Тибқи гузориши ин созмон, дар ҳашт кишвар - Бирма, Куба, Либия, Кореяи Шимолӣ, Сомалӣ, Судон, Туркманистон ва Узбакистон озодиҳои сиёсӣ ва шаҳрвандӣ дар сатҳи поинтарин қарор доранд. Дар ин кишварҳо аҳзоби мухолиф ва созмонҳову расонаҳои хабарии мустақил мамнӯъ ва ё саркӯб шудаанд, мардум ҳамарӯза хатари муҷозот барои ибрози андешаи ғайрро эҳсос мекунанд. Ба рӯйхати 17 кишвари мустабиди олам Фридом Ҳауз ҳамчунин Белорус, Чин, Кот д Ивуар, Гвинея, Эритрея, Лаос, Арабистони Саудӣ, Сурия ва Зимбабверо шомил кардааст. Мақомоти ин кишварҳо низ озодиҳои сиёсиро поймол мекунанд, ба ташкили созмонҳои мустақил иҷоза намедиҳанд, рӯзномаҳои мустақилро таҳти тафтиш қарор додаанд ва мунаққидони ҳукуматро муҷозот мекунанд.

Фридом Ҳауз дар робита ба вазъи ҳуқуқи башар дар Узбакистон навиштааст, ки баъд аз ошӯб дар шаҳри Андиҷон дар соли 2005, ҳукумати Ислом Каримов ба зиндон афкандани дигарандешон ва фишор болои расонаҳои мустақилро ташдид бахшид, созмонҳое, ки бо сармояи кишварҳои хориҷӣ фаъолият мекарданд, баста ва ё аз кишвар ронда шуданд. Фридом Ҳауз бори дигар аз ҳаводиси Андиҷон ёд овардааст, ки моҳи майи соли 2005 ба саҳнаи муқовимати неруҳои мусаллаҳ ва мардуми аз ситами ҳукумату фақру нодорӣ ба дод омада табдил шуд. Ҳудуди се ҳазор сокини Андиҷон, аз ҷумла, занону кудакон бо шиорҳои зиддиҳукуматӣ дар маркази шаҳр ҷамъ омаданд. Ҳукуматдорон ба хотири пароканда кардани тазоҳурот ва аз эътирозгарон холӣ кардани як бинои қаблан тасарруфшуда аз истифодаи неру кор гирифтанд.

Фридом Ҳауз бо такя ба иттилоъи шоҳидони ҳодиса навиштааст, ки сарбозон сӯи мардум оташ кушоданд, ҳатто сӯи онҳое, ки аз майдон фирор мекарданд ва ё ҷароҳат бардошта буданд. Ба иттилоъи расмии Тошканд, дар ин ҳодиса 187 нафар ба ҳалокат расиданд ва аммо манбаъҳои ғайрирасмӣ теъдоди кушташудагон дар ошуби Андиҷонро қариб 800 нафар ҳисоб кардаанд.

Олег Панфилов, раиси Маркази журналистикаи экстрималии Русия ва коршиноси масоили минтақа дар ташреҳи гузориши Фридом Ҳауз ба мо гуфт:

«Кишварҳое, ки он ҷо режимҳои худкома на фақат расонаҳои хабарӣ, балки ҳама талошҳои ташкили ҷомеъаи шаҳрвандиро таҳти назорат мегиранд, ҳамеша аз он доду фиғон мекунанд, ки созмонҳои байнулмилалӣ аз помолкунии ҳуқуқи башар дар ин кишварҳо ҳарф мезананд. Ва аммо худи онҳо барои ислоҳи вазъ иқдоме намекунанд ва чизеро тағйир намедиҳанд, аз ҷумла, баъд аз сари қудрат омадани раисиҷумҳури нави Туркманистон чизе тағйир наёфт, дар Узбакистон бошад, баъд аз ҳаводиси Андиҷон саркӯбкунӣ афзоиш ёфт ва на фақат ҳомиёни ҳуқуқи башар, на фақат хабарнигорон, балки ҳамкори мо Умеда Ниёзоваро низ ба зиндон афканданд.»

