Дар чанд ҷумла
Ҷониби Тоҷикистон муноқиша дар марз бо Қирғизистонро шарҳ дод
Ҷониби Тоҷикистон муноқишаи рӯзи гузашта дар марз бо Қирғизистонро шарҳ дод. Рӯзи 24-уми июл бар асари муноқишаи сокинон дар минтақаи наздимарзии Тоҷикистон бо Қирғизистон, роҳи Исфара ба ҷамоати деҳоти Ворух барои чанд соат баста монд.
Дар изҳороти Раёсати нерӯҳои марзбонии Кумитаи давлатии амнияти миллии Тоҷикистон омадааст, ки баъд аз зуҳри 24-уми июл қатори мошинҳои сокинони Ворух барои гузаронидани туй ба тарафи Исфара дар ҳаракат буд ва дар даромадгоҳи деҳаи Оқсойи Бодканд як сокини маҳаллӣ ба ҳаракати ин корвон монеа эҷод кард.
Тибқи иттилои Раёсати нерӯҳои марзбонии Тоҷикистон, ин сокини деҳоти Оқсойи Бодканд, ки дар ҳолати мастӣ қарор доштааст, бо баҳонаи он, ки гӯё яке аз мошинҳои тӯёна барои ҳаракати ӯ монеа эҷод кард, роҳи мошинҳоро баст.
Ин сокини ҷамоати Оқсой, ки дар ин изҳорот аз ӯ ном бурда нашудааст, сипас ба тарафи мошинҳои шаҳрвандони Тоҷикистон сангандозӣ кардааст. Тибқи иттилои расмии ҷониби Тоҷикистон, дар натиҷа қисмҳои гуногуни 3 мошин шикаста, 4 шаҳрванди Тоҷикистон ҷароҳатҳои сабук бардоштанд.
Шаби гузашта сокинони ин минтақаи наздимарзии Тоҷикистон шикоят карданд, ки рӯзи 24 июл низомиёни қирғиз ва сокинони деҳаи Оқсой ягона роҳ ба самти Ворухро бастанд.
Ҳадди ақал се ҳамсуҳбати Радиои Озодӣ дар шаҳри Исфара гуфтанд, аз нимарӯзи 24 июл то соати 9-и шаб роҳ аз Ворух ба самти шаҳри Исфара, ки аз миёни деҳаи Оқсой мегузарад, баста буд. Як ҳамсуҳбати мо гуфт, низомиёни қирғиз дар роҳ истодаанд ва сокинон ба самти мошинҳои Тоҷикистон санг партофтанд.
Расонаҳои Қирғизистон бо такя ба мақомоти маҳаллии он кишвар хабар доданд, ки пас аз мулоқоти ҷонибҳо мушкил бартараф шуд ва посгоҳҳо бардошта шуданд. "Вазъият дар марзи ду кишвар дар ҳоли ҳозир ором аст. Комисияи муштарак сабабҳои муноқиша байни шаҳрвандони ду кишварро таҳқиқ мекунад",-омадааст дар изҳороти Идораи марзбонии Қирғизистон.
Марзи Тоҷикистону Қирғизистон, ки наздики 300 километраш то ҳол муайян нашудааст, солҳост ба макони низоъ миёни сокинон ва низомиён табдил шудааст. Ду тараф ба сари обу замин ва чарогоҳ борҳо бо ҳам муноқиша кардаанд ва ҳамеша якдигарро дар сар задани ҳодисаҳо гунаҳкор мекунанд. Дар ду муноқишаи хунин, ки моҳи апрели соли 2021 ва сентябри 2022 рух дод, аз ҳарду тараф даҳҳо нафар куштаву захмӣ шуданд.
Ҳамаи хабарҳои имрӯзро дар инҷо бихонед
Аз хонаҳо то "Ҷумъабозор". Таҳқиқи даъво бар сари моликият дар Хуҷанд
Як гурӯҳи корӣ барои таҳқиқи шикоят ва даъвоҳои пайдарҳам бар сари замину тақсими моликият ва бунёди биноҳои баландошёна аз Душанбе ба шаҳри Хуҷанд рафтааст.
Мақомот ягон шарҳ намедиҳанд.
Манбаъҳои огоҳи Радиои Озодӣ рӯзи 31-уми август бо шарти фош нашудани ном гуфтанд, ки ин ҳайат "аз панҷоҳ нафар ва асосан аз намояндагони Оҷонси мубориза бо фасод, Додситонии кул ва Кумитаи сохтмону меъморӣ иборат аст."
"Онҳо истифодаи дурусти замин, бунёди иншооти гуногун ва то куҷо риоя шудани ҳуқуқи соҳибмулконро хоҳанд санҷид," -- гуфт як манбаи наздик ба мақомоти шаҳри Хуҷанд.
