Дар ҳоле, ки Вазорати дифоъ аз иҷрои нақшаи даъват дар ҳама вилоятҳои кишвар ва шаҳри Душанбе гузориш дод, манобеи Радиои Озодӣ мегӯянд, нақшаи даъват дар чанд шаҳру ноҳия иҷро нашудааст.

Ду ҳамсуҳбати радиои Озодӣ дар комиссияҳои даъвати шаҳри Душанбе ва вилояти Хатлон гуфтанд, ки мақомот натавонистаанд, нақшаи даъватро дар беш аз 15 шаҳру навоҳии тобеи марказ ва вилояти Хатлон ба иҷро расонанд.

Вазорати дифоъ рӯзи 1-уми декабр бо пахши хабарномае гуфт, “бо оғоз гардидани ин маъракаи муҳими сиёсӣ, дар нахустин рӯзи даъват Вилояти мухтори кӯҳистони Бадахшон, чаҳор навоҳии пойтахт, шаҳру ноҳияҳои тобеи ҷумҳурӣ ва вилоятҳои Хатлону Суғд аз иҷрои пурраи нақшаи даъват гузориш доданд.”

Вазорати дифоъ ҳар сол ҳисобот медод, ки чанд дар сад нақша иҷро шудааст, вале дар хабарномаи имсол оморе зикр нашудааст. Танҳо гуфта шуд, ки даъват поён ёфтааст, вале таъкид нашуда буд, ки он миқдоре, ки барои артиш сарбоз лозим аст, ҷалб шудааст, ё не. Бори ахир рӯзи 12-уми ноябри имсол яке аз намояндагони Вазорати дифоъ гуфта буд, нақшаи даъват ба хидмат дар артиш беш аз 81 дарсад иҷро шудааст. Радиои Озодӣ рӯзи 8-уми декабр чанд маротиба ба дафтари матбуоти Вазорати дифоъ занг зад, вале касе аз он тараф гӯширо нагирифт.

Манобеи Радиои Озодӣ гуфтанд, ки дар ҷаласаи вижае вазири мудофиа ба комисариатҳои ҳарбии шаҳру навоҳие, ки нақшаро иҷро накардаанд, гуфтааст, ки нақшаи даъватро бояд то 15-уми декабр пурра ба анҷом расонанд. Назари Вазораи дифоъ ба ин маълумот алҳол дастрас нашудааст. Дар хабарномаи ахири Вазорат таъкид шуда буд, ки «даъвати ҷавонони синни хидмат барои омӯзиш ва омодагӣ давом мекунад.»

Даъвати тирамоҳии ҷавонони аз 18 то 27-сола дар Тоҷикистон рӯзи 1-уми октябр оғоз шуд ва рӯзи 30-уми ноябр ба поён расид. Дар ин муддат шикоят аз ҳолатҳои маҷбуран бар артиш ҷалб кардани ҷавонони бемор ва бо шеваи гуногун зери фишор қарор додани наздикони ҷавонон тақрибан аз ҳама минтақаҳои кишвар ба дасти Радиои Озодӣ расид.

Аз ҷумла сокинони як маҳалла дар ноҳияи Кушониён шикоят моҳи октябр шикоят карданд, ки мақомот бо талаби баргардондани фарзандонашон аз хориҷа ва фиристодани онҳо ба артиш сими барқи чанд хонаро бурида, ба дари масҷидҳо қуфл задаанд. Дар ҳукумати ноҳия изҳори бехабарӣ карданд. Ҳуқуқдонҳо рафтори мансабдорони маҳаллиро хилофи қонун донистанд. Мақомот пайваста таъкид мекунанд, ки облава ё даъвати зӯроварона ба артиш вуҷуд надорад. Ин дар ҳолест, ки аз таҳқиқи шикоятҳои даъвати иҷборӣ ё сарбозшикор хабар дода намешавад.

Ба поён расидан ё идома кардани даъватро беш аз ҳама ҷавононе мепурсанд, ки ҳоло дар Русия ба сар мебаранд ва хостори бозгашт ба Тоҷикистонанд. Дар давраи байни даъватҳои баҳорӣ ва тиирамоҳӣ ҳазорон ҷавони синни хидмати ҳарбӣ ба Русия сафар мекунанд, то ба хидмати ҳарбӣ бурда нашаванд. Имрӯзҳо онҳо изҳори нигаронӣ мекунанд, ки бархе аз ҷавонони синни хидмати ҳарбӣ аз фурудгоҳҳо рост ба кумисариатҳои ҳарбӣ бурда мешаванд.

Бозии ниҳоии мусобиқа рӯзи 24-уми январ дар шаҳри Ҷидда, дар варзишгоҳи "Prince Abdullah Al Faisal Sports City Stadium" доир гардид. Ҷопониҳо бо ҳисоби 4:0 пирӯз шуданд. Косей Огура ду гол, Юто Озеки ва Рюноске Сато якголӣ заданд.

Мунтахаби Ҷопон унвони қаҳрамонии худро, ки ду сол пеш дар Қатар ба даст оварда буд, бо сарбаландӣ ҳифз намуд. Дарвоқеъ, ҷопониҳо бори сеюм Ҷоми қаҳрамониро ба даст оварданд. Қаблан онҳо солҳои 2016 ва 2024 бо медалҳои тилло сарфароз шуда буданд.

Барои ҷойи сеюм дастаҳои мунтахаби ҷавонони Ветнам ва Кореяи Ҷанубӣ рӯзи ҷумъаи 23-юми январ дар Ҷидда, дар варзишгоҳи "King Abdullah Sports City Hall Stadium" мубориза бурданд.

Замони асосӣ ва изофаи дидор бо ҳисоби мусовии 2:2 хотима ёфт. Дар задани силсилазарбаҳои пеналти кори футболбозони ҷавони Ветнам омад кард ва онҳо бо ҳисоби 7:6 пирӯз шуданд.

Ёдовар мешавем, дастаи мунтахаби ҷавонони то 23-солаи Тоҷикистон дар марҳилаи интихобии Ҷоми Осиё-2026 дар гурӯҳи “К”, ки аз 3-юм то 9-уми сентябри соли гузашта дар Варзишгоҳи марказии ҷумҳуриявии шаҳри Душанбе доир гардид, бар Непал бо ҳисоби 4:0 пирӯз шуда, аз Филиппину Сурия бо ҳисоби якхелаи 0:1 шикаст хӯрд. Тоҷикистон бо 3 имтиёз дар ин гурӯҳ ҷойи сеюмро гирифт ва аз ҳаққи иштирок дар қисми ниҳоии мусобиқа маҳрум гашт.

Ҷоми Осиё (U-23)

Бозӣ барои ҷойи сеюм, 23-юми январ (ҷумъа):

Ветнам – Кореяи Ҷанубӣ – 2:2 (7:6 – аз рӯйи пеналти)

Ҷидда, варзишгоҳи «King Abdullah Sports City Hall Stadium»

Финал, 24-уми январ (шанбе):

Ҷопон – Чин – 4:0

Голҳо: Юто Озеки, 12, Косей Огура, 20, Рюноске Сато, 59, Косей Огура, 76.

Ҷидда, варзишгоҳи "Prince Abdullah Al Faisal Sports City Stadium"

Додгоҳе дар Имороти Муттаҳидаи Арабӣ ҳашт шаҳрванди Узбекистонро барои ширкат дар як занозанӣ ба ҳабси абад маҳкум кард. Як узбекистонии дигарро ба 25 сол зиндон маҳкум карданд.

Аҳрор Бурҳонов, сухангӯи Вазорати корҳои хориҷии Узбекистон бо тасдиқи хабар гуфтааст, намояндагии дипломатии ин кишвар барои ҳимояи ҳуқуқи шаҳрвандон корҳои заруриро анҷом медиҳад.

Муноқиша, ки дар пайи он шаҳрвандони Узбекистон боздошт шуданд, моҳи апрели соли 2025 дар яке аз нуқтаҳои фурӯши сӯзишвории шаҳри Дубай рух дод.

Ба гуфтаи мақомоти тафтишоти Имороти Муттаҳидаи Арабӣ, дар ин занозанӣ ду шаҳрванди Узбекистон ҳалок шуданд. Ба гуфтаи додситонии Дубай, сабаби муноқиша хусумати пешина миёни ду гуруҳ буд.

Омори тозаи Вазорати фарҳанги Тоҷикистон нишон медиҳанд, ки соли гузашта теъдоди рӯзномаҳои мустақил дар кишвар боз ҳам камтар шудааст.

Тибқи иттилои ахири Вазорати фарҳанг, феълан дар кишвар 61 рӯзномаи мустақил чоп мешаванд, ки дар қиёс ба як соли пеш 7 адад камтар аст. Соли гузашта шумори нашрияҳои мустақил 68 адад буд.

Тибқи омори Вазорати фарҳанг,бархилофи нашрияҳои мустақил соли гузашта теъдоди ҳафтаномаҳои давлатӣ аз 130 ба 131 адад бештар шудааст.

Ба иттилои расмӣ, дар кишвар ҳамчунин 184 маҷалла (151 давлатӣ ва 33 мустақил), 97 матбаа (23 давлатӣ ва 74 мустақил) фаъолият мекунанд.

Сабабҳои аз чоп мондани 7 нашрияи мустақил маълум нест. Танҳо маълум аст, ки дар нимаи аввали соли 2025 газетаҳои "Фараж" ва "Самак" аз чоп монданд.

ИНЧУНИН, БИХОНЕД:

Нашрияи "Фараж" дигар чоп намешавад

Бар асоси раддабандиҳои созмонҳои ҷаҳонӣ, як омили аслии коҳиши расонаҳо дар Тоҷикистон, саркӯби озодии баён, рӯзноманигорон ва расонаҳо дар чанд соли ахир будааст. Аммо дар гузориши Вазорати фарҳанг дар бораи сабабҳои аз чоп мондани нашрияҳои мустақил чизе гуфта нашудааст.

Шӯрои ҳуқуқи башари Созмони Милали Муттаҳид рӯзи ҷумъаи 23-юми январ саркӯби норозиён дар ҷараёни эътирозҳои ахири Эронро маҳкум карда, хостори анҷоми "таҳқиқоти фаврӣ" дар ин бора шуд.

Комиссари олии ҳуқуқи башари СММ дар ибтидои нишаст эълом кард, ки дар ҷараёни саркӯби эътирозҳои Эрон "ҳазорон" нафар, аз ҷумла кӯдакон ҷони худро аз даст додаанд. Фолкер Турк, аз мақомҳои эронӣ хост, "аз тасмимҳои худ ақибнишинӣ карда ва ба саркӯби эътирозгарон поён диҳанд".

Дар ин нишасти Шӯрои ҳуқуқи башари СММ қатъномае қабул шуд, ки бар асоси он маъмурияти ҳайати таҳқиқи мустақил дар бораи нақзи ҳуқуқи башар дар Эрон ба муддати ду сол тамдид шуд.

Бар асоси ин қарор, гузоришгари вижаи ҳуқуқи башари Эрон низ ба муддати як соли дигар корашро давом медиҳад.

Даври аввали музокироти сеҷонибаи намояндагони Русия, Украина ва ИМА 23-юми январ дар шаҳри Абу Дабӣ ба анҷом расид.

Ба гузориши хабаргузории ТАСС, музокирот пурра паси дарҳои баста ва бидуни ҳузури хабарнигорон идома кард. "Ба эҳтимоли зиёд дар гуфтугӯҳои 24 январ низ ин тартиб идома ёбад", -гуфтаанд ҳамсуҳбатони ТАСС. Музокирот давоми ду рӯз идома меёбад.

Президенти Украина Владимир Зеленский хабар дод, ки дар ин музокирот роҳҳои хатми ҷанг баррасӣ мешавад ва "намояндагони Украина ҳар соат ба ӯ гузориш медиҳанд".

"Муҳим ин аст, ки Русия омода бошад ин ҷанги оғозкардаашро тамом кунад", - гуфтааст Зеленский.

Бо ин ҳол раиси ҷумҳури Украина мегӯяд, дар бораи хулосаи ниҳоии музокирот гуфтугӯ кардан ҳанӯз барвақт аст.

Намояндагони Кохи Сафед ба шабакаи NBC News гуфтаанд, вохӯрӣ "пурмаҳсул буд" ва "музокирот фардо идома мекунад”".

Ҳайати Русияро адмирал Игор Костюков ва ҳайати Украинаро котиби Шӯрои амният Рустам Умаров роҳбарӣ мекунанд. Стив Виткоф, фиристодаи вижаи президенти Амрико низ дар ин гуфтугӯ ширкат дорад. Пештар Владимир Зеленский гуфта буд, ки ояндаи Донбас аз мавзуъҳои калидии гуфтугӯ аст.

