Пайвандҳои дастрасӣ

Хабари нав

Хабарҳо

Трамп мутмаин аст, ки Эрон “базудӣ” хостори музокира хоҳад шуд

Президенти ИМА Доналд Трамп гуфт, ки бовар дорад базудӣ Теҳрон дар ҷустуҷӯи роҳи барпо кардани музокира бо Вашингтон мешавад. Трамп инчунин тахминзаниҳои матбуотро рад кард, ки гуфтааст, миёни президент ва маъмурияташ дар мавзӯи Эрон ихтилофи назар вуҷуд дорад. Трамп дар саҳифаи худ дар Твиттер рӯзи 15 май навишт, “мутмаин ҳастам, ки Эрон базудӣ хостори барпо кардани музокира мешавад”. Ӯ аз ин беш чизе нагуфт.

Ин изҳороти ӯ дар паи он нашр шуд, ки рӯзи 9 май Трамп эҳтимоли сар задани ихтилофҳои низомӣ бо Эронро сарфи назар накард. Вале ӯ гуфт: “Ман мехоҳам бубинам, ки онҳо ба ман занг мезананд”.

Мақомоти эронӣ ҳамон замон вокуниш карда, ҳама гуна музокира бо Вашингтонро рад карданд.

Таниш дар равобити ИМА ва Эрон баъди моҳи маи соли 2018 аз созиши ҳастаӣ бо Эрон берун шудани Вашингтон афзоиш ёфт. Аз тирамоҳи соли гузашта таҳримҳои иқтисодӣ болои Эрон, ки аз соли 2015 бекор шуда буд, дубора ҷорӣ шуд. ИМА Эронро дар фаъолиятҳои харобкорона дар Ховари Миёна айбдор мекунад, вале Эрон ин иттиҳомотро рад карда мегӯяд, ки фаъолияти барномаи ҳастаиаш ҳадафҳои сулҳомез дорад.

Ҳамаи хабарҳои имрӯзро дар инҷо бихонед

Ҷеенбеков дар Ҷашни Ғалаба дар Маскав ширкат мекунад

Президентҳои Қирғизистон ва Русия. Акс аз бойгонӣ.

Президенти Қирғизистон Сооронбой Ҷеенбеков дар ҷашнҳои бахшида ба 75-солагии пирӯзӣ дар Ҷанги Дувуми Ҷаҳонӣ дар шаҳри Маскави Русия ширкат мекунад. Дар ин бора Толгонай Стамалиева, котиби матбуотии раиси ҷумҳури Қирғизистон хабар дод.

Пештар аз ин расонаҳои Русия ҳам навиштанд, ки Ҷеенбеков дар Ҷашни Ғалаба ширкат хоҳад кард.

Владимир Путин, президенти Русия эълом кард, ки Ҷашни Ғалаба 24 июн таҷлил шавад. Вай ҳамзамон ба зердастонаш дастур дод, ки омодагӣ бинанд. Ҷашни Ғалаба ҳамасола 9 май таҷлил мешуд, аммо густариши коронавирус соли ҷорӣ боиси таъхири таҷлили ҷашн шуд.

Дар Қирғизистон ва аксари кишварҳои пешини шӯравӣ чорабиниҳои оммавии бахшида ба 9 май соли ҷорӣ баргузор нашуданд.

Фавти чаҳор нафар дар як корхона дар Қазоқистон

Як корхона дар Қазоқистон. Акс аз бойгонӣ.

Чаҳор коргар дар корхонае дар вилояти Оқтеппаи Қазоқистон фавтида, ду тани дигар бистарӣ шудаанд. Дар ин бора аз раёсати назорат дар соҳаи меҳнат ва идораи ҳифзи сиҳатии вилояти Оқтеппа хабар доданд.

Ҳодисае, ки боиси марг ва бистарии коргарон шуд, рӯзи 28 май рух дод. Мақомот гуфтанд, ҳангоми поккории зарфи партовҳои кимиёӣ як коргар ҷароҳат бардошт ва панҷ тан аз ҳамкорони вай дохили зарф шуда, талоши наҷоти маҷруҳро карданд. Дар натиҷа ҳамаи ин коргарон аз ҳарорати моддаҳои кимиёӣ ҷароҳат бардоштанд, ки чаҳор танашон фавтида, ду тани дигар бистарӣ шуданд.

Мақомоти вилояти Оқтеппа гуфтанд, дар пайи ин ҳодиса парвандаи ҷиноӣ боз шуда, таҳқиқ идома дорад.

Корхонаи моддаҳои кимиёӣ дар канораи Оқтеппа ҷойгир аст, ки маҳсулоти кимиёӣ истеҳсол мекунад. Ин маҳсулот дар саноати ҳавопаймоӣ, нафтӣ ва дору истифода мешавад.

Беназмиҳои оммавӣ дар Миннеаполис баъди фавти як сиёҳпӯст

Беназмиҳо дар Миннеаполис. 27 май, 2020.

Дар шаҳри Миннеаполиси аёлати Миннесоти Амрико рӯзи севум аст, ки беназмиҳо идома доранд. Мардум баъди он даст ба беназмӣ заданд, ки сокини сиёҳпӯсти шаҳр Ҷорҷ Флойд пас аз боздошт аз сӯи пулис ба ҳалокат расид.

Флойди 46-сола пас аз боздошт зуд ба беморхона интиқол ёфта, 25 май ҷон бохт. Видеое, ки дар шабакаҳои иҷтимоӣ нашр шуд, нишон медиҳад Флойд бо дастони баста дар замин хобида, маъмурони сафедпӯсти пулис гардани ӯро зер кардаанд. Вай чанд бор мегӯяд, ки нафаскашияш мушкил шудааст ва ӯро раҳо кунанд. Ин сокини Миннеаполис ҳангоми боздошт мусаллаҳ набуд ва сабаби дастгиршуданашро сохтакории ҳуҷҷат меноманд.

Баъди оғози тафтиши ҳодиса аз сӯи Бюрои федеролии тафтишот чаҳор корманди пулис, ки дар боздошти Флойд даст доштанд, аз мақом барканор шуданд. Шаҳрдори Миннеаполис Ҷейкоб Фрей талаб кард, ки маъмурон ба ҷавобгарӣ кашида шаванд. Муовини пешини президент ва номзади эҳтимолӣ ба мақоми президентии ИМА Ҷо Байден даъват кард, ки пулисҳои барканоршуда барои "амали нафратоварашон" ба ҷавобгарӣ кашида шаванд.

