Милинкевич касест, ки як сол пеш дар айни чунин анҷуман номзади ягонаи оппозисюни Беларус дар интихоботи президентӣ баргузида шуда, дар муқобили Александр Лукашенко қарор гирифт. Ба омори расмии мақомоти Беларус 6 дарсади райъдиҳандагон аз номзадии Милинкевич пуштибонӣ кард.

Дар давоми ин як сол Милинкевич намояндаи расмии мухолифони Беларус буд ва дар ин мақом ба кишварҳои хориҷӣ сафарҳо дошт, дар Порлумони аврупо суханронӣ кард ва барандаи ҷоизиа ба номи Сахарови ин порлумон эълон гардид.

Худдории ӯ аз ширкат дар Анҷумани солонaи оппозисюни Беларус аз нигоҳи аксари коршиносон нишонаи фурӯпошии ягонагии мухолифон аст. Вале худи ӯ мегӯяд, хостори парокандагӣ набуда, бо сабаби мухолифаташ ба тасмими шӯрои ҳамоҳангсози оппозисюн дар мавриди раҳбарии бонавбат ба иттиҳоди мухолифон дар анҷуман ширкат нахоҳад кард: "Ман аз сабқат наметарсам ва омодаам бори дигар барои раҳбарӣ мубориза кунам. Вале вақте ки эътилофи мо тасмими раҳбарии бонавбатро пазируфт, рағбати ман ба он гум гашт. Зеро раҳбарии бонвабат чӣ маънӣ дорад? Яъне ҳама раисанд ва ҳеч кас раис нест. Ҳар кас барои муддати муайян раҳбар мешавад, вале баъд аз чанд моҳ ҷойро ба каси дигар медиҳад. Кас метавонад, ҳар се сол як бор раёсат кунад. Аммо шумо бо чунин мушти гиреҳнахӯрда наметавонед, бо як режими диктотурӣ муқовимат кунед."

Милинкевич инчунин мегӯяд, тартиби пебшарии номзадҳои анҷуман шаффоф нест ва бо ҳадафҳои муайян мавриди ҳуққабозист.
Аляксанд Бухвостау, ташкилкунандаи анҷуман аз Иттиҳодияҳои касбии озод, иддаъои Милинкевичро рад кард ва гуфт, мавзеъгирии ӯ хилофи асли ягонагии оппозисюн аст.

Раҳбари Ҳизби коммунист Сиарҳей Калякин, ки раиси ситоди интихоботии Милинкевич буд, гуфт, Милинкевич аз он метарсад, ки мақоми раёсатро аз даст медиҳад: "Ба андешаи ман, вай мутмаъин нест, ки пуштибонии вакилонро ба даст хоҳад овард. Биноан, бидуни сабқат худро канор кашидааст. Касе канораҷӯӣ мекунад, ҳақ нест."

Раиси Ҳизби ваҳдати мардум Анатол Лябежка, ки рақиби Милинкевич дар интихоботи раҳбари ягонаи оппозисюн буда, бо фарқи каме интихоботро бохта буд, мегӯяд, аз ҳамин лаҳзаи изҳороти ахири Милинкевич эътилофи оппозисюн амалан раҳбар надорад ва ин ба анҷуман имкон медиҳад, раҳбари нав интихоб кунад. Вале раҳбари Ҷабҳаи мардумии Белорус Винтсук Вяхорка бар ин аст, ки бидуни Милинкевич анҷуман қонунӣ нахоҳад буд.
Мӯътадилони ҳамаи аҳзоб мехоҳанд, ба хотири ҳифзи ягонагии эътилоф роҳҳои васатро ҷустуҷӯ кунанд. Аз ҷумла таъсиси мақомҳои бештари роҳбариро, ки бархе бонавбат дар ихтиёри аҳзоб гузошта шаванд ва бархе доимӣ бошанд. Аммо хулосаи кулли коршиносон ин аст, ки тафриқа дар оппозисюни Беларус васеътар шуда, ҳамзамон лабханди президент Лукашенкоро низ фарохтар мекунад.

Масъалаи тафриқа дар эътилофҳо зимни муборизаи қудрат ба бисёре аз ҳизбу ҷумбишҳои оппозисюн хос аст. Дар ҳоле ки мухолифони Беларус тавонистанд, як номзади ягонаеро ба саҳнаи интихоботи президентӣ бароранд, ҳизбҳои сиёсии Тоҷикистон ба чунин муваффақият ноил нагаштанд.Дар интихоботи порсолаи президентӣ, ҳатто чизе шабеҳ ба эътилофи ин аҳзоб низ арзи вуҷуд накард. Эҳтимол чунин вазъият аст, ки сабаби зуҳури ҳизбу ҳаракатҳои нав мегардад.

