Ҳукумати Амрико дар чаҳорчӯби як барнома ба ниҳодҳои гумрук ва марзбонии Тоҷикистон ба маблағи ҳудуди як миллион доллар кӯмаки фаннӣ ироа кардааст.
Ричард Ҳоугленд, сафири Амрико дар Тоҷикистон дар маросими супоридани ин кӯмакҳо гуфт, ҳадафи ин барнома кӯмак ба кишварҳо дар амри дарёфти таҷҳизоти фаннӣ ҷиҳати ҳифозат ва назорати марз, махсусан ба манзури ҷилавгирӣ аз қочоқи силоҳи қатли ом ва василаи интиқоли он ва ҳамчунин анвоъи фаъолиятҳои дигари террористӣ мебошад.
Сафири Амрико дар Тоҷикистон афзуд, ки кӯмаки кишвараш ҳеҷ гоҳ ба масъалаи ихроҷи нирӯҳои сарҳадбони Русия аз марзи Тоҷикистону Афғонистон иртиботе надорад. Вале вай ҳамзамон гуфт, нирӯҳои русиро аз марзи Тоҷикистон ихроҷшуда арзёбӣ кардан барвақт аст, зеро асокири сарҳадбони Русия ҳоло дар ин марз боқӣ мондаанд ва раванди таҳвили комили масъулияти ҳифозат ва назорати марз аз марзбонони Русия ба Тоҷикистон соли дигар низ идома хоҳад кард. Аз сӯи дигар, афзуд оқои Ҳоугленд, бар асоси тавофуқоти ҳосилшуда, миёни Тоҷикистону Русия як идда аз афсарони Русия ба ҳайси мушовир дар Тоҷикистон хоҳанд монд.
Дар ҳамин ҳол, Нуралишоҳ Назаров, фармондеҳи ситоди кулли нирӯҳои марзбони Тоҷикистон гуфт, ба ҳангоми таҳвили ҳифозати сарҳад марзбонони Русия, бар асоси созишнома, силоҳ ва лавозимоти худро боқӣ гузоштанд:
«Таҷҳизоте, ки буд, ба мо монд. Масалан, ба маблағи бештар аз 232 миллион рубли русӣ, аммо афсӯс, ҳамон техникаву транспорте, ки гирифтем, камтар фарсуда ҳастанд ва барои онҳоро ба кор даровардан қисмҳои эҳтиётии бениҳоят зиёде ва сӯзишворӣ лозим мешавад. Барои ҳамин ҳоло мушкилот ҳаст.»
Нуралишоҳ Назаров афзуд, ҳукумати Амрико тайи ду соли ахир ба марзбонони тоҷик наздик ба чаҳор миллион доллар кӯмак кардааст ва ин ёрӣ ҷиҳати таҳкими муроқибати марз ва ҷилавгирӣ аз қочоқи маводи мухаддир мусоидат хоҳад кард.
Тибқи иттиллоъи сафорати Амрико дар Тоҷикистон, ин кишвар то ҳоли ҳозир таҷҳизоти мухобиравӣ, дурбин, ҳудуди 7 ҳазор сарулибоси низомӣ, 40 машинаи навъи КАМАЗ, 50 мошини УАЗ ва 20 мошини "Нива" ба нирӯҳои сарҳадбони тоҷик кӯмак кардааст.
Ричард Ҳоугленд сафири Амрико дар Тоҷикистон гуфт, Саидамир Зуҳуров муовини сарвазири Тоҷикистон дар авоили соли равон аз ӯ ва дигар роҳбарони намояндагиҳои хориҷӣ тақозо карда буд, дар пайи ихроҷи нирӯҳои марзбони рус ва дар давраи интиқоли масъулияти муроқибати марз аз сарҳадбонони Русия ба ҳамтоёни тоҷик ба давлати Тоҷикистон кӯмак карда шавад. Ба гуфтаи сафири Амрико, дар ҳоли ҳозир, ҳукумати ӯ ва Иттиҳоди Аврупо як тарҳи наверо ҷиҳати кӯмак ба марзбонони тоҷик омода кардааст, ки он аз оғози соли оянда ба марҳалаи иҷро хохад расид.
Абдуқайюми Қайюмзод, Радиои Озодӣ, Душанбе

