Тазоҳуроти мухолифин дар пойтахти Қирғизистон шаҳри Бишкек дирӯз мунҷар ба даргирии байни издиҳоми тазоҳургарон бо нируҳои милиса шуд, ки дар ниҳоят бо тасарруфи сохтмонҳои муҳими давлатӣ аз сӯи тазоҳургарон анҷом ёфт.

Мухолифин Кохи раёсатҷумҳурӣ ва бинои родиёву телевизиони давлатиро ишғол намуда, ноиби собиқи раисиҷумҳур Феликс Қуловро аз маҳбас раҳо карданд. Феликс Қулов дар пайи раҳоияш аз зиндон билофосила раҳбари хадамоти амнияти миллии Қирғизистон таъйин шуд. Вай гуфт, пеш аз ҳама барои барқарор сохтани назму тартибот талош хоҳад кард: "Мо талош хоҳем кард, тартиботро то субҳи ҷумъа барқарор кунем. Ман ҳама корро барои ин хоҳам кард."

Додгоҳи Олии Қирғизистон ҳамзамон натоиҷи интихоботи ахири порлумониро, ки сабаби аслии тазоҳуроти чандинрӯзаи мардум дар кишвар шуда буд, лағв намуд. Раиси Додгоҳи Қонуни Асосии Қирғизистон Чолпон Бекова гуфт, сарвазир Николай Танаев истеъфо додааст.

Шоми дирӯз порлумони пешини Қирғизистон бо ташкили як иҷлосияи изтирорӣ Эшонбой Қодирбековро раиси порлумон ва раисиҷумҳури муваққати кишвар интихоб кард. Раҳбарии ҳукумати муваққат ба Шӯрои ҳамоҳангсози Иттиҳоди мардуми Қирғизистон супурда мешавад, ки раёсаташро яке аз раҳбарони мухолифин Қурмонбек Боқиев бар ӯҳда дорад.

Хабарнигори Родиёи Озодӣ дар Қирғизистон мегӯяд, тайи субҳи панҷшанбе дар Бишкек мағозаҳову сохтмонҳое, ки ба Аскар Оқоев ва аҳли хонаводаи ӯ тааллуқ доштанд, аз ҷониби издиҳом ғорат шуданд. Ин дар ҳолест, ки макони будубоши президент Аскар Оқоев то ҳол маълум нест ва, ба гуфтаи Қурмонбек Боқиев Оқоев, ӯ алакай қаламрави Қирғизистонро тарк кардааст. Аммо Бахтибек Абдурисоев, сафири Қирғизистон дар Амрико, шоми 24 март гуфт, Аскар Оқоев дар як макони амн буда, аз мақомаш истеъфо надодааст.

Дабири кулли СММ Куфӣ Анон ба оромӣ дар Қирғизистон даъват кардааст. Сухангӯи СММ гуфт, ки оқои Анон таҳаввули вазъ дар Қирғизистонро бо таваҷҷуҳ назора мекунад. Амрико гуфтааст, ба ҳифзи субот дар Қирғизистон манфиатдор ҳаст ва тазоҳургарони қирғизро ба сӯи хештандорӣ даъват мекунад.

Фиристодаи хоси раиси давраии САҲА Алоиз Петержела аз ҳама ҷонибҳои низоъ дар Қирғизистон даъват кард, ҷиҳати дарёфти як роҳи осоиштаи бӯҳрони кунунӣ амал кунанд. Аммо вазири хориҷаи Русия Сергей Лавров дирӯз гуфт, ки САҲА низ то ҷое дар чунин сурати ҳол дар Қирғизистон масъул ҳаст. Оқои Лавров ғолибан натиҷагирии нозирони САҲА аз ҷараёни интихоботи ахири порлумони Қирғизистонро дар назар дошт.

