Дар чанд ҷумла
Ду устоди донишгоҳи Хуҷанд боздошт шудаанд
Ду мақомдори Донишгоҳи давлатии Хуҷандро бо гумони гирифтани пора боздошт кардаанд.
Дафтари матбуоти Раёсати Вазорати корҳои дохилӣ дар вилояти Суғд бо нашри гузориши видеоӣ рӯзи 21-уми май аз боздошти Иброҳим Ҷабборзода ва Нуралӣ Шукуров декан ва муовини декани факултаи таърих ва ҳуқуқи Донишгоҳи Давлатии Хуҷанд ба номи Ғафуров хабар дод.
Ба иттилои ин ниҳод, ду мақомдори донишгоҳ барои мондани баҳо аз як донишҷӯйи соли сеюми ихтисоси таърих, ки шаҳрванди хориҷӣ будааст, пора талаб кардаанд. "Дар пайи шикояти донишҷӯ рӯзи дуюми май додситонӣ ва раёсати корҳои дохилӣ дар Суғд муовини декани факултаро ҳангоми гирифтани 1500 сомонӣ боздошт кардаанд,"-- омадааст дар гузориш.
Назар ва мавқеи омӯзгорони боздоштшуда маълум нест.
Нисбати ҳарду мақомдори Донишгоҳ, бо модаи 319-и Кодекси ҷиноӣ, яъне гирифтани "ришва" парванда боз шуда, онҳо дар ҳабси пешакӣ қарор доштаанд.
Шикоят аз ришваситонӣ дар мактабҳои олии Тоҷикистон кам нест. Аз кори мақомот ҳам дар амри ҷилавгирӣ аз фасод танқид садо медиҳад, ки бештар омӯзгорону пизишконро боздошт мекунанд ва аз фасодкории афроди баландпоя чашмпӯшӣ мекунанд.
Созмонҳои байналмилал дар гузоришҳои худ мизони фасод дар Тоҷикистонро баланд арзёбӣ кардаанд. Соли гузашта, Созмони Шаффофияти Байналмилал дар гузориши худ гуфта буд, фасод дар Тоҷикистон ба як “расм” табдил шудааст.
Ҳамаи хабарҳои имрӯзро дар инҷо бихонед
Ду шаҳрванди Тоҷикистонро дар Амрико ба ғорати банкоматҳо муттаҳам кардаанд
Пулиси ноҳияи Линколн дар Каролинаи Шимолии Амрико ду шаҳрванди Тоҷикистонро ба ғорати банкоматҳо аз роҳи ҳамлаи сайберӣ (киберӣ) айбдор кардааст.
Расонаҳои Амрико аз қавли пулис хабар доданд, ки як шаҳрванди Тоҷикистон боздошт шуда, дигаре бо як шарики эронияш дар ҷустуҷӯ қарор дорад.
Ба иттилои пулис, Нурмуҳаммад Раҳмонзодаи 26-сола ва Фирдавс Раҷабови 35-сола ҳамроҳи Милод Аваздавонии 36-сола, зодаи Эрон, дар моҳи феврали имсол ва пас аз ҳамлаи киберӣ аз банкоматҳои фурӯшгоҳе зиёда аз даҳ ҳазор доллар рабудаанд.
Пулис гуфтааст, замоне аз ҳодиса огоҳ шуд, ки рӯзи 21-уми феврали имсол дар аёлати Мэйн ба банкоматҳои фурӯшгоҳҳои маҳаллӣ ҳамлаи густардаи киберӣ сурат гирифт. Ин навъи ғоратгариро "ATM jackpotting" меномидаанд, ки бо анҷоми ҳамлаи киберӣ сохтори банкоматро вайрон карда, онро маҷбур мекунанд, то пулҳоро ба берун барорад.
Пулис гуфтааст, Нурмуҳаммад Раҳмонзодаро, ки бо ному насаби сохта дар Амрико ба сар мебурд, моҳе пас аз ҳодиса дар Каролинаи Ҷанубӣ боздошт карданд, вале Фирдавс Раҷабов ва шарики эронии ӯ, Милод Аваздавонӣ, дар ҷустуҷӯ қарор доранд.
Мақомоти Амрико онҳоро ба дуздӣ ва ташкили гурӯҳи ҷиноӣ муттаҳам медонанд.
Назари пайвандон ва вакилони дифои ин афрод маълум нест, вале пулис бо нашри акси Фирдавс Раҷабов ва шарики эрониаш аз сокинон хостааст, ҳангоми дидани онҳо ба мақомот хабар диҳанд.
Дар Иёлоти Муттаҳидаи Амрико, бино бар маълумоти гуногун, аз 10 то 16 ҳазор зодаи Тоҷикистон зиндагӣ карда, асосан дар бахши тиҷорату нақлиёт ва хидматрасонӣ фаъоланд. Солҳои охир чанде аз онҳо бо иттиҳомҳои гуногун, аз ҷумла озори ҳамсар, поймоли қоидаи будубош ва пайравӣ аз созмонҳои мамнӯи ифротгароӣ дастгир ва бархе аз ҳудуди Амрико ронда шудаанд.
Трамп аз Би-би-сӣ як миллиард доллар товон талаб кард
Доналд Трамп, раисҷумҳури Амрико, барои баргардондани шаъну шараф ва обрӯи худ хостори як миллиард доллар товон аз шабакаи хабарии Би-би-сӣ шудааст.