Аз нигоҳи Фридом Ҳауз, дар Туркманистон вазъи озодиҳои сиёсиву шаҳрвандӣ баъди сари қудрат омадани раисиҷумҳури нав Қурбонгулӣ Бердимуҳаммадов низ тағйир нахӯрдааст. Туркманистон, ба Иттилоти созмони Транспаренси Интернешнл, дар миёни 163 кишвари гирифтори фасод дар хати 142 қарор дорад. Дар ин кишвар озодии баён маҳдуд шудааст - ҳама расонаҳои хабарӣ ва садову симо таҳти назорати ҳукумат қарор доранд. Айни ҳол, дар Туркманистон теъдоди ками хабарнигорони хориҷӣ фаъолият мекунанд, зеро ҳукумат як гурӯҳи онҳоро аз кишвар берун кардааст. Аз ҷумла, соли 2005 хабарнигори оҷонси русии РИА Новости Виктор Панов бо иттиҳоми ҷосусӣ аз Туркманистон берун карда шуд. Соли гузашта хабарнигори Радиои Озодӣ Оғулсафар Муродова низ бо иттиҳоми ҷосусӣ маҳкум ба зиндон шуд ва бо сабабҳои то ҳол норӯшан дар маҳбас аз дунё даргузашт. Кристоф Уокер - раҳбари бахши пажуҳиши Фридом Ҳауз низ дар як сӯҳбат бо Радиои Озодӣ вазъи озодиҳои сиёсӣ, аз ҷумла, озодии матбуот дар Туркманистонро бадтарин дар минтақа арзёбӣ кард:

«Туркманистон дар пажуҳишҳои мо миёни кишварҳои бештар аз ҳама мустабид ҷойгир аст. Марги раисҷумҳур албатта дарро ба рӯи тағйирот боз кард ва аммо аз рӯи пажуҳишҳои ахир душвор аст гуфтан, ки ин дар то кай боз хоҳад монд. Албатта, афзоиши иттилоъ аз кишвар ва иҷозаи озодии матбуот барои кишвари фақиру дарбастае чун Туркманистон гоми басо муҳиме мебуд.»

Ба иттилоъи Фридом Ҳауз, ҳукумати Туркманистон озодиҳои мазҳабии шаҳрвандонро низ маҳдуд мекунад ва бархе аз гурӯҳҳои мазҳабӣ таҳти фишори шадид қарор доранд. Мақомот таълиму тадриси диниро назорат мекунанд, теъдоди масоҷид дар кишвар солҳои ахир ба карат коҳиш ёфт. Ҳукумат аз масоҷид ва ибодатгоҳҳои дигар адён тақозо дорад, ки китоби Сафармурод Ниёзов "Рӯҳнома"- ро ҳамеша рӯи даст дошта бошанд. Ҳарчанд Қонуни асосӣ баргузории намоишу гирдиҳамоиҳои осоиштаро иҷоза медиҳад, дар асл ин озодиҳо қариб ки комилан аз байн рафтаанд, омадааст дар гузориши Фридом Ҳауз.

Мақомоти интизомии Тоҷикистон як мардро барои то дами марг задани духтарандари чаҳорсолааш дастгир кардаанд.

Вазорати корҳои дохилӣ рӯзи 29-уми июл бо нашри баёнияе гуфт, ин сокини 35-солаи ноҳияи Ёвон ба “қасдан расонидани осеби сахт ба саломатӣ” гумонзад аст.

Ангезаи чунин рафтори ӯ маълум нест.

Дар баёния омадааст, “гумонбар рӯзи 27-уми июл бо латукӯби духтарандари 4-солааш дар хона ба ӯ ҷароҳатҳои вазнин расонд”.

Зоҳиран тифли захмиро як рӯз баъд аз латукӯб ва бад шудани аҳволаш хостаанд, ки ба шифохона баранд, вале ӯ дар роҳ фавтидааст.

Вазорати корҳои дохилӣ гуфтааст, ки таҳқиқи ҳодиса идома дорад.

Мавқеи боздоштшуда ё пайвандонаш ба ҳодиса маълум нест.

Ваколатдори ҳуқуқи кӯдак дар Тоҷикистон дар гузориши имсолаи худ гуфтааст, соли 2025 шаш муроҷиат дар бораи зӯроварӣ ба тифлон ё задани онҳоро сабт кард.

Дар гузориш омадааст, “ташвишовар аст, ки бештар шахсоне ба кӯдакон зӯроварӣ ё зулм мекунанд, ки тифлон онҳоро мешиносанд ё ба онҳо меҳр бастаанд.”

Аз ҷумла, моҳи сентябри соли гузашта дар Душанбе як ҷавони 33-соларо дастгир карданд, ки барои танбеҳ носи зиёдеро ба даҳони писарандари 6-солааш рехта, сабаби марги ӯ шуд.

Дар Тоҷикистон ҳафт ҷудокор, аз ҷумла се паҳлавони номӣ – Сомон Маҳмадбеков, Темур Раҳимов ва Обид Ҷебовро ҷазои интизомӣ додаанд.