Қоҳир Расулзода, нахуствазири Тоҷикистон гуфтааст, ки соли 2025 дар кишвар барои тақрибан 100 000 муҳассил мактаб ва ё синфхонаҳои нав сохтаанд.

Дафтари матбуоти раёсати ҷумҳурӣ рӯзи 23-уми январ бо нашри баёнияе аз ҷараёни нишасти солонаи ҳукумат навиштааст: “Соли 2025 дар мамлакат 214 муассисаи таҳсилоти миёнаи умумӣ ва бинову синфхонаҳои иловагӣ барои 99 ҳазор хонанда сохта, ба истифода дода шуд.”

Дар Тоҷикистон, ки солона то 250 ҳазор тифл ба дунё меояд, норасоии мактабу кӯдакистон як мушкили ҷиддӣ боқӣ мемонад. Дар баъзе аз мактабҳои кишвар дар як синф бештар аз 40 нафар ҳам таҳсил мекунанд ва ҷойи нишаст низ барои иддае намерасад.

Низомномаи мактабҳои миёна шумораи ҳадди аксари хонандагонро дар як синф барои шаҳрҳо 25 донишомӯз муқаррар кардааст. Дар аксари мактабҳои Душанбе ин теъдод аз 30 боло буда ба 40-45 ва бештар аз он низ мерасад.

Раиси ҷумҳур Эмомалӣ Раҳмон дар гузашта гуфтааст, дар Тоҷикистон бояд ба ҳисоби миёна ҳар сол бояд зиёда аз 380 муассисаи таълимӣ бунёд шавад, то фарзандони мардум дар мактаб дуруст нишаста, дарс бихонанд.

Ҳоло дар Тоҷикистон 4056 муассисаи таҳсилоти миёнаи умумӣ фаъолият доранд. Айни замон бештар аз 250 мактаби ҳамагонӣ дар нимавайрон буда ва бинои 351 мактаби дигар ба таъмири асосӣ эҳтиёҷ доштаанд.

Мактабҳои Русия аз ҳафтаи оянда иттилоот дар бораи қабул ва ё ихроҷи фарзандони муҳоҷирони корӣ ва ҳам натиҷаҳои имтиҳони онҳо аз забони русиро ба вазорати умури дохилӣ месупоранд.

Дар ин бора Думаи давлатии Русия рӯзи 23-уми январ хабар дода гуфтааст, қонуне, ки вакилони мардумӣ дар ин бора тасвиб карданд, аз рӯзи 28-уми январ ҳукми иҷро мегирад.

Вячеслав Володин, раиси Думаи давлатӣ гуфтааст: “Системаи табодули ҳамзамони иттилоот дар бораи фарзандони муҳоҷир ва хонаводаҳои муҳоҷирон байни муассисаҳо ва идораҳои маориф ва вазорати умури дохилӣ, назорату сабти хориҷиёнеро, ки дар кишвари мо зиндагӣ мекунанд, босамар ва шаффофтар месозад.”

Ба гуфтаи ӯ, шеваи нави назорат, имкон медиҳад, ҳузури қонунии кӯдакону волидонашон дар Русия назорат ва риояти қонунҳо дар бораи муҳоҷират таъмин шавад.

Ҳангоми қабули ин қонун дар тобистони соли гузашта Михаил Матвеев, яке аз вакилони муҳоҷирситези Думаи давлатӣ аз ҷумла бо ишора ба бачаҳои муҳоҷирон гуфта буд: "Шашсад ҳазор дар марказҳои тиҷоратӣ ва кӯчаҳои мо дайдугӣ мекунанд, галла-галла мегарданд, ба кӯдакону калонсолон ҳамла мекунанд, майдончаҳои бозии кӯдаконро террор мекунанд.”

Қонуну қоидаҳои наву маҳдудкунандаи кору иқомати муҳоҷирон дар Русия сабаб шудааст, ки ҳазорон хонаводаи тоҷик фарзандони худро барои идомаи таҳсил ба Тоҷикистон фиристанд. Мақомоти Тоҷикистон мегӯяд аз миёни беш аз 5 ҳазор кӯдаке, ки дар 9 моҳи соли 2025 аз мактабҳои кишварҳои хориҷӣ ба Тоҷикистон оварда шудаанд, 70 дар садашон наврасоне ҳастанд, ки қаблан дар Русия таҳсил мекарданд.

Бегоҳи 22-юми январ дар шаҳри Маскав вохӯрии президенти Русия Владимир Путин бо Стив Виткоф, фиристодаи вижаи раиси ҷумҳури Амрико ва Ҷеред Кушнер, домоди Доналд Трамп баргузор шуд.

Ба гуфтаи Юрий Ушаков, ёвари раиси ҷумҳури Русия, натиҷаи асосии ин дидор тавофуқ дар бораи вохӯрии намояндагони Русия, ИМА ва Украина аст. Қарор аст ин мулоқот 23-юми январ дар шаҳри Абу Дабии Имороти Муттаҳидаи Арабӣ баргузор шавад.

Ба гузориши хабаргузории Ройтерс, Ушаков таъкид кардааст, ки сулҳи пойдор бидуни ҳалли масъалаҳои марзӣ ба даст намеояд.

Стив Виткоф рӯзи 22-юми январ дар ҳошияи дидори солонаи иқтисодии Давос дар Швейтсария гуфт, тарафҳо барои созиши оташбас дар Украина хеле наздик шудаанд.

Ба гуфтаи фиристодаи вижаи Трамп, танҳо як масъалаи ҳалношуда боқӣ мондааст. Ба эҳтимоли зиёд ин масъалаи сарзамин аст.

Бунгоҳи Boomberg ҳафтаи гузашта навишт, ки Виткоф ва Кушнер ба Путин нақшаи сулҳи ИМА-ро барои Украина пешниҳод мекунанд.

Додгоҳе дар вилояти Маскави Русия як зодаи Тоҷикистонро, ки ба куштани навраси рус муттаҳам аст, барои ду моҳ ба ҳабс гирифт. Дар ин бора додситонии вилояти Маскав хабар додааст.

Имомалӣ Турдиев, зодаи Тоҷикистон, ки шаҳрвандии Русияро дорад ба он муттаҳам мешавад, ки 18-уми январ баъди як муноқиша навраси 18-соларо русро бо корд ба ҳалокат расонд. Ҳодиса дар шаҳри Электростали вилояти Маскав рух дод.

Дар навор дида мешавад, ки миёни ду тараф дар дохили автобус баҳсҳои лафзӣ сар мешавад ва онҳо дар истгоҳи наздиктарин аз автобус пиёда шуда, занозанӣ мекунанд. Наврасон ба сӯи Имомалӣ аз туфанги шуълагиранда оташ кушодаанд. Ба гуфтаи мақомоти Русия, баъди ин зодаи Тоҷикистон бо корд се маротиба ба бадани навраси рус задааст.

Наздикони Имомалӣ ба расонаҳои русӣ гуфтаанд, ӯ танҳо аз занони дар дохили автобус буда ҳимоят кард.

Субҳи 23-юми январ дар шаҳри Душанбе ҷаласаи солонаи ҳукумати Тоҷикистон оғоз шуд.

Дафтари матбуоти президент гуфт, дар ҷаласа аъзои ҳукумат, раисони шаҳру ноҳияҳо, ширкатҳои давлатӣ, бонкҳо ва дигар мақомдорон ширкат доранд.

Хабарнигорони расонаҳои мустақил ба маҷлиси солона даъват нашудаанд.

Дар назар аст, ки дар ин ҷаласа аз кори ҳукумат дар соли 2025 натиҷагирӣ шуда, нақшаву барномаҳо барои соли 2026 баррасӣ шаванд.

Дар гузашта дар ҷараёни маҷлиси солонаи ҳукумат баъзе тағйироти кадрӣ сурат гирифта буд.

Шариф Назарзода, сардори Раёсати корҳои дохилӣ дар Хатлон дар ҳамоише дар шаҳри Кӯлоб аз сокинон хостааст, ки барои пешгирӣ аз кордкашии наврасон бо мақомоти интизомӣ ҳамкорӣ кунанд.

Даъвати генерал Назарзода аз сокинони Кӯлоб пас аз он аст, ки дар занозании гурӯҳии шаби 11-уми январ дар ин шаҳр Маҳмадалӣ Исуфов, размикори 19-сола кушта ва се ҳамсоли дигараш захмӣ шуданд. Мақомот Сулаймон Одинаев, сокини 19-солаи шаҳрро ба ин ҷиноят муттаҳам ва боздошт кардаанд.