Би-би-сӣ муттаҳам шудааст, ки суханони Доналд Трампро пеш аз ҳодисаи юриши мардум ба бинои Конгресс дар моҳи январи соли 2021 ба таври нодуруст нашр кардааст.
Вакилони Трамп то рӯзи ҷумъа мӯҳлат додаанд, ки Би-би-сӣ мустанади нашршударо ҳазф кунад, маъзарат бихоҳад ва ба хотири латма задан ба обрӯи президенти Амрико товони муносибе бипардозад.
Дар пайи ин ҷанҷол, раиси умумии Би-би-сӣ ва раиси бахши нашароти ин шабака истеъфо доданд.
Дар таркиш дар шаҳри Деҳлӣ 10 кас ҷон бохт
Дар пайи таркиши як мошин дар шаҳри Деҳлӣ, пойтахти Ҳиндустон, даҳ кас кушта ва беш аз сӣ тани дигар захмӣ шуданд.
Ин ҳодиса шоми душанбе дар як минтақаи сераҳолӣ дар наздикии "Қалъаи Сурх" рух додааст.
Тибқи гузоришҳо, ин таркиш ба одамон ва мошинҳои зиёде осеб расонидааст.
Мансабдорони Ҳиндустон гуфтаанд, ки таҳқиқоти худро дар мавриди ин ҳодиса оғоз карданд.
Сабабҳои ҳодиса маълум нест.
Вазири корҳои дохилии Ҳинд гуфт, онҳо дар ҳоли баррасии "ҳамаи эҳтимолҳо" ҳастанд.
Дар Бағдод масъалаи бозгардонии тоҷикҳо аз маҳбасҳои Ироқ баҳс шуд
Мақомоти тоҷик масъалаи бозгардонидани шаҳрвандони Тоҷикистон аз зиндонҳои Ироқро бо ҳамтоёни ироқии худ баррасӣ кардаанд.
Хабаргузории давлатии "Ховар" рӯзи 10 уми ноябр навишт, ки дар мулоқоти ҳайати Тоҷикистон бо вазири адлияи Ироқ дар Бағдод, вазъи он шаҳрвандони Тоҷикистон, ки дар маҳбасҳои Ироқ нигаҳдорӣ мешаванд ва мавзӯи овардани онҳо ба кишвар, матраҳ шудааст.
Ҳайати Тоҷикистон бо раҳбарии Котиби Шӯрои амният Юсуф Раҳмон зимни ин сафар ҳамчунин бо президенти Ироқ Абдул Латиф Рашид масъалаи таҳкими ҳамкорӣ миёни ду кишвар дар самти сиёсату амниятро баррасӣ кардаанд.
Мақомот нагуфтаанд, ки чӣ теъдод аз шаҳрвандони Тоҷикистон дар зиндонҳои Ироқ нигаҳдорӣ мешаванд, аммо моҳи феврали имсол гуфта шуда буд, ки 381 нафарро аз Сурияву Ироқ ба кишвар баргардондаанд ва вобаста ба имкон овардани тоҷикон идома хоҳад кард.
Сироҷиддин Муҳриддин, вазири умури хориҷии Тоҷикистон авоили соли ҷорӣ гуфта буд, ки бозгардонидани шаҳрвандони кишвар аз гӯшаҳои ҷангзадаи ҷаҳон ва ҳамоиши онҳо ба зиндагии оддӣ, як масъалаи муҳим барои ҳукумат ба ҳисоб меравад..
Ба иттилои расмии мақомоти Тоҷикистон, аз соли 2014 ва баъд аз зуҳури ДОИШ, тақрибан 2 ҳазор нафар ба сафи ин созмон ва дигар гурӯҳҳои тундрав дар Ироқу Сурия пайвастаанд.
Аксари онҳо дар ҷангҳо кушта шуда, зану кӯдаконашон қисман ба Тоҷикистон оварда шуданд ва боқимонда дар зиндонҳои Ироқ ва урдугоҳҳои Сурия ба сар мебаранд.
Маҳбусон ва созмонҳои ҳифзи ҳуқуқ борҳо аз шароити нигаҳдории зиндониён дар маҳбасҳои Сурия ва Ироқ шикоят карда буданд.
Тоҷикистон дар 9 моҳ беш аз 3,7 млн тонна семент истеҳсол кардааст
Дар 9 моҳи соли равон истеҳсоли семент дар Тоҷикистон афзоиш ёфтааст.
Бино ба иттилои Оҷонси омори Тоҷикистон, дар ин давра дар кишвар зиёда аз 3,7 миллион тонна семент тавлид шудааст, ки назар ба ҳамин давраи соли гузашта беш аз 500 ҳазор тонна ё қариб 16 дарсад зиёд будааст.
Афзоиши истеҳсоли семент дар ҳолест, ки содироти ин маҳсулот ба Узбекистон мушкил шудааст. Мақомоти гумруки Узбекистон аз соли 2024 барои воридоти ҳар тонна семент аз Тоҷикистон 300 доллар талаб мекунанд. Пештар чунин пардохт ҳамагӣ 35 доллар буд.
Аммо бо вуҷуди афзоиши истеҳсолот ва маҳдудиятҳо барои содир намудани он ба хориҷ, нархи як халта семент дар бозори масолеҳи сохтмонӣ ба 55 сомонӣ баробар аст.
Солҳои ахир дар Тоҷикистон асосан бо сармояи Чин чанд корхонаи бузурги тавлиди семент бунёд шуданд, ҳарчанд нигарониҳо дар бораи зарари ин корхонаҳо ба муҳити зист ҷой дорад.
