Тазоҳуроти мухолифин дар пойтахти Қирғизистон шаҳри Бишкек дирӯз мунҷар ба даргирии байни издиҳоми тазоҳургарон бо нируҳои милиса шуд, ки дар ниҳоят бо тасарруфи сохтмонҳои муҳими давлатӣ аз сӯи тазоҳургарон анҷом ёфт.

Мухолифин Кохи раёсатҷумҳурӣ ва бинои родиёву телевизиони давлатиро ишғол намуда, ноиби собиқи раисиҷумҳур Феликс Қуловро аз маҳбас раҳо карданд. Феликс Қулов дар пайи раҳоияш аз зиндон билофосила раҳбари хадамоти амнияти миллии Қирғизистон таъйин шуд. Вай гуфт, пеш аз ҳама барои барқарор сохтани назму тартибот талош хоҳад кард: "Мо талош хоҳем кард, тартиботро то субҳи ҷумъа барқарор кунем. Ман ҳама корро барои ин хоҳам кард."

Додгоҳи Олии Қирғизистон ҳамзамон натоиҷи интихоботи ахири порлумониро, ки сабаби аслии тазоҳуроти чандинрӯзаи мардум дар кишвар шуда буд, лағв намуд. Раиси Додгоҳи Қонуни Асосии Қирғизистон Чолпон Бекова гуфт, сарвазир Николай Танаев истеъфо додааст.

Шоми дирӯз порлумони пешини Қирғизистон бо ташкили як иҷлосияи изтирорӣ Эшонбой Қодирбековро раиси порлумон ва раисиҷумҳури муваққати кишвар интихоб кард. Раҳбарии ҳукумати муваққат ба Шӯрои ҳамоҳангсози Иттиҳоди мардуми Қирғизистон супурда мешавад, ки раёсаташро яке аз раҳбарони мухолифин Қурмонбек Боқиев бар ӯҳда дорад.

Хабарнигори Родиёи Озодӣ дар Қирғизистон мегӯяд, тайи субҳи панҷшанбе дар Бишкек мағозаҳову сохтмонҳое, ки ба Аскар Оқоев ва аҳли хонаводаи ӯ тааллуқ доштанд, аз ҷониби издиҳом ғорат шуданд. Ин дар ҳолест, ки макони будубоши президент Аскар Оқоев то ҳол маълум нест ва, ба гуфтаи Қурмонбек Боқиев Оқоев, ӯ алакай қаламрави Қирғизистонро тарк кардааст. Аммо Бахтибек Абдурисоев, сафири Қирғизистон дар Амрико, шоми 24 март гуфт, Аскар Оқоев дар як макони амн буда, аз мақомаш истеъфо надодааст.

Дабири кулли СММ Куфӣ Анон ба оромӣ дар Қирғизистон даъват кардааст. Сухангӯи СММ гуфт, ки оқои Анон таҳаввули вазъ дар Қирғизистонро бо таваҷҷуҳ назора мекунад. Амрико гуфтааст, ба ҳифзи субот дар Қирғизистон манфиатдор ҳаст ва тазоҳургарони қирғизро ба сӯи хештандорӣ даъват мекунад.

Фиристодаи хоси раиси давраии САҲА Алоиз Петержела аз ҳама ҷонибҳои низоъ дар Қирғизистон даъват кард, ҷиҳати дарёфти як роҳи осоиштаи бӯҳрони кунунӣ амал кунанд. Аммо вазири хориҷаи Русия Сергей Лавров дирӯз гуфт, ки САҲА низ то ҷое дар чунин сурати ҳол дар Қирғизистон масъул ҳаст. Оқои Лавров ғолибан натиҷагирии нозирони САҲА аз ҷараёни интихоботи ахири порлумони Қирғизистонро дар назар дошт.

