Ҳукумати Толибон дар Афғонистон аз рӯзи 1-уми декабр пахши барномаҳои Радиои Озодиро дар мавҷҳои AM ва FM қатъ кардааст.

Бахши дарӣ ва паштуии Радиои Аврупои Озод/Радиои Озодӣ 24 соат дар Афғонистон барномаи радиоӣ пахш мекунад.

Ҷейми Флай, президенти Радиои Аврупои Озод/Радиои Озодӣ дар вокуниш ба амалкарди Толибон гуфт, шеваи кори ин расона тағйир нахоҳад кард ва бо ҳар василаи мумкин ба мардуми Афғонистон хабари дуруст расонида хоҳад шуд.

Ӯ гуфт, “Озодӣ як роҳи наҷот барои даҳҳо миллион афғонҳост, ки тасмими Толибон зиндагии онҳоро фоҷебортар мекунад.”

Дар хабарномаи Радиои Аврупои Озод/Радиои Озодӣ гуфта мешавад, ки Радиои Озодӣ дар Афғонистон ҳамарӯза дар бораи ҳуқуқи занон ба кору таҳсил, мубориза бо тундгароӣ, зиндагии ҷавонон ва ҷамъияти ҳамҷинсгароён гузориш таҳия мекунад.

“Озодӣ ҳамчунин ба афғонистониҳо барномаҳо дар бораи солимӣ, ҳаққи таҳсили духтарон, фасодкории мақомдорон, афроди нотавон ва умедвориҳо ба оянда гузориш таҳия кардааст”,--гуфта мешавад дар хабарнома.

Радиои Озодӣ дар як соли гузашта, бо вуҷуди баста шудани дафтараш дар Кобул ва хориҷ шудани хабарнигоронаш аз Афғонистон корро давом дод.

Толибон моҳи августи соли гузашта Афғонистонро тасарруф карданд. Ҳукумати ин гурӯҳро то кунун ҳеч кишваре ба расмият нашинохтааст.

Бунгоҳи хабарию телевизионии Euronews дафтари намояндагии худро дар шаҳри Тошканд ифтитоҳ кард. Дар ин бора рӯзи 1 июл дафтари матбуоти ВКХ Узбекистон дар саҳифаи телеграмаш хабар додааст.

Дар хабар омадааст, ки “Euronews – яке аз расонаҳои боэътибори ҷаҳонӣ расман дар Тошканд боз шуд. Ин ҳодисаи муҳим баёнгари боз ва омода будани Узбекистон ба ҳамкориҳои байналмилалӣ аст ва шарики боэътимод будани он кишварро дар сатҳи ҷаҳонӣ намоиш медиҳад”.

Дар изҳороти расмӣ инчунин аксҳое аз маросими ифтитоҳи дафтари намояндагии ин расона нашр шудааст.

Ба иттилои дарёфтӣ, Euronews дар Тошканд як намояндагии Осиёи Марказии ин телевизион мешавад ва бештар дар мавзӯъҳои фарҳангу туризм барномаҳо таҳия хоҳад кард. Ҷузъиёти дигар феълан нашр намешавад, аз ҷумла ин ки оё дар Тоҷикистон ҳам дафтари намояндагӣ боз мекунад ё на.

Euronews як шабакаи бисёрзабонаи телевизионии Аврупо буда, қароргоҳаш дар шаҳри Лиони Фаронса ҷойгир аст. Барномаҳои онро, ки дар бораи ҳаводиси ҷаҳон ва кишварҳои ҷудогона, аз ҷумла Русия ва Украина ҳам мавод таҳия мекунад, тавассути маҳвора ва ҳам шабакаи YouTube дар интернет дидан мумкин аст.

Дар Тоҷикистон дар як ҳафтаи гузашта ду шаҳрванди Русия ба ҳалокат расидаанд, яке ба гуфтаи мақомот худкушӣ кардааст, дигарӣ дар тасодуф ҷон додааст. Кумитаи ҳолатҳои фавқуллода имрӯз хабар дод, ки Дамир Менклиеви 39-сола, корманди пойгоҳи 201-уми Русия дар Тоҷикистон “рӯзи 1-уми июл дар деҳаи Сайёди ҷамоати деҳоти Лучоб” дар ноҳияи Рӯдакӣ худро ба дор овехтааст.