Лавров гуфт, омодаи дидор бо Рубио аст
Сергей Лавров, вазири корҳои хориҷии Русия, мегӯяд, ки омодаи мулоқот бо Марко Рубио, вазири корҳои хориҷии Амрико аст. Ин дар ҳолест, ки Русия эълон кардааст, аз шарти аслӣ барои поён додан ба ҷанги Украина ақибнишинӣ нахоҳад кард.
Пеш аз ин гузоришҳое нашр шуда буд, ки Лавров пас аз бекор шудани нишасти Трамп бо Путин дар Будапешт, ҷойгоҳаш дар Кремлро аз даст додааст. Кремл рӯзи 7-уми октябр ин гузоришҳоро рад кард ва Лавров низ рӯзи 9-уми ноябр дар гуфтугӯ бо хабаргузории расмии РИА Новости аз идомаи тамоси худ бо Марко Рубио дар масъалаи Украина хабар дод.
Талошҳои Трамп барои миёнравӣ дар поён додан ба ҷанги Украина то кунун бенатиҷа мондааст ва ӯ моҳи гузашта ба таври ногаҳонӣ нишасти барномарезишудаи худро бо Путин дар Будапешт бекор кард.
Кремл рӯзи 7-уми ноябр гузориши расонаҳои ғарбиро рад кард, ки навишта буданд Лавров пас аз лағви ин нишаст, ҷойгоҳи худро назди Путин аз даст додааст. Ин гузоришҳо пас аз он нашр шуд, ки Вазорати корҳои хориҷии Русия паёме нашр кард ва таъкид намуд, ки Маскав ҳозир нест аз мавзеи худ дар бораи Украина ақибнишинӣ кунад.
Идеяи баргузории нишасти президентҳои Амрико ва Русия дар Будапешт дар ҷараёни тамоси телефонӣ байни ду раҳбар дар моҳи гузашта матраҳ шуд. Аммо пас аз чанд рӯз Кохи Сафед эълон кард, ки барномае барои мулоқот "дар ояндаи наздик" миёни он ду вуҷуд надорад.
Чанд рӯз баъд Доналд Трамп ҳам гуфт, агар президенти Русия омодаи тавофуқ барои поён додан ба ҷанги Украина набошад, ӯ вақти худро барои дидор бо Путин "талаф нахоҳад кард".
Сергей Лавров рӯзи 9-уми ноябр гуфт, "ман ва вазири корҳои хориҷӣ Марко Рубио зарурати гуфтугӯҳои муназзамро дарк мекунем. Ин гуфтугӯҳо барои баррасии масъалаи Украина аҳамият доранд. Ба ҳамин сабаб, аз тариқи телефон дар тамосем ва дар сурати ниёз омодаи мулоқоти ҳузурӣ ҳастем".
Сенаторҳои амрикоӣ розӣ шуданд, ки таътили ҳукумат поён ёбад
Сенаторҳои Амрико ба созише расиданд, ки бар асоси он, таъмини буҷаи федеролӣ аз сар гирифта мешавад ва ба таътили ҳукумат поён дода хоҳад шуд. Ин созиш миёни сенаторҳои демократ ва ҷумҳурихоҳ рӯзи якшанбеи 9-уми ноябр ба даст омад.
Таътили ҳукумати Амрико 40 рӯз пеш оғоз шуд ва бесобиқатарин дар таърихи ин кишвар ба шумор меравад. Дар натиҷаи таътил шудани ҳукумат, фаъолияти шуморе аз ниҳодҳо фалаҷ шуд ва садҳо ҳазор корманди федерол бемаош мондаанд.
Мақомҳо ҳушдор додаанд, ки дар сурати идомаи ёфтани таътили ҳукумат, сафарҳои ҳавоӣ дар Амрико мумкин аст ба зудӣ "тақрибан фалаҷ шавад", зеро ҳазорон парвоз дар охири ҳафта бекор ё бо таъхир рӯбарӯ шудааст.
Қарор аст имрӯз дар мавриди ин тавофуқ раъйгирӣ сурат бигирад.
Пас аз қабул шудан, ин созиш ба Маҷлиси намояндагон, ки дар назорати ҷумҳурихоҳон аст, фиристода хоҳад шуд ва пас аз тасдиқ дар онҷо, барои имзои президент Доналд Трамп омода мешавад.
Дар аксар шаҳрҳои Украина интиқоли барқ қатъ шудааст
Дар пайи ҳамлаҳои Русия интиқоли барқ ба шаҳри Киев ва дигар манотиқи Украина ба мушкил дучор шудааст.
Гурӯҳҳои таъмиргар талош доранд, ки хатҳои барқрасонӣ ва зеристгоҳҳои осебдидаро зудтар барқарор кунанд.
Ширкати давлатии энержии "Укрэнерго" ҳушдор дод, ки рӯзи 9-уми ноябр дар аксари минтақаҳо барқ барои муддати аз ҳашт то 16 соат қатъ хоҳад шуд.
Бар асари ҳамлаҳои Русия дар рӯзи 7-уми ноябр, дастикам ҳафт нафар кушта ва шумораи номаълуме захмӣ шудааст.
Владимир Зеленский, президенти Украина аз кишварҳои ҳампаймонаш даъват кардааст, ки фишор ба Русияро бештар кунанд, то аз харобкорӣ даст кашад.