Бетартибиҳои оммавӣ шоми 26 май оғоз шуда, то ҳол идома доранд. Эътирозгарон дар назди бинои пулис ҷамъ шуда, бархе аз онҳо ба самти бино санг ҳаво доданд. Кормандони пулис дар посух аз гази ашковар истифода карданд. Дар бораи харобкориҳо, ғорат ва оташ задани фурӯшгоҳҳо низ хабар дода мешавад.

Вазири адлияи ИМА рӯзи панҷшанбе гуфт, марги Ҷорҷ Флойд-ро таҳқиқ мекунанд.

Вазорати тандурустӣ гуфт, 139 нафари дигар бемор шуданд, талафот "нест"

Мақомоти Вазорати тандурустӣ гуфтанд, ки дар як шабонарӯзи гузашта 139 мавриди собитшудаи бемории COVID-19 – ро сабт кардаанд. Дар баёнияи вазорат аз рӯзи 28-уми май омадааст, ки то имрӯз теъдоди гирифторон ба 3563 нафар расид, вале талафот бетағйир мондааст.

Ба қавли мақомот, коронавируси нав то кунун сабаби марги 47 нафар дар Тоҷикистон шудааст ва 1674 кас шифо ёфтаанд. Мутахассисон ва теъдоди зиёде аз мардум ба дурустии омори расмӣ шубҳа доранд ва мегӯянд, миқёси сирояти беморӣ ва талафот бузургтар аст.

Як вебсайти навтаъсисе, ки маълум нест, кӣ сохтааст, https://kvtj.info/ гузоришҳо доир ба маргу мир дар замони пандемия дар Тоҷикистонро ҷамъ меорад ва бар асоси ҳисобҳои он аз замони сирояти беморӣ дар кишвар то кунун бештар аз 300 нафар ҷон додаанд.

Ҳамарӯза дар шабакаҳои иҷтимоӣ доир ба марги фарде дар ин ё он ҷо гузориш мерасад ва корбарон ҳам менависанд, ки сабаби марг “илтиҳоби шуш ва ё "коронавирус" будааст. Мақомоти Тоҷикистон бори аввал рӯзи 30-юми апрел гуфтанд, ки дар кишвар 15 мавриди сирояти коронавируси навро сабт кардаанд, ҳарчанд то ин рӯз доир ба марги чандин нафар аз бемории «илтиҳоби шуш» гузориш шуда буд.

Салиби Сурх: Беш аз 200 корманди тиб дар робита бо коронавирус мавриди таҳдид қарор гирифт

Табибе дар Инглистон

Президенти Кумитаи байналмилалии Салиби Сурх гуфт, ки аз моҳи март ба ин сӯ дар қаламрави 13 кишвар 208 ҳодисаи ҳамла ба кормандони тиб ба қайд гирифта шудааст ва ин ҳодисаҳо ба бӯҳрони коронавирус рабт мегиранд. Питер Маурер рӯзи 27 май гуфт, дар ҳоле, ки ниёз ба ходимони тиб фавқулодда баланд аст, онҳо мавриди ҳамлаву озор қарор гирифтаанд. Ин ҳамлаҳо дар ҳолест, ки мақоми корманди тиб дар чашми бисёр сокинони сайёра ҳамчун “фариштаҳои сафедпӯш” ва рамзи наҷот аз бемории ҳамагир боло рафта, аксарият ба онҳо паёмҳои қадрдониву ситоиш мефиристанд. Маурер дар суханронии худ дар баробари Шӯрои амнияти СММ гуфт: “Бӯҳрони COVID-19 базудӣ метавонад ба бӯҳрони ҳифозатӣ табдил шавад”. Ӯ дар сӯҳбат бо хабарнигорон гуфт, ки ҳодисаҳои озору ҳамла ба кормандони тиб дар Ховари Миёна, Осиёву Уқёнусия, Амрико ва Африқо мушоҳида шудааст, ки он ҷо Салиби сурх дафтари намояндагӣ дорад. Вале, ба гуфтаи ӯ, омори воқеӣ метавонад аз ин хеле бештар бошад.
Маурер гуфт, ки ҳодисаҳо аз таҳдидҳои лафзӣ сар карда то оташ задани муассисаҳои муолиҷакунандаи гирифторони COVID-19-ро дар бар мегиранд.

Парлумони Чин қонуни баҳсбарангези амнияти миллӣ дар Ҳонгконгро қабул кард

27 май, Ҳонгконг. Задухӯрди полис бо эътирозгарон

Парлумони Чин қонуни амнияти миллӣ дар Ҳонгконгро қабул кард ва ин иқдом боиси аз нав ба кӯчаҳои шаҳр рехтани эътирозгарон шуд. Конгресси миллии мардумӣ рӯзи 28 май дар ҷаласаи парлумонӣ тарҳи қонунро қабул кард. Маҷлис дар Чин бештар хусусияти расмӣ дорад ва ҳар он чиро, ки раҳбарияти ҳизби ҳокими коммунист мегӯяд, иҷро мекунад. Қонуни нав бо вуҷуди эътирозҳои чандинмоҳаи нирӯҳои демократии Ҳонгконг, ки як қаламрави дорои мақоми махсус аст, қабул шуда, хиёнат, сарнагуншавӣ, ошӯб ва мудохилаи хориҷиро манъ мекунад. Инчунин қонуни нав ба Пекин иҷоза медиҳад, ки барои саркӯби эътирозҳо сохторҳои вижаи қудратӣ ба Ҳонгконг ворид шаванд. Ин таҳаввулот эътирозҳои серҷамъияти мардумиро ба бор овард.
Ин иқдоми Пекин котиби давлатии ИМА Майк Помпеоро водор кард, ки ба Конгресс бигӯяд Кохи сафед дигар Ҳонгконгро минтақаи дорои мухторияти махсус арзёбӣ намекунад ва ба ҳамин хотир ин маркази тиҷоратӣ бар асоси қонунгузории ИМА дигар наметавонад мақоми минтақаи дорои низоми махсус дониста шавад.