Раҳматулло Валиев, сарпарасти ситоди Ҳизби демократи Тоҷикистон, ҳизбе ки дастикам ба се бахш тақсим шудааст, мегӯяд, дар Тоҷикистон низ мисли Беларус аст парокандагии аҳзоби мухолиф зимни рақобатҳои қудрат вуҷуд дорад. Аммо он ки дар давраи ҷанг ва гуфтушунидҳои сулҳ оппозисюни тоҷик соҳиби як иттиҳоди қавӣ буд, ба ақидаи ҷаноби Валиев ба он бастагӣ дошт, ки сарони аҳзоб аз ҳама фикрҳо даст кашида, танҳо як мақсад доштанд, ки кишварро ба сулҳу оромӣ расонанд. Имрӯз низ, зимни як идеяи миллӣ, чунин ҳолат дар Тоҷикистон имконпазир аст, вагарна, мегӯяд Валиев, дар алоҳидагӣ ҳеч ҳизбе ба мақсад нахоҳад расид, аммо ин ҳол табъи дили раҳбарияти кишвар хоҳад буд.

Пайкар ё ҷасади Сино Муборакшоев, ронандаи раиси Вилояти Мухтори Куҳистони Бадахшон аз дарёи Панҷ ёфт шудааст.

Рӯзи 25-уми июн дафтари матбуоти Кумитаи ҳолатҳои фавқулода хабар дод, ки дар ҷараёни ҷустуҷӯи мошини раиси ВМКБ ва ҳамроҳонаш аз дарёи Панҷ як ҷасад ёфтанд ва ташхис кӣ будани ӯро муайян мекунад.

Рӯзи 26-уми июн Ориф Нозимиён, сухангӯи дафтари матбуоти Кумитаи ҳолатҳои фавқулода ба Радиои Озодӣ гуфт, ташхис муайян кард, ки ҷасади ёфтшуда Сино Муборакшоев, ронандаи раиси ВМКБ аст.

Сухангӯи Кумита ҳамчунин гуфт, 26-уми июн боз як ҷасади дигар пайдо карданд ва "ташхис то ҳоло кӣ будани ӯро муайян накардааст".

Дар ҳамин ҳол як манбаи дигар дар ниҳодҳои интизомии минтақаи Кӯлоб гуфт, ҷасади ёфташударо ба шаҳри Кӯлоб бурдаанд. "Барои муайян кардани шахсияти ин ҷасад наздикони ҳамаи касонеро, ки бо Алишер Мирзонабот буданд, даъват кардаанд", - гуфт як манбаи огоҳ ба Радиои Озодӣ.

Мошини хидматии раиси вилояти Бадахшон рӯзи 17-уми июн дар ҳудуди ноҳияи Дарвоз ба дарёи Панҷ сарозер шуд ва беш аз як ҳафта боз ҷустуҷӯйи пайкари онҳо идома дорад.

Дар дохили мошин ба ҷуз Алишер Мирзонаботу ҳамсараш Амина Амонуллоева ва духтари дусолааш Орифа, ду марди дигар – ёвараш Садоншо Ҷанобалишо ва ронандааш Сино Муборакшоев – буданд. Онҳо аз Душанбе ба Хоруғ мерафтанд.

Вазорати корҳои дохилии Тоҷикистон сабаби ҳодисаро "суръати баланд" ва "аз ӯҳдаи идораи мошин набаромадани ронанда" номид.

Кумитаи ҳолатҳои фавқулода мегӯяд, дар ҳоли ҳозир беш аз 200 маъмури наҷот дар рӯйи об ва зери он дар ҳудуди ноҳияҳои Дарвозу Шамсиддин Шоҳин ва мавзеъҳои дигар ҷасадҳоро ҷустуҷӯ доранд.

Содир Ҷабборов (Жапаров), раисҷумҳури Қирғизистон, аз мардуми кишвараш хостааст, пеш аз гирифтани қарзи бонкӣ барои тӯю маъракаҳо фикри бозгардондани онро бикунанд.

Хабаргузории “24.kg” рӯзи 26-уми июн навишт, Ҷабборов дар ин бора ҳангоми мулоқоташ бо сокинони ноҳияи Оқтолаи вилояти Норин гап задааст.

Як сокини Норин гуфтааст, баъзе аз одамон барои саривақт насупурдани қарз ба “феҳристи сиёҳ”-и бонкҳо ворид карда мешаванд.

Ҷабборов дар посух гуфтааст: “Қарзи бонкӣ кумаки бебозгашт нест. Баъзеҳо қарз гирифта тӯй мегузаронанд, вале баъди тӯй онро баргардонида наметавонанд.”

Расонаҳои Қирғизистон навиштанд, ки мавзӯи қарзҳои бонкӣ барои барпо кардани тӯй дар ин кишвар дар гузаштаҳо ҳам матраҳ шудаст.

Кумитаи омори миллии Қирғизистон гуфтааст, соли 2025 ташкилоти қарзӣ ба сокинон ба маблағи 86 миллиард сом пул додаанд. Бахши асосии маблағҳо барои барпо кардани тӯй истифода мешаванд.

Дар Қирғизистон низ ба мисли кишварҳои дигари Осиёи Марказӣ тӯю арӯсиҳо аз бахши бисёр серхароҷоти маъракаҳо ба ҳисоб мераванд.

Ширкати Apple замимаи ВКонтакте, шабакаи иҷтимоии русиро, ки шаҳрвандони Тоҷикистон ҳам аз он истифода мекунанд, аз App Store пок кардааст. Инчунин, барномаҳои дигари вобаста ба VK Group дар дастгоҳҳои Apple боргирӣ намешаванд.

