

Вазири ҷанги Амрико раиси Ситоди кулли нерӯҳои заминии артиши Амрикоро аз мақомаш барканор кард. Пит Ҳегсет рӯзи панҷшанбеи 2 апрел аз генерал Рэнди Ҷорҷ хост, ки билофосила аз мақомаш канорагирӣ ва худро бознишаста кунад.

Як мақоми амрикоӣ дар гуфтугӯ бо хабаргузории "Рейтерз" гузориши шабакаи CBS дар ин бораро тасдиқ кард.

Далели расмии ин мавзуъ ҳанӯз эълон нашудааст. Аммо CBS ба нақл аз як манбаъ гузориш дода буд, ки Пит Ҳегсет фардеро дар ин мақом мехоҳад, ки "дидгоҳи ӯ ва Доналд Трампро дар нерӯи замини артиш ба иҷро бигузорад".

Генерал Рэнди Ҷорҷи 61-сола, охирин мақоми баландпояи низомӣ аст, ки дар давраи дувуми президентии Доналд Трамп барканор мешавад. Он ҳам дар ҳоле, ки Амрико даргири ҷанги густурда бо Эрон аст.

Ин низомии амрикоӣ дар тӯли наздик ба чаҳор даҳа дар хидмати артиш, борҳо ба Ироқ ва Афғонистон фиристода шуда буд ва дар мақомҳое чун ёвари вазири дифои пешини Амрико Ллойд Остин дар даврони Ҷо Байден, анҷоми вазифа карда буд.

Қарор аст генерал Кристофер ЛаНеве, муовини фармондеҳи Ситоди нерӯҳои заминӣ, ки пештар ёвари Пит Ҳегсет будааст, муваққатан фармондеҳии ситодро ба ӯҳда бигирад. Ӯ дар солҳои 2022-2023 фармондеҳи лашкари 82-и фазоӣ будааст.

Доналд Трамп аз замони бозгашташ ба Кохи Сафед чандин чеҳраи шинохта шуда ва мақомҳои баландпояи низомӣ, аз ҷумла, раиси пешини Ситоди муштараки нерӯҳои мусаллаҳ, фармондеҳи нерӯҳои баҳрӣ ва Горди соҳилӣ, раиси Оҷонси иттилооти дифоӣ ва муовини раиси Ситоди нерӯҳои ҳавоиро аз мақомҳояшон барканор кардааст.

Пит Ҳегсет, вазири ҷанги Амрико исрор дорад, ки президент танҳо фармондеҳони мавриди назарашро баргузида ва дар мақомҳои калидӣ мегузорад. Аммо қонунгузорони демократ, аз эҳтимоли "сиёсӣ шудан"-и артиши Амрико, ки ба шакли суннатӣ, аз назари сиёсӣ бетараф будааст, ибрози нигаронӣ мекунанд.

Дар натиҷаи сангрезӣ дар ноҳияи Ванҷ ба автобусе, ки навсарбозонро ба артиш мебурд, як нафар ҷон бохта, панҷ тани дигар захмӣ шудаанд.

Ҳодиса баъд аз нисфирӯзии дуюми апрел дар мавзеи Хехики ноҳияи Ванҷ рух додааст

Манобеи Радиои Озодӣ дар ноҳияи Ванҷ гуфтанд, ки ҷасади Максим Айдарбеков, навсарбози 18-сола ба зодгоҳаш, ноҳияи Шуғнон, бурда шудааст. Панҷ тан аз захмишудаҳои дигар, ки зодагони ноҳияи Шуғнони Вилояти Мухтори Кӯҳистони Бадахшон ҳастанд, тариқи чархбол барои табобат ба Душанбе интиқол ёфтаанд. Навсарбозони захмишуда аз 20 то 26 сол доранд.

Ба гуфтаи ҳамсуҳбатони Радиои Озодӣ, сангҳои аз кӯҳ кандашуда ба миёнаҷои автобус бархӯрда, сабаби ин садама шудааст.

Ин автобус ва корвони мошинҳои дигар бояд навдаъватшудаҳоро аз Хоруғ то пойтахт мерасонданд.

Тасдиқи расмии ин хабар ва ҷузъиёти бештар ҳоло дастраси Радиои Озодӣ нест.

Илҳом Ализода, Сардори Раёсати иттилоот ва робита бо ҷомеаи вазорати мудофиа ба Радиои Озодӣ гуфт, ки аз ин ҳодиса маълумоте дар даст надоранд. Ахмед Маҳмадбеков, муовини Комисари ҳарбии ВМКБ, ки гуфта мешавад ин корвони навсарбозонро ҳамроҳӣ мекард низ, аз додани ҷузъиёти ин ҳодиса худдорӣ кард. Вазорти мудофиа ва ҳукумати ВМКБ то кунун расман ин ҳодисаро шарҳ надодаанд.

Ҳодиса як рӯз пас аз маросими гусели даъватшавандаҳои вилояти Бадахшон ба артиш, рух додааст.

Саҳифаи фейсбукии "Pamir Insaid" навори автобус пас аз садамаро нашр кардааст:

Маъракаи "Рӯзи даъватшаванда" ва раҳпаймоии оммавӣ дар шаҳри Хоруғ бо ширкати шумори зиёди намояндагони мақомот, сарбозону афсарон ва даъватшавандаҳо рӯзи якуми апрел баргузор шуд.

Раиси вилояти Бадахшон дар ин чорабинӣ аз он ситоиш кардааст, ки дар 8 соли ахир вилоят нақшаи даъватро дар рӯзи аввали сафарбаркунӣ иҷро мекунад.

Дар ҳамин ҳол, Вазорати мудофеаи Тоҷикистон гуфт, дар ду рӯзи аввали моҳи апрел нақшаи даъват ба артиш беш аз "54 дарсад иҷро шуд".

Ба иттилои ин ниҳод, дар баробари Вилояти Мухтори Кӯҳистони Бадахшон, шаҳрҳои Бохтар, Кӯлоб, Норак, ноҳияҳои Дӯстӣ, Ёвон, Вахш дар рӯзи аввали даъват аз иҷро шудани нақша хабар додаанд.

Даъвати баҳорӣ дар Тоҷикистон аз якуми апрел оғоз ва то охири моҳи май идома мекунад.

С.Д., арӯси 19-солаеро, ки рӯзи 7-уми март дар пайи як муноқиша аз хонаи шавҳараш дар ноҳияи Ёвон берун шуда, нопадид гашта буд, дар шаҳри Бохтар ёфтаанд.

Яке аз пайвандонаш рӯзи дуюми апрел гуфт, "ӯ дар онҷо дар як хона бо духтарон зиндагӣ мекардааст".

Ҷузъиёт маълум нест.

Ба суоли наздикон, кӣ чаро ин корро кард, С.Д. аз бародари шавҳараш шикоят карда, гуфтааст, ӯро азият медод ва дар ғайби шавҳараш мехост, ба утоқи хоби вай ворид шавад.

Наздикони шавҳари С.Д. қаблан дар як суҳбат бо Радиои Озодӣ иддаои ҷониби арӯсро рад карда буданд.

Радиои Озодӣ рӯзи 31-уми март аз нопадид шудани С.Д. хабар дод.

Пайвандонаш гуфта буданд, ӯро ҷустуҷӯ доранд ва ба нақли онҳо, вай дар пайи як моҷарои оилавӣ бедарак шуда буд.

С.Д. моҳи сентябри соли 2025 издивоҷ кардааст.

Бино бар эълонҳои ниҳодҳои умури дохилии Тоҷикистон ҳар сол даҳҳо нафар, аз ҷумла занону духтарон бедарак мешаванд. Афроди нопадидшудае низ ҳастанд, ки бо гузашти солҳо аз онҳо нишоне пайдо нагаштааст.

