Дар чанд ҷумла
Покистон пеш аз ид: "Таваррум коҳиш наёфтааст, нарх болост"
Дар арафаи Иди Қурбони имсола молбозорҳои Покистон гарм нестанд.
Хабарнигори "Рейтерс", ки 13-уми июн молбозори шаҳри Карочиро дид, мегӯяд, муштариён аз нархи баланд шикоят доранд.
Аз моҳи майи соли гузашта, бо оғози барномаи ислоҳоти зери назорати Сандуқи Байнулмилалии Пул, мизони таваррум дар Покистон ба 38 дарсад расид. Муштариён исрор меварзанд, ки сарфи назар аз таваррум дар арафаи ид тоҷирон нархи чорворо баланд кардаанд.
Муҳаммад Осиф, сокини Карочӣ, гуфт, "таваррум коҳиш наёфтааст. Бар илова нарх ҳам дар муқоиса бо соли пеш баланд аст. Соли гузашта нархи миёнаи чорвои қурбонӣ ба як ҳазор рупия (358 доллари Амрико) баробар буд. Имсол ҳамон мол ба як ҳазору панҷсад рупия ё 537 доллари Амрико баробар мебошад."
Аз ин ҳол чорвопарварон низ нороҳатанд, зеро теъдоди зиёди мардум чорвои хурдтар қурбонӣ мекунанд. Муҳаммад Чутал 540 километрро тай карда, аз ноҳияи Готкии вилояи Синдҳ ба Карочӣ мол овардааст.
Ӯ мегӯяд, "парвариши молро соли гузашта оғоз намудам. Дар ин давра хӯроки чорво бисёр гарон буд. Шояд соли оянда нархи чорво поинтар шавад. Хӯрок гарон буд, чорво ҳам гарон шуд. Нархи ғизои чорво дар се моҳи охир андаке коҳиш ёфт."
Видео дар инҷост:
Покистон талош дорад барои таҳкими рушди иқтисодӣ ва пешгирӣ аз муфлисшавӣ аз 6 то 8 миллиард доллар қарзи Сандуқи Байнулмилалии Пулро ба даст орад. Соли гузашта дар чунин ҳол Покистон аз Сандуқ 3 миллиард доллар қарзи кӯтоҳмуддат гирифта, аз муфлисӣ берун шуда буд.
Ҳамаи хабарҳои имрӯзро дар инҷо бихонед
Писари Муаммар Қаззофӣ дар ғарби Либия кушта шудааст
Сайф-ул-Ислом, писари Муаммар Қаззофӣ, раҳбари пешини Либия, дар наздикии шаҳри Зинтон, дар ғарби ин кишвар кушта шудааст. Вай 53 сол дошт.
Додситонии Либия рӯзи 4-уми феврал гуфтааст, куштори Сайф-ул-Исломро тафтиш мекунад ва талош барои ёфтани гумонзадҳо идома дорад.
Дар изҳороти Додситонии Либия гуфта шудааст, ки писари Қаззофӣ аз зарби тир ҷон дод.
Вакили мудофеи Сайф-ул-Ислом ба хабаргузории "Франс-Пресс" гуфтааст, эҳтимол ӯро "гурӯҳи чорнафарии номаълум" куштааст, ки "рӯзи сешанбе ба хонааш дар Зинтон ҳамла карда буд".
Муаммар Қаззофӣ, раҳбари пешини Либия, соли 2011 ва баъд аз сарнагунии ҳукуматаш, дар ҳоле ки фирорӣ шуда буд, ба дасти нерӯҳои инқилоб кушта шуд.
Пас аз он, писараш Сайф-ул-Исломро бо иттиҳоми ҷиноят алайҳи шаҳрвандон дастгир ва ба қатл маҳкум карданд. Соли 2017 хабар расид, ки Қазоффии хурдӣ озод шудааст.
Вай дар соли 2021 номзадии худро барои президентӣ дар Либия эълон кард, аммо интихобот ба таъхир уфтод.
Ҳалокати 21 кас дар зарбаҳои нави Исроил ба Ғазза
Бар асари зарбаҳои Исроил ба Ғазза камаш 21 кас кушта ва бештар аз сӣ нафар захмӣ шудааст.
Хабаргузории dpa-и Олмон навишт, ки ҳодиса рӯзи 4-уми феврал иттифоқ уфтод.
Ба гузориши ниҳодҳои зери назорати Амрико ва Иттиҳоди Аврупо созмони фаластинии "Ҳамос"-ро террористӣ медонанд дар Ғазза, дар миёни кушташудаҳо кӯдакон низ ҳастанд.
Артиши Исроил мегӯяд, пас аз он ки фаластиниҳо ба сӯйи сарбозони исроилӣ тир заданд, дар шимоли Ғазза чанд ҳамла анҷом дод. Дар ин ҳодиса як сарбози исроилӣ сахт захмӣ шудааст.
Санҷидани дурустии иддаои ду тараф ба таври мустақил имконпазир нест.
Аз моҳи октябри соли 2025 миёни Исроил ва гурӯҳи фаластинии "Ҳамос", ки Амрикову Аврупо созмони террористӣ медонанд, оташбас амал мекунад, вале ҷонибҳо ҳамвора якдигарро ба поймоли шартҳои он гунаҳкор мекунанд.
Тоҷикистон қасд дорад ба Белгия муҳоҷири корӣ фиристад
Мақомоти Тоҷикистон мегӯянд, ки барои бештар кардани роҳҳои муҳоҷират, бо 15 кишвар тақрибан чиҳил ҳуҷҷат имзо кардаанд.
Аз ҷумла, бо Белгия, Чин ва Туркияву Ҷопон санади ҳамкорӣ оид ба муҳоҷират имзо шудааст.
Мақомоти Вазорати меҳнат рӯзи сеюми феврал аз имзои ёддошти тафоҳум бо Вазорати корҳои дохилӣ ва Идораи муҳоҷирати Белгия хабар доданд.
Санади мазкур ба Тоҷикистон имкон медиҳад, ки ба кишварҳои БЕНИЛЮКС - Белгия, Нидерландия ва Люксембург муҳоҷири корӣ фиристад. Бар асоси ин санад муҳоҷирони тоҷик метавонанд дар соҳаҳои кишоварзӣ, сохтмон, парасторӣ ва тиб машғул шаванд.
Ба гуфтаи мақомот, ҳамчунин 500 шаҳрванди Тоҷикистон дар Қатар бо кор таъмин шудаанд ва Ҷумҳурии Корея соли 2025 барои 800 муҳоҷири корӣ квота ё роҳхат пешниҳод кардааст.
Вазъи бади муҳоҷирон дар Русия дар солҳои охир мақомот ва сокинонро дар фикри ҷустуҷӯ ва ёфтани макони нави кору зиндагӣ андохтааст.
Нерӯи корӣ як манбаи муҳими даромад дар Тоҷикистон аст ва бо вуҷуди сиёсати сахтгиронаи муҳоҷирати Русия ва ронда шудани ҳазорон муҳоҷир, дар ҳоли ҳозир ин кишвар ҳамчунон як макони асосӣ барои кору зиндагии тоҷикон боқӣ мондааст.
Дар метрои Маскав телефонҳои мусофиронро месанҷанд
Дар метрои Маскав телефонҳои мобилии мусофиронро ба таври интихобӣ тафтиш хоҳанд кард. Ин кор дар асоси фармони Вазорати нақлиёти Русия аз 4-уми феврали соли 2025 роҳандозӣ мешудааст.
Хабаргузории РБК бо истинод ба хадамоти матбуотии метрополитени Маскав гуфтааст, ки телефонҳои мобилии мусофирон дар сурати пеш омадани зарурат ва бо ҳадафҳои амниятӣ санҷида мешаванд.
Бар асоси дастури Вазорати нақлиёт, маъмурони пулис ё кормандони метро ҳақ доранд аз мусофирон телефон талаб карда, онро фаъол кунанд ва корашро бисанҷанд.
Соҳибони телефонҳои мобилиро барои саркашӣ аз додани телефони худ ҷарима намекунанд, аммо пулис ҳақ доштааст, ки онҳоро ба метро роҳ надиҳанд.