Ба иттилои дарёфтӣ, тафтиш то 5-уми сентябр идома хоҳад кард.
Дар моҳҳои охир сокинони чанд бинои бозмонда аз шӯравӣ ва молики "Ҷумъабозор" дар Хуҷанд ба Радиои Озодӣ шикоят карда буданд, ки мақомот бе ризояти онҳо ва пардохти ҷуброни одилона моликияташонро ба шахсони дигар, бавижа ширкати "Асри мо" вогузор кардаанд. Чизе, ки моликон ғасби ба истилоҳ "рейдерӣ", вале мақомот дурусту қонунӣ номиданд.
Дар бораи ширкати "Асри мо" маълумоти кофӣ дар даст нест. Чанд ҳуҷҷати ёфтшуда дар манбаъҳои боз баёнгари он аст, ки "Асри мо" ба бунёди баландошёнаҳо дар шаҳри Душанбе машғул аст.
Солҳои охир дар Тоҷикистон баҳсҳои вобаста аз манзили наву кӯҳна зиёд аст. Сокинон аксар вақт шикоят мекунанд, ки ширкатҳои бинокор манзилашонро вайрон карда, дар иваз ҷуброни ночиз пешниҳод мекунанд.
Мулоқоти раисҷумҳури Тоҷикистон бо ду намояндаи Амрико
Раисҷумҳури Тоҷикистон дар шаҳри Бишкек, ҷое, ки дар сафари корӣ қарор дорад, бо ду намояндаи расмии Амрико мулоқот кардааст.
Дидору гуфтугӯйи Эмомалӣ Раҳмон бо Серҷио Гор, фиристодаи вижаи президенти Амрико барои Осиёи Марказӣ ва Ҷанубӣ ва Стив Дейн, сенатори ҷумҳурихоҳ, рӯзи 31-уми август анҷом шуд. Стив Дейн узви Кумитаи захираҳои энержӣ ва табиии Сенати Амрико аст.
Дафтари матбуоти раисҷумҳури Тоҷикистон навишт, ки ду тараф "мавзуъҳои мубрами ҳамкориро баррасӣ карданд", аммо тафсилот надод.
Манбаъ ба таври умумӣ гуфт, "масъалаҳои рушди ҳамкории тиҷоратию иқтисодӣ, аз ҷумла эҷоди фазои мусоид барои ҷалби сармоягузорӣ ба бахшҳои энергетика, саноат ва маъданҳои нодиру муҳим, мавриди баррасии ҷонибҳо қарор доштанд."
Вазорати корҳои хориҷии Амрико 11-уми август дар гузориши солонааш пиромуни шаффофияти молӣ дар идораҳои давлатии 140 кишвар, Тоҷикистонро дар қатори давлатҳое номбар кард, ки ба талаботи ҳадди ақали шаффофияти молӣ ҷавобгӯ набуданд. Набуди шаффофият яке аз мушкилотест, ки намегузорад, сармоягузорони хориҷӣ ба Тоҷикистон биёянд ё онро кишвари олуда ба фасод ва номуносиб барои ҳамкорӣ ва сармоягузорӣ медонанд.
Амнияту субот дар минтақа ва ҷаҳон ва роҳҳои ҳалли сиёсию дипломатии низоъҳо аз бахши дигари мулоқоти раисҷумҳури Тоҷикистон бо мақомҳои амрикоӣ будааст. Тоҷикистон пештар аз "ташаннуҷи бесобиқаи вазъ дар Ховари Миёна" нигаронӣ карда, хоҳони ҳалли мушкил аз роҳҳои дипломатӣ шуда буд.
Ин мулоқоти дувуми раисҷумҳури Тоҷикистон бо Серҷио Гор, фиристодаи Доналд Трамп барои Осиёи Марказӣ ва Ҷанубӣ, дар ним соли охир аст. Ин дипломати 40-солаи зодаи Узбекистонро, ки ҳамзамон сафири Амрико дар Ҳинд аст ва як соҳибкори бособиқа ҳам мебошад, шахсияти таъсиргузор дар масоили Осиёи Марказӣ медонанд.
Боздошти 140 муҳоҷир дар як амалиёт дар метрои Маскав
Дар як амалиёти зидди муҳоҷирон дар метрои Маскав рӯзи 29-уми август тақрибан 140 муҳоҷирро боздошт кардаанд.
Мақомоти Русия нагуфтанд, ки онҳо шаҳрвандони кадом кишвар ҳастанд, аммо гуфтанд, ки ин афрод қоидаҳои зистро вайрон карда, ба рӯйхати шахсони зери назорат ворид шудаанд.