Вакилони порлумони Қирғизистон ҳангоми сафари худ ба Русия ба таври озмоишӣ дар санҷиш ё имтиҳони забони русӣ, ки аз кӯдакони муҳоҷирон барои қабул ба мактаб гирифта мешавад, ширкат намуда, онро душвор хондаанд.

Намояндагони Жогорку Кенеш ё порлумони Қирғизистон аз вакилони Думаи давлатии Русия хостанд, ки дар ин маврид чора андешанд.

Марлен Маматалиев, вакили қирғиз, гуфт, “таҷриба нишон медиҳад, ки аз санҷиш нагузаштани кӯдакони муҳоҷирон бештар на ба надонистани забони русӣ, балки ба омилҳои равонӣ вобаста аст. Мо дирӯз дар маркази тестӣ будем ва дидем, ки воқеан мушкилот ҷой доранд. Мехостем дар ин масъала кор бурда шавад, роҳи ҳал вуҷуд дорад”.

Вакили қирғиз пешниҳод кард, ки ҳадди ақал барои кӯдакон то синфи панҷ ин имтиҳон бекор карда шавад.

Русия аз моҳи апрели соли гузашта қоидаҳои қабули фарзандони муҳоҷиронро ба мактаб дигар кард ва ҳоло ин гурӯҳи кӯдакон танҳо баъди гузаштан аз имтиҳони забони русӣ ва санҷиши санади иқомат ҳаққи таҳсил хоҳанд дошт.

Мақомоти ин кишвар гуфтанд, беш аз 87 дарсади фарзандони муҳоҷирон натавонистанд ба мактабҳои Русия дохил шаванд.

Чанде пеш вазири маорифи Тоҷикистон гуфт, дар як соли охир беш аз 9 ҳазор кӯдаки тоҷик, ки аз мактабҳои Русия ронда ё дар онҷо аз таҳсил маҳрум шудаанд, ба Тоҷикистон баргаштаанд.

Созмони Милали Муттаҳид гузориш дод, ки ҷанг дар Ховари Миёна ва маҳдуд шудани интиқоли сӯзишворӣ тавассути гулӯгоҳи Ҳурмуз ба иқтисоди ҷаҳонӣ таъсири манфӣ мегузорад.

Ба навиштаи Муассисаи Тиҷорат ва Рушди СММ нархи баланди сӯзишворӣ дар дарозмуддат метавонад боис ба афзоиши таваррум ва нархи зиндагӣ дар кишварҳои олам гардад.

Аз ин рӯ, суоли кай хотима ёфтани ҷанг дар маркази таваҷҷуҳи бисёриҳо қарор дорад ва интизор мерафт, ки посухи онро аз паёми президенти Амрико Доналд Трамп пайдо хоҳанд кард.

Доналд Трамп шаби якуми апрел дар аввалин паёмаш ба мардуми Амрико аз оғози ҷанг дар Эрон гуфт, ки ҳадафҳо аз амалиёт дар Ҷумҳурии Исломӣ тақрибан иҷро шудаанд. Ба гуфтаи ӯ, эҳтимол ин амалиёт дар ду -се ҳафтаи оянда бо пирӯзӣ хотима меёбад.

Вай ҳамзамон ишора кард, ки агар дар музокирот раҳбарони Эрон шартҳои Амрикоро қабул накунанд, имкон дорад, ки ҳамлаҳои Амрико бештар шаванд. "Мо дар ду-се ҳафтаи оянда онҳоро бо зарбаҳои вазнин мувоҷеҳ мекунем," – афзуд ӯ.

Раисҷумҳури Амрико эътироф кард, ки нархи маводи сӯхт боло рафтааст, вале ба қавли ӯ "ин натиҷаи ҳамлаҳои Эрон ба киштиҳои тиҷоратӣ ва кишварҳои ҳамсоя аст, ки дер идома нахоҳад кард.

Embed ба дигарон фиристед

Трамп дар бораи хатми низоъ дар Ховари миёна чӣ гуфт?