Ҳаводиси дирӯз иттифоқуфтода дар Қирғизистонро алакай бо айни ҳаводиси инқилобӣ дар Гурҷистону Украина монанд мекунанд. Таври маълум, дар он ду кишвар ҳам тазоҳуроти мардум ба нишони эътироз ба тақаллуби натоиҷи интихобот шурӯъ шуда, дар ниҳоят мунҷар ба тағйири қудрат ва ба раъси он кишварҳо расидани мухолифин шуда буд. Раисиҷумҳури Гурҷистон Михаил Саакашвили, ки барои анҷоми як сафари расмии серӯза вориди Украина шудааст, дирӯз пеш аз тарки Тифлис дар бораи ҳаводиси Қирғизистон гуфт: "Мо ба раисиҷумҳур Оқоев пешниҳод карда будем, ки роҳи осоиштаи ҳалли масъаларо биҷӯяд. Муттаассифона, як рӯз пеш посухи вай ба ин пешниҳод чунин буд, ки ҳама аъзои мухолифин ҷинояткоранд. Ман қатъиян ба ин розӣ нестам. Ман бовар дорам, ки дар байни онҳо нафарони хеле оқил ҳаст ва мо аз мухолифини қирғиз даъват мекунем, ки амнияти ҷисмони президент ва хонаводаи вайро замонат дода, аз роҳи хушунат ҷилавгирӣ кунанд."
Мирзои Салимпур, Прага

Вазири корҳои дохилии Тоҷикистон аз роҳбарони диаспораҳои тоҷикон дар хориҷи кишвар дархост кардааст, ки аз гаравидани ҷавонон ба гурӯҳҳои тундрав ҷилавгирӣ намоянд.

Дафтари матбуоти Вазорати корҳои дохилӣ мегӯяд, дидори вазир бо роҳбарони диаспораҳо 19-уми март дар Душанбе баргузор шуд.

Ба иттилои манбаъ, вазир Рамазон Раҳимзода ба роҳбарони диаспораҳои тоҷикон гуфтааст, сиёсати ҳукумати Тоҷикистонро дар миёни муҳоҷирон "дуруст фаҳмонанд".

Вазир гуфтааст, президенти кишвар Эмомалӣ Раҳмон "пайваста аз ҳаёту фаъолияти ҳамватанони бурунмарзӣ ва муҳоҷирони меҳнатӣ бохабар ҳастанд".

Ин дар ҳолест, ки муҳоҷирони тоҷик дар Русия борҳо аз бетаваҷҷуҳии ҳукумат ба вазъи онҳо шикоят карда буданд.

Дар вохӯрии вазири корҳои дохилӣ бо намояндагони диаспораҳо хабарнигорони мустақил ширкат надоштанд ва барои ҳамин рӯшан нест, ки дар ин нишаст вазъи муҳоҷирон баррасӣ шудааст ё не.

Тоҷикистон аз ҷумла кишварҳои муҳоҷирфирист аст. Солона ҳудуди як миллион тоҷикистонӣ барои кор ба хориҷ, махсусан ба Русия мераванд.

Ҳукумати Тоҷикистон мехоҳад ҳузури занон дар корҳои давлатиро бештар кунад. Дар як барномаи ҳукуматӣ, ки Радиои Озодӣ 25-уми март шинос шуд, омадааст, феълан фақат 19 дарсади роҳбарони мақомот занон ҳастанд, ки нокофӣ мебошад.

Бар пояи ин санад, то соли 2030 бояд 25 дарсади вазифаҳои роҳбарӣ дар идораҳои давлатӣ ба занон ихтисос дода шавад. Дар ин барнома гуфта нашудааст, ки аз кадом тариқ мақомот мехоҳанд ин корро иҷро кунанд.

Ба гуфтаи мақомот, давоми чор соли оянда ҳиссаи занон дар корҳои давлатӣ аз 25 дарсади феълӣ бояд ба 30 дарсад зиёд карда шавад.

Тасмими ҳукумат барои бештар ҷалб кардани занон ба корҳои давлатӣ дар ҳолест, ки пештар мақомот пешниҳоди вакилонро дар ин бора рад карда буданд.

Соли 2019 як гурӯҳ вакилони порлумон ба ҳукумати Тоҷикистон пешниҳод карда буданд, ки ҳангоми ислоҳи қонун дар бораи хидмати давлатӣ, то 40 дарсади мансабҳои давлатӣ ба занон дода шавад.

