Як созмони байнулмилалӣ хоҳони озодии рӯзноманигор Хуршед Фозилов шуд.

Кумитаи Дифоъ аз Журналистон (CPJ) рӯзи 17-уми март дар баёнияе аз мақомоти Тоҷикистон хост, ба таъқиби хабарнигорон хотима диҳанд.

Рӯзноманигор Хуршед Фозилов рӯзи 6-уми марти имсол аз тарафи маъмурони амниятӣ дар шаҳри Панҷакент дастгир шуд. Ҳоло дар Боздоштгоҳи Хуҷанд аст.

Мақомот расман сабаби боздошти ӯро нагуфтанд. Наздиконаш мегӯянд, ба ҷинояте гумонбар аст, ки аз 5 то 8 сол зиндонро дар назар дорад. Худаш напазируфтааст. Хешовандонаш туҳмат медонанд.

Гулноза Саид, ҳамоҳангсози барномаҳои Кумитаи Дифоъ аз Журналистон барои Аврупо ва Осиёи Марказӣ, рӯзи 17-уми март гуфт, "мақомоти Тоҷикистон бояд сабаби дақиқи боздошти Фозиловро фош кунанд ё ӯ ва рӯзноманигорони дигари зиндониро фавран озод намоянд."

Ишорааш ба ҳабси 7 рӯзноманигор ва блогер дар як соли охир дар Тоҷикистон аст. Шахсоне, ки ба қавли Гулноза Саид, додгоҳҳои Тоҷикистон "бе пешниҳоди ягон далели қобили таваҷҷуҳ" ба муҳлатҳои тӯлонии зиндон маҳкум карданд.

Хуршед Фозилов бештар бо расонаҳои мустақили маҳаллӣ ҳамкорӣ дошт ва дар мавзуъҳои иҷтимоӣ, бахусус мушкилоти мардум ва камбуди мақомот дар Панҷакент, менавишт. Дар шабакаҳои иҷтимоӣ низ фаъол буд.

Чанд сол пеш дар як барномаи телевизиони давлатии Тоҷикистон ӯро аз ҳамкорони сомонаи мустақили "Ахбор" номбар карда буданд.

37-сола аст, соҳиби се фарзанд.

Вазорати корҳои дохилии Тоҷикистон рӯзи 27-уми декабр бо нашри баёнияе гуфт, зани 48 солаи сокини Ҷайҳун нисбати келинаш "муносибати бераҳмонаро раво дида", ӯро пайваста латту кӯб ва таҳқир мекардааст. Ин ҳолат аз соли 2019 идома доштааст ва ба гуфтаи мақомот моҳи сентябри соли равон, арӯси хонавода ба ҷабру ситами хушдоман тоб наоварда, сирко хӯрда, худкушӣ кардааст. Назари хушдоман ва ҳам наздикони келин маълум нест. Дар бораи ҷузъиёти ҳодиса ва шавҳари арӯс ҳам иттилоъ дода нашудааст.

Бино ба навиштаи Вазорат, нисбати хушдоман бар асоси моддаи 109, қисми 1-и Кодекси ҷиноии Тоҷикистон, яъне барои "ба худкушӣ расондан" парвандаи ҷиноятӣ кушода шудааст ва таҳқиқи ҳодиса идома дорад.

Дар давоми 3-4 соли ахир дар Тоҷикистон дастикам 10 қазияи марги келину боздошти хушдоманҳо расонаӣ шудааст. Дар 7 ҳолат келинҳо дар хонаи шавҳар худкушӣ кардаанд ва дар марги онҳо хушдоманҳоро гунаҳкор дониста, аз панҷ то ҳафт сол зиндонӣ кардаанд. Ҳолатҳое ҳам ҳаст, ки дар марги хушдоманҳо келини онҳо айбдор дониста шудаанд.

ИНЧУНИН, БИХОНЕД:

Ҷанҷоли хушдоману келин кай тамом мешавад?

Соли 2021 Зархол Мустонова, сокини Турсунзодаро барои “ба худкушӣ расонидан”-и арӯси хонавода маҳкум ба зиндон карданд. Келини ӯ ҳам бо сирко худкушӣ кард. Хушдоман пас аз се соли адои ҷазо, дар соли 2024 ба озодӣ баромад.

Соли 2021 дар ноҳияи Файзобод занеро бо айни ҳамин гуноҳ ҳафт сол зиндонӣ карданд.

Ҷомеашиносон мегӯянд, дар бисёр хонаводаҳо қоидаи нонавиштаи бартарии хушдоман бар арӯс амал мекунад, ки ҳамсари писарро на ҳамчун узви комилҳуқуқи оила, балки як хидматгор мебинанд.

ИНЧУНИН, БИХОНЕД:

Зани 54-сола барои "ба худкушӣ расонидан"-и келин 5 сол зиндонӣ шуд

Дар Тоҷикистон солҳои ахир сӯиқасд ба худкушӣ ва ё мавридҳои худкушӣ зиёд шудаанд. Тибқи маълумоти Додситонии кулли Тоҷикистон, дар соли 2024 дар кишвар 259 нафар занону духтарон ба худкушӣ ва сӯиқасд ба он, даст задаанд.

Як таҳқиқи тозаи парвандаҳои худкушӣ дар кишвар нишон додааст, ки тақрибан 75 дарсади онҳое, ки касеро ба худкушӣ расондаанд, мардон мебошанд. 25 дарсади худкушиҳо бо айби занон рух медодаанд. Онҳо бо муносибати бераҳмона ва мунтазам паст задани шаъну эътибори инсон, сабаби қасди ҷони худ кардани касе, масалан, келини хонавода мешудаанд.

Аксаран ҳукмҳои қатл пинҳонӣ ва бидуни эълони расмӣ анҷом шудаанд. Аммо 10 нафарро дар мазҳари ом ва пеши чашми мардум қатл кардаанд.

Дар гузориш омадааст, ки мақомоти Эрон аксаран, онҳоеро ба қатл маҳкум карданд, ки ба куштор 47,55% ва ҷиноятҳои вобаста ба маводи мухаддир — 46,10%. айбдор буданд. Ҳукми қатл ҳамчунин бештар нисбати онҳое иҷро шудааст, ки ба таҷовуз, ҷиноятҳои зидди давлату амният, ҷиноёти иқтисодӣ ва фасод гунаҳкор шудаанд.

The Daily Telegraph бо истинод ба фаъолони эронӣ навиштааст, ки пас аз муноқишаи 12 – руза бо Исроил, мақомоти Эрон ҷазои ҳукми қатл ба шиддат афзоиш додаанд.

Дар гузашта Дидбони Ҳуқуқи Башар (Human Rights Watch) мақомоти Эронро танқид карда буд, ки аз ҳукми эъдом (қатл) ба унвони абзоре барои тарсондан ва саркӯби камшуморон ё ақаллияти қавмӣ, мухолифони сиёсӣ ва хориҷиҳо истифода мебарад.

Кохи Сафед то ҳанӯз дар ин бора расман хабар надодааст, вале дар барномаи кории рӯзонаи президент, мулоқоти ду раҳбар дар иёлати Флорида таъйин шудааст. Ҳадафи асосии ин гуфтугӯҳо дарёфти роҳҳои хатми ҷанги Русия дар Украина ва дастёбӣ ба як созишномаи сулҳ гуфта мешавад.

Зеленский баъд аз боздид аз Канада вориди ИМА шуд. Дар Канада президенти Украина бо нахуствазир Марк Карни мулоқот дошт ва ӯ дар ростои гуфтугӯҳои муҳим дар Амрико таъкид кард, ки кишвараш барои пуштибонӣ аз Украина омода аст.

Раисиҷумҳури Украина дар ростои мулоқоти сарнавиштсозаш бо Доналд Трамп, бо раҳбарони кишварҳои аврупоӣ мулоқоти телефонӣ дошт. Дар ин мулоқот Урсула фон дер Ляйен, раиси Комиссияи Аврупо, ба зарурати дастёбӣ ба "як сулҳи одилона ва пойдор, ки соҳибихтиёрӣ ва тамомияти арзии Украинаро комилан ҳифз кунад." таъкид кард.

Раҳбари Украина эълон кард, ки пас аз мулоқот бо Трамп вай дигарбора бо раҳбарони кишварҳои Аврупо гуфтугӯ хоҳад кард. Ӯ аз Ғарб даъват кард, то дар баробари Маскав аз мавқеи устувор кор бигиранд.