Федератсияи ҷудои Тоҷикистон рӯзи 29-уми июл дар баёнияе гуфт, онҳо дар чор моҳи оянда аз ҳаққи ширкат дар бозиҳо маҳруманд.

Ин федератсия, ки раёсаташро набераи раисҷумҳур бар уҳда дорад, ҳафт ҷудокорро ба вайрон кардани “интизоми касбӣ ва ҳозир нашудан ба тамрин” гунаҳкор кардааст.

Назари варзишгарон ва мураббиёни онҳо то кунун дастрас нест.

Федератсияи ҷудои Тоҷикистон иддао кардааст, ки онҳоро чанд дафъа барои иштирок дар машқҳои дастҷамъӣ даъват намуд, аммо акси садое нагирифт.

Инчунин, онҳо барои гуё “беҳурматӣ нисбат ба аъзо ва эътироф накардани нақшаи расмии дастаи мунтахаби ҷудои Тоҷикистон” гунаҳкор дониста шудаанд.

Дастикам се ҷудокоре, ки ҳоло ҷазои интизомӣ гирифтаанд, дар мусобиқаҳои дохили Тоҷикистон ва берун аз он комёбиҳои чашмрас доранд.

Сомон Маҳмадбеков ва Темур Раҳимов барандаи медали биринҷӣ дар Бозиҳои олимпии соли 2024 дар Порис (Париж) ҳастанд.

Обид Ҷебов барандаи медали биринҷии мусобиқаи қаҳрамонии ҷаҳон дар соли 2025 дар Маҷористон аст.

Федератсияи ҷудои Тоҷикистон дар қарораш аз 29-уми июл гуфтааст, онҳо "новобаста аз натиҷаҳо ва мақому унвонҳояшон" чор моҳ “аз ҳаққи иштирок дар тамоми мусобиқаҳои дохилӣ ва байнулмилалӣ маҳрум карда шаванд”.

Мақомоти Тоҷикистон мегӯянд, дар нимаи аввали соли равон дар ҳудуди кишвар 18 шаҳрванди Афғонистонро бо ҷурми қочоқи маводи мухаддир дастгир кардаанд.

Дар гузориши тозаи Оҷонсии назорати маводи нашъаовар омадааст, ин 18 афғонистонӣ ба қочоқи 601 килограм маводи нашъаовар гумонзад ҳастанд.

Мустақилона тасдиқ кардани ин маълумот феълан ғайриимкон аст.

Моҳи майи имсол мақомоти Тоҷикистон даҳҳо паноҳҷӯи афғонистониро аз кишвар хориҷ карданд ва гуфтанд, як сабаби ин кор даст доштани онҳо ба қочоқи маводи мухаддир аст. Бархе паноҳҷӯён дар суҳбатҳои бидуни сабт ин иттиҳомро рад карда буданд.

Ба гузориши Оҷонсии назорати маводи нашъаовар, дар шаш моҳи аввали имсол ҳамчунин 6 шаҳрванди Узбекистон, 1 қазоқистонӣ, 2 табааи Қирғизистон ва як шаҳрванди Украинаро бо ҷурми қочоқи маводи мухаддир дастгир карданд.

Мақомот танҳо гуфтанд, аз ин афрод 91 килограм маводи нашъаовар мусодира кардаанд.

Намояндагони Оҷонсии назорати маводи нашъаовар бо нашри ин омор мегӯянд, "Тоҷикистон яке аз кишварҳои транзитии маводи нашъадор дар самти Масири Шимол"-и Афғонистон боқӣ мемонад.

Забеҳуллоҳ Амирӣ, раиси иттилоот ва фарҳанги ҳукумати "Толибон" дар вилояти Бадахшони Афғонистон, рӯзи 28-уми июл дар як ҳамлаи мусаллаҳона дар вулусволӣ ё ноҳияи Баҳорак кушта шудааст.

Як манбаъ дар ҳукумати "Толибон" бо тасдиқи ин хабар ба бахши афғонистонии Радиои Аврупои Озод/Радиои Озодӣ гуфт, ин рӯйдод таҳти баррасӣ қарор дорад.

Бар асоси эъломияи фармондеҳии амнияти ҳукумати "Толибон" дар Бадахшон, Амирӣ дар роҳи Баҳорак-Файзобод ҳадафи ҳамлаи ду фарди мусаллаҳи дучархасавор қарор гирифт ва ҷон бохт.

Дар ин эъломия омадааст, яке аз ҳамлаварон дар тирандозии муҳофизони Амирӣ кушта ва ҳамлагари дигар фирор кардааст.

Баъзе аз расонаҳо аз боздошти фарди дувум хабар доданд.

