Мақомоти интизомии Тоҷикистон соли 2016 рӯйхати беш аз 300 намояндаи ақаллиятҳои ҷинсиро тартиб дода, гуфта буданд, ин афрод ба "гурӯҳи хатар" шомиланд.

Рамазон Раҳимзода 15-уми феврал ҳастии чунин рӯйхатро қотеона ва батакрор рад кард. Ӯ гуфт, ВКД-и Тоҷикистон ҳаргиз чунин рӯйхатеро пешниҳод ё нашр накардааст.

"Рӯйхатро мумкин шумо чоп карда бошед, дар мо чунин рӯйхат нест. Вақте ахборотро гуфтед, росташро бо далел гӯед,"-гуфт Рамазон Раҳимзода.

Радиои Озодӣ нусхаи маҷаллаи “Қонуният”-и сохторҳои ҳифзи қонун аз соли 2017-ро пайдо кард, ки худи вазири корҳои дохилӣ дар мақолааш аз таҳия шудани чунин рӯйхат хабар додааст.

Видеоро инҷо тамошо кунед:

Рамазон Раҳимзода дар шумораи №1-и ин маҷалла аз соли 2017 дар саҳифаи 24-уми он навиштааст, ки дар амалиёти ходимони ҳифзи ҳуқуқ бо номи шартии “Ахлоқ” ва “Тозакунӣ” ин афрод ошкор ва мушаххас шудаанд.

Дар ин маҷалла аз номи Вазири ВКД чунин гуфта шудааст: “Дар соли 2016 бошад гурӯҳҳои корӣ оид ба шомилшавии ҷавонон ба гурӯҳҳои осебпазири гомосексуалистон, лесбиянкаҳо, бисексуалҳо ва трансексуалҳо созмон дода шуда, дар натиҷаи ҳамкориҳои дуҷониба 367 нафар шаҳрвандони ҷумҳурӣ, ки ба гурӯҳҳои осебпазир шомиланд, дастрас карда шудаанд, ки аз ин миқдор 319 нафар ба ҳамҷинсгароии мард бо мард ва 48 нафари дигараш бо ҷимои зан бо зан мебошанд, ки онҳо дар қайдҳои махсуси оперативӣ гузошта шудаанд.”

Хабарнигори Радиои Озодӣ зимни нишасти хабарӣ ҳамин масъаларо аз вазир Рамазон Раҳимзода пурсид, вале ӯ бо асабоният инро рад кард ва суол дод, оё хабарнигор худ ин феҳрастро дидааст. Вай бо қатъият гуфт, ки чунин феҳрист ҳаргиз таҳия ё пешниҳод нашудааст. Вазир бо ин шева мақолаи худашро рад кард ва маълум нест, дар он мақола рост мегӯяд ё дар нишасти хабарӣ.

Масъалаи ҳамҷинсгароён дар ҷомеаи Тоҷикистон як мавзӯи ҳассос аст. Камшуморон ё ақаллиятҳои ҷинсӣ дар ҷомеаи суннатии Тоҷикистон "аз афроди осебпазир" ба шумор мераванд ва аз ин рӯ, аз ифшои ҳуввияти худ меҳаросанд ва танҳо ба созмонҳои ҳомии ҳуқуқ аз рӯзгори худ мегӯянд. Теъдоди дақиқи ҳамҷинсгароён дар Тоҷикистон маълум нест.

Гурӯҳҳои ҳомии ҳуқуқи башар мегӯянд, камшуморони ҷинсӣ дар Тоҷикистн воқеан ҳам ба бахши гурӯҳҳои осебпазир шомиланд ва дар ҳолатҳои зиёд на танҳо аъзои ҷомеа, балки ходимони полис ҳам ҳуқуқи онҳоро нақз мекунанд.