Конгресс тарҳи таҳрими Чин барои ҳимоят аз ҳуқуқи уйғурҳоро қабул кард

Ин муассиса бовар меравад, ки ба унвони қароргоҳи бозтарбияи мусалмонон ва дар амал ба ҳайси боздоштгоҳи уйғурҳои Чин истифода мешавад. Шаҳри Артуш, шимоли Қошғари Чин. Июни соли 2019

Маҷлиси намояндагони ИМА рӯзи 27 май бо раъйи оро тарҳи таҳримҳоро қабул кард, ки аз президент Доналд Трамп тақозо мекунад барои саркӯби уйғурҳои мусалмонтабор дар Чин Пекинро таҳрим кунад. Ин иқдоми навбатӣ дар равобити бе ин ҳам бадшудаи миёни Вашингтон ва Пекин мебошад. Тарҳи қонун, ки оғози моҳ дар Сенат ҳам пуштибонӣ дида буд, муҷозоти мақомоти баландпояи чинии дастдошта дар поймолкунии ҳуқуқи уйғурҳои мусалмонро пешбинӣ мекунад. Раиси Маҷлиси намояндагон Ненси Пелосӣ гуфт, “амалҳои ваҳшиёнаи Пекин дар нисбати мардуми уйғур таҳқири виҷдони ҳамагонӣ дар ҷаҳон аст”. Тарҳе, ки бо пуштибонии 413-1 узви маҷлис қабул шуд, акнун ба Кохи Сафед меравад, то президент Доналд Трамп онро қабул ваё рад кунад. Трамп гуфт, ки ин масъаларо хеле ҷиддӣ баррасӣ мекунад. СММ ва дигар ташкилоти ҳомии ҳуқуқи инсон Чинро дар он муттаҳам мекунанд, ки тахминан 1 миллион уйғурҳои туркзабони Чинро дар вилояти Шинҷон бо баҳонаи муборизаи зидди ифротгароӣ ба қароргоҳҳои консентрасионӣ ҷой кардааст. Пекин ин иттиҳомро рад карда мегӯяд, ки ин мардум ба таври ихтиёрӣ ба урдугоҳҳои бозтарбия мераванд. Чин таҳдид кардааст, ки дар сурати ҳама амалҳое ба манфиати уйғурҳо ба ИМА посух хоҳад дод. Чин мегӯяд, масъалаи уйғурҳо умури дохилии он кишвар аст.

Баъди хатми оташбас дар Афғонистон ҳафт низомӣ кушта шуд

Толибон аз зиндон раҳо мешаванд

Дар як ҳамла дар вилояти Парвон ҳафт сарбози афғон ба ҳалокат расид ва мақомот масъулиятро ба дӯши Толибон вогузор карданд. Воҳида Шоҳкор, сухангӯи волӣ рӯзи 28 май гуфт, ки ҷангҷӯён ба посгоҳе дар Парвон ҳамла карданд. Ба гуфтаи Шоҳкор, дар ин ҳодиса Толибон ҳам хисорот диданд. Раиси полиси ноҳия Ҳусайн Шоҳ гуфт, ки ҷангҷӯён ба сӯи посгоҳ оташ кушоданд ва панҷ узви нирӯҳои амниятӣ ба ҳалокат расиданд. Ду нафари дигар аз зарби тир кушта шуданд. Толибон то ҳол дар робита бо ин ҳодиса изҳори назар накардаанд. Ин дар ҳолест, ки ду ҷониб барои шурӯи музокироти сулҳ ризоият додаанд ва ба унвони иҷрои пешшарти ин музокирот дар рӯзҳои оташбаси Иди Рамазон мақомот то ду ҳазор узви Толибонро озод карданд ва Толибон ваъдаи озод кардани 50 то 100 низомии ҳукуматиро доданд.

Boeing истеҳсоли ҳавопаймоҳои навъи 737 MAX-ро дигарбора оғоз мекунад

Ширкати Boeing истеҳсоли ҳавопаймоҳои мусофирбари навъи "Боинг 737 MAX"-ро дар корхонаи Рентони аёлати Вашингтони ИМА аз сар мегирад. Истеҳсоли ин навъи ҳавопаймоҳо панҷ моҳ пеш манъ гардид. Дар суқути ду ҳавопаймо навъи "Боинг 737 MAX" 346 кас кушта шуд.

Парвози пурфурӯштарин навъи ҳавопаймоҳои ширкат моҳи марти соли 2019, баъди суқути дувумин "737 MAX" дар фосилаи ним сол, манъ шуд.

Ҳамакнун истеҳсоли ин навъи ҳавопаймоҳо бо теъдоди камтар ба роҳ монда мешаванд то ин ки амнияти коргарон ва сифати маҳсулот боло бурда шавад. Дар оянда истеҳсол афзоиш дода хоҳад шуд.

Манъи парвозҳои "737 MAX" тақрибан дар ҳамаи кишварҳо, аз ҷумла дар худи ИМА, баъди суқути ҳавопаймои навъи мазкур дар Эфиопия дар моҳи марти соли гузашта рӯи даст гирифта шуд, ки 157 қурбонӣ дошт. Пештар аз он ҳавопаймои навъи мазкур дар Индонезия суқут кард.

Дар ҳар ду ҳолат, ба гуфтаи мутаххасисон, иштибоҳи техникӣ рух дода ва низоми худкор иштибоҳан ҳавопайморо ба замин ҳидоят кардааст. Ин иштибоҳро роҳбари ширкати Boeing Деннис Мюиленбург ҳам қисман эътироф кард.

Соли 2019 ширкати Boeing ба далели руйдодҳои марбут ба "737 MAX", аз соли 1997 ба ин тараф, бори аввал зиёни молӣ дид. Соли ҷорӣ ба далели паҳншавии коронавирус ширкат ба коҳиши талабот ба ҳавопаймо рӯ ба рӯ шуд. Бо назардошти ин вазъ ширкат тасмим дорад, ки аз 160 ҳазор коргараш 10 дарсадро ихтисор кунад.

Қирғизистон барои мубориза бо коронавирус беш аз $462 млн дарёфт хоҳад кард

Шаҳри Ӯши Қирғизистон.

Дар Ситоди ҷумҳуриявии Қирғизистон гуфтанд, барои мубориза бо коронавирус дар ин кишвар аз созмонҳои молии байналмилалӣ сармоя ҷалб карда хоҳад шуд.

Ба огаҳии ситод, дар ҳоли ҳозир барои дарёфти беш аз 462 миллион доллар созишномаҳо ба имзо расидааст. Сандуқи байналмилалии асъор то ҳол 242 миллион доллари маблағи мазкурро ҳамчун қарз ҷудо кардааст, ки бо он буҷаи ҷумҳуриявӣ пур карда мешавад.

Бонки осиёии рушд низ 100 миллион доллар ҷудо мекунад, ки 25 миллиони он қарз мебошад. Ин бонк ҳамчунин 20 миллион доллари дигар медиҳад, ки 10 миллиони он қарз буда, барои хариди таҷҳизоти тиббӣ ва дору барои мубориза бо коронавирус сарф мегардад.