Ба гуфтаи мақомоти украинӣ, Русия рӯзи 8 ноябр бо беш аз 450 ҳавопаймои бесарнишин ва 45 мушак ба Украина ҳамла кардааст.
Украина низ дар посух бо даҳҳо бесарнишин ба корхонаҳои коркарди нафти Русия ҳамла кардааст. Мақомоти Русия зиёни расида аз ин ҳамлаҳоро шарҳ надодаанд.
Русия наздик ба чор сол аст, ки бедалел зидди Украина меҷангад ва сарбозони артиши ин кишвар ҳазорон бегуноҳро кушта, боиси фирори миллионҳо украинӣ аз ватанашон шудаанд.
Ҷабборов гуфт, дигар ба табаддулот дар Қирғизистон роҳ намедиҳанд
Содир Ҷабборов, президенти Қирғизистон гуфтааст, ки дигар ба табаддулот дар кишвараш роҳ нахоҳад дод.
Ӯ ин ҳарфро дар саҳифаи фейсбукиаш ҳангоми посух додан ба суоли сокинон гуфтааст.
Ҷабборов шашумин президенти Қирғизистон дар беш аз сӣ соли замони истиқлоли ин кишвар аст. Раҳбарони пешини ин кишвар дар пайи эътирози сокинон барканор шуда буданд. Содир Ҷабборов низ пас аз барканории Сооронбой Ҷеэнбеков дар эътирозҳои охири соли 2020 моҳи январи соли 2021 президент интихоб шуд.
Ӯ гуфтааст, ки ҳанӯз гурӯҳҳое вуҷуд доранд, ки мардумро ба эътироз таҳрик медиҳанд, вале ҳукумат дигар ба ин роҳ нахоҳад дод.
"Ба табаддулот роҳ намедиҳем. Якум инки мо баҳонае барои табаддулот намедиҳем. Дуюм, давлат мисли гузашта заиф нест. Давлат ҳоло қавӣ аст. Сеюм инки мардум медонад, ки киро биронад ва киро бимонад,"--гуфт ӯ.
Содир Ҷабборов, ки дар гузашта мансабдори давлатӣ буд, соли 2017 бо иттиҳоми гаравгонгирӣ зиндонӣ шуд. Ӯ дар пайи эътирозҳои сартосарӣ дар охири соли 2020 аз зиндон берун ва раҳбари Қирғизистон шуд.
Акмалиддин дар қаҳрамонии самбои ҷаҳон медали биринҷӣ гирифт
Акмалиддин Каримов, паҳлавони маъруфи тоҷик, дар мусобиқоти қаҳрамонии ҷаҳон-2025 дар риштаи самбои варзишӣ байни мардон дар вазни то 58 кило дар шаҳри Бишкеки Қирғизистон соҳиби медали биринҷӣ гардид.
Мусобиқоти қаҳрамонии самбои ҷаҳон, ки дар пойтахти Қирғизистон – шаҳри Бишкек – 7-уми ноябр шуруъ шуда, то рӯзи 9-уми ноябр идома меёбад. Дар мусобиқот гуштигирони зӯртарини ҷаҳон барои 31 маҷмуи медалҳо дар риштаҳои самбои варзишӣ ва самбои размӣ, инчунин самбо байни варзишгарони нобино рақобат мекунанд.
Акмалиддин дар даври ҳаштякниҳоӣ Илҳом Фармоновро аз Узбекистон бо ҳисоби 8:0, дар чорякфинал намояндаи FIAS (Федератсияи байналмилалии самбо) Бурдз Владзичлауро бо ҳисоби 4:0 шикаст дода, дар даври ниманиҳоӣ аз Нурсултон Жубатхон аз Қазоқистон бо ҳисоби 1:2 мағлуб шуд.
Акмалиддин барои дарёфти медали биринҷӣ намояндаи Иёлоти Муттаҳидаи Амрико Вернелл Робертсро бо ҳисоби 8:0 шикаст дода, мақоми сеюмро азони худ кард.
Ин чаҳорумин медали биринҷии паҳлавони 35-солаи тоҷик Акмалиддин Каримов дар мусобиқоти қаҳрамонии ҷаҳон ба шумор меравад. Ҳамчунин вай дар қаҳрамонии ҷаҳон чаҳор медали нуқра ба даст овардааст.
Соли 2021-ум барои Акмалиддин соли аз ҳама бобарор буд. Вай дар қаҳрамонии ҷаҳон дар шаҳри Тошканд дар самбои варзишӣ дар вазни то 58 кило медали тило гирифт, ки ин натиҷаи беҳтарин дар корномаи варзишиаш маҳсуб мешавад.
Бояд гуфт, ки cоли 1975 дар Мински Беларус паҳлавони машҳури тоҷик Саидмуъмин Раҳимов дар риштаи самбои варзишӣ қаҳрамони ҷаҳон шуда буд.
Баъди 42 сол, яъне соли 2017, Беҳрӯзи Хоҷазода дар шаҳри Сочии Русия ин унвонро ба даст овард. Баъдан соли 2018 дар Бухарести Руминия Хушқадам Хусравов ва соли 2021 дар Тошканди Узбекистон Акмалиддин Каримов қаҳрамони ҷаҳон гардиданд.
Дар риштаи самбои размӣ бошад, ду паҳлавони тоҷик – Сайриддин Икромов (-74 кг, соли 2007, Прагаи Ҷумҳурии Чех) ва Эраҷ Раҳимов (-52 кг, соли 2009, Солоникии Юнон) - медали тиллои мусобиқоти қаҳрамонии ҷаҳонро ба даст овардаанд.