Айни замон, музокиракунандагони амрикоӣ, украинӣ ва аврупоӣ сари як тарҳи сулҳи иборат аз 20 банд кор мекунанд, ки ҳадафаш поён додан ба ҷанги Русия дар Украина аст. Ин тарҳ аз кафолатҳои амниятӣ барои Украина, бозсозии кишвар ва роҳҳои хатми ҷанг иборат аст.

Хабаргузории Bloomberg бо такя ба манобеи худ навишт, ки Маскав хоҳони ворид кардани тағйирот ба ин тарҳ аст.

Тибқи гузоришҳо, бомдоди 27 декабр таркишҳои сахте шаҳри Киев, пойтахти Украинаро ларзонд.

Ба гуфтаи мақомҳои маҳаллӣ, бар асари ҳамлаҳои мушакӣ ва паҳбодии Русия ба чандин минтақаи пойтахти Украина дастикам 11 захмӣ шуданд, ки 2 нафари онҳо кӯдакон мебошанд. Ин ҳамла ба биноҳои истиқоматӣ зарба задааст.

Артиши Украина эълон кард, ки Русия дар ин ҳамлаҳои шабона аз наздик ба 500 паҳбод ва ҳудуди 40 мушак истифода карда, зерсохторҳои энержӣ ва минтақаҳои ғайринизомиро ҳадаф қарор додааст.

Дар пайи ҳамлаҳои паҳбодӣ ва мушакии Русия дар бомдоди шанбе, аз се як ҳиссаи шаҳри Киев дар сармои зимистон бе гармӣ ва барқ монд ва дастикам 11 захмӣ шуданд.

Владимир Зеленский, раисҷумҳури Украина ин ҳамлаҳоро нишонае аз "идомаи сиёсатҳои вайронгарони Маскав" донист ва хостори афзоиши фишори Амрико ва Аврупо бар Русия шуд.

Дар як соли ахир дар Қазоқистон шумораи рекордии шаҳрвандон барои пайвастан ба артиш ё қисмҳои низомии Русия ба ҷавобгарӣ кашида шудаанд.

Хабарнигорони "Медиазона" ва тарҳи “Алвидоъ силоҳ" ё "Прошай, оружие"маълум кардаанд, ки соли равон нисбати 700 қазоқистони парвандаи ҷиноятӣ боз шудааст.

Онҳо бо ду моддаи Кодекси ҷиноии Қазоқистон, барои зархаридӣ ва ширкат дар амалиёти ҷангии кишвари хориҷӣ айбдор мешаванд. Қонун барои зархаридӣ ва иштирок дар амалиётҳои ҷангии хориҷӣ аз 9 сол зиндон то ҳабси абадро пешбинӣ мекунад.

Ба навиштаи муҳаққиқон, шумори афроде, ки ба ҷавобгарӣ кашида мешаванд, пас аз нашри тарҳи украинии "Хочу жить" зиёд шуд. Ин тарҳ шумора ва маълумоти тамоми зархаридонеро, ки дар Украина аз тарафи Русия меҷанганд, нашр карда буд.

Ба ин тартиб, соли 2024 дар Қазоқистон барои зархариди ва ширкат дар ҷанги бегона ҳамагӣ 170 парвандаи ҷиноятӣ боз шуда буд ва соли 2025 ин омор ба 705 баробар шуд.

Қазоқистон расман дар мавриди ҳамлаи Русия ба Украина мавқеи бетарафонаро интихоб кардааст, вале мақомоти қудратии ин кишвар бар инанд, ки ҷалби шаҳрвандон ба ҷанги бегона, барои амнияти миллӣ хатар дорад.

Зимнан, қонунҳои Тоҷикистон ҳам ширкати шаҳрвандон дар ҷангҳои бегонаро манъ мекунад, аммо то ҳанӯз ягон зодаи ин кишвар барои иштирок дар ҷанги Украина ба ҷавобгарӣ кашида нашудааст.

Бо вуҷуди гузоришҳои батакрор дар бораи ҳузури зодагони Тоҷикистон дар ҷанги Русия дар Украина ва куштаву захмӣ шудан ва асир уфтодани теъдоде аз онҳо, мақомот дар Душанбе ягон иттилоъ намедиҳанд. Биноан, шумораи дақиқи онҳо маълум нест.