Аз ҷониби Радиои Озодӣ

Embed ба дигарон фиристед

Нусхабардорӣ шуд

---

бар px баландӣ px

---

URL нусхабардорӣ шуд

Феълан кор намекунад

0:00 0:00:54 0:00

Ҷасади ду зани ҷавон ва як кӯдаки шашсоларо, ки шаби 2-юми апрел дар хонаашон дар шаҳри Кӯлоб кушта шудаанд, ба хок супурданд.

Сабаби куштор ҳанӯз маълум нест.

Ҳодиса дар маҳаллаи 8-уми Кӯлоб рух дода, ҳанӯз гумонзад ё гумонбарҳо ба қатл боздошт нашудаанд.

Як манбаъ дар мақомоти интизомии шаҳри Кӯлоб, ки нахост номаш зикр шавад, ба Радиои Озодӣ гуфт, тафтиши ҳодиса оғоз шуд.

Ҳамсуҳбати дигари мо дар мақомоти интизомӣ гуфт, дар бадани хоҳарон, Зуҳро Қурбоноваи 28-сола ва Таҳминаи Шоҳмаҳмади 20-сола, ки ҳомила будааст, панҷ зарби кордро диданд.

Ба қавли ӯ, Абубакр Қурбонов, хоҳарзодаи шашсолаи онҳо аз ду зарби корд захмӣ шуда, дертар дар бемористони шаҳр ҷон бохтааст. Ӯ писари Фотима Қурбонова, духтари дигари ин хонавода будааст, ки ҳоло дар Русия қарор дорад.

Шомаҳмад Қурбонов, падари Зуҳро ва Таҳмина, дар тамоси телефонӣ бо Радиои Озодӣ гуфт, феълан дар ҳолати афсурдагӣ аст ва намедонад, ки чаро ду духтар ва як наберааш бераҳмона кушта шудаанд. Ӯ хоҳони таҳқиқи мунсифонаи ҳодиса аст.

Намози ҷанозаи ин се нафар рӯзи 2-юми апрел дар масҷиди ҷомеи Кӯлоб, ки бо номи масҷиди “Мулло Ҳайдар” маъруф аст, баргузор гашт.

Аз аввали сол бори сеюм аст, ки дар Кӯлоб куштори пурсарусадо рух медиҳад.

Рӯзи 8-уми феврал Қурбоналӣ Маҳмудов, як сокини Кӯлоб дар ҷанҷоле аз ҷониби ҳамсояаш кушта шуд. Ӯ бародари Маҳмудҷон Маҳмудов, раиси ширкати “Кӯлоб Таксӣ” буд.

Шаби 11-уми январ дар занозании миёни ҷавонон, Муҳаммадалӣ Саъдуллоев, варзишгари 19-сола ҷон бохт. Дар қатли ӯ як ҳамсолашро гумонбар дониста, боздошт кардаанд.

ИНЧУНИН, БИХОНЕД:

Яке кушта ва дигаре дар бемористон. Ба раиси "Кӯлоб Таксӣ" ва бародараш чӣ шуд?

ИНЧУНИН, БИХОНЕД:

Размикори тоҷик дар як занозании гурӯҳӣ кушта шудааст

Дар ин бора нашрияи Financial Times бо такя ба манобеаш хабар додааст.

Гулӯгоҳи Ҳурмуз, ки беш аз 20 дарсади нафти ҷаҳон аз тариқи он интиқол меёбад, беш аз як моҳ боз пас аз ҳамлаи Исроилу Амрико ба Эрон баста шудааст.

Пештар Трамп аз кишварҳои узви паймони НАТО хоста буд, ки дар боз кардани тангаи Ҳурмуз кумак кунанд, вале онҳо рад карданд.

Нашрияи Financial Times навиштааст, Трамп ҳушдори қатъи кӯмак ба Украинаро додааст.

Баъди ин, рӯзи 19-уми март Фаронса, Олмон ва Баритониёи Кабир эълон карданд, ки барои амнияти убури киштиҳо аз тангаи Ҳурмуз саҳм мегузоранд.