Дар гузориши гузориши Департаменти давлатии ИМА: “Вазъи ҳуқуқи башар дар Тоҷикистон” гуфта шудааст, ки мақомоти тоҷик “садҳо шахсони мутаалиқ ба аҳли ҳамчинсгароён аз марду зан, шахсони дуҷинса ва ҷинс ивазнамуда (LGBTI)- ро чун бахше аз нияти таъини рафтори ахлоқӣ ва ҳимояти қишрҳои осебпазири ҷомеа” рӯйхат кардааст.

Шайх Ҳасина, нахуствазири пешини Бангладеш, ки моҳи декабри соли 2024 дар пайи эътирозҳои омавӣ сарнагун шуда буд, дар ғайбаш ба эъдом маҳкум гардид.

Як додгоҳи Бангладеш 17-уми октябр Шайх Ҳасинаро ба "ҷиноят алайҳи башарият" гунаҳкор кард. Додгоҳ Ҳасинаро ба саркӯби маргбори муътаризон гунаҳкор кард.

Ба гузориши хабаргузории Франс пресс, баъди эълони ҳукм ҳозирон дар толори додгоҳ хурсандӣ карданд.

Худи Шайх Ҳасина, ки ба Ҳинд фирор кардааст аз ширкат дар мурофиаҳои додгоҳӣ худдорӣ кард ва ин додгоҳро фармоишӣ хонд.

Шайх Ҳасинаи 77-сола дар пайи эътирозҳои густурда 5-уми августи соли гузашта истеъфо дода, аз Бангладеш фирор кард. Ҳасина 15 соли ахир нахуствазири Бангладеш буд.

Доналд Трамп, раиси ҷумҳури Амрико аз эҳтимоли гуфтугӯ бо Николас Мадуро, президенти Венесуэла хабар дод.

Раиси ҷумҳури Амрико рӯзи якшанбеи 16-уми ноябр ба хабарнигорон гуфт, “мумкин аст гуфтугӯҳое бо Модуро дошта бошем, бояд бинем чӣ мешавад. Онҳо мехоҳанд суҳбат кунанд”.

Трамп бидуни шарҳи ҷузъиёти бештар танҳо илова кард, ки “Венесуэла мехоҳад гуфтугӯ кунад. Маънояш чист? Шумо бигӯед... ман бо ҳар касе суҳбат мекунам”.

Таниш миёни ИМА ва Венесуэла дар моҳҳои ахир бештар шудааст.

Ситоди кулли Нерӯҳои мусаллаҳи Украина гуфт, ки низомиёни ин кишвар ба як корхонаи коркарди нафт дар вилояти Самараи Русия зарба задаанд.

Ба иттилои манбаъ, ин корхона артиши Русияро бо сӯзишворӣ таъмин мекунад.

Вячеслав Федоришичев, волии Самара, ҳамларо тасдиқ кард, аммо хабар дод, ки онро "хунсо кардаанд" ва "талафоте нест".

Нерӯҳои мусаллаҳи Украина ҳамчунин гузориш доданд, ки як анбори ҳавопаймоҳои бесарнишин ва ҷойи нигоҳдории сӯзишвориро дар қаламрави зери назорати Русия дар вилояти Донетск хароб карданд.

Дар ҳамин ҳол, мақомоти Волгоград дар Русия дар хабарномае гуфтанд, ки шаби 15 ба 16-уми ноябр ҳавопаймоҳои бесарнишини украинӣ дар ноҳияҳои Дзержинский ва Тракторозаводский ба биноҳои истиқоматӣ зарар расонидаанд. Се кас маҷруҳ шудааст.

Вазорати дифои Русия гуфт, нерӯҳои дифои ҳавоии ин кишвар шаби гузашта дар фазои Волгоград 17 ва дар вилояти Самара 23 ҳавопаймои бесарнишини Украинаро раҳгирӣ карданд. Ба иттилои вазорат, дар умум 57 ҳавопаймои бесарнишин нобуд карда шудаанд.

Тасдиқи иддаои ҷонибҳои даргир феълан ғайриимкон аст.

Бритониё эълон кард, ки давраи интизории паноҳандагонро барои гирифтани иқомати доимӣ дар ин кишвар ба таври чашмгир афзоиш медиҳад.

Тарҳ шоми 15-уми ноябр муаррифӣ шуд.

Бар асоси он, касоне, ки ба таври ғайриқонунӣ вориди Бритониё шуда, сипас паноҳандагӣ мегиранд, бояд 20 сол сабр кунанд, то битавонанд барои иқомати доимӣ дархост диҳанд. Ин муҳлат дар ҳоли ҳозир ба панҷ сол баробар аст.

Барои онҳое, ки аз роҳҳои қонунӣ вориди Бритониё мешаванд, низ муҳлати интизорӣ барои гирифтани иқомати доимӣ то даҳ сол боло бурда мешавад.

Вазорати умури дохилии Бритониё ин барномаро "ислоҳоти бузургтарин дар сиёсати паноҳандагӣ" номид ва гуфт, ҳадафи он коҳиши вуруди ғайриқонунии муҳоҷирон ва осон кардани ихроҷи ин гуна афрод аст.

Тибқи қоидаҳои ҳозира, шахсоне, ки дар Бритониё мақоми гуреза доранд, то 5 сол ҳимоят мешаванд. Вазорати корҳои дохилии Бритониё гуфт, ин давра низ ба дуним сол поин оварда мешавад ва бозгашти шахсоне, ки кишварашон "амн" ҳисобида мешавад, иҷборӣ хоҳад гашт.

Бар асоси тарҳи нав, масъулияти давлат барои таъмини паноҳандагон бо хона ва ироаи кумакҳои молӣ дар Бритониё, ки аз соли 2005 ба ин сӯ ҷорист, лағв карда мешавад.

Додгоҳи Исфара (вилояти Суғд) як сокини ин шаҳрро бо гуноҳи фурӯхтани адабиёти динии бидуни иҷоза зиёда аз 4 ҳазор сомонӣ, муодили беш аз чорсад доллар, ҷарима бастааст. Хулосаи қарори додгоҳ рӯзи 10-уми ноябр нашр шуд.

Мақомот аз ӯ ном нагирифта, гуфтаанд, дар бозори марказии Исфара ба савдои адабиёте машғул буд, ки “фурӯш ва паҳн карданаш бе ҳуҷҷати расмии диншиносӣ манъ аст.”

Мавқеи ин сокини Исфара маълум нест ва ҳам номгӯйи адабиёт нашр нашудааст.

Шерзод Аслиддинзода, муовини раиси Додгоҳи Исфара, дар хулосаи қарор гуфтааст, ҳафт китоб мусодира ва барои нигоҳдорӣ ба Кумитаи дин фиристода шуд: "Вақте адабиёти динӣ бе санҷиш... паҳн мешавад, ин эҳтимол дорад, ки ҳамвора хатарҳои идеологӣ ва экстремистӣ дар байни ҷомеа ҷой мегиранд."

Мақомоти Тоҷикистон соли 2009 ва пас аз қабули қонуни озодии виҷдон ва иттиҳодияҳои динӣ, воридот ва нашру паҳни адабиёти диниро зери назорат гирифтаанд. Аз он сол ба баъд бе иҷозаи мақомот ворид кардан, чоп ё фурӯхтани адабиёти динӣ бидуни санҷиш ва иҷозаи расмӣ манъ аст.

Мақомот ин корро барои пешгирӣ аз паҳн шудани адабиёти ифротӣ дуруст медонанд, аммо баъзе аз созмонҳои ҳомии ҳуқуқи башар онро ҳамчун бахше аз маҳдудиятҳои озодии бунёдӣ танқид мекунанд.

Хабаргузории "Рейтерс" ба нақл аз Кремлин навишт, ки президенти Русия Владимир Путин бо сарвазири Исроил Бенямин Нетаняҳу гап задааст. Ин суҳбат рӯзи 15-уми ноябр телефонӣ анҷом шуд.

Дар баёнияи Кремлин омадааст, ки ду ҷониб дар бораи вазъияти Ховари Миёна, аз ҷумла таҳаввулот дар Ғазза, Сурия ва барномаи ҳастаии Эрон гуфтугӯ карданд. Тафсилот дода нашудааст.