Намояндагони ҳукумат бо радди ин пешниҳод гуфта буданд, ки масъалаи қабули занон ба кор дар идораҳои давлатӣ дар қонунҳои дигар ҳал шудааст.

Феълан аз 21 узви ҳукумат чанд вазир, аз ҷумла, вазири меҳнат ва вазири фарҳанг занон ҳастанд.

Мусофирони фурудгоҳи “Пулково” дар шаҳри Санкт-Петербург рӯзҳои 22 ва 23-юми март маҷбур шудаанд, ки дар рӯйи фарши сарду холӣ бихобанд. Дар ду рӯз беш аз 100 парвози ҳавопаймо дар ин фурудгоҳи Русия боздошта шуд.

Мақомот гуфтанд, сабаби таъхир дар парвозҳо таҳдиди паҳпод ё ҳавопаймоҳои бесарнишини украинӣ ба фурудгоҳ будааст.

Александр Дрозденко, волии Ленинград, гуфт, низоми дифои ҳавоӣ ва воҳидҳои муборизаи радиоэлектронӣ беш аз 70 дронро нобуд карданд. Дар бораи талафоти эҳтимолӣ хабаре нашр нашудааст.

Дрозденко гуфт, дар шаҳри соҳилии Приморск баъди ба зарфи сӯзишворӣ расидани паҳподе оташнишонҳо дар ҷои ҳодиса кор мекунанд. Дар ноҳияи Виборги вилояти Ленинград як сутуни барқ осеб дидааст.

Приморск ва Уст-Луга дар соҳили баҳри Балтика ҷойгир буда, нуқтаи муҳими содироти маводи сӯхт дониста мешаванд. Рӯзи яшканбе дар паи ҳамлаи паҳподҳо содироти нафти хом ва дигар сӯзишворӣ аз ин ҷо боздошта шуд.

Навор дар инҷост:

Кувайт рӯзи 24-уми март эълон кард, ки системаи дифои ҳавоии ин кишвар дар ҳоли муқобила бо "ҳамлаҳои мушакӣ ва паҳподӣ" ҳаст. Артиш аз шаҳрвандон хост, дастури мақомотро риоя кунанд.

Ҳамзамон, Вазорати барқи Кувайт хабар дод, ки дар пайи суқути боқимондаҳои мушакҳои раҳгиришуда ҳафт хати интиқоли барқ аз кор монд.

Арабистони Саудӣ низ субҳи 24-уми март эълон кард, ки падофанди ҳавоии ин кишвар тайи ду соат, дар чанд ҳамлаи ҷудогона, дар маҷмӯъ 19 паҳподро, ки вилояти Шарқияи ин кишварро ҳадаф қарор дода буданд, раҳгирӣ ва аз байн бурд. Ин хабарро Вазорати дифои Арабистони Саудӣ нашр кардааст.

Дар ҳамин ҳол, Бритониё эълон кардааст, ки барои муқобила бо мавҷи ҳамлаҳои Эрон ба кишварҳои Халиҷи Форс сомонаҳои дифои ҳавоии кӯтоҳбурд ба минтақа мефиристад.

Кейр Стармер, нахуствазири Бритониё гуфт, ин таҷҳизот ба Баҳрайн, Кувайт ва Арабистони Саудӣ фиристода мешавад. Ҳамчунин сомонаи зиддипаҳподии Rapid Sentry ба Кувайт мунтақил хоҳад шуд ва як нови ҷангии Бритониё низ дар шарқи Миёназамин ҷобаҷо шудааст.

Ба гузориши хабаргузории "Франс Пресс", мақомҳои бритониёӣ мегӯянд, ҳузури низомии ин кишвар дар минтақа ба болотарин сатҳ дар 15 соли гузашта расида, парвозҳои амалиётӣ барои ҳимоят аз чанд кишвари минтақа афзоиш ёфтааст.

Эрон гуфтааст, дар сурати идомаи ҳамлаҳои Исроил ба Лубнон ва Фаластин, "маҳалли таҷаммуъ"-и нерӯҳои Исроилро дар шимоли ин кишвар ва Навори Ғазза ҳадафи ҳамлаҳои мушакӣ ва паҳподӣ қарор хоҳад дод.