Ҳаводиси дирӯз иттифоқуфтода дар Қирғизистонро алакай бо айни ҳаводиси инқилобӣ дар Гурҷистону Украина монанд мекунанд. Таври маълум, дар он ду кишвар ҳам тазоҳуроти мардум ба нишони эътироз ба тақаллуби натоиҷи интихобот шурӯъ шуда, дар ниҳоят мунҷар ба тағйири қудрат ва ба раъси он кишварҳо расидани мухолифин шуда буд. Раисиҷумҳури Гурҷистон Михаил Саакашвили, ки барои анҷоми як сафари расмии серӯза вориди Украина шудааст, дирӯз пеш аз тарки Тифлис дар бораи ҳаводиси Қирғизистон гуфт: "Мо ба раисиҷумҳур Оқоев пешниҳод карда будем, ки роҳи осоиштаи ҳалли масъаларо биҷӯяд. Муттаассифона, як рӯз пеш посухи вай ба ин пешниҳод чунин буд, ки ҳама аъзои мухолифин ҷинояткоранд. Ман қатъиян ба ин розӣ нестам. Ман бовар дорам, ки дар байни онҳо нафарони хеле оқил ҳаст ва мо аз мухолифини қирғиз даъват мекунем, ки амнияти ҷисмони президент ва хонаводаи вайро замонат дода, аз роҳи хушунат ҷилавгирӣ кунанд."
Мирзои Салимпур, Прага

Маҷлиси намояндагон, палатаи поёнии порлумони Тоҷикистон, рӯзи 16-уми июн қонуни афвро баррасӣ кардааст.

Дафтари матбуоти Маҷлиси намояндагон бе овардани ҷузъиёт гуфт, лоиҳаи қонун “Дар бораи авф” баррасӣ ва "қарори дахлдор қабул карда шуд".

Қонуни афвро барои вакилон Ҳабибулло Воҳидзода, додситони кулли Тоҷикистон муаррифӣ кардааст. Тафсилот маълум нест.

Дар гузашта қонуни афв баъд аз тасдиқи Маҷлиси намояндагон нашр шудааст.

Пештар манобеи огоҳ ба Радиои Озодӣ гуфтанд, қонуни афви маҳбусон бахшида ба 35-солагии истиқлоли давлатии Тоҷикистон қабул мешавад.

Сафорати Тоҷикистон боздошти шаҳрванди 16-солаи кишварро дар Русия бо иттиҳоми куштор пайгирӣ дорад.

Дафтари матбуоти Вазорати корҳои хориҷии Тоҷикистон дар посухи хатӣ ба Радиои Озодӣ навишт, "Хадамоти консулии сафорат бо мақомоти Русия тамоси мустақим дошта, ҷараёни тафтишотро пайгирӣ менамояд".

Дар Вазорати корҳои хориҷӣ гуфтанд, тафтиши ҳодиса идома дорад ва баъд аз гирифтани маълумоти иловагӣ расонаҳоро дар ҷараён хоҳанд гузошт.

Рӯзи 11-уми июн Кумитаи тафтишотии Русия аз боздошти як шаҳрванди хориҷӣ бо иттиҳоми куштаву захмӣ кардани як падару писар хабар дод. Расонаҳо навиштанд, ҳамлавар 16-сола ва зодаи Тоҷикистон аст.

Назари наздикони наврас ба қазия ва ҳамин тавр ангезаи ӯ барои ин кор маълум нест.

Дар гузашта ҳам шаҳрвандони Тоҷикистон бо иттиҳоми содир кардани ҷиноят дар Русия дастгир шудаанд. Пайвандони баъзе аз муҳоҷирон ба бегуноҳии наздиконашон пойфишорӣ кардаанд.

Як узви "Гурӯҳи 24", созмони мухолифи ҳукумати Тоҷикистон, мегӯяд, мақомот дар ноҳияи Вахш фишорро ба падару модараш зиёд кардаанд, то ӯ ва амакҳояш – Ҳасан ва Ҳусейн Ашӯровҳо – танқиди ҳукуматро бас карда, аз хориҷа баргарданд. Фаъолияти ин созмон дар Тоҷикистон мамнуъст.

Исломиддин Ашӯров аз соли 2016 дар Аврупо қарор дорад. Амакаш, Ҳусейн Ашӯров, муовини раиси Кумитаи иҷроия ва ҳамзамон масъули бахши равобити хориҷии “Гурӯҳи-24” аст.

“Барои бозгаштани мо ба Тоҷикистон ба падарам фишор овардаанд. Панҷ сол пеш низ маҷбур карда буданд. Падарам он вақт дар як видео ба амакҳоям гуфта буд, ки ба Исломиддин роҳи нодуруст нишон надиҳед ва монед, ба Тоҷикистон баргардад. Вале мо хуб медонем, ки агар баргардем, моро ҷазои сангин медиҳанд,” – гуфт Исломиддин Ашӯров рӯзи 16-уми июн дар суҳбат бо Радиои Озодӣ.

Вай афзуд, нисбат ба ӯ ва ду амакаш дар Тоҷикистон бо гумони “тундгароӣ бо истифода аз расонаҳо ва интернет” парванда боз шуда, аксҳояшон дар қатори шахсони мавриди ҷустуҷӯ дар ноҳияи Вахш қарор дода шудааст.

Ҳусейн Ашӯров дар шабакаҳои иҷтимоӣ пайваста ҳукумати Эмомалӣ Раҳмонро ба худкомагӣ ва фишор ба фаъолону маҳдудияти озодиҳои сиёсӣ, динӣ ва баён танқид мекунад.

Кӯшиши мо барои гирифтани шарҳи мақомот то ин дам имконпазир набуд.

"Гурӯҳи 24" соли 2012 дар Русия таъсис ёфта, соли 2014 бо қарори Додгоҳи олии Тоҷикистон созмони экстремистӣ ва мамнуъ эълон шуд. Пайравонаш ин қарорро намепазиранд.

То кунун даҳҳо нафар дар Тоҷикистону Русия ва кишварҳои дигари пасошӯравӣ бо иттиҳоми тарафдорӣ аз “Гурӯҳи 24” боздошту зиндонӣ шудаанд. Ин созмонро тоҷири норозӣ Умаралӣ Қувватов бунёд гузоштааст. Худи ӯ соли 2015 дар шаҳри Истанбул кушта шуд.

Владимир Путин, раиси ҷумҳури Русия қонунеро имзо кард, ки бар асоси он муҳлати ташхиси ҳатмии муҳоҷирон кам карда мешавад. Санад дар махзани қонунгузории Русия нашр шудааст.

Бар асоси ин қонун, муҳлати ташхиси ҳатмии муҳоҷирон аз 90 ба 30 рӯз кам карда мешавад.

Муҳоҷирон то ин вақт баъди ворид шудан ба Русия вазифадор буданд то 90 рӯз аз муоинаи ҳатмии пизишкон гузаранд, то маълум шавад, ки гирифтори бемориҳои хатарнок нестанд.

Аммо тибқи қонуни нав, муҳлати гузаштан аз ташхиси тиббӣ то 30 рӯз муқаррар шуд. Натиҷаи ташхис барои гирифтани иҷозаи кор ё патент дар Русия зарур аст.

Ин қоида аз 1-уми сентябри имсол иҷроӣ мешавад.

Қонуни нав ҳамчунин барои саркашӣ аз супоридани ташхиси ҳатмӣ аз 25 то 50 ҳазор рубл ҷарима ва ихроҷ аз Русияро пешбинӣ кардааст.

Ғайр аз ин, барои сохтакорӣ ва фурӯши маълумотномаҳои қалбакӣ то 1 миллион рубл ҷарима ва ё то чор сол зиндон пешбинӣ шудааст.

