Тибқи гузориши ин созмон, дар ҳашт кишвар - Бирма, Куба, Либия, Кореяи Шимолӣ, Сомалӣ, Судон, Туркманистон ва Узбакистон озодиҳои сиёсӣ ва шаҳрвандӣ дар сатҳи поинтарин қарор доранд. Дар ин кишварҳо аҳзоби мухолиф ва созмонҳову расонаҳои хабарии мустақил мамнӯъ ва ё саркӯб шудаанд, мардум ҳамарӯза хатари муҷозот барои ибрози андешаи ғайрро эҳсос мекунанд. Ба рӯйхати 17 кишвари мустабиди олам Фридом Ҳауз ҳамчунин Белорус, Чин, Кот д Ивуар, Гвинея, Эритрея, Лаос, Арабистони Саудӣ, Сурия ва Зимбабверо шомил кардааст. Мақомоти ин кишварҳо низ озодиҳои сиёсиро поймол мекунанд, ба ташкили созмонҳои мустақил иҷоза намедиҳанд, рӯзномаҳои мустақилро таҳти тафтиш қарор додаанд ва мунаққидони ҳукуматро муҷозот мекунанд.

Фридом Ҳауз дар робита ба вазъи ҳуқуқи башар дар Узбакистон навиштааст, ки баъд аз ошӯб дар шаҳри Андиҷон дар соли 2005, ҳукумати Ислом Каримов ба зиндон афкандани дигарандешон ва фишор болои расонаҳои мустақилро ташдид бахшид, созмонҳое, ки бо сармояи кишварҳои хориҷӣ фаъолият мекарданд, баста ва ё аз кишвар ронда шуданд. Фридом Ҳауз бори дигар аз ҳаводиси Андиҷон ёд овардааст, ки моҳи майи соли 2005 ба саҳнаи муқовимати неруҳои мусаллаҳ ва мардуми аз ситами ҳукумату фақру нодорӣ ба дод омада табдил шуд. Ҳудуди се ҳазор сокини Андиҷон, аз ҷумла, занону кудакон бо шиорҳои зиддиҳукуматӣ дар маркази шаҳр ҷамъ омаданд. Ҳукуматдорон ба хотири пароканда кардани тазоҳурот ва аз эътирозгарон холӣ кардани як бинои қаблан тасарруфшуда аз истифодаи неру кор гирифтанд.

Фридом Ҳауз бо такя ба иттилоъи шоҳидони ҳодиса навиштааст, ки сарбозон сӯи мардум оташ кушоданд, ҳатто сӯи онҳое, ки аз майдон фирор мекарданд ва ё ҷароҳат бардошта буданд. Ба иттилоъи расмии Тошканд, дар ин ҳодиса 187 нафар ба ҳалокат расиданд ва аммо манбаъҳои ғайрирасмӣ теъдоди кушташудагон дар ошуби Андиҷонро қариб 800 нафар ҳисоб кардаанд.

Олег Панфилов, раиси Маркази журналистикаи экстрималии Русия ва коршиноси масоили минтақа дар ташреҳи гузориши Фридом Ҳауз ба мо гуфт:

«Кишварҳое, ки он ҷо режимҳои худкома на фақат расонаҳои хабарӣ, балки ҳама талошҳои ташкили ҷомеъаи шаҳрвандиро таҳти назорат мегиранд, ҳамеша аз он доду фиғон мекунанд, ки созмонҳои байнулмилалӣ аз помолкунии ҳуқуқи башар дар ин кишварҳо ҳарф мезананд. Ва аммо худи онҳо барои ислоҳи вазъ иқдоме намекунанд ва чизеро тағйир намедиҳанд, аз ҷумла, баъд аз сари қудрат омадани раисиҷумҳури нави Туркманистон чизе тағйир наёфт, дар Узбакистон бошад, баъд аз ҳаводиси Андиҷон саркӯбкунӣ афзоиш ёфт ва на фақат ҳомиёни ҳуқуқи башар, на фақат хабарнигорон, балки ҳамкори мо Умеда Ниёзоваро низ ба зиндон афканданд.»

Аз нигоҳи Фридом Ҳауз, дар Туркманистон вазъи озодиҳои сиёсиву шаҳрвандӣ баъди сари қудрат омадани раисиҷумҳури нав Қурбонгулӣ Бердимуҳаммадов низ тағйир нахӯрдааст. Туркманистон, ба Иттилоти созмони Транспаренси Интернешнл, дар миёни 163 кишвари гирифтори фасод дар хати 142 қарор дорад. Дар ин кишвар озодии баён маҳдуд шудааст - ҳама расонаҳои хабарӣ ва садову симо таҳти назорати ҳукумат қарор доранд. Айни ҳол, дар Туркманистон теъдоди ками хабарнигорони хориҷӣ фаъолият мекунанд, зеро ҳукумат як гурӯҳи онҳоро аз кишвар берун кардааст. Аз ҷумла, соли 2005 хабарнигори оҷонси русии РИА Новости Виктор Панов бо иттиҳоми ҷосусӣ аз Туркманистон берун карда шуд. Соли гузашта хабарнигори Радиои Озодӣ Оғулсафар Муродова низ бо иттиҳоми ҷосусӣ маҳкум ба зиндон шуд ва бо сабабҳои то ҳол норӯшан дар маҳбас аз дунё даргузашт. Кристоф Уокер - раҳбари бахши пажуҳиши Фридом Ҳауз низ дар як сӯҳбат бо Радиои Озодӣ вазъи озодиҳои сиёсӣ, аз ҷумла, озодии матбуот дар Туркманистонро бадтарин дар минтақа арзёбӣ кард:

«Туркманистон дар пажуҳишҳои мо миёни кишварҳои бештар аз ҳама мустабид ҷойгир аст. Марги раисҷумҳур албатта дарро ба рӯи тағйирот боз кард ва аммо аз рӯи пажуҳишҳои ахир душвор аст гуфтан, ки ин дар то кай боз хоҳад монд. Албатта, афзоиши иттилоъ аз кишвар ва иҷозаи озодии матбуот барои кишвари фақиру дарбастае чун Туркманистон гоми басо муҳиме мебуд.»

Ба иттилоъи Фридом Ҳауз, ҳукумати Туркманистон озодиҳои мазҳабии шаҳрвандонро низ маҳдуд мекунад ва бархе аз гурӯҳҳои мазҳабӣ таҳти фишори шадид қарор доранд. Мақомот таълиму тадриси диниро назорат мекунанд, теъдоди масоҷид дар кишвар солҳои ахир ба карат коҳиш ёфт. Ҳукумат аз масоҷид ва ибодатгоҳҳои дигар адён тақозо дорад, ки китоби Сафармурод Ниёзов "Рӯҳнома"- ро ҳамеша рӯи даст дошта бошанд. Ҳарчанд Қонуни асосӣ баргузории намоишу гирдиҳамоиҳои осоиштаро иҷоза медиҳад, дар асл ин озодиҳо қариб ки комилан аз байн рафтаанд, омадааст дар гузориши Фридом Ҳауз.

Дар Тоҷикистон ба бунёди як корхонаи азими истихроҷи сурма оғоз кардаанд, ки қарор аст, солона то 5 ҳазор тонна аз ин фулуззоти серхаридор дар бозорҳои ҷаҳонӣ истеҳсол кунад. Дар ин бора дафтари матбуоти раёсати ҷумҳурӣ рӯзи 11-уми июл хабар дода, гуфт, ки корҳои сохтмониро раиси ҷумҳур Эмомалӣ Раҳмон ба таври маҷозӣ оғоз бахшид.

Дар ин баёния омадааст, корхонаи мазкур, аз кони маъдани Паҳндара дар ноҳияи Айнӣ cурма истихроҷ мекунад, ки аз фулуззоти гаронбаҳои лозим барои истеҳсоли абзорҳои электронӣ ва батареяҳо ба ҳисоб меравад. Ба қавли мақомот, кони маъдани Паҳнадаро ширкати бритониёии “Микон Интернэшнл” таҳқиқ карда ва ба захираҳои кон “баҳои баланд додааст”.

Дафтари матбуоти раёсати ҷумҳурӣ гуфтааст: “Иқтидори истеҳсолии корхона дар як сол аз ҳисоби истихроҷи маъдан зиёда аз 150 ҳазор тонна, ҳаҷми истеҳсоли консентрати сурма то 50 ҳазор тонна бо таркиби то 35 фоиз сурма ва иқтидори солонаи корхонаи истеҳсоли маъдани сурма то 5 ҳазор тонна маҳсулоти тайёр пешбинӣ шудааст.”