Қарор аст, онҳоро аз хоки Русия берун ва вурудашонро ба ин кишвар барои чанд сол манъ кунанд.
Барои пайдо ва муайян кардани муҳоҷирон аз низоме истифода шудааст, ки Вазорати корҳои дохилии Русия онро "технологияи навтарин" номид.
Мақомот шарҳ надоданд, ки ин фанноварӣ дақиқан чӣ гуна кор мекунад, аммо ВКД-и Русия таъкид кардааст, ки "санҷиш дар метрои Маскав самарабахшии худро нишон дод" ва чунин маъракаҳо минбаъд дар гӯшаҳои дигари Русия низ баргузор хоҳанд шуд.
Соли 2025 дар Маскав ва вилояти ҳамноми он барномаи мобилии "Амина" расман ба кор сар кард. Истифодаи он аз 1-уми сентябри имсол барои тамоми "хориҷиҳо, ки вурудашон ба Русия бе виза амалӣ мегардад", аз ҷумла Тоҷикистон, ҳатмӣ мешавад.
Замимаи "Амина" маълумотро дар бораи макони муҳоҷирон дар шаҳру вилояти Маскав ба Вазорати корҳои дохилии Русия мефиристад. Агар дар тӯли зиёда аз се рӯз маълумоти нав ворид нашавад, муҳоҷир ба “феҳристи шахсони таҳти назорат” шомил карда мешавад.
Эмомалӣ Раҳмон бо сафари корӣ ба Қирғизистон рафт
Эмомалӣ Раҳмон, раисҷумҳури Тоҷикистон, рӯзи 31-уми август бо сафари корӣ ба Қирғизистон рафт.
Ӯ дар нишасти сарони кишварҳои узви Созмони Ҳамкориҳои Шонгҳой ширкат хоҳад кард.
Нишаст 1-уми сентябр дар шаҳри Бишкек мегузарад.
Пойтахти Қирғизистон бори чаҳорум аст, ки нишасти Созмони Ҳамкориҳои Шонгҳойро мизбонӣ мекунад. Аз ин қабл, раҳбарони кишварҳои узви ин созмон дар солҳои 2007, 2013 ва 2019 дар Бишкек ҷамъ омада буданд.
Созмони Ҳамкориҳои Шонгҳой соли 2001 таъсис шудааст ва Чину Русия онро ҷойгузине барои НАТО муаррифӣ мекунанд.
Русия, Чин, Ҳинд, Қазоқистон, Қирғизистон, Тоҷикистон, Покистон, Эрон, Узбекистон ва Беларус аъзои аслии созмон ҳастанд. Афғонистон ва Муғулистон мақоми нозирро доранд.
Саммити Бишкек бо ҳузури сарони 17 кишвар доир мешавад
Дар ҷаласаи навбатии Шӯрои сарони кишварҳои узви Созмони ҳамкориҳои Шанхай ва ҳамоиши "СҲШ-+", сарони 17 кишвар ва раҳбарони шуморе аз созмонҳои байналмилалӣ иштирок мекунанд.
Ин нишаст рӯзи 1 сентябр дар Бишкек, пойтахти Қирғизистон таҳти унвони "СҲШ: Якҷо ба сӯи сулҳи пойдор, рушд ва шукуфоӣ", баргузор мешавад.
Дафтари матбуоти раёсати ҷумҳури Қирғизистон хабар дод, ки дар ин ҳамоиш Александ Лукашенко, раисҷумҳури Белорус, Нарендра Моди, нахуствазири Ҳинд, Масъуд Пизишкиён, раисҷумҳури Эрон, Қосимҷомарт Тоқаев, раисҷумҳури Қазоқистон, Си Ҷинпин, раисҷумҳури Чин, Шаҳбоз Шариф, нахуствазири Покистон, Владимир Путин, раисҷумҳури Русия, Эмомалӣ Раҳмон, раисҷумҳури Тоҷикистон, Шавкат Мирзиёев, раисҷумҳури Узбекистон, Илҳом Алиев, раисҷумҳури Озарбойҷон, Никола Пашинян, нахуствазири Арманистон, Ухнаагийн Хурэлсух, раисҷумҳури Муғулистон, Фор Эссозимна Гнассингбе, раиси Шӯрои вазирони Ҷумҳурии Того, Раҷаб Таййиб Эрдуғон, раисҷумҳури Туркия, Тхонглун Сисулит, президенти Ҷумҳурии мардумӣ-демократии Лаос, Во Тхи Ан Суан, муовини раисҷумҳури Ҷумҳурии сотсиалистии Ветнам ва Ҳусейн Исо, муовини нахуствазири Ҷумҳурии арабии Миср, иштирок хоҳанд кард.