Намояндагии Вазорати меҳнат ва муҳоҷирати Тоҷикистон дар Русия аз муҳоҷирони тоҷик хостааст, минбаъд ҳангоми ворид шудан ба Русия талаботи нав дар бораи гузаштан аз ташхиси ҳатмиро риоя кунанд.

Доналд Трамп, раисҷумҳури Амрико дар нимаи дувуми рӯзи 15 июн барои ширкат дар нишасти раҳбарони ҳафт кишвари саноатии дунё маъруф ба G 7, вориди шаҳри Женева шуд ва сипас ба шаҳри Эвиан-ле-Бен дар Фаронса рафт, ки ҷаласа онҷо баргузор мешавад.

Нишасти раҳбарони Гурӯҳи 7 имсол билофосила пас аз эълони созиши сулҳ байни Эрон ва Амрико барои поёни ҷанг, доир мешавад. Интизор меравад, ки ин мавзуъ меҳвари аслии гуфтугӯи раҳбарони кишварҳои узв бошад.

Амрико, Фаронса, Бритониё, Олмон, Канада, Италия ва Ҷопон кишварҳои узви Гурӯҳи 7 ҳастанд.

Эммануэл Макрон, раисҷумҳури Фаронса, ки мизбони ин давра аз нишасти раҳбарон аст, рӯзи 15 июн дар пайи эълони созиши сулҳи Амрико ва Эрон гуфт, ки дар нишасти Гурӯҳи 7, "паёмадҳо"-и созиш бо Эрон аз назари таъсири он ба Лубнон, бозкушоии пойдори тангаи Ҳурмуз ва барномаи мушакии Эрон, баррасӣ хоҳад шуд.

Илова бар масъалаи Эрон ва ҷанг дар Ховари Миёна, интизор меравад ҷанг дар Украина ҳам аз мавзӯъҳои дигари мавриди баҳси нишасти имсоли Гурӯҳи 7 бошад. Владимир Зеленский, раисҷумҳури Украина қарор аст рӯзи сешанбе дар нишаст иштирок кунад.

Кейр Стармер, нахуствазири Бритониё рӯзи 15 июн эълон кард, ки истифода аз шабакаҳои иҷтимоӣ барои афроди то 16-сола дар ин кишвар манъ хоҳад шуд.

Ӯ гуфт, ки ин шабакаҳо кӯдакон ва навҷавононро дар рӯбарӯи мӯҳтавои "хатарнок" қарор медиҳанд, ки "хатарнок" аст ва "барои мӯътод кардан тарроҳӣ шудаанд".

Тибқи эълони ҳукумати Бритониё, ин мамнуият шомили платформаҳое чун Снапчат, Тикток, Ютуб, Инстаграм, Фейсбук ва Х мешавад, аммо шомили хадамоти паёмрасон монанди Вотсапп намешавад.

Ин тасмим аз сӯи бархе ниҳодҳои хайрияи ҳомии кӯдакон истиқбол шуд, аммо бархе фаъолони дигар ҳушдор доданд, ки чунин тасмим метавонад наврасонро дар фазои онлайнӣ камтар эмин нигаҳ дорад.

Нахуствазири Бритониё гуфт, ин мамуният зери таъсири таҷрибаи Австралия анҷом мешавад, ки дар моҳи декабри соли гузашта аввалин кишваре буд, ки дастрасии афроди зери 16-сола ба шабакаҳои иҷтимоиро манъ кард.

Кейр Стармер ибрози умедворӣ кардааст, ки оинномаи манъи истифодаи кӯдакон ва навҷавонон аз шабакаҳои иҷтимоӣ то охири декабри соли ҷорӣ қабул шавад ва дар моҳҳои аввали соли оянда ба иҷро дарояд.

Канада ҳам ахиран истифодаи шабакаҳои иҷтимоӣ барои шахсони то 16-соларо манъ кард.