Ин таҳдид аз сӯи Сипоҳи посдорони Эрон дар ҳоле содир шуд, ки артиши Исроил рӯзи 23-юми март хабар дод, ки ду мушаки партобшуда аз Эрон ба тарафи Исроил дар ҷануби Лубнон фуруд омад.

Сипоҳи посдорони Эрон дар баёнияаш тавзеҳи бештаре дар ин бора надодааст.

Исроил аз оғози ҷанг бо Эрон ва ба дунболи он ҳамлаҳои "Ҳизбуллоҳ" ба Исроил, амалиёти густардаеро ба таври ҳамзамон алайҳи ин гурӯҳ дар ҷануби Лубнон оғоз кардааст.

Исроил ва Амрико гурӯҳи "Ҳизбуллоҳ"-и Лубнонро созмони террористӣ медонанд. Ин гурӯҳ дар порлумони Лубнон чанд намоянда дорад.

Дар тозатарин таҳаввулот, мақомҳои Лубнон эълон карданд, ки дар ҳамлаи ҳавоии Исроил ба минтақае хориҷ аз Бейрут, ду нафар кушта ва панҷ нафар захмӣ шуданд. Ин ҳамла пас аз чандин ҳамлаи шабона ба ҷануби Бейрут рух дод.

Ҳамзамон хабаргузории расмии Лубнон аз идомаи ҳамлаҳои Исроил ба минтақаҳои мухталифи ҷануб ва шимол-шарқи ин кишвар ва ҳамчунин вуруди нерӯҳои исроилӣ ба як шаҳри марзӣ ва даргирӣ бо сокинон хабар додааст.

"Ҳизбуллоҳ" низ эълон кардааст, ки ҳамлаҳое алайҳи нерӯҳои исроилӣ дар ҷануб ва шимоли Исроил анҷом додааст.

Ин даргириҳо, ки барои ҳафтаи чаҳорум боз идома дорад, боис ба кушта шудани беш аз ҳазор нафар ва овора шудани наздик ба ним миллион нафар дар Лубнон гаштааст.

Нерӯҳои марзбонии Арманистон як шаҳрванди 46-солаи Тоҷикистонро дастгир кардаанд.

Ба иттилои дарёфтии Радиои Озодӣ, Асомуддин Раҷабови 46-сола аз Гурҷистон ба Арманистон мегузашт.

Вакили мудофеъ Ани Чатинян аз Helsinki Citizens' Assembly–Vanadzor рӯзи 23-юми март ба Радиои Озодӣ гуфт, шахси зери ҳимояташ бо дархости мақомоти Тоҷикистон ва бо иттиҳоми "ифротгароӣ" дастгир шудааст.

"Дар ҳоли ҳозир додситонӣ қазияи ӯро баррасӣ дорад. Умед дорем, ки ба Тоҷикистон таслим нахоҳад кард," – гуфт хонум Чатинян.

Шарҳи ҷониби Тоҷикистон дастрас нест.

Ҷустуҷӯйи Радиои Озодӣ нишон дод, ки Асомуддин Раҷабов дар шабакаи иҷтимоии Фейсбук бо имзои мустаор матлабҳои танқидӣ нашр кардааст.

Яке аз дӯстонаш гуфт, ӯ як соли охир дар Гурҷистон мезист, вале пулис огоҳӣ додааст, ки муҳлати будубошаш ба поён расиду бояд ин кишварро тарк кунад.

"Муҳлати шиносномаи Асомуддин ҳам ба охир мерасид ва ӯ ягона шонсро дар он дид, ки ҳарчи зуд ба Арманистон гузарад, аммо дар марз дастгир шуд," -- афзуд ӯ.

Ба нақли ин ҳамсуҳбати Радиои Озодӣ, ки номаш ба далели амниятӣ навишта намешавад, Асомуддин Раҷабов аз соли 2009 то соли 2012 дар дастаи зудамали таъйиноти махсус ё ОМОН-и Вазорати корҳои дохилии Тоҷикистон хидмат кардааст.

