Кормандони Хадамоти махсуси Туркманистон вақтҳои ахир ҷалби хабарчинҳои худро аз миёни донишҷӯёни донишгоҳҳои ин кишвар пурзӯр кардаанд.

Ба хабарнигори бахши туркмании Радиои Озодӣ муяссар шуд, ки бо донишҷӯён ва намояндагони баъзе аз донишгоҳҳои Туркманистон дар ин бора суҳбат кунад.

"Мегӯянд, дар баробари нозирони муқаррарӣ ҳамчунин чандин нафар аз Вазорати амнияти миллӣ низ дар донишгоҳҳо кор мекунанд. Онҳо аз ҳамаи гуруҳҳо донишҷӯёнро ба ҳамкорӣ ҷалб мекунанд, то дар бораи суханони норозиёнаи ҳамсабақонашон ба вазъи кишвар хабар диҳанд", - изҳор дошт ҳамсуҳбати мо.

"Ҳамчунин аз хабарчинҳо талаб мешавад, бифаҳманд, ки кадоме аз ҳамсабақони онҳо ба воситаи филтршикан ё худ VPN ба сомонаҳои масдуд ворид мешаванд ё паёмакрасонҳои WhatsApp ва Telegram-ро истифода мекунанд. Ба онҳо мефаҳмонанд, ки имкон пайдо карда, телефонҳои ҳамроҳи ҳамсабақонашонро тафтиш кунанд", - мегӯяд хабарнигори бахши туркмании Радиои Озодӣ.

Як корманди Хадамоти махсуси Туркманистон ба шарти ифшо нашудани номаш ба Радиои Озодӣ гуфт, онҳо барои суҳбат ҷавононеро даъват мекунанд, ки бо созмонҳои диниву мазҳабӣ робита доранд.

Дар баёнияи сафорат омадааст, шаҳрвандони ноболиғи кишварро рӯзи 29-уми апрел ба Тоҷикистон фиристоданд.

Интиқоли кӯдакони тоҷики дар Русия бесаробонмонда дар ҳамкорӣ бо вазорати корҳои дохилии Русия сурат гирифтааст.

Соли гузашта аз ин кишвар, ки мизбони садҳо ҳазор муҳоҷири кории тоҷик аст, на камтар аз 6 тифли тоҷикро, ки аз волидайн, ё парастор маҳрум шудаанд, ба Тоҷикистон фиристода буданд.

Соли 2024 аз Русия ба Тоҷикистон 54 тифли бесаробонмонда интиқол дода шуд.

Дар ин бора дар намояндагии ширкат хабар доданд. Ба гуфтаи онҳо, ин пойгоҳ хариду фурӯши криптоасъорро бар асоси қонун иҷоза медиҳад ва ин фаъолияти онҳо ба қонунгузории Тоҷикистон ҳам мутобиқат мекунад

Хадамоти табодули криптоасъор имкон медиҳад, ки шахс бо пули миллии Сомонӣ криптоасъор харида ваё чунин арзашаро бифурӯшад.

Дар ин пойгоҳ имкони муомила бо чунин навъҳои пули рақамии мисли Bitcoin, USDT ва Ethereum имконпазир мебошад.

Дар сомона гуфта шудааст, ки онҳо дафтари корие дар Душанбе доранд ва он ҷо бо забонҳои тоҷикиву русӣ хидматрасонӣ сурат мегирад. Муассиси ин хадамот - "Провайдери литсензиашудаи хизматрасониҳо дар соҳаи муомилаи активҳои рақамӣ — резиденти IT Park Душанбе" мебошад.

Ба навиштаи Бонки миллии Тоҷикистон, криптоасъор як шакли дороии рақамӣ буда, ба технологияи блокчейн асос ёфтааст. Криптоасъор дар шабакаи ғайримарказонидашуда бе иштироки мақомоти давлатӣ ё бонки марказӣ (миллӣ) сохта ва идора карда мешавад.

Қарор дар ин замина рӯзи 30 июн ба иҷро медарояд.

Ин қарор ба шаҳрвандони кишварҳои узви Ҷомеаи ҳамсуд ё СНГ, инчунин, шаҳрвандони Гурҷистон рабт дорад, ки ба хоки Русия бидуни виза ворид шуда, дар соҳаи интиқолҳои байналмилалӣ кор мекунанд. Аз ҷумла, қоидаҳои нав ба ронандагон аз кишварҳои Осиёи Марказӣ рабт мегирад.

Бино ба ин санад, ронандагон ҳақ доранд дар хоки Русия дар давоми як сол дар маҷмӯъ то 180 рӯз қарор дошта бошанд. Барои ворид шудан ва як муддат дар хоки Русия истодани онҳо бояд ариза дода шавад.

Мақомот мегӯянд, ки қарори мазкур барои коҳиши маҳдудиятҳои маъмурӣ, халал нарасонидан ба интиқоли борҳо ва содда кардани корҳои ташкилӣ дар ин соҳа равона шудааст.

Интиқолҳои байналмилалӣ муҳимтарин шабакаи таъминони бору маҳсулот ба бозорҳои дохил ва хориҷи кишварҳои Осиёи Марказӣ дониста мешавад.

Дар ин бора бо такя ба Оҷонси омор хабаргузории русии Интерфакс хабар додааст. Хабар мегӯяд, дар семоҳаи аввали соли ҷорӣ дар Тоҷикистон 9,3 ҳазор декалитр машрубот истеҳсол шудааст ва ин 19 ҳазор литр камтар назар ба соли гузашта будааст.

Як далелашро дар камтар шудани талабот дар ин ҷумҳурии асосан мусалмоннишин арзёбӣ карда мегӯянд, ки ин ба як тамоюл табдил шудааст.

Сабаби дигараш дар тағйирот дар соҳаи истеҳсоли машрубот дар Тоҷикистон гуфта мешавад.

Муфтии Тоҷикистон санаи эҳтимолии фарорасии Иди Қурбонро эълон кардааст.

Сайидмукаррам Абдулқодирзода, раиси Шӯрои уламои Тоҷикистон ба хабаргузории "Азия-Плюс" гуфтааст, "тибқи ҳисобҳои пешакӣ, имсол иди Қурбон ба 27-уми май рост меояд".

Ба гуфтаи муфтии кишвар, ин сана ҳанӯз ниҳоӣ нест ва Шӯрои уламо як ҳафта қабл аз фарорасии ид, рӯзи Иди Қурбонро эълон мекунад.

Мутобиқи таълимоти дини Ислом, иди Қурбон ҳамасола санаи 10-уми моҳи Зулҳиҷҷаи солшумории ҳиҷри қамарӣ фаро мерасад.

Иди Қурбон дар Тоҷикистон як иди расмӣ аст ва ба ин муносибат мардум истироҳат мекунанд. Ба муносибати ид бархе хонаводