Ҳодиса
Аҳмадов дар боздоштгоҳи Сизран нигаҳдорӣ мешавад
Сафорати Тоҷикистон дар Маскав гуфт, ки гумонбари аслии куштори афсари пулиси Русия дар боздоштгоҳи ноҳияи Сизрани вилояти Самара қарор дорад.
Сафорати Тоҷикистон дар Русия мегӯяд, ки Маҳмадалӣ Аҳмадови 23-сола -- гумонбари аслӣ дар куштори афсари пулис Андрей Гошт ва хоанводааш дар боздоштгоҳи ноҳияи Сизрани вилояти Самара нигаҳдорӣ мешавад.
Сарвар Бахтӣ, сухангӯи сафорати Тоҷикистон дар Маскав, рӯзи 9 май дар суҳбат бо Озодӣ гуфт, ки баъди боздошташ дар фурудгоҳи "Домодедово"-и шаҳри Маскав Аҳмадов ба Самара интиқол дода шуд. "Ҳоло ӯ дар боздоштгоҳи ноҳияи Сизран, маҳалли содир шудани ҷиноят нигаҳдорӣ мешавад ва ба саволҳои пулис посух медиҳад," - гуфт Бахтӣ.
Дар ҳамин ҳол, намояндаи раиси ҷумҳури Русия дар ҳавзаи федеролии Приволжйе Михаил Бабич 12 муфаттишро барои ба таври сареъ боз шудани куштори ходими собиқи пулиси Сизран бо ҷоиза қадрдонӣ кард. Дар ин бора телевизиони давлатии Русия хабар додааст.
Дар миёни онҳое, ки барои куштори Андрей Гошт мукофот гирифтанд, панҷ ходими ВКД, панҷ корманди Кумитаи тафтишотӣ ва ду ходими Раёсати хадамоти амнияти федеролии Русия мебошанд. Михаил Бабич аз "кори муассири онҳо дар амри боз ва пайдо кардани омилони ин ҷиноят" ситоиш кардааст.
Ба иттилои Бабич, парванда дар ихтиёри Кумитаи тафтишотӣ ва зери назорати бевоситаи раиси ин муассиса – Александр Бастрикин аст. Ӯ алакай ду дафъа ба вилояти Самара барои назорати ҷараёни тафтишот сафар кардааст. Ӯ гуфт, ки кори муштараки сохторҳои қудратӣ – муфаттишони Кумитаи тафтишотӣ ва ВКД дар фурсати хеле кӯтоҳ имкон дод, то омилони ин куштор мушаххас ва боздошт шаванд.
Куштори 6 узви оилаи Андрей Гошт, собиқ раиси шӯъбаи умури дохилаи Сизран дар вилояти Самара рӯзи 24 апрел рух дод. Рӯзи 4 май Кумитаи тафтишотии Русия ба ҳамаи чаҳор муттаҳами куштори мазкур, аз ҷумла як зодаи Тоҷикистон Маҳмадалӣ Аҳмадов расман айб эълон кард.
Ин афрод аз рӯи моддаҳои "куштори ду ва нафари бештар", "Сӯиқасд ба куштори хурдсол" ва "авбошӣ"-и Кодекси ҷиноии Русия парванда муттаҳам мешаванд. Маҳмадалӣ Аҳмадов, ки зодаи Тоҷикистон буда, гӯё раҳбарии ин гурӯҳи ҷиноиро ба ӯҳда доштааст, баъди 10 рӯзи ҷиноят бо ҳавопаймо аз Душанбе ба Маскав интиқол ёфт.
Мақомоти рус гуфтанд, ки ӯ ба ҳангоми кӯшиши убури марзи Афғонистон боздошт ва ба Русия истирдод шуд. Аммо масъулони Вазорати корҳои дохилии Тоҷикистон гуфтанд, ки Аҳмадов худро бегуноҳ меҳисобад ва баъд аз шахсан ҳозир шудан ба Вазорати корҳои дохилии Тоҷикистон дар Душанбе ва иқрори бегуноҳиаш, ихтиёран ба Маскав рафт, то ба саволҳои тафтишот посух диҳад.
Аз рӯи қонунҳои Тоҷикистон, истирдоди шаҳрвандони Тоҷикистон ба давлатҳои хориҷӣ, ки дар содир кардани ҷинояте гумонбар шудаанд, манъ аст.
Рӯзи 5 май Аҳмадов баъди интиқол ёфтанаша ба Самара, барои анҷоми ҳаракатҳои тафтишотӣ бо конвой ба рустои Ивашевкаи ноҳияи Сизрани вилояти Самара бурда шуд. Феълан иттилои бештар дар бораи сарнавишти ӯ маълум нест. Тафтишот идома дорад.
Дар як ҳамлаи хунини рӯзи 24 апрел подполковник Андрей Гошт, муовини сардори ситоди раёсати корҳои дохилаи вилояти Самара ва 5 узви хонаводаи ӯ, бо шумули падару модари солхӯрдааш кушта шуданд. Аз ин ҳамла танҳо духтарчаи ҳамагӣ ҳафтсолаи бародари ин афсари баландпояи пулис ҷон ба саломат бурд, вале то ҳол дар ҳолати мадҳушӣ дар бемористон таҳти табобат қарор дорад. Аҳмадов ва ҳамин тавр, се гумонбари дигар – Ислом Бобоев, Орхан Зохрабов ва Роман Фаталиев, ки зодагони Озарбойҷон мебошанд, ҳама дар боздоштанд.
Ҳамаи хабарҳои имрӯзро дар инҷо бихонед
Марги панҷ узви як оила дар садамаи мудҳише, дар роҳи Душанбе -Хуҷанд
Дар як рӯзи ахир дар натиҷаи садама дар роҳҳои Тоҷикистон 6 нафар ҷон бохтаанд. Дар ҳодисае мудҳише, ки нимарӯзи 20-уми сентябр рух додааст, бар асари бархурди мошини сабукрав бо мошини борбар панҷ узви як оила ба ҳалокат расидаанд.
Бино ба иттилои Кумитаи ҳолатҳои фавқулода ҳодиса дар шоҳроҳи Душанбе – Хуҷанд рух додааст. Ронанда Амирбек Муродови 45 сола бо зану се фарзандаш, ки хурдтарини онҳо 5 сола будааст, ба Душанбе сафар мекард ва дар Шаҳристон ба садамаи мудҳиш дучор шудааст.
Кумита дар баёнияе гуфтааст, дар пайи бархурди мошинҳо таркиш сурат гирифта, ҳама дар ҷойи ҳодиса ба ҳалокат расидаанд. “Ронандаи 24-солаи мошини “Дулан” сокини шаҳри Истаравшан бо ҷароҳатҳои ҷисмонӣ ба беморхони марказии ноҳияи Шаҳристон интиқол дода шудаст.” - омадааст, дар хабарномаи Кумитаи ҳолатҳои фавқулода.