Саломатӣ ва зебоӣ. Ангезае, ки занону духтаронро ба толорҳои варзишӣ мебарад
Дар Душанбе даҳҳо толори варзишӣ ё фитнесклубҳо фаъолият доранд, ки бо пешниҳоди машқу хидматрасониҳои гуногун занону мардонро ба тамрин даъват мекунанд.
Шумори онҳое ҳам, ки ба зебогии андоми худ ва ҳифзи сиҳатӣ таваҷҷуҳ доранд, бештар мешавад. Духтарон, яке барои лоғар шудан, дигаре баръакс барои вазнгирӣ, аммо ҳама барои тақвияти саломатӣ ба фитнесклуб мераванд.
Кимиё, як сокини Душанбе чанд моҳ боз дар яке аз толорҳои варзишии шаҳр машқ мекунад.
“Ман ба ҳайси модел кор мекунам ва бисёр муҳим аст, ки вазнамро нигоҳ дорам. Пеш аз интихоб кардани зал ман ҳам бисёр ҷойҳо рафтам, муқоиса кардам. Замони инҷо омадан, тахфиф буд. Ман ин ҷойро интихоб кардам ва аз он розиям,”-- гуфт вай.
Моҳистон, сокини дигар Душанбе 3 сол боз ба толори варзишӣ меравад. Мегӯяд, агар хоҳиш бошад, вақт ва пул пайдо мешавад. Вай гуфт: “Ман ба хотири саломатиям машқ мекунам. Вазнам 77 кило буд, ҳоло 62 шуд. Хеле вазн кам шуд. Агар хоҳед, ҳазор тариқ метавонед сарф кунеду машқ оед. Барои баъзеҳо муносибат аст, барои баъзеҳо не.”
Яке аз вижагиҳое, ки ҳоло дар ин ва аксар толорҳои дигари варзишӣ ё фитнесклубҳои Душанбе дида мешавад, ин ҷудо будани ҷойи машқи занон аз мардон аст. Кормандони ин соҳа мегӯянд, ин корро бо талаби муштариён кардаанд.
Манижа Алиева, маъмури толори варзишии “Профит фитнес” дар суҳбат бо Радиои Озодӣ гуфт: “На ҳама занҳо мехоҳанд, ки бо мардон машқ кунанд, аз ин хотир танҳо барои занон ҷой омода кардем. Тамоми таҷҳизоте, ки зарур аст, инҷо ҳаст. Машқҳои гуруҳӣ дорем, рақсҳо. Ҳастанд занҳое, ки аз 50 сол зиёд доранд ва барои нигоҳ доштани саломатии худ меоянд. Ҳамчунин, наврасон низ ҳастанд.”
Шумори толорҳои хурду бузурги варзишӣ дар Душанбе торафт бештар мешаванд. Вобаста ба шароиту хидматрасонӣ арзиши машқ дар онҳо фарқ мекунад. Дар толорҳои варзишии калонтар, ки ҳавзи шиноварӣ доранду бо дастгоҳи махсуси муосири машқи бадан муҷаҳҳазанд, обунаи моҳона аз 800 – 1000 сомонӣ болост. Машқгоҳҳое бо нархи аз 400 то 600 сомонӣ ҳам ҳастанд. Вале на ҳама тавони пардохти ин маблағро доранд.
Мисли Нигора, ки барои рафтан ба толори варзишӣ шароит надорад, вале мехоҳад вазн партояд ва дар хона машқ мекунад. “Аз интернет машқҳо скачат кардагием, аз рӯи ҳамон иҷро мекунем. Ба ман дастрастар курси диетолог ғалтид. 180 сомонӣ 21-рӯза харидам. Бо вай ҳам хароб мешавӣ, лекин дертар. Агар нархи фитнесклубҳо дастрас мебуд ба мо, ба вай мумкин тезтар хароб мешидем. Таъсираш соз.”
Таҳлилгарони соҳа нисбатан гарон будани нархи хидматрасонӣ дар толорҳои калони варзишӣ ва камбуди муррабиёни касбиро аз мушкил дар ин самт меноманд.
Мансур Муҳиддинов, довари дараҷаи байналмилалӣ ба Озодӣ гуфт: “Якум пайдо кардани муттахасисони сатҳи баланд, дуюм пул. Агар ҳаққи машқ дар толор каме паст мешуд, ки нафарони одӣ ҳам рафта метавонистанд, хуб мешуд.”
Ба гуфтаи коршиносон, дар маҷмӯъ солҳои ахир таваҷҷӯҳи сокинон ба варзиш ва нигоҳубини бадани худ бештар шудааст. Онҳо бар инанд, ки соатҳои дарози кор сабаби камқувватии ҷисмонӣ ва афсурдагӣ мешаванд ва тамрин дар фитнес-клуб метавонад ин холигоҳҳоро пур кунад.
Ҳамлаи Русия ба чанд минтақа дар Украина
Шаби гузашта Русия бо истифода аз ҳавопаймо ва бесарнишину мушакҳо ба чанд минтақаи Украина ҳамла кард. Аз ҷумла, вилоятҳои Днепропетровск, Киев, Кировоград, Николаев, Полтава ва Харков мавриди зарба қарор гирифтаанд.
Мақомоти расмии Украина иддао доранд, ки Русия зерсохторҳои энергетикӣ ва иншооти ғайринизомиро ҳадаф қарор додааст.