Ба иттилои манбаъ, Антонио Гутерриш, дабири кулли СММ, Нурлан Ермекбаев, дабири кулли Созмони ҳамкориҳои Шанхай, Уралбек Шаршеев, мудири Кумитаи иҷроияи Сохтори минтақавии зиддитеррористии Созмони ҳамкории Шанхай, Сергей Лебедев, дабири кулли Иттиҳоди Давлатҳои Мустақил, Таалатбек Масадиқов, дабири кулли Созмони Паймони Амнияти Дастҷамъӣ ҳам дар ин ҳамоиш хузур хоҳанд ёфт.
Тибқи иттилои дафтари матбуоти раёсати ҷумҳури Қирғизистон, сарони кишварҳо дар бораи масоили муҳими байналмилалӣ ва минтақаӣ, самтҳои авлавиятдор барои рушди ин созмон, дурнамои ҳамкориҳо дар арсаҳои сиёсӣ, тиҷоратӣ, иқтисодӣ, нақлу ҳамл ва боркашонӣ, рақамӣ, муҳити зист ва фарҳангиву башардӯстона гуфтугӯ хоҳанд кард.
Дар поёни ин нишаст, Эъломияи Бишкек ба муносибати 25-солагии Созмони ҳамкориҳои Шанхай, ва ҳамчунин санадҳо ва қарорҳое бо ҳадафи тақвияти ҳарчӣ бештари ҳамкориҳои чандҷониба, имзо хоҳанд шуд.
Дар ҳамоиши васеъи "Созмони ҳамкориҳои Шанхай +", доир ба тақвияти нақши меҳварии Созмони Милали Муттаҳид, ва ҳамчунин густариши ҳамкориҳо табодули афкор сурат мегирад.
Пойтахти Қирғизистон барои бори чаҳорум мизбони нишасти Созмони ҳамкориҳои Шанхай хоҳад буд. Аз ин қабл, дар солҳои 2007, 2013 ва 2019 раҳбарони кишварҳои узви ин созмон дар Бишкек ҷамъ омада буданд.
Мулоқоти сарони кишварҳои аъзои Созмони ҳамкориҳои Шанхай ҳамасола як бор доир мешавад.
Созмони ҳамкориҳои Шанхай, ки Чин ва Русия онро ҷойгузине барои НАТО муаррифӣ мекунанд, акнун ба яке аз муҳимтарин бистарҳои ҳамкории кишварҳои ғайри ғарбӣ табдил шудааст.
Созмони Ҳамкориҳои Шанхай як созмони минтақавӣ аст, ки дар соли 2001 таъсис шуд. Русия, Чин, Ҳинд, Қазоқистон, Қирғизистон, Тоҷикистон, Покистон, Эрон, Узбекистон ва Белорус аъзои аслии ин созмон ҳастанд.
Афғонистон ва Муғулистон дар Созмони Ҳамкориҳои Шанхай мақоми нозирро доранд.
Мирзиёев: Сиёсати Узбекистон дар Афғонистон "созанда" аст
Раисҷумҳури Узбекиистон гуфтааст, ки кишвараш ба сиёсати "созанда ва қотеъ" дар баробари Афғонистон идома хоҳад дод.
Шавкат Мирзиёев рӯзи 29 август дар суханронӣ ба муносибати 35-умин солгарди истиқоли кишвараш гуфт, ки сиёсати хориҷи Узбекистон бар ҳусни ҳамҷаворӣ, ҳамкориҳои стратегӣ ва робитаҳои баробар устувор аст.
Аммо ӯ дар бораи сиёсати ояндаи ин кишвар дар баробари Толибон ҷузъиёти бештар ироа накард.
Узбекистон аз соли 2021 бо бозгашти Толибон ба қудрат, робитаҳои худро бо Толибон ҳифз кардааст.
Ҳарчанд Тошканд ҳукумати Толибонро ба расмият нашинохтааст, аммо талош дорад Афғонистонро дар тарҳҳои минтақаӣ ва тиҷорӣ миёни Осиёи Марказӣ ва Ҷанубӣ шомил кунад.
Тибқи омори ҳукумати Узбекистон, дар шаш моҳи аввали соли ҷорӣ, мизони тиҷорат миёни Афғонистон ва Узбекистон ба ҳудуди як миллиард доллар расидааст.
Узбекистон аз густариши тиҷорат ва транзит миёни Осиёи Марказӣ ва Ҷанубӣ аз масири Афғонистон ҳимоят мекунад.