Ба гуфтаи мақомот, эҳтимол суръати баланди ҳаракати мошинҳо ва мушкил шудани идораи он ба ин фоҷеа сабаб шудааст.
Марги як хонавода дар садамаи рӯзи 20-уми сентябр дар ҳолест, ки субҳи ҳамон рӯз дар садамаи дигаре дар роҳи Мастчоҳи Кӯҳӣ, як зани 40 сола ҷон бохтааст. Дар ин ҳодиса 4 мусофири дигар ҷароҳат бардошта, ба беморхона интиқол ёфтаанд.
Солона дар садамаҳои нақлиётӣ дар Тоҷикистон садҳо кас кушта ва маъюби якумрӣ мешаванд. Мошинҳои куҳнаву роҳҳои ноҳамвор, ҳаракат бо суръати баланд ва риоя накардани қоидаҳои ҳаракат аз сабабҳои маргумири зиёд дар роҳҳо номбар мегардад.
Роҳи манъи дастрасии кӯдакон ба шабакаҳои иҷтимоӣ дар Австралия
Моҳи ноябри соли 2024-ум давлати Австралия ғайримунтазира дастур дод, ки тамоми наврасони аз 16-сола поин аз дастрасӣ ба шабакаҳои иҷтимоӣ маҳрум карданд.
Ба қавли онҳо корбарӣ дар шабакаҳо ба вазъи равонии онҳо таъсири манфӣ дорад. Бо наздикшавии замони иҷрои қонун мақомдорони ин кишвар роҳҳои беҳтари татбиқи онро пешниҳод кардаанд.
Рӯзи 16-уми сентябр Австралия аз шабакаҳои иҷтимоӣ хост, бо дахолати камтарин ва бо назардошти ҳуши маснӯӣ ва одатҳои корбарон ба муайян намудани синну соли онҳо рӯ оранд.
Сар аз моҳи декабр дар ин кишвар дастрасии наврасони ҷавонтар то 16-сола ба шабакаҳои иҷтимоӣ манъ хоҳад шуд. Ҳоло аҳли олам пайгирӣ дорад, ки Австралия аз чӣ роҳе ин тасмимро амалӣ хоҳад кард.
Комиссари амнияти электронии Австралия Ҷулия Инман Грант мегӯяд, ҳатмӣ нест, ки масъулони шабакаҳои иҷтимоӣ тавассути тафтиши ҳаматарафа ба ташхиси снну соли корбарон машғул бошанд.
Ҷулия Инман Грант, Комиссари амнияти электронии Австралия гуфт:
"Калонсолон набояд аснои корбурди шабакаҳои иҷтимоӣ шоҳиди тағйири бузурге шаванд. Ба ақидаи мо зарур нест, ки синни тамоми корбарон дубора муайян карда шавад. Мо мехоҳем корбарони ҷавонтар аз 16-сола аз истифодаи шабакаҳо маҳрум гарданд. Мо медонем, ки чӣ гуна технологияҳо ба мо матлабҳои тарғиботии нишонрас мефиристанд. Ҳамин гуна онҳо дақиқ медонанд, ки чӣ тавр синнусоли корбарони кӯдакро фиреб кунанд."
Моҳи июл Грант дастур дода буд, ки дастрасии наврасони зери 16-сола ба ЮТЮБ манъ шавад. Пеш аз он шабакаҳои иҷтимоии ФЕЙСБУК, ИНСТАГРАМ ва СНАПЧАТ ҳам дар рӯйххати сиёҳ шомил шуда буданд. Ягона шабакаи иҷтимоӣ, ки аз тарафи муаллимони Австралия ҳимоят шуду дастрасӣ ба он маҳду намешавад, ТИКТОК будааст.
Вазири федералии мухобироти Австралия Аника Велс ҳам аз маъмурони шабакаҳои иҷтимоӣ талаб кард, ки ҳангоми коркарди маълумоти марбут бо корбарон аз эҳтиёт кор гиранд. Аника Велс Вазири федералии мухобироти Австралия
"Мо умедворем, ки барои иҷрои ин қонунҳо истифодаи маълумоти хусусии мардум ба ҳадди имкон кам бошад. Мо аз ҳама талаб намекунем, дар шабакаҳои иҷтимоӣ синну солашонро эълон кунанд. Шабакаҳои бе он ҳам дар бораи корбарон маълумоти кофӣ доранд. Маслан, агар нафаре аз соли 2009-ум корбари ФЕЙСБУК аст, бе тафтиш ҳам ошкор мешавад, ки синни ӯ аз 16 боло аст."
Вазир илова кард, ки шабакаҳо маҷбуранд, талаботи қонунро иҷро кунанд ва чунин имкониятҳоро дар ихтиёр доранд.
Моҳи ноябри соли 2024-ум Австралия бо ишора ба таъсири манфии шабакаҳои иҷтимоӣ ба вазъи равонии наврасон қонун қабул кард, ки наврасони хурдсол аз дастрасӣ ба шабакаҳои иҷтимоӣ маҳрум гарданд ва ин қонун бояд сар аз моҳи декабри соли 2025-ум ба ҳукми иҷро дарояд. Шабакаҳои иҷтимоӣ маҷбуранд, тамоми наврасони аз 16-сола поёнро аз пойгоҳҳояшон берун кунанд.
Трамп гуфт, агар Афғонистон пойгоҳи Багромро надиҳад,"кори бад" хоҳад шуд
Доналд Трамп, президенти ИМА ба Афғонистон таҳдид кардааст, ки агар Пойгоҳи ҳавоии Багромро ба Амрико надиҳад, "корҳои бад"-е иттифоқ хоҳад уфтод. Толибон қаблан ин талабро рад карда буданд.
Трамп рӯзи 20-уми сентябр дар шабакаи Твиттер навишт: "Агар Афғонистон Багромро ба онҳое, ки онро сохтаанд, яъне ба Иёлоти Муттаҳида барнагардонад, иттифоқи баде рух хоҳад дод”
Президент Трамп аз ин бештар ҷузъиёт надод ва нагуфт, ки чӣ чизе рух хоҳад дод, аммо дар сӯҳбат бо хабарнигорон дар Кохи сафед бо такрори таҳдиди худ гуфт: "Мо ҳоло бо Афғонистон гуфтугӯ дорем ва талош дорем онро баргардонем. Мехоҳем фавран онро баргардонем. Агар онҳо ин корро накунанд, пас шумо хоҳед донист, ки ман чӣ кор мекунам."
Дар ду рӯзи ахир ин бори дуввум аст, ки ӯ ба зарурати бозгардонии пойгоҳи Багром таъкид мекунад. Рӯзи 18-уми сентябр дар нишасте дар Лондон Трамп гуфт, Иёлоти Муттаҳида талош дорад, пойгоҳи ҳавоии Багромро аз Толибон бозпас бигирад, чун ин гурӯҳи тундрав ба ёрии ИМА муҳтоҷ аст ва Чин метавонад аз он барои барномаҳои ҳастаиаш истифода кунад.