Сабабҳои худкушӣ маълум нест ва қазияро мақомот таҳқиқ мекунанд. Аз ин пештар ҳамин кумита эълон кард, ки Вадим Сиганов, сарбози пойгоҳи мазкур рӯзи 26-уми июн ҳангоми параплансаворӣ дар ноҳияи Варзоб ба замин афтода, ҷон додааст.

Ҷасади ӯро наҷотбахшони тоҷик аз як макони душворгузари кӯҳӣ пайдо карда ба хонаводааш супурдаанд. Пойгоҳи 201-уми низомии Русия дар Тоҷикистон бузургтарин пойгоҳи низомии он кишвар дар хориҷ аст ва дар он тақрибан 7 000 сарбоз хидмат мекунанд.

Раёсати корҳои дохилӣ дар шаҳри Душанбе аз боздошти як ронанда хабар дод, ки мошинро ба тарафи кормандони милиса ронда, "аз зӯроварӣ ба муқобили намояндаи ҳокимият истифода бурдааст".

Дар хабарномаи ин ниҳод аз рӯзи 2 июл омадааст, ки Аҳлиддин Одинаев дар "Бозори Корвон"-и Душанбе мунтазам қоидаҳои ҳаракатро вайрон намуда, дастури кормандони ҳифзи ҳуқуқро нодида мегирифтааст.

Ба иттилои манбаъ, кормандони пулиси ноҳияи Фирдавсӣ пас аз тафтиш ӯро боздошт карданд. Айни ҳол, ӯ дар ҳабси пешакӣ аст ва пулис алайҳи ӯ парвандаи ҷиноятӣ боз карда, таҳқиқ давом дорад.

Назари худи ронанда ва наздиконаш ба ин қазия маълум нест.

Дар гузашта ҳам дар Душанбе ва минтақаҳои дигари кишвар мавридҳои ба тарафи кормандони милиса рондани мошин аз сӯи ронандагон, рух дода буд.

Созмони байналмилалии муҳоҷират эълон кард, ки дар моҳи июни имсол беш аз 230 ҳазор афғон аз Эрон ба Афғонистон баргаштаанд, ки аксари онҳо ба таври маҷбурӣ ихроҷ шудаанд.

Ин раванд дар ҳафтаҳои ахир шиддат гирифтааст, зеро Эрон барои ҳамаи муҳоҷирони бесанади афғон барои берун рафтан аз он кишвар то 6 июл муҳлат додааст.

Бо ин ҳол, Созмони байналмилалии муҳоҷират мегӯяд, ки шумори ихроҷшудаҳо ҳатто пеш аз фаро расидани муҳлати муқаррарашуда ҳам боло будааст.

Ба гуфтаи сухангӯи ин созмон, байни 1 то 28 июн 234 ҳазор нафар ба Афғонистон баргаштаанд ва аз оғози сол то кунун 691 ҳазор афғон баргаштаанд, ки 70 дарсади онҳо ба зӯрӣ берун карда шудаанд.

Дар бархе рӯзҳои ҳафтаи гузашта, шумори бозгаштаҳо ба 30 ҳазор нафар дар рӯз расидааст.

Дар идомаи баҳсҳои лафзии миёни президенти ИМА ва раҳбари кулли ширкати Tesla, рӯзи 1 июл Доналд Трамп пешниҳод кард, ки идораи муассирияти кори ҳукумат (Department of Government Efficiency - DOGE) имтиёзҳои барои ширкатҳои Илон Маск додашударо бозбинӣ кунад. Изҳороти Трамп баъди он садо дод, ки Маск қонуни нав дар бораи андозҳову хароҷотро интиқод намуд.

Саҳмияҳои Tesla дар фурӯшҳои муқаддамотӣ 5% нархашонро аз даст доданд. Мухолифатҳои миёни Трамп ва Маск метавонад ба тиҷоратҳои яке аз сарватмандтарин шахсони сайёра осеби ҷиддӣ расонад.