Бонки ҷаҳонӣ барои ду тарҳ - "Тарҳи изтирорӣ роҷеъ ба коронавирус" ва "Тақвияти устувории Қирғизистон дар баробари офатҳои табиӣ" 21 миллиону 150 ҳазор доллар хоҳад дод. Тарҳҳо хариди таҷҳизот ва маводро барои бахши тандурустии он кишвар пешбинӣ мекунанд.

Бонки рушди исломӣ барои хариди таҷҳизоти тиббӣ ба Қирғизистон 15 миллион доллар қарз ҷудо хоҳад кард. Иттиҳоди Аврупо ҳам 33 миллиону 880 ҳазор доллар грант ҷудо мекунад.

Пулҳои Бонки Олмон дар ҳаҷми $30 миллиону 352 ҳазору 500 доллар ба дастгирии кишоварзон бо мақсади таъмини амнияти ғизоӣ сарф хоҳад шуд.

Аз 100 ҳазор гузашт. ИМА дар садри феҳристи кишварҳои пурталафоти коронавирус

Манҳеттен, Ню-Йорк, 25 март. Ташкили сардхонаи муваққатӣ дар пушти як беморхона

Дар ИМА шумори фавти инсонҳо бар асари коронавирус аз марзи 100 ҳазор нафар гузашт. Пажӯҳишгоҳи Ҷон Ҳопкинс рӯзи 27 май гуфт, ки дар баробари тасдиқи олудагии 1,7 миллион сокини ИМА, марги инсонҳо бар асари коронавирус дар ин кишвар ба 100,047 нафар расид. ИМА дар садри кишварҳои шадидан осебдида бар асари вируси нав қарор дорад.
Аз назари таносуби фавт бар ҳар 100 ҳазор аҳолӣ шумори қурбониҳо дар ИМА 30 нафар буда, аз ин ҷиҳат дар мақоми нӯҳум дар ҷаҳон қарор мегирад. Дар чунин раддабандӣ мақомҳои аввалро дар феҳристи қурбониҳо Белгия, Испания, Бритониё, Фаронса, Итолиё ва Шведсия ишғол мекунанд. Вале талафоти амрикоиҳо дар муқобили коронавирус ба маротиб бештар назар ба қурбониҳои ин мардум дар ҷанги Кореяву Ветнам мебошад.
Пандемияву ҷоришавии маҳдудиятҳои иҷтимоӣ ба иқтисоду тиҷорат зарба зад ва президент Доналд Трамп, ки аввал хатари вирусро кам нишон медод, ҳоло ба бозкушоии тиҷоратҳо даъват мекунад. Ҳама 50 аёлат маҳдудиятҳоро бекор карда ҳатто қиморхонаҳои Лас-Вегасу боғи кӯдаконаи Walt Disney World барои дубора боз кардани дарҳояшон омода мешаванд.

Муҳаммадбоқир Қолибоф раиси порлумони Эрон шуд

Муҳаммадбоқир Қолибоф пас аз интихоб шуданаш ба раёсати порлумони Эрон. 28 май, 2020.

Муҳаммадбоқир Қолибоф, намояндаи порлумон аз шаҳри Теҳрон, раиси Маҷлиси намояндагони Эрон интихоб шуд. Ӯ барои як сол дар ин мақом кор хоҳад кард.

Оқои Қолибоф бо 230 раъйи вакилон ба ин мақом расид. Дигар номзадҳо барои раёсати порлумон Мустафо Мирсалим ва Фаридун Аббосӣ буданд, ки ба гузориши хабаргузории давлатии Эрон -- ИРНА, мутаносибан 12 ва 17 раъй ба даст оварданд.

Муҳаммадбоқир Қолибоф ба ҷараёни усулгароёни Эрон тааллуқ дорад. Усулгароён дар порлумони Эрон аксариятро ташкил медиҳанд.

Оқои Қолибоф фармондеҳи пешини нерӯҳои интизомӣ ва 12 сол шаҳрдори Теҳрон буд. Дар солҳои гузашта се бор барои курсии президентӣ талош кард, аммо ноком монд.

Тайи дувоздаҳ соли ахир раёсати порлумони Эронро Алии Лориҷонӣ ба ӯҳда дошт.

Дар остонаи сафари Мирзиёев ба Марғелон табибон кӯчарӯбӣ мекунанд

Омодагиҳо ба сафари Шавкат Мирзиёев дар Марғелон.

Кормандони муассисаҳои тиббии шаҳри Марғелони Узбекистонро ба поккории маркази тиҷории санъатгарон бароварданд.

Мақомоти Марғелон гуфтанд, дар шаҳр барои сафари президенти Узбекистон Шавкат Мирзиёев омодагиҳо идома доранд. Ба иттилои мақомот, қарор аст, Мирзиёев рӯзи 29 ба Марғелон сафар кунад.

Кормандони муассисаҳои тиббӣ гуфтанд, рӯзи 25 май барои поккории маркази тиҷорӣ иҷборан фиристода шудаанд.

"Моро барои поккории маркази тозабунёд фиристоданд. Тирезаҳоро шустем. Барои фаррошӣ қисме аз ҳамкорони дигари моро бурданд. Ба мо дастур доданд, ки то омадани президент марказро бояд комилан поккорӣ кунем", - гуфт як корманди соҳаи тиб, ки нахост номаш зикр шавад.

Мақомоти мегӯянд, Мирзиёев дар сафараш ба Марғелон биноҳои навсохтро ба истифода хоҳад дод.

Русия омода аст, дар гуфтугӯҳои марзии Тоҷикистону Қирғизистон миёнаравӣ кунад

Сергей Лавров, вазири умури хориҷии Русия.

Вазири умури хориҷии Русия Сергей Лавров рӯзи 28-уми май гуфтааст, Русия омода аст, дар гуфтугӯҳои марзии Тоҷикистону Қирғизистон миёнаравӣ кунад.

"Дар робита ба вазъи марз байни Тоҷикистону Қирғизистон... Ин бори аввал нест, ки мутаассифона, чунин таниш сурат мегирад. Мо аз ҳампаймонони худ даъват мекунем, ки вориди гуфтугӯ шаванд ва то ҳадди аксар аз истифодаи силоҳ худдорӣ варзанд. Омодаем хидмати миёнаравии худро пешниҳод кунем. Ва бовар дорем, ки ҳар чи зудтар вазъ ором шавад, ҳамон андоза беҳтар аст. Мо дар ин бора ба дӯстонамон хабар додем", - гуфт Лавров.