Сармоягузории тарҳро ширкати “HK Skyline Development Limited” бар ӯҳда доштааст, ки як ширкати чинии сабтшуда дар Ҳонконг аст. Ҳаҷми сармоягузорӣ барои истихроҷи конро нагуфтаанд, вале ба қавли мақомот, қарор аст, истихроҷи маъдан ва истеҳсоли сурма соли 2027 оғоз ёбад ва дар сурати ба фаъолият пардохтани он 400 нафар бо кори доимӣ таъмин мешаванд. Истихроҷи бисёре аз конҳои маъдани табиӣ дар Тоҷикистонро ширкатҳои чинӣ сармоягузорӣ мекунанд ва шикоят аз олудагии муҳити зист дар маҳалли ин кону майдонҳо зиёд аст.

Роҳбарони Фаронса ва Бритониё хостори ҷорӣ кардани таҳримҳои нав алайҳи Русия шудаанд, то Маскав ба оташбас дар Украина розӣ шавад.

Кир Стармер, нахуствазири Бритониё гуфт, тамаркузи кишварҳо бояд ба он равона шавад, ки Владимир Путинро сари мизи музокирот баргардад. "Ин фишори муштарак тағйироте хоҳад овард,"-гуфт нахуствазири Бритониё.

Изҳороти роҳбарони Фаронса ва Бритониё дар ҷараёни ҳамоиши кумакрасонҳои Украина дар шаҳри Рими Итолиё садо дод.

Эмануэл Макрон, раисиҷумҳури Фаронса аз кишварҳои муттаҳид даъват кард, ки фишорро ба Русия бештар кунанд. Макрон таъкид кард, ки фишор бар рӯи иқтисоди Русия метавонад вазъро тағйир диҳад.

Роҳбарони Аврупо дар нишасти Рим таъкид карданд, ки ҷойгир кардани неруҳои посдори сулҳ дар Украина, баъди барқарории оташбас фавран амалӣ карда мешавад. Маскав қаблан ба ҳузури ҳамагуна неруҳои посдори сулҳ дар Украина мухолифат кардааст.

Доналд Трамп, раисҷумҳури Амрико рӯзи 10 июл гуфт, ки Вашингтон аз тариқи НАТО ба Украина кӯмакҳои низомӣ фароҳам хоҳад кард.

Трамп дар суҳбат бо шабакаи хабарии NBC афзуд, ки фикр мекунад рӯзи душанбе суханони муҳиме дар бораи Русия хоҳад гуфт.

Дар чанд рӯзи ахир раисҷумҳури Амрико аз президенти Русия бинобар пешрафтҳое надоштан дар таъмини оташбас байни Русия ва Украина, интиқодҳои сахт кард.

Трамп дар гуфтугӯ бо NBC афзуд, ки Амрико аслиҳаро дар ихтиёри НАТО қарор хоҳад дод ва НАТО онро ба Украина хоҳад фиристод.

Раисҷумҳури Амрико таъкид кард, ки пули ин аслиҳаро аъзо НАТО хоҳанд пардохт.

Пас аз баргашт ба қудрат дар моҳи январи имсол, ин нахустин бор аст, ки Доналд Трамп бар асоси салоҳиятҳое, ки вижаи президенти Амрико аст, ба Украина силоҳ мефиристад.

Вазорати тандурустии Тоҷикистон марги як сокини ноҳияи Хуросон аз бемории сӯхтаниро рад кардааст. Аммо ин ниҳод тасдиқ кардааст, ки дар ноҳияи Хуросон се кас ба бемории сӯхтанӣ гирифтор шуда, шифо ёфтаанд.

Рӯзи 9-уми июн пайвандони Қамариддин Раҳимов, сокини ноҳияи Хуросон гуфта буданд, ки эҳтимолан бародарашон баъди истеъмоли гӯште, ки аз дӯкони деҳа харида буд, ба бемории сӯхтанӣ гирифтор шуда, фавтид.

Аммо Вазорати тандурустии Тоҷикистон мегӯяд, сабаби марги Раҳимов бемории ҷигар аст. Дар Вазорати тандурустӣ гуфтанд, гӯштеро, ки ин сокини Хуросон гӯё аз он сироят ёфтааст, санҷиданд ва дар он аломатҳои бемории сӯхтанӣ пайдо нашуд.