Оҷонсии Рейтерс менависад, вазорати нақлиёти ИМА дар қабули қарори эҷоди роботакси аз ҷониби ширкати Tesla нақши муҳим дошта, инчунин SpaceX-и Маск бо қарордодҳои федеролӣ бо арзиши 22 миллиард доллар амалӣ мешавад.

Трамп дар Truth Social навишт: “Илон беҳтарин кӯмакпулиҳои давлатиро назар ба ҳар як инсони дигар дар сайёра ба даст меорад ва бидуни ин ёронаҳо, Илон шояд ҳама мағозаҳояшро баста ба Африқои Ҷанубӣ баргардад. Дигар мушаку маҳвораҳо парвоз нахоҳанд кард ва мошинҳои электронӣ истеҳсол намешаванд ва кишвари мо САРВАТИ зиёде захира хоҳад кард. Шояд ҳам DOGE ба ин чизҳо нигоҳи амиқе бикунад? ПУЛИ ЗИЁДЕ САРФА ХОҲАД ШУД!!!”.

Баҳси миёни президенти ИМА ва соҳибкори маъруф аввали моҳи июн шурӯъ шуд. Он замон Илон Маск зидди қонуни нав баромад, ки онро таҳлилгарон ҳам барои 3 триллион доллар хароҷоти иловагиаш интиқод карданд. Баъди як муддат хомӯш шудани баҳсҳо Маск рӯзи шанбе дубора қонунро танқид кард ва онро “харобкорона” номид. Ду рӯз баъдаш ба таъсиси ҳизби наве даъват намуд.

Интиқоди ахир дар муносибатҳои ду дӯсти наздик шикофи ҷиддие эҷод кардааст ва маълум нест, ки то куҷо танқидҳои Маск ба аъзои Конгресс дар қабули қонуни нав таъсиргузор хоҳад шуд.

Додгоҳе дар Узбекистон сокини 46-солаи вилояти Қашқадарёро бо иттиҳоми иштирок дар чандин созмони мамнӯи террористӣ ба 16 соли зиндон маҳкум кард. Санаи содир шудани ҳукм нашр намешавад, вале ба иттилои матбуоти маҳаллӣ, тафтишот гуфтааст, фаъолиятҳои ғайриқонунии Обид Сафаров аз соли 2013, замони таъсиси ба истилоҳ созмони динию ифротии “Ҷиҳодчилар” дар Қашқадарё шурӯъ мешавад.

Баъди ин ӯ ба узвияти “Ҳаракати исломии Туркистон”, “Шохаи Хуросони Давлати исломӣ” (ДОИШ) шомил шуда, бо мақсади ҳамроҳ шудан ба гурӯҳҳои ҷангҷӯён чандин бор аз хоки Русия, Озарбойҷон, Эрон, Афғонистон ва Покистон убур кардааст.

Яке аз иттиҳомҳое, ки ин шаҳрванд содир кардааст, иштирок дар ҳамлаи мушакии болои шаҳри Тирмиз дар соли 2022 мебошад. Он вақт аз хоки Афғонистон ба маҳаллаҳои аҳолинишини шаҳри Тирмизи вилояти Сурхондарёи Узбекистон панҷ мушак партоб шуд ва ба моликияти сокинони маҳаллӣ осеб расонид. Сафаровро январи соли 2025 дар Покистон боздошт ва ба Узбекистон истирдод карданд.

Худи маҳкумшуда дар додгоҳ гуноҳашро қисман эътироф кардааст. Ӯро аз рӯи шаш моддаи Кодекси ҷиноии Узбекистон, аз ҷумла терроризм, харобкорӣ, сӯиқасд ба сохти конститутсионӣ, иштирок дар ташкилоти мамнӯъ ва паҳн кардани маводи экстремистӣ маҳкум карданд.

Шурӯъ аз имрӯз, 1 июл дар Русия иртиботи мобилии хориҷиҳоеро, ки аз санҷиши биометрӣ нагузаштаанд, қатъ мекунанд. Дар ин бора рӯзи сешанбе пойгоҳи иттилооти давлатии “Минцифры” хабар додааст.

