Яке аз гузоришгарони баландпояи Созмони Милал аз боз кардани парванда ба зидди фаъолони маданӣ ва ҳомиёни ҳуқуқи бадахшонӣ дар Тоҷикистон изҳори нигаронӣ кардааст.

Мери Лавлор, гузоришгари хоси Созмони Милал барои ҳомиёни ҳуқуқи инсон рӯзи 19-уми август дар саҳифааш дар Твиттер навиштааст: “Ман аз таҳқиқи амалҳои ҳомиёни ҳуқуқи инсон, хонум Мамадшоева, ҷаноби Холиқназаров, Иргашов ва ҷаноби Мамадшоев, ки бино ба гузоришҳо бинобар ҳимояташон аз ақаллиятҳои помирӣ ба солҳои тӯлонии зиндон рӯ ба рӯ шудаанд, нигарон ҳастам.” Хонум Лавлор дар ин навиштаи худ, саҳифаи вазорати умури хориҷии Тоҷикистонро пайванд додааст.

Улфатхоним Мамадшоева, рӯзноманигор ва фаъоли мадании бадахшонӣ, Манучеҳр Холиқназаров, мудири Анҷумани ҳуқуқшиносони Помир, Фаромуз Иргашов, Хурсанд Мамадшоева аъзои "Комиссияи 44" баъди нооромиҳои моҳи май дар Вилояти Мухтори Куҳистони Бадахшон дастгир шуданд. Мақомот онҳоро ба барангехтани тазоҳуроту нооромиҳо дар Рушон муттаҳам мекунанд, ки дар натиҷаи он ба гуфтаи мақомот 16 нафар кушта шуд.

Ҳомиёни ҳуқуқ ва худи ин афрод гуфтаанд, ки ҳеч гуноҳе надоранд ва барои ҳимоят аз ҳуқуқи мардуми вилоят садо баланд кардаанд. Вазъият дар Вилояти Мухтори Кӯҳистони Бадахшон моҳи майи имсол печида шуд. Дар ҷараёни амалиёти мақомот дар Хоруғу Рӯшон даҳҳо нафар кушта, беш аз 200 нафар дастгир ва чанде аз онҳо аз 11 то 18-солӣ зиндонӣ шуданд.

Чоршанбе Чоршанбиев, размикори бозиҳои якҳарбаи омехта (ММА)-ро дар зиндони шаҳри Хуҷанд барои 15 рӯз дар утоқи танбеҳ (ШИЗО) ҷойгир кардаанд.

Масъулони зиндон ба зангҳои мо посух надоданд.

Ду манбаи огоҳи Радиои Озодӣ 7-уми июл гуфтанд, ки "ӯ даҳ рӯз пеш гуё барои нақзи тартибу низоми маҳбас ҷазо гирифтааст."

Вебсайти "Pamir Inside", ки бештар ҳодисаҳои Вилояти Мухтори Кӯҳистони Бадахшонро бозтоб медиҳад, бо такя ба як манбаъ дар дохили маҳбаси Хуҷанд навишт, Чоршанбиев "ҳангоми сафороии зиндониён гуё гап зада, тартибро халалдор намудааст."

Маъмурони зиндонҳо дар Тоҷикистон бештар намояндагони мухолифон ва фаъолонро дар боздоштгоҳу маҳбасҳо танбеҳ медиҳанд.

Солҳои охир ба ҳуҷраи танбеҳ рафтани вакили мудофеъ Бузургмеҳр Ёров, аъзои зиндонии ҳизби дар Тоҷикистон мамнӯи наҳзати исломӣ, фаъоли сиёсӣ Маҳмурод Одинаев, рӯзноманигор Абусаттор Пирмуҳаммадзода ва дигарон расонаӣ шуда буд.

Чоршанбе Чоршанбиев соли 2021 аз Русия ба Тоҷикистон ронда шуда, дар Душанбе бо айбномаи "даъвати оммавӣ барои бо зӯр тағйир додани сохти конститутсионӣ" 8,5 сол зиндонӣ гардид. Дертар, соли 2024, ҳукми ӯ чаҳор соли дигар дароз гардид.