Рӯзномаи Wall Street Journal рӯзи 19-уми сентябр ба нақл аз як манбаи худ навишт, ки мақомоти амрикоӣ бо Толибон ин мавзӯъ ва ҳам эҳтимоли истифодаи Багромро ба унвони як "нуқтаи оғоз" барои амалиёти зиддитеррористӣ баррасӣ кардаанд.
Дар вокуниши худ мақомоти Толибон рӯзи 19 сентябр суханҳои раҳбари ИМА-ро рад карданд. Аз ҷумла, Зокир Ҷалол, намояндаи расмии ВКХ дар Кобул, дар саҳифааш, дар шабакаи Х навишт, Кобул барои чунин як муомилае омода нест.
Пойгоҳи низомии Багром, воқеъ дар 40-километрии шимоли Кобул, дар солҳои 1950-ум аз ҷониби Иттиҳоди Шӯравӣ сохта шудааст. Баъди соли 2001 ин пойгоҳро нирӯҳои зери раҳбарии ИМА таҳти назорат гирифтанд. Соли 2021, пас аз 20 соли ҳузури нерӯҳои амрикоӣ ин пойгоҳ ба дасти мақомоти Афғонистон ва дар натиҷа ба дасти Толибон гузашт.
Дар Чехия беш аз 40 коргари идораи полис дар як вақт шикамдард шуданд
Дар шаҳри Прагаи Чехия ҳафтаи гузашта дар як вақт беш аз чил корманди як идораи полис бо нишонаҳои исҳол ё шикамдард ба духтур муроҷиат кардаанд. Сомонаи чехии iDNES рӯзи 17 сентябр навишт, ки ҳодиса ҳафтаи гузашта дар идораи полиси маҳаллаи Летна рух дод.
Таҳқиқ шурӯъ шудааст, вале фарзияи аввалия ин аст, ки эҳтимолан бемории ходимони полис хусусияти вирусӣ дорад. Ҳанӯз манбаи сироят маълум карда нашудааст, вале барои пешгирӣ аз ҳама гуна эҳтимоли бадтар шудани вазъ барои як муддат ошхонаи умумӣ ва буфети бинои идораи полис баста шуд.
Ҳана Мала, як намояндаи ин идораи полис ба нашрия гуфтааст: “44 корманд бо нишонаҳои сабуки шикамравӣ шикоят карданд. Таҳқиқоти микробиологӣ вуҷуди хусусиятҳои бактериологии бемориро тасдиқ накард. Инчунин ВКД ба ҳайси идораи таъмини амнияти ҷамъиятӣ таҳқиқи эпидемиологиро ба роҳ мондааст”.
Ӯ гуфт, ки тафтиши ошхонаву буфет ҳеҷ мушкилеро ошкор накард ва баъди анҷоми таҳқиқ ин ду муассисаи хӯроки умумӣ аз рӯзи сешанбе дубора корро аз сар гирифтанд. Мала гуфт, баъди он ҳодиса дигар шикояте дар бораи бад шудани саломатии ходимони идораи полис дарёфт нашудааст.
Рубио: Мо аз ҳамлаи Исроил ба Қатар хушнуд нестем
Вазири хориҷаи Амрико гуфт, Вошингтон аз ҳамлаҳои ҳавоии Исроил ба гурӯҳи ифротии ҲАМОС дар Қатар "хушнуд нест", аммо афзуд, чунин мавқеъ мақоми Исроилро ба унвони муттаҳиди Амрико тағйир нахоҳад дод.
Марко Рубио, рӯзи шанбе қабл аз сафараш аз Вашингтон ба Исроил ба хабарнигорон гуфт: “Албатта, мо хушнуд набудем, президент ҳам норозӣ аст.” Вай илова кард, ки: “Ин масъала моҳияти равобити мо бо Исроилиҳоро тағйир намедиҳад, вале мо бояд дар ин бора гуфтугӯ кунем, махсусан дар бораи он, ки ин вазъ ба талошҳои дипломатӣ барои дастёбӣ ба оташбас дар Ғаззаи ҷангзада чӣ таъсире хоҳад кард.”
Ҳамлаи ҳавоии рӯзи сешанбе, нахустин ҳамлаи Исроил алайҳи Қатар, ки аз муттаҳидони Амрико дар Ховари Миёна аст, минтақаро таккон дод ва ба талошҳои дипломатӣ барои расидан ба оташбас дар Ғаззаи ҷангзада зарба зад.
Нахуствазири Қатар, ҳамлаи Исроил ба хоки кишварашро “Ваҳшиёна” хонд ва хостори муҳокимаи Бенямин Нетаняҳу шуд. Вай нахуствазири Исроилро ба ин ҳамла муттаҳам карда, гуфт, бо ин дастур ӯ “ҳамагуна умед барои раҳоии асиронро аз айн бурда аст.”
Аз сӯйи дигар, нахуствазири Исроил рӯзи шанбе аз ҳамла ба қароргоҳи Ҳамос дар Доҳа дифоъ кард ва гуфт, аз байн бурдани раҳбарони Ҳамос, ки дар Қатар зиндагӣ мекунанд, монеаи асосӣ дар роҳи раҳоии гаравгонҳо ва поён додани ҷанг дар Ғаззаро аз байн мебарад.
Дар вокуниш ба ин мавқеъ, гурӯҳи исроилие, ки барои раҳоии гаравгонҳои Ғазза кор мекунад, эълом кард, ки Бинёмин Нетаняҳу бузургтарин монеа дар роҳи раҳоии гаравгонҳост.
Гурӯҳи "Ҳамос" дар баёнияе эълон кард, ки дар ин ҳамла 5 тан аз аъзои ин гурӯҳ, аз ҷумла, писари раҳбари ҳайати музокиракунандаи ин гурӯҳ Халил Ҳайя ва раиси дафтари ӯ, кушта шуданд. Аъзои ҳайати музокиракунандаи "Ҳамос" аз ин ҳамла ҷон ба саломат бурданд.
Қатар гуфт, ки яке аз нерӯҳои амниятии дохилиаш дар ин ҳамла кушта шудааст.
Баъди сӯхтани биноҳои ҳукумат дар Непал вазъ ором шудааст
Дар Непал, ки ошӯбу бетартибиҳои оммавӣ сабаби истеъфои ҳукумат шуданд, назму тартиботро дар пойтахти кишвар шаҳри Катманду, сарбозони артиш таҳти назорат гирифтаанд. Рӯзи 10-уми сентябр фурудгоҳи байналмилалии шаҳр дигарбора корашро аз сар гирифт.