Ин муассиса гуфтааст, ки аз аввали соли ҷорӣ созиш бо ширкати мухобиротиро танҳо он шаҳрвандоне метавонанд имзо кунанд, ки дар Низоми ягонаи биометрӣ (Единая биометрическая система - ЕБС) сабтином шуда бошанд.

Дар ин ҳолат ҳар як нафар метавонад то 10 симкорти телефонӣ ҳам дошта бошад. То имрӯз, ба иттилои ин пойгоҳ, 2 миллион хориҷӣ аз рӯи қоидаи нав сабтином шудааст. Агар як шаҳрванди хориҷӣ ин талаботро нодида гирифт, бо маҳдудиятҳое рӯбарӯ мешавад, аз ҷумла, ба мӯҳлати се моҳ ё бештар аз он иртиботи мобилиашро қатъ мекунанд.

Дар Русия шурӯъ аз 1 январ фурӯши симкортҳо ба хориҷиҳо сахттар шуд. Дар вазорати рушди рақамӣ инро ба мубориза бо қаллобон ва дорандагони симкортҳои машкук рабт медиҳанд. Соли 20024 Роскомнадзор беш аз 9 миллион адад симкортҳои хориҷиҳоро масдуд кард.

Баъди ин 6 миллион нафар аз сабтиноми дубора гузаштанд. Дар маҷмӯъ дар Русия 13 миллион хориҷӣ симкорти телефонҳои мобилро дорад.

Идораи ҳавошиносии Тоҷикистон аз омадани ҳавои гарми тоқатфарсо то марзи 50 дараҷа дар кишвар ҳушдор додааст.

Дар иттилоияе, ки Идораи обуҳавошиносӣ нашр кардааст, гуфта мешавад, ки аз рӯзи 3-ум то 7-уми июл ба сабаби ворид шудани анбӯҳи ҳавои гарм, дар вилояти Хатлон ҳарорат аз 42 то ба 47 дараҷа мерасад.

Дар ноҳияҳои тобеи марказ ва вилояти Суғд ҳаво то 43 дараҷа гарм мешавад ва шарқи кишвар ҳам, ки умдатан ҳарорати муътадил дорад, мардум ҳам бояд аз гармии то 42-дараҷаӣ дар сояҳо паноҳ баранд.

Ба гуфтаи Идораи ҳавошиносӣ, ҳарорати баланд метавонад, зудтар пиряхҳоро дар кӯҳистонҳои Тоҷикистон об карда, сабаби сар задани селҳои пиряхӣ ва баланд шудани сатҳи рӯдхонаҳо дар Бадахшону Суғд шавад.

Аз ин ҷиҳат, Кумитаи ҳифзи муҳити зист ба аҳолӣ тавсия додааст, ки дар ноҳияҳои кӯҳӣ ва доманакӯҳӣ эҳтиёткор бошанд, то аз хатари селу обхезӣ эмин бимонанд.

Нархи талоқ дар Тоҷикистон ду баробар боло меравад. Тағйирот дар ин бора ба қонун дар бораи боҷи давлатиро вакилони Маҷлиси намояндагон ворид карданд.

Қарор аст баъди тасдиқи Маҷлиси миллӣ ва имзои раисҷумҳур ва як моҳ пас аз нашри расмӣ, он мавриди амал қарор гирад.

Аз ин ба баъд, барои бақайдгирии давлатии бекор кардани ақди никоҳ дар асоси аризаи яке аз ҳамсарон, ба андозаи 2 нишондиҳанда барои ҳисобҳо, дар асоси аризаи якҷояи ҳамсарон ба андозаи 10 нишондиҳанда ва дар асоси ҳалномаи суд бошад, ба андозаи 14 нишондиҳанда барои ҳисобҳо, боҷ ситонида хоҳад шуд.

Дар ҳоли ҳозир нархи талоқ дар Тоҷикистон ба андозаи як нишондиҳанда барои ҳисобҳо аст. Як нишондиҳанда барои ҳисобҳо 75 сомониро ташкил медиҳад.

