Дилмурод Эргашеви 42-соларо, ки 13 соли охир дар шаҳри Клеваи Олмон мезист, моҳи ноябри соли 2024 ба Тоҷикистон бозпас фиристоданд ва Додгоҳи ноҳияи Синои шаҳри Душанбе ӯро бо иттиҳоми "даъвати оммавӣ барои фаъолияти ифротгароӣ", ба ҳашт соли зиндон маҳкум кард. Ҳоло ӯ дар маҳбаси Хуҷанд адои ҷазо мекунад.
Тибқи иттилои манбаъҳои Радиои Озодӣ, нахустин мурофиаи ин парванда дар Додгоҳи Дюсселдорфи Олмон рӯзи 21 август баргузор шуд. Фарҳод Одинаев, фаъоли мадании тоҷик ба Радиои Озодӣ гуфт, ки ӯ дар нахустини мурофиаи додгоҳӣ ҳамчун шоҳид, иштирок кард.
"Ман ҳамчун шоҳид ба таври хаттӣ дар бораи бо чӣ шева ихроҷ шудани Эргашев ва боздошт шудану ба 8 соли зиндон маҳкум шуданаш бо далелҳо навиштам",-гуфт Фарҳод Одинаев.
Ба гуфтаи Фарҳод Одинаев, вакили дифои Дилмурод Эргашев дар мурофиа дархост кардааст, ки ихроҷи ӯ ба таври қонунӣ бекор ва ин зодаи Тоҷикистон ба ҷойи пешини зисташ дар Олмон баргардонида шавад.
Фарҳод Одинаев мегӯяд, дар мурофиа ба ҷуз адвокати Дилмурод Эргашев, инчунин вакилони Бундестаг(порлумони Олмон) низ ширкат доштанд. Ин вакилони порлумон дар замони ихроҷи Дилмурод Эргашев, бар тасмими мақомоти он кишвар эътироз карда буданд.
Ба қавли Фарҳод Одинаев, вакилони порлумони Олмон дар мурофиа гуфтаанд, ки "мо набояд интизор шавем, ки далелҳои шиканҷа ё таъқиби Дилмурод Эргашев муайян карда шаванд, балки бояд пешакӣ тафтиш кунем, ки оё ӯ дар хатар ҳаст ё не. Олмон бояд пеш аз ихроҷи шаҳрванд, хатари эҳтимолии шиканҷа ва таъқиби он дар дохили кишварашро ба назар бигирад".
Рӯзномаи маҳалии Олмон "WDR Lokalzeit" дар робита ба ин мурофиа навиштааст, ки агар додгоҳи маъмурии Дюсселдорф ихроҷи Дилмурод Эргашевро ғайриқонунӣ эътироф кунад, ин метавонад ба Олмон барои дар оянда ба Тоҷикистон ихроҷ кардани шаҳрвандони ин кишвар, таъсир гузорад.
Соли гузашта рӯзе пеш аз онки пулиси Олмон мехост, ӯро ба Тоҷикистон бозпас бифристад, Дилмурод Эргашев рагҳои дасту пойи худро бурид, вале пулис ҳамон вақт гуфт, ки ин кор монеи ихроҷи Эргашев нахоҳад шуд.
Созмонҳои ҳомии ҳуқуқ дар гузашта аз ҳукумати Олмон хоста буданд, ки Дилмурод Эргашевро ба Тоҷикистон нафиристад, чун мумкин аст, онҷо барои ақидаҳои худ азобу шиканҷа шавад.
Кишварҳои Аврупо дар солҳои ахир чандин паноҳҷӯи тоҷикро ихроҷ карданд, ки баъдан дар Тоҷикистон боздошт ва ба солҳои тӯлонии зиндон маҳкум шуданд.
Аз ҷумла, Фаррух Икромов моҳи апрели соли 2024 аз Лаҳистон ихроҷ шуд ва дар Тоҷикистон ба 23 сол зиндон маҳкум гашт.
Ҳизбулло Шовализода, як узви ҳизби дар Тоҷикистон мамнӯи наҳзати исломӣ, соли 2020 аз Австрия ба Тоҷикистон бозпас фиристоданд. Ӯро ба 20 сол зиндон маҳкум карданд.
Билол Қурбоналиев, паноҳҷӯи дигари тоҷик ҳам аввали соли 2024 баъди ихроҷ аз Олмон ба Тоҷикистон, ба 10 сол зиндон маҳкум шуд.
Ӯ яке аз ширкатдорони тазоҳуроти мухолифон дар Берлин ҳангоми сафари президент Эмомалӣ Раҳмон ба Олмон буд.
Гуфтугӯ