Барномаи давлатии "Зистан мехоҳам" дар Украина дар се рӯйхат номи тақрибан ду ҳазор зодаи Тоҷикистонро ҷамъ овардааст, ки аз тарафи Русия дар ҷанг ширкат карда, қисме аз онҳо кушта шудаанд.

Муаллифони ҳамин рӯйхат пешниҳоди шаҳрвандии Русия ва тақдими миллионҳо рублро аз тарзҳои ҷалби шаҳрвандони Осиёи Марказӣ, аз ҷумла Тоҷикистон ба артиши Русия медонанд.

Хабаргузории расмии Сурия гузориш дод, ки рӯзи 26 декабр дар пайи як таркиш дар масҷиди "Имом Алӣ" дар вилояти Ҳимс, дастикам 8 тан кушта ва 20 тани дигар захмӣ шудаанд.

Шоҳидони айнӣ гуфтаанд, ки ин таркиш ҳангоми намози ҷумъа замоне рух дод, ки масҷид пур аз намозгузорон будааст.

Ин ҳодиса дар минтақае рух дод, ки бештари сокинони онро ақалиятҳои алавӣ ва шиаи Сурия ташкил медиҳанд.

Як мақоми амниятӣ дар Ҳимс, ки нахост номаш ошкор шавад, ба хабаргузории "Франс пресс" гуфтааст, ки эҳтимолан маводи тарканда дар дохили масҷид ҷобаҷо шуда будааст.

Дидбони ҳуқуқи башари Сурия қароргоҳаш дар Бритониё низ эълон кардааст, ки то ҳанӯз маълум нест ин рухдод ҳамлаи интиҳорӣ будааст ё дар натиҷаи таркиши маводи таркандаи аз пеш ҷобаҷошуда рух додааст.

Аксу видеоҳои нашршуда аз сӯи хабаргузории расмии Сурия хисороти густурдаи дохили масҷид, сӯрохи бузурге дар бахше аз девор, дуди сиёҳ дар дохили масҷид, фаршҳо ва китобҳои рӯи замин афтодаро нишон медиҳад.

Дар ҳамин ҳол, расонаҳои арабӣ гузориш додаанд, ки як гурӯҳи мусаллаҳ ба номи "Катоиби ансори сунат" масъулияти ин таркишро ба ӯҳда гирифтааст.

Ин гурӯҳ, ки чанд пеш аз мавҷудияти худ хабар дод, гуфта буд, ки ҳадафи ҳамлаҳои онҳо "нобудии комили шиаиён ва алавиён дар Сурия, ё водор сохтани онҳо ба муҳоҷират ба кишварҳои дигар" аст.

Ин гурӯҳ ҳамчунин масъулияти таркиши калисое дар Димишқ дар чанд моҳи пешро ба ӯҳда гирифта буд. Дар ин таркиш дастикам 22 тан кушта шуданд.

Пас аз поёни қудрати Башор Асад, раисҷумҳури пешини Сурия дар поёни соли 2024, ки худ алавӣ буд, гузоришҳое аз одарабоӣ ва қатли аъзои ин ақалияти мазҳабӣ нашр шудааст.

Дар Шаҳритус ду бародарро бо гумони қатли бародари калониашон боздошт кардаанд. Ҳодиса рӯзи 23 декабр дар пайи як муноқишаи хонаводагӣ байни бародарон рух додааст.

Вазорати корҳои дохилӣ рӯзи 25 декабр бо нашри баёнияе гуфт, бародарон, сокинони 35,38 ва 40-солаи Шаҳритус ҳангоми ҷамъоварии ҳезум ва дар ҳолати сархушӣ бо ҳам ҷанҷол карда, дар натиҷа ду нафар бародари калониро латукуб ва қатл мекунанд.

Ба иттилои вазорат, гумонбарон пайкари бародари худро аввал дар ҷойи ҳодиса зери хок карда, қасд доштанд шабона пинҳонӣ ҷасадро оварда дар ҳавлии худ гӯронанд.