Шумори нопадидшудаҳои сели Непал ва Чин ба 3 ҳазор расид
Мақомҳои Непал ва Чин эълон карданд, шумори нопадидшудаҳои сели вайронгари минтақаи Ҳимолой ба наздик ба се ҳазор нафар расида, то кунун ҷасадҳои 633 қурбонӣ пайдо шудааст.
Ин сел, ки рӯзи 26 август дар пайи кандани як яхпора оғоз шуд, ҳаҷми бузурге аз об, ях, санг ва гилу лойро ба сӯи деҳаҳо, пулҳо ва нерӯгоҳҳои барқӣ-обии минтақаҳои марзии Непал ва Тибет равона кард.
Дар Непал 626 нафар кушта ва 2426 нафар, аз ҷумла, садҳои шаҳрванди хориҷӣ нопадид шудаанд. Мақомҳои Чин низ аз ҳалокати ҳафт нафар ва нопадид шудани беш аз 550 тан дар Тибет хабар додаанд.
Бисёре аз нопадидшудаҳо, зоирони ҳиндӣ дар масири як кӯҳи барои пайравони ин дин муқаддас ва кормандони нерӯгоҳҳои барқӣ-обӣ ҳастанд. Артиши Непал ҳамчунин дар талош аст беш аз 100 нафар гирифтор дар тунели як нерӯгоҳро наҷот диҳад.
Амалиёти ҷустуҷӯ ва наҷот рӯзи 29 август бинобар борандагӣ ва тумани ғафс дар бахшҳое аз Непал, мутаваққиф шуд. Ҳукумати Непал хостори кӯмаки фаннии хориҷӣ барои наҷоти афроди гирифтор дар тунелҳо, шиносоии қурбониён, озмоишҳои генетикӣ ва бозсозии роҳҳо ва шабакаҳои иртибототӣ шудааст.
Вазорати молияи ин кишвар ҳаҷми хисороти бозсозии минтақаҳои вайроншударо чаҳор то панҷ миллиард доллар бароварда кард.
Салиби Сурх эълон кардааст, ки мумин аст ҳудуди 93 ҳазор нафар аз ин фоҷеа осеб дида бошанд ва бо идомаи амалиёти ҷустуҷӯ, эҳтимоли афзоиши шумори қурбониён вуҷуд дорад.
СММ эълон кардааст, ки нерӯ ва таҷҳизот барои кӯмак ба минтақаҳои осебдида мефиристад.
Амрико низ гуфтааст, як мушовири вокуниш ба ҳодисаҳои табиӣ ба минтақа мефиристад ва 500 ҳазор доллар кӯмак ҷудо мекунад.
Ҳинд эълон кард, амалиёти имдодро бо ҳукумати Непал ҳамоҳанг мекунад ва Кореяи Ҷанубӣ низ аз фиристодани як тими зудамал хабар додааст.
Бозори наздимарзии "Рузвай" миёни Дарвоз ва Нусай боз шуд
Бозори наздимарзии "Рузвай" миёни ноҳияи Дарвози Тоҷикистон ва Нусайи Афғонистон, ки бинобар нооромиҳо дар он сӯи марз ду ҳафта боз баста буд, дигарбора боз шудааст.
Манбаъҳои маҳаллӣ дар Дарвози Тоҷикистон ва Нусайи Афғонистон ба Радиои Озодӣ гуфтанд, ки бозор дар ду рӯзи охир ба таври маъмулӣ фаъолият мекунад ва сокинони ҳар ду ҷониб ашёи мавриди ниёзи худро аз он харидорӣ мекунанд.
Ин бозори наздимарзӣ дар деҳаи Рузвайи Дарвози Тоҷикистон ҷойгир аст ва сокинони ду тарафи марз ҳақ доранд, ҳар ҳафта рӯзҳои шанбе ва якшанбе ҷамъ омада, хариду фурӯш кунанд.
Ноҳияи Нусай дар вилояти Бадахшони Афғонистон рӯзҳои 11-17-уми август шоҳиди даргирӣ миёни нерӯҳои ҳукумати "Толибон" ва Ҷумъахон Фотеҳ, фармондеҳи норозии ин гурӯҳ, буд. Дар он рӯзҳо Ҷасмина, сокини 21-солаи ноҳияи Дарвози Тоҷикистон, бар асари тирандозӣ аз ҷониби Афғонистон ба ҳалокат расид.
Дар пасманзари ин ҳодиса бозор барои ду ҳафта баста буд. Манобеи Радиои Озодӣ ин тасмимро ба вазъи амниятӣ вобаста дониста буданд.