Ба гузориши "Таймз Исроил", дафтари Нетаняҳу низ танҳо бо ишора ба суҳбати ду тараф дар бораи "масоили минтақаӣ" иктифо кард.

Гуфтугӯи раҳбарони Русия ва Исроил се рӯз баъди он сурат гирифт, ки Эрон ба бозрасони Созмони байнулмилалии энержии атомӣ иҷоза надод, то ба таъсисоти ҳастаияш, ки Исроил ва Амрико бомбборон кардаанд, дастрасӣ пайдо кунанд.

Доналд Трамп, раисҷумҳури Амрико эълон кардааст, ки барои ҳифзи обрӯи худ ва талаби товон то панҷ миллиард доллар аз Би-би-сӣ, иқдоми қонунӣ мекунад.

Раисҷумҳури Амрико шаби гузашта ба хабарнигорон гуфт, "мо аз онҳо байни як то панҷ миллиард доллар товон талаб хоҳем кард. Эҳтимолан ҳафтаи оянда. Мо маҷбурем ин корро анҷом диҳем".

Ин изҳорот пас аз он матраҳ шуд, ки Би-би-сӣ аз раисҷумҳури Амрико Трамп бахшиш пурсид, аммо дархости ӯ барои пардохти товони як миллиард долларро напазируфт.

Би-би-сӣ муттаҳам аст, ки суханронии 6-уми январи соли 2021-и Трампро ба тавре нашр кардааст, ки нишон диҳад ӯ мардумро мустақиман ба хушунат фаро хондааст.

Би-би-сӣ дар ин маврид иштибоҳи худро пазируфта ва ба ҳамин далел, мудири умумии ин расонаи давлатии Бритониё ва мудири бахши хабари он истеъфо доданд.

Пеш аз ин вакилони дифои Трамп то рӯзи ҷумъа ба Би-би-сӣ фурсат дода буданд, ки расман узрхоҳӣ кунад ва товони муносиб бипардозад.

Бо ин ҳол, Би-би-сӣ танҳо узрхоҳии расмӣ карда, дархости Трамп барои пардохти товони якмиллиарддоллариро қабул накардааст.

Президенти Тоҷикистон Эмомалӣ Раҳмон рӯзи 15 ноябр барои иштирок дар Вохӯрии машваратии сарони кишварҳои Осиёи Миёна, ба Тошканд сафар кард.

Дафтари матуботи раёсати ҷумҳури Тоҷикистон иттилоъ дод, ки Эмомалӣ Раҳмонро дар ин сафар вазири корҳои хориҷӣ, дабири Шӯрои амнияти Тоҷикистон ва дигар мақомоти расмӣ ҳамроҳӣ мекунанд.

Вохӯрии ҳафтуми машваратии сарони кишварҳои Осиёи Миёна рӯзҳои 15-16 ноябр бо мизбонии президенти Узбекистон Шавкат Мирзиёев доир мешавад.

Қарор аст дар он президентҳои Тоҷикистон, Қирғизистон, Қазоқистон ва Туркманистон иштирок кунанд.

Президенти Озарбойҷон Илҳом Алиев соли савум аст, ки ба унвони меҳмони фахрӣ дар ин ҳамоиш иштирок мекунад.

Ба иттилои расонаҳои Узбекистон, дастури кори ин нишаст, афзоиши ҳамкориҳои минтақаӣ ва иҷрои тарҳҳои калони муштарак мебошад.

Раҳбарони минтақа ҳамчунин дар бораи масоили минтақавӣ ва байналмилалӣ табодули назар хоҳанд кард.

Қарор аст, ки дар поёни ин вохӯрӣ, бастае аз санадҳои чандҷониба имзо шавад.

Вазорати меҳнат, муҳоҷират ва шуғли аҳолии Тоҷикистон бо пахши як хабар шаҳрвандони кишварро барои кор дар Гурҷистон дар самти бурдарасонӣ ё "доставка", даъват кардааст.