Вазоратҳои хориҷии Тоҷикистону Қирғизистон то кунун ба изҳороти вазири корҳои хориҷии Русия вокуниш накардаанд.

Рӯзи 27 май шаҳрванди Қирғизистон сӯи сокини Исфараи Тоҷикистон тир кушод, ки айни ҳол таҳқиқи ҳодиса шуруъ шудааст. Рӯзи 24 май бо баҳонаи чарогоҳ низоъ бархост, ки марзбонон силоҳ истифода карданд.

Тоҷикистону Қирғизистон 976 километр марз доранд, ки то кунун 504 километри он муайян ва аломатгузорӣ шудааст. Ду тараф бо вуҷуди гузашти солҳо натавонистанд, сари минтақаҳои баҳсбарангез ба мувофиқа бирасанд ва хатти марзро бикашанд. Ҷанҷолу тирандозӣ маҳз дар ҳамин минтақаҳо ва барои обу замин ва чарогоҳ сурат мегирад ва гоҳо ба хунрезӣ меанҷомад.

Муноқишаи имсол дар замоне сурат мегирад, ки ду кишвар барои муқобила бо густариши бемории СОVID-19 даступо мезананд. Дар Қирғизистон беш аз 1400 нафар ва дар Тоҷикистон 3424 нафар ба бемории нав гирифторанд.​

Бо фосилаи ҷисмонӣ. Нахустин сафари президент Раҳмон дар аҳди коронавирус

Боздид аз ҳолати истифодабарии замин дар хоҷагиҳои деҳқонии ноҳияи Ҷайҳун. 28 майи соли 2020

Президент Эмомалӣ Раҳмон барои бори аввал пас аз эълони ҳолатҳои гирифторӣ ба коронавирус дар Тоҷикистон, ба яке аз ноҳияҳои кишвар сафар кард. Вай охирҳои моҳи март ба Суғд сафар карда, дар тантанаҳои наврӯзӣ ширкат карда буд. Тоҷикистон рӯзи 30-юми апрел аз нахустин ҳолатҳои гирифторӣ ба COVID-19 хабар дод.

Дафтари матбуоти президенти Тоҷикистон рӯзи 28-уми май хабар дод, ки оқои Раҳмон субҳи имрӯз ба ноҳияи Ҷайҳун (Қумсангири пешин)-и вилояти Хатлон рафтааст. Манбаъ ҳадафи сафари Эмомалӣ Раҳмонро "шиносоӣ бо вазъи зиндагии мардум ва боздид аз ҳолати истифодабарии заминҳои хоҷагиҳои деҳқонӣ" гуфтааст.

Дар силсилаи аксҳо дида мешавад, ки раҳбари Тоҷикистон аз боғу киштзорҳо дидан кардааст. Ба фарқ аз сафарҳои ҳамсони гузашта, ин бор зери қадамҳои ӯ қолин густарда нашудааст. Эмомалӣ Раҳмон аз ҷумла "бо ҷараёни ҷамъоварии ҳосили ғалла ва агротехникаи парвариши пахта дар Ҷамъияти дорои масъулияти маҳдуди Иттиҳоди аграрии “Водии Заррин” шинос шуд. Ин ниҳодест, ки бо ташаббуси ӯ дар соли 2013 таъсис ёфта буд.

Дар идомаи хабар омадааст, ки президент бо фаъолияти Беморхонаи марказии ин иноҳия шинос шуда, бо табибон мулоқот кардааст. Дар ин диду боздидҳо фосилагирии ҷисмонӣ барои эҳтиёт аз COVID-19 риоя шудааст. Аммо гуфта ё дида намешавад, ки оё ӯ беморонро низ аёдат кард ё на. Дар шаҳри Душанбе низ ӯ танҳо аз бемористони навсохт дидан кард ва ба аёдати беморон дар чанд шифохонаи пойтахт иқдом накард.

Президент Раҳмон дар вохӯрӣ бо пизишкони ноҳияи Ҷайҳун аз ҷумла гуфтааст, "бо эълони вазъияти пандемия дар ҷаҳон Ҳукумати Ҷумҳурии Тоҷикистон аз рӯзҳои аввал ба хотири пешгирӣ аз эпидемияи баамаломада, корҳои заруриро ба сомон расонид". Ин дар ҳолест, ки мунтақидон ҳукумати Тоҷикистонро ба пинҳон доштани сироят, сари вақт огоҳ накардани аҳолӣ, худдорӣ аз эълони карантини сартосарӣ ва тақсими кумакҳои башарии кишварҳои дигар аз номи худ муттаҳам мекунанд.

Раҳбари Тоҷикистон гуфт, манзураш, аз омодагӣ ба сироят, аз ҷумла муҷаҳҳаз гардонидани беморхонаву марказҳои саломатӣ бо дастгоҳу таҳҷизоти зарурӣ, таъмини табибон бо либосҳои вижаи муҳофизатӣ ва таъсиси беморхонаҳои муваққатии сироятӣ аст. Бо вуҷуди ин омодагиҳо табибон дар пойтахт ва ноҳияҳои гуногуни кишвар аз нарасидани дорувор ва василаҳои ҳифозатӣ шикоят мекунанд. Бархе аз онҳо мегӯянд, либосу ниқоби ҳифозатиро бо пули худ харидаанд.

Сафари президент Раҳмон ба вилояти Хатлон дар ҳоле ҷараён мегирад, ки як моҳи охир дар кишвар садҳо ҳолати гирифторӣ ба коронавирус сабт шуд ва мақомот мардумро ба эҳтиёкорӣ даъват мекунанд. Мақомот мегӯянд, муолиҷаи ин беморон ройгон аст, вале чандин нафар дар шабакаҳои иҷтимоӣ навиштанд, ки чунин табобат аз ҳисоби хонаводаи беморон сурат гирифта, маблағҳои зиёдеро талаб мекунад.

Як мақоми ҳукумати шаҳри Бохтар низ гуфт, ки қарор аст онҳо президентро пешвоз гиранд ва як бинои фарҳангиро расман ифтитоҳ кунад, вале на мисли пешина бо чорабиниҳои серодам, балки дар ҳалқаи маҳдуди мансабдорон.

Раиси ҷумҳури Тоҷикистон дар мулоқот бо роҳбарон ва фаъолони ноҳияи Ҷайҳун ба рушди иқтисод даъват кард ва танҳо як дафъа аз короновирус ёдрас шуд ва гуфт, он "боиси ташвишу нигаронии мардуми сайёра, аз ҷумла сокинони кишвари мо гардидааст, ҳалли масъалаҳои беҳтар кардани таъминоти муассисаҳои тандурустӣ аз ҷумлаи вазифаҳои муҳимтарини роҳбарони мақомоти иҷроияи ҳокимияти давлатии шаҳру ноҳияҳо мебошад."