Ширкати DBS Group даромади муҳоҷиронеро, ки дар Русия таксӣ меронанд, ҳисоб кардааст. Хабаргузории давлатии "РИА Новости" аз қавли муаллифони таҳқиқот навишт, бе дар назар гирифтани "чойпулӣ", онҳо ба ҳисоби миёна дар моҳе аз 50 то 60 ҳазор рубл даромад доранд. Бо ҳисоби имрӯза, аз 615 то 730 доллар.

Ширкати DBS Group гуфтааст, "ҳоло сиёсати давлати Русия ба эҷоди тавозун дар байни зарурати пур кардани ҷойҳои холӣ ва назорати муҳоҷирон равона шудааст. Ин чораҳо ба таври мустақим ба баъзе соҳаҳо, пеш аз ҳама таксиву таъминот ё боркашонӣ таъсир расонидааст. Дар пасманзари талаботи зиёд ба ин касбҳо маоши ронандаҳо ҳам афзоиш ёфтааст."

Муаллифони таҳқиқот гуфтаанд, имрӯз дар Русия ба ронандагон ниёзи ҷиддӣ вуҷуд дорад, бахусус ин камбудӣ дар бахши таксиронӣ ва таъминот ё логистика мушоҳида мешавад.

Таҳлилгарон таъкид мекунанд, ки дар ин соҳа "нақши муҳоҷирони корӣ бисёр муҳим аст, вале солҳои охир бо сабаби сахттар шудани қоидаҳои муҳоҷират, шумори маҳдуди коргарон ҳамчун ронанда кор мекунанд".

Як соҳибкорро дар вилояти Суғд барои баргузории ҷашни зодрӯз берун аз доираи оила, 117 ҳазор сомонӣ ҷарима кардаанд.

Амирҷон Холматов, раҳбари Ҷамъияти "Сихкабоби Амирӣ"-ро Додгоҳи ноҳияи Бобоҷон Ғафуров ба нақзи нақзи қонун "Дар бораи танзими расму оин ва маросиму тантанаҳо" айбдор донист.

Дафтари матбуоти Раёсати Вазорати корҳои дохилӣ дар вилояти Суғд бо нашри навор аз ҷашни зодрӯз гуфтааст, соҳибкор бар хилофи қонуни танзими анъана, рӯзи 1 уми феврал дар қаҳвахонаи шахсии худ бо ширкати дӯстону ҳамкорон рӯзи таваллудашро таҷлил карда, онро мустақим дар интернет намоиш додааст.

Назари худи соҳибкор маълум нест.

Тибқи қонун "Дар бораи танзими анъана ва ҷашну маросимҳо дар Ҷумҳурии Тоҷикистон", маросими таҷлили ҷашни зодрӯз бояд дар иҳотаи оила гузаронида шавад.

Дар гузашта ҳам чандин нафар дар кишвар барои таҷлил аз зодрӯзи худ бо дӯстон, ба додгоҳ кашида шуда буданд.

Аз ҷумла, овозхон Сураё Қосимова барои таҷлили 60-умин солгардаш дар тарабхона ва ҳамчунин Зулайхо Маҳмадшоева барои ҷашнгирӣ аз зодрӯз, дар ҳаҷми 4 ҳазор сомонӣ ҷарима шуда буданд.

Бархе аз соҳибҷашнҳо ҳам бо норозигӣ аз ин ҳукм талош карда буданд ба зинаҳои болоии додгоҳ шикоят баранд.

Дар пайи ҳамлаҳои Эрон ба Имороти Муттаҳидаи Араб, ин кишвар визаи иқомати "бисёре" аз эрониёни муқими Иморотро дар ҳоле, ки дар хориҷ аз ин кишвар ба сар мебаранд, бекор кардааст. Ҳатто баъзе аз дорандагони эронии "визаи тилоӣ"-и Имороти Муттаҳидаи Араб ҳам аз паёмадҳои ин тасмими расмии ҳукумат канор намонда ва бо лағви иқомат рӯбарӯ шудаанд.

Имороти Муттаҳидаи Араб ва дигар кишварҳои арабии ҳошияи Халиҷи Форс аз ҳамон ибтидои ҷанги Амрико ва Исроил бо Эрон ҳадафи ҳамлаҳои интиқомҷӯёнаи Сипоҳи посдорон қарор гирифтанд. Дар ин миён, танҳо Иморот бинобар гузоришҳо, то кунун ҳадафи беш аз ду ҳазор ҳамлаи мушакӣ ва паҳбодии Эрон будааст.

Як манбаъ ба Радиои Фардо, бахши эронии Радиои Озодӣ тасдиқ кард, ки шумори эрониёне, ки ҳамакнну берун аз Иморот ҳастанд, бо чунин иқдоме рӯбарӯ шуда ва аз имкони бозгашт ба ин кишвар маҳрум шудаанд. Иморот ҳанӯз дар ин бора ба таври расмӣ чизе нагуфтааст.

Бар асоси манбаъҳои ғайрирасмӣ, байни 500 то 800 ҳазор эронӣ дар Имороти Муттаҳидаи Арабӣ, ба вижа Дубай ва Шарҷа, зиндагӣ мекунанд ва арзиши дороиҳо ва касбу кори эрониён дар ин кишвар ҳудуди 300 миллиард доллар тахмин зада мешавад.

Муҳаммадбоқири Қолибоф, раиси Маҷлиси Эрон ва фармондеҳи пешини Сипоҳи посдорон, рӯзи якшанбе дар як суханронӣ гуфт, ки Амрико "ба таври ошкоро барои музокирот паём мефиристад, вале пинҳонӣ барои ҳамлаи заминӣ нақша мекашад".

"Мардони мо интизори вуруди заминии нерӯҳои амрикоӣ ҳастанд," -- афзуд ӯ.

Ин изҳороти Қолибоф дар посух ба гузоришҳо дар бораи омодагии артиши Амрико ба амалиёти заминӣ, бо ҳадафи боз кардани гулӯгоҳи Ҳурмуз садо дод.

Ҷанг дар Эрон беш аз чор ҳафта боз идома дорад ва Ҷумҳурии Исломӣ то кунун як бахши қобили таваҷҷуҳи нерӯи мушакӣ ва дарёии худро аз даст дода, бисёре аз фармондеҳони олирутбаи Сипоҳи Посдорон дар пайи ҳамлаҳои Исроил кушта шудаанд.

Бо ин ҳама, Эрон бо истифода аз мавқеи худ дар шимоли Халиҷи Форс ва наздикӣ ба гулӯгоҳи Ҳурмуз, ки 20 дарсад аз нафту гази ҷаҳон аз тариқи он убур мекунад, тавонистааст, бар бозори энержӣ дар саросари ҷаҳон ва аз ин роҳ ба иқтисоди ҷаҳонӣ ба таври чашмрас таъсир расонад.

Дар як моҳе, ки ҳамлаҳои Амрико ва Исроил ба хоки Эрон идома дорад, ҳукумати Эрон тақрибан ҳар рӯз ва ҳар шаб тарафдорони худро ҳатто зери бомбаборон ва дар авҷи ҳамлаҳои ҳавоӣ ба хиёбонҳо мебароранд. Иқдоме, ки сабаби марги мардуми ғайринизомӣ дар ин таҷаммуъҳо шудааст.

Вазорати корҳои хориҷии Қазоқистон муноқиша бо ширкати зодагони ин кишварро дар минтақаи Ленингради Русия шарҳ дод.

Ерлан Жетибаев, намояндаи вазорат гуфт, "дар муноқишаи рӯзи 26-уми март дар шаҳраки Уст-Лугаи вилояти Ленинград, шаҳрвандони Қазоқистон ҳам ширкат доштанд".

