Ба иттилои Радиои Азаттик, бо қарори додгоҳи ноҳияи Первомайскии шаҳри Бишкек аз 6-уми июл Собирбеков то 3 август дар боздошт хоҳад монд. Дар додгоҳ ба Бахши қирғизии Радиои Озодӣ гуфтанд, ки боздоштшуда инчунин дар “таҳияи маводи мухаддир бо ҳадафи фурӯш дар ҳаҷми махсусан калон” гумонбар мешавад. Мувофиқи Кодекси ҷиноии Қирғизистон, ба ӯ аз 12 то 15 соли зиндон таҳдид мекунад.

Дар бораи ҳабси номзади ҷияни президент рӯзи 10-уми июл маълум шуд, ҳарчанд ҳабси ӯ 5 июл сурат гирифт. Собирбеков танҳо нест ва ӯро дар миёни на камтар аз даҳ нафари дигар бо айни чунин иттиҳом боздошт кардаанд. Сухангӯи президенти Қирғизистон Аскат Алагозов дар шарҳи ин хабар гуфт, ки ҳадафи асосии ин мард “пайдо кардани афроди сарпаноҳ дар ҳукумат ба хотири таъмини амнияти корҳои ҷиноиаш будааст.” Маълум нест худи Собирбеков дар ин бора чӣ назар дорад.

Дар бораи домоди Нуркоҷоева моҳи июн маълум шуд, вақте ӯ навори видеоиеро аз маросими ботантана ва серхарҷу бошукӯҳи пешниҳоди издивоҷашро дар шабакаҳои иҷтимоӣ нашр кард. Аксарият аз хароҷоти ҳангуфти ин маросим ва истифода шудани чархболи вазорати корҳои изтирории Қирғизистон интиқод карданд.

Президент баъдан аз мардум узр хост ва гуфт, ки хешовандони президент бояд намунаи ибрат бошанд.

Дар Пекин як нақшаи дарозмуддати сармоягузорӣ миёни Тоҷикистон ва Бонки осиёии сармоягузориҳои инфрасохторӣ ба имзо расид. Сомонаи президенти Тоҷикистон рӯзи 11 май хабар дод, ки барои иҷрои ин нақша бонк беш аз 800 миллион доллари амрикоӣ ихтисос медиҳад.

Имзои санадҳо баъди мулоқоти Эмомалӣ Раҳмон бо президенти Бонки осиёии сармоягузориҳои инфрасохторӣ Зоу Ҷиайи барпо шуд. Ҷузъиёте аз ин беш нашр намешавад.

Раҳмон бо ҳадафи як сафари серӯзаи давлатӣ дар Чин қарор дорад ва ин сафар то 14 май давом мекунад. Дар сӯҳбат бо Ҷиайи, “таваҷҷуҳи зиёд ба густариши ҳамкорӣ дар бахшҳои зерсохторӣ, ба мисли энергетика, нақлиёту роҳсозӣ, обрасонӣ, технологияҳои рақамию “сабз” ва ҳамчунин кишоварзӣ зоҳир гардид”, гуфта шудааст дар хабар. То ҳол ин бонк ба Тоҷикистон барои иҷрои як қатор лоиҳаҳои зерсохторӣ 400 миллион доллар кӯмак кардааст.

Чин сармоягузори муҳими иқтисоди Тоҷикистон ба шумор меравад ва ҳамзамон бо ёриҳои афзоянда, ба бовари мунаққидон, вобастагии сиёсию молии Душанбе аз Пекин ҳам афзун мешавад.

Ба навиштани сомонаи ВКД Тоҷикистон, “ҳамкориҳо дар самти муҳоҷират, диверсификатсия, раванди муҳоҷират, содда гардонидани низоми ҳуҷҷатгузорӣ барои муҳоҷирон ва пешгирии қаллобӣ” баррасӣ гардид.

Раҳимзода ва Юнг инчунин мавзӯи мубориза бо ҷинояткорӣ ва реадмиссияро баррасӣ карданд, ки бозгардони шаҳрвандонро ба ватанашон дар сурати содир шудани ҷиноят пешбинӣ мекунад.