Вале ҳарду боздошт шудаанд ва нисбати онҳо бар асоси моддаи 104, қисми 2-и Кодекси ҷиноятии Тоҷикистон (куштор бо бераҳмии махсус), парвандаи ҷиноӣ боз шудааст. Қонун барои ин амал аз 15 то 25 сол зиндонро пешбинӣ мекунад.

Ин бори аввал нест, ки ҷанҷолҳои хонаводагӣ дар кишвар бо фоҷеа ва ҳодисаҳои мудҳиш анҷом меёбад.

Хабарҳо дар бораи қатли як узви хонавода бо дасти шахси наздикаш пайваста расонаӣ мешавад.

Дар Тоҷикистон, ки сокинонаш аз норасоии барқ ранҷ мекашанд ва барои ҳалли ин мушкил роҳҳои гуногунро таҷриба мекунанд, воридоти панелҳои офтобиро аз пардохти боҷи гумрукӣ ё андоз аз арзиши иловашуда, озод карданд.

Бар асоси тағйирот ба Кодекси андоз, ки рӯзи 17 декабр порлумони Тоҷикистон қабул кард, барои овардани панелҳои отфобӣ то якуми январи соли 2031 боҷи гумрукӣ гирифта намешавад. Дар ин бора хабаргузории давлатии "Ховар" бо такя ба Кумитаи андоз хабар додааст.

Ба гуфтаи масъулини ин ниҳод, имтиёз бо ҳадафи ҳавасмандсозӣ ва фароҳам овардани шароити мусоид барои истифода аз панелҳои офтобӣ ва қисмҳои эҳтиётии он пешбинӣ шудааст.

Ҳамзамон бо ин, тибқи Кодекси андоз ба заминҳое ҳам, ки дар он таҷҳизоти тавлидкунандаи барқ истифода ва насб мешавад, сабукӣ дода мешавад. Яъне, соҳибони чунин заминҳо барои 5 сол аз пардохти андози замин озод карда мешаванд.

Пешниҳоди имтиёз барои овардани панелҳои офтобӣ дар Тоҷикистон дар ҳолест, ки сокинон кишвар дар фасли сармо ба камбуди шадиди барқ гирифторанд ва истифода аз нерӯи офтоб як роҳи халосӣ аз бебарқӣ дониста мешавад.

Вале ба гуфтаи сокинон, харидории панелҳои офтобӣ ва пайвасташавӣ ба нерӯи офтобӣ ҳоло хароҷоти зиёд дорад ва на ҳама имкони дастрасӣ ба онро доранд.

Ҳоло дар кишвар низоми ҳатмии насб кардани панелҳои офтобӣ дар бинову сохтмонҳои нав амал мекунад ва пеш аз ҳама ин талабот мактабу беморхона ва баландошёнаҳоро дар назар дорад.

Сергей Собянин, шаҳрдори Маскав, дар як моҳи охир бори дуюм ба зарурати нерӯи муҳоҷирон дар пойтахти Русия таъкид кард.

Изҳороти аввали ӯ дар оғози моҳи декабр дар мусоҳиба бо шабакаҳои телевизиони Русия садо дод. Собянин дафъаи дувум рӯзи 24-уми декабр дар Думаи шаҳри Маскав гуфт, пойтахти Русия ба 500 ҳазор коргар ниёз дорад ва инро мешавад фақат аз ҳисоби муҳоҷирони корӣ пур кард.

Вай, ки ин суханҳоро дар ҷараёни гузоришдиҳии солонааш дар баробари Думаи шаҳри Маскав баён мекард, гуфт, даст кашидан аз нерӯи муҳоҷирон мизони таваррумро боло мебарад ва дар натиҷа, иқтисоди Русия осеб мебинад.

Шаҳрдори Маскав афзуд, "ин мавзӯи ҷиддӣ аст, бо ин соҳа бозӣ кардану ба авомгарӣ ё популизм машғул шудан мумкин нест.” Ва илова кард, ки мушкилот дар соҳаи муҳоҷират бо ҳуҷуму амалиёт ҳал намешавад.