Далели асосии мақомот як навори суханронии Чоршанбиев дар бораи воқеаҳои моҳи ноябри соли 2021 дар Бадахшон аст. Дар он ҳодиса се кас кушта ва даҳҳо нафар захмӣ шуданд.

Мақомот Чоршанбиевро ба он гунаҳкор кардаанд, ки размикор мардумро ба муқобили ҳукумат даъват кардааст. Елизавета Колтунова, устоди Пажӯҳишгоҳи филология ва журналистикаи Донишгоҳи Нижний Новгород он замон гуфта буд, ки "дар изҳороти баҳсбарангези Чоршанбиев нишонаҳои даъват ба зӯроварӣ, аз ҷумла вобаста ба ҳар гуна тағйирот дар Ҷумҳурии Тоҷикистон вуҷуд надорад."

Додгоҳи Қонуни асосии Қазоқистон гуфт, раисҷумҳури ҳозираи он кишвар, Қосимҷомарт Тоқаев, метавонад дар интихоботи ояндаи президентӣ номзадияшро пешбарӣ кунад.

Ин посух ба муроҷиати раҳбари Қазоқистон буд. Суол ин буд: оё шахсоне, ки мувофиқи Конститутсия ё Қонуни асосии соли 1995 дар вазифаҳои давлатӣ кор кардаанд, ҳақ доранд, аз рӯйи Конситутсияи нав ба ҳамин вазифаҳо таъйин шаванд?

Додгоҳи конститусионии Қазоқистон ба чунин хулоса омадааст, ки маҳдудиятҳо дар Сарқонуни нав танҳо ба интихоб ё таъйинот аз рӯи қоидаҳои нав рабт дорад.

Ин ба он маъност, ки муҳлати президентии Тоқаев, ки бояд ноябри соли 2029 ба анҷом расад, ҳамчун мӯҳлати аввали президентии ӯ ба ҳисоб гирифта намешавад. Дар ин сурат, ӯ метавонад дар интихобот номзадияшро пешбарӣ карда, то соли 2036 дар сари қудрат бимонад. Он вақт Тоқаев 83-сола хоҳад буд.

Қаблан гуфта мешуд, ки мӯҳлати кунунии президентии Тоқаев аввалину охирин мебошад. Соли 2022, баъди ҳодисаҳои моҳи январи пурхушунат, ба Конститутсияи Қазоқистон тағйирот ворид карда, гуфтанд, ки президент метавонад як дафъа ба муддати 7 сол бе ҳаққи интихоби дубора интихоб шавад. Ноябри ҳамон сол Тоқаев дар интихоботи пеш аз мӯҳлат баранда гардид.

Конститутсияи нави Қазоқистонро моҳи марти соли 2026 қабул карданд ва он 1-уми июл ба иҷро даромад. Матни Конститутсияи нав ҳам бо пешниҳоду ташаббуси худи Тоқаев нав шудааст.

Мунтақидон мегӯянд, ислоҳоти конститутсионӣ қудрату нуфузи президенти Қазоқистонро қавитар мегардонад. Салоҳиятҳои Тоқаев васеъ шуд, аз ҷумла ӯ дар таъиноти кадрӣ дасти дарозтаре дорад: бархе мақомҳои муҳимро ӯ акнун метавонад бе назардошти мавқеи Сенат таъйин намояд, чун худи Сенат ҳам ихтисор карда шуд.

Як зан дар шаҳри Андиҷони Узбекистон панҷгоник – се духтар ва ду писар – ба дунё овардааст.

Ҳар кадоме аз онҳо каме беш аз як кило вазн дошта, зери назорат ва нигоҳубини вижа ҳастанд.

Дафтари матбуоти Вазорати тандурустии Узбекистон гуфт, модари панҷгоник рӯзи 6-уми июл бистарӣ карда шуд.

"Пас аз чанд соат табибон буриши қайсарӣ гузарониданд ва панҷ навзодро гирифтанд," – афзуд манбаъ.

Таваллуди панҷгоник ҳодисаи нодир дониста мешавад.