Вазорати тандурустии Тоҷикистон мегӯяд, омори гирифторӣ ва шифоёбии беморони COVID-19 дар шабонарӯзи гузашта баробар буд. Ба иттилои Вазорат, дар 24 соати гузашта 158 ҳолати нави гирифторӣ ба COVID-19 сабт шуда, ҳамин миқдор беморон шифо ёфтаанд.

Ба изофаи омори нав, шумори гирифторшудагон ба бемории COVID-19 дар Тоҷикистон акнун ба 3424 нафар расид. Ба иттилои мақомот, 1575 нафар аз беморон шифо ёфта, 47 нафар ҳам ҷон додаанд.

Ин омори расмӣ дар шабакаҳои иҷтимоӣ зери шубҳа гузошта мешавад ва бино бар як феҳрасти ғайрирасмӣ дар Интернет, шумори ҷонбохтагон аз коронавирус ва "илтиҳоби шуш" то имрӯз 354 кас ҳисоб мешавад. Ин феҳрастро бар асоси хабари расонаҳо, шабакаҳои иҷтимоӣ ва иттилои наздикони фавтидагон таҳия ва барӯз мекунанд, аммо мақомот онро қабул надоранд ва дастрасии аҳолӣ ба он дар Тоҷикистон маҳдуд карда шудааст.

158 кас гирифтор шуд ва 158 кас шифо ёфт. Омори нави мақомоти тоҷик дар бораи коронавирус

Вазорати тандурустии Тоҷикистон мегӯяд, омори гирифторӣ ва шифоёбии беморони COVID-19 дар шабонарӯзи гузашта баробар буд. Ба иттилои Вазорат, дар 24 соати гузашта 158 ҳолати нави гирифторӣ ба COVID-19 сабт шуда, ҳамин миқдор беморон шифо ёфтаанд.

Ба изофаи омори нав, шумори гирифторшудагон ба бемории COVID-19 дар Тоҷикистон акнун ба 3424 нафар расид. Ба иттилои мақомот, 1575 нафар аз беморон шифо ёфта, 47 нафар ҳам ҷон додаанд.

Бо ин вазъ шубҳаҳо ба оморҳои расмӣ зиёд аст ва бисёриҳо мегӯянд, мақомот на ҳама ҳақиқатро дар бораи коронавирус баён медоранд. Бар асоси феҳрасти ғайрирасмӣ дар Интернет, шумори ҷонбохтагон аз коронавирус ва "илтиҳоби шуш" то имрӯз 354 кас ҳисоб шудааст. Ин феҳрастро бар асоси хабари расонаҳо, шабакаҳои иҷтимоӣ ва иттилои наздикони фавтидагон таҳия мекунанд. Ҳарчанд мақомот ин рӯйхатро қабул надоранд.

Дар Русия моҳи апрел бекорӣ то 23 дарсад афзудааст

Ярмаркаи кор дар шаҳри Омск. Акс аз соли 2016

Моҳи апрел дар Русия сафи бекорон то 4,3 миллион нафар ваё 5,8 дарсад зиёд шуд. Дар қиёс бо моҳи март бекорӣ то 23 дарсад афзуда дар маҷмӯъ 815 ҳазор нафарро фаро гирифт. Дар ин бора дар омори оҷонсии Росстат хабар дода шудааст.
Аз миёни 1,3 миллион нафари бекори дар Роструд ба қайдгирифташуда 1,1 миллион нафарашон ба ҳайси бекор маблағ дарёфт карданд. Дар Русия аз охири март то миёнаҳои май низоми рӯзҳои истироҳат ҷорӣ шуд, вале ба ҳар минтақа иҷоза доданд, ки фурсати бекор кардани карантинро мустақилона танзим кунанд. Масалан, дар Маскав маҳдудият то 31 май идома хоҳад ёфт. Дар ин муддат корхонаву мактаб ва маъракаҳои ҷамъиятӣ бекор шуданд. Бисёр сокинони Русия аз ҳисоби худ дар истироҳат буданд. Пешбиниҳои вазорати кори Русия ин аст, ки шумори бекорон дар соли 2020 аз 5 миллион нафар бештар хоҳад шуд.

Раиси собиқи пажӯҳишгоҳи стратегии назди президенти Узбекистон дар ҷосусӣ айбдор шуд

Рафиқ Сайфулинро аз афроди наздик ба Рустам Иноятов меноманд

Додгоҳи ҳарбие дар Узбекистон рӯзи 25 май собиқ раиси Пажӯҳишгоҳи таҳқиқоти стратегӣ ва байниминтақавии назди президенти Узбекистонро бо иттиҳоми “ҷосусӣ ба манфиати Русия” ба 12 соли зиндон маҳкум кард. Дар ин бора бо такя ба як ҳуқуқшинос бахши Узбекии Радиои Озодӣ хабар дод. Рафиқ Сайфулини 61-сола гуноҳашро қисман эътироф кард. Ҳуқуқшиносе, ки нахост номаш нашр шавад, гуфт, Сайфулин гуфтааст, ки бархе маводи таҳлилиро дар ихтиёри Русия қарор медод, вале ин мавод санад ваё маълумоти махфӣ неву таҳлилӣ буд. Як мақоми баландпоя дар вазорати умури дохилии Узбекистон гуфт, ки Рафиқ Сайфулин дар “ҷосусӣ ба манфиати Русия” ва “фош кардани сирри давлатӣ” гунаҳгор дониста шуд. Маълум нест, ки оё маҳкумшуда аз болои қарори додгоҳ ба зинаи болоӣ шикоят мекунад ё на. Рафиқ Сайфулин корро даврони шӯравӣ дар КГБ сар карда, забонҳои форсӣ, пушту ва дариро медонад. Баъди истиқлолият, дар солҳои 1994-95 дар кумитаи давлатии пешбиниву омори кабинаи вазирони Узбекистон кор кардааст. Дертар раҳбарии пажӯҳишгоҳи стратегиро ба ӯҳда гирифт. Ӯро аз афроди наздик ба собиқ раиси Хадамоти амнияти миллии Узбекистон Рустам Иноятов меноманд.