Фармондеҳии амнияти ҳукумати "Толибон" дар Бадахшон гуфтааст, ки ангезаи ҳамла ҳанӯз маълум нест.

Ин ҳамла дар ҳоле рух додааст, ки вилояти Бадахшони Афғонистон дар рӯзҳои охир шоҳиди даргириҳост.

"Ҷабҳаи озодии Афғонистон" гуфтааст, чанд постгоҳи "Толибон"-ро дар ноҳияи Зебок тасарруф карда, ба нерӯҳои "Толибон" талафоти сангине ворид кардааст.

Наҷотбахшони Кумитаи ҳолатҳои фавқулодаи Тоҷикистон рӯзи 28-уми июл ҷасади ду марзбонро аз дарёи Панҷ пайдо кардаанд.

Афсари 23-сола Ёраҳмад Қурбоналиев ва марзбони қаторӣ Билол Каримови 19-сола рӯзи 24-уми июл дар наздикии дидбонгоҳе дар ноҳияи Фархори вилояти Хатлон дар рӯдхонаи Панҷ ғарқ шуданд.

Як манбаи огоҳ дар Идораи ҳолатҳои фавқулодаи вилояти Хатлон ба Радиои Озодӣ гуфт, ҷасад ё пайкарҳоро барои ташхис ба шаҳри Кӯлоб бурданд. Дар назар аст, маросими видоъ бо ин низомиён дар зодгоҳашон, ноҳияҳои Ховалинг ва Фархор, баргузор шавад.

Ҳамдеҳагони яке аз ҷонбохтагон, Билол Каримови 19-сола, хабар додаанд, ки ҷасади ӯ ва Ёраҳмад Қурбоналиевро дар соҳили рӯди Панҷ дар деҳаи Ҳисори ноҳияи Фархор ёфтанд.

Ориф Нозимиён, сухангӯйи Кумитаи ҳолатҳои фавқулода, рӯзи сешанбе дар эъломияе гуфт, об ҷасадҳоро тақрибан панҷ километр поинтар, ба мавзеи "пайвастшавии дарёи Сурхоб ба дарёи Панҷ" берун андохтааст.

Фоҷиа ҳангоми иҷрои маъмурияти марзбонон сурат гирифтааст. Як манбаъ дар мақомоти интизомии вилояти Хатлон 27-уми июл ба Радиои Озодӣ гуфт, "онҳо хостаанд, заршӯёни афғонистониро аз як ҷазираи хурди мутаалиқ ба Тоҷикистон берун кунанд". Дар ин бора ҷузъиёти бештар дода нашудааст.

Тоҷикистон бо Афғонистон марзи дарозе дорад ва рӯдхонаи Панҷ қисме аз онро аз ҳам ҷудо мекунад. Дар гузашта ҳам ғарқ шудани марзбонони тоҷик дар ин рӯдхона дида шудааст.

Навор дар Инстаграм:

Дар пайи сӯхтор дар бозори марказии шаҳри Хоруғ як қаҳвахона ва чанд дӯкон ба коми оташ рафтааст. Ҳодиса рӯзи 27-уми июл рух дод.

Як манбаъ дар Идораи оташнишонии шаҳри Хоруғ рӯзи 28-уми июл ба Радиои Озодӣ гуфт, "сӯхтор соати 15:14 сар шуда, соати 18:30 пурра хомӯш карда шуд."

Ба гуфтаи ҳамсӯҳбати мо, тибқи маълумоти пешакӣ, сӯхтор аз қаҳвахонаи "Мурғоб" дар ин бозор сар шудааст.

Сабаби оташсӯзӣ ва ҳамчунин зарари расида маълум нест.

Хадамоти оташнишонии Тоҷикистон дар як посухи катбӣ дар рӯзи 28-уми июл ба Радиои Озодӣ навишт, ки барои фӯру нишондани оташ 5 мошин бо 72 корманди хадамот сафарбар карда шуданд.

Дар ин нома омадааст: “Ҳангоми ҳозир шудани кормандон ба ҷойи сӯхтор муайян карда шуд, ки дар масоҳати 150 метри мураббаъ дохил ва болопӯши мағозаҳои кӯчаи Шоҳтемури шаҳри Хоруғро алангаи оташ фаро гирифта, хавфи паҳншавии он ба дигар биноҳои ҳамшафат таҳдид мекард. Дар амалиёти саривақтӣ сӯхтор дар масоҳати аввалааш ба пуррагӣ хомӯш карда шуд.”

Ҳеч касе дар ин фалокат осеб надидааст. Риоят накардани меъёрҳои бехатариро, яке аз сабабҳои асосии оташсӯзӣ дар бозору мағоза ва дигар иншооти Тоҷикистон меноманд, ки тақрибан ҳар сол такрор мешаванд ва даҳҳову садҳо соҳибкору тоҷирро муфлис мекунанд.