Артиш аз мардуми норозӣ хост, назму тартибро риоят кунанд ва дар музокирот дар бораи ояндаи кишвар ширкат варзанд. Дар бораи ингуна музокирот аз ин пештар раиси ҷумҳури Непал низ суҳбат кард. Рӯзи чаҳоршанбе ҳеч гузорише дар бораи зӯровариву хушунат аз ин кишвари осиёӣ нарасид.
Дар чанд рӯзи гузашта, дар натиҷаи бархӯрди тазоҳургарон ва маъмурони интизомӣ дар Непал беш аз 25 нафар кушта ва 600 каси дигар захмӣ шуданд. Рӯзи 9-уми сентябр тазоҳургарон дар Катманду ба биноҳои ҳукумат юриш бурда, бисёре аз онҳоро оташ заданд, аз ҷумла хонаҳои вазирон ва узви ҳукумати Непалро. Баъзе аз мақомоти баландпояро ҳам латукӯб кардаанд.
Баъди ин ҳукумати Непал корашро қатъ кард ва нахуствазиру чанд вазири дигар аз мақомҳояшон истеъфо доданд. Бастани шабакаҳои иҷтимоӣ, аз ҷумла паёмрасонҳо сабаби тазоҳуроти олуда ба хушунат шуд, агарчӣ ҳукумат қарор дар бораи маҳдуд кардани дастрасӣ ба онҳоро беэътибор сохт. Аммо тазоҳургарон мегуянд, ки на танҳо қарори бастани шабакаҳои иҷтимоӣ, балки ришвахориву фасод дар Непал онҳоро норозӣ кардааст.
Дар ноҳияи Рӯдакӣ модареро бо се фарзандаш куштаанд
Дар деҳаи Дарёободи ноҳияи Рӯдакӣ ҷасади як зан бо се фарзандашро дар хонаашон пайдо кардаанд ва ин ҷиноят мардуми деҳаи оромро сахт тарсондааст.
Ҳодиса шоми ҷумъаи 5-уми сентябр рух додааст. Ба нақли ҳамсояҳо, ҷасади модару ду духтар ва як писарашро баъди ду рӯзи марг пайдо кардаанд. Мақомоти расмӣ то ҳол ҳодисаро шарҳ надодаанд. Яке аз ҳамсояҳои хонавода бо шарти зикр нашудани номаш ба Радиои Озодӣ гуфт, ҳамсояҳо бори охир занро бегоҳии рӯзи ҷумъа, 5-уми сентябр дидаанд.
“Номи зан Шаҳло аст. Духтаронаш Ҳабиба ва Ҳамида ва писараш Шараф ном доштанд. Писар синфи 6 ва духтаронаш дар синфи 9 ва 10 таҳсил мекарданд. Шавҳари зан дар муҳоҷирати кор буд, баъди ҳодиса ба Тоҷикистон омад. Шаби ҳодиса зан бо ҳамин се фарзандаш дар хона будаанд.
Шавҳараш аз Русия ба ҳамсояҳо занг зада гуфтааст, ки ба хонаи онҳо раванд, чун телефонашон кор накарда истодааст, як бор бинед ку дар куҷо бошанд. Вақте зани ҳамсоя бо як ҳамсояи дигар вориди хона мешаванд, мебинанд ҳама ҷо кофтагӣ, бӯйи ғализ мебарояд. Як ҷойгаҳро мебинанд, ки писараш даҳонаш бо “скотч” печонидагӣ, мурдааст. Доду фарёд карда, мебароянд. Баъд милиса омада, дар хона ҷасадҳоро мебинанд" - афзуд ҳамсуҳбати мо.
Маълум нест касе боздошт шудааст ё не. Марги зан ҳамроҳ бо се фарзандашро ду сокини дигари деҳаи Дарёобод ҳам тасдиқ карданд. "Ҳамсояҳо тарсидаанд. Дар мактаб ҳам миёни хонандагону омӯзгорон дар бораи ҳамин ҳодиса суҳбат мекунанд", гуфт мусоҳиби дигари мо.
СҶТ: Зарардидагони зилзила дар Афғонистон дучори мушкили равонӣ шудаанд
Пас аз зилзилаи вайронгари охир дар шарқи Афғонистон, шуморе аз сокинони вилояти Кунар, аз ҷумла кӯдакону занон дар ҳолати бади равонӣ қарор дошта, тарс аз такрори заминларза ва пасларзаҳо вазъи онҳоро душвор кардааст.
Абдулвоҳиди даҳсола яке аз даҳҳо кӯдаконест, ки дар зилзилаи ноҳияи Чукии вилояти Кунар зарар дидааст. Абдулвоҳид рӯзи 7-уми сентябр, дар суҳбат бо бахши дарии Радиои Озодӣ гуфт, шабро бо тарсу ҳарос рӯз мекунанд.
“Хобҳои бад мебинам. Хобҳое, ки зилзила аст ва ҳама мо бо тарс ба ҳар тараф фирор мекунем, ман мехоҳам мо аз инҷо ба ҷои дигар интиқол дода шавем, дилам намехоҳад инҷо бошем. Бисёр метарсам ва ҳолати бисёр душвор аст.”
Мирвайси 12-сола, сокини дигари дараи Девагули ноҳияи Чукӣ ва хонандаи синфи шашуми мактаб мегӯяд, ки шабҳо хоби ором надоранд. Вай афзуд: “Ман тарс дорам, ки боз ҳам зилзила нашавад. Дар хоб меби нам, ки зилзила мешавад ва ба ҳар тараф меравам, дилам меларзад, мехоҳам мактабу мадраса, хонаҳои мо ва ҳама чиз дубора обод ва фаъол шавад. Мехоҳам дар деҳа монам.”
Бархе аз занони осебдида аз зилзила дар вилояти Кунар, ки нахостанд ному садояшон дар гузориш нашр шавад низ ба Радиои Озодӣ гуфтанд, ки дар вазъияти бади равонӣ қарор доранд ва аз кучактарин ларзиш метарсанду кӯдаконашон беист гиря мекунанд.
Бино ба иттилои Созмони ҷаҳонии Тандурустӣ , афроде, ки заминларзаи охир дар шарқи Афғонистонро мушоҳида кардаанд, ба мушкили шадиди равонӣ рӯбарӯ ҳастанд.
Ин созмон бо нашри гузорише дар бораи зилзила дар шарқи Афғонистон, рӯзи якшанбеи 7-уми сентябр ҳушдор додааст, ки хадамоти маслиҳати равонӣ ва ҳимоятҳои иҷтимоӣ дар минтақаҳои зилзилазада ҳануз маҳдуд аст. Муаллифони гузориш ба он таъкид кардаанд, ки барои ҷилавгирӣ аз паёмадҳои ҷиддӣ, зарур аст, ки хадамоти равонӣ – иҷтимоӣ беҳтар роҳандозӣ шавад.