ВКонтакте, ки пойгоҳи иҷтимоии маъруф дар Русия ба шумор меравад, аз соли 2006 фаъол аст. Ин ширкати русӣ рӯзи 25-уми июн дар изҳороте гуфт, Apple бидуни шарҳ ё огаҳӣ замимаи онро ҳазф кард.

Ин пойгоҳ гуфт, дастрасии даҳҳо миллион корбараш ба шабакаҳои иҷтимоӣ, паёмрасонҳо, пойгоҳҳои видеоӣ, имейл ва маҳсулоти омӯзишии онҳо низ номумкин гардид.

Дар Кремл қарори Apple-ро барои ҳазфи ВКонтакте "аҷиб" номиданд. Сухангӯи Кремлин гуфт, аз ширкати амрикоӣ тақозо хоҳанд кард, ки қарорашро шарҳ диҳад.

Ширкати Apple дар оғози моҳи июн нисбат ба шабакаи иҷтимоии русии Max, ки дар пушти он ҳукумати Русия истодааст, тасмими ҳамсон гирифта буд.

Мақомоти Русия давоми моҳҳои зиёд аз ҳама шаҳрвандон талаб мекарданд, ки ба пойгоҳи Max бипайванданд ва дар ин байн фаъолияти WhatsApp ва Telegram-ро ҳам ба шиддат маҳдуд карданд.

Ким Кон Ҳи, ҳамсари Юн Сок Ёл, раисҷумҳури пешини Кореяи Ҷанубӣ, бо гуноҳи ришвагирӣ ба 7 сол зиндон маҳкум шуд.

Додрас рӯзи 26-уми июн гуфт, "ӯ барои иҷрои хоҳишҳои сиёсии дигарон ҷавоҳироти гаронбаҳо гирифт." Худи зан гуфтааст, аз рӯйи ҳукм шикоят хоҳад кард.

Додраси додгоҳи ноҳияи марказии Сеул, пойтахти Кореяи Ҷанубӣ, гуфт, "Ким Кон Ҳи бо истифода аз қудраташ ба ҳайси ҳамсари президент дар дарёфти вазифаву мақомҳо дар порлумон мусоидат карда, дар иваз подоши гаронбаҳо гирифтааст".

"Ӯ беибо ришваҳои зиёде қабул мекард, дар ҳоле ки барои одамони одӣ барои харидани чунин чизҳо як умр вақт зарур аст," -- гуфт додрас рӯзи 26-уми июн.

Дар миёни ҷавоҳироти гаронбаҳое, ки ӯ гирифтааст, аз ҷумла гарданбанди маъруфи Van Cleef & Arpels, дастпонаи ‌Tiffany, гӯшвори Graff ёд шудааст. Инчунин ӯ як сангпушти тилоӣ, сумкаи ширкати Dior ва соати ширкати Vacheron Constantin-ро бо арзиши беш аз 25 ҳазор доллар ва як наққошӣ гирифтааст.

Додрас гуфт, рафтори ҳамсари собиқ президент боварро ба шаффофияти таъйини мансабдорон ба вазифаҳои давлатӣ аз байн мебарад.

Дар миёни онҳое, ки "пора" додаанд, раиси як ширкати бинокорӣ будааст, ки хоҳони мансаб барои домодаш шудааст. Ё як рӯҳоние, ки хостааст шабакаи нуфузи худро дар миёни мақомдорони Кореяи Ҷанубӣ тавсеа бидиҳад.

Додгоҳ қарор кард, ки ин зан ба иловаи 7 сол зиндон ҷарима пардохт кардаву тамоми тӯҳфаҳои гирифтаашро баргардонад.

Худи зан дар додгоҳ иттиҳомҳоро рад карда, гуфтааст, бо ҳукм розӣ нест ва бозбинияшро талаб хоҳад кард.

Мурофиаи мазкур дар ҳоле барпо шуд, ки Ким Кон Ҳи барои муомилаҳои ғайриқонунӣ дар бозори саҳом ва гирифтани ришва аз Калисои муттаҳидаи Кореяи Ҷанубӣ моҳи апрели имсол ба чор сол ҳабс маҳкум шуда, дар зиндон қарор дошт.

Ҳамсари ӯ, президенти собиқи Кореяи Ҷанубӣ, моҳи феврал барои ташкили ошӯби кӯтоҳмуддат ва бедалел ҷорӣ кардани қуюди ҳарбӣ дар соли 2024 ба ҳабси абад маҳкум шудааст.

Маъмурони наҷот дар Венесуэла садҳо шахси бенишоншударо дар зери вайронаҳо ҷустуҷӯ мекунанд. Рӯзи 25-уми июн замин дар атрофи Каракас, пойтахти Венесуэла, ларзид ва маконҳои зиёдеро хароб кард.

Хадамоти заминшиносии Амрико гуфт, шояд ҳазорҳо нафар дар ин ҳодиса ҷон бохта бошанд. Вазорати беҳдошти Венесуэла хабар дод, ки то кунун ҷасад ё пайкари беш аз дусад нафарро пайдо карданд.