"Интерфакс" хабар додааст, ки дар даромадгоҳи истгоҳҳои метрои Маскав мисли Санкт-Петербург санҷиши телефонҳо оғоз шудааст.
Ин тасмим дар ҳолест, ки тайи солҳои охир дар нақлиёти ҷамъиятии Русия чораҳои амниятӣ шадидтар шуда, баҳсҳои зиёдеро дар мавриди дахолат ба ҳаёти шахсии шаҳрвандон ба миён овардааст.
Таъсиси хазинаи филизоти нодиру серхаридор дар Амрико
Таъсиси захираи филизоти нодир бо сармояи 12 миллиард доллар дар Амрико арзиши саҳмияи ширкатҳои истихроҷи маъданро дар бозори бурс якбора боло бурд.
Ин сармоягузориро охирин талоши Вашингтон медонанд, ки барои пешгирӣ аз он чизе, ки мақомдорон онро “дасткории Чин дар нархи маъдани литиум, никел, металҳои нодир ва дигар маъданҳои муҳим” меноманд, равона шудааст.
Боло рафтани нархи ин металҳои нодир солҳо боз монеи рушди ширкатҳои истихроҷи маъдан дар Амрико шудааст. Саҳмияҳои ду ширкати амрикоӣ, аз ҷумла “Минералҳои нодири Амрико”, ки кораш истихроҷи ин навъи филизот аст, аз 7 то 16 дар сад дар як рӯз боло рафт.
Маъданҳои нодир барои истеҳсоли абзорҳои электронӣ, аз мошини барқӣ то аслиҳаи пешрафта, зарур аст.
Хабаргузории Блумберг, ки бори аввал хабари тарҳро нашр кард, навиштааст, ки Бонки содироту воридоти ИМА ширкатҳои истихроҷи металу маъданҳои нодирро 10 миллиард долллар сармоягузорӣ хоҳад кард.
Ҳадаф харидорӣ ва захира кардани маъдану металҳои нодир барои истеҳсоли мошин, ширкатҳои технологӣ ва дигар корхонаҳои саноатии Амрико мебошад.
Моҳи гузашта як гурӯҳ аз Ҳизби демократ ва Ҳизби ҷумҳурихоҳ дар Конгресси Амрико тарҳи қонунеро пешниҳод карданд, ки таъсиси захираи маъданҳои муҳимро ба маблағи 2,5 миллиард доллар пешбинӣ мекунад. Ин иқдом бо ҳадафи муътадил гардонидани нархҳо дар бозор ва ҳавасмандгардонии истихроҷу коркарди маъдан дар дохил рӯи даст гирифта шудааст.
Тарма ду қитъаи роҳро дар шоҳроҳи Душанбе-Чаноқ бастааст
Ҳаракат дар яке аз шоҳроҳҳои муҳими Тоҷикистон, ки шимоли кишварро ба шаҳри Душанбе мепайвандад, тайи ду ҳафтаи охир ба душвории зиёд печидааст.
Барфи зиёде, ки аз охири моҳи январ меборад, сабаби фаромадани баҳманҳо ё тармаҳои хурду бузурге шудааст, ки роҳи Душанбе-Чаноқро барои соатҳо мебанданд ё ҳаракатро дар он бисёр сахт мекунанд.
Ширкати IRS, мутасаддии нигоҳубин ва ҷамъоварии пул дар ин роҳ, рӯзи 3-юми феврал гуфт, тарма ду қитъаи роҳро бастааст ва поккорӣ идома дорад.
Роҳи Душанбе-Чаноқ шаҳри Душанберо бо вилояти Суғд мепайвандад ва як роҳи пурпечутоби кӯҳӣ ва айни замон муҳими Тоҷикистон ба ҳисоб меравад. Рӯзона аз он ҳазорон мошин ва садҳо тонна молу маҳсулот мегузарад ва қатъи равуо дар он ва таъхир дар расонидани молу коло зиёни иқтисодии зиёде ҳам мерасонад.