80% табибон дар Русия ба омори расмии марг бар асари коронавирус бовар надоранд

Красногорски Русия

Тахминан 80% табибон дар Русия ба омори расмии марг бар асари коронавирус дар ин кишвар бовар надоранд. Пурсиши RNC Pharma ва "Доктор на работе", ки дар маҷаллаи "Медицинский вестник" нашр шуд, ба ин натиҷа омадааст, ки 61 дарсади духтурон гуфтаанд, ба натиҷаҳои омори расмӣ дар бораи марг шубҳа доранд. 17 дарсад гуфтанд, ки дасткорӣ шудани омори расмиро исбот карда метавонанд. 8 дарсад гуфтанд, ки феълан зарурат барои таҳрифи маълумот нест, вале бо афзоиши бештари ҳодисаҳои олудагӣ дасткории омор ҳам шурӯъ хоҳад шуд. Аз миёни табибон танҳо 9 дарсад гуфтанд, ки ба омори расмӣ пурра бовар доранд. Онҳо гуфтанд, ки маводи марбут ба марги инсонҳоро дасткорӣ карда намешавад. Маҷаллаи тиббӣ барои шарҳи натиҷаҳои пурсиш ба вазорати беҳдошти Русия муроҷиат кард.

Муддатҳои зиёд аст, ки дар заминаи омори расмии талафот бар асари коронавирус шубҳа баён мешавад, вале мақомот инро ҳамеша рад кардаанд.
Вебсайти "Медиазона" ҳисоб кардааст, ки бар асари коронавирус дар Русия на камтар аз 186 корманди тиббӣ ҷон додааст. Дарсади воқеии марги табибон дар таносуб бо кишварҳои аҳолиаш ҳамсон ба маротиб болотар аст.

Моҳи май дар мақолаи нашрияҳои бритониёиву амрикоии The Financial Times ва The New York Times бо такя ба таҳқиқоте гуфта шуд, ки дар Русия омори воқеии талафоти инсонҳо бар асари коронавирус метавонад 70% бештар аз нишондодҳои расмӣ бошад. Дар вазорати хориҷаи Русия ин навиштаҳоро “тахминҳои беасос” ва “дурӯғи навбатии ҳангомасоз бар зидди Русия” номида, талаб карданд, ки нашрияҳо барои ин матлаб узрхоҳӣ кунанд. То рӯзи 27 май дар Русия 370680 ҳодисаи олудагӣ ва 3968 ҳолати марг бар асари коронавирус ба қайд гирифта шудааст. Шумори шифоёфтагон 142208 нафар гуфта мешавад.

Коммерсант: Русия сахттар шудани созиши ОПЕК+-ро пешниҳод мекунад

Дар мулоқоти моҳи июни созмони ОПЕК+ Русия мумкин аст, ҳифзи сатҳи кунунии истихроҷи нафтро то моҳи сентябри соли ҷорӣ пешниҳод кунад.

Дар ин бора нашрияи “Коммерсант”-и Русия бо такя ба манобеи худ хабар додааст.

Бино ба созиши моҳи апрелӣ, аз моҳи май то июли соли равон кишварҳои узви ОПЕК+ бояд истихроҷи нафтро то 9,7 миллион бушка дар шабонарӯз кам кунанд. Баъдтар пешниҳод шуд, ки ҳаҷми истихроҷи нафт то 8 миллион бушка дар рӯз то охири соли 2020 ва то 6 миллион бушка то соли 2021 кам карда шавад.

Русия дар пайи созиши ахир истихроҷи нафтро то 8,5 миллион бушка дар рӯз дар моҳҳои май-июл кам мекунад. Ба иттилои нашрия, вазорати энержии Русия ҳифзи ин квотаро барои ду моҳи оянда мумкин аст, дархост кунад.

Ба иттилои манбаи нашрия, сахттар шудани мавқеи Русия ба фишори шарики асосии созишнома Арабистони Саудӣ рабт дорад, ки ин кишвар аз сатҳи кунунии истихроҷи нафт норозӣ аст. Ин ҳам дар ҳолест, ки ахиран талабот ба нафт ба эътидол даромадааст.

Ваколатдори ҳуқуқи инсон бо Отамбоев дар боздоштгоҳ мулоқот кард

Алмосбек Отамбоев, президенти пешини Қирғизистон

Токон Мамитов, ваколатдори ҳуқуқи инсон дар Қирғизистон ба боздоштгоҳи Кумитаи давлатии амнияти миллии он кишвар рафт ва бо президенти пешин Алмосбек Отамбоев мулоқот кард.

Аз хадамоти матбуотии ваколатдор иттилоъ доданд, ки Мамитов бо вакили пешин Канибек Осмоналиев, ноиб-сарвазири пешин Дуйшенбек Зилолиев ва шаҳрдори пешин Албек Ибраимов ҳам мулоқот кардааст.

Алмосбек Отамбоев аз номуътадилии фишори хунаш шикоят кардааст.

Маҳбусон ҳамчунин аз бархе судяҳо ва роҳбарони мақомоти ҳифзи ҳуқуқ ба ваколатдори ҳуқуқи инсон шикоят кардаанд.

Аз хадамоти матбуотии ваколатдор гуфтанд, ки ҳамаи шикоятҳо таҳлил ва ба мақомоти додгоҳиву ҳифзи ҳуқуқ расонида мешавад.

Собиқ раҳбари Чувашия аз болои қарори Путин ба додгоҳ шикоят кард

Соли 2014. Мулоқоти Путин ва Игнатев


Собиқ раҳбари минтақаи Чувашия Михаил Игнатев, ки аз болои президент Владимир Путин ба додгоҳ шикоят кард, бо нишонаҳои пневмонияи дутарафа ва осеби амиқи шуш дар беморхона бистарӣ шудааст. Ӯ дар як бемористони шаҳри Санкт-Петербург аст ва ба дастгоҳи хунгузаронии сунъӣ пайваст аст. Дар ин замина нашрияи “Коммерсант” хабар дода гуфтааст, ки Игнатев дар шӯъбаи эҳёгарӣ қарор дорад. Вебсайти Mash мегӯяд, ки мақомдори собиқ аз аввали май дар беморхона қарор дорад.
Игнатеви 58-сола аз соли 2010 то январи соли 2020 раҳбари Чувашия буд. Моҳи январ Путин ӯро бо тавзеҳи расмии “аз даст додани эътимод” аз мақомаш барканор кард ва дирӯз маълум шуд, ки ӯ аз болои ин қарор ба додгоҳ шикоят кардааст.
Игнатев аввалин раҳбари як минтақа дар таърихи Русия аст, ки қарори барканориашро тавассути додгоҳ ба чолиш мекашад. Қарор аст мурофиаи додгоҳӣ аз рӯи ин даъво дар Додгоҳи Олии Русия 30 июн баргузор шавад. Феълан маълум нест, ки оё мурофиа бо сабаби бемор будани даъвогар ба таъхир гузошта мешавад ё на.