Иттилои алтернативӣ дар ин бора дастрас нест.

Вазорати тандурустӣ далел овардааст, ки агар Қиёмиддин Раҳимов баъди истеъмоли гӯшти аз дӯкони деҳа харида сироят мешуд, бояд дигар сокинони деҳа ҳам ба бемории сӯхтанӣ мубтало мешуданд.

Бо ин ҳол Вазорати тандурустии Тоҷикистон тасдиқ кардааст, ки се сокини ноҳияи Хуросон ба бемории сӯхтанӣ сироят ёфта, баъди табобат сиҳат шуданд.

Радиои Озодӣ мустақилона ин маълумотро тасдиқ карда наметавонад.

Дар ҳоле, ки иттилои алтернативӣ дар даст нест, Вазорати тандурустӣ хабарҳо дар бораи сӯзондани даҳ гов дар ноҳияи Хуросонро баъди мубтало ба сӯхтанӣ, рад кардааст.

Сӯхтанӣ як бемории хатарноке мебошад, ки аз ҳайвон ба инсон мегузарад.

Раёсати корҳои дохилии Душанбе мегӯяд, дар нимаи аввали соли равон танҳо дар пойтахти кишвар 90 кас барои фолбинӣ ва ҷодугарӣ ҷазо гирифтанд.

Дар хабарномаи расмӣ нисбати 84 кас парвандаи маъмурӣ тартиб дода, онҳо ҷарима шудаанд.

Аммо ба гуфтаи мақомот, 6 нафари дигар, ки такроран ба фолбинӣ ва ҷодугарӣ даст заданд, парвандаҳои ҷиноятӣ оғоз шуда, "нисбаташон ҷазои сазовор татбиқ гардидааст".

Мақомот мушаххасан ҷазои онҳоро нагуфтанд. Мақомоти Тоҷикистон аз аввали имсол як маъракаи мубориза бо фолбинон ва ҷодугаронро оғоз карданд.

Вале пайвандони бархе аз ин боздоштшудаҳо гуфтанд, хешовандони онҳо ҷодугар ё фолбин набуданд, балки танҳо дуохонӣ мекарданд.

Ҷунбиши Ислоҳот ва Рушд, як созмони мухолифи давлат ва хориҷ аз Тоҷикистон ҳукми зиндони Дилмурод Эргашев яке аз аъзои ин созмонро “золимона” хонда, сахт маҳкум кардааст.

Дар баёнияи расмии созмон, ки рӯзи 10-уми июл нашр шуд, омадааст, “Ӯ ҷинояткор нест, балки шахси озодандеш, фаъоли ҷомеаи шаҳрвандӣ ва ҳимоятгари арзишҳои демократӣ мебошад, ки танҳо барои мавқеи сиёсӣ ва муборизаи осоиштаи худ бар зидди диктатура ба таври беасос ва золимона равонаи зиндон шудааст. “

Додгоҳи ноҳияи Сино дар шаҳри Душанбе Дилмурод Эргашевро рӯзи 27 феврали имсол бо гуноҳи “даъвати оммавӣ барои фаъолияти ифротгароӣ” ба 8 соли зиндон маҳкум кард. Дилмурод Эргашев узви пешини созмони "Гуруҳи 24" аст, ки бо қарори Додгоҳи Олии Тоҷикистон экстремистию террористӣ эълон ва фаъолияташ дар Тоҷикистон мамнӯъ шудааст. Пас аз берун шудан аз ин созмон, ӯ ба Ҷунбиши ислоҳот ва рушди Тоҷикистон пайваст.

Дар баёнияи ин созмон омадааст, Эргашев, ки пас аз 13 соли зиндагӣ дар Олмон моҳи ноябри соли 2024 ба Тоҷикистон ихроҷ шуда буд, бо иттиҳоми сохта ва ангезаи комилан сиёсӣ равонаи зиндон кардаанд.

Ҳукумати Тоҷикистон солҳои ахир барои саркӯби дигарандешон, зиндонӣ кардани хабарнигорону мунтақидони давлат аз тарафи созмонҳои ҳомии ҳуқуқ ва кишварҳои ғарбӣ батакрор танқид мешунавад.