"Вай дар амалиёти нерӯҳои давлатӣ дар Бадахшон ҳам ширкат дошта, баъди дидани баъзе саҳнаҳои ваҳшатнок ихтиёрӣ аз дастаи ОМОН берун шуд ва барои идомаи зиндагӣ ба Русия рафт. Сипас ба Туркия ва аз онҷо ба Гурҷистон гузашт," – гуфт ӯ.

Асомуддин Раҷабов соҳиби ду фарзанд аст.

Ҳафтаи гузашта пайвандони ду шаҳрванди боздоштшудаи Тоҷикистон дар Арманистон гуфта буданд, ки чанд рӯз боз аз онҳо дарак надоранд.

Онҳо низ бо дархости Тоҷикистон ва бо иттиҳоми "зархаридӣ", "ташкили иттиҳоди ҷиноӣ" ва "қочоқи маводи мухаддир" дастгир шуда, дар Боздоштгоҳи муваққатии шаҳри Ванадзор, дар шимоли Арманистон ҳастанд. Наздикони онҳо, баръакс иддао доранд, ки қазия сиёсист.

Додгоҳе дар Қирғизистон як рӯзноманигори таҳқиқотгарро аз зиндон озод кард.

Бар асоси қарори додгоҳ, Муҳаббат Тоҷибек, роҳбари гурӯҳи тарҳҳои Temirov LIVE ва "Айт, айт десе" баъди зиёда аз ду сол аз зиндон раҳо мешавад, аммо ҳаққи тарки ҷойи зисташро надорад.

Вакили дифоъ, ки дар мурофиаи додгоҳӣ ба тарзи онлайнӣ ширкат дошт, гуфт, Муҳаббат Тоҷибек 23-юми март озод шуд. Додситон ё айбдоркунандаи давлатӣ ҳам ба озод шудани ӯ розӣ шудааст.

Муҳаббат Тоҷибек моҳи январи соли 2024 ҳамроҳи дигар кормандони тарҳҳои таҳқиқотии Temirov LIVE ва “Айт.айт десе” боздошт шуда буд.

Моҳи октябри он сол додгоҳ Муҳаббат Тоҷибекро бо гуноҳи "даъват ба беназмиҳои оммавӣ" ба 6 сол зиндон маҳкум кард.

Худи ӯ ва ҳомиёни ҳуқуқ иттиҳомро беасос гуфтанд.

Владимир Путин, президенти Русия, созишномаро бо Тоҷикистон дар бораи ташхиси муҳоҷирон қабл аз сафар имзо кард.

Ба гузориши хабаргузории расмии "ТАСС", бо имзои Путин раванди тасдиқ ё ратификатсияи созишнома дар Русия ба анҷом расид ва ин санад иҷроӣ мешавад.

Шӯрои Федератсия, палатаи болоии порлумони Русия, рӯзи 17-уми март ин созишномаро тасдиқ карда буд. Бар пояи ин санад, акнун муҳоҷирони тоҷик метавонанд пеш аз сафар ба Русия дар Тоҷикистон аз муоинаи тиббӣ гузаранд.

Натиҷаи ташхис барои гирифтани иҷозаи кор ё патент дар Русия зарур аст. Дар назар аст дар як ё чанд дармонгоҳи шаҳри Душанбе нуқтаҳои муоинаи тиббӣ боз шаванд, ки ба ташхиси муҳоҷирони меҳнатӣ қабл аз сафари онҳо ба Русия машғул хоҳанд шуд.

Нархи ташхис ба гуфтаи Саломиддин Юсуфӣ, муовини вазири тандурустии Тоҷикистон, 240 сомонӣ ё 25 доллар арзиш дорад.

Муҳоҷирони тоҷик борҳо аз мушкил будани гирифтани санади тиббӣ дар Русия шикоят кардаанд.

Мақомоти ҷумҳурии худхондаи Абхозистон як шаҳрванди Тоҷикистонро, ки бо иттиҳоми ифротгароии динӣ дар ҷустуҷӯ қарор дошт, боздошт ва ба Русия истирдод кардаанд.