Навор дар Инстаграм:

Ин бори аввал нест, ки дар бозори шаҳри Хоруғ сӯхтор мешавад.

Соли 2022 низ ин бозор оташ гирифта буд.

Музаффар Орифӣ (Маркиэл Даниэл), раҳбари нахустини бахши тоҷикии Радиои Аврупои Озод/Радиои Озодӣ, даргузашт.

Хешовандонаш гуфтанд, ки ӯ рӯзи бистуми июл дар 95-солагӣ дар Ню-Йорк ҷон дод.

Орифӣ зодаи шаҳри Самарқанд буда, дар Тоҷикистони замони Шӯравӣ кору зиндагӣ кардааст.

Котиби масъули “Тоҷикистони Советӣ”, ҳозира “Ҷумҳурият”, буд.

Соли 1973 аз Иттиҳоди Шӯравӣ ба Исроил кӯчид ва пас аз ду сол корро дар Радиои Аврупои Озод/Радиои Озодӣ сар кард.

Музаффар Орифӣ (Маркиэл Даниэл) дар яке аз гуфтугӯҳои пешинааш нақл карда буд, ки дар шароити сахти замони “ҷанги сард” ба роҳандозии барномаҳои тоҷикии Радио Озодӣ пардохт.

“Мардум аз шуъбаи забони тоҷикӣ чандон огаҳ набуданд. Он тобеи шуъбаи узбакӣ буд. Мо кӯшиш кардем, фаҳмонем, ки Тоҷикистон дигар аст. Мо дархост кардем, ки бахши ҷудогона шавад. Хушбахтона, амрикоиҳо ин таклифро қабул карданд," – гуфта буд ӯ.

Он замон пахши барномаҳои Радиои Озодӣ дар қаламрави Шӯравии собиқ мамнуъ буд ва мавҷи радио ба ҳар восита дастнорас карда мешуд. Ин ҳол то шурӯи бозсозӣ шадидан идома кард.

Дар таҳияи барномаҳои тоҷикии Радиои Озодӣ бештар аз номаи шунавандагон ва рӯзномаву маҷаллаҳое истифода мекарданд, ки дар Тоҷикистон нашр мешуд.

Музаффар Орифӣ соли 2023 дар суҳбати дигараш гуфта буд, “бо бисёре аз одамон мулоқот мекардем. Масалан, дар газетаи “Тоҷикистони Советӣ” ё “Комсомоли Тоҷикистон” баъзе мақолаҳо мебаромад. Амрикоро бадном мекарданд. Мо мегуфтем, ки ин ҳақиқат нест. Ин пропагандаест, ки аз Маскав маҷбур мекунанд. Рости гап, вазифаи мо расондани иттилоъ буд.”

Вай дар мақоми раҳбари бахши тоҷикии Радиои Озодӣ бист сол кор кард. Соли 1995, пас аз кӯчидани қароргоҳи Радиои Аврупои Озодӣ/Радиои Озодӣ аз шаҳри Мюнхени Олмон ба шаҳри Прага дар Ҷумҳурии Чех, бознишаста ва дар Ню-Йорк муқимӣ шуд. Ҷое, ки даврони пирияшро гузаронд ва дар ҳамон ҷо даргузашт.

Нашрияи “The Bukharian Times”, чопи Амрико, рӯзи 24-уми июл дар матлабе ӯро “устод, рӯзноманигори варзида ва шахси содиқ ба арзишҳои озодии баён” номид. Касе, ки ба навиштаи ҳамин нашрия бахши зиёди умри худро сарфи рӯзноманигорӣ кард ва аз мусаҳҳеҳии нашрияҳои маҳаллӣ то раҳбарии бахши тоҷикии Радиои Озодӣ расида буд.

Гузориши видеоиро дар инҷо бинед:

Кумитаи ҳолатҳои фавқулодаи Тоҷикистон мегӯяд, сели рӯзи 20-уми июл дар ноҳияи Рӯшон ба 40 хона зарар расондааст, ки макони зисти 198 нафар буд.

Ба иттилои манбаъ, дар ин офати табиӣ асосан сокинони деҳаи Баррӯшон ва Деҳрӯшон осеб диданд.

Мақомот мегӯянд, як комиссия зарари пурраи селро муайян мекунанд. Дар хабарномаи Кумитаи ҳолатҳои фавқулода омадааст, наҷотдиҳандагон ба бартараф кардани оқибатҳои офати табиӣ машғуланд.