Дар идома омадааст, ки тақвияти ҳамкориҳо дар самти мубориза бар зидди ҷиноятҳои муташаккили трансмиллӣ, киберҷиноятҳо (қаллобии онлайнӣ), терроризм, экстремизм, гардиши ғайриқонунии воситаҳои нашъадор ва дигар мавзӯъҳо ҳам дар ин дидор матраҳ шудааст.

Олмон мегӯяд, дар қаламрави ин кишвар зиёда аз 30 ҳазор шаҳрванди Тоҷикистон кору зиндагӣ доранд. Шумори паноҳҷӯни Тоҷикистон дар Олмон бахусус баъди саркӯби мухолифон дар даҳ соли пеш бештар шуд ва аз он замон то кунун Душанбе талош кардааст мунаққидони ҳукуматро ба ватан баргардонад.

Дар чанд ҳодисаи ихроҷу истирдоди шаҳрвандони Тоҷикистон, ки баъдан ба мӯҳлатҳои тӯлонӣ зиндон шуданд, мақомоти Олмонро барои ҳамкорӣ бо ҳукумате интиқод карданд, ки даст ба таъқибҳои фаромиллии мунаққидонаш мезанад.

Ин нафарон ширкатдорони барномаи ба истилоҳ «Переселение» аст, ки ба Русия кӯчидани шаҳрвандони Русия аз кишварҳои беруна, аз ҷумла Тоҷикистонро дар назар мегирад. Нашрияи "Важные истории" навиштааст, ки омори ахир поинтарин баъди соли 2011 мебошад.

Дар як мусоҳибааш бо ТАСС Геннадий Овечко, сардори раёсати ВКХ Русия оид ба кор бо ҳамватанон дар хориҷа гуфт, соли 2025 аз кишварҳои дигар ба Русия 27 ҳазор кас кӯчидааст ва дар хориҷа аз номи 33,5 ҳазор кас 14 ҳазор аризаи кӯчидан дастрас шудааст.

Овечко гуфтааст, соли 2025 назар ба соле аз он пеш ба Русия чор баробар бештар кӯчидаанд. Вале ӯ омори соли 2024-ро нагуфт. Ӯ иддао кардааст, ки шумори кӯчидаҳо аз кишварҳои хориҷаи ба истилоҳ ғайридӯст бо Русия, мисли Олмон, Латвия, Эстония, Украина, Литва, Канада ва ИМА афзудааст, ҳарчанд ин оморро ҳам дақиқ нагуфт.

Вале нашрияи "Важные истории" пештар бо такя ба ВКД Русия навишт, ки соли 2025 аз рӯи барномаи «Переселение» 26,7 ҳазор нафар кӯчидаанд. Вале ба фарқ аз ВКХ, нашрия гуфт, ки ин омори камтарин баъди соли 2011 мебошад, чун он сол шумори кӯчидаҳо 31,4 ҳазор нафарро ташкил додааст. Соли 2022 ин омор 64,8 нафарро ташкил дода буд.

Ба навиштаи ин нашрия, баръакс, аксари кӯчидаҳо аз кишварҳои Осиёи Марказӣ мебошанд. Аз Қазоқистон - наздики 9,5 ҳазор, аз Қирғизистон - беш аз 2,8 ҳазор, аз Узбекистон – беш аз 2,6 ҳазор, аз Туркманистон - беш аз 2,5 ҳазор ва аз Тоҷикистон 2426 ҳазор нафар кӯчидаанд. Инҳо 75% ҳамаи омори соли 2025-ро ташкил медиҳанд. Нашрия мегӯяд, воқеан ҳам, шумори хосторони аз Аврупо ба Русия кӯчидан зиёд шудааст. Масалан, аз Олмон соли 2025 ба Русия 1,3 ҳазор кас кӯчидааст. Соли 2021 шумори онҳо 110 кас буд.

Барномаи давлатии ёрӣ ба ҳамватанон дар хориҷа барои кӯчидани ихтиёрӣ ба Русия соли 2006 ҷорӣ шуд. Овечко гуфтааст, ки аз соли 2007 то 2025 ба Русия беш аз 1,25 миллион нафар кӯчидаанд. Омори кӯчидаҳо солҳои 2014-2015 якбора афзуд. "Важные истории" мегӯяд, далелаш ин буд, ки сокинони минтақаҳои ишғолшудаи Украинаро, ки бояд дар Русия қонунӣ мешуданд, маҷбур мекарданд, ки ба ин барнома ҳамроҳ шаванд.