Созмони Ҷаҳонии тандурустӣ, хабар додааст, ки барои расидагӣ ба ин вазъият ду тими сайёри сиҳатии равонӣ ва иҷтимоӣро ба ноҳияи Нургули вилояти Кунар ва шифохонаи вилоятии Нангарҳор фиристодаанд.
Ин тимҳо афроди ниёзмандро ба марказҳои беҳдоштӣ интиқол дода, ба муолиҷаи вижа фаро гирифтаанд. То кунун ба Созмон беш аз 400 мавриди машварат ва муроҷиат сабт шудааст.
Қорӣ Азизурраҳмон, фаъол иҷтимоӣ, ки ҳамроҳи хонаводааш барои ҳимоят аз осебдидагони зилзила аз Кобул ба Кунар рафтааст, мегӯяд, ки афроди зиёд, махсусан кӯдакону занон пас аз заминларза дар ҳолати бади равонӣ қарор дошта, бархе баланд дод мезананду гиря мекунанд. Аксарият дучори заъфи хотира шудаанд.
“Инҷо онқадар мушкили равонӣ зиёд шудааст, вақте бо мардум суҳбат мекунем номи писарони худро фаромуш кардаанд, писарон номи падарони худро аз ёд бурдаанд. Модар номи кӯдак ва кӯдак номи модари худро фаромуш кардааст. Вақте номи худашонро мепурсем ду то се дақиқа фикр карда, баъд ҷавоб медиҳанд.”
Созмони Ҷаҳонии Беҳдошт дар гузориши ахири худ гуфтааст, ки бар асари заминларзаҳо дар шарқи Афғонистон 84 ҳазор нафар осеб дидаанд.
Таҳлилҳои аввалияи СҶТ маълум кард, ки дастикам 16 муассисаи беҳдоштӣ дар чаҳор вилояти шарқи Афғонистон бар асари заминларза осеб дида, беш аз 2200 захмӣ дар даҳ муассисаи беҳдоштӣ бистарӣ шудаанд. Аксари онҳо дар бемористони марказии вилояти Нангарҳор буданд. Аз ин шумора 58 дарсадро мардон, 42 дарсадро занону духтарон ва беш аз 10 дарсадро кӯдакони то панҷсола ташкил медиҳанд.
Заминларзаи нобаҳангоми шаби 31-уми август, ба шиддати шаш дараҷа, дар вилоятҳои шарқии Афғонистон, ба хусус Кунар, талафоти сангин ва хисороти бузурги ҷониву молӣ дар пай дошт.
Ҳукумати “Толибон” гуфт, ки дар ин ҳодиса дар вилояти Кунар беш аз 2200 нафар кушта, беш аз 3600 нафари дигар захмӣ шудаанд ва беш аз 6700 хона вайрон шудаанд.
Ҳамлаи сагҳои дайду ба 17 нафар дар Ҳисор
Дар пайи ҳамлаи сагҳои оворагард дар деҳаи Гулхании шаҳри Ҳисор 17 нафар осеб дида, ба беморхона интиқол ёфтаанд.
Ҳодиса бегоҳи рӯзи ҷумъа, 5-уми сентябр рух додааст. Илҳом Қараев, сардухтури беморхонаи ин шаҳр дар як тамоси телефонӣ ба Радиои Озодӣ ҳодисаро тасдиқ кард ва гуфт, аксарият аз рӯй ва даст зарар дидаанд. Беморон ҳама дар як рӯз муроҷиат кардаанд.
Ҳоло ба гуфтаи вай 6 нафар, ки аксарият наврасонанд дар беморхона бистариянд ва ба дигарон пас аз гирифтани эм ё ваксина ҷавоб дода шудаанд. Қараев афзуд, вазъи саломатии афроди аз ҳамлаи сагҳо зарардида вазнин нест.
"Рӯзи чоршанбе ҳамаашро як бори дигар аз назар мегузаронем ва ҷавоб медиҳанд. Ҳамааш Иммуноглобулин (муқовимати дарунӣ) гирифтаанд, чун ин кӯдакҳо аз рӯй зарар дидаанд. Аз рӯйи тақвим чӣ тавре, ки муайян шудааст, боқимондаи дорӯро ҳам мегузаронем."
Дар аксҳое, ки корбарон фиристодаанд, чанд кӯдаке дида мешавад, ки бо сару рӯйи хуншору баста дар беморхона қарор доранд.
Ҳодисаи ҳамлаи сагҳои оворагард ба одамон дар минтақаҳои Тоҷикистон ҳар сари чанд вақт мушоҳида мешавад. Чанд сол инҷониб дар кишвар безараргардонӣ ё куштори сагҳои дайду идома дорад.
Масъулон эътироф мекунанд, ки ҷой ва имконияти нигоҳубини сагҳои оворагардро надоранд ва бештар ин ҷонварон қатл мешаванд. Дар гузашта ин амал боиси интиқоди ҷонвардӯстдорон шуда буд. Онҳо гуфта буданд, ки мақомот ба ҷойи нигаҳбонии сагҳо дар макони махсус онҳоро бераҳмона нобуд мекунанд.
Ҷасадҳои ду сарбози тоҷикро ҳанӯз ҳам аз рӯдхонаи Вахш пайдо накардаанд
Бо гузашти беш аз як моҳ ҷасади ду сарбози Вазорати дифои Тоҷикистонро, ки дар рӯдхонаи Вахш ғарқ шуданд, ҳанӯз пайдо накардаанд.
Як мақоми ҳукумати вилояти Хатлон рӯзи 4-уми сентябр дар сӯҳбат бо Радиои Озодӣ гуфт, ки наҷотбахшони Кумитаи ҳолатҳои фавқулода ҳамчунон ба ҷустуҷӯи ҷасадҳо идома медиҳанд.
Сарбозони тоҷик рӯзи 30-уми июл дар наздикии воҳиди низомиашон дар ноҳияи Кушониён дар наздикии размоишгоҳи “Ҳарбмайдон” ғарқ шудаанд. Ба гуфтаи манбаъҳо, сарбозон ҳангоми ширкат дар машқҳои низомӣ дар рӯдхона ғарқ шуданд, вале сабаби аслии ҳодиса то ҳол равшан нест. Вазорати дифоъ то кунун ҳеч шарҳу хабаре дар ин бора надодааст.
Яке аз манбаъҳои Радиои Озодӣ дар Идораи ҳолатҳои фавқулодаи Хатлон гуфт, ки сарбозони ғарқшуда Солеҳ Худойбердиеви 19-сола ва Равшан Муҳаммадии 20-сола будаанд ва амалиёти ҷустуҷӯ то соҳилҳои дарёи Вахш дар ҳудуди ноҳияи Қубодиён анҷом шудааст.