Иттилоияи алтернативӣ аз Рӯшон дастрас нест.

Ёдовар мешавем, ки рӯзи 20-уми июл “бар асари баланд шудани ҳарорати ҳаво ва об шудани барфу пиряхҳои баландкӯҳ” дар чанд деҳаи ноҳияи Рӯшон сел фаромад.

Мақомот аз кӯчондани сокинони зарардида ба ҷойи амн хабар доданд ва гуфтанд, барои онҳо манзилҳои нав сохта мешавад.

Тоҷикистон имсол шоҳиди офатҳои табии зиёд, аз ҷумла омадани селу тармафароӣ ва шамоли сахт шуд. Ба гузориши расмӣ, дар нимаи аввали имсол дар ин офатҳо 12 нафар ба ҳалокат расидаанд. Ҳодисаҳои нохуши табиӣ дар шаш моҳи аввали имсол ба иқтисоди Тоҷикистон беш аз 52 миллион сомонӣ ё 5,7 миллион доллар зарар расондааст.

Раиси ҷумҳури Иёлоти Муттаҳида Доналд Трамп феълан аз нақшаҳои худ барои сахтар кардани даргирӣ бо Эрон даст кашидааст.

Рӯзномаи "Ню-Йорк Таймз" бо такя ба манбаъҳои худ дар Кохи Сафед навишт, низомиён аз кам шудани захираҳои мушакӣ барои маҷмаи дифои ҳавоии "Патриот" дар Ховари Миёна нигаронанд.

Ин рӯзнома менависад, то охири моҳи апрел Пентагон аллакай беш аз 1200 мушаки раҳгири "Патриот"-ро, ки арзиши ҳар кадоми онҳо аз чор миллион доллар бештар аст, истифода кардааст. Ба арзёбии низомиён, аз он замон то кунун вазъи захираҳо боз ҳам бадтар шудааст.

Ҳамсуҳбатони "Ню-Йорк Таймз" гуфтаанд, ки маъмурияти феълии Кохи Сафед аз оқибатҳои бештари танишҳо нигарон аст. Аз ҷумла, эҳтимоли ҷалб шудани муттаҳидони Иёлоти Муттаҳида дар Халиҷи Форс ба даргирӣ, болоравии бештари нархи сӯхт, буҳрони иқтисодӣ ва афзоиши фишори муҳоҷират аз ҷумлаи ин паёмадҳо арзёбӣ мешаванд.

Ғайр аз ин, бархе аз мақомҳои амрикоӣ шак доранд, ки ҳамлаҳои нави низомӣ Теҳронро маҷбур кунад, ки ба мизи музокирот баргардад.

Кохи Сафед рӯзи шанбеи 26-уми июл гузориши рӯзномаи "Ню-Йорк Таймз"-ро рад кард ва таъкид намуд, ки Доналд Трамп ҳамчунон ҳамаи гузинаҳоро рӯи миз нигоҳ доштааст.

Бо вуҷуди изҳороти Трамп дар бораи омодагӣ ба ҳамлаҳои минбаъда, дар Кохи Сафед як барномаи алтернативӣ мавриди баррасӣ қарор дорад, ки чандин мушовири ӯ, аз ҷумла Ҷаред Кушнер, аз он ҷонибдорӣ мекунанд. Ин нақша идомаи музокирот бо Эронро дар баробари тақвияти фишорҳои иқтисодӣ ва таҳримҳо пешбинӣ мекунад ва ба ҷойи амалиёти нави густардаи низомӣ пешниҳод мешавад.

Дар шаш моҳи аввали имсол 191 шаҳрванди Тоҷикистон бо иттиҳоми қочоқи маводи мухаддир дар хориҷи кишвар дастгир шудаанд. Оҷонсии назорати маводи нашъаовари Тоҷикистон мегӯяд, ҳашт нафар аз онҳо зан ҳастанд.

Ба гузориши ин ниҳод, бештари ин афрод ё 156 нафар дар Русия дастгир шудаанд.

Ҳамчунин 12 шаҳрванди Тоҷикистон дар Узбекистон, 19 кас дар Қазоқистон ва шаш тани дигар дар Қирғизистон ва Белорус боздошт кардаанд.

Манбаъ мегӯянд, ин тоҷикистониҳо ба қочоқи 35 килограм маводи мухаддир гумонзад ҳастанд.

Тибқи омори расмӣ, боздошти шаҳрвандони Тоҷикистон бо гумони муомилоти ғайриқонунии маводи мухаддир дар қиёс ба ҳамин давраи соли гузашта камтар шудааст. Дар нимаи аввали соли гузашта 344 тоҷикистонӣ бо ин иттиҳом дар берун аз кишвар дастгир шуда буданд.