Пештар мақомоти ин кишвар эълон карда буданд, ки 250 бино зиён дида ё пурра хароб шудааст ва садҳо нафар зери вайронаҳо мондаанд.

Венесуэла иқтисоди заиф дорад ва ниҳодҳои ин кишвар тавони кумаки фаврӣ ба зиёндидагонро надоранд. Пасларзаҳо низ кори наҷотдиҳандагонро сахттар кардааст.

Як сокини Венесуэла, ки аз зери харобаҳо солим берун овардаанд, гуфт: "Чор соат зери вайрона будам. Намедонам кормандони Кумитаи ҳолатҳои фавқулода ё идораи дигар наҷотам доданд. Онҳо дастгоҳи зиёд надоштанд. Онҳо натавонистанд бо таҷҳизот бетонҳоро шикананд, ҳамаро бо даст карданд. Ман ҳам талош кардам, ки роҳ боз кунам. Дар хонаам ҷиҳози зиёд доштам, ки онҳо маро аз девори чаппашуда муҳофизат карданд."

Делси Родригес, раисҷумҳури муваққати Венесуэла, ба Ла-Гуаяра рафт, ки бештар зиён дидааст: "Мо аз ҷомеаи ҷаҳонӣ кумак хостем. Нахустин наҷотдиҳандагон аз ҷумҳурии Доминикин ҳоло мерасанд ва кумакҳои кишварҳои дигар дар роҳ аст. Беҳтарин орзуву дуои мо ин аст, ки мардону занони Венесуэла саломат бошанд.”

Эл Салвадор ва Мексика рӯзи 25-уми июн гурӯҳи наҷотдиҳандагонро ба Венесуэла фиристоданд. Иёлоти Муттаҳида таҳримҳоро нисбат ба Венесуэла сабук кард ва интиқоли пулу молу маҳсулотро дар ҳолатҳои изтирорӣ ба ин кишвар, ки то кунун мамнуъ буд, иҷозат дод.

Тоҷикистон барои бунёди даҳ мактаби нав, аз Бунёди Кувайт барои рушд 19,2 миллион доллар вом ё қарз мегирад.

Ба гузориши Сафорати Тоҷикистон дар Кувайт, "муддати қарзи мазкур 26 сол буда, 5 соли он давраи имтиёзнок ё давраи танаффус мебошад".

Қарз бо баҳраи 1 дарсади солона дода мешавад.

Манбаъ мегӯяд, қарор аст бо ин маблағ дар вилоятҳои Суғду Хатлон ва ноҳияҳои тобеи ҷумҳурӣ даҳ мактаби нав сохта шавад.

Камбуди мактаб аз мушкилиҳои асосии низоми маорифи Тоҷикистон гуфта мешавад.

Мақомот мегӯянд, бо вуҷуди ҳамасола сохта шудани мактабҳои нав, нарасидани ҷойи нишаст ё аз меъёр зиёд будани муҳассилин дар синхфона дида мешавад.

Вазорати корҳои хориҷии Ҷумҳурии исломии Эрон изҳороти дабири кулли НАТО дар бораи истифодаи Амрико аз бархе пойгоҳҳои ин паймони низомӣ дар Аврупо дар ҷанги ахир бо Эронро "эътироф ба ҳамдастии фаъолонаи ин созмон дар иртикоби таҷовузи низомӣ алайҳи як кишвари мустақил" хонд ва хостори посухгӯии аъзои ин паймони низомӣ шуд.

Марк Рутте, дабири кулли НАТО, дар посух ба интиқодҳои Доналд Трамп ба ҳамкорӣ накардани ин паймони низомӣ бо Амрико дар ҷараёни ҷанги ахир бо Эрон гуфта буд, дар вақти ин ҷанг, кишварҳои аврупоии аъзои НАТО ҳамкории бисёр зиёде бо Амрико доштанд ва чаҳор то панҷ ҳазор парвози амалиётии артиши Амрико аз пойгоҳҳои аврупоӣ, ва аз ҷумла, Италия анҷом шуда буд.

Мақомҳои Италия бо радди ин изҳорот гуфтаанд, ки танҳо бар асоси ӯҳдадориҳои дутарафа бо Вашингтон, иҷозаи парвозҳои боркашонӣ ва пуштибониро дода буданд ва ҳеч амалиётӣ низомӣ аз пойгоҳҳо ва фурудгоҳҳои ин кишвар анҷом нашудааст.

Дар замони ҷанги Эрон, чандин муттаҳиди аврупоии Амрико, аз ҷумла, Италия ва Испания бо ин ҷанг мухолифат карда буданд ва бархе дигар чун Британия, Олмон ва Фаронса ҳам бо мавзеъгирии эҳтиёткорона, худро аз ворид шудан ба ин ҷанг дур нигаҳ доштанд. Мавзуе, ки боиси ранҷиш ва гилаи сахти Доналд Трамп шуд.