Пошхӯрии оилаҳо ва маҳрум шудани фарзандон аз тарбияи яке аз волидайн солҳост, ки аз мавзӯъҳои нигаронкунанда дар ҷомеаи Тоҷикистон аст.

Тибқи омори расмӣ, соли 2024 дар Тоҷикистон 9 ҳазор оила аз ҳам ҷудо шудаанд.

Як зан дар ноҳияи Фархор рӯзи 30 июн чаҳор кӯдакашонро ба дарёи Сурхоб андохтааст.

Аз Кумитаи ҳолатҳои фавқулодаи Тоҷикистон субҳи 1 июл ба Радиои Озодӣ хабар доданд, ки дирӯз ин занро зинда, аммо ҷасадҳои ду кӯдакашро мурда берун оварданд. Дар КҲФ гуфтанд, ки ҷустуҷӯи ҷасадҳои ду кӯдаки дигар идома дорад.

Феълан маълум нест, ки фарзандони ин зан чанд сол доштанд ва чаро вай даст ба ин кор задааст.

Шоми 30 июн корбарони Радиои Озодӣ бо фиристодани аксу наворҳо хабар доданд, ки дар деҳаи Қизисуи ноҳияи Фархор як зан ҳамроҳи чаҳор фарзандаш худро ба дарёи Сурхоб андохтааст. Дар наворҳои фиристода дида мешуд, ки мақомот дар дарёи Сурхоб ҷасадҳоро ҷустуҷӯ доранд.

Ба иттилои манбаъҳои Радиои Озодӣ, модари ин кӯдакон боздошт ва нисбаташ тибқи моддаи 104, қисми дуи Кодекси ҷиноятии Тоҷикистон, парванда боз шудааст.

Тафтиши ин парвандаро додситонии ноҳияи Фархор пеш мебарад.

Вазорати фарҳанги Озарбойҷон хабар дод, ки дар посух ба фишору таъқиби озарбойҷониҳо дар Русия ҳамаи маҳфилҳои консертӣ, намоиш ва дигар барномаҳои муштарак бо Русия дар Боку бекор карда шуданд.

Пештар Вазорати корҳои хориҷии Озарбойҷон гуфт, 27-уми июн дар ҷараёни рейди пулиси Русия "ду озарбойҷонӣ ба таври ваҳшиёна кушта шуда, чанд нафари дигар ҷароҳатҳои вазнин бардоштаанд." Ба гузориши расонаҳо, зиёд аз 50 зодаи Озарбойҷон дастгир шудаанд. Вазорати корҳои хориҷии Озарбойҷон 29-уми июн хабар дод, ки кордори Сафорати Русияро даъват карда, ба ӯ нотаи эътирозӣ додааст.

Рӯзи 30-юми июн пулиси Озарбойҷон дар як рейд дафтари хабаргузории русии “Спутник Озарбойҷон”-ро тафтиш ва ду нафарро дар ин ҷо бо гумони онки кормандони Хадамоти амнияти Русия ё ФСБ ҳастанд, боздошт намуд. Расонаҳои озарӣ навиштанед, қаблан шумораи кормандони ин бунгоҳ аз 40 то 1 нафар коҳиш дода шуданд. Сомонаи Report менависад, қатъи назар аз қарори барҳам додани ин бунгоҳ, он корашро идома додааст.

Дар пасманзари сард шудани равобити Маскав ва Боку, намояндагони порлумони Озарбойҷон аз ширкат дар ҷаласаи порлумонӣ дар Думаи давлатии Русия низ худдорӣ карданд.

Вазорати корҳои дохилии Тоҷикистон ҷузъиёти тасодуфи маргбор дар роҳи Хуҷанд-Мастчоҳро эълон кард, ки дар натиҷаи он 7 нафар ҷон доданд. Ҳодиса 28-уми июн рух дода, дар бораи он аввал Радиои Озодӣ хабар дода буд.