Наҷотдиҳандагони Кумитаи ҳолатҳои фавқулода дар вилояти Хатлон ба ҷустуҷӯи як афсар ва ҳам сарбози Неруҳои марзбонӣ дар дарёи Панҷ шуруъ кардаанд.

Ба иттилои расмӣ, ин сарбозу афсар, баъд аз зуҳри 24-уми июл дар ҳудуди ҷамоати Хутани ноҳияи Фархор ба дарёи Панҷ афтидаанд. Номи ин низомиён ва дар чӣ шароит ғарқ шудани онҳо маълум нест.

Тибқи иттилои дарёфтӣ, ин афсару сарбоз дар қисми ҳарбии 0307-и Неруҳои марзбонӣ хизмат мекарданд.

Неруҳои марзбонии Тоҷикистон дар бораи ин ҳодиса расман хабар надодааст.

Аксҳои бештар аз ҷойи ҳодиса:

Ин аввалин мавриди ғарқ шудани низомиёни тоҷик дар дарёи Панҷ нест.

Моҳи январи имсол ҷасади Шоҳдил Ҷӯразода, сарбози неруҳои сарҳадии Тоҷикистонро баъди якуним моҳ ҷустуҷӯ аз дарёи Панҷ пайдо шуд. Мақомот ба наздикони ин сарбоз гуфтанд, ӯ худкушӣ кардааст. Аммо пайвандони Шоҳдил Ҷӯразода ба ин фарзия бовар накарда, хостори таҳқиқи қазияи марги ӯ шуда буданд.

Тибқи иттилои Кумитаи ҳолатҳои фавқулода, дар нимаи аввали имсол дар кӯлу дарёҳои Тоҷикистон 83 нафар, аз ҷумла 33 кӯдак ғарқ шудаанд.

Як ширкати чинӣ дар Тоҷикистон ду нерӯгоҳи барқӣ-обӣ месозад. Ин ду нерӯгоҳ дар ҳавзаи дарёи Зарафшон бунёд хоҳанд шуд.

Ба иттилои Вазорати энержӣ ва захираҳои оби Тоҷикистон, нерӯгоҳи барқи обии "Айнӣ" бо иқтидори 160 МВт ва "Ёвон" бо иқтидори 100 МВт, сохта мешаванд.

Мақомоти Вазорати энержӣ ва захираҳои об рӯзи 25 июл дар Душанбе ин тарҳро бо раҳбарияти ширкати "China Gezhouba Group International Engineering Co., Ltd", баррасӣ кардаанд.

Ширкатҳои чинӣ ҳоло дар Тоҷикистон асосан дар бахши коркарди маъдан ва роҳсозӣ фаъолият мекунанд.

Чин шарики муҳими тиҷоратию иқтисодӣ ва қарздиҳандаи асосии Тоҷикистон мебошад. Тибқи оморҳои ахири Вазорати молия, Тоҷикистон аз Чин беш аз 700 миллион доллар қарздор аст.

Як сокини ноҳияи Рашт, ки се сол пеш бо иттиҳоми ба худкушӣ расонидани ҳамсараш ба шаш сол зиндон маҳкум шуда буд, бар асоси қонуни афв озод шудааст.

Як манбаъ дар ноҳияи Рахт бидуни бурдани номаш ба Радиои Озодӣ гуфт, ки чанд рӯз пеш Султони Абдулвоҳид аз зиндони шумораи 3/5 аз шаҳри Хуҷанд озод шуд.

Радиои Озодӣ моҳи августи соли 2022 бар асоси як навори видеоӣ, лаҳзаи худро ба дарё партофтани Маҳинаи Холмаҳмад, ҳамсари 23-солаи Султони Абдулвоҳид, гузориш карда буд.

Ба гуфтаи наздикони ин хонавода, ҳодиса он замон пас аз он рух дод, ки шавҳараш ин занро талоқ дод.

Ҳамон сол Додгоҳи Рашт Султони Абдулвоҳиро бо моддаи 109(ба худкушӣ расонидан), шаш сол аз озодӣ маҳрум кард.

Қонуни нави афв дар Тоҷикистон, ки 16-уми июни имсол имзо шуд ва ба иҷро даромад, нисбат ба 18 ҳазор нафар, аз ҷумла зиндониён ва онҳое, ки парвандаашон дар ҳоли баррасист, татбиқ хоҳад шуд.