Ба гуфтаи манбаъ, баланд будани сатҳи об ва талотуми зиёд дар Вахш монеи ҷустуҷӯ ва пайдо кардани ҷасадҳо шудааст. Бар асоси омори расмӣ, танҳо ҳамин дар кӯлу рӯдхонаҳои вилояти Хатлон беш аз 50 нафар ғарқ шудаанд, вале бори аввал аст, ки аз ҳалокати якбораи ду сарбози номуроди тоҷик дар Вахш гузориш мешавад. Аксари қурбониёни имсола дар рӯзҳои гарми тоқатфарсои тобистонӣ ва ҳангоми шиноварӣ ҷон додаанд.
Теъдоди қурбониёни заминларзаи Афғонистон аз 1000 нафар гузашт
Вазорати корҳои хориҷии Тоҷикистон ба пайвандону наздикони осебдидагони заминларзаи Афғонистон изҳори ҳамдардӣ кард. Вазорат рӯзи 1-уми сентябр дар як паёме гуфтааст, ки кушта ва захмӣ шудани ҳазорон нафар “боиси андӯҳи амиқи мардуми Тоҷикистон шудааст”.
Шаби 31-уми август дар заминларзаи харобиовар даҳҳо деҳа дар шарқи Афғонистон валангор шуд. Бештари минтақаҳои зарадида кӯҳистоннӣ ва дурдаст ҳастанд ва захмиёне, ки аҳволашон бад аст, бо чархбол ба беморхонаҳо интиқол меёбанд. Ҳукумати Толибон аз ҷомеаи ҷаҳонӣ кумак хостааст. Се кишвари ҳамсояи Афғонистон, мисли Покистон, Ҳиндустон ва Эрон эълони омодагӣ барои кӯмак кардаанд.
Қурбониёни заминларза беш аз ҳазор нафар шумориш шуда ва теъдоди захмиён аз се ҳазор бештар. Ҳисобе, ки ниҳоӣ нест ва ҳанӯз ҷустуҷӯи зери харобаҳо идома дорад. Садҳо манзили зист дар вилоятҳои Кунар, Нангарҳор, Лағмон ва Нуристон хароб шуданд ва ҳазорон нафар шаби гузаштаро дар берун рӯз карданд.
Зардон, сокини вилояти Кунар: “Нисфишабии якшанбе заминларзаи сахт деҳаи моро хароб кард. Мо 200 захмиро аз харобаҳо берун кардем ва онҳоро бо чархбол ба Ҷалолобод бурданд. Шояд 300-350 нафари дигар зери харобаҳо бошанд. Ҳама хонаҳо ба хок яксон шуданд."
Нерӯи заминларза дар марз бо Покистон 6 дараҷаи ҷадвали Рихтер ҳисоб шудааст. Ҳукумати Толибон садҳо низомӣ ва сокинони мулкиро ба кумак ҷалб кардааст. Заминларза бештар минтақаҳоеро хароб кардааст, ки дар дурдаст қарор доранд. Мақомоти Толибон мегӯянд, барои расидан ба баъзе минтақаҳо лозим шуд, ки тими наҷотдиҳандагон шаш соат пиёда роҳ раванд. Аз ин рӯ, захмиёниро бо чархболҳо ба беморхонаҳо мебаранд.
Яке аз сокинони деҳаи Дерхон мегӯяд: “Вазъият хеле баду хатарнок аст. Ҳанӯз ҳам замин кам-кам меларзад. Худо нигаҳ дорад, вале мардум дар тарсу ҳарос ҳастанд. Ҳама шаби худро дар берун рӯз карданд. Одамоне ҳам ки хонаҳояшон нимвайроан аст, метарсанд, ки баргарданд.”
Намояндагони Созмони Милали Муттаҳид дар Афғонистон гуфтаанд, ки бо сабаби боронҳои сахт эҳтимоли лағзиши замин ва сангрез вуҷуд дорад. Ҳазорон ҷасади ҳайвоноти ҳалокшуда низ хатари олудшавии сарчашмаҳои обро низ зиёд кардааст. Аз соли 2021, пас аз ба қудрат расидани Толибон ин сеюмин заминларзаи харобиовар дар Афғонистон аст.
Заминларзаи вайронгар 600 нафарро дар Афғонистон куштааст
Мақомоти Толибон дар Афғонистон мегӯянд, ки дар натиҷаи заминларзаи вайронгар дар рӯзи душанбе бештар аз 600 нафар кушта ва 1500 каси дигар захмӣ шудаанд.
Айни замон чархболҳо бо маъмурони наҷот ба деҳоти дурдаст дар шарқи Афғонистон мераванд, то бозмондагонро аз зери вайронаҳои хонаҳои гилин берун кунанд. Ин фалокат аҳволи Толибони ҳоким бар Афғонистон ва мардуми онро бадтар мекунад, ки бо бӯҳрони башарӣ даст ба гиребон ҳастанд, кӯмакҳои байналмилалӣ ҳам камтар мегиранд ва паноҳҷӯёни зиёдашро ҳам аз ҳамсоякишварҳо хориҷ мекунанд.
Вазорати умури дохилии Толибон дар як баёнияи расмӣ гуфтааст, дар ин зилзилаи 6 дараҷаӣ 1500 нафар маҷруҳ шудаанд ва талафот аз он ба 622 нафар расидааст. Радиои давлатии Афғонистон гуфт, ки теъдоди қурбониён 500 нафар аст. Мақомот дар Кобул гуфтаанд, ки маъмурони имдодӣ ба деҳоти дурдасти осебдида мешитобанд, ки дар гузашта ҳам шоҳиди заминларза ва обхезиҳои вайронгар шудаанд.
Шарофат Замон, сухангӯи вазорати умури дохилии Толибон гуфтааст, ки “Омори чанде аз шифохонаҳои нишон медиҳад, ки бештар аз 400 нафар захмӣ ва даҳҳо каси дигар ҳалок шудаанд.”
Хабаргузории “Бохтар”-и таҳти назорати Толибон ба нақл аз мақомот навиштааст, ки се русто дар вилояти Кунар ба тамом аз байн рафтаанд. Наҷибулло Ҳаниф, раиси вилоят гуфтааст, 250 кас куштаву 500 нафар захмӣ шудаанд, вале мумкин аст, шумораи осебдидагон ва ҷонбохтагон афзоиш ёбад. Дар гузоришҳои аввалия гуфта мешуд, фақат дар як деҳа 30 нафар ҳалок шудаанд ва садҳо тани дигарро аз онҷо барои муолиҷа ба шифохона бурдаанд. Заминларза бо нерӯи 6 балл ба вуқӯъ пайвастааст ва дар қаламрави Покистон ҳам эҳсос шудааст. Бар асоси иттилои идораи зилзиласанҷии Амрико заминларза дар умқи 10 километрии замин ва дар наздикии шаҳри Ҷалолобод наздик ба марзи Покистон ба амал омадааст.