Ба ҳисобҳои байнулимилалӣ, ба ҳар як 50 миллион бордорӣ як маврид таваллуди панҷгоник рост меояд.

Панҷгоники аввалин дар Тоҷикистон – се духтару ду писар – моҳи декабри соли 2020 дар зоишгоҳе дар Душанбе ба дунё омаданд.

Дар 6 моҳи аввали соли ҷорӣ дар пайи ҳодисаҳои нохуш дар корхонаҳои саноатӣ ва кӯҳкории Тоҷикистон 21 нафар ба ҳалокат расида, 19 кас ҷароҳат бардоштаанд.

Масъулини Хадамоти назорати давлатии бехатарии корҳо дар саноат ва соҳаи кӯҳкорӣ рӯзи 7-уми июл дар нишасти хабарӣ гуфтанд, дар байни фавтидаҳо ду шаҳрванди Чин ва як кас аз Эрон, дар байни захмиён бошад, як шаҳрванди Русия ва як нафар аз Чин ҳастанд.

Ба гуфтаи манбаъ, дар пайи ин ҳаводиси нохуш ва барои роҳ додан ба қоидавайронкуниҳо, 2 корхона, 33 мансабдор ва 13 шахси масъул, дар умум, ба маблағи 153 ҳазору 960 сомонӣ ҷарима шудаанд.

Ба иттилои Хадамот, сабаби асоси ин ҳодисаҳо, "бемасъулиятии муҳандисиву техникии кормандони корхонаҳо дар ҷойи садамаҳо, риоя нагардидани қоидаҳои бехатарии саноат, ҳамчунин, норасоии мутахассисони соҳибихтисоси соҳа", будааст.

Мақомот мегӯянд, чунин ҳодисаҳо дар шаш моҳи соли ҷорӣ нисбат ба ҳамин давраи соли гузашта 8 ҳолат зиёд будааст.

Марги коргарон, аз ҷумла хориҷиён дар ҷои кор, дар гузашта ҳам борҳо расонаӣ шуда буд. Ҷабрдидаҳо борҳо аз чашмпӯшии мақомот ба қонуншикании масъулони корхонаҳо, шикоят кардаанд.

Мақомот дар Суғд мегӯянд, корҳои таъйину аломатгузории марзи давлатии Тоҷикистон бо Қирғизистон дар ҳудуди ин вилоят пурра анҷом ёфтааст.

Ба иттилои дафтари матбуоти раиси вилояти Суғд, дар маросими анҷоми корҳои муайянсозӣ, Раҷаб Аҳмадзода, раиси вилояти Суғд ва масъулони Нерӯҳои марзбонӣ ва намояндагони Вазорати мудофиа, иштирок кардаанд.

Тоҷикистон ва Қирғизистон даҳсолаҳо боз наметавонистанд сарҳади байни ду кишварро таъйину аломатгузорӣ кунанд ва танҳо моҳи марти соли гузашта Созишнома дар бораи аломатгузории марзи Тоҷикистону Қирғизистон аз ҷониби роҳбарони ҳарду давлат имзо гардид.

Ҷониби Тоҷикистон ҷузъиёти созишномаи марзиро бо Қирғизистон ошкор накарданд, вале бархе аз мақомдорони Қирғизистон қисман ин масъаларо шарҳ дода, гуфта буданд, ҷонибҳо ба хулосае омадаанд, ки қисмате аз роҳ ва чанд маҳалли аҳолинишинро бо ҳам иваз карданд.

Марзи Тоҷикистону Қирғизистон 1006 километр аст ва то моҳи март бисёре аз қитъаҳо баҳсӣ ба ҳисоб мерафтанд.

Дар нуқтаҳои баҳсӣ борҳо ҷанҷол сар зада, боиси кушта ва захмӣ шудани даҳҳо низомӣ ва сокинони маҳаллӣ аз ҳарду тараф шуда буд.

Доналд Трамп, раисҷумҳури Амрико барои ширкат дар нишасти дурӯзаи сарони НАТО ба Анқара, пойтахти Туркия сафар кард.