Баста шудани амалии тангаи Ҳурмуз аз сӯи Эрон дар як моҳи гузашта ҷараёни ҷаҳонии интиқоли нафтро халалдор кард, ки он боиси ҷаҳиши қиматҳо дар саросари ҷаҳон шудааст.

Мақомот дар Душанбе аз сокинон хостанд, ки аз таксиҳои маъруф "ба 10 сомона" истифода набаранд ва рӯ ба таксиҳои расмӣ, яъне "Jura биёранд.

"Душанбенақлиётхадамотрасон", Корхонаи тобеи ҳукумати Душанбе рӯзи якуми апрел дар муроҷиате аз сокинони пойтахт хоҳиш кардааст, ки ҳангоми зарурат танҳо аз таксиҳои "рақами давлатии тагрангашон сабз ва рақами қайди иловагии тагрангаш зард", истифода баранд.

Ба гуфтаи ин ниҳод, ронандагони ин навъи нақлиёт пайваста аз муоинаи техникӣ гузашта, аз лиҳози бехатарӣ ба талабот ҷавобгӯ аст. Дар ин навъи таксиҳо ба таъкиди мақомот, камераҳои мушоҳидавӣ насб шуда, раванди хидматрасонӣ назорат мешавад.

Таксиҳои "10-сомона", ки шуморашон дар шаҳр нисбат ба солҳои пеш кам шудааст, дар Душанбе новобаста ба масофаи ҳаракат аз мусофирон 10 сомонӣ роҳкиро мегиранд ва аксари сокинон, дар роҳҳои сермошини пойтахт барои равуо ба гӯшаҳои дуртари шаҳр аз ин навъи таксиҳо истифода мебаранд.

Таксиҳои бо номи "Jura", ки ҳоло мақомот аз сокинон хостаанд, бештар аз он истифода кунанд, вобаста ба масофаи ҳаракат ва барои интизорӣ, аз ҷумла дар тамбашавиҳо аз мусофирон пул мегиранд ва ин ба ҷайби на ҳама мусофирон мувофиқ аст.

Шикоят аз кори ин мусофиркашҳо ҳам дар шаҳр кам нест. Дар ҳамин ҳол, пулиси Душанбе аз муҷозоти 7 ронандаи таксӣ хабар додааст, ки ба итилои ин ниҳод, ғайриқонунӣ ба мусофиркашӣ машғул буданд.

Тоҷикистон, ки дар ҳамсоягии Афғонистон қарор дорад, осебпазиртарин кишвар дар баробари таҳдидҳои террористӣ дар минтақа будааст. Хатари терроризм дар ин кишвар дар соли 2026 "муътадил" арзёбӣ шудааст.

Ин хулосаи Пажӯҳишгоҳи иқтисод ва сулҳ аст, ки ҳар сол шохиси таҳдидҳои теророристиро дар саросари ҷаҳон нашр мекунад. Бино ба гузориши нави ин пажӯҳишгоҳ, мавқеи Тоҷикистон дар муқоиса бо соли гузашта бадтар шудааст.

Дар раддабандии таҳдидҳои террористӣ имсол кишвар дар мавқеи 41-ум ҷой гирифтааст ва соли гузашта дар зинаи 70-ум қарор дошт ва ин нишондиҳанда ба маънои хеле кам будани таҳдидҳо буд.

Муаллифони гузориш мегӯянд, ҳарчанд вазъият дар Тоҷикистон дар муқоиса бо минтақаҳои ҷангзадаи ҷаҳон босубот боқӣ мемонад, аммо хатарҳо ҳамчунон зиёданд.

Узбекистон дар ин раддабандӣ дар зинаи 96-ум ҷойгир шуда, таҳдидҳои амниятӣ дар ин ва кишварҳои дигари минтақа хеле кам будааст.

Дар маҷмӯъ, дар Шохиси ҷаҳонии терроризм дар соли 2026 гуфта шудааст, ки сатҳи таҳдидҳо дар ҷаҳон рӯ ба коҳиш аст ва шумораи ҳамлаҳои террористӣ дар муқоиса бо соли гузашта 22 дарсад ва теъдоди қурбониёни он 28 дарсад кам шудааст.