Ба иттилои Сергей Собянин, муҳоҷирон 5-6 дарсади Маҷмӯи маҳсулоти дохилиро таъмин мекунанд: “Бешубҳа, агар бе муҳоҷирон корро буд мекардем, олӣ буд. Вазъи демографӣ ва иқтисод, мутаассифона, қоидаҳои дигареро ба мо бор мекунанд. Имрӯз ҷойҳои холии кор аз 400 то 500 ҳазорро ташкил медиҳанд. Ҳатто агар иқтисод ба ҳолати беҳтаре баргардад, омор иваз намешавад.”

Сергей Собянин, инчунин, дар мавриди сахттар шудани қоидаҳои муҳоҷират сухан гуфт. Ба иттилои ӯ, дар натиҷаи тафтиши санадҳои биометрии муҳоҷирон дар фурудгоҳҳои пойтахти Русия 45 ҳазор муҳоҷир аз санҷиш нагузаштаанд.

Ӯ гуфт, беш аз як миллион хориҷӣ замимаи “Амина”-ро дар телефон насб кардаанд, ки дастрасиро ба маълумот дар бораи ҷои ҷамъшавӣ ва зиндагии муҳоҷирон осонтар мегардонад. Ин ҳама чораҳо, ба гуфтаи шаҳрдори Маскав, барои танзими соҳаи муҳоҷират имкон фароҳам кардааст. Чизе, ки муҳоҷирон сахтгирона, маҳдудкунанд ва ё поймоли ҳуқуқи худ медонанд.

Embed ба дигарон фиристед

Ҳимояти дубораи Собянин аз ҳузури муҳоҷирон дар Маскав

Аз ҷониби Радиои Озодӣ

Embed ба дигарон фиристед

Нусхабардорӣ шуд

---

бар px баландӣ px

---

URL нусхабардорӣ шуд

Феълан кор намекунад

0:00 0:02:03 0:00

Икромиддин Сареъ, фармондеҳи пулиси вилоятҳои Тахор ва Бағлон дар замони ҳукумати пешини Афғонистон ва аз чеҳраҳои мухолифи ҳукумати "Толибон", шаби 24-уми декабр бар асари тирандозӣ дар назди дафтари кориаш дар пойтахти Эрон кушта шуд.

Манбаъҳои наздик ба ӯ ва Ҷабҳаи муқовимати миллии Афғонистон гуфтанд, ки дар ин ҳодиса Икромиддин Сареъ ва яке аз ҳамроҳонаш кушта шуда, як нафари дигар захмӣ гаштааст.

Генерал Сареъ пас аз сарнагунии низоми пешини Афғонистон ва ба сари қудрат омадани "Толибон" ба Эрон рафт ва дар онҷо барои низомиёни пешин додхоҳӣ мекард.

Алӣ Майсам Назарӣ, сухангӯи Ҷабҳаи муқовимати миллии Афғонистон, ҳукумати "Толибон"-ро муттаҳам ба террори ӯ кардааст. Ҳукумати "Толибон" то ба ҳол дар ин бора изҳори назар накардааст.

Баъзе аз мақомҳои ҳукумати пешини Афғонистон ва ҷабҳаҳои мухолифи "Толибон" қатли ин фармондеҳи собиқи пулисро маҳкум карда, аз ҳукумати Эрон хостаанд, ки дар ин бора таҳқиқ ва омилони онро шиносоӣ кунанд.

Ҳукумати Эрон то ҳол дар ин бора ба расонаҳо чизе нагуфтааст.

Дар чанд моҳи охир ин дувумин чеҳраи мухолифи "Толибон" аст, ки дар Эрон террор мешавад.

Чаҳор моҳ пеш Маъруф Ғуломӣ, яке аз фармондеҳони ҷиҳодӣ низ дар шаҳри Машҳад боз зарби гулӯлаи афроди мусаллаҳ кушта шуда буд.

Дар шаҳри Душанбе дар назди ширкатҳои сохтмонӣ ё нуқтаҳои фурӯши биноҳои нави истиқоматӣ "QR код"-ҳои махсусро насб мекунанд, ки ба гуфтаи мақомот аз ҳолатҳои фиреб хӯрдани муштариён зимни хонахарӣ пешгирӣ мекардааст. Дар ин бора Раёсати корҳои дохилии Душанбе рӯзи 24-уми декабр хабар дод.