Кумисюни Аврупо дар ҳамкорӣ бо кишварҳои Осиёи Марказӣ ва Қафқози Ҷанубӣ аз эҷоди як пойгоҳи табодули маълумот ва мувофиқа барои ҷалби 2 миллиард евро сармояи ниҳодҳои молии байнулмилалӣ хабар дод. Ин талошҳо барои фаъол кардани роҳҳо ва додугирифтҳои байни ин кишварҳо равона мешаванд.

Дар ин бора рӯзи 23-юми июн дар ҷаласае бо иштироки Марта Кос, комиссар оид ба ҳамкорҳои байнулмилалӣ ва Йозеф Сиклеа, комиссар оид ба нақлиёти босубот ва мақомоту намояндагон аз кишварҳои Осиёи Марказӣ ва Қафқози Ҷанубӣ хабар доданд.

Дар иттилоияи расмӣ гуфта шуд, ки дар доираи тарҳи стратегии Иттиҳоди Аврупо бо номи “Дарвозаҳои ҷаҳонӣ” бо ширкати вазирони нақлиёт ва мақомоти дигари Қазоқистон, Қирғизистон, Молдова, Тоҷикистон, Туркманистон, Туркия, Украина ва Узбекистон, намояндагони кишварҳои Гурӯҳи ҳафт кишвари пешрафтаи саноатӣ ва созмонҳои молии байнулмилалӣ ҷаласа барпо шуд. Аз Тоҷикистон дар ҷаласа Беҳзод Икромов, муовини раиси ҳайати намояндагии Иттиҳоди Аврупо дар ин кишвар суханронӣ кардааст.

Дар ин пойгоҳи ягона, қарор аст, ҷараёни ворид шудани сармояҳо, фаъолиятҳои сиёсӣ дар соҳаи нақлиёт, энержӣ, мухобироти рақамӣ ва тиҷорати байни кишварҳои ширкатдори ин тарҳ ҳамоҳанг шавад.

Кумисюни Аврупо гуфтааст, барои беҳбуди зербунёдҳои нақлиётии пайвандгари минтақаи ҷойгир дар соҳилҳои Баҳри Сиёҳ ва Қафқози Ҷанубӣ 2 миллиард евро сармояро ҷалб мекунад.

Марта Кос гуфтааст, дар пасманзари ҷанги идомадори Русия дар хоки Украина, “ба мо долонҳои боэътимоди нақлиётӣ заруранд. Дар давоми понздаҳ соли оянда тиҷорат дар ин самт метавонад панҷ баробар афзояд”.

Йозеф Сикела таъкид кардааст, ки “долони нақлиётӣ тавассути Баҳри Хазар ба як пули ҳаётан муҳим байни Аврупову Осиё табдил мешавад”.

Як намояндаи Кумисюни Аврупо дар посухи хатӣ ба муроҷиати Радиои Озодӣ гуфт, стратегияи “Дарвозаҳои ҷаҳонӣ” барои беҳтар кардани иртибот ва содатар кардани тиҷорати миёни Иттиҳоди Аврупо ва Осиёи Марказӣ тавассути Туркия ва Қафқози Ҷанубӣ эҷод шудааст.

"Дар ниҳоят, ин ҳамкориҳо ба тақвияти суботи минтақаӣ ва эҷоди шабакаҳои боэътимоди нақлиётию тиҷоратӣ равона шудаанд," -- гуфт мусоҳиби Радиои Озодӣ.

Доналд Трамп, раисҷумҳури Амрико, рӯзи 24-уми июн гуфт, Эрон дар гуфтушунидҳои аввал гузаштҳои бузург кардааст.

"Мо бо бартарии зиёд дастболоем. Эрон гузаштҳои хеле бузург мекунад. Мебинем, ки чӣ мешавад,” – афзуд ӯ.

Покистон ва Қатар, ки дар гуфтушуниди Амрико ва Эрон дар Шветсария миёнарав ҳастанд, бовар доранд, ки давоми 60 рӯзи оянда ду кишвар ба созиши пурра даст хоҳанд ёфт.

Иёлоти Муттаҳида таҳримҳоро бар зидди Эрон барои ду моҳ сабук кардааст. Эрон ҳоло ҳақ дорад, ки нафт фурӯшад.

Ҳадафи созишномаи ибтидоӣ риояи оташбас дар минтақа, аз ҷумла миёни Исроил ва “Ҳизбуллоҳ” аст, ки аз пуштибонии Эрон бархӯрдор аст, вале Амрико онро созмони террористӣ медонад.

Дар ҳамин ҳол, Сипоҳи посдорони инқилоби исломии Эрон гуфтааст, убури амни киштиҳо аз тангӣ ё гулӯгоҳи Ҳурмуз танҳо ба воситаи роҳе, ки Теҳрон муайян кардааст, имконпазир аст.

Ин ниҳоди низомии Эрон гуфт, бо киштиҳое, ки қасд доранд бе ҳамоҳангӣ бо Ҷумҳурии Исломӣ аз ин оброҳаи муҳим гузаранд, бархӯрд хоҳанд кард.

Умон рӯзи 24-уми июн як масири муваққатиро барои транзити киштиҳои дархостшуда аз гулӯгоҳи Ҳурмуз эълон кард.