Ин ниҳод гуфтааст, ки музди кор дар як соат беш аз 6 доллар ё ҳудуди 58 сомонӣ аст. Аммо хариди билет, хӯрок ва ҷои зист аз ҳисоби худи коргар пардохт карда мешавад.

Хоҳишмандон дар асоси шартномаи меҳнатӣ ба муддати як сол дар ин кишвар фаъолият карда метавонанд. Талабот барои корҷӯён чунин аст: сину сол аз 18 то 45, надоштани доғи судӣ ва доштани шаҳодатномаи ронандагӣ (категорияҳои А ва В).

Мақомоти Тоҷикистон солҳои ахир талош доранд, ба ҷуз Русия, роҳи муҳоҷирони тоҷик ба дигар кишварҳо боз шавад.

Аз ҷумла, шаҳрвандони Тоҷикистон барои кор ба Британияи Кабир фиристода мешаванд. Вале шумораи онҳо зиёд нест.

Дар пайи ҳамлаҳои ҳавоии Русия ба Киев ва дигар шаҳрҳои Украина, чандин тан кушта ва даҳҳо тани дигар, аз ҷумла, як зани обистан захмӣ шудаанд. Нерӯҳои русӣ дар ҳамлаҳои 14 ноябр аз 430 ҳавопаймои бесарнишин ва 18 мушак истифода кардаанд.

Владимир Зеленский, раисҷумҳури Украина дар шабакаи "Телеграм" гуфтааст, ки ҳамлаҳои рӯзи дар рӯзи 14 ноябр яке аз бузургтарин ҳамлаҳои Русия дар моҳҳои ахир аст. Зеленский дар идома гуфтааст, ки шаҳрҳои Суми, Одесса ва Харков ҳам ҳадаф қарор гирифтанд.

Ба гуфтаи Зеленский, нерӯҳои дифои ҳавоии Украина 405 бесарнишин ва 14 мушак, аз ҷумла, ду мушаки баллистикии навъи "Кинжал"-ро раҳгирӣ карданд.

Зеленский афзудааст, ки даҳҳо бинои баландошёна, бемористонҳо ва Сафорати Озарбойҷон дар ин ҳамлаҳо осеб дидаанд.

Вазорати корҳои хориҷии Озарбойҷон низ гуфтааст, ки дар ҳамла бахше аз девори сафорати ин кишвар дар шаҳри Киев тахриб шуда ва хисороти қобили таваҷҷуҳе ба ин бинои дипломатӣ ворид шудааст.

Ин ҳамлаҳои ҳавоӣ шаҳракҳои истиқоматиро дар саросари пойтахти Украина ҳадаф қарор додааст.

Виталий Кличко, шаҳрдори Киев низ гуфтааст, ки ҳудуди 30 бино тахриб шудааст.

Тимир Ткаченко, раиси идораи низомии Киев гуфтааст, ки дар ин ҳамлаҳо шаш нафар дар пойтахт кушта шуда, дастикам 35 тани дигар захм бардоштаанд, ки ду тани онҳо кӯдакон буданд.

Русия ҳамеша инкор кардааст, ки зербиноҳои ғайринизомиро ҳадаф қарор медиҳад.

Бародари ӯ, Ашраф Гулов, домоди президент Эмомалӣ Раҳмон сафири Тоҷикистон дар Имороти Муттаҳидаи Араб аст.

Сомонаи президенти Тоҷикистон рӯзи 14-уми ноябр навиштааст, ки "бо розигии президент" дар шаҳру вилоятҳои Русия "аз ҳисоби кадрҳои дорои таҷрибаву собиқаи корӣ ва ҷавобгӯ ба талаботи муосир таъин гардиданд."

Исми афроди нав расман эълон нашудааст, вале манобеи Радиои Озодӣ гуфтанд, ки Хуршед Шерализода, ки ёвари вазири корҳои хориҷӣ буд, ба кори наваш дар Санкт-Петербург оғоз кардааст.