Шариф Назарзода рӯзи 22-юми январ дар ҳамоиш акси размикор, боздоштшудаҳо ва афроди захмиро ба ҷавонони Кӯлоб намоиш дода, гуфтааст, кордзанӣ миёни наврасон, ифротгароӣ ва истеъмоли ҳабҳои мадҳушкунанда миёни ҷавонон аз мушкили аслӣ дар Кӯлоб аст.

Назарзода аз варзишгарон, мураббиёнашон ва дигар ҷавонони шаҳр хостааст, ки барои “пешгирии ҳамагуна зуҳуроту падидаҳои халалдоркунандаи тартиботу оромӣ саҳмгузор бошанд.”

Ба иттилои раёсати умури дохилии Хатлон, соли гузашта дар шаҳри Кӯлоб 719 ҷиноят сабт шудааст, ки нисбат ба солҳои гузашта бештар аст. Кӯлоб бо аҳолии беш аз 200 ҳазор нафар сеюмин шаҳри бузурги Тоҷикистон аст. Бархе сокинон сабаби аслии рӯ овардани ҷавонони шаҳр ба занозанӣ ва ифротгароиро бекорӣ медонанд.

Додгоҳи шаҳри Хуҷанд баррасии парвандаи занозании пурсарусадо дар тарабхонаи “Парламент”-и ин шаҳрро оғоз кардааст. Манобеи Радиои Озодӣ рӯзи 22-юми январ гуфтаанд, ки чаҳор нафар дар додгоҳ муҳокима мешаванд.

Ду нафар дар боздошт, ду тани дигар дар озодӣ будаанд. Парвандаи онҳо бар асоси кадом банди Кодекси ҷиноӣ муҳоқима мешавад, ҳанӯз маълум нест. Дар муноқиша дар ин ресторан дар рӯзи 20-уми декабри соли гузашта, наздикони сарвазири Тоҷикистон ва додситони шаҳри Бустон, ки писари мақомдори наздик ба президент аст, ширкат доштаанд.

Embed ба дигарон фиристед

Тафсилоти ҷанҷол дар "Парламент"-и Хуҷанд

Аз ҷониби Радиои Озодӣ

Embed ба дигарон фиристед

Нусхабардорӣ шуд

---

бар px баландӣ px

---

URL нусхабардорӣ шуд

Феълан кор намекунад

0:00 0:04:11 0:00

Линки мустақим

• 240p | 12,0MB
• 360p | 19,2MB
• 480p | 36,1MB
• 720p | 63,0MB
• 1080p | 102,3MB

Парвиз Ашӯров, домоди собиқи сарвазири Тоҷикистон бо писараш ва Абдуқаҳҳор Азизов, додситони шаҳри Бӯстон, писари Абдуҷаббор Азизӣ, ёвари собиқи Эмомалӣ Раҳмон, ду тарафи моҷаро ҳастанд. Наздикони ду тараф ҳамдигарро дар сар задани моҷаро гунаҳкор медонанд. Мақомот расман дар ин бора хабаре нашр накардаанд.

Пас аз чанд рӯзи нашри гузориш дар бораи ин муноқиша мақомот хабар доданд, ки Абдуқаҳҳор Азизов, додситони шаҳри Бӯстон аз мақомаш барканор шудааст. Дар шабакаҳои иҷтимоӣ наворҳои зиёде аз ин занозанӣ нашр шудааст, ки дар ҳар кадоми он ҷонибҳо тарафи дигареро сабаби сар задани муноқиша меноманд.

Фарзандони Маҳмурод Одинаев муовини раиси Ҳизби сотсиал-демократ иддао доранд, ки мақомоти зиндони Ваҳдат, падари маъюбашонро бесабаб ва як моҳ дар ҳуҷраи танбеҳӣ (ШИЗО) нигаҳ доштаанд.

Писараш Ҳабибулло Ризоев рӯзи 22-уми январ ба Радиои Озодӣ гуфт, ки падарашро чаҳор рӯз пештар аз ҳуҷраи танбеҳӣ ба утоқи маъмулии зиндон овардаанд. Ӯ афзуд, падараш дар сӯҳбати телефонӣ аз онҳо хостааст, ки ба сардори Раёсати маҳбасҳо дар вазорати адлия нома навишта пурсанд, ки сабаби ба ҳуҷраи танбеҳ бурдани ӯ чист. Ҳабибулло Ризоев афзуд:

«Мо дарак надоштем, ки падарам дар ҳуҷраи танбеҳ аст. Мунтазири мулоқоти навбатӣ будем. Падарам ҳафтаи гузашта занг зада, гуфт, як моҳ дар онҷо бо тани бемору мӯҳтоҷ ба табобат нигаҳ дошта шудааст. Як асобағал дошт, ҳоло ду асо гирифтааст ва бемориҳои дигараш хуруҷ кардаанд.»