Насби "QR код"-ро дар назди сохтмони биноҳои нави истиқоматӣ, Сарраёсати меъморӣ ва шаҳрсозии Душанбе оғоз кардааст ва ба гуфтаи мақомот, бо ин роҳ харидор қабл аз харид ё бастани шартнома бо ширкати сохтмонӣ метавонад дар бораи сохтмон маълумоти заруриро пайдо кунад ва бисанҷад.

Яъне, бо нусхагирии "QR код" ё рамзи насбшуда тавассути телефони худ харидор имкон доранд бубинад, ки оё ширкат санади расмӣ, мисли қарори лоиҳакашӣ, шиносномаи бино ё қарори иҷозаи сохтмонро дорад ё на.

Ба гуфтаи мақомот, ин иқдом бо дастури шаҳрдорӣ ва ба хотири пешгирӣ аз хатарҳо ҳангоми хонахарӣ роҳандозӣ шудааст.

Солҳои ахир бо зиёд шудани сохтмони биноҳои дар пойтахт, баҳсу шикоятҳо низ аз кори ширкатҳои хонасоз, ҳолатҳои фиреб хӯрдани муштариён ва ё фурӯхта шудани як хона ба чанд нафар бештар шудааст.

Тоҷикистон дар сарҳад бо Афғонистон, ки дар як моҳи охир шоҳиди дастикам ду ҳамла ва куштаву захмӣ шудани даҳ коргар аз Чин буд, чор дидбонгоҳи навро ба истифода додааст.

Вебсайти президент навишт, ки раисҷумҳур Эмомалӣ Раҳмон рӯзи 24-уми декабр дар ин маросим ба таври маҷозӣ ё онлайн ширкат кард.

Ба нигоштаи манбаъ, дидбонгоҳҳои сарҳадӣ дар минтақаи баландкӯҳ ва душворгузари сарҳад бо Афғонистон бори аввал сохта шудаанд. Минтақаҳое, ки қаблан ба таври зарурӣ муҳофизат намешудааст.

“Барои фаъолияти бемонеаи онҳо ба масофаи зиёда аз 70 километр роҳи нави мошингузар бунёд ёфта, дигар инфрасохтори ёрирасон низ фароҳам оварда шуд,” – гуфта шудааст дар хабар.

Солҳои охир, ба иттилои расмӣ, 80 дидбонгоҳи марзӣ сохта шуда, дар бунёди баъзе аз онҳо созмону кишварҳои гуногун саҳм гирифтаанд.

Дар ҳамин рӯз як майдони тонкронӣ дар тамрингоҳи Ҳарбмайдон низ фаъол шуд. Ҳарбмайдон дар наздикии сарҳад бо Афғонистон ҷойгир аст.

Тоҷикистон бо Афғонистон тақрибан 1400 километр марз дорад. Бо вуҷуди ваъдаҳои "Толибон" дар бораи истифода нашудани хоки Афғонистон аз сӯи гурӯҳҳои террористӣ, мақомоти тоҷик аз он тарафи марз нигаронӣ доранд. Ҷое, ки ба гуфтаашон қочоқчиёни маводи мухаддир ва ҷангҷӯён камин гирифтаанд.

Дар натиҷаи фурӯ рехтани теппаи азиме дар як маҳалли заршӯӣ дар ноҳияи Шамсиддини Шоҳин 2 нафар ҳалок шудаанд.

Манобеи огоҳ аз ҳодиса рӯзи 24-уми декабр ба Радиои Озодӣ гуфтанд, ки фалокат 20-уми декабр ҳангоми кор дар маҳалли Сари Ғор рух додааст. Дар онҷо чанд ширкат машғули заршӯӣ ҳастанд.

Як корбар низ видеоро ба Радиои Озодӣ фиристод ва ҳодисаро тасвир кард.

Бино ба гузоришҳо, чанд рӯз пештар аз ин ҳодиса дар маҳалли Шугнов дар ноҳияи Ховалинг, яке аз маҳалҳои бузурги заршӯӣ низ як нафар зери хок монда ҷон додааст.

Риоя накардани меъёрҳои амниятӣ ва беэҳтиётӣ ҳангоми корро яке аз сабабҳои асосии ҳалокати коргарон дар Тоҷикистон медонанд. Соли гузашта дар корхонаҳои саноатӣ ва истихроҷи маъдан 30 нафар кушта ва 26 каси дигар захмӣ шудаанд.