Вазорати молияи Амрико аз ҷорӣ кардани таҳримҳо алайҳи чаҳор фард ва 9 ширкати вобаста ба миллиардери эронӣ Бобаки Занҷонӣ хабар дод ва эълон кард, ки ин афрод ва ширкатҳо бахши муҳиме аз шабакаеро ташкил медиҳанд, ки барои коҳиши таҳримҳои зидди Эрон ва интиқоли махфиёнаи пул дар дохил ва хориҷи Эрон, фаъолият мекунад.

Бар асоси баёнияи Вазорати молияи Амрико, ки рӯзи 24 июл нашр шуд, ширкатҳои зермаҷмуаи гурӯҳи "Dot One"-и Бобаки Занҷонӣ дар Эрон ва ҳамчунин чанд ширкати фаъол дар Туркия ва Имороти Муттаҳидаи Араб дар феҳристи таҳримҳо қарор гирифтаанд.

Вазорати корҳои хориҷи Амрико низ дар баёнияи алоҳида эълон кард, ин иқдом дар идомаи фишор бар ҳукумати Эрон пас аз ҳамлаҳо ба киштиҳои тиҷорӣ дар тангаи Ҳурмуз ва кишварҳои минтақа, сурат гирифтааст.

Вазорати молияи Амрико мегӯяд, Бобаки Занҷонӣ аз маҷмӯае аз фаъолиятҳо дар бахши хадамоти молӣ, тавлиди тилло ва ҷавоҳирот ва тарҳҳои калони боркашонӣ ва зерсохтӣ барои пинҳон кардани дороиҳо, пулшӯӣ ва афзоиши тавоноии интиқоли махфиёнаи пул, истифода кардааст.

Ин вазорат моҳи феврали имсол Бобаки Занҷонӣ ва ду саррофии диҷитолро, ки дар Бритониё ба номи ӯ сабт шудааст, таҳрим карда буд. Ба асоси эъломияи Вазорати молияи Амрико, бархе аз ин саррофиҳо барои пулшӯии Сипоҳи посдорони Эрон мавриди истифода қарор гирифтааст.

Бобаки Занҷонӣ ва мақомоти ҳукумати Эрон то кунун ба ин иқдоми Амрико вокуниш нишон надодаанд

Бархе мақомоти эронӣ дар гузашта иддао карда буданд, ки ин тоҷири сарватманд аз 500 то 600 миллион доллар дар Тоҷикистон сармоягузорӣ кардааст ва ҳамчунин бо афроди пурнуфузи ҳукумати Тоҷикистон робита дорад. Ин мақомот ҳамчунин гуфта буданд, ки Занҷонӣ дар ин занҷираи сирқати пули нафти Ҷумҳурии Исломӣ аз ниҳодҳои бонкии Тоҷикистон ҳам истифода бурдааст.

Аммо ҷониби Эрон иддао дорад, ки ин 2,5 миллиард доллари интиқолдодаи ӯ маҳз дар Душанбе гум шудааст. Мақомоти Тоҷикистон борҳо гуфтанд, ки Бобаки Занҷонӣ ҳамаи дороиҳояш дар Тоҷикистонро ба як сармоягузорӣ турк фурӯхтааст.

Бахши робита бо ҷомеаи артиши Покистон рӯзи 24 июл дар баёнияе эълон кард, ки афроди мусаллаҳ як худрави пур аз маводи таркандаро шабе пеш дар наздикии як постгоҳи бозрасӣ тарконданд ва 12 сарбоз, ду пулис ва як мақоми давлатиро ба ҳалокат расонданд.

Ин ҳамла дар ноҳияи Танки вилояти Хайбар-Пахтунхоҳ, сурат гирифтааст. Тибқи баёнияи артиши Покистон, 12 ниманизомӣ низ дар табодули оташи ҷавобӣ, кушта шуданд.

Таҳрики Толибони Покистон масъулияти ин ҳамларо ба ӯҳда гирифт ва дар баёнияе эълон кард, ки ин ҳамла тавассути чаҳор бамгузори интиҳорӣ ё худкуш, анҷом шудааст.

Таҳрики Толибони Покистон аз соли 2007 ба ин тараф алайҳи ҳукумати ин кишвар ҷангида ва ҳадафашро сарнагунии ҳукумат ва татбиқи шаритаи исломӣ тибқи тафсир ва бардоштҳои худаш дар ин кишвар, унвон кардааст.

Исломобод мегӯяд, афроди мусаллаҳи ин гурӯҳ аз паноҳгоҳҳои амн дар Афғонистон барои анҷоми ҳамлаҳо дар дохили Покистон истифода мекунанд.

Ҳукумати Толибон ҳамеша инро рад карда ва гуфтааст, ки ноамниҳои Покистон мушкили дохилии ин кишвар аст.