Ивазмад Қодиров, афсари Вазорати корҳои дохилии Тоҷикистон, ба 12 сол зиндон маҳкум шуд.

Додгоҳи ҳарбии шаҳри Хоруғ рӯзи 25-уми июн ӯро ба куштани Саломатшо Ғалчаеви 34-сола аз ноҳияи Ванҷ гунаҳкор донистааст.

Мавқеи Ивазмад Қодиров ё наздикону вакили мудофеаш ба ҳукм рӯшан нест.

Неъмат Ғалчаев, бародари Саломатшо, рӯзи 25-уми июн ба Радиои Озодӣ гуфт, зидди ҳукми додгоҳ шикоят намебаранд. Ҳарчанд, ба гуфтаи ӯ, "ду шоҳиде, ки ҳангоми ҳодиса афсари милисаро ҳамроҳӣ мекарданд, ба мурофиа оварда нашуданд." Вай аз касе ном нагирифт.

Талоши Радиои Озодӣ барои гирифтани шарҳ ва маълумоти бештар аз Додгоҳи низомии Хоруғ то ин дам бенатиҷа буд.

Саломатшо Ғалчаев шаби 17-уми марти имсол дар натиҷаи як муноқиша дар деҳаи Рохарви ноҳияи Ванҷ кушта шуд.

Дар ҳоле ки мақомот тафсилот намедиҳанд, як манбаи боварбахши Радиои Озодӣ гуфта буд, моҷаро бар сари робитаи афсари Вазорати корҳои дохилӣ бо як духтари мактабхон, ки хеши ҷавони кушташуда аст, сар задааст.

Ивазмад Қодиров фармондеҳи ротаи фаврии таъйиноти махсуси Қӯшунҳои дохилӣ буд ва он шаб аз силоҳ истифода кардааст.

Аз Саломатшо Ғалчаев панҷ фарзанд монд.

Кумитаи ҳолатҳои фавқулодаи Тоҷикистон рӯзи 25-уми июн дар эъломияе гуфт, аз дарёи Панҷ ҷасади мардеро ёфтанд, ки "шояд" яке аз мусофирони мошини раиси Вилояти Мухтори Кӯҳистони Бадахшон бошад, аммо ҳоло дақиқ нест.

Ба иттилои ин ниҳод, ҷасад дар 20-километрии ҷойи афтодани мошини Алишер Мирзонабот ва ҳамроҳонаш пайдо шуда, "айни ҳол сохторҳои дахлдор барои муайян намудани шахсият чора меандешанд."

Мошини хидматии раиси вилояти Бадахшон рӯзи 17-уми июн дар ҳудуди ноҳияи Дарвоз ба дарёи Панҷ сарозер шуд ва беш аз як ҳафта боз ҷустуҷӯйи пайкари онҳо идома дорад.

Дар дохили мошин ба ҷуз Алишер Мирзонаботу ҳамсараш Амина Амонуллоева ва духтари дусолааш Орифа, ду марди дигар – ёвараш Садоншо Ҷанобалишо ва ронандааш Сино Муборакшоев – буданд. Онҳо аз Душанбе ба Хоруғ мерафтанд.

Вазорати корҳои дохилии Тоҷикистон сабаби ҳодисаро "суръати баланд" ва "аз ӯҳдаи идораи мошин набаромадани ронанда" номид.

Кумитаи ҳолатҳои фавқулода мегӯяд, дар ҳоли ҳозир беш аз 200 маъмури наҷот дар рӯйи об ва зери он дар ҳудуди ноҳияҳои Дарвозу Шамсиддин Шоҳин ва мавзеъҳои дигар ҷасадҳоро ҷустуҷӯ доранд.

Алишер Мирзонабот, ки дар гузашта дар Кумитаи давлатии амнияти миллии Тоҷикистон кор кардааст, 46-сола буд ва аз соли 2021 идораи вилояти Бадахшонро бар уҳда дошт.

Ҳарчанд мақомот аз шеваи раҳбарӣ ва амалкардҳояш дар панҷ соли гузашта ситоиш кардаанд, гурӯҳе аз фаъолони зодаи Бадахшон ӯро дар саркӯби норозиён ва боздошту ҳабси дигарандешон дар минтақа танқид мекунанд.

Ҳоло иҷрои вазифаҳои раиси Вилояти Мухтори Кӯҳистони Бадахшон ба дӯши Шарифхон Сафарзода гузошта шудааст. Вай солҳои охир муовини аввали Алишер Мирзонабот буд.

Ду заминларзаи пуршиддат ва пайдарпай дар Каракас, пойтахти Венесуэла, вайронӣ ва талафоти зиёд дар пай доштааст.

Шаҳрдории Каракас мегӯяд, биноҳои зиёде ба харобазор табдил шуданд.

Алҳол бар пояи хабарҳои расмӣ пайкари беш аз сӣ нафар ёфт шуда, 700 каси дигар маҷруҳ гаштаанд.

Хадамоти заминшиносии Амрико оқибатҳои онро офатбор номид.

Дар видеоҳои бешумори нашршуда биноҳои бисёри вайроншударо дидан мумкин аст.