Шумори қурбониёни ҳамла дар Украина ба 37 нафар расид
Мақомот дар Украина гуфтанд, ки шумори қурбониёни ҳамлаҳои ахири бесарнишинҳои Русия ба анборе дар ноҳияи Бучанскии вилояти Киев, ки шоми 28 август рух дод, то 37 нафар афзоиш ёфт. Дар ин бора рӯзи 29 август дар маъмурияти вилояти Киев хабар доданд.
Поккории маҳалли таркишҳо идома дорад ва эҳтимол меравад, ки шумори қурбониҳо боз ҳам афзоиш ёбад. Беш аз 40 нафар маҷрӯҳ шудааст. 370 нафар аз маҳалли ҳамлаҳо ба ҷои дигар интиқол додан шуданд. Аз хисороте дар як бинои истиқоматӣ ҳам хабарҳо мерасад.
Дар ин анбор муҳимоти низомӣ нигаҳдорӣ мешуд. Президенти Украина Владимир Зеленский гуфт, ки низомиёни рус ба анбори нирӯҳои мудофиавӣ зарба заданд ва ба гуфтаи ӯ, ин ҷои дурусте барои ташкили анбор набуд. Баъди ҳамла минаву паҳпод ва дигар силоҳҳо, ки дар дохил нигаҳдорӣ мешуданд, ба таркидан шурӯъ карданд.
Ӯ ин ҳодисаро бо як ҷиноят баробар кард. Мақомоти Украина гуфтаанд, ки анбори силоҳ набояд наздик ба маҳалли зисти одамон сохта шавад.
Нахуствазири Украина Сергей Коретский ин ҳодисаро "хунукназарии ҷинояткорона" қаламдод кард. Вазорати дифои Русия гуфт, ки анбор ба ширкати Fire Point марбут аст, ки аз ҷумла бо истеҳсоли мушакҳои "Фламинго" машғул буда дар ҳамла зидди Русия истифода мешаванд.
Тасдиқи мустақилонаи ин иддао вуҷуд надорад. Дар паи сӯхтори азими рухдода баъди ин ҳамлаҳо шоҳроҳи пайвандкунандаи Киев ва ғарби Украина як муддат баста шуд ва рӯзона қисман боз гардид.
Анҷоми боздиди коршиноси СММ аз Тоҷикистон
Боздиди коршиноси мустақили Шӯрои ҳуқуқи инсони СММ оид ба таъсири қарзи беруна ва ҳуқуқи инсон Аттия Варис аз Тоҷикистон бар анҷом расид. Рӯзи 28 август дар вазорати корҳои хориҷии Тоҷикистон бо ширкати ӯ ва муовини вазири умури хориҷӣ Идибек Қаландар дар ҳузури намояндагони вазорату идораҳои давлатии Тоҷикистон нишасти хабарӣ барпо шуд.
Дар хабарномаи ВКХ омадааст, ки А. Варис мушоҳидаҳои пешакии худро аз натиҷаи сафар ва мулоқотҳои расмӣ бо мақомоти давлатии Тоҷикистонро муаррифӣ намуд. Ҷузъиёте аз он беш нашр намешавад, вале дар иттилоияи Дафтари СММ оид ба ҳуқуқи инсон дар Осиёи Марказӣ гуфта шуд, ки дар мулоқоташ бо Идибеки Қаландар рӯзи 18 август, коршиноси мустақили СММ масоили вобаста ба рушди босубот, маблағгузории бомасъулият ва зарурати ҳамкориҳои байналмилалӣ дар самти рушди ҳуқуқи инсон ва беҳбуди некӯаҳволиро баррасӣ кардааст.
“Дар ҷараёни мулоқот коршиноси мустақил аз Тоҷикистон хостааст, ки дар муҳокимаҳои байналмилалии вобаста ба тақсими одилонаи даромадҳо аз истифода баҳрҳои боз ва андозбандиҳои байналмилалӣ фаъолона иштирок кунад”, омадааст дар хабарнома.
Дар ҷараёни боздидаш аз Тоҷикистон Аттия Варис бо намояндагони ҷомеаи шаҳрвандӣ мулоқот карда ба ВМКБ ҳам сафар кардааст.
Ҷузъиёти бештаре дар бораи диду боздидҳову сӯҳбатҳои коршиноси СММ дар Тоҷикистон то ҳол нашр нашудааст.
Дар Русия як ганҷи нуқраии қадимиро ёфтаанд
Дар шаҳри Коломнаи вилояти Маскав дар ҷараёни ковишҳои бостоншиносӣ ганҷи қадимиву бисёр арзишманде пайдо шудааст. Гурӯҳи донишмандони Пажӯҳишгоҳи археологияи Академияи илмҳои Русия, ки бо ковишҳо дар маркази шаҳри Коломна машғул будааст, дар наздикиҳои қалъа як кӯзаро пайдо кардааст, ки дар дохилаш 2600 тангаи нуқраии қадимии сохти маҳаллӣ ҷой дошт. Дар ин бора рӯзи 26 август худи донишмандон бо нашри як видео хабар доданд.