Шаби 15-уми июн дар ҳамлаҳои густурдаи Русия ба Украина дастикам 9 нафар кушта ва даҳҳо тани дигар захмӣ шуданд. Калисои зери ҳимояи ЮНЕСКО дар Киев низ ҳадафи ҳамла қарор гирифт.

Игор Клименко, вазири корҳои дохилии Украина, гуфт, панҷ маъмури наҷот дар вақти хомӯш кардани сӯхтор дар Харков ҳадафи ҳамлаи артиши Русия қарор гирифта, кушта шуданд. Дар инҷо ҳамчунин панҷ тани дигар захм бардоштанд.

Мақомоти Украина гуфтанд, дар пайи зарбаи нерӯҳои Русия ба осорхонаи рассомии вилояти Харков шаш нафар, аз ҷумла як хурдсол захмӣ шудаанд.

Виталий Кличко, шаҳрдори Киев низ гуфт, ҳамлаҳои густурдаи Русия боис ба сӯхтор дар тақрибан ҳама гӯшаҳои пойтахти Украина шуд. Аз кушта шудани чор нафар ва захмӣ гардидани 23 тани дигар дар шаҳри Киев гузориш шудааст.

Дар айни ҳол Украина низ ҳамла ба иншооти энергетикӣ, аз ҷумла корхонаҳои нафти Русияро давом медиҳад. Киев мегӯяд, ин корхонаҳо сарчашмаи маблағгузории ҷанг алайҳи Украина ҳастанд.

Президенти Иёлоти Муттаҳидаи Амрико дар рӯзи зодрӯзаш бо роҳбарони Украина ва Русия телефонӣ гап задааст. Трамп рӯзи 14-уми июн 80-сола шуд.

Владимир Зеленский, раиси ҷумҳури Украина суҳбат бо Трампро "ҷолиб" номид ва афзуд, "бисёр масъалаҳои калидиро" баррасӣ кардаанд.

Дар бораи суҳбати Доналд Трамп бо Владимир Путин ёвари раиси ҷумҳури Русия Юрий Ушаков хабар дод. Ин суҳбат қариб як соат идома кардааст.

Ба қавли Ушаков, ду тараф дар бораи сафари қарибулвуқуи фиристодаи вижаи президенти Амрико ба Маскав тавофуқ кардаанд.

Ба гуфтаи ёвараш, Владимир Путин гуфтааст, ҳамлаҳои Украина ба зерсохтҳои Русия ба раванди ҷанг таъсир намерасонанд.

Худи Трамп дар бораи суҳбаташ бо роҳбарони Русия ва Украина чизе нагуфтааст.

Ҷасад ё пайкари як сарҳанг (полковник)-и собиқи Вазорати корҳои дохилии Тоҷикистонро, ки дар ҷанги Русия алайҳи Украина кушта шуда буд, дар ноҳияи Восеъ дафн кардаанд.

Ба иттилои дарёфтии Радиои Озодӣ, маросими дафни Маҳмадҷон Бозоров, машҳур бо лақаби "Маҳмади Вандам", рӯзи 15-уми июн дар деҳаи Восеъободи калон баргузор шуд.

Ба гуфтаи мусоҳибони Радиои Озодӣ, ки нахостанд номашон навишта шавад, тобути Маҳмадҷон Бозоровро як рӯз пеш аз Русия ба Тоҷикистон овардаанд.

Гузориши видеоӣ дар инҷост:

Маҳмадҷон Бозоров аз ҷониби Русия дар Украина меҷангид ва дар аввали соли 2025 нопадид шуда буд.

Ӯ то соли 2005 дар дастаи зудамали таъйиноти махсус ё ОМОН-и Вазорати корҳои дохилии Тоҷикистон кор мекард.

Ба қавли пайвандонаш, Маҳмадҷон Бозоров ҳафт сол пеш бо ҳафт фарзанд ба Русия кӯчида, шаҳрвандии ин кишварро гирифт ва дар онҷо ба фаъолиятҳои низомӣ идома дод.