Бино ба хабарҳо, чанд нерӯгоҳи барқӣ осеб дидааст. Метрои Харков аз кор монда, ба шабакаи барқу об ҳам зарар расидааст. Дар шаҳр нуқтаҳои гармшавӣ кушода шудаанд.
Раисиҷумҳури Украина Владимир Зеленский, рӯзи 8-уми ноябр гуфт, ки беш аз 450 ҳавопаймои бесарнишин ва 45 мушаки навъҳои мухталиф партоб шудаанд, ки ҳадафи ҳамла ба зиндагии муқаррарӣ, биноҳои истиқоматӣ, иншооти энергетикӣ ва инфрасохтор аст. "Барои ҳар як зарбаи Маскав ба бахши энержии мо бо ҳадафи эҷоди мушкил ба мардуми оддӣ пеш аз зимистон, бояд бо ҷорӣ кардани таҳрими бидуни истисно ба тамоми сохторҳои энергетикии Русия посух дода шавад."- навиштааст, Зеленский дар Telegram.
Ба иттилои шаҳрдори Кременчуге дар пайи зарбаҳои Русия мардум дар ин ҷо аз барқ маҳрум шуданд. Дар вилояти Полтава дар пайи ҳамлаҳои Русия ба кори роҳи оҳан халал ворид шуда, дар роҳе, ки Харковро бо Киев мепайвандад чандин қатора аз ҳаракат бозмонданд.
Дар Днепр бесарнишини Русия ба як бинои истиқоматии нуҳ ошёна бархурдааст. Дастикам ду нафар ҷон бохта, хонаҳо дар ошёнаи дуюм вайрон шудаанд.
Аввалин медалҳои варзишгарони тоҷик дар Бозиҳои VI ҳамбастагии исломӣ
Шаби 7-уми ноябр дар шаҳри Риёзи Арабистони Саудӣ маросими ифтитоҳи Бозиҳои VI ҳамбастагии исломӣ баргузор шуд, ки дар он ҳайати варзишии Тоҷикистон низ иштирок кард.
Пас аз анҷоми паради иштироккунандагони Бозиҳо парчами кишвари мизбон - Арабистони Саудӣ - ва рамзҳои мусобиқотро рӯйи саҳна оварда, барафрохтанд. Ҳамин тавр, Бозиҳои VI ҳамбастагии исломӣ дар Риёз кушода эълон шуданд.
Бояд гуфт, Арабистони Саудӣ бори дуюм аст, ки мизбони ин чорабинии варзишии қоравӣ гаштааст. Дар мусобиқот аз рӯи барномаи Бозиҳо Тоҷикистонро 69 варзишгар дар 12 намуди варзиш намояндагӣ хоҳанд кард.
Дар мусобиқаи кураш, ки бори аввал ба барномаи Бозиҳои ҳамбастагии исломӣ дохил шуд, 6-уми ноябр варзишгарони тоҷик - Шоҳида Қаландарова дар вазни то 70 кило ва Муҳаммадшариф Наҷмиддинов дар вазни то 81 кило - ду медали биринҷӣ гирифтанд. Ин аввалин медалҳои Тоҷикистон дар Бозиҳои VI ҳамбастагии исломӣ мебошад.
Дастаи мунтахаби футзали Тоҷикистон, ки дар ду бозии марҳилаи гурӯҳӣ аз тими Афғонистон бо ҳисоби 5:9 ва аз мунтахаби Марокаш бо ҳисоби 1:7 мағлуб шуд, имкони аз гурӯҳ баромаданро аз даст дод. Дар бозии даври охирин дар гурӯҳи “В” шогирдони Пайрав Воҳидов 8-уми ноябр бо тими Эрон бозӣ мекунанд.
Паҳлавонони тоҷик дар мусобиқоти инфиродии ҷудо аз рӯи барномаи Бозиҳои VI ҳамбастагии исломӣ, ки рӯзҳои 8-9-уми ноябр дар Риёз баргузор мешавад, ширкат меварзанд.
Ба иттилои сомонаи расмии Федератсияи байналмилалии ҷудо (IJF), то ҳоло барои иштирок дар ин мусобиқот 147 варзишгар (84 мард ва 63 зан) аз 32 кишвари се қора номнавис шудаанд.
Тоҷикистонро дар мусобиқоти инфиродии ҷудо аз рӯи барномаи Бозиҳои VI ҳамбастагии исломӣ дар Риёз 7 варзишгар (5 нафар дар рақобатҳо байни мардон ва 2 нафар миёни занон) намояндагӣ хоҳанд кард:
Мардон:
-66 кг – Ёсин Бобокалонов
-73 кг – Абубакр Шеров
-90 кг – Муҳаммадҷон Абдуҷалилзода
-100 кг – Ҷаҳонгир Маҷидов
+100 кг – Темур Раҳимов
Занон:
-48 кг – Аҳлия Муъминова
-52 кг – Мадина Қурбонзода
Варзишгарон дар рақобатҳои инфиродӣ барои 14 маҷмуи медалҳо (7 вазн байни мардон ва 7 вазн миёни занон) талош мекунанд.
Барномаи мусобиқот: 8-уми ноябр – мардон:: -60 кг, -66 кг, -73 кг; занон: -48 кг, -52 кг, -57 кг, -63 кг | |||
|
Гуштигирони тоҷик, инчунин дар мусобиқоти ҷудои дастаии омехта аз рӯи барномаи Бозиҳои VI ҳамбастагии исломӣ, ки дар Риёз 10-уми ноябр доир мегардад, рақобат хоҳанд кард.