Мақомоти интизомии Русия раиси Иттиҳодияи озаритаборон дар вилояти Маскав Элшон Иброҳимро рӯзи 10-уми июл ба ватанаш Озарбойҷон ихроҷ кардаанд. Панҷ рӯз пеш аз ин ӯро аз ҳаққи шаҳрвандии Русия маҳрум сохтанд.

Нашрияи “Известия” видеои ҳузури Иброҳимов дар фурудгоҳро нашр кард, ки онҷо тасдиқ мекард, ки ихроҷаш ба Озарбойҷон барои ғайриинтизор буд ва андаке нороҳат ҳам шудааст. Элшон Иброҳимов тақрибан 30 сол зиндагӣ мекард ва аз соли 2018 раиси Иттиҳодияи озаритаборон дар Вилояти Маскав буд. Ба гуфтаи телевизиони РБК сабаби маҳрум кардани Иброҳимов аз ҳаққи шаҳрвандии Русия амалкардҳои ӯ аст, ки “барои амнияти миллии Русия хатар эҷод мекунад.” Худи Иброҳимов қазияро шарҳ надода гуфтааст, ки баъди чанд рӯзи бозгашт ба Озарбойҷон дар ин бора суҳбат мекунад.

Ихроҷи раҳбари яке аз иттиҳодияҳои озаритаборони Русия дар пасманзари якбора бад шудани робитаҳои ин кишвар бо Озарбойҷон сурат мегирад. Робитаҳо баъди он сард шуд, ки рӯзи 27-уми июн маъмурони амниятии Русия даҳҳо нафар озаритаборро дар робита ба чанд қатли фармоиши дар солҳои 2001-2010 дастгир карданд ва ду нафари онҳо ҳангоми боздошт ба ҳалокат расиданд.

Хешовандони кушташудагон мегӯянд, ки наздикони онҳоро то дами марг латукӯб кардаанд, ҳарчанд ба қавли мақомоти интизомии Русия сабаби марги онҳо бемории дил будааст. Дар посух ба ин рафтори мақомоти Русия, дар Озарбойҷон даҳҳо шаҳрванди Русия, аз ҷумла хабарнигорони хабаргузории давлатии “Спутник”-ро дастгир карданд, ҳарчанд ин расона аз моҳи апрел дар Озарбойҷон аз ҳаққи фаъолият маҳрум шуда буд.

Бино ба гузориши расонаҳои Украина, яке аз афсарони баландрутбаи Хадамоти махсуси ин кишвар рӯзи 10-уми июн бо зарби тири туфанг кушта шудааст.

Матбуоти дохилӣ бо такя ба дафтари матбуоти Хадамоти Махсуси Украина навиштаанд, ки ҷасади полковники хадамот, ки номашро набурдаанд, дар ноҳияи Голосеев дар шаҳри Киев пайдо кардаанд.

Вале Игор Мосийчук, вакили собиқи украинӣ гуфтааст, ки афсари кушташуда Иван Воронич, яке афсарони Маркази амалиётҳои махсуси хадамот будааст ва ӯро бо зарби 5 тири туфанги сокит куштаанд ва қотил аз ҷойи ҳодиса ғайб задааст.

Дар пайи ба дарё афтидани як мошин дар ноҳияи Роштқалъа, чор нафар ба ҳалокат расидаанд.

Вазорати корҳои дохилӣ мегӯяд, ҳодиса субҳи 8-уми июл рух додааст.

Ба иттилои манбаъ, ронандаи 36-сола ҳангоми убур аз роҳи марказии ноҳияи Роштқалъа аз уҳдаи идораи нақлиёти “Нива” набаромада, ба дарё сарозер шудааст.

Мақомот мегӯянд, ронанда ва се мусофири нақлиёт, ки ду нафарашон зан буд, ғарқ шудаанд.

Ҷасади як нафари онҳоро пайдо кардаанд ва мақомот гуфтанд, ҷустуҷӯи дигарон идома дорад.

Ҳамасола бар асари сонеаҳои нақлиётӣ дар роҳҳои Тоҷикистон даҳҳо нафар ҳалок мешаванд.

Мақомоти қудратии Русия ду шаҳрванди Тоҷикистонро бо иттиҳоми гаравгон гирифтани як ҳамватанашон боздошт кардаанд.

Хабаргузории русии ТАСС аз қавли мақомоти Русия навиштааст, ин ду шаҳрванди Тоҷикистон, ки дар Маскав мезистанд ба шаҳри Обнински вилояти Калуга омада, як ҳамватани худро ба асорат гирифтаанд. Ному насаби боздоштшудаҳо ва ҷабрдида нашр нашудааст.