Нетаняҳу, ки рӯзи 10 май бо CBS News сӯҳбат мекард, ба саволи хабарнигор дар бораи ин ки шояд Исроил бояд масъалаи муносибатҳои молиаш бо ИМА-ро бозбинӣ кунад, аз ҷумла гуфт:

«Бешубҳа. Ман дар ин бора ба президент Трамп ҳам гуфта будам. Ман инро ба мардуми худи мо ҳам гуфта будам. Ман мехоҳам ёриҳои молии амрикоӣ, ёриҳои молии ҳамкориҳои ҳарбии моро ба сифр расонам. Мо соле 3,8 миллиард доллар дарёфт мекунем ва ба бовари ман, мо бояд аз ёриҳои боқимондаи ҳарбӣ даст кашем».

Нетаняҳу пешниҳод кардааст, ки коҳиши дастгирии молии ИМА «ҳамин ҳоло» шурӯъ шуда, дар давоми даҳ соли баъдӣ пурра хотима дода шавад.

CBS мегӯяд, ин изҳорот дар пасманзари кам шудани пуштибонии Исроил дар чашми мардуми Амрико садо дод. Ба иттилои маркази назарсанҷии Pew, 60% пурсидашудаҳо дар ИМА нисбат ба Исроил назари манфии худро баён кардаанд ва ин 20% бештар назар ба чор соли пеш будааст. CBS менависад, яке аз сабабҳои поинравии маҳбубияти Исроил дар назарпурсиҳои Амрико ҷанг дар Навори Ғазза мебошад.

Bloomberg менависад, дар доираи як созишномаи даҳсолаи ҳамкорӣ, ИМА ба Исроил соле дар ҳаҷми 3,8 миллиард доллар ёриҳо мерасонад ва ин санад то соли 2028 эътибор дорад.

Дар як гузориши хадамоти таҳқиқоти Конгресс омадааст, ки Исроил баъди Ҷанги Дуюми Ҷаҳон дарёфткунандаи азимтарини ёриҳои ИМА ба шумор меравад. То имрӯз ИМА ба Исроил (бе назардошти таваррум) барои тақвияти иқтисод ва қувваҳои мусаллаҳи ин кишвар дар ҳаҷми 174 миллиард доллар ёрӣ расонидааст.

Дар матни ин гузориш, аз ҷумла, омадааст: «Дар давоми ду даҳсолаи гузашта, аз ҷумла, дар давраи низои идомаёбандаи Исроил алайҳи ҲАМОС, муносибати ҷомеаи Амрико ба Исроил, ки дар пурсишҳои афкори умум инъикос шудааст, назар ба давраҳои гузашта каме дигар шудааст. Бо вуҷуди ин ки қонунгузорон мисли гузашта ба тарафдоӣ аз ёриҳои ИМА ба Исроил овоз медиҳанд, баъзе гурӯҳҳои идеологии сиёсӣ ба бозбинии муносибатҳои деринаи байни ИМА ва Исроил дар робита бо расонидани ёриҳо даъват мекунанд».

Талафоти ҷонӣ ҳам вуҷуд дорад. Александр Прокудин, волии Херсон гуфт, дар натиҷаи ҳамлаҳои Русия ду нафар куштаву ду нафар захмӣ шудаанд. Шаби душанбе ҳамлаи паҳподҳо дар ноҳияи Никополскии вилояти Днепропетровск ба қайд гирифта шуд. Ба гуфтаи раиси ин вилоят Александр Ганжа, дар ин ҳамлаҳо як ошхонаи тобистонаву як иншооти ёрирасоне оташ гирифтааст.

Дар ҷабҳа ҳам задухӯрдҳо давом дорад. Ба иттилои Ситоди кулли артиши Украина, то субҳи 11 май тахминан 180 ҳамла ба қайд гирифта шудааст. Ҳамлаҳои густурсаву пуршиддате мисли рӯзҳои пешин дар самти Покровск, Гуляйполе ва Лиман ба вуқӯъ пайваст.