Писари Маҳмурод Одинаев иддао кард, ки бо вуҷуди бемории падараш ва эҳтиёҷи сахт ба муолиҷа, мақомоти зиндон ба табобати ӯ дуруст аҳамият намедиҳанд ва муолиҷаи муносиб ҳам сурат намегирад.

Вале моҳи августи соли гузашта Музаффар Ашӯриён вазири адлия дар робита ба вазъи саломатии чеҳраҳои шинохтаи зиндонӣ гуфт, беморхонае, ки дар сохтори Сарраёсати иҷрои ҷазои ҷиноятӣ аст, ба ҳама маҳкумшудагон ёрии тиббӣ мерасонад. Ӯ афзуд: “Тамоми чораҳоро барои беҳтар кардан, даво бахшидани беморӣ меандешанд.”

Маҳмурод Одинаев, муовини раиси Ҳизби сотсиал-демократи Тоҷикистон, ки аз фаъолони шабакаҳои иҷтимоӣ буд ва ҳукуматро бо лаҳни тунде танқид мекард, рӯзи 28-уми январи соли 2021 ба 14 сол зиндон маҳкум карданд. Маҳмурод Одинаевро ба "авбошӣ" ва "даъвати оммавӣ барои бо роҳи зӯроварӣ тағйир додани сохти конститутсионии Тоҷикистон" гунаҳкор донистанд, агарӣ худаш гуфтааст, ки ин иттиҳомот асосе надоранд.

Баъзе соҳибкорони узбекистонӣ аз монеагузории мақомоти Тоҷикистон барои воридоти маҳсулоти сохтмонӣ шикоят кардаанд.

Намояндаи ширкати "Knauf" 17-уми январ дар нишасте бо ҳузури муовини нахуствазири Узбекистон аз он шикоят кард, ки сарфи назар аз пешниҳоди бастаи ҳуҷҷатҳо, гумруки Тоҷикистон маҳсулотро бо таъхир ҳуҷҷатгузорӣ мекунанд ва ин боис мешавад, ки арзиши молу коло 15 дарсад зиёд шавад.

Мақомоти Тоҷикистон, аз ҷумла Хадамоти гумрук дар ин бора изҳори назар накардаанд.

Ҷамшед Хоҷаев, муовини нахуствазири Узбекистон аз ин вазъ нигаронӣ карда гуфтааст, ки кишвараш чораҳои монандро барои воридоти молу маҳсулоти Тоҷикистон ҷорӣ хоҳад кард.

Тобистони соли 2025 Тоҷикистон барои нуриҳои минералии Узбекистон ва Узбекистон барои сементи Тоҷикистон боҷи гумрукӣ ҷорӣ кард.

Додугирифти Тоҷикистон ва Узбекистон баъди соли 2018 ва боз шудани марзҳо бамаротиб зиёд шуд.

Дар вилояти Самараи Русия кор кардани муҳоҷирон дар соҳаҳои боррасонӣ (курер), фурӯшанда, ронанда ва омӯзгориро манъ кардаанд.

Ба гузориши хабаргузории ТАСС, маҳдудияти нав аз моҳи апрели имсол иҷроӣ мешавад.

Бар асоси ин қарор, муҳоҷирон дар вилояти Самара дигар ҳақ надоранд, ки ҳамчун ронанда дар ҳама гуна нақлиёти ҷамъият кор кунанд. Бахши боррасонӣ ё курер, ки аз касбҳои даромаднок барои муҳоҷирон ба шумор меравад ҳам дар Самара барои муҳоҷирон манъ мешавад.

Волии вилоят ҳадаф аз манъи кори муҳоҷиронро дар чанд бахш "таъмини амнияти шаҳрвандон ва ҳифзи бозори меҳнати Самара" унвон кардааст.

Мақомоти Русия дар солҳои ахир маҳдудиятҳо барои муҳоҷирони кориро бештар карда, кор кардани шаҳрвандони хориҷиро дар чандин соҳаҳо манъ кардаанд.