Донишмандон мегӯянд, ки аксари ин тангаҳо дар асри 15 дар худи Коломна сохта шудааст. Коломна дар он давра баъди Маскав дуюмин муҳимтарин шаҳри таҳти назари шоҳзода Василий Донской будааст. Донишмандон мегӯянд, ки дар миёни бозёфтҳои онҳо ҳам намунаҳое аз тангаҳои шинос ва ҳам бисёр нодир ё беназир дида мешаванд.
Худи ганҷи ёфтшуда азимтарин намунае аз бозёфтҳои асри 15 дониста мешавад. Тахмини донишмандон ин аст, ки тангаи зиёде дар як кӯза метавонад моли кадом соҳибкор ё сокини маҳаллии сарватманде бошад, ки дар хидмати шоҳзода қарор доштааст.
Ҷасади хоҳарони дар Иморот кушташударо ба Қазоқистон интиқол доданд
Консулгарии Қазоқистон дар шаҳри Дубай ҷасади ду хоҳари ба таври мармуз кушташуда дар Шарҷаро ба ватан интиқол додааст. Тафтиши ҳодисаи куштори хоҳарон Ақҷан ва Жулдиз Боҳановҳо аз тарафи мақомоти тафтишотии Имороти Муттаҳидаи Араб идома дорад ва дипломатҳои Қазоқистон бо додситонии маҳаллӣ дар ҳамкорӣ қарор доранд.
Дар ин бора рӯзи 29 август Жонболат Усенов, сухангӯи ВКХ Қазоқистон дар Телеграм-каналаш хабар додааст.
Хабари пайдо шудани ҷасади ду шаҳрванди Қазоқистон, хоҳарони 20 ва 22-сола дар шаҳри Шарҷа чанд рӯз пеш аз тарафи ВКХ нашр шуд. Хонаводаи Ақҷан ва Жулдиз Боҳановҳо гуфтаанд, ки хоҳарон бо мақсади кор дар як ороишгоҳ ба Шарҷа рафта буданд ва бояд моҳи сентябр бармегаштанд.
Як ҳафта пеш аз фоҷеа тамоси онҳо бо хонавода пурра қатъ шуд. Ҷасади хоҳаронро дар як хонаи иҷора пайдо карданд. Як хеши ин хоҳарон ба нашрияи Tengrinews.kz гуфтааст:
“Мо онҳоро дар ҳама ҷо ҷустуҷӯ кардем, ҳатто фикр кардем, ки шояд дар идораи полиси муҳоҷират бошанд. Вале дирӯз ба мо гуфтанд, ки ду ҷасадро ошкор карданд ва онҳо хоҳарони мо ҳастанд. Онҳоро куштаанд ва як нафарро ҳам бо гумони содир кардани ин куштор аллакай боздошт кардаанд. Ӯ ҳам аз Қазоқистон аст”. Вале маълум нест, то куҷо ин ҳама маълумот дуруст аст ва чӣ сабаб буд, ки ин куштор рӯй додааст.
Беш аз 600 қурбонии сел дар Непал; номаи андӯҳ аз Душанбе
Шумори қурбониёни обхезии мудҳиш дар Непал ва Тибет 623 нафарро ташкил дода, боз наздики се ҳазор кас беномунишон дониста мешаванд. Дар ин бора рӯзи 29 август DW бо истинод ба мақомоти Непал ва Чин хабар дод.
То рӯзи шанбе дар Непал ҷасади 616 ва дар Тибет 7 нафарро пайдо ва шиносоӣ карданд. Федератсияи байналмилалии Салиби Сурх ва Ҳилоли Аҳмар гуфт, дар фоҷеаи рӯзи чоршанбе 93 ҳазор кас зарар дид.
Рӯзи 29 август президенти Тоҷикистон Эмомалӣ Раҳмон дар номаи тасаллияте ба унвонии раиси ҷумҳурии Непал Рам Чандра Паудел аз талафоти сершумори ҷонӣ, осеб дидани теъдоди зиёди мардум ва харобиҳо изҳори андӯҳ кардааст.
Рӯзи 26 август баъди он ки як пора яхи азим ҳамроҳ бо лою санг ба як дарёи кӯҳӣ афтод, оби зиёде соҳилро рахна карда, деҳоти маҳалли зисти атрофи онро пахш ва босуръат ба дигар минтақаҳо ҳаракат карда ба сели харобиоваре табдил шуд.