Ёдовар мешавем, дар Бозиҳои V ҳамбастагии исломӣ, ки моҳи августи соли 2022-юм дар шаҳри Қунияи Туркия бо иштироки 4200 варзишгар аз 56 кишвари ҷаҳон баргузор шуд, варзишгарони тоҷик ҳашт медал (се нуқра ва панҷ биринҷӣ) ба даст оварданд.
Дар ҳисоби медалҳо мизбонон мақоми аввалро касб карданд. Мунтахаби Туркия 341 медал, аз он ҷумла 145 нишони тило, гирифт. Мунтахаби Узбекистон бо касби 158 медал ҷойгоҳи дувум ва мунтахаби Эрон бо касби 133 медал ҷойгоҳи севумро соҳиб шуданд.
Дар умум варзишгарони тоҷик дар Бозиҳои ҳамбастагии исломӣ то имрӯз 16 медал (1 нишони тило, 4 нуқра ва 11 биринҷӣ) ба даст овардаанд. Ягона медали тилоро Дилшод Назаров дар аввалин Бозиҳои ҳамбастагии исломӣ, ки соли 2005-ум дар Арабистони Саудӣ баргузор шуда буд, дар гурзандозӣ гирифтааст.
"Сомон-эйр"эълон кард, ки аз ширкати Boeing 14 ҳавопаймо мехарад
Ширкати тоҷикистонии “Сомон-Эйр” бо ширкати бузурги амрикоӣ - “Boeing” барои харидории 14 ҳавопаймои пешрафтаи навъи 787 Dreamliner ва 737 MAX қарордод баст.
Бино ба иттилои“Сомон-Эйр” созиш рӯзи 6-уми ноябр дар чаҳорчӯби саммити С5+1 дар Вашингтон ба даст омадааст. Ин ба ширкат имкон медодааст, ки ба хатсайрҳои дур ҳам парвоз кунад.
Ширкат бо нашри хабарномае эълон кардааст, ки барои аввалин бор соҳиби 4 ҳавопаймоӣ бузурги Boeing 787-9 хоҳад шуд. Ҳамчунин қарор аст 10 ҳавопаймои 737-8 ро дастрас кунад.
“Ширкати ҳавопаймоии «Сомон Эйр» нақша дорад, ки бо ҳавопаймои 787-9, ки барои мусофирон бароҳат аст, аз Душанбе хатсайрҳои навро ба роҳ монад. Ҳавопаймои 737-8 парвозҳои асосиро дар масофаҳои наздик ва миёна анҷом хоҳад дод. Дар маҷмӯъ, ин ҳавопаймоҳо харҷи сӯзишвориро ба андозаи 20–25% коҳиш медиҳанд, ки ин хароҷот барои ҷойи мусофирон ва хидматрасонии техникӣ ҳам кам хоҳад кард.” – омадааст, дар хабарномаи ширкати “Сомон -эйр”
Як рӯз пеш аз ин дар Вашингтон мулоқоти раиси Оҷонсии ҳавонавардии Тоҷикистон, Ҳабибулло Назарзода бо ҳамтои амрикоияш Кристен Гатлин баргузор шуд. Ҷонибҳо рушди ҳамкориҳо дар ин бахш, таҳияи созишнома “Дар бораи алоқаи ҳавоӣ” ва имкони оғози парвозҳои мустақим миёни Тоҷикистон ва ИМА-ро баррасӣ карданд.
Дар ҳоли ҳозир ширкат шаш ҳавопаймои навъи Boeing 737 Next-Generation-ро дар ихтиёр дорад, ки аз Тоҷикистон ба 25 самт дар Аврупо, Осиё ва Ховари Миёна парвоз мекунанд.
"Сомон Эйр" бузургтарин ширкати ҳавопаймоӣ хусусӣ дар Тоҷикистон аст. Интиқоди мусофирон аз кору хидматрасонӣ дар ҳавопаймоҳои ин ширкат ҳам кам нест. Молики ширкат Ҳасан Асадуллоҳзода, додарарӯси президенти Тоҷикистон Эмомалӣ Раҳмон дониста мешавад.
“Истиқлол” ва “Вахш” барои медалҳои тило талош доранд
Бозиҳои даври 21-уми мусобиқоти қаҳрамонии футболи Тоҷикистон миёни дастаҳои Лигаи олӣ рӯзҳои 1-2-юм ва 5-уми ноябр баргузор шуданд.
Дастаи “Вахш”-и Бохтар, пешсафи мусобиқот, дар бозии даври 21-ум дар варзишгоҳи “Кӯлоб-Арена”-и шаҳри Кӯлоб бозиро бо тими мизбон - “Равшан”- бо ҳисоби 0:0 анҷом дод.
Бозии КМВА (Клуби марказии варзишии артиш)-и Душанбе бо дастаи мизбон – “Хуҷанд”-и шаҳри Хуҷанд - низ бидуни гол ба поён расид.
Дар бозии “Эсхата”-и Хуҷанд бо дастаи меҳмон – “Барқчӣ”-и Ҳисор - ҳисоб 1:1 шуд. “Ҳосилот”-и Фархор тими меҳмон – Ҳулбук”-и Восеъро бо ҳисоби 1:0 мағлуб кард. Дастаи «Регар-ТадАЗ»-и Турсунзода дар майдони худ аз тими “Панҷшер”-и Ҷалолиддини Балхӣ бо ҳисоби 1:2 шикаст хӯрд.