Ирина Волк, сухангӯи Вазорати корҳои дохилии Русия пештар хабар дода буд, ки як марди сокини шаҳри Обнинск бо нафаре дар шабакаҳои иҷтимоӣ шинос мешавад, вале баъдан миёни онҳо баҳс сар мезанад.

Боздоштшудаҳо аз шаҳри Маскав ба Обнинск омада, ҷабрдидаро аз хонааш бароварда, ба ҷойи беодам мебаранд ва латукӯб мекунанд. Ҳолати шиканҷаи мард дар навор сабт шудааст.

Алайҳи ду шаҳрванди Тоҷикистон бо иттиҳоми рабудани одам парвандаи ҷиноӣ боз шудааст. Кодекси ҷиноии Русия барои ин кор аз 5 то 12 соли зиндонро пешбинӣ мекунад. Иттилои алтернативӣ дар бораи ҳодиса дастрас нест.

Дар гузашта шикоятҳои зиёде аз муҳоҷирони тоҷик садо дода буд, ки ҳамватанони худашон онҳоро фиреб медиҳанд.

Дастаи “ПСЖ” ("Пари Сен-Жермен")-и Фаронса, ки дар бозии дуюми ниманиҳоии қаҳрамонии бошгоҳҳои футболи ҷаҳон-2025 тими "Реал"-и Мадриди Испанияро бо ҳисоби бузурги 4:0 шикаст дод, ба финали мусобиқот роҳ ёфт.

Бозии дуюми ниманиҳоӣ шаби 9-уми июл дар варзишгоҳи "Метлайф"-и Ист-Ратерфорд (иёлати Ню-Ҷерси, ИМА) доир гардид.

Аз чаҳор голи "ПСЖ" дутоашро нимҳимоятгари испаниягӣ Фабиан Руис, ки беҳтарин бозигари ин дидор эътироф шуд, дар дақиқаҳои 6-ум ва 24-ум ба самар расонд.

Боз якголиро ҳамлагари фаронсавӣ Усмон Дембеле дар дақиқаи 9-ум ва ҳамлагари португолӣ Гонсалу Рамуш дар дақиқаи 88-ум заданд.

Ба ин тартиб, “ПСЖ” дар финали қаҳрамонии бошгоҳҳои футболи ҷаҳон-2025, ки 13-уми июл баргузор мешавад, бо "Челси"-и Лондони Англия рақобат мекунад.

Ёдовар мешавем, “Челси”, ки дар даври ниманиҳоии қаҳрамонии бошгоҳҳои футболи ҷаҳон-2025 тими «Флуминенсе»-и Бразилияро бо ҳисоби 2:0 шикаст дод, аввалин шуда ба финали мусобиқот роҳ ёфт.

Бозии аввали ниманиҳоӣ шаби 8-уми июл дар варзишгоҳи "Метлайф"-и Ист-Ратерфорди ИМА доир гардид. Ҳарду голро ҳамлагари нави “Челси” Жоао Педро дар дақиқаҳои 18-ум ва 56-уми дидор ба дарвозаи «Флуминенсе» зад.

Мусобиқоти қаҳрамонии бошгоҳҳои футболи ҷаҳон-2025, ки дар Иёлоти Муттаҳидаи Амрико 15-уми июн оғоз ёфта буд, 13-уми июл ба поён мерасад.

Маблағи ҷавоизи мусобиқот 1 миллиард доллари ИМА-ро ташкил медиҳад. Ба дастаи ғолиб 125 миллион доллар тақдим мегардад. Маблағи боқимонда байни иштироккунандгони дигари мусобиқот мувофиқи ҷойҳои ишғолкардаашон тақсим карда мешавад.

Бино ба гузоришҳо Доналд Трамп раиси ҷумҳури Амрико дар давраи аввали раҳбариаш ба Владимир Путин таҳдид кардааст, ки дар сурати ҳамлаи Русия ба Украина Маскавро бомборон ва зеру забар мекунад.