Вай гуфт, консули генералии Қазоқистон дар Русия аз маҳалли ҳодиса дидан карда, "ба шаҳрвандони Қазоқистон кӯмаки зарурии ҳуқуқӣ расонида мешавад”. Ӯ илова кард, ки вазъ таҳти назорати ниҳодҳои масъул қарор дорад.

Мақомоти Қазоқистон мегӯянд, дар ин ҳодиса касе аз шаҳрвандони ин кишвар осеби ҷиддӣ надидаанд.

Рӯзи 27-уми март дар шабакаҳои иҷтимоӣ навори занозании гурӯҳе дар як сохтмони Русия нашр шуд. Ҳодиса рӯзи 26-уми март дар шаҳраки Уст-Лугаи вилояти Ленинград рух додааст. Дар он, аз ҷумла шаҳрвандони Қазоқистон низ иштирок доштанд.

Бино ба навиштаи хабаргузориҳои Русия, сабаби сар задани ҷанҷол муноқишаи коргарони қазоқистоние будааст, ки барои сохтмони терминали маҷмааи коркарди газ ҷалб шуда буданд. Ба маҳалли ҳодиса нерӯҳои Росгвардия ва ОМОН ҳозир шуда, иштирокчиёни занозаниро боздошт кардаанд.

Рӯзномаи "Вашингтон Пост" бо истинод ба манбаҳои худ дар Амрико гузориш додааст, ки Пентагон ё вазорати дифои ин кишвар тарҳеро барои анҷоми як амалиёти заминии чандҳафтаина дар хоки Эрон омода мекунад.

Кохи Сафед дар вокуниш ба ин хабар гуфт, ки ин гуна омодагиҳо танҳо як бахше аз "нақшаҳои эҳтимолӣ" мебошанд.

Бар асоси ин гузориш, амалиёти мазкур мумкин аст дар доираи ҳамлаи нерӯҳои вижа ва заминӣ ба аҳдофе мисли ҷазираи Хорг ва минтақаҳои соҳилии наздик ба гулӯгоҳи Ҳурмуз бошад, аммо ба гуфтаи манобеъ, ин ба маънои таҳоҷуми густурда нахоҳад буд.

Дар ҳамин ҳол, Марко Рубио, вазири корҳои хориҷии Амрико, рӯзи ҷумъа таъкид кард, ки Вашингтон метавонад “бидуни истифода аз нерӯҳои заминӣ” ҳам ба ҳадафҳои худ даст ёбад.

Қаблан чанд расонаи Амрико бо такя ба манбаъҳои худ хабар дода буданд, ки президент Доналд Трамп дар фикри фиристодани ҳазорҳо нерӯи заминӣ ба Ховари Миёна аст. Худи ӯ рӯзи 19-уми март нақшаи ҷобаҷо кардани нерӯҳои бештарро дар минтақа рад кард, вале ҳамзамон ишора кард, ки ҳама “дарҳо боз мемонанд”.

Хабаргузории Reuters бо такя ба се манбаъ хабар дода буд, ки маъмурияти Амрико имкони истиқрори нерӯҳои заминиро дар ҷазираи Хорги Эрон баррасӣ дорад. Нуқтае, ки 90% аз нафти Эрон аз онҷо содирот мешавад.

Бо идомаи ҷанг бо Эрон, Амрико ҳузури низомии худро дар минтақа афзоиш дода ва киштии ҷангии "Триполи" -ро бо тақрибан 3500 нерӯҳои дарёӣ ба Ховари Миёна интиқол додааст. Ҳамзамон, як гурӯҳи обиву хушкии дигар бо ҳудуди 2500 нерӯ дар роҳ ба ин минтақа аст.

Бино ба гузоришҳо Пентагон ҳамчунин нақшаи сафарбарсозии то 10 ҳазор нерӯи иловагии дигарро дорад.