Як додгоҳи сайёр ҳафт занро аз ҷамоати Язгуломи ноҳияи Ванҷ ҷазо додааст.

Ҳукумати ноҳияи Ванҷ рӯзи 24-уми декабр дар саҳифааш дар Фейсбук хабар дод, ки онҳо ба "таълими ғайрирасмии динӣ" гунаҳкор ва аз кардаашон "пушаймон" ҳастанд.

Мавқеи занон маълум нест.

Дар аксҳое, ки мақомот нашр карданд, онҳо бо сари хам ва дар ҳузури як гурӯҳ аз сокинони ҷамоати Язгулом, муовини раиси ноҳияи Ванҷ, сардорони шуъбаҳои амнияту корҳои дохилӣ, додситон ва намояндаҳои дигари мақомоти қудратӣ тасвир ёфтаанд.

Додгоҳи сайёр занҳоро, ки ному насабашон ифшо нашудааст, бар асоси моддаи 474-и Кодекси ҳуқуқвайронкунии маъмурии Тоҷикистон ҷарима бастааст. Ин банди қонун аз 1125 то 1500 сомонӣ ҷаримаро пешбинӣ мекунад.

Шонздаҳ сол боз дар Тоҷикистон гирифтани таълими динӣ танҳо дар назди волидон ва ё муассисаҳои расмӣ, ба мисли Донишкадаи исломӣ иҷозат аст.

Созмонҳои ҳомии ҳуқуқ ҳамвора мақомоти Тоҷикистонро барои маҳдуд кардани озодиҳои динӣ танқид мекунанд. Намояндагони Кумитаи дин гуфтаанд, озодиҳои мазҳабӣ дар кишвар таъмин аст.

Ҷамояти Язгулом дар ноҳияи Ванҷ чанд соли охир дар пайванд ба боздошти сокинони он бо иттиҳоми ифротгароӣ дар сархати расонаҳо қарор дорад.

Ҳафтаи гузашта Қорӣ Зоҳид (Қувватов), сокини 30-солаи деҳаи Жамаки Язгулом, бо иттиҳоми ҳамкорӣ бо созмонҳои ифротгаро 5 сол зиндонӣ шуд. Аз ин пештар наздик ба 27 сокини ин ҷамоат боздошт ва бархеи онҳо ба солҳои гуногуни зиндон маҳкум гаштанд.

Дар Тоҷикистон аз ин пас барои шикори бабри барфӣ, як ҷонвари зебои нодир дар кишвар, мумкин аст, гунаҳкорро то ба 8 сол зиндон маҳкум кунанд.

Бабр, ё паланги барфӣ, ки онро паланги осиёимиёнаӣ меноманд, дар кӯҳистонҳои Помир дар Тоҷикистон сукунат дорад ва ҷонвари дар вартаи нобудӣ аст.

Дар Кодекси ислоҳшудаи ҷиноӣ, ки раисҷумҳур Эмомалӣ Раҳмон рӯзи 17-уми декабр имзо кардааст, барои фурӯхтани паланги барфӣ ҳам ҷазо таъйин шудааст.

Бар асоси Кодекси пешинаи ҷиноӣ барои шикору куштани ин ҷонвари зебо аз 3 то ба 5 сол ҷазо медоданд. Бар асоси санади нав, барои шикору куштану фурӯхтани бабрӣ барфӣ аз соли оянда ҷаримаҳои бузурги то 220 000 сомонӣ ва 8 сол зиндон пешбинӣ шудааст.

Дар Тоҷикистон теъдоди бабри барфӣ, ё осиёмиёнаӣ андаке афзуда, аз марзи 500 сар гузаштааст.

Агарчӣ то кунун гузорише дар бораи шикори бабри барфӣ дар Тоҷикистон нарасидааст, ҳамлаи онҳо ба чорвои мардум дар Бадахшон ва видеоҳои дастгиру озор додани онҳо дида шудааст.

Танг кардани муҳити зисти ин ҷонваронро, ки фақат дар 12 кишвар боқӣ мондаанд, як сабаби барои шикор ба хонаҳои мардум омадани онҳо медонанд.