Ба гузориши хабаргузории "Рейтерз", як мақоми Вазорати корҳои хориҷии Амрико рӯзи 29 август гуфт, раводид ё визаи Маҳмуд Аббос ва ҳудуди 80 мақоми фаластинии дигар, ки узви Ташкилоти худгардони Фаластин ва Созмони озодибахши Фаластин ҳастанд, содир нахоҳад шуд ё бекор мешавад.
Маҳмуд Аббос қасд дошт, илова бар ҳузур дар нишасти солонаи СММ, дар нишасти дигаре бо мизбонии Фаронса ва Арабистони Саудӣ ширкат кунад. Қарор аст дар ин нишаст Бритониё, Фаронса, Австралия ва Канада, кишвари Фаластинро ба расмият бишносанд.
Дафтари Маҳмуд Аббос ин тасмими Вашингтонро нақзи тавофуқи "қароргоҳи СММ" донистааст. Бар асоси ин тавофуқ, Амрико усулан вазифадор ба фароҳам кардани имкони дастрасии дипломатҳои хориҷӣ ба СММ аст, ҳарчанд Вашингтон мегӯяд, метавонад ба сабабҳои амниятӣ ва сиёсӣ, виза надиҳад.
Вазорати корҳои хориҷии Амрико дар шарҳи ин масъала, Ташкилоти худгардони Фаластин ва Созмони озодибахши Фаластинро муттаҳам кард, ки "дар мубориза бо ифротгароӣ" кӯтоҳӣ карда ва дар айни ҳол ба дунболи "шиносоии якҷониба"-и кишвари Фаластин ҳастанд.
Вазорати корҳои хориҷи Амрико гуфт, "дар ростои манфиатҳои миллии мост, ки Созмони озодибахши Фаластин ва Ташкилоти худгардони Фаластинро бинобар пойбанд набудан ба ӯҳдадориҳояшон ва заиф сохтани дурнамои сулҳ, посухгӯ бидонем".
Бо ин ҳол, ин вазорат таъкид кардааст, ки ҳайати намояндагии Фаластин дар СММ, аз ҷумла, мақомҳое, ки ба таври доим дар онҷо қарор доранд, шомили ин маҳдудиятҳо намешаванд.
Мақомҳои фаластинӣ иттиҳоми Вашингтон алайҳи худро рад карда ва мегӯяд, ки даҳҳо сол музокирот бо миёнаравии Амрико натавонистааст ба ишғоли Исроил поён диҳад ва ташкили кишвари Фаластинро фароҳам кунад.
Созмони Милали Муттаҳид эълон кардааст ин мавзӯъро бо Амрико дар чаҳорчӯби "қароргоҳи СММ" баррасӣ хоҳад кард. Пештар низ дар соли 1988, Амрико аз додани виза барои Ёсир Арафот худдорӣ карда буд ва Маҷмаи Умумии СММ барои суханронии ӯ ба ҷойи Ню-Йорк дар Женева нишаст доир кард.
Дар вокунишҳо, вазири корҳои хориҷии Исроил аз тасмими Амрико истиқбол кардааст. Ҳамзамон, Вашингтон ва Телавив аз мавзеъгирии бархе муттаҳидони ғарбиашон норозӣ ҳастанд, ки ваъда додаанд моҳи оянда Фаластинро дар СММ ба расмият мешиносанд.
То кунун дастикам 147 кишвари узви СММ Фаластинро ба расмият шинохтаанд ва фаластиниҳо дар ин ниҳод ҷойгоҳи нозир доранд.
Амрико мегӯяд, ки ташкили кишвари Фаластин танҳо аз роҳи музокироти мустақим бо Исроил мумкин аст. Аммо бисёре аз мақомдорони тундрави Исроил дар паҳлуи кишвари худ, таъсиси давлате бо номи Фаластинро қабул надорад.
Фаластиниҳо дунболи ташкили кишвари мустақил дар Каронаи ғарбӣ, Навори Ғазза ва бо пойтахти он Байтулмуқаддас ҳастанд.
Гуфтугӯ