Дар баёнияи расмии ВКД аз рӯзи 30-уми июн омадааст, дар пайи ин сонеҳа 7 нафар ба ҳалокат расида, 3 каси дигар захмӣ шудааст. Ду нафар аз қурбониён шаҳрвандони Узбекистон ва панҷ каси дигар аъзоёни як оила, аз шаҳри Истиқлоли Тоҷикистон ҳастанд. Яке аз ҳалокшудагон 8 ва дигарӣ 15-сола будааст.

Ба қавли вазорат, сабаби садама, ба ақиби мошини дигаре бархӯрдану аз роҳаш хориҷ шудани мошини Муҳаммадӣ Холбоев, шаҳрванди Узбекистон будааст. Дар ин ҳодиса, ки дар қаламрави ноҳияи Мастчоҳ рух дод, ду ноболиғи дигар яке 8 ва дигарӣ 15-сола захм бардошта, бемори бистарӣ шудаанд.

Ин фалокат дуввумин садамаи мудҳиши маргбор дар вилояти Суғд дар тӯли камтар аз як моҳ аст. Рӯзи 29-уми май дар як садамаи шабеҳи дигар дар ноҳияи Ҷаббор Расулов шаш нафар ҷон бохтанд. Дар Тоҷикистон солона садҳо нафар дар чунин садамаҳо ҷон медиҳанд ва садҳо каси дигар маъюби якумрӣ мешаванд. Беътиноӣ ба қоидаҳои ҳаракат, роҳҳои нимавайрон, суръати баланд аз сабабҳои асосии маргумир дар роҳҳои кишвар дониста мешавад.

ИНЧУНИН, БИХОНЕД:

Тафсилоти садамаи мудҳиш дар Суғд. Ду узбекистонӣ ҳам ҷон бохтаанд

Хабаргузории давлатии ТАСС-и Русия мегӯяд, фақат яке аз гумонбарони асосӣ ба ҳамлаи террористӣ дар Крокус "тамоми гуноҳҳояшро эътироф" ва аз амалкардҳояш изҳори пушаймонӣ кардааст. Хабаргузорӣ чанд рӯз аст, ки ҷузъиёти парвандаи ҳамлаи пурқурбонӣ ба ин толори консертӣ дар канори Маскавро нашр мекунад, вале ҳеч чизе аз гуфтаи вакилони дифои муҳоҷирони тоҷик наовардааст.

ТАСС рӯзи 30-уми июн навишт, ки бо эътирофоти Фаридуни Шамсиддин аз парвандаи ӯ ошно шудааст. "Ба гуноҳаш комилан эътироф кард. Аз кардааш пушаймон аст,"-навиштааст ТАСС.

Фаридуни Шамсиддинро бо амри додгоҳи Маскав шаби 24-уми март бо иттиҳоми "анҷоми амалиёти террористӣ" боздошт карданд ва гуфтанд, ки ӯ чанд рӯз қабл аз ҳодиса аз Туркия ба Маскав омадааст. Назари вакили дифои Фаридуни Шамсиддин дар ин хабар оварда нашудааст. Аммо шеваи боздошту латӯкуби бераҳмонаи чор муҳоҷири тоҷик баъди ҳамла, сабаби хашми мардум шуд ва ин шубҳаву гумонро барангехт, ки шаҳрвандони Тоҷикистон зери шиканҷа гуноҳи нокардаро ба гардан гирифтаанд.

Ба навиштаи хабаргузории ТАСС, се гумонбари дигар ба ҷиноят Муҳаммадсобир Файзов, Саидакрам Раҷабализода ва Далерҷон Мирзоев, агарчӣ ба гуноҳи хеш иқрор шудаанд, вале аз кардаашон изҳори пушаймонӣ накардаанд.

Маъмурони амниятии Русия вақти боздошт гӯши яке аз муттаҳамонро бурида ва дигариро ба ҳадде зада буданд, ки дар аробаи маъюбон ва беҳушу беёд ӯро ба додгоҳ оварда буданд. Дигариро порчае аз селофан дар гардан оварда буданд, ки умдатан барои нафасгир кардан истифода мебаранд.