Қарор аст афзоиши хароҷоти дифоии Аврупо ва бозтаърифи нақши Амрико дар амнияти қораи Аврупо, аз мавзӯъҳои меҳварии ин нишаст бошад.

Ба навиштаи хабаргузории "Франс пресс", муттаҳидони НАТО дар нишасти рӯзи 7 июл дар Анқара афзоиши чашмгири хароҷоти дифоии худро муаррифӣ хоҳанд кард, то бо ин битавонанд норозигии сахти президенти Амрикоро нисбат ба вокуниши Аврупо ба ҷанги Эрон, коҳиш диҳанд.

Мақомҳои амрикоӣ пеш аз ин нишаст гуфтанд, бозбинии Пентагон дар бораи вазъи нерӯҳои Амрико дар Аврупо мумкин аст ба коҳиши шумори нерӯҳои амрикоӣ дар ин қора бианҷомад. Иқдоме, ки Вашингтон онро бахше аз интиқоли масъулиятҳои дифоӣ ба муттаҳидони аврупоӣ гуфтааст.

Марк Рютте, дабири кулли НАТО гуфтааст, кишварҳои аврупоӣ дар ҳоли иҷрои ӯҳдадориҳои худ барои афзоиши хароҷоти дифоӣ ҳастанд.

Кумитаи ҳолатҳои фавқулодаи Тоҷикистон мегӯяд, ҷустуҷӯи пайкар ё ҷасади Орифа Мирзонаботзода, духтари раиси пешини Вилояти Мухтори Куҳистони Бадахшон дар дарёи Панҷ идома дорад.

Мақомот гуфтанд, беш аз 200 наҷотдиҳанда дар ҳудуди ноҳияҳои Дарвоз, Шамсиддини Шоҳин ва минтақаи Кӯлоб ҷасади Орифаи 2-соларо ҷустуҷӯ доранд.

Ориф Нозимиён, сухангӯи Кумитаи ҳолатҳои фавқулода 6-уми июл ба Радиои Озодӣ гуфт, гилолуд будани об ва ҳам ҷараёни тези дарё корҳои ҷустуҷӯиро мушкил кардааст.

"Мо аз дрон (паҳпод)-ҳои зериобӣ истифода мекунем, вале мутаассифона об гилолуд аст, лойи зиёд дорад, мавзеъҳои душворгузар дорад, қаъри об ноаён аст", - афзуд сухангӯи Кумита.

Ба гуфтаи Ориф Нозимиён, баландшавии сатҳи дарё дар мавзеъҳое, ки дарахту буттаҳо дорад мушоҳида мешавад ва барои ҳамин дар ҳамоҳангӣ бо кормандони идораи ҷангал ҷустуҷӯро давом медиҳанд.

Орифа Мирзонаботзода, духтари дусолаи раиси ВМКБ Алишер Мирзонабот дар канори волидону ду ҳамкори падараш рӯзи 17 июн ба об афтид. То имрӯз ҷасади Алишер Мирзонабот, ҳамсараш Амина Амонуллоева, инчунин ронандаи раиси вилоят Сино Муборакшоев ва ёвараш Садоншо Ҷанобилшо пайдо шудаанд.

Бар асоси қонуни нави афв, 2 ҳазору 979 тан, аз ҷумла тақрибан сесад занро аз зиндонҳои Тоҷикистон озод кардаанд.

Идораи зиндонҳо дар эъломияе ба расонаҳои давлатӣ гуфтааст, ин афрод рӯзи 6-уми июл аз маҳбасҳои Норак, Ваҳдат ва Ёвону Дӯстӣ раҳо шуданд.

Мақомот баръакси дафъаҳои гузашта маросими озодии зиндониёнро бе эълони пешакӣ ва асосан бо ҳузури хабарнигорони давлатӣ гузаронданд.

Тибқи иттилои дарёфтии Радиои Озодӣ, рӯзи душанбе аз зиндони низомаш умумии рақами 3/6 дар ноҳияи Ёвон 1120 нафар раҳо шудаанд.

Бино ба аксу наворҳое, ки Радиои Озодӣ дастрас кард, мардуми зиёде ба пешвози наздикони раҳошудаи худ ба зиндони Ёвон рафта буданд.