Рӯзи 10 май президенти Украина Владимир Зеленский гуфт, ки дар рӯзи дуюми оташбас Русия ҳеҷ ҳамлаи ҳавоӣ ё мушакие ба хоки Украина анҷом надод ва украиниҳо ҳам айни чунин корро кардаанд. Айни замон, ба гуфтаи Зеленский, дар хатти ҷабҳа вазъ ором набуд ва низомиёни рус ҳуҷумҳои худро давом медоданд. Рӯзи 8 май президенти ИМА Доналд Трамп гуфт, ки дар миёни Русия ва Украина оташбаси серӯза ҷорӣ шуд ва қарор аст то 11 май давом кунад. Трамп гуфт, ин оташбас ҳамчунин табодули зиндониҳоро аз рӯи нақшаи 1000 ба 1000 дар назар мегирад.

Додситонии Душанбе ба таҳқиқи навори озори наврас дар як кӯдакистони пойтахт оғоз кардааст.

Дар ин видео, ки 9-уми май ба шабакаҳои иҷтимоӣ роҳ ёфт, дида мешавад, ки мураббии кӯдакистон як духтари хурдсолро бо шаппотӣ мезанад.

Раёсати корҳои дохилии Душанбе дар хабарномае навишт, ҳодисаи мазкур санаи 7-уми май дар кӯдакистони рақами 12-и ноҳияи Исмоили Сомонӣ рух додааст.

Ба гуфтаи ин манбаъ, додситонии пойтахт "нисбати мураббӣ ва дигар шахсони масъули муассисаи мазкур санҷиш"-ро оғоз кардааст ва пас аз анҷоми таҳқиқ ба ин амал "баҳои ҳуқуқӣ" дода мешавад.

Назари масъулини кӯдакистон ва волидайни наврас ба қазия маълум нест.

Пахши навори мазкур нигаронии корбарони шабакаҳои иҷтимоиро дар бораи шароити кори кӯдакистонҳои пойтахт ба миён овард. Соли гузашта Раҳим Саидзода, вазири маорифи Тоҷикистон ҳам "аз корҳои таълимию тарбиявӣ ва ободонӣ" дар баъзе кӯдакистонҳои Душанбе нигаронӣ карда буд.

Раиси ҷумҳури Тоҷикистон Эмомалӣ Раҳмон субҳи 11-уми май бо сафари давлатӣ ба Чин рафтааст.

Дафтари матбуоти президенти Тоҷикистон бо нашри ин хабар гуфт, вазири корҳои хориҷӣ, ёвари раиси ҷумҳур дар умури робитаҳои хориҷӣ ва роҳбарони як қатор вазорату идораҳо ҳамроҳи Эмомалӣ Раҳмон ба Чин рафтаанд.

Тибқи иттилои расмӣ, сафари Эмомалӣ Раҳмон ба Чин то 14-уми май идома мекунад. Вазорати корҳои хориҷии Тоҷикистон пештар гуфта буд, дар сафари Эмомалӣ Раҳмон ба Чин баррасии "ҳамкориҳои дуҷониба дар соҳаҳои сиёсат, иқтисод ва тиҷорат, саноат, сармоягузорӣ ва гуманитарӣ" дар назар аст.

Чин аз сармоягузорони аслӣ ба иқтисоди Тоҷикистон ба шумор меравад ва Душанбе аз Пекин бештар аз 700 миллион доллар қарздор аст. Қарзҳои зиёди Чин қаблан нигарониҳоеро ба миён овардааст.

Ширкатҳои чинӣ дар бахши истихроҷи сарватҳои табии Тоҷикистон ҳузури густурда доранд. Ду ширкати чинӣ “Зарафшон” ва “Покруд” 84 дарсади захираҳои тилои солонаи Тоҷикистонро истихроҷ мекунанд.

Пойбандии ҳарчи бештари иқтисодии Тоҷикистон аз Чин ин нигарониро ба вуҷуд овардааст, ки Душанбе дар оянда пойбанди амру иродаи сиёсии Пекин хоҳад гашт.

Тоҷикистон ва Чин тақрибан 500 километр марзи муштарак доранд.

Пулиси Тоҷикистон як сокини шаҳри Панҷакентро барои ғайриқонунӣ иваз кардани асъор боздошт кардааст.