Дар ҳамлаи террористӣ ба толори консертии Крокус дар канори Маскав дар рӯзи 22-уми марти соли гузашта 149 нафар нафар кушта ва 609 каси дигар маҷруҳ шуданд. Дар умум мақомоти Русия 19 нафарро ба анҷоми ин ҳамла муттаҳам мекунанд ва аксари онҳо шаҳрвандони Тоҷикистон ҳастанд.

Гуруҳи ба ном "Давлати исломӣ" дар он замон масъулияти ин ҳамларо бар уҳда гирифт, аммо ҳафтае пештар хабаргузории ТАСС навишт, ки ин ҳамларо бо амри Хадамоти махсуси Украина анҷом додаанд. Иддаое, ки ин кишвар рад кардааст.

Ҳамлаи террористӣ ба "Крокус" ҷомеаи Тоҷикистонро ваҳшатзада кард ва баъди он мақомоти Русия ба амалиёти густурда ва олуда бо бадрафториро ба зидди муҳоҷирони тоҷик оғоз карданд.

Эрон имкониятҳои техникӣ барои азсаргирии ғанисозии уранро ҳифз кардааст. Дар ин бора Рафаэл Гросси, мудири Оҷонси Байнулмилалии Энержии Атомӣ (МАГАТЭ) дар суҳбат бо телевизиони CBS хабар додааст.

Гросси гуфтааст, ҳамлаҳои Исроил ва ИМА ба ниҳодҳои ҳастаии Эрон зарари ҷиддӣ расонд, вале онҳоро нобуд накардааст.

"Онҳо давоми чанд моҳ метавонанд ғанисозии уранро оғоз кунанд, ҳатто барвақтар. Намешавад тасдиқ кард, ки ҳама чиз нобуд шудааст ва чизе боқӣ намонд,"-гуфтааст Гросси.

Доналд Трамп, раиси ҷумҳури Амрико баъди ҳамлаи артиши ин кишвар ба се таъсисоти ҳастаии Эрон гуфт, ниҳодҳои ҳастаии Эрон комилан нобуд шуданд. Вале бархе расонаҳо, азҷумла CNN, The New York Times бо такя ба манобеи худ навиштанд, ҳамлаҳои Амрико барномаи ҳастаии Эронро танҳо муваққатан манъ кард.

Ба гузориши нашрияи Financial Times, бахши асосии урани ғанишуда ҳамчунон боқӣ мондааст.

Ҳавопаймоҳои Амрико шаби 21-уми июн ба се иншооти ҳастаии Эрон - Форду, Натанз ва Исфаҳон бомбҳои азиме андохтанд.

Президенти Амрико Доналд Трамп аз лоиҳаи қонун дар бораи ҷорӣ кардани таҳримҳои нав алайҳи Русия, ҷонибдорӣ кардааст. Дар ин бора сенатори ҷумҳурихоҳ Линдси Грэм дар суҳбат бо телевизиони ABC хабар додааст.

"Дирӯз бори аввал президент ба ман гуфт, вақти он расидааст, ки ин лоиҳаро пеш барем,"-гуфт Грэм ва илова кард, ки сенаторҳо ба президент Трамп роҳкоре медиҳанд, ки Владимир Путинро барои музокира бо Украина маҷбур кунад.

Ба гуфтаи Линдси Грэм, таҳримҳои нав пешбинӣ мекунанд, ки кишварҳо дар сурати аз Русия молу маҳслуот харидан, бояд ба Украина кумак кунанд. Агар давлатҳо ин корро накунанд, ба маҳсулоти содиротии онҳо ба ИМА 500 дарсад боҷи гумрукӣ баста мешавад.

Ба гуфтаи Грэм, аз 100 сенатор 84 нафар аз лоиҳаи қонун пуштибонӣ кардаанд.

Манобеи Wall Street Journal навиштаанд, Кохи Сафед талош мекунад Линдси Грэмро водор кунад, ки лоиҳаи қонуни таҳримҳо алайҳи Русияро сабуктар кунад.

Аз замони оғози ҳамлаи бедалели Русия ба Укрина дар моҳи феврали соли 2022, Иттиҳоди Аврупо ва Амрико алайҳи Маскав таҳримҳои сангине ҷорӣ карданд.