Дар Тоҷикистон Кодекси меҳнатро ислоҳ карданд ва акнун бар асоси он табъиз дар ҷойи кор манъ шудааст.

Аз ҷумла, корфармо ҳақ надорад шахсро барои маъюб буданаш ё гирифторӣ ба бемории норасоии масуният ё СПИД аз кор маҳрум кунад. То ин вақт дар Кодекси меҳнат чунин нукта вуҷуд надошт.

Илова бар ин, қонуни нав ба шаҳрвандон имкон медиҳад, ки дар ҳолати ба табъиз ё дискриминатсия дучор шудан дар ҷойи кор, барои ҷуброни зарар ба мақомот муроҷиат кунанд. Қонун ҳамчунин корфарморо вазифадор мекунад, ки ҳангоми муқаррар кардани маош ба табъиз роҳ надиҳанд, яъне барои мардону занон маоши гуногунро дар назар нагиранд.

Ба назар мерасад, ин дигаргунӣ бо талаби созмонҳои ҳомии ҳуқуқ қабул шудааст. Ин дар ҳолест, ки дар Тоҷикистон ҳанӯз 194 навъи кор, аз ҷумла дар бахши истихроҷи маъдан, кафшергарӣ ва нақбканӣ барои занон манъ аст.

Дар тағйироти нав ба Кодекси меҳнат мушаххас ба рӯйхати корҳои мамнуъ барои занон таъкид нашудааст. Аммо ишора шудааст, ки маҳдуд кардани ҳаққи кор барои баъзе гуруҳҳо, аз ҷумла аз рӯйи ҷинс, табъиз ё пастзанӣ ҳисобида намешавад. Баръакс манъ будани кор дар баъзе бахшҳо аз рӯи ҷинсият ҳамчун ғамхории махсуси давлат номида шудааст.

Созмонҳои ҳомии ҳуқуқ ҳуқуқ, аз ҷумла Созмони Милал борҳо аз ҳукумати Тоҷикистон талаб кардаанд, ки онро бекор кунад. Мақомоти Тоҷикистон дар посух ба ин танқидҳо гуфтаанд, шароитҳое ҳаст, ки дар онҷо кор кардани занон зараровар аст.

Бино ба як гузориши Созмони Милал аз соли 2023, занон дар муқоиса бо мардон дар иқтисоду бозори кор ба монеаҳои ҷиддӣ ва фаровоне рӯ ба рӯ мешаванд. Аз лаҳзаи қабул ба кор то таъйини маошу имтиёзҳои дигар.

Ҳусиҳои Яман эълон карданд, ки рӯзи шанбеи 28-уми март аввалин мушаки худро дар ҳимоят аз Эрон ба сӯи Исроил партоб кардаанд.

Пеш аз ин артиши Исроил аз шиносоии як мушаки партобшуда аз Яман хабар дода буд.

Ҳусиҳо гуруҳи таҳти ҳимояти Ҷумҳурии исломӣ мебошанд, ки як қисмати Яман, аз ҷумла пойтахт шаҳри Санъоро зери назорат доранд.

Яҳё Сареъ, сухангӯи ҳусиҳо бо пахши наворе дар шабакаи иҷтимоии X гуфт, ин гуруҳ ба сӯи шаҳрҳои Исроил чанд мушаки баллистикӣ партофтааст.

Давоми як моҳи ҷанги Амрико ва Исроил алайҳи Эрон, гуруҳҳои тарафдори Ҷумҳурии исломӣ дар Лубнон ва Ироқ ба пуштибонӣ аз Теҳрон садо баланд карданд. Аммо ҳусиҳо давоми як моҳи ҷанг хомӯш буданд.

Котиби давлатӣ ё вазири корҳои хориҷии Амрико мегӯяд, дар сурати сахтар шудани ҷанг бо Эрон мумкин аст, ки силоҳҳои барои Украини пешбинишуда ба Ховари Миёна фиристода шаванд.