Дар Сарраёсати иҷрои ҷазои ҷиноятӣ, ниҳоди нозир бар зиндонҳо, ба суоли Радиои Озодӣ дар бораи раҳоии маҳбусон посух надоданд.

Навор дар Инстаграм:

Қонун дар бораи афв рӯзи 16-уми июн аз ҷониби Эмомалӣ Раҳмон, раисҷумҳури Тоҷикистон имзо шуд. Бар асоси он, бояд 18 ҳазор кас аз боздоштгоҳу зиндон ё аз ҷавобгарии ҷиноӣ озод шаванд.

Аз замони қабули қонун, ин аввалин раҳоии дастаҷамъии маҳкумшудагон аз як зиндони Тоҷикистон аст.

Аммо қонуни афв нисбат ба баъзе аз сиёсатмадорону мухолифон ва фаъолони зиндонӣ татбиқ нахоҳад шуд. Касоне, ки ҳабси абад шудаанд ё бо айбномаи хиёнат ба давлат ва ҷиноятҳои дигари вазнин, ки худашон ва наздиконашон беасос медонанд, дар зиндон ҳастанд.

ИНЧУНИН, БИХОНЕД:

Киро афв мекунанд, киро не? Шарҳи баъзе аз бандҳои қонуни нав

Намояндагони Вазорати фарҳанги Тоҷикистон гуфтанд, Бахтиёр Раҳимов, ҳаҷвнигори шинохта аз гурӯҳи "Ғарибшо", ки рӯзи 30-юми июн даргузашт, ҳеч гоҳ барои гирифтани унвони давлатӣ муроҷиат накардааст.

Баъзе аз ҳамкасбонаш дар рӯзи видоъ бо ӯ гуфтанд, Бахтиёр Раҳимов бисёр мехост, ки бар ивази хидматҳояш ба вай ягон унвони давлатӣ диҳанд. Ин мавзуъ дар шабакаҳои иҷтимоӣ баҳсҳои зиёдеро ба миён овард.

ИНЧУНИН, БИХОНЕД:

Ташриф Халилов: "Як қанотам шикаст"

Матлубахон Сатториён, вазири фарҳанг, 6-уми июл дар нишасти матбуотӣ гуфт, Бахтиёр Раҳимов се дафъа унвони Аълочии фарҳангро гирифт, аммо барои дарёфти унвони давлатӣ муроҷиат накард.

Намояндагони Вазорати фарҳанг иддао карданд, ки як сол пеш худи онҳо аз Бахтиёр Раҳимов хоста буданд, ҳуҷҷатҳояшро барои гирифтани унвони давлатӣ пешниҳод кунад, аммо ӯ бо сабаби беморӣ ин корро накард. Тасдиқи мустақилонаи ин ҳарфҳо мушкил аст.

Як сабаби дигари унвони давлатӣ надоштани Бахтиёр Раҳимов, ба гуфтаи намояндагони Вазорати фарҳанг, ин будааст, ки ҳаҷвнигор дар ягон идораи тобеи вазорат кор намекард. Дар Вазорати фарҳанг гуфтанд, номи ҳунармандон барои гирифтани унвонҳои давлатӣ аз сӯи муассисаҳои фарҳангӣ ё ҳукуматҳои маҳаллӣ пешниҳод мешавад.

Тақдими унвонҳои давлатӣ дар Тоҷикистон ва то куҷо сазовор будани номзадҳо дар гузашта ҳам баҳсбарангез шуда буд.

Бахтиёр Раҳимов, ҳаҷвнигор ва яке аз бунёдгузорони гурӯҳи ҳунарии "Ғарибшо", рӯзи 30-юми июн дар 57-солагӣ даргузашт.

Вай дар саҳнаҳои ҳаҷвияш масъалаҳои доғи иҷтимоӣ, аз ҷумла хидмати сарбозӣ, кор дар идораҳои давлатӣ ва ҷаримаҳои ҳангуфтро бо забони танз баён мекард. Дар чанд филм ҳам нақш бозидааст.