То кунун хабари нопадид, асир афтодан ва кушта шудани даҳҳо зодаи Тоҷикистон дар Украина расонаӣ гардидааст.

Мақомоти Тоҷикистон ҳам ба шаҳрвандон ҳушдор дода буданд, ки дар ҷанги Украина ширкат накунанд, вале то кунун касеро ҷазо надодаанд ё ҳадди ақал расонаӣ накардаанд.

Навор дар Инстаграм:

Дар се рӯзи ахир ду наврас дар Тоҷикистон ғарқ шуда, се каси дигарро наҷот додаанд.

Ба гузориши Кумитаи ҳолатҳои фавқулода, рӯзҳои 12 ва 13-уми июн, ду навраси 16-сола дар канал ё наҳри "Мирҷӯи-1"-и ноҳияи Зафаробод ҳангоми оббозӣ ғарқ шудаанд. Мақомот мегӯянд, ҷасади онҳоро аз об бароварда, ба наздикошон додаанд.

Манбаъ мегӯяд, рӯзи 13-уми июн се нафарро, ки дар миёни об дармонда буданд, аз ғарқшавӣ наҷот додаанд.

Дар хабарномаи Кумитаи ҳолатҳои фавқулода омадааст, ин се нафар, ки 36 ва 37-сола будаанд, ҳангоми истироҳат дар соҳили дарёи Вахш "дар муҳосираи об" мондаанд.

Кумитаи ҳолатҳои фавқулода бо нашри ин ду хабар аз сокинон даъват кардааст, ки қоидаҳои оббозиро риоя карда, дар ҷойҳои манъшуда шиноварӣ накунанд.

Ҳамасола дар рӯзҳои гарм ва ҳангоми оббозӣ дар соҳили кӯл ё дарёҳо сокинон ҷони худро аз даст медиҳанд.

Бозори саҳҳоми Wall Street рӯзи ҷумъа шоҳиди ҳодисаи таърихӣ шуд. Илон Маск рӯзи 12 июн пас аз онки саҳмияҳои ширкаташ SpaceX дар нахустин рӯзи пешниҳоди умумии аввалия дар бозор 30 дарсад афзоиш ёфт, нахустин триллионери ҷаҳон шуд.

SpaceX 6,555 миллион саҳми худро ба қимати 135 доллар барои ҳар саҳм пешниҳод кардааст. Арзиши ин ширкат дар замони вуруд ба бозор ҳудуди 1,77 триллион доллар бароварда мешавад.

Маск пеш аз пешниҳоди умумии саҳмияҳои SpaceX, бо сарвати ҳудуди 696 миллиард доллар, сарватмандтарин фарди ҷаҳон буд. Ӯ 62 дарсад саҳми SpaceX-ро дар ихтиёр дорад. Коршиносон арзиши ин саҳмро байни 743 то 866,5 миллиард доллар бароварда мекунанд.

SpaceX ки фаъолияти худро соли 2002 ҳамчун як ширкати фазоӣ оғоз карда буд, акнун ба яке аз бозигарони аслӣ дар арсаи фановариҳои моҳвораӣ ва ҳушӣ маснуӣ табдил шудааст.

Коршиносон ба ин боваранд, ки ин пешниҳоди аввалия метавонад заминасози вуруди дигар ширкатҳои калони ҳуши маснуӣ ба бозори саҳҳом дар моҳҳои оянда бошад.

Илон Маск (зодаи соли 1971 дар Африқои Ҷанубӣ) соҳибкор ва аз сарватмандтарин афроди ҷаҳон аст, ки бештар ҳамчунин мудири ширкатҳои калон, монанди "Тесла", SpaceX ва шабакаи иҷтимоии Х (Твиттери пешин), шинохта мешавад.