Мавридҳои зери барф мондану ҳалок шудани мусофирон ҳам дида шудааст. Рӯзи якуми январ дар ҳамин роҳ ва дар ноҳияи Варзоб ду нозири роҳ зери тарма монда ҷон бохтанд.
Дар ҳамин ҳол ҳавошиносони тоҷик ҳушдор додаанд, ки рӯзҳои 4 ва 5-уми феврал дар роҳи Душанбе-Чаноқ хатари фаромадани баҳман ё тарма вуҷуд дорад ва аз мардум хостаанд, зимни ҳаракат ва сафар дар ин минтақаҳо эҳтиёткор бошанд.
Навор дар Инстаграм:
Бритониё даҳ мақом ва як ниҳоди амниятии Эронро таҳрим кард
Бритониё рӯзи дуюми феврал даҳ нафар ва як ниҳоди амниятии давлатии Эронро дар феҳристи таҳримҳои худ қарор дод.
Тибқи эълони расмии ҳукумати Бритониё, таҳримҳои нави ин кишвар фармондеҳони интизомии Ҷумҳурии исломии Эрон ва бархе аз афродро бинобар "нақзи ҷиддии ҳуқуқи башар" ҳадаф қарор медиҳад.
Ин афрод аз ҷумла ба саркӯби озодиҳои баён ва гирдиҳамоиҳои осоишта муттаҳам мешаванд.
Дар феҳристи ин таҳримҳо, Искандар Муъминӣ, вазири корҳои дохилӣ ва Бобаки Занҷонӣ, сармоядор ва тоҷири эронӣ низ шомил ҳастанд.
Тибқи ин таҳримҳо, дороиҳои ин афрод масдуд мешавад ва онҳо аз ҳаққи сафар маҳрум ҳастанд.
Бритониё пештар ҳушдор дода буд, ки дар сурати идомаи нақзи ҳуқуқи башар, таҳримҳо алайҳи Эронро сахттар мекунад.
Се мансабдори тоҷик барои нақзи қонуни танзим ҷарима шудаанд
Дар як соли гузашта дар Тоҷикистон се мансабдорро барои вайрон кардани қонуни танзими ҷашну маросим ҷарима кардаанд. Маблағи ҷарима ва номи мақомдорон ифшо нашудааст.
Масъулини Кумитаи дин ва танзими анъанаи Тоҷикистон рӯзи дуюми феврал дар нишасти хабарии ин ниҳод гуфтанд, дар маҷмӯъ дар соли 2025 1268 сокини кишвар барои поймол кардани муқаррароти қонуни танзим муҷозот шудаанд.
Ин афродро, ки бар хилофи қонун, ҷашни бошукӯҳе баргузор кардаанд ва ё масалан "оши худоӣ" додаанд, дар умум бештар аз 11 миллион сомонӣ ҷарима кардаанд.
Барои нақзи қонуни танзим аз 8 ҳазору 640 сомонӣ (беш аз 800 доллар) то 216 ҳазор сомонӣ, муодили бист ҳазор доллар, ҷарима карда мешавад. Барои шахсони мансабдор маблағи ҷарима аз 780 то 117 ҳазор сомони муайян шудааст. Бар асоси қонунгузории Тоҷикистон, мансабдорон барои вайрон кардани қонуни танзим метавонанд аз мақом барканор шаванд.
Масъулони Кумитаи дин дар гузашта гуфта буданд, ки мансабдорон роҳи фирор аз ин ҳолатро ёфтаанд ва баъзе аз онҳо аз тарси қонуни танзим ва расонаӣ шудани номашон, ҷашну маъракаи хонаводагии худро ба номи наздиконашон сабт ва барпо мекардаанд.
Як корманди “Душанбе Сити Бонк”-ро 14 сол зиндонӣ кардаанд
Додгоҳи ноҳияи Ашт як корманди “Душанбе Сити Бонк”-ро ба тасарруфи садҳо ҳазор доллари ин бонк гунаҳкор дониста, ҷазои сахт додааст.