Хадамоти амнияти давлатии Абхозистон дар иттилоияе гуфт, истирдоди шаҳрванди Тоҷикистон Каримхон Саидови 43-сола дар поёни ҳафтаи гузашта сурат гирифт.

Назари Саидов ба қазия ва қарори истирдодаш маълум нест.

Инчунин рӯшан нест, ки ӯро бо дархости Русия боздошт кардаанд ё Тоҷикистон. Мақомот дар Душанбе дар ин бора ҳанӯз изҳори назар накардаанд.

Дар хабари мақомоти Абхозистон, аз ҷумла гуфта шудааст, ки гуё Саидов “дар саҳифаҳои ҳомии гурӯҳҳои ифротӣ дар Сурия маводе паҳн мекард, ки барои сафед кардани ифротгароӣ ва барангехтани адовати динӣ равона шуда буд”.

Хадамоти амнияти давлатии Абхозистон гуфт, муҳлати санадҳои муҳоҷирати Саидов дар Абхозистон ҳам гузашта буд ва ӯ рӯзи 20-уми март ба Русия истирдод шуд.

Феълан маълум нест, ки ӯ дар куҷо аст ва дар Русия ба ӯ айбе эълон шудааст ё на.

Тоҷикистон Абхозистони рӯ ба Русияро чун давлати мустақил ба расмият намешиносад, аз ин рӯ, бисёр муносибатҳои ҳуқуқии вобаста ба шаҳрвандони Тоҷикистон дар ин ҷумҳурӣ тавассути сохторҳои Русия ҳаллу фасл мешаванд.

Раисҷумҳури Амрико гуфт, баъди як суҳбати "бисёр хуб" ҳама гуна ҳамларо ба нерӯгоҳҳои Эрон то панҷ рӯз ба таъхир гузошт. Вазорати корҳои хориҷии Эрон билофосила посух дод, ки байни Теҳрон ва Вашингтон "муколамае" вуҷуд надорад.

Доналд Трамп 23-юми март дар шабакаи Truth Social навишт, "бо назардошти хусусият ва лаҳни гуфтугӯҳо" ба Вазорати дифоъ супориш додааст, ки "ҳама гуна ҳамла алайҳи нерӯгоҳҳо ва зербунёдҳои энержии Эронро ба муддати панҷ рӯз боздорад".

Трамп афзуд, "ин гуфтугӯҳо дар тӯли ҳафта идома хоҳад дошт".

Дар ҳамин ҳол, "Тасним" ва "Форс", ду хабаргузории наздик ба Сипоҳи посдорони инқилоби исломии Эрон, бо такя ба манбаъҳои худ навиштанд, ки байни Теҳрон ва Вашингтон мустақим ё ғайримустақим "ягон музокирот" сурат нагирифтааст.

Изҳороти раисҷумҳури Амрико чанд соат пеш аз поёни зарбулаҷал ба Эрон барои бозкушоии гулӯгоҳи Ҳурмуз садо дод. Аз ин оброҳа 20 дарсад аз нафту гази ҷаҳон мегузарад.

Доналд Трамп шоми 21-уми март ба Эрон ҳушдор дода буд, ки "агар дар зарфи 48 соати оянда гулӯгоҳи Ҳурмузро пурра ва бе таҳдид боз накунад, Амрико нерӯгоҳҳои ин кишварро нобуд хоҳад кард."

Тибқи гузоришҳои расида, Иёлоти Муттаҳида ҳазорҳо афсару сарбози нерӯҳои заминиро ба Ховари Миёна мефиристад. Дар вокуниш нерӯҳои мусаллаҳи Ҷумҳурии Исломӣ таҳдид кардаанд, ки Эрон даст ба иқдоми мутақобил зада, зерсохторҳои минтақаро нобуд хоҳад кард.

Ҷудо аз он, раиси порлумони Эрон Муҳаммадбоқир Қолибоф навишт, "ҳамзамон бо ҳамла ба нерӯгоҳҳо ва зерсохтори эронӣ тамоми зербунёд ва коргоҳҳои энергетикии марбут бо Амрико дар минтақа нобуд карда мешаванд."