Нафткаши дуюми эронӣ ба захирагоҳи азимтарини Венесуэла расид

Киштии нафткаши  “Fortune”

Нафткаши дуюми эронӣ ҳомили газу нафт бо вуҷуди тавсеаи ихтилофҳои Вашингтон ва ду кишвари таҳримшуда, рӯзи 26 май ба соҳилҳои Венесуэлаи дучори бӯҳрон расид.
Киштӣ рӯзи 25 май вориди обҳои Венесуэла шуд. Поинравии башиддати нархи нафт баъди соли 2014 бӯҳрони иқтисодии Венсуэларо амиқтар кард. Киштии аввалини эронӣ 24 соат пеш аз он вориди обҳои Венесуэла гардид. Киштии “Fortune” нафтро ба захирагоҳи Эл Палито бурд ва ин коргоҳ тавони дар як рӯз коркард кардани 140 ҳазор бушка нафтро қодир аст. Худи рӯзи 26 май нафткаши сеюм ҳам вориди обҳои Венесуэла шуд ва қарор аст ду нафткаши дигар ҳам базудӣ бирасад.

Тарҳи қонуни нав дар бораи суруди миллӣ боиси эътирозҳои нав дар Ҳонгконг шуд

Ҳонгконг, 27 май. Эътирозгарон талош доранд аз таъсири дастгоҳи мурчпошӣ панаҳ шаванд

Полиси Ҳонгконг рӯзи 27 май ба сӯи эътирозгарон, ки аз тарҳи нави қонуни муҷозоткунандаи “таҳқир”-и суруди миллии Чин норозӣ ва ба маркази шаҳр рехтанд, бо дастгоҳи мурчу қаланфурпошӣ посух дод. То нисфирӯзӣ дастикам 17 эътирозгар, аз ҷумла мактабхонҳои 14 ва 15-сола ҳабс шуданд. Онҳоро дар нигаҳдошти асбобҳое, ки “барои мақсадҳои ғайриқонунӣ” ба хотири доштани кулоҳи бехатар ва дастгоҳи нафаскашӣ ба кор мераванд, гунаҳгор карданд. Тарҳи қонун аз ҳама мактабҳои Ҳонгконг талаб мекунад, ки суруди миллии Чинро азхуд карда, “ҳама шахсон ва корхонаҳо” дар маъракаҳо онро бисароянд. Агар ин қонун қабул шавад, барои “масхараву сӯиистифода” аз он то се соли зиндон ва то 6 ҳазор доллар ҷарима таъин мешавад. Агар рӯзи 27 май шӯрои қонунгузор онро дар хониши дуюм қабул кард, хониши сеюм ва овоздиҳӣ моҳи июн барпо хоҳад шуд. Ин тарҳ дар ҳоле баррасӣ мешавад, ки Пекин ният дорад қонуни амнияти миллӣ барои Ҳонгконгро қабул кунад ва ин санад фаъолияти сохторҳои интизомиро дар ин маркази тиҷоратӣ иҷоза хоҳад дод.

Мақомот: Сокини Исфара дар марзи Қирғизистон захмӣ шудааст

Марзи байни Тоҷикистон ва Қирғизистон

Неруҳои марзбонии Тоҷикистон як шаҳрванди Қирғизистонро ба оташкушоӣ ба сӯи сокини Исфара муттаҳам кардаанд. Ин ниҳод гуфтааст, ҳодиса пеш аз зуҳи 27-уми май рух дод. Мақомоти Қирғизистон аз шарҳи ҳодиса худдорӣ карданд.

Идораи Неруҳои марзбонии Тоҷикистон рӯзи 27-уми май бо нашри як изҳорот гуфт, Соат Бахтибеков, бошандаи ҷамоати Оқсойи Қирғизистон ба сӯи Шукрона Шаропова, як сокини 25-солаи Чоркуҳ тир кушода, “ӯро аз қисмати рости баданаш захмӣ кардааст.”

Дар изҳороти Неруҳои марзбонии Тоҷикистон гуфта мешавад, ки Шукрона Шаропова дар ҳолати миёнаи вазнин дар беморхонаи шаҳри Исфара бистарӣ аст.

Неруҳои марзбонии Қирғизистон гуфтанд, дар бораи ҳодиса ва шарҳи расмии Тоҷикистон феълан изҳори назар намекунанд. Мақомоти қирғиз гуфтанд, раиси ҷамоаи овулҳо Усарова ба ҷойи ҳодиса рафта ва вазъ феълан ором аст.

Тибқи иттилои дарёфтии хабарнигори бахши қирғизии Радиои Озодӣ, Соатбек Бахтибеков аз хешовандони нафаре аст, ки дар муноқишаи рӯзи 8-уми май ҷароҳат бардошта буд.

Неруҳои марзбонии Тоҷикистон гуфтааст, мақомоти дахлдори ду давлат дар ҷойи ҳодиса қарор доранд.

Феълан маълум нест, ки шаҳрванди Қирғизистон дар чӣ шароит ба сӯи Шукрона Шаропова, коргари бригадаи №14-уми тухмипарварии Чоркуҳ оташ кушодааст. Ҳамчунин дақиқ нест, ки шаҳрванди Қирғизистон дар боздошт аст ё не. Неруҳои марзбонии Қирғизистон, ки дар ҳар муноқишаи марзӣ ба таврӣ фаврӣ изҳорот медод, бо гузашти се соат аз ҳодиса то ҳол шарҳе надодааст. Идораи Неруҳои марзбонии Тоҷикистон мисли чанд изҳороти қаблии худ гуфтааст, чунин амалҳо “метавонад вокуниши ҷавобиро аз ҷониби сокинони наздисарҳадӣ дар ин минтақаи ҳассос барангезад.”

Сарҳади Тоҷикистону Қирғизистон бахусус дар минтақаи Исфара ва Ботканд ҳар моҳ шоҳиди муноқиша миёни сокинони наздимарзӣ мешавад. Дар ҳафта ахир низ дар ин минтақа чанд муноқиша рух дод, ки дар пайи он аз ҳарду тараф марзбонон ва шаҳрвандони оддӣ захм бардоштанд.

Ёфтҳои бештар

XS
SM
MD
LG