Бар асоси маълумотҳои дарёфтӣ, Заррина Исмоилзода, консули генералии Тоҷикистон дар шаҳри Новосибирски Россия шудааст. Ӯ нахустин зани дипломат аст, ки консули Тоҷикистон дар яке аз вилоятҳои бузурги Русия таъин мешавад.

Бар асоси тағйироти ахир, Холназар Ғоиб, консулии генералии Тоҷикистон дар Екатеринбург, Файзуллозода Фаридун, консули генералии Тоҷикистон дар шаҳри Уфаи Русия муқаррар шудаанд.

Муродзода Фирӯз, консулии генералии Тоҷикистон дар шаҳри Алмаатои Қазоқистон таъин гаштааст.

Дар шаҳрҳои Русия, ки консулҳои Тоҷикистон дигар шудаанд, теъдоди зиёди муҳоҷирони тоҷик кору фаъолият мекунанд.

Муҳоҷирони тоҷик пайваста аз озору азият ва нақзи ҳуқуқашон дар Русия шикоят мекунанд ва намояндагиҳои Тоҷикистонро танқид мекунанд, ки ба додашон намерасанд.

Тибқи созиш миёни Узбекистон ва ҳукумати Толибон, маҳсулоти кишоварзии Афғонистон аз тариқи фурудгоҳҳои Узбекистон ба кишварҳои дигар содир мешавад.

Сухангӯи раиси вилояти Балхи Афғонистон рӯзи 13 ноябр дар сафҳаи Х навишт, ки бар асоси тафоҳумномаи имзошуда бо Узбекистон, мева ва сабзавоти Афғонистон аз тариқи фурудгоҳҳои Узбекистон ба бозорҳои дигар кишварҳои Осиёи Марказӣ, Осиёи Ҷанубӣ ва Аврупо содир мешавад.

Аз тақрибан як моҳ ба ин тараф Покистон роҳҳои заминии худро бо Афғонистон бастааст, ки дар натиҷаи он тоҷирони афғон зарари зиёд дидаанд.

Мулло Абдулғанӣ Бародар, муовини раиси вазирони ҳукумати Толибон рӯзи 12 нобяр аз тоҷирони афғон хостааст, ки масирҳои дигари тиҷоратиро бар ивази Покистон ҷустуҷӯ кунанд.

Шуморе аз тоҷирони афғон ба Радиои Озодӣ гуфтанд, ин шояд барои онҳо осон набошад, ки ба зудӣ масирҳои дигаре бар ивази роҳҳои Покистон барои худ пайдо кунанд, зеро Покистон бозори калон ва наздик барои мева ва сабзавоти Афғонистон мебошад.

Дар шаҳри Душанбе ҳазору 312 падару модарро барои таълиму тарбияи нодурусти фарзандонашон ҷазо додаанд. Ин омор давоми 10 моҳи соли ҷорӣ ба қайд гирифта шудааст.

Пулиси Душанбе дар ин бора хабар дода навиштааст, ки онҳо бар асоси моддаи 90-и Кодекси ҳуқуқвайронкунии маъмурӣ, яъне иҷро накардани ӯҳдадории таълиму тарбияи кӯдак, ҷазо гирифтаанд.

Ин банди қонунгузорӣ аз 750 сомонӣ ҷарима то 10 рӯз ҳабсро пешбинӣ мекунад.

Пулиси пойтахт бо нашри ин омор, гуфтааст, ки дар аксари мавридҳо маҳз аз беназоратӣ ва бемасъулиятии падару модарон наврасон истифода бурда, даст ба кирдорҳои гуногуни ҳуқуқвайронкунанда ва ҳатто ҷиноятҳои вазнин мезананд.

Ин омор дар ҳоле нашр мешавад, ки чанд рӯз қабл дар пайи кордкашии мактаббачагон дар шаҳри Душанбе як хонанда ҷон бохта, навраси дигар маҷрӯҳ шуд.

Вазири дифои Покистон мегӯяд, ки кишвараш омодаи ҷанг дар ду ҷабҳа бо Афғонистон ва Ҳинд аст. Хоҷа Осиф ин матлабро рӯзи 13 ноябр дар як нишасти хабарӣ дар Исломобод баён кард.