Чунин ҳамла ба кишварҳои Халиҷи Форс, ки муштарии бузурги нерӯ ва вобаста аз коргоҳҳои обсофкун мебошанд, таъсири фавқулода хоҳад дошт.

Сипоҳи посдорони инқилоби исломии Эрон ваъда додааст, ки дар ҳоли зарурат гулӯгоҳи Ҳурмузро комилан баста, онро замоне боз хоҳад кард, ки тамоми зерсохторҳои маҳвшуда барқарор шаванд.

Маҳдудшавии равуои киштиҳо дар Ҳурмуз боис ба афзоиши нархи маводи сӯхт ва ҳамзамон бо он болоравии қимати маводи ниёзи аввалия гардидааст.

Гузориши видеоӣ дар инҷост:

Шахсони ношинос дар шаҳри Лондон чор мошини Ёрии таъҷилии марбут ба як ширкати яҳудиро оташ задаанд. Ширкати ғайритиҷоратии "Хатсала" ба расондани ёрии пизишкии бепул машғул буд.

Ба гузориши Би-би-сӣ, ҳодиса дар ноҳияи Голдерс Грин рух додааст.

Баъди оташ задан дар дохили мошинҳо чанд баллони газ таркидааст, ки дар натиҷа хонаҳои истиқоматии атроф осеб дидаанд.

Сара Ҷексон, сардори пулиси ноҳия гуфтааст, аз рӯи навори дурбинҳои назоратӣ ҳодисаро таҳқиқ доранд.

Се нафар гумонбар ҳастанд.

Пулиси Лондон мегӯяд, ҳодисаро ҳамчун "ҷиноят бар асоси яҳудибадбинӣ" таҳқиқ дорад.

Шимон Райд, як сокини маҳаллӣ гуфтааст, мошинҳои Ёрии таъҷилӣ дар канори ибодатгоҳи яҳудиён (синагога) қарор дошт.

Кир Стармер, нахуствазири Бритониё ин ҳодисаро маҳкум карда, онро амали "яҳудситезона" хонд.

Додгоҳе дар Қирғизистон як рӯзноманигори таҳқиқотгарро аз зиндон озод кард.

Бар асоси қарори додгоҳ, Муҳаббат Тоҷибек, роҳбари гурӯҳи тарҳҳои Temirov LIVE ва "Айт, айт десе" баъди зиёда аз ду сол аз зиндон раҳо мешавад, аммо ҳаққи тарки ҷойи зисташро надорад.

Вакили дифоъ, ки дар мурофиаи додгоҳӣ ба тарзи бархат (онлайнӣ) ширкат дошт, гуфт, Муҳаббат Тоҷибек 23-юми март озод мешавад. Додситон ё айбдоркунандаи давлатӣ ҳам ба озод шудани ӯ розӣ шудааст.

Муҳаббат Тоҷибек моҳи январи соли 2024 ҳамроҳи дигар кормандони тарҳҳои таҳқиқотии Temirov LIVE ва “Айт.айт десе” боздошт шуда буд.

Моҳи октябри он сол додгоҳ Муҳаббат Тоҷибекро бо гуноҳи “даъват ба бетартибиҳои оммавӣ” ба 6 сол зиндон маҳкум кард. Худи ӯ ва ҳомиёни ҳуқуқ иттиҳомро беасос гуфтанд.

Як шаҳрванди Қирғизистон, ки баъди садамаи нақлиётӣ дар Иёлоти Муттаҳида боздошт шуда буд, метавонад то 28,5 сол зиндонӣ шавад. Дар ин садама, ки моҳи феврал дар аёлати Индиана рух дод, чор нафар ба ҳалокат расидааст.

Додситони минтақаи Ҷей дар аёлати Индиана хабар додааст, ки Бекжан Бейшекеев якбора ба чор иттиҳом, аз ҷумла беэҳтиётӣ, ки боиси марг шудааст, муттаҳам мешавад.