Одамон зери харобаҳо мондаанд ва корҳои наҷотдиҳӣ идома дорад.

Фурудгоҳи асосии Венесуэла баста шудааст.

Навор дар Инстаграм:

Бақо Содиқов, филмбардори маъруфи тоҷик ва муаллифи "Адонис XIV" ва "Гирдбод", рӯзи 25-уми июн дар 85-солагӣ дар Олмон даргузашт.

Вай сӣ сол пеш аз Тоҷикистон ба Самарқанд кӯчида, дертар ба шаҳри Тошканд рафт ва ахиран ҳамроҳи ҳамсару ду фарзандаш, Улуғбек ва Умедҷон, дар Аврупо буд.

Бақо Содиқов соли 1941 таваллуд шуда, соли 1967 факултаи коргардонии Донишгоҳии театрӣ-рассомии Тошкандро хатм кардааст.

Ӯ соли 1979 узви Иттиҳоди синамогарони Шӯравӣ интихоб шуд. Соли 1993 ҷоизаи давлатии ба номи Абуабдуллоҳи Рӯдакиро гирифт ва аз он пеш, дар соли 1988, ҳунарманди хидматнишондодаи Тоҷикистон шуд.

Содиқов соли 1961 бо иҷрои нақши асосӣ дар филми "Панҷ нафар аз Фарғона" дар киностудияи “Узбекфилм” ба олами синомагарӣ пайваст. Дар киностудияи "Тоҷикфилм" аз соли 1967 ба ҳайси коргардон дар филмҳои бадеӣ ва коргардони филмҳои ҳуҷҷатӣ кор кардааст.

"Адонис", "Гирдбод", "Бухорои шариф", "Ҷосус" ва "Имом Бухорӣ" аз корҳои намоёни ӯ ҳастанд.

Ин филмбардори тоҷик баъди кӯчидан ба Узбекистон ҳам ором нанишаст. Дар онҷо филми "Мурувват" ва "Фидоиён"-ро ба навор гирифт. "Фидоиён" аз 7 қисм иборат буда, дар бораи ҷадидони Бухорост.

Хабарнигорони Радиои Озодӣ солҳои охир чанд дафъа бо Бақо Содиқов суҳбат доштанд ва ҳоло порчаҳоро аз як мусоҳибаи соли 2016, ки муҳтавояшон куҳна нашудаанд, пешкаш мекунем:

Радиои Озодӣ: Чӣ шуд, ки аз Тоҷикистон рафтед?

Бақо Содиқов: "Ман соли 1996 аз Тоҷикистон баромадам, аммо то ҳол эҳсос мекунам, ки Ҳисору Балҷувон, Кӯлобу Чилдухтарон ва Бадахшон, дар маҷмӯъ, ҳар қитъаи Тоҷикистон пеши чашмам аст. Аз ёд медонам, ки аз тарафи Кӯлоб то Ховалинг чӣ қадар роҳ аст, чиро дидан мумкин аст. Бовар мекунед, Тоҷикистон дар дили ман аст. Ман дар Узбекстону Қазоқистон будам, дар Туркманистон будам. Миёни ин ҳама ҳеч фарқ намегузорам. Чӣ хел ҳамаи ин марзҳоро ҷудо карда мешавад? Ман аҳли сиёсат нестам, ман филмбардорам, одами эҷодиям ва фикр мекунам, натанҳо маданияти мо ва дини мо, балки эҳсоси мо як аст. Мо гӯшту нохунем."

Радиои Озодӣ: Вале чаро рафтед?

Бақо Содиқов: "Ман танҳо ҳаминро мегӯям, ки ба хотири ҳифзи хонаводаам аз Тоҷикистон рафтам. Баъд, гуфта будам, ки то панҷоҳсолагӣ ба ватан хидмат мекунам, яъне то замоне ки нерӯву тавони зиёд ҳаст ва, ба фикрам, ин корро ҳам кардам."

Радиои Озодӣ: Дилатон танг мешавад ба ёди шаҳре, ки шояд ҷавониятон гузаштааст, дӯстоне, ки сари як пиёла чой сӯҳбат мекардед, хиёбонҳое, ки чеҳраҳои шиносро медид?

Бақо Содиқов: "Ватан, дӯстон, сарзамин, баҳр, дарахтон... Тоҷикистон ва дӯстони наздики ман дар дили ман ҳастанд. Бист сол шудааст, ки аз онҳо як метр ва ҳатто як сантиметр дур нашудаам. Онҳо дар дили ман ҳастанд. Ҳамон гунае, ки ҷавону поку самимӣ буданд, ҳамин тавр ҳифз шудаанд. Дар дили ман ҳастанд. Аз он рӯзгор Лоиқ Шералӣ, Ато Муҳаммадҷонов, Маҳмудҷон Воҳидов ва даҳҳои дигарро дар ёд дорам. Ман чаҳор шабакаи Тоҷикистонро ҳамарӯза пайгирӣ мекунам. Тамошо мекунам. Ахиран дидам, ки Бозор Собир аз Амрико омадааст ва маҳфил дошт, суолу ҷавоб дошт, хуш шудам. Ман як қадам аз Тоҷикистон дур нашудаам."