Артиши Исроил рӯзи 13 июн бо вуҷуди оташбас дар ҷанг бо "Ҳизбуллоҳ", аз ҳамлаҳои қарибулвуқӯъ ба ҷануби Лубнон ҳушдор дод ва ба сокинони 20 шаҳр ва деҳа дар наздикии шаҳри Набтия гуфт, ки ин минтақаҳоро холӣ кунанд.

Артиши Исроил эълон кард, ин ҳушдор дар пайи нақзи оташбас аз сӯи "Ҳизбуллоҳ"-и Лубнон содир шудааст.

Сухангӯи арабзабони артиши Исроил дар матне дар шабакаи Х навишт, "барои амнияти худ, бояд фавран хонаҳои худро холӣ карда, ба шимоли дарёи Заҳронӣ раванд".

Ӯ афзуд, "ҳар касе, ки дар наздикии иншоот ё таҷҳизоти ҷангии "Ҳизбуллоҳ" бошад, ҷони худро ба хатар меандозад". Ин сухангӯи артиши Исроил гурӯҳи "Ҳизбуллоҳ"-ро ба нақзи оташбас муттаҳам кард.

Исроил ва Эрон рӯзи 8 июн пас аз дархости Доналд Трамп, раисҷумҳури Амрико барои қатъи даргирӣ, ҳамлаҳои мустақим ба якдигарро мутаваққиф карданд.

Аммо Теҳрон эълон кард, агар Исроил ба ҳамла ба муттаҳидонаш, ниманизомиёни "Ҳизбуллоҳ" дар Лубнон идома диҳад, дигарбора ҳамлаҳоро оғоз мекунад.

Мулло Ҳайбатулло, раҳбари ҳукумати Толибон дастури манъи истифода аз телефонҳои ҳушманд дар ҳама идораҳои низомӣ ва ғайринизомии давлатии Афғонистонро додааст.

Ин мавзӯъро масъулини ҳукумати Толибон дар чандин вилояти Афғонистон дар гуфтугӯ бо бахши афғонистонии Радиои Аврупои Озод/Радиои Озодӣ, тасдиқ карданд. Ба гуфтаи онҳо, ин дастур ба таври шифоҳӣ ба онҳо расонида шудааст.

Як мақоми Толибон дар вилояти Бадахшон, ки бинобар ҳассосияти мавзӯъ нахост номаш дар гузориш зикр шавад, рӯзи 11 июн ба Радиои Озодӣ гуфт, "як дастури шифоҳӣ вуҷуд дорад, ки давоми соатҳои корӣ аз телефонҳои ҳушманд истифода нашавад".

Дар вилоятҳои Ғазнӣ, Ҳилманд ва Нангарҳор низ мақомҳои маҳаллии ҳукумати Толибон ба шарти ифшо нашудани ном ва садояшон ин мавзӯъро тасдиқ карданд ва гуфтанд, ки дастури Мулло Ҳайбатуллоҳ дар бархе минтақаҳо се рӯз пеш ва дар бархе вилоятҳо ҳудуди як ҳафта пеш ба онҳо расидааст.

Чанд рӯз пеш наворҳое дар шабакаҳои иҷтимоӣ нашр шуд, ки дар он бархе афроди Толибон телефонҳои ҳушмандро мешикананд.

Ҳамчунин бархе расонаҳои дохилии Афғонистон паёми садоиеро нашр карданд, ки ба яке аз мақомҳои Толибон нисбат дода мешавад. Ӯ дар ин навор аз нишасти Мулло Ҳайбатулло бо масъулони низомии ин кишвар суҳбат мекунад.

Дар ин паём иддао шудааст, ки раҳбари Толибон ба ҳамаи идораҳои низомӣ ва давлатӣ дастур додааст, ки телефонҳои ҳамроҳ ҷамъоварӣ ва шикаста шаванд.

Радиои Озодӣ натавонистааст ин иддаоро ба таври мустақилона тасдиқ кунад.