Дар гузориши додситонӣ омадааст, шаҳрванди 30-солаи Қирғизистон мошини боркашонро идора мекард ва дар шоҳроҳ муқобили самти ҳаракат баромада, бо мошини сабукрав бархӯрдааст. Дар ин ҳодиса чор шаҳрванди ИМА ҳалок шуданд, ки аз 19 то 50 сол син доштанд.

Маҷлиси намояндагон, палатаи поёнии порлумони Тоҷикистон ҳафтаи гузашта дар як иқдоми камсобиқа лоиҳаи ду қонунро баргардондааст.

Ба гузориши нашрияи порлумонии "Садои мардум", Шӯрои Маҷлиси намояндагон 13-уми март қарор кард, ки лоиҳаи тағйиру иловаҳо ба қонун "Дар бораи сармоя ва ҳавасмандгардонии фаъолияти сармоягузорӣ" баргардонда шавад.

Дар хабари расмӣ ҷузъиёт дода нашудааст. Дар бораи лоиҳаи ин қонун ва сабабҳои баргардондани он дар манобеи боз низ маълумоте нест.

Ба иттилои расмӣ, Шӯрои Маҷлиси намояндагон рӯзи 16-уми март ҳамчунин лоиҳаи қонун "Дар бораи идоракунии рақамӣ"-ро бозпас гардондааст.

Дар бораи сабабҳои баргарондани ин лоиҳаи қонун низ шарҳе дода нашудааст. Лоиҳаи қонун дар бораи "Дар бораи идоракунии рақамӣ" моҳи ноябри соли 2025 расонаӣ шуда буд. Он вақт Маҷлиси намояндагон лоиҳаи ин қонунро барои додани хулоса ба кумитаҳои порлумон фиристода буд.

Порлумони Тоҷикистонро барои бидуни баҳс қабул кардани қонунҳо танқид мекунанд. Худи вакилон ин интиқодро қабул надоранд ва мегӯянд, лоиҳаи қонунҳо то расидан ба ҷаласаи Маҷлиси намояндагон баррасӣ ва такмил мешаванд.

Палатаи поёнии порлумони Тоҷикистон аз 63 вакил иборат аст, ки аксари онҳо аъзои Ҳизби ҳокими халқии демократӣ ва аҳзоби тарафдори ҳукумат ҳастанд. Ҳизби сотсиал-демократи Тоҷикистон, ки ягона ҳизби мухолифи расмӣ дар кишвар гуфта мешавад, дар порлумон намоянда надорад.

Додгоҳи шаҳри Хуҷанд як мардро барои баҳсу муноқиша бо ҳамсараш 234 сомонӣ ҷарима кардааст.

Ба иттилои додгоҳ, ин мард нимашаби 5-уми феврал "бо ҳамсараш баҳсу муноқишаи оилавиро ба миён оварда, нисбаташ беҳурматӣ зоҳир намуда, суханҳои қабеҳ гуфта, нисбаташ зӯровариро раво дидааст".

Назари ин мард ба қазия маълум нест. Сомонаи Додгоҳи Хуҷанд навиштааст, мард "ба гуноҳаш пурра иқрор гардида, аз кирдори содирнамудааш софдилона пушаймонӣ изҳор намуд".

Ба гузориши сомонаи Додгоҳи Хуҷанд, алайҳи ин мард бар асоси моддаи 93 иловаи 1-и Кодекси ҳуқуқвайронкунии маъмурӣ ҷазо таъйин шудааст. Ин банди қонун риоя накардани талаботи қонунгузорӣ дар бораи пешгирии зӯроварӣ дар оиларо пешбинӣ мекунад.

Хушунати хонаводагӣ аз масъалаҳои нигаронкунанда дар Тоҷикистон гуфта мешавад. Ба иттилои расмӣ, соли 2025 беш аз 3600 шикоят аз хушунат дар хонаводаҳо сабт гаштааст. Ин 403 маврид зиёдтар назар ба соли 2024 мебошад.

Хушунати хонаводагӣ дар ҳоли ҳозир дар Тоҷикистон ҷурми ҷиноӣ нест. Мақомот солҳо боз ният доранд, ки онро ҷурми ҷиноӣ бишносанд, вале ин кор то кунун сурат нагирифтааст.