Дар баёнияи расмӣ гуфта шудааст, ки яке аз инкассаторҳо дар камтар аз як ҳафта, яъне аз 25-уми июн то 30-юми июни соли 2025, бештар аз се миллиону 250 ҳазор сомонӣ ё бештар аз 270 ҳазор доллари бонкро зоҳиран барои муомила ва гирифтани суд дар биржаҳои “Универсал трейдинг” ва “Крантон груп” истифода кардаву аз даст додааст.
Додгоҳи ноҳияи Ашт аз ин корманди бонк М.Ҷ.З. ном бурда, гуфтааст, ӯ бо ин “кирдори худ ба “Душанбе сити бонк” зарари махсусан калони моддӣ расонид.”
Дар муҳокима, ки рӯзи 16-уми январи имсол сурат гирифтааст, корманди акнун собиқи бонкро барои аз худ кардани пули бонк ба 14 сол зиндони низомаш сахт маҳкум кардаанд.
Назари муттаҳам ба ҷиноят маълум нест.
Баъд аз раҳоӣ ин ҷавони 32-сола ҳақ надорад, то 5 сол дар ягон муассисаи молӣ ва ё бонк кор кунад.
Дар бораи ифтитоҳи парванда ба зидди ин ҷавон Вазорати корҳои дохилии Тоҷикистон моҳи июли соли 2025 хабар дода, гуфта буд, ки ӯ аз терминалҳои ноҳияи Ашт се миллиону ҳафтод ҳазор сомонии нақдро гирифта, на ба ҳисоби “Душанбе Сити Бонк”, балки ба ҳисоби худ гузаронда, ба бонк зарари бузурги молӣ расонидааст.
Афзоиши нархи об ва хидматрасониҳои дигар дар Тоҷикистон
Нархи об ва хидматрасониҳои дигари коммуналӣ дар Тоҷикистон боло рафтааст.
Раиси Кумитаи хоҷагии манзилию коммуналӣ рӯзи 2-юми феврал дар нишасти хабарӣ гуфт, аз якуми январ нархи об ва хадамоти дигар барои мардум 15 ва корхонаҳо 30 дарсад афзуд.
Ба иттилои Ҷамшед Табарзода, арзиши як метри мукааб об барои аҳолӣ, ки 1 сомониву 30 дирам буд, акнун ба 1 сомониву 50 дирам расидааст.
Барои касоне, ки дастгоҳи ҳисоби об надоранд, арзиши об барои ҳар узви оила (аз 6-моҳа боло) ба ҳисоби миёна 8 сомониву 10 дирам таъйин шудааст.
Боло рафтани нархи об дар ҳолест, ки бахше аз сокинони Тоҷикистон аз мушкили дастрасӣ ба об нигаронӣ доранд. Сокинон дар бисёре аз деҳаҳо маҷбуранд, аз дурии чанд километр ба хонаашон об кашонанд ва ё аз мошинҳо об харанд.
Мақомоти Тоҷикистон барои ҳалли мушкили об дар ҷаҳон ба Созмони Милал пешниҳодҳо фиристода, дар Душанбе чанд нишасти бузург гузаронидаанд. Бо вуҷуди ин, то ҳол беш аз 30 дарсади аҳолӣ дар дохили кишвар ба оби ошомиданӣ таъмин набудаанд.
Ҳамлаҳои Русия дар Украина ҷони 17 танро гирифт
Мақомот дар Украина мегӯянд, ки рӯзи якуми феврал дастикам 17 нафар дар ду ҳамлаи ҷудогонаи Русия дар минтақаи Днепропетровск дар ҷануби Украина кушта шуданд.
Ба гуфтаи мақомот, 15 нафар пас аз он кушта шуданд, ки як паҳбоди русӣ дар наздикии як автобус дар минтақаи Павлоград бархӯрд.
Ду нафари дигар бар асари бархӯрди як паҳбод ба як хонаи шахсӣ дар маркази Днепропетровск кушта шуданд.
Дар ҳамин ҳол, мақомоти Украина гуфтанд, ки дар ҳамлаи Русия ба як зоишгоҳ дар шаҳри Запороже дастикам шаш нафар захмӣ шуданд.