Ба гузориши Вазорати корҳои дохилӣ, ин марди 44-сола рӯзи 6-уми май дар бозори шаҳри Истаравшан аз як нафар "4 ҳазор сомонӣ ва 200-доллари амрикоиро гирифта, бар ивазаш 253 ҳазор сӯми узбекӣ додааст."

Вазорат мегӯяд, ин мард моҳи марти имсол "барои муомилот бо асъори хориҷӣ" ҷазои маъмурӣ гирифта буд.

Назари фарди боздоштшуда ба қазия маълум нест.

Аз рӯи ин иттиҳоми ба ин нафар то 28,5 ҳазор сомонӣ ҷарима ва ё то ду сол зиндон таҳдид мекунад.

Дар Тоҷикистон иваз кардани асъори хориҷӣ танҳо дар бонкҳо иҷозат аст.

Дар ҳамлаи мошини бомбгузоришуда ва афроди мусаллаҳ ба як посгоҳи пулис дар минтақаи Хайбар-Пахтунхоҳи Покистон ҳадди ақал 15 кас кушта шудааст.

Ин иттилоъро хабаргузории “Рейтерз” бо такя ба пулиси Покистон нашр кардааст.

Бино ба иттилои нашршуда, ин ҳамла рӯзи шанбе нахуст бо инфиҷори як мошини бомбгузоришуда оғоз шуд ва пас аз он афроди мусаллаҳ ба посгоҳ ворид шудаанд.

Дар ин ҳамла ҳамчунин 3 каси дигар захмӣ шудааст. Гуруҳе бо номи “Иттиҳоди муҷоҳидин” масъулияти ҳамларо ба уҳда гирифтааст.

Ҳавошиносони тоҷик аз боронгариҳои сахт, омадани сел ва раъду барқ дар рӯзҳои 10-11 май ҳушдор доданд. Оҷонсии ҳавошиносии Тоҷикистон мегӯяд дар ин рӯзҳо дар бештари минтақаҳои кишвар ба ҷуз, шарқи ВМКБ, ҳавои номусоид пешбинӣ шудааст.

Аз ҷумла, боронгариҳои сахт дар Душанбе, Варзоб, Ҳисор, Рӯдакӣ, Ёвон, Ваҳдат, Файзобод, Рашт, Нуробод, Тавилдара, Лахш, Панҷакент, Данғара, Восеъ, Балҷувон, Темурмалик, Кӯлоб, Ховалинг, Муъминобод, Шамсиддин Шоҳин ва Дарвоз дар назар аст.

Ба иттилои Оҷонси ҳавошиносии Тоҷикистон, дар ин рузҳо бинобар боронгариҳои зиёд эҳтимол дорад сатҳи оби рӯдхонаҳои Зарафшон, Обихингов, Вахш, Ёхсу, Қизилсӯ ва дарёҳое, ки аз қаторкӯҳҳои Ҳисор ҷорӣ мешаванд, боло равад.

Оҷонсӣ ба мардум тавсия додааст, ки дар ин рузҳо аз чораҳои эҳтиётӣ кор бигиранд ва ҷуйбору селроҳаҳоро пок кунанд. Ба сокинони минтақаҳои куҳистонӣ тавсия шудааст, ки дар ин рӯзҳо аз рафтан ба ҷамъоварии ҳезум, алаф, гиёҳҳои шифобахш ва моҳигирӣ, худдорӣ кунанд.

Ҳушдори ҳавошиносон дар ҳолест, ки Тоҷикистон рӯзҳои 1-4 май шоҳиди боронҳои зиёд ва омадани сел буд. Дар пайи ин офати табиӣ ҳадди ақал 4 нафар ба ҳалокат расида, панҷ каси дигар бистарӣ шудаанд. Садҳо хонавода дар саросари кишвар зиёни моддӣ диҳанд.

Эмомалӣ Раҳмон, раисҷумҳури Тоҷикистон рӯзи 9 май дар Душанбе дар маросими таҷлил аз Рӯзи ғалаба иштирок кард. Ин маросим дар боғи Ғалабаи пойтахт доир шуд.

Тибқи иттилои расмӣ, дар ин маросим мақомоти давлатӣ, собиқадорони ҷанг, намояндагони ниҳодҳои дипломатии муқими Душанбе ва Пойгоҳи низомии 201-и Русия дар Тоҷикистон, иштирок доштанд.