Марко Рубио 27-уми март баъди нишасти вазирони корҳои хориҷии ҳафт кишвари бузурги ҷаҳон ё G7 дар Фаронса гуфт, Иёлоти Муттаҳида силоҳҳоро дар асоси афзалиятҳои худ идора мекунад.

Пойгоҳи Bloomberg аз қавли Марко Рубио навиштааст, "агар барои Амрико чизе лозим бошад ва он таҷҳизот амрикоӣ бошад, мо онро дар навбати аввал барои Амрико нигоҳ медорем. Феълан ин ҳолат пеш наомадааст".

Бар асоси созише, ки соли 2025 ба даст омад, силоҳҳои зарурӣ барои Украинаро кишварҳои аврупоӣ аз Амрико харида, дар ихтиёри Киев мегузоранд.

Ба гузориши Politico, мақомоти амриикоӣ аллакай ба муттаҳидонашон хабар додаанд, ки интиқоли силоҳ дар моҳҳои наздик шояд ба таъхир афтад ё аслан қатъ шавад. Аз ҷумла мумкин аст, ки интиқоли мушакҳои дифои ҳавоӣ барои низоми "Пэтриот" ба Украина ба таъхир афтад.

Раисҷумҳури Тоҷикистон бе овардани номи ягон кишвар гуфт, ки Душанбе ҷонибдори "ҳалли ҳама гуна низоъ ва ихтилофот танҳо бо роҳи сиёсию дипломатӣ" мебошад.

Изҳороти Эмомалӣ Раҳмон рӯзи 26-уми март дар Узбекистон ва дар ҷараёни мулоқоташ бо президенти он кишвар Шавкат Мирзиёев садо дод.

Дар ҳоли ҳозир ҳамлаи Амрикову Исроил ба Эрон ва зарбаҳои Ҷумҳурии Исломӣ ба Исроил ва ҳампаймонҳои Иёлоти Муттаҳида дар Халиҷи Форс идома дорад.

Эмомалӣ Раҳмон ва як ҳайати ҳукумати Тоҷикистон рӯзҳои 26 ва 27-уми март дар Узбекистон қарор дошта, як баста санадҳои ҳамкориро дар бахши тиҷорату сармоягузорӣ, энергетика, нақлиёт ва кишоварзӣ имзо карданд.

Раисҷумҳури Тоҷикистон дар идомаи сафараш ба шаҳри Бухоро рафта, Қалъаи Бухоро, оромгоҳи Баҳоуддини Нақшбанд, Маҷмааи “Лаби ҳавз” ва оромгоҳи Исмоили Сомониро зиёрат кардааст. Муҷассамаи Исмоили Сомонӣ ҳамчун асосгузори аввалин давлати тоҷикон дар маркази шаҳри Душанбе қомат афрохтааст.

Тоҷикистону Узбекистон то соли 2016, дар замони раҳбарии Ислом Каримов, муносибати сард доштанд. Каримовро барои ҷорӣ кардани виза, маҳдуд кардани робитаҳои иқтисодию тиҷоратӣ ва сиёсӣ бо Тоҷикистон интиқод мекунанд.

Ҳоло низоми виза барои шаҳрвандони Тоҷикистону Узбекистон бекор ва рафтуомади миллионҳо нафар аз ҳарду тарафи марз осон гардида, шароит барои кору тиҷорати сокинони ду кишвар фароҳам омадааст.

Дар айни замон ҳарду кишвар барои поймоли озодиҳои бунёдии шаҳрвандон танқид мешаванд.

Марко Рубио, котиби давлатӣ ё вазири корҳои хориҷии Амрико, рӯзи 27-уми март ба Фаронса рафтааст.

Ӯ дар нишасти вазирони корҳои хориҷии G7 (ҳафт кишвари пешрафтаи саноатии ҷаҳон) иштирок мекунад. Ҷаласа дар пасманзари танишҳои вобаста ба Эрон, Украина ва ноамниҳои ҷаҳонӣ баргузор мешавад.