Афғонистон як кишвари осебпазир дар баробари заминларза ва воқеъ дар қаторкӯҳҳои Ҳиндукуш аст, ки тахтаҳои тектоникии Ҳинду Авруосиё зери он ба ҳам мехӯранд.
Соли гузашта дар пайи силсилаи заминларзаҳо бештар аз 1000 нафар кушта шудаанд, ки нишондиҳандаи осебпазирии яке аз қашшоқтарин кишварҳои ҷаҳон дар баробари фалокатҳои табииро нишон медиҳад.
"Беҳуш ва дар шуъбаи эҳёгарӣ аст." Ба як ҷавони тоҷик дар Амрико чӣ рӯй дод?
Дар занозании гурӯҳӣ дар ноҳияи Монтгомерии аёлати Пенсилвания дар Амрико, ки сабаб ва иштирокдоронаш расман эълон нашудааст, як ҷавон аз Тоҷикистон осеби сахт бардоштааст. Муҳаммадазиз Раҳматзодаи 18-сола ҳоло дар шуъбаи эҳёгарии Шифохонаи кӯдакони шаҳри Филаделфия бистарист.
Занозанӣ, ба иттилои пулиси Монтгомери, шаби 14-уми август дар назди фурӯшгоҳи WAWA рӯй дод. Бо ҳозир шудани пулис иштирокдорони занозанӣ фирор карда, танҳо Муҳаммадазиз дар ҳолати беҳушӣ дар маҳалли воқеа мондааст. Ӯро сипас бо чархбол ба шифохона расонданд.
Набиҷон Раҳматзода, падари Муҳаммадазиз, рӯзи 20-уми август дар суҳбат бо Радиои Озодӣ гуфт, фарзандаш шаш рӯз боз беҳуш аст ва дар бахши эҳёгарист.
Вай гуфт: “Вазъияти писарам вазнин аст. Табибон бояд майнаи ӯро ташхис кунанд. Онҳо мегӯянд, ки ҳуҷайраҳои майнаи сар қариб пурра мурдааст. Тавассути хун бояд як моеъро ворид карда, майнаи сарро санҷанд, ки то чӣ ҳад зинда аст ва умеде барои монданаш ҳаст ё не.”
Ба гуфтаи падараш, Муҳаммадазиз ҳанӯз хонандаи мактаб аст ва рӯзи 16-уми сентябр ба синни 19 мерасад. “Ҳоло табибон ҳар чизе аз дасташон меояд, карда истодаанд. Умедам танҳо ба мӯъҷиза аз сӯи Худованд аст,” -- афзуд Раҳматзода.
Дар бораи чӣ гуна сурат гирифтани занозанӣ хонаводаи Муҳаммадазиз маълумоти пурра надоранд ва ҳоло таҳқиқи қазия аз сӯи нозирон идома дорад.
“Полиси шаҳраки Морленди Поён ҳодисаро фаъолона тафтиш дорад. Агар касе шоҳиди ҳодиса бошад ё дар бораи он маълумот дорад, занг занад,” – гуфта шудааст дар эъломияи полис.
Чанде аз фаъолони тоҷики муқими Амрико, аз ҷумла Беҳзод Исомиддинов, мудири созмони “Тоҷикони Амрико” дар Филаделфия ва Парвиз Ниёзов, блогери тоҷик аз Ню-Йорк, барои аёдат ба шифохона рафтаанд. Онҳо дар ин бора дар саҳифаҳои худ дар шабакаҳои иҷтимоӣ хабар доданд.
Парвиз Ниёзов дар як навор дар шабакаҳои иҷтимоӣ вазъро ин гуна шарҳ додааст: "Як нуқтаи ҷамъшавии наврасону ҷавонони то 21-сола будааст. Намояндагони ҳамаи миллатҳо. Дар ҳамон ҷо ҷамъ мешаванд. Ногоҳ гапашон мегурезад. Вақте мефаҳманд, ки полис омада истодааст, мегурезанд ва ғайриинтизор ҳамин бачаро мезананд." Ин фарзия расман эълон нашудааст. Ниёзов ҳам гуфтааст, навори ҳодиса ҳаст ва пулис онро таҳқиқ дорад.
Дар Иёлоти Муттаҳидаи Амрико, бино бар маълумоти гуногун, аз 10 то 16 ҳазор зодаи Тоҷикистон зиндагӣ карда, асосан дар бахши тиҷорату нақлиёт ва хидматрасонӣ фаъоланд. Набиҷон Раҳматзода ва аъзои оилааш аз ҷумлаи онҳо ҳастанд, ки тақрибан ду сол пеш ба Амрико рафта, дар канори шаҳри Филаделфия зиндагӣ доранд.
13 сол зиндон. Тафсилоти ҳукми як афсари баландпояи милиса
Радиои Озодӣ баъзе ҷузъиёти парвандаи афсари милисаеро пайдо кард, ки барои шиканҷаи як гумонбар ба 13 сол зиндон маҳкум шудааст. Музаффар Маҳмудзода, муовини сардори яке аз шуъбаҳои корҳои дохилии ноҳияи Шоҳмансур дар Душанбе буд ва баҳсаш дар чанд додгоҳ идома дошт.
Намояндагони Додгоҳи олии Тоҷикистон дар оғози моҳи август эълон карданд, ки як афсари милисаро барои шиканҷа аз озодӣ маҳрум намуданд, вале бо вуҷуди пофишории хабарнигорон тафсилот надоданд.
Сипас, рӯзи 7-уми август, вазири корҳои дохилӣ Рамазон Раҳимзода аз зиндонӣ шудани як корманди ин ниҳод барои шиканҷа ибрози бехабарӣ кард. Мақомот дар бораи ин ҳукм баёния ё изҳороте надоданд.
Чунин роздорӣ сабаб шуд, ки Радиои Озодӣ ба ҷустуҷӯйи воқеа равад. Тибқи иттилои дарёфтии Радиои Озодӣ аз 19-уми август, Музаффар Маҳмудзода дар тирамоҳи соли 2024 бар асоси шикояти наздикони як гумонбаршуда дастгир шудааст.
Ин афсари милиса аввал ба шиканҷа муттаҳам шуда, сипас ҳангоми мурофиа дар Додгоҳи ноҳияи Синои пойтахт иттиҳоми ӯ ба фаротар рафтан аз ҳадди ваколати хидматӣ тағйир ёфтааст.
Додгоҳи ноҳияи Сино моҳи январи имсол Музаффар Маҳмудзодаро ба панҷ сол зиндон маҳкум карда, амр додааст, ки ӯ 112 ҳазор сомонӣ ҷарима ё ҷуброн низ пардозад.