Солҳои Ҷанги дуюми ҷаҳон аз Тоҷикистон тахминан 300 ҳазор нафар ба ҷанг сафарбар шуданд ва сеяки онҳо барнагаштанд. 65 зодаи Тоҷикистон унвони Қаҳрамони Иттиҳоди Шӯравиро гирифтаанд.

Дар гузашта мақомот дар Тоҷикистон таъкид кардаанд, ки ғалаба дар Ҷанги дуюми ҷаҳон бо баҳои ҷонсупориҳои даҳҳо ҳазор сарбоз аз Тоҷикистон ва дигар ҷумҳуриҳои шӯравии собиқ ҳам ба даст омадааст.

Эмомалӣ Раҳмон яке аз ширкатдорони доимии ҷашнҳои Рӯзи ғалаба дар Маскав ҳатто баъди шурӯи ҷанги Русия алайҳи Украина буд. Аммо ба иттилои манбаъҳо дар ҳукумати Тоҷикистон, ӯ имсол дар ҷашнҳои Рӯзи ғалаба дар Маскав иштирок намекунад.

Манбаъҳо дар вилояти Бадахшони Афғонистон мегӯянд, ки афроди ҳукумати Толибон бо мардуми маҳал бар сари тахриби киштзорҳои кӯкнор даргир шуданд. Ин даргирӣ рӯзи ҷумъа, 8 май дар деҳаи Отанҷилави ноҳияи Аргу, рух додааст.

Ба гуфтаи як манбаи Радиои Аврупои Озод/Радиои Озодӣ, даргирӣ замоне оғоз шуд, ки мардуми маҳал монеи тахриби киштзорҳои кӯкнор шуданд.

Як манбаи огоҳ дар маҳал, ки бинобар ҳассосияти мавзӯъ нахост номаш гирифта шавад, ба Радиои Озодӣ гуфт, ки дар ин даргирӣ як кӯдак кушта шудааст. Бархе расонаҳо ҳам аз кушта шудани як кӯдак дар ин даргириҳо навиштанд.

Мақомоти ҳукумати Толибон дар вилояти Бадахшон ба пурсиши Радиои Озодӣ дар мавриди ин ҳодиса посух надоданд.

Пеш аз ин ҳам мардуми маҳал дар ноҳияҳои мухталифи Бадахшон барои пешгирӣ аз тахриби киштзорҳои кӯкнор бо афроди Толибон даргир шуданд.

Чунин даргирӣ соли гузашта миёни афроди Толибон ва мардуми маҳал дар ноҳияи Хош рух дода буд. Масъулини Толибон он замон бе ироаи омори мушаххас тасдиқ карданд, ки ин даргириҳо талафоте доштааст.

Аммо манбаъҳои ғайрирасмӣ гуфтанд, ки дар ин даргириҳо дастикам 15 сокини маҳаллӣ кушта ва 60 нафар захмӣ шуданд.

Раҳбари Толибон дар моҳи апрели соли 2022 кишти кӯкнор, тавлид ва қочоқ тарёкро ғайриқонунӣ эълон кард.

Омори наве аз мизбони кишти кӯкнор дар Афғонистон нашр нашудааст. Аммо гузориши СММ нишон медиҳад, ки дар кишти кӯкнор дар ин кишвар дар соли 2025 нисбат ба соли қабли он 20 дарсад коҳиш ёфтааст.

Дар пайи ҳамлаи паҳпод ё ҳавопаймоҳои бесарнишин ба Ростови лаби Дон, кори 13 фурудгоҳ дар ҷануби Русия маҳдуд шуда, даҳҳо парвоз бекор шудааст.

Вазорати нақлиёти Русия гуфт, ин тасмим баъди ҳамлаи паҳподҳо ба идораи маъмурии корхонаи Аэронавигатсия дар ҷануби Русия гирифта шуд.

Ба ин тартиб, кори фурудгоҳҳои Астрахан, Владикавказ, Волгоград, Гелендҷик, Грозний, Краснодар, Махачқалъа, Магас, Минералние Водий, Налчик, Сочи, Ставропол ва Элиста муваққатан маҳдуд шуд. Дертар хабар расид, ки дар кори фурудгоҳи Внуковои Маскав ҳам мушкил пеш омадааст.