Сабти суҳбати Доналд Трамп дар бораи ин гуфтугу бо раиси ҷумҳури Русияро телевизиони Си Эн Эн нашр кард. Кохи Сафед, ё Доналд Трамп ҳанӯз ин гузоришро шарҳе надодаанд. Дар ин суҳбат дар ҳузури донорҳои маъракаи интихоботиаш дар соли 2024 ва зимни ёдоварӣ аз давраи аввали раёсати ҷумҳурӣ дар солҳои 2017-2021 Доналд Трамп гуфтааст: ”Ман ба Путин гуфтам, ки агар ба Украина ҳамла кунед, Маскавро бомборон ва зеру забар мекунам. Дигар интихоб нахоҳам дошт. “

Доналд Трамп дар идома мегӯяд, ки Путин дар посух ба вай гуфтааст, ки ба ин таҳдидаш бовар надорад, ҳарчанд ба қавли Трамп “Путин ба ин таҳдид 10 дар сад бовар кардааст.” Дар бораи ин суҳбатҳо нашрияи Вашингтон Пост моҳи майи соли гузашта навишт, аммо худи навори савтии суҳбат ҷое то кунун нашр нашуда буд.

Дар ҳамин суҳбат Доналд Трамп ҳамчунин мегӯяд, ки ба Си Ҷинпин, раиси ҷумҳури Чин ҳам гуфтааст, ки агар кишвараш ба Тайван ҳамла кунад, Амрико ба Пекин зарба мезанад. Доналд Трамп борҳо гуфтааст, ки агар соли 2022 раиси ҷумҳур мебуд, Русия ба Украина ҳамла намекард ва ҳамеша Ҷо Байден. раиси ҷумҳури собиқро сабабгори таҷовузи Русия ба хоки Украина меномад. Дмитрий Песков, сухангӯи раиси ҷумҳури Русия дар посух ба дархости хабарнигорон дар бораи шарҳи ин хабар ба онҳо гуфтааст, ки ин суолро аз ҳукумати Амрико бипурсанд.

Амрико ба Украина дар муқовимат ба зидди Русия бо аслиҳаву дигар муҳимоти ҷангӣ кӯмак мекунад, аммо гуфтааст, ки ҳеч қасди фиристодани сарбоз ба Украина ва ё нақши мустақим дар ин ҷанг надорад.

Пайвандони Абдусаттор Пирмуҳаммадзода, рӯзноманигори тоҷик мегӯянд, чор моҳ аст, ки аз аҳволи ӯ хабаре надоранд.

Абдукарим Пирмуҳаммадзода, бародари рӯзноманигор ба хабаргузории "Азия-Плюс" гуфтааст, баъди моҳи март пайвандонашон чанд маротиба барои дидани Пирмуҳаммадзода ба зиндони Хуҷанд рафтанд, вале мақомот иҷозаи мулоқот надоданд. Наздиконаш мегӯянд, аз моҳи март ба ин тараф ба ин рӯзноманигор ҳатто иҷозаи занг задан ба наздиконашро намедиҳанд.

Шарҳи расмии мақомот дар ин бора дастрас нест.

Бародари Абдусаттор Пирмуҳаммадзода гуфтааст, аз рӯи шуниди онҳо, моҳи март намояндагони комиссияи афв ба зиндон рафта, рӯйхати маҳбусонеро тартиб медоданд, ки қарор буд, озод шаванд.

"Бародарам ба комиссияҳо мегӯяд, ки "ман бегуноҳам, чаро номи маро ба рӯйхати озодмешудаҳо ворид намекунед?". Комиссия чизе намегӯяд, вале баъди рафтани онҳо, масъулини зиндон бародарамро ҷазо медиҳанд. Чуноне огоҳ шудем, ҳоло дар ҳуҷраи камераи ҷаримавӣ (ШИЗО) аст",-гуфтааст бародари Абдусаттор Пирмуҳаммадзода.

Радиои Озодӣ талош дорад шарҳи расмии мақомот дар ин бора ба даст орад.

Пирмуҳаммадзода моҳи декабри соли 2022 бо иттиҳоми узвият дар созмонҳои мамнуъ ба 7 сол зиндон маҳкум шуд. Аммо худаш ва наздиконаш айбномаро борҳо рад кардаанд.

Ин рӯзноманигор баъди боздошт дар номае аз боздоштгоҳ навишт, аз рӯзи аввал зери фишори равонӣ ва шиканҷа буд, то иттиҳоми ба қавлаш "бофтаву сохта"-и мақомоти милисаро ба дӯш бигирад. Дар Додситонии кулли Тоҷикистон инро тасдиқ накарданд.