Навор дар Инстаграм:

Субҳи 6-уми июл дар пайи ҳамлаҳои ҳавоии артиши Русия ба шаҳрҳои Украина, дастикам 11 кас кушта шуда, 46 тани дигар захмӣ гардиданд.

Виталий Кличко, шаҳрдори Киев гуфт, 15 манзили маскунӣ дар ин ҳамла зарар диданд.

Аз ҷумла дар ноҳияи Подолскийи Киев як баландошёна ҳадаф қарор гирифт ва аз ошёнаи 5 то 9 пурра хароб шуд. Ҳамлаи паҳпод ва мушакҳо сабаби сӯхтори бузург дар ин минтақа шудааст.

Ба гузориши Неруҳои ҳавоии Украина, артиши Русия субҳи душанбеи 6-уми июл бо 68 мушак ва 351 паҳпод ё ҳавопаймои бесарнишин ба Украина ҳамла кардааст. Ҳадафи асосии ҳамла шаҳри Киев будааст.

Неруҳои украинӣ мегӯянд, 37 мушак ва 326 паҳподро нобуд кардаанд.

Тасдиқи дурустиин ин омор феълан ғайриимкон аст.

Ҳукумати Тоҷикистон пули парвона ё иҷозатномаро барои нуқтаҳои шартбандӣ ё букмейкерӣ чанд баробар зиёд кардааст. Радиои Озодӣ 5-уми июл бо матни тағйирот ба қонун дар бораи иҷозатномадиҳӣ шинос шуд, ки ахиран аз сӯи порлумон ҳам тасвиб гардид.

Бар асоси ин санад, хироҷи яккарата барои додани парвонаи кор ба нуқтаҳои букмекерӣ аз 3 ҳазор сомонӣ ба 130 ҳазор сомонӣ зиёд шудааст.

Ҳамчунин нуқтаҳои букмекерӣ вазифадор шудаанд, ки ҳар сол барои дароз кардани муҳлати ин санад 130 ҳазор сомонӣ пардозанд. То ин вақт ин гуна марказҳо барои тамдиди парвонаи кор 3 ҳазор сомонӣ медоданд.

Мақомот ҳанӯз нагуфтаанд, ки ҳадаф аз боло бурдани нархи иҷозатнома барои нуқтаҳои букмейкерӣ чист. Аммо дар гузашта мақомот ва ҳам ҷомеа аз кори нуқтаҳои шартбандӣ ва бахусус ҳузури ноболиғон дар ин марказҳо нигаронӣ карда буданд.

Дар гузашта мавридҳои худкушии ҷавонон баъди аз даст додани пули зиёд дар нуқтаҳои букмекерӣ расонаӣ шуда буд. Аз ҷумла моҳи декабри соли гузашта як донишҷӯи Донишгоҳи миллии Тоҷикистон дар хобгоҳ худкушӣ кард. Як фарзияи марги ин донишҷӯ ин буд, ки ӯ бозии букмейкерӣ ё шартбандии варзиширо бохта, қарздор шудааст.

ИНЧУНИН, БИХОНЕД:

Аз бозии букмейкерӣ то идораи пулис. "Мӯътодӣ" ба куҷо мебарад? ВИДЕО

Тибқи омори панҷ сол пеш, дар Тоҷикистон наздики 50 ширкати букмекерӣ ё худ шартбандиҳо фаъолият мекунанд. Вазорати корҳои дохилии Тоҷикистон чанд сол пеш вуруди шахсони то 18-20-соларо ба маконҳои шартбандӣ манъ карда буд. Аммо ҳар чанд вақт мақомот аз гузарондани рейд ва ҳузури ноболиғон дар ин марказҳо гузориш медиҳанд.

Президенти Амрико Доналд Трамп рӯзи 4-уми июл бо роҳбарони Украина ва Русия телефонӣ гап задааст.

Пас аз ин суҳбат Владимир Зеленский, раиси ҷумҳури Украина барои пуштибонӣ аз кишвараш ба ИМА изҳори сипос кард. Зеленский дар шабакаи телеграми худ навишт, пуштибонии Амрико аз истиқлолияти Украинаро "ниҳоят қадрдонӣ мекунем".