Бо ин вуҷуд, дар кишварҳои ғарбӣ афзоиши фаъолияти гурӯҳҳои ифротӣ ба мушоҳида мерасад ва коршиносон ҳушдор медиҳанд, ки дар пасманзари муноқишаҳои нави ҷаҳонӣ, эҳтимол дорад ояндаи наздик таҳдидҳои террористӣ дубора зиёд шаванд.

Расонаҳои Эрон гузориш доданд, ки Камол Харрозӣ, собиқ вазири корҳои хориҷии он кишвар, рӯзи 1 апрел дар ҳамлаҳо ба Теҳрон, захмӣ шудааст. Бар пояи хабарҳо, ҳамсари Камол Харрозӣ дар ин ҳамла ҷон бохтааст.

Харрозӣ раиси Шӯрои раҳбурдии робитаҳои хориҷӣ аст ва ҳамчунин мушовири байналмилалии раҳбари Ҷумҳурии исломии Эрон ба шумор меравад.

Ба гузориши рӯзномаҳои "Шарқ", "Эътимод" ва "Ҳаммеҳан", хонаи ӯ дар Теҳрон рӯзи чаҳоршанбе дар ҳамлаҳое, ки ба Амрико ва Исроил рабт дода мешавад, ҳадаф қарор гирифт.

Ин расонаҳо афзудаанд, ки ӯ дар пайи ин ҳамла ба шиддат захмӣ ва дар бемористон бистарӣ шудааст.

Камол Харрозӣ дар даврони президентии Муҳаммад Хотамӣ аз 20 августи соли 1997 то 24 августи соли 2005 вазири корҳои хориҷии Эрон буд.

Ду мақоми эронӣ субҳи панҷшанбе бан "Ню-Йорк Таймз" гуфтанд, ки Харрозӣ дар ҳоли пайгирии гуфтугӯ бо Покистон барои баргузории эҳтимолии дидор миёни мақомҳои эронӣ ва Ҷей Ди Венс, муовини раисҷумҳури Амрико будааст.

Ба гуфтаи ин мақомҳо, ҳадаф қарор додани Харрозӣ, ҳамчун талоше барои халалдор кардани раванди дипломатӣ хонда мешавад.

Додситонии ҳарбии гарнизони Хоруғ нисбати Ивазмад Қодиров, афсари Вазорати корҳои дохилии Тоҷикистон, бо иттиҳоми қатли як сокини ноҳияи Ванҷ, парвандаи ҷиноӣ боз кардааст.

Моҷаро нимаи дувуми моҳи март гӯё бар сари робитаи афсари Вазорати корҳои дохилӣ бо як духтари мактабхон, ки хеши ҷавони кушташуда аст, сар задааст.

Як манбаи наздик ба тафтишот бо шарти ошкор нашудани номаш рӯзи 1-уми апрел ба Радиои Озодӣ гуфт, таҳқиқи куштори Саломатшо Ғалчаеви 34-сола аз тарафи афсари Вазорати корҳои дохилӣ, махфӣ идома дорад ва пас аз айбдор шудани афсари пулис бо ҷурми "куштори одам", ҳолатҳои дигари ин қазия мавриди бозрасӣ қарор доранд.

Вай афзуд, ки дар ҳоли ҳозир сабаби аслии бо худ доштани силоҳи оташфишон аз тарафи афсари пулис дар ҷойи ҳодиса ва баромадан аз ҳадди ваколатҳои хизматӣ санҷида шуда, ба парванда илова мешавад. Ба гуфтаи манбаи Радиои Озодӣ, бо анҷоми тафтишот парванда ба Додгоҳи ҳарбии гарнизони Хоруғ фиристода хоҳад шуд.