Пас аз шурӯи ҳамлаҳои Амрико ва Исроил ба Эрон дар охири моҳи феврал, ин нахустин мулоқоти рӯбарӯи Рубио бо ҳампаймонҳои калидӣ мебошад.

Дар ҷаласа дипломатҳои баландпояи Бритониё, Фаронса, Олмон, Итолиё, Канада ва Иттиҳоди Аврупову Ҷопон ва ҳамчунин Украина иштирок мекунанд.

Марко Рубио 26-уми март дар остонаи сафараш ба Порис (Париж) гуфт, як паёми марказие, ки ӯ ба ҳампаймонҳо дорад, талаби бозкушоии гулӯгоҳи Ҳурмуз аст. Ин роҳи муҳими обиро Эрон баста нигоҳ медорад.

Рубио дар суҳбат бо хабарнигорон гуфт, “ин ба манфиати онҳо аст, ки ёрӣ расонанд.”

Артиши Исроил кушта шудани сарбозаш дар Лубнонро тасдиқ кард.

Шаби гузашта артиши Исроил аз кушта шудани як сарбози 21-сола хабар дод. Чанд соат қабл ҳам кушта шудани як сарбози дигари 21-сола тасдиқ шуда буд.

Ба ин тартиб, бар асоси омори нашршуда аз сӯи артиши Исроил, аз оғози даври нави даргириҳо бо "Ҳизбуллоҳ"-и Лубнон, ки тақрибан ҳамзамон бо ҷанги Эрон, ҳудуди як моҳ пеш шурӯъ шуд, 4 сарбози исроилӣ дар Лубнон кушта шудаанд.

Ба гузориши расонаҳои исроилӣ, яке аз ду сарбозе, ки рӯзи 26 март кушта шуданд, бар асари партоби мушаки "Ҳизбуллоҳ" ҷони худро аз даст додааст. Сарбози дигар дар ҷараёни тирандозӣ бо ниманизомиёни "Ҳизбуллоҳ" кушта шудааст.

"Ҳизбуллоҳ"-и Лубнон як созмони динии шиъӣ аст, ки аз сӯи Эрон ҳимоят мешавад. Исроилу Амрико ва чанд кишвари дигар онро созмони террористӣ медонанд.

Гурӯҳе аз кишварҳо, аз ҷумла, Иттиҳоди Аврупо ҳам шохаи низомии ин созмонро террористӣ медонанд. Шохаи сисёсии "Ҳизбуллоҳ" дар порлумони Лубнон чанд курсӣ дар ихтиёр дорад.

Фармондеҳии марказии Амрико тасдиқ кард, ки Алиризо Тангсирӣ, фармондеҳи Нерӯи дарёии Сипоҳи посдорон дар ҳамлаи ҳавоии Исроил кушта шудааст.

Фармондеҳӣ дар шабакаи иҷтимоии X (Твиттер) навишт, кушта шудани Тангсирӣ "минтақаро оромтар мекунад".

Дар ин баёния омадааст, Сипоҳи посдорон баъди аз даст додани роҳбари деринаи худ "дар роҳи баргаштнопазир қарор гирифтааст".

Дар бораи кушта шудани ин фармондеҳи Сипоҳи посдорон нахуст Исроил хабар дода буд.

Мақомоти эронӣ то ҳол кушта шудани Тангсириро тасдиқ ё инкор накардаанд.

Вазорати хазонадории Амрико соли 2019 Алиризо Тангсириро таҳрим карда буд.

Фармондеҳии марказии Амрико таъкид кардааст, ки ҳамлаҳои низомии Иёлоти Муттаҳида алайҳи нерӯи дарёии Сипоҳи посдорон идома хоҳад кард.

Дар ҷараёни ҳамлаи Амрико ва Исроил ба Эрон дар як моҳи охир чандин мақоми баландпояи Ҷумҳурии Исломӣ, аз ҷумла роҳбари олии он кишвар Алии Хоманаӣ ва фармондеҳи Сипоҳ кушта шуданд.