Бозии даври 21-ум миёни дастаҳои “Истаравшан”-и шаҳри Истаравшан ва “Истиқлол”-и Душанбе ба далели иштироки қаҳрамони Тоҷикистон дар Лигаи қаҳрамонҳои Конфедератсияи футболи Осиё мавқуф монд.
Ба ин тартиб, ҳоло дар ҷадвали мусобиқот “Вахш” бо 41 имтиёз аз 20 бозӣ дар ҷойи аввал аст. “Истиқлол” бо 37 имтиёз аз 17 бозӣ мақоми дуюмро касб кардааст. КМВА ва “Равшан” ҳар кадом дар 21 бозӣ 34-имтиёзӣ гирифтаанд. Аз рӯи таносуби беҳтари тӯбҳо КМВА дар ҷойии сеюм ва “Равшан” дар ҷойи чорум қарор доранд.
Дар бозиҳои боқимонда мубориза барои медалҳои тило байни ду дастаи пешсаф – “Вахш” ва “Истиқлол” – авҷ мегирад. Шонси “Истиқлол” барои гирифтани унвони қаҳрамонӣ хубтар аст, зеро душанбегиҳо панҷ бозӣ, бохтариҳо бошанд, ду бозии дигар анҷом медиҳанд.
Барои медалҳои биринҷии мусобиқот КМВА ва “Равшан” талош меварзанд, ки ҳар кадом боз як бозӣ барпо мекунанд. Низомиён дар даври охирин - 9-уми ноябр - дар майдони худ бо “Регар-ТадАЗ” ва “Равшан” 10-уми ноябр дар Кӯлоб бо “Ҳулбук” вориди рақобат мешаванд.
Мусобиқоти қаҳрамонии футболи Тоҷикистон-2025
Лигаи олӣ. Даври 21-ум
1-уми ноябр (шанбе)
«Хуҷанд» – КМВА – 0:0
2-юми ноябр (якшанбе)
«Ҳосилот» – «Ҳулбук» - 1:0
Гол: Ҷозеф Акомади, 57 (1:0).
«Эсхата» – «Барқчӣ» - 1:1
Голҳо: Санҷар Рихсибоев, 69 (1:0), Диловар Ҷамшедзода, 90+5 (1:1).
«Равшан» – «Вахш» - 0:0
5-уми ноябр (чоршанбе)
«Регар-ТадАЗ» – «Панҷшер» - 1:2
Голҳо: Рӯзиев, 19 – аз пеналти (0:1), Қучқоров, 43 (0:2), Шервонӣ Мабатшоев, 77 – аз пеналти (1:2).
Корти сурх: Одинаев, 14 (“Панҷшер”).
Бозии “Истаравшан” – “Истиқлол” мавқуф гузошта шуд.
Мавқеи дастаҳо дар ҷадвали мусобиқоти лигаи олӣ:
1. “Вахш” - 20 бозӣ 41 имтиёз, таносуби тӯбҳо – 30-17
2. “Истиқлол” - 17 бозӣ 37 имтиёз, таносуби тӯбҳо – 33-13
3. КМВА - 21 бозӣ 34 имтиёз, таносуби тӯбҳо – 37-23
4. “Равшан” - 21 бозӣ 34 имтиёз, таносуби тӯбҳо – 25-19
5. “Эсхата” - 21 бозӣ 30 имтиёз, таносуби тӯбҳо – 29-24
6. “Хуҷанд” - 21 бозӣ 28 имтиёз, таносуби тӯбҳо – 23-25
7. “Регар-ТадАЗ” - 20 бозӣ 27 имтиёз, таносуби тӯбҳо – 22-21
8. “Барқчӣ” - 21 бозӣ 27 имтиёз, таносуби тӯбҳо – 22-19
9. “Ҳосилот” - 19 бозӣ 23 имтиёз, таносуби тӯбҳо – 24-25
10. “Истаравшан” - 20 бозӣ 19 имтиёз, таносуби тӯбҳо – 22-36
11. “Ҳулбук” - 20 бозӣ 12 имтиёз, таносуби тӯбҳо – 13-33
12. “Панҷшер” - 21 бозӣ 11 имтиёз, таносуби тӯбҳо – 15-40
Беҳтарин нишонзанҳо: Дмитрий Билоног (“Вахш”), Квадво Фримпонг (“Регар-ТадАЗ”), Шериддин Бобоев (“Равшан”), Аянвале Олаолува (“Равшан”), Пол Камолафе (“Хуҷанд”/”Истиқлол” – 7-голӣ.
Даври 22-юм
9-уми ноябр (якшанбе)
15:00 – «Вахш» - Истаравшан»
Бохтар. Варзишгоҳи «Вахш»
15:00 – КМВА – “Регар-ТадАЗ”
Душанбе. Варзишгоҳи КМВА-и Вазорати мудофиаи ҶТ
15:00 – “Барқчӣ” – “Хуҷанд”
Душанбе. Варзишгоҳи марказии ҷумҳуриявӣ
10-уми ноябр (душанбе)
15:00 – “Ҳулбук” – “Равшан”
Кӯлоб. Варзишгоҳи “Кӯлоб-Арена”
15:00 – “Истиқлол” – “Эсхата”
Ҳисор. Варзишгоҳи марказӣ
15:00 – “Панҷшер” – “Ҳосилот”
Бохтар. Варзишгоҳи «Вахш»
Гуфтугӯ