Ин ҳамлаҳо дар ҳоле аст, ки интизор меравад даври нави гуфтугӯҳо байни Киев ва Маскав дар ҳафтаи ҷорӣ оғоз шавад.
Владимир Зеленский, раисҷумҳури Украина гуфтааст, ки ин даври гуфтугӯҳо рӯзҳои 4-5 январ дар шаҳри Дубайи Имороти Муттаҳидаи Араб баргузор хоҳад шуд.
Ихроҷи зиёда аз 600 донишҷӯи тоҷик аз Русия
Соли 2025 қариб 600 донишҷӯи тоҷикро аз Русия ихроҷ кардаанд. Ба гуфтаи Лутфия Абдулхолиқзода, муовини вазири маориф ва илми Тоҷикистон, ин донишҷӯёни рондашуда дар донишгоҳҳои кишвар таҳсилро давом доданд.
Лутфия Абдулхолиқзода охири ҳафтаи гузашта зимни нишасти хабарӣ гуфт, моҳи ноябри соли 2025 дар нишасти ҳайатҳои Тоҷикистон ва Русия масъалаи ихроҷи донишҷӯёни тоҷик аз Русия баррасӣ шуд ва иҷозаи бозгашти 730 донишҷӯ ба даст омад.
Инҳо донишҷӯёне будаанд, ки давоми ду соли ахир аз Русия ихроҷ шуда буданд. Лутфия Абдулхолиқзода гуфт, онҳо ба Русия ҳуҷҷатҳое пешниҳод карданд, ки нишон медиҳад, 730 донишҷӯ беасос хориҷ шудаанд. Баъди ин ба гуфтаи муовини вазир, Русия гуфтааст, 730 нафарро қабул мекунанд, вале аллакай қисми зиёди ин донишҷӯён "нахостанд ба Русия баргарданд".
Солҳои ахир шикоят аз мушкил шудани вуруди донишҷӯён ба ҳудуди Русия зиёд шудааст. Аксаран донишҷӯёни тоҷик ҳангоми бозгашт аз таътил ба Русия ё марзро гузашта наметавонистанд ё ба донишгоҳ роҳ намеёфтанд. Мақомоти кишвар гуфта буданд, Русия сабаби рондани донишҷӯёнро шарҳ намедиҳад.
Тоҷикистон содироти барқро ба хориҷ зиёд кардааст
Вазорати энергетика ва захираҳои об мегӯяд, ки соли 2025 Тоҷикистон содироти барқ ба хориҷи кишварро қариб якуним миллиард киловат соат ё 37 дарсад зиёд кардааст.
Ин дар ҳолест, ки дар бештари шаҳру ноҳияҳои Тоҷикистон аз моҳи сентябр лимит ё маҳдудияти реҷаи интиқоли барқ ҷорӣ шудааст.
Далер Ҷумъа, вазири энергетика ва захираҳои оби Тоҷиктстон 29-уми январ дар нишасти хабарӣ гуфт, соли гузашта Тоҷикистон ба хориҷ 5,3 миллиард киловат соат барқ содир кардааст.
Аз ҷумла, ба Афғонистон 1,7 миллиард киловат соат, ба Узбекистон 894,7 миллион киловат соат ва ба Қирғизистон 11,5 миллион киловат соат. Вазорат мегӯяд, ки беш аз 90 дарсади барқи содиротӣ дар моҳҳои апрел-сентябр, дар даврае, ки воридоти об ба обанбор зиёд аст, сурат мегирад.
Тибқи омори расмӣ, соли гузашта Тоҷикистон аз Узбекистон ва Қирғизистон 2,7 миллиард киловат соат барқ ворид кардааст.
Интиқоли барқ ба хориҷ дар шароите, ки мардуми Тоҷикистон бо маҳдудият барқ мегиранд, интиқодҳоро ба миён овардааст. Феълан сокинони деҳоти Тоҷикистон шабонарӯз то 6-8 соат барқ мегиранд.
Мақомоти Покистон мегӯянд, 145 ҷангҷӯро дар Балучистон куштанд
Мақомоти Покистон рӯзи якшанбе гуфтанд, дар ҷараёни як амалиёти низомии 40-соата дар вилояти Балучистон 145 ҷангҷӯро куштанд.