Бонки Осиёии Рушд пешбинӣ кардааст, ки даргирӣ дар Ховари Миёна боиси суст гаштани суръати рушди иқтисоди кишварҳои Осиё ва ҳавзаи Уқёнуси Ором хоҳад шуд.

Ин бонк 26-уми март дар хабарномае навишт, бо сар задани низоъ дар Ховари Миёна, суръати рушди иқтисоди кишварҳои Осиё ва минтақаи Уқёнуси Ором дар солҳои 2026-2027 метавонад то 1,3 дарсад коҳиш шавад.

Ҳамчунин тибқи ин пешбинӣ, агар мушкили интиқоли сӯзишворӣ аз як сол зиёд давом кунад, нархҳо 3,2 дарсад боло мераванд.

"Низоъ ба иқтисоди кишварҳои Осиё ва минтақаи Уқёнуси Ором фишор меорад ва ин ҳолат боиси болоравии нархи маводи сӯхт, халалдор шудани занҷираҳои таъминот ва савдо, инчунин сахт шудани шароити молӣ мегардад. Ҳамчунин соҳаҳои сайёҳӣ ва интиқоли пул метавонанд аз ин ҳолат зарар бинанд",-омадааст дар гузориши Бонки Осиёии Рушд.

Ин ниҳоди молии минтақаӣ се сенарияи хатарро пешбинӣ карда, гуфтааст, дар ҳолати кӯтоҳ будани даргириҳо, фишор ба бозори маводи сӯхт низ камтар хоҳад шуд.

Дар пайи ҳамлаи Амрико ва Исроил ба Эрон, мақомоти эронӣ тақрибан танга ё гулӯгоҳи Ҳурмузро бастанд. Бастани ин оброҳа, ки масири гузаштани тақрибан 20 дарсад аз нафти дунё аст, боиси боло рафтани нархи нафт дар бозорҳои ҷаҳонӣ шуд.

Бонки Осиёии Рушд се сенарияро барои нархи нафт пешбинӣ кардааст, ки дар вазъияти бадтарин нархи ҳар барел ё бушкаи нафт метавонад то 155 доллар зиёд шавад.

Тоҷикистону Узбекистон мехоҳанд, ки дар чор соли оянда додугирифтро ба ду миллиард доллар расонанд.

Ин тарҳ рӯзи 26-уми март дар ҷараёни сафари Эмомалӣ Раҳмон, раисҷумҳури Тоҷикистон ба Узбекистон имзо шуд. Феълан додугирифти Душанбеву Тошканд ҳудуди як миллиард долларро ташкил медиҳад.

Ба иттилои "Ховар", хабаргузории давлатии Тоҷикистон, "барномаи то 2 миллиард доллар" расондани гардиши мол то соли 2030 дар назар аст. Ҷузъиёти бештари ин барнома ва роҳҳои афзун кардани додугирифти Тоҷикистон ва Узбекистон феълан маълум нест.

Дар хабарномаи дафтари матбуоти президенти Узбекистон омадааст, ҳоло дар ин кишвар зиёда аз 500 ширкати муштарак бо Тоҷикистон кор мекунанд.

Моҳи январи имсол Оҷонси омори Узбекистон эълон карда буд, ки дар ин кишвар 410 корхона бо сармояи соҳибкорони тоҷикистонӣ кор мекунанд.

Тибқи иттилои расмӣ, дар ҷараёни сафари президент Эмомалӣ Раҳмон ба Узбекистон миёни Душанбе ва Тошканд чанд санади ҳамкорӣ дар бахшҳои гуногун имзо шудааст.

Равобити Тоҷикистону Узбекистон, ки дар гузашта ба далели баҳси роҳу обу нерӯгоҳ ба сардӣ печида буд, баъд аз марги Ислом Каримов ва ба қудрат омадани Шавкат Мирзиёев беҳтар шуд.

Ҳар ду кишвари Осиёи Марказӣ пайваста аз сӯйи созмону кишварҳои ғарбӣ барои поймоли озодиҳои бунёдии сокинон танқид мешаванд.