Ба гуфтаи Зеленский, ӯ ва Трамп масъалаи поён додан ба ҷангро баррасӣ карда, ба тавофуқ расиданд, ки дар нишасти НАТО дар Анқара вохӯранд.

"Имкони воқеии хотима бахшидан ба ин ҷанг вуҷуд дорад ва азми Амрико дар ин раванд аҳамияти ҳалкунанда хоҳад дошт", - гуфт раиси ҷумҳури Украина.

Дар ҳамин ҳол Юрий Ушаков, ёвари президенти Русия хабар дод, ки Владимир Путин ҳам дар гуфтугӯи телефонӣ бо Трамп, ҷанг дар Украинаро баҳс кардааст. Ба иддаои ёвари президенти Русия, Трамп омодагии худро барои мусоидат ба ҳарчи зудтар тамом шудани ҷанг баён доштааст.

Ба гуфтаи Ушаков, Путин ба Трамп гуфтааст, неруҳои Русия ҳамлаҳои худро бар зидди Украина идома медиҳанд.

Муҷтабо Хоманаӣ, роҳбари Ҷумҳурии исломии Эрон дар маросими ҷанозаи падараш Алии Хоманаӣ ширкат накард.

Намози ҷанозаи Алии Хоманаиро субҳи якшанбеи 5-уми июл Оятуллоҳ Ҷаъфар Субҳонӣ хонд. Хоманаӣ рӯзи 28 феврали имсол дар пайи ҳамлаҳои муштараки Амрико ва Исроил ба Эрон, дар Теҳрон кушта шуда буд.

Бо ин ҳол се писари дигари Алӣ Хоманаӣ, Мустафо, Масъуд ва Майсам, ки аз оғози ҷанг пинҳон буданд, рӯзи якшанбе бар сари тобути падари худ ҳозир шуданд.

Муҷтабо Хоманаӣ моҳи марти имсол ва баъди даҳ рӯзи кушта шудани падараш, роҳбари нави Ҷумҳурии исломии Эрон шуд. Аммо дар ин муддати тӯлонӣ Муҷтабо Хоманаӣ боре дар миёни мардум дида нашуд ва ҳеч паёми садоӣ, видеоӣ ё аксе ҳам аз ӯ нашр нагардид.

Дар маросими видоъ бо Алии Хоманаӣ, аъзои баландпояи Эрон, аз ҷумла фармондеҳони Сипоҳ ширкат доштанд.

Дар пайи як сонеҳа ё садамаи нақлиётӣ дар ноҳияи Фархор 7 кас ба ҳалокат расида, чанд каси дигар маҷруҳ шудаанд. Ҳодиса баъд аз зуҳри 4-уми июл рух додааст.

Як манбаъ дар Раёсати корҳои дохилии вилояти Хатлон 5-уми июл ба Радиои Озодӣ гуфт, ду нақлиёти сабукрав "дар натиҷаи риоя накардани қоидаҳои ҳаракат дар роҳ" бо ҳам бархӯрданд.

"Аз як мошин панҷ кас ва аз мошини дигарӣ ду нафар ба ҳалокат расидаанд. Захмиён ҳам ҳастанд. Тафтиши ин ҳодиса идома дорад", - афзуд ҳамсуҳбати мо.

Дафтари матбуоти Вазорати корҳои дохилӣ ҳодисаро расман шарҳ надодааст. Дар наворҳое, ки ба шабакаҳои иҷтимоӣ роҳ ёфт дида мешавад, ки ду мошини ба садама дучоршуда пурра хароб шудаанд. Муаллифони видео мегӯянд, дар миёни фавтидагон занон низ ҳастанд.

Ин дуввумин садамаи пурқурбонӣ дар ҳафтаи равон дар роҳҳои Тоҷикистон аст. Рӯзи 2-юми июл дар тасодуфи роҳ дар шаҳри Ваҳдат 11 кас ҷон бохта буд. Вазорати корҳои дохилии Тоҷикистон гуфт, ҳодиса дар ҳудуди деҳаи Элок ва дар шоҳроҳи Душанбе-Кӯлоб-Хоруғ рӯй додааст.

