Анатолий Котов рӯзи 21 август чанд соат пас аз фуруд омадан дар фурудгоҳи Истанбул аз Варшава -- ҷойе, ки дар табъид ба сар мебурд, нопадид шуд.
Ба гузориши хабаргузории туркии IHA, ӯ соати 1:49 баъд аз зуҳр ба Истанбул расид ва савори парвози дохилӣ ба Трабзон рафт. Аз онҷо соати 6:35 баъд аз зӯҳр бо як киштӣ обҳои Туркияро тарк кард ва чанд соат баъд тамос бо ӯ қатъ шуд.
Қарор буд, ки ин марди 44-сола рӯзи 24 август ба Варшава баргардад. Хонаводааш дар бораи нопадид шудани ӯ ба пулиси Туркия хабар додаанд.
BELPOL -- як гурӯҳи иборат аз афсарони собиқи амниятии Белорус ҳушдор додааст, ки Туркия ҷойи хатарнок барои мухолифони ҳукумати Минск аст. Соли гузашта Котов ба сурати ғоибона муҳокима ва ба иттиҳоми "ифротгароӣ" ва "тавтеа", ба 12 сол маҳкум шуд.
Намояндаи BELPOL Владимир Жигар ба "Current Time" гуфт, ки Хадамоти амнияти Белорус "бо ҳамтоёни туркии худ робитаҳои зич барқарор кардаанд".
Ӯ гуфт, "агар як мухолифи сиёсии Белорус, ки дар гузашта маҳкум шудааст, ҳатто ғоибона, вориди Туркия шавад, хадамоти амниятии маҳаллӣ эҳтимол дорад ӯро дастгир накунанд. Аммо маълумоти вобаста ба вуруди ӯ, ба Минск ирсол хоҳад шуд".
Котов барои Бунёди ҳамбастагии варзишии Белорус, гурӯҳе ки аз фаъолон ва мухолифони Белорус дар хориҷ аз кишвар ҳимоят мекунад, кор мекунад.
Александр Апейкин, мудири ин бунёд ба бахши белорусии Радиои Озодӣ гуфт, аз эҳтимол дур аст, ки мақомоти Туркия, Котовро расман ихроҷ карда бошанд.
Апейкин гуфт, "чунин раванд вакили дифоъ ва ҳуҷҷатбозиро тақозо мекунад, ки метавонист пеши ин амалро бигирад. Он чизе, ки ба назар мерасад, истирдоди ғайрирасмӣ аст, шояд ӯро боздошт ва ба таври иҷборӣ ихроҷ кардаанд".
Апейкин дар идома афзуд, "агар ин ихтиёрӣ мебуд, ҳеҷ асосе барои рафтан аз тариқи Трабзон ва рафтан аз тариқи баҳр вуҷуд надошт. Ба Минск ва Маскав парвозҳои мустақим вуҷуд доранд".
Консулгарии Белорус дар Истанбул аз посух ба суоли "Current Time" дар мавриди нопадид шудани Котов, худдорӣ кард.
Консулгарии Лаҳистон дар Туркия, ки масъули шаҳрвандони таҳти ҳимояти Варшава аст, суолҳоро ба Вазорати корҳои хориҷии он кишвар фиристод. Дар ин бора аз Вазорати корҳои хориҷии Лаҳистон посухе нарасид.
АЗ ХУДӢ ТО МУХОЛИФ
Котов, ки соли 1980 дар Минск ба дунё омада ва дар риштаи дипломатӣ таҳсил кардааст, наздик ба 10 сол дар Сафорати Белорус дар Лаҳистон кор кард. Ӯ баъдан дар Кумитаи миллии олимпӣ фаъолият намуд ва то ба мақоми дабири кулли он расид ва дар соли 2019 раҳбарии кумитаи тадорукоти Бозиҳои аврупоӣ дар Минскро бар ӯҳда дошт.
То соли 2020 ӯ дар ҳукумати Алесандр Лукашенко мақоми баланде дошт. Аммо ӯ дар моҳи августи ҳамон сол дар пасманзари мавҷи бесобиқаи эътирозҳо пас аз эълони дигарбора пирӯз шудани Лукашенко дар интихоботи президентӣ, аз ин мақом истеъфо дод.
Мардуми Белорус, кишварҳои ғарбӣ ва созмонҳои байналмилалии ҳуқуқи башар ба таври густурда бовар доштанд, ки натиҷаҳои интихоб сохта ва тақаллубӣ аст.
Котов дар номаи саркушодаи варзишгарони Белорус, ки хушунати пулис алайҳи эътирозгаронро маҳкум мекард, имзо намуд ва ба Лаҳистон фирор кард.
Дар замони нопадид шудан, Котов дар Варшава дар як оҷонси хусусӣ кор мекард ва барои расонаҳои мустақили Белорус назар медод.
Нопадид шудани Котов ягона ҳодисаи нопадид шудани як мухолифи ҳукумати Беларус дар хориҷ нест. Рӯзи 25 март Анжелика Мелникова, сухангӯи Шӯрои ҳамоҳангсозии мухолифин низ пас аз тарки Лаҳистон нопадид шуд.
Ӯ ҳамроҳи духтаронаш ба берун аз Иттиҳоди Аврупо сафар кард ва ҳаргиз барнагашт. Ба гуфтаи Павел Латушко, яке аз чеҳраҳои барҷастаи мухолифон, телефони ӯ аз 19 март дар хоки Белорус фаъол будааст.
Чеҳраҳои мухолиф дар солҳои аввали ҳукумати Лукашенко дар даҳаи 1990 нопадид шуданд, агарчи ин нопадид шуданҳо дар дохили Белорус рух дод.
Аз ҷумлаи ин афрод, метавон ба Юрий Захаренко, собиқ вазири корҳои дохилӣ, ки охирин бор дар моҳи майи соли 1999 дар наздикии хонааш дар Минск ба зӯр ба як мошини сиёҳшиша савор карда шуд ва Виктор Ханчар, ки пас аз хуруҷ аз ҳамоме дар пойтахти Белорус дар сентябри соли 1999 нопадид шуд, ишора кард.
Аз он замон то кунун ҳеч кадом аз онҳо дида нашуданд.
Гурӯҳҳои ҳомии ҳуқуқи башар ва кишварҳои ғарбӣ мақомоти баландпояи Белорусро дар ин одамрабоиҳо муттаҳам карданд.
Иттиҳоди Аврупо ва Амрико алайҳи Виктор Шейман, собиқ додситони кул, Юрий Сиваков, собиқ вазири корҳои дохилӣ ва Дмитрий Павличенко, фармондеҳи нерӯҳои вижаи вокуниши сареи вазорати корҳои дохилии Белорус, таҳрим ҷорӣ карданд.
Гуфтугӯ