Неъмат Ғалчаев, бародари Саломатшо Ғалчаев рӯзи 1-уми апрел дар сӯҳбати телефонӣ бо Радиои Озодӣ гуфт, ки аз боз шудани парвандаи ҷиноятӣ нисбати муттаҳам дар қатли Саломатшо хабар доранд.

Ӯ афзуд, азбаски парванда махфӣ аст ва ҳодисаи мавриди санҷиш қарор дорад, аз ҷузъиёти бештар хабар надоранд. "Мо интизор ҳастем, ки тафтишот дақиқ ва боадолатона сурат мегирад ва афсари пулис ба ҷазои сазовораш хоҳад расид"-, гуфт Неъмат Ғалчаев.

Неъмат Ғалчаев дар идома гуфт, то ҷое хабар доранд, ҳоло муфаттишон талош доранд, муайян кунанд, ки афсари пулис бо кӣ робита доштааст -- духтари мактабхон ваё модари ӯ.

Ҳодиса шаби 17-уми март дар деҳаи Рохарви ноҳияи Ванҷ рӯй дод. Дар ҳоле ки мақомот тафсилот намедиҳанд, як манбаи боварбахши Радиои Озодӣ гуфт, моҷаро гуё бар сари робитаи афсари Вазорати корҳои дохилӣ бо як духтари мактабхон, ки хеши ҷавони кушташуда аст, сар задааст.

"Афсар тахминан соати 9-10-и шаб бо мақсади дидорбинӣ бо хонандаи синфи даҳум ба деҳа омадааст. Бо Саломатшо рӯ ба рӯ шуда, ҷанҷол мекунанд. Сипас Ивазмад Қодиров бо истифода аз силоҳи табелии худ ба тарафи Ғалчаев тир мекушояд ва ӯ дар роҳ ба беморхона ба ҳалокат расидааст",–афзуд ҳамсӯҳбати мо.

Ин манбаъ гуфт, "афсари ВКД командири ротаи фаврии таъйиноти махсуси Қӯшунҳои дохилӣ ва аз ноҳияи Восеи вилояти Хатлон аст".

Дар ҳоли ҳозир мавқеи ӯ ва наздиконаш ба қазия маълум нест.

Оҷонсии назорати давлатии молиявӣ ва мубориза бо коррупсияи Тоҷикистон дар пайи санҷиш тасарруфи беш аз 1 миллион сомонии маоши кормандони як беморхонаро ошкор кардааст.

Ин ниҳод рӯзи 31-уми март дар хабарномае навиштааст, ки муҳосиби Беморхонаи марказии ноҳияи Варзоб бо истифода аз ваколатҳои мансаби худ ва "барзиёд нишон додани маоши кормандони беморхона ва дигар пардохтҳо", дар солҳои 2022- 2025 беш аз 1 миллиону 147 ҳазор сомониро аз худ кардааст.

Бино ба хабари Оҷонсӣ, Сиддиқов Б.Б ин амалҳоро дар давраи фаъолияташ ба ҳайси сармуҳосиби Беморхонаи марказии ноҳияи Варзоб ва баъдан муҳосиби ин корхона анҷом дода, "ба давлат зарари махсусан калон расондааст".

Мавқеи мансабдор ба ин иттиҳом маълум нест.

Ба иттилои Оҷонсӣ, нисбати Сиддиқов бар асоси се модда, аз ҷумла, барои аз худ кардани моли давлат ва қаллобӣ ба миқдори махсусан калон парвандаи ҷиноятӣ боз ва ба додгоҳ ирсол шудааст.

Бори аввал нест, ки мансабдоре дар Тоҷикистон ба таври расмӣ ба ҷиноят муттаҳам мешаванд. Қаллобӣ, сохтакории ҳуҷҷат ё баромадан аз ҳадди ваколатҳои мансабӣ, аз ҷумлаи иттиҳомҳои маъмул алайҳи онҳост.

То кунун бархе бо ҳамин далел боздошту зиндонӣ шуда, бархеи дигар бо пардохти ҷуброн аз ҷавобгарӣ озод гаштаанд.