Даргириҳо пас аз силсилаи ҳамлаҳои ҳамоҳангшудаи ҷудоиталабони балуч оғоз шуд, ки дар онҳо даҳҳо нафар ҷон доданд. Сарфароз Буғтӣ, намояндаи ҳукумати ин вилояти ҳаммарз бо Эрон ва Афғонистон гуфт, ки дар ҳамлаҳои ҷангҷӯён 17 маъмури неруҳои интизомӣ ва 31 ғайринизомӣ кушта шудаанд.
Ба гуфтаи мақомот, ҳамлагарон дар либоси мулкӣ вориди шифохонаву мактаб ва бозорҳо шуда, ба сӯи мардум оташ кушодаанд ва аз сокинон ҳамчун "сипари инсонӣ" истифода бурдаанд.
Масъулияти ин ҳамлаҳоро гурӯҳи мамнӯи "Артиши озодибахши Балучистон" ба уҳда гирифт. Ин гурӯҳ иддао кард, ки 84 сарбози Покистонро куштааст. Аммо артиши Покистон ин иддаоро рад карда, гуфт, ки низомиёни кишвар ҳамлаҳоро рафъ карданд ва иҷоза надоданд, ки ягон иншооти стратегӣ, ё шаҳр ба дасти ҷангҷӯён афтад.
Вазорати дифои Покистон мегӯяд, ҷангҷӯён бештар коргарон ва табақаҳои камбизоатро ҳадаф қарор медиҳанд. Артиши Покистон ин ҳамлаҳоро кори дасти ҷангҷӯёни таҳти ҳимояти Ҳинд хонд, аммо Деҳлӣ ин иттиҳомро "беасос" хонда, рад кард.
Вилояти Балучистон, ки бузургтарин ва камбизоаттарин минтақаи Покистон аст, даҳсолаҳо боз шоҳиди шӯришҳои ҷудоихоҳон мешавад. Онҳо талаб доранд, ки ҳиссаи бештари даромад аз ҳисоби манобеи табиии вилоят ба худи балучҳо дода шавад.
Даври нави музокироти сулҳи Украина дар Абузабӣ сурат мегирад
Владимир Зеленский раиси ҷумҳури Украина, хабар дод, ки даври нави музокироти сеҷониба дар бораи поён додан ба ҷанг дар Украина рӯзҳои 4 ва 5-уми феврал дар шаҳри Абузабии Имороти Муттаҳидаи Араб баргузор мешавад.
Ӯ афзуд, ки ин иттилоро аз ҳайати Украина дар музокирот дарёфт кардааст. Дар паёми Зеленский гуфта нашудааст, ки нишасти Абузабӣ рӯзи 1-уми феврал баргузор шуд ё на. Қаблан тамоми тарафҳо — Русия, Амрико ва Украина тасдиқ карда буданд, ки даври нави музокирот рӯзи якшанбе пешбинӣ шудааст.
То ҳол паёми Зеленский дар шабакаҳои иҷтимоиро дар мавриди санаи нави музокирот намояндагони Амрико ва Русия шарҳ надодаанд.
Рӯзи 31-уми январ Кирилл Дмитриев, фиристодаи хоси раиси ҷумҳури Русия дар аёлати Флорида бо ҳайати амрикоӣ, аз ҷумла Стив Уиткофф ва Ҷаред Кушнер, фиристодагони хоси Доналд Трамп мулоқот кард. Тарафҳо гуфтугӯҳоро "самарбахш" ва "созанда" хонданд.
Даври аввали музокирот бо ҳузури намояндагони Русия, Украина ва Иёлоти Муттаҳида рӯзҳои 23-24-уми январ дар Абузабӣ сурат гирифта буд. Ҷонибҳо аз пешрафт дар гуфтугӯҳо хабар доданд, ҳарчанд эътироф карданд, ки дар масъалаи марзҳо ва қаламравҳои ишғолшудаи Украина ҳанӯз ба созиши ниҳоӣ нарасидаанд.