Ба иттилои Асотсиатсияи ширкатҳои сайёҳии Русия, дар пайи мушкил шудани кори фурудгоҳҳо дар ҷануби Русия, зиёда аз 80 парвоз бекор ё ба таъхир гузошта шуданд. Телеграм канали Mash, аз таъхири 184 парвоз хабар додааст.

Вазорати корҳои хориҷии Чин хабар дод, ки президенти Тоҷикистон бо як сафари давлатӣ ба ин кишвар меравад.

Дар хабарномаи ин ниҳод рӯзи 8-уми май гуфта шудааст, ки сафар бо даъвати президенти Чин Си Ҷин Пин рӯзҳои 11 то 14-уми май сурат мегирад.

Дар ин хабар маълумоти бештаре дар бораи барномаи сафари президенти Тоҷикистон чизе гуфта нашудааст.

Мақомоти Тоҷикистон ҳам дар ин бора шарҳе надодаанд.

Чин аз сармоягузорони аслӣ ба иқтисоди Тоҷикистон ба шумор меравад ва қарзи Душанбе аз Пекин бештар аз 700 миллион долларро ташкил медиҳад. Қарзҳои зиёди Чин қаблан нигарониҳоеро ба миён овардааст.

Тоҷикистон ва Чин тақрибан 500 километр марзи муштарак доранд.

Абдуллобек Қувватбеков, маъруф ба Мавлавӣ Абдуллои Язгуломӣ, як рӯҳонии тоҷик, баъди панҷ сол аз зиндон озод шудааст.

Ду нафар аз пайвандони ин рӯҳонӣ 8-уми май ба Радиои Озодӣ гуфтанд, Мавлавӣ Абдуллои Язгуломӣ чор рӯз пеш озод шуд ва ҳоло дар назди пайвандонаш аст.

"Ӯ панҷ сол муҳлати ҷазоро пурра адо кард ва баъд озодаш карданд", - гуфт яке аз наздикони ин рӯҳонӣ.

Дар наворе, ки ба дасти Радиои Озодӣ расид дида мешавад, ки ин рӯҳониро шабона ба хонааш овардаанд.

Мавлавӣ Абдуллои Язгуломӣ моҳи июни соли 2021 дар шаҳри Душанбе боздошт шуд ва се моҳ пас додгоҳ ӯро барои “даъват ба ифротгароӣ тариқи интернет” ба панҷ сол зиндон маҳкум кард. Ду шогирди ин рӯҳонӣ чорунимсолӣ аз озодӣ маҳрум шуда буданд. Наздикони Мавлавӣ Абдуллоҳ он вақт ҳукмро ноодилона хонданд.

Мавлавӣ Абдуллои Язгуломӣ зодаи ҷамоати Язғуломи ноҳияи Ванҷ буда, дар ин ноҳия аз эътибори хос бархӯрдор аст. Наворҳои зиёде аз маъвизаҳои ӯ дар шабакаҳои иҷтимоӣ нашр шудааст, вале дар ниҳоят маълум нашуд, ки кадом аз онҳоро мақомот "даъват ба ифротгароӣ" унвон карданд.

Тайи солҳои ахир шумори зиёде аз зодагони Язгулом ба иттиҳоми "ифротгароӣ" маҳкум ба зиндон шудаанд.

Аз ҷумла, Додгоҳи олии Тоҷикистон дар моҳи декабри соли 2024-ум 31 нафарро аз ҷамоати Язгуломи ноҳияи Ванҷ аз 2 то 23 сол ҳабс маҳкум кард. 27 нафари онҳо дар ноҳияи Ванҷ дастгир шуда, чор тани дигарро аз хориҷ овардаанд.

Соли гузашта ҳам Додгоҳи ноҳияи Исмоили Сомонӣ беш аз 10 зодаи Язгуломро ба муҳлатҳои гуногун маҳкум ба зиндон кард.

Язгулом ҷамоате дар ноҳияи Ванҷ аст, вале баъзе аз зодагонаш дар пойтахт ва гӯшаҳои дигари Тоҷикистон кору зиндагӣ мекунанд.