ИНЧУНИН, БИХОНЕД:

Дар тасодуфи роҳ дар Ваҳдат 11 кас ҷон бохт

Ба иттилои манбаъ, Фирдавс Абдуллоев, ронандаи мошини борбари “Дулан”, бо сабаби кор накардани тормоз ё фишанги исти мошинаш аввал ба як “Опел Зефира” ва сипас ба “Тойота Прадо” бархӯрд.

Ба иттилои расмӣ, соли 2025 дар Тоҷикистон тақрибан ҳазору чорсад тасодуфи роҳ ё садамаи нақлиётӣ сабт шуда, дар пайи он 643 нафар ҷон бохта ва беш аз якуним ҳазор кас маҷруҳ шудаанд.

Суръати баланд ва беэътиноӣ ба қоидаву қонуни ҳаракатро сабаби тасодуфи нақлиётӣ ва маргумири зиёд дар роҳҳои Тоҷикистон медонанд.

Мошинҳои куҳна, роҳҳои ноҳамвор ва беэътиноӣ ба дониши ронандагон ҳангоми имтиҳонгирӣ аз сабабҳои дигари ин мусибатҳо номбар мешаванд.

Телевизиони давлатии Эрон эълон кардааст, ки маросими адои эҳтироми ҳайатҳои хориҷӣ ба пайкари Алии Хоманаӣ, раҳбари пешини Ҷумҳурии исломӣ, шомгоҳи ҷумъа дар Мусаллои Теҳрон, ба поён расид.

Телевизиони ҳукуматии Эрон ба нақл аз масъулин аз ҳузури "50 ҳайати олирутба"-и хориҷӣ дар ин маросим хабар дод.

Ин дар ҳоле аст, ки ҳузур наёфтани мақомҳои баландрутба аз кишварҳое монанди Чин, Русия ва Туркия ба унвони пуштибонҳои Ҷумҳурии исломии Эрон дар ин маросим қобили таваҷҷуҳ буд.

Вазорати корҳои хориҷии Эрон пештар эълон кард буд, "ҳашт раиси ҳукумат, шомлии раисҷумҳур ё нахуствазир, ва раисони порлумонҳои 12 кишвар дар маросими видоъ бо Алии Хоманаӣ ширкат мекунанд.

Мақомҳои кишварҳои аврупоӣ дар ин маросим ҳузур наоштанд ва аз кишварҳои минтақа низ Арабистони Саудӣ дар сатҳи муовини вазири корҳои хориҷӣ иштирок кард. Умон, Қатар ва Ироқ раисони порлумонҳои худро ба ин маросим фиристоданд. Аз сӯи Ироқ, раисҷумҳури ин кишвар низ ҳузур дошт.

Аз миёни дигар кишварҳои Ховари Миёна, аз Имороти Муттаҳидаи Араб, Кувайт ва Баҳрайн, ки дар ҷараёни ҷанги 40-рӯза ва баъд аз он ҳадаф ҳадафи ҳамлаҳои мушакӣ ва паҳбодии Эрон қарор гирифтанд, ҳайате ширкат накардааст.

Дар пайи нашри таҳлилҳо ва вокунишҳо аз поин будани сатҳи ҳузури мақомҳои кишварҳои хориҷӣ дар маросими адои эҳтиром ба Алии Хоманаӣ, хабаргузории "Тасним" наздик ба Сипоҳи посдорон, ба нақл аз як манбаи огоҳ навишт, Амрико монеи ҳузури мақомҳои кишварҳои дигар дар ин маросим шудааст.

Мақомҳои Эрон барномаи якҳафтаӣ барои видоъ ва дафни Алии Хоманаӣ дар назар гирифтаанд ва умедворанд, "миллионҳо нафар" дар ин барномаҳо иштирок кунанд. Алии Хоманаӣ рӯзи 28 феврали имсол дар пайи ҳамлаҳои муштараки Амрико ва Исроил ба Эрон, дар Теҳрон кушта шуд.