Таҳмина Муъминзода, сардори яке аз раёсатҳои Додситонии кулли Тоҷикистон, рӯзи 8-уми август дар нишасти хабарӣ гуфт, бинобар сабук будани ҷазои таъиншуда додситон эътироз кард ва “ҳукм бекор шуд”.
Ба иттилои дарёфтии Радиои Озодӣ, баъди шикояти додситонӣ парвандаро барои баррасии дигарбора ба Додгоҳи ноҳияи Фирдавсии Душанбе фиристодаанд. Дар Додгоҳи ноҳияи Фирдавсӣ рӯзи 19-уми август ба Радиои Озодӣ гуфтанд, ки Музаффар Маҳмудзодаро дар охири моҳи марти имсол бо гуноҳи шиканҷа ва боздошти худсарона ба 13 сол зиндон маҳкум карданд.
Шикояти вакилони дифои Маҳмудзода аз ҳукм бетағйир гузошта шудааст. Талошҳои мо барои гирифтани шарҳи вакилон ва наздикони ӯ то ин дам бенатиҷа буд.
Мурофиаи афсари баландпояи милиса паси дарҳои баста гузаштааст ва барои ҳамин намояндагони се додгоҳ дар Душанбе аз ироаи ҷузъиёти парванда худдорӣ карданд. Шахсияти нафаре, ки муовини пешини сардори Шуъбаи корҳои дохилии ноҳияи Шоҳмансур барои шиканҷаи ӯ зиндонӣ шудааст, низ то ин лаҳза маълум нест.
Наворро дар инҷо бинед:
Тоҷикистон ба сабаби бадрафторӣ ва шиканҷаи гумонбарон дар боздоштгоҳҳо ҳамеша танқид мешавад. Эътилофи зидди шиканҷа дар Тоҷикистон гузориш додааст, ки дар шаш моҳи аввали имсол аз эҳтимоли шиканҷа ва бадрафторӣ дар мақомоти қудратӣ 7 шикоят гирифт.
Ба гузориши Эътилоф, ба мисли солҳои гузашта аксари шикоятҳо аз шиканҷа аз дасти кормандони сохторҳои Вазорати корҳои дохилӣ аст. Созмони Милал дар гузашта гуфтааст, дар Тоҷикистон маъмурони интизомӣ барои гирифтани эътирофи гуноҳ боздоштшудагонро шиканҷа мекунанд ва додгоҳҳо низ ин эътирофро ба инобат мегиранд, ки мухолиф ба қонунҳои худи кишвар ва аҳдномаҳои байнулмилалист.
Мақомоти Тоҷикистон онро "худиқрорӣ" меноманд, ҳарчанд марги мармузи баъзе аз боздоштшудаҳо гуфтаҳои мақомотро зери суол мебарад.
"Гуфт, агар ҷойи пулро нагӯӣ, мекушам"
Додситони вилояти Суғд дар охири ҳафтаи гузашта ба рӯзноманигорон гуфт, ки бо гузашти якуним моҳ аз марги ду сокини ноҳияи Ҷаббор Расулов рози ҷиноят ҳанӯз маълум нашудааст.
Яке аз онҳо, Зариф Абураҳимов, дар моҳи июн кушта ва дигаре, Ёқуб Иброҳимов, дар аввали моҳи июл дар шароити мармуз ҷон бохт. Пайвандон талаб доранд, ки сабабгорони ҳодиса зудтар ошкор ва ба ҷавобгарӣ кашида шаванд.
“Гурӯҳи тафтишотӣ созмон дода шудааст. Роҳбараш муовини додситони вилоят аст. Кормандони Додситонӣ аз шаҳру ноҳияҳои дигар, кормандони Раёсати умури дохилӣ дар Суғд ва ноҳияи Ҷаббор Расулов барои ин кор сафарбар шудаанд,” – шарҳ дод додситони вилояти Суғд Фурқат Хоҷазода.
Зариф Абдураҳимови 38-сола шаби 27-уми июн дар назди фарзандонаш аз ҷониби ду шахси ниқобпӯш кушта шудааст. Ҳамсараш Гулсанам Абдураҳимова гуфт, он шаб дар бемористон буд, аммо ба нақли фарзандонаш қотилон аввал пул талаб кардаанд.
"Гуфт, агар ҷойи пулро нагӯӣ, мекушам. Вақте ҳеч чиз нагуфтем, ба дасту пой ва чашмонамон скотч кард. Як илоҷ карда, скотчро канда, аз ҷой хестам, ки ба тарафи саҳро гурехтанд. Сипас доду вой карда, ҳамсояҳоро ҷеғ задам ва дидам, ки падарам дар пеши чашмам ҷон доданд," – нақл кард Озодбек Абдураҳимов, писари Зариф Абдураҳимов.
Додситони вилояти Суғд низ бар ин аст, ки ҳадаф ғоратгарӣ будааст, вале Фурқат Хоҷазода аз додани маълумоти бештар худдорӣ кард, чун ба гуфтааш “сирри тафтишот аст” ва “шахсони ҷинояткору ҷиноятпеша бояд зудтар ёфта шаванд.”
Гузориши видеоӣ дар инҷост:
Чанд сокини деҳаи Саричашма дар ноҳияи Ҷаббор Расулов гуфтанд, ки то ин дам мақомоти тафтишотӣ бисёриҳоро ба бозпурсӣ даъват ва бархеро дастгир кардаанд.
Дар рӯзҳои аввали ҳодиса яке аз пайвандони Зариф Абдураҳимов, Ёқуб Иброҳимови 50-соларо ҳам масъулони мақомот ба милисахонаву додситонӣ бурда, дар бораи ин мавзуъ пурсидаанд. Баъди як ҳафтаи қатли Зариф Абдураҳимов, ӯ низ 5-уми июл ба таври мармуз ҷон бохтааст. Пайвандонаш гуфтанд, ки худкушӣ кард ва раиси ноҳия мегӯяд, тафтиши марги ӯ низ идома дорад.
Гулсанам Абдураҳимова, ҳамсари Зариф Абдураҳимов, мегӯяд, "мехоҳам одаме, ки ҳамин корро кардааст, ҳарчи зудтар пайдо шавад. Ҳама ҷо тинҷӣ аст ва мардум пайи кори худаш аст. Фақат мехоҳем, ки ҷиноят тезтар ошкор шавад."
Кушторҳои мармуз дар шаҳри Конибодом дар ду соли охир дар минтақаи Суғд мардумро ба ташвиш оварда буд. Мақомот охири соли гузашта чандин нафарро дар куштори беш аз 20 сокини он шаҳр ба солҳои тӯлонӣ маҳкум ба зиндон карданд ва ду шаҳрванди Қирғизистонро дар пайгарди расмӣ қарор додаанд. Вале ин ҳолатҳои нав ва ёфт нашудани омилони он дар минтақаи дигари шимоли Тоҷикистон ташвишҳои мардумро дучанд кардааст.
Гуфтугӯ