Радиои Озодӣ: Пас, аз вазъи филмҳои нави тоҷикӣ ҳам хабар доред. Чӣ мегӯед?

Бақо Содиқов: "Бале, аз филмҳои нави Тоҷикистон хабар дорам. Ман ба ҳеч кас ақл ёд доданӣ нестам. Фақат мегӯям, ки мавзӯи филмҳо маҳдуд аст, тасвир маҳдуд аст. Барои мисол, агар Маҳмудҷон Воҳидов дар вақташ бо офаридаи шоирону адибони дохили Тоҷикистон қаноат мекард ва ба репертуараш ашъори Хайёму нақши Шекспирро ворид наменамуд ва аз осори бузургони дигари классику ҷаҳонӣ баҳра намебардошт, Маҳмудҷон Воҳидови дохилӣ буд. Вале Маҳмудҷон Воҳидов актёри сатҳи байналмилалӣ буд. Барои чӣ маҳдуд бошем, ки хислати маҳаллӣ дорад? Фарҳанги тоҷик инро намебардорад. Баъдан ба далели онки баъзе ҳунармандон дар замони даргириҳои дохилӣ аз кишвар рафтанд, шояд таъсири ин ҳам бошад."

Ин мусоҳибаи видеоӣ бо Бақо Содиқов соли 2023 сабт шудааст:

Фармондеҳии марказии артиши Амрико ё СЕНТКОМ эълон кард, ки дар ҳамлаи ҳавоии нерӯҳои ин кишвар дар шимол-ғарби Сурия, яке аз раҳбарони баландпояи гурӯҳи "Давлати исломӣ" (ДОИШ), кушта шудааст.

СЕНТКОМ рӯзи чоршанбе дар шабакаи Х навишт, ки ин ҳамла 19 июн анҷом шуд ва дар ҷараёни он, Алӣ Ҳусейн Ал-Улайвӣ, аз раҳбарони баландпояи ин гурӯҳ кушта шуд.

Бар пояи баёнияи артиши Амрико, ин ҳамла бахше аз талошҳои Амрико барои аз байн бурдани гурӯҳҳои террористӣ аст, ки дар пайи ҳамла ба шаҳрвандони амрикоӣ дар хоки ИМА ҳастанд.

Брэд Купер, фармондеҳи СЕНТКОМ дар ин бора гуфт, нерӯҳои амрикоӣ ва шарикони минтақаии онҳо ҳамчунин ба мубориза бо боқимондаҳои ДОИШ идома хоҳанд дод, то итминон ҳосил кунанд, ки ин гурӯҳ шикаст хӯрдааст.

Ӯ афзуд, ки Амрико ба дифоъ аз хоки худ, нерӯҳои низомиаш ва муттаҳидонаш дар минтақа, идома хоҳад дод.

Манбаъҳои огоҳ ба Радиои Озодӣ гуфтанд, қонуни нави афв дар Тоҷикистон нисбат ба гурӯҳе аз сиёсатмадорону мансабдорони собиқ, ки соли 2025 дар доираи парвандаи “табаддулот” зиндонӣ шудаанд, татбиқ нагардид.

Хешовандони ҳадди ақал се нафар аз ин шахсиятҳо низ ба Радиои Озодӣ гуфтанд, дар парвандаи ин афрод банди 306-и Кодекси ҷиноӣ ё талоши ғасби қудрат ҷой дорад ва ин иттиҳом шомили афв намешавад.

Пайвандони яке аз зиндониён рӯзи 24-уми июн бо шарти фош нашудани ном гуфт, "қабл аз эълони афв мақомот ба зиндон рафта, шахсони аз 55-сола болоро барои озод кардан номнавис карданд. Аксар маҳкумшудагон дар доираи парвандаи “табаддулот” низ аз 60-сола боло ҳастанд ва мунтазир буданд, ки онҳо низ раҳо хоҳанд шуд. Аммо ба сабаби ҷой доштани иттиҳоми талоши ғасби қудрат дар парвандаашон, онҳоро озод накарданд."

Дар ин миён танҳо рӯзноманигор Рухшона Ҳакимова барои зан буданаш шомили қонуни афв шуд ва се сол ҳукми ӯро кам карданд.

Навор дар Инстаграм:

Гурӯҳи иборат аз сиёсатмадорону мансабдорони пешин, аз ҷумла Саидҷаъфар Усмонзода, Ҳамроҳхон Зарифӣ, Абдулфайз Атоӣ, Акбаршо Искандаров, Шокирҷон Ҳакимов, Аҳмадшоҳ Комилзода ва ду афсари собиқи амният моҳи феврали соли 2025 бо иттиҳоми “хиёнат ба давлат” ва “кӯшиши табаддулот” аз 8 то 27 сол зиндонӣ шуданд. Худашон ин ҳукмро беасос дониста, аз мақомот хостанд, ки онро бознигарӣ ва қарори мусодираи амволро бекор кунанд. Чизе, ки додгоҳ напазируфт ва ҳам далелашро ба ҷомеа нагуфт.