Дар муқобил, шуморе аз масъулини ҳукумати Толибон дар Кобул дар паёмҳои хаттӣ ба Радиои Озодӣ гуфтаанд, ки то кунун чунин дастуре ба онҳо нарасидааст ва дар бораи видеоҳои нашршуда хабаре надоранд.

Шаҳбоз Шариф, нахуствазири Покистон рӯзи 12 июн эълон кард, ки матни ниҳоии созиши сулҳ миёни Эрон ва Амрико мавриди қабули ҳар ду тараф қарор гирифтааст.

Ӯ дар паёме дар шабакаи Х навишт, "метавонем тасдиқ кунем, ки матни ниҳоӣ ва мавриди тавофуқ барои сулҳ, ҳосил шудааст ва Покистон акнун аз наздик бо ҳар ду тараф ҳамкорӣ мекунад, то марҳилаи баъдӣ ниҳоӣ шавад".

Покистон дар моҳҳои гузашта нақши миёнҷӣ байни Теҳрон ва Вашингтонро бар ӯҳда дошт ва як даври музокироти ҳузурӣ байни ҷонибҳо низ дар Исломобод баргузор шуд. Ӯ афзуд, "сулҳ ҳаргиз то ин надоза наздик набудааст".

Шаҳбоз Шариф ҳамчунин гуфт, "дар авҷи талошҳои давомдори Покистон барои миёнҷигарӣ, мо комилан аз маъракаи беисти нашри маълумоти нодуруст, ки аз сӯи касоне роҳандозӣ шуда буд, ки мехоҳанд созиши сулҳро халалдор кунанд, огоҳ ҳастем".

Аббос Ароқчӣ, вазири корҳои хориҷии Эрон рӯзи 12 июн таъкид кард, ки созиш бо Амрико барои поён додан ба ҷанг дар Ховари Миёна ҳаргиз то ин андоза наздик набудааст.

Ин изҳорот пас аз он матраҳ шуд, ки Доналд Трамп, раисҷумҳури Амрико Теҳронро ба музокира бо ниятҳои бад муттаҳам кард ва гуфт, нуқтаҳои матраҳшуда дар расонаҳо дар бораи мӯҳтавои созиш нодуруст аст.

Доналд Трамп, раисҷумҳури Амрико, гуфт, он чизе, ки аз сӯйи Эрон дар бораи тавофуқи эҳтимолӣ байни Ҷумҳурии Исломӣ ва Иёлоти Муттаҳида ба расонаҳо роҳ ёфтааст, дуруст нест.

Баъзе аз расонаҳои эронӣ ва амрикоӣ тайи соатҳои гузашта бахшҳое аз муҳтавои тавофуқи эҳтимолӣ байни Эрону Амрикоро нашр карданд.

ИРНА, хабаргузории расмии Ҷумҳурии Исломӣ, иддао кард, ки тафоҳум миёни ҷонибҳо шомили парвандаи ҳастаии Эрон намешавад ва қарор аст дар марҳилаҳои баъдӣ дар бораи он музокира шавад.

Ҳамчунин, рӯзномаи “Эътимод” ба нақл аз манобеи эронӣ навишт, ки барои оғози оташбаси 60-рӯзаи зикршуда дар тафоҳумнома бояд 12 миллиард доллар аз дороиҳои бандмондаи Эрон озод карда шавад.

Доналд Трамп рӯзи 12-уми июн дар шабакаи иҷтимоии Truth Social навишт: “Чизе, ки онҳо (Эрон) гуфтаанд, аз ҷумла баёнияи суст ва риққатангез дар бораи дастёбӣ ба тавофуқ, ҳеч нисбате бо воқеият надорад.”

Вай мақомоти Эронро “бешараф” хонд ва афзуд: “Барои онҳо чизе бо номи музокира ва таомул бо ҳусни ният вуҷуд надорад.”

Трамп ба Теҳрон ҳушдор дод, ки рафтори худро ба тартиб дарорад ва он ҳам ҳарчи зудтар.