Зарбаи сангинтарини офати табиӣ ба қитъаи роҳи Катманду-Лҳаса расидааст, ки як роҳи бисёр маъруфи туристӣ ба ҳисоб меравад. Дар миёни нопадидшудаҳо садҳо ҷаҳонгардони хориҷӣ ҳам мебошанд.
Раҳмон ва Путин дар Бишкек бо ҳам мулоқот мекунанд
Рӯзи 1 сентябр дар шаҳри Бишкек мулоқоти президенти Тоҷикистон Эмомалӣ Раҳмон ва раиси ҷумҳурии Русия Владимир Путин баргузор мешавад. Ин мулоқот баъди анҷоми ҷаласаи сарони кишварҳои узви Созмони ҳамкориҳои Шонгҳой (СҲШ) барпо хоҳад шуд, ки қарор аст рӯзи 31 август дар пойтахти Қирғизистон ҷараён гирад.
Дар бораи мулоқоти ду президент ёвари Путин – Юрий Ушаков хабар дод. Ӯ гуфт, баъди он ки ҷаласаи СҲШ ва ҳама чорабиниҳои дигар ба анҷом мерасанд, Путин дар чанд мулоқоти дуҷониба иштирок хоҳад кард ва якеаш бо раҳбари Тоҷикистон аст.
Ушаков нагуфт, ки дар ин дидор чӣ масъалаҳо баррасӣ мешаванд. Бори охир Путин ва Раҳмон нӯҳ моҳ пеш, рӯзи 22 декабри соли 2025 дар шаҳри Санкт-Петербург дар ҳошияи нишасти ғайрирасмии сарони Ҷомеаи кишварҳои ҳамсуд (СНГ) дидор карда буданд ва дар кори он Путин ваъда дод, омилони куштори навраси тоҷик Қобилҷон Алиев ҷазо хоҳанд гирифт.
Маълум нест ҷараёни тафтишот чӣ гуна пеш меравад, вале куштори ин кӯдак як намунаи бераҳмии махсус нисбат ба як кӯдаки муҳоҷирон дониста мешавад.
Мулоқоти Путин ва Раҳмон дар ҳоле барпо мешавад, ки дар Русия аз аввали моҳи сентябр қоидаҳои хеле сахту маҳдудкунандаи қабули муҳоҷирони корӣ ҷорӣ мешавад ва изҳороти муҳоҷирситезонаи сиёсатмадорону намояндагони давлати ин кишвар бештару баландтар садо медиҳанд.
Баъди ҳамла ба толори консертии “Крокус” дар вилояти Маскав баҳори соли 2024, дар Русия фишор болои муҳоҷирони тоҷик ҳарчи бештар шуда, Думаи давлатӣ даҳҳо қонуни маҳдудкунандаи фаъолияти коргарони хориҷиро қабул кард.
Эълони нави даъват ба артиш дар Тоҷикистон
Эмомалӣ Раҳмон, раисҷумҳури Тоҷикистон, аз мақомот хостааст, ки ҷавонони аз 18 то 27-соларо барои хидмат дар артиш даъват кунанд. Фармон дар ин бора рӯзи 28-уми август имзо шуд.
Даъват аз аввали моҳи октябр то охири ноябри имсол бо ҳузури маъмурони милиса ва амниятӣ идома хоҳад кард. Дар ин муддат сарбозонеро, ки муҳлати хидматашон ба поён расидааст, ба хонаҳояшон ҷавоб медиҳанд.
Тибқи фармони нав, Вазорати тандурустӣ вазифадор шудааст, ки "барои муоинаи даъватшавандагон табибону мутахассисони ботаҷрибаро сафарбар намояд".
Тайи солҳои охир ба сафи артиш фиристодани ҷавонони бемор, ки гоҳо бо марги онҳо низ анҷомидааст, дар Тоҷикистон сабт шудааст.
Аз ҷумла, моҳи феврали имсол наздикони Эмомҷон Шаханов, як сокини ноҳияи Муъминобод шикоят карданд, ки ӯро, ки гирифтори бемории рӯҳӣ аст, бо зӯр ба артиш бурданд.
Даъват ба сафи нерӯҳои мусаллаҳи Тоҷикистон ҳар сол бо сарусадо дар бораи сарпечии ҷавонон аз хидмат ва ё сарбозшикор (облава) мегузарад.
Як сабаби аслии сарпечии ҷавонон аз хидмати ҳарбии ҳатмии дусоларо дар бадрафторӣ дар сафи нерӯҳои мусаллаҳи Тоҷикистон меноманд.
Мақомот баръакс мегӯянд, вазъ дар қисмҳои ҳарбӣ назар ба солҳои пеш беҳтар шудааст.
Гуфтугӯ