Пеш аз ин Муҳсин Нақавӣ, вазири корҳои дохилии Покистон ба порлумони ин кишвар гуфта буд, ки ду ҳамлаи интиҳорӣ дар ин кишвар дар ин ҳафта, аз сӯи афғонҳо анҷом шудааст.

Дар яке аз ин ҳамлаҳо дар рӯзи 11 ноябр дар Исломобод 12 нафар кушта ва 27 тани дигар захмӣ шуданд.

Ба гуфтаи мақомоти покистонӣ, таркиши дигаре рӯзи 10 ноябр дар наздикии дарвозаи як мактаби ҳарбӣ дар Вазиристони ҷанубӣ рух дод ва боиси кушта шудани се нафар шуд.

Вазири дифои Покистон ҳамчунин Кобулро ба таъмини молии терроризм ва Ҳинро ба ҳимоят аз он барои пешгирӣ аз сулҳ дар Покистон, муттаҳам кард.

Покистон пеш аз ин низ чунин иддао карда буд ва ҳукуматҳои Ҳинд ва Толибон дар Афғонистон онро рад карда буданд.

Пеш аз имзои президент, вакилони Маҷлиси Намояндагони ИМА низ ин лоиҳаро тасвиб карданд.

"Қатъи кори ҳукумат", ки 43 рӯз давом кард, дарозтарин "шатдаун" дар таърихи ИМА будааст.

Ин тарҳро дар ибтидо вакилони Сенати ИМА пас аз баҳсҳои тӯлонӣ имзо карда, барои баррасӣ ба Маҷлиси Намояндагон фиристоданд. Пас аз имзои президент ин тарҳ амалӣ мешавад.

Аз замони қатъи кори ҳукумат тақрибан 1 миллиону 500 ҳазор коргари давлатӣ ба рухсатии бемузд фиристода шуда буд, ки ҳоло дубора сари кор бармегарданд.

Бар асоси ин тарҳи муваққат, кори ниҳодҳои давлатӣ то 30-юми январи соли 2026 мисли соли пеш маблағгузорӣ мешавад. То охири моҳи январ бояд вакилони Сенат тарҳи солонаи буҷаро қабул кунанд.

Дар Амрико соли молӣ аз рӯзи 1-уми октябр оғоз ёфт, вале то ин муддат Конгресс натавонист, ягон қарори ҳатто муваққатӣ ҳам дар бораи маблағгузории буҷаи ҳукумати марказӣ қабул кунад. Вакилони ду ҳизб сари нуктаҳои буҷа ихтилофи назар доштанд, аз ин рӯ, маблағгузории қисме аз идораҳои ҳукумати марказӣ қатъ шуда буд.

Барои қабули қонун дар бораи маблағгузории буҷаи Амрико бояд на камтар аз 60 вакили Сенат раъй диҳад, аммо Ҳизби Ҷумҳурихоҳ дар Сенат фақат 53 раъй дошт, ки барои қабули санад кофӣ набуд. Рӯзи якшанбеи гузашта гурӯҳи 8-нафарии вакилони Ҳизби Демократ бо раҳбарони Ҳизби Ҷумҳурихоҳ ва намояндагони ҳукумати Амрико ба созиш расиданд, ки роҳро барои тасвиби буҷаи муваққат боз кард.

Дар иваз вакилони ҷумҳурихоҳ гуфтаанд, ки омодаи баррасии хостаи демократҳо, яъне идомаи кумак барои бимаи тиббии мардуми камбизоат дар Амрико ҳастанд. Як талаби асосии демократҳо барои қабули буҷа ҳамин аст.

Дарозтарин "шатдаун" боиси бекор мондани ҳазорон корманди давлатӣ, лағв шудани парвозҳо ба ИМА ва лағви кумакҳо ба мардуми камбизоат шуда буд. Агар ин вазъ то моҳи дигар давом мекард, низомиёни амрикоӣ низ бекор мемонданд.