Мақомоти Тоҷикистон баъди соли 2022 беш аз даҳ хабарнигор ва блогерро боздошт ва дар мурофиаҳои пӯшида ба солҳои тӯлонии зиндон маҳкум карданд. Талаби созмонҳои ҳомии ҳуқуқ барои озодии хабарнигорон то ин дам нодида гирифта шудааст.

Дар нимаи аввали соли равон 91 нафар дар Тоҷикистон ғарқ шудаанд. Дар ин бора Ориф Нозимиён, намояндаи Кумитаи ҳолатҳои фавқулодаи Тоҷикистон хабар додааст. Ба гуфтаи Нозимиён, теъдоди ғарқшудагон дар қиёс ба шаш моҳи аввали соли гузашта, 5 нафар бештар аст.

Кумитаи ҳолатҳои фавқулода дар хабарномае аз сокинон дархост кардааст, ки фарзандонашонро аз оббозӣ дар ҷойҳои манъшуда боздоранд. Бо вуҷуди ин таъкидҳои мақомот, ҳамасола дар кӯлу дарёҳои Тоҷикистон даҳҳо нафар, бахусус наврасону ҷавонон, ғарқ мешаванд.

Як шикояти сокинон дар пойтахт ин аст, ки маконҳои оббозӣ гарон аст ва наврасон дар рӯзҳои гарм маҷбур мешаванд дар ҷойҳои хатарнок оббозӣ кунанд.

Додгоҳи байналмилалии ҷиноӣ дар Гаага ҳукми боздошти Ҳайбатулло Охунзода, раҳбари Толибон ва Абдулҳаким Ҳаққонӣ, раиси Додгоҳи олии ҳукумати ин гурӯҳро ба иттиҳоми "иртикоби ҷиноят алайҳи башар аз навъи озор ва азият ба далелҳои ҷинсиятӣ ва сиёсӣ", содир кардааст.

Додгоҳ дар хабарномае, ки рӯзи 8 июл нашр кард, ин ду танро муттаҳам кард, ки ба таври мустақим ё содир кардани дастур, сабабгори ҷиноят алайҳи башарият аз навъи озору азият бар асоси ҷинсият шудаанд.

Додгоҳ гуфтааст, ки бар асоси моддаи 7-и асосномаи Рум, озору азияти систематикӣ алайҳи занон, духтарон ва дигар афрод ба далоили ҷинсиятӣ ва сиёсӣ, ҷиноят алайҳи башарият ба шумор меравад.

Дар идома омадааст, ки ин озору азиятҳо аз замони ба қудрат расидани Толибон дар 15 августи соли 2021 алайҳи духтарон, занон ва дигар афроде, ки бо сиёсатҳои ҷинсиятии Толибон мувофиқ набуданд ва ҳамчунин алайҳи касоне, ки аз ҳуқуқҳои занон ва духтарон пуштибонӣ мекунанд, ҷорӣ шудааст.

Додгоҳи байналмилалии ҷиноӣ дар ин эъломия гуфтааст, ки Толибон сиёсатеро амалӣ кардаанд, ки боиси нақзи шадиди ҳуқуқ ва озодиҳои сиёсии ғайринизомиён, шудааст.

Додгоҳ афзудааст, ки Толибон бо он, ки маҳдудиятҳоро ба таври умумӣ ҷорӣ кардаанд, аммо занон ва духтарон ба таври махсус ба далели ҷинсияташон ҳадаф қарор гирифтаанд. Ин маҳдудиятҳо шомили маҳрумсозии систематикӣ аз ҳаққи таҳсил, озодии рафтуомад, баён, боварҳои динӣ ва ҳарими хусусӣ будаанд.

Забеҳуллоҳ Муҷоҳид, сухангӯи ҳукумати Толибон дар вокушиш ба ин ҳукми Додгоҳи байналмилалии ҷиноӣ гуфт, ки ин додгоҳро ба расмият намешиносанд ва иддао кард, ки раҳбаронашон адолатро тибқи шариати исломӣ дар Афғонистон татбиқ мекунанд.

Шуморе аз созмонҳои мудофеъ аз ҳуқуқи занони афғон аз ин ҳукми Додгоҳи байналмилалии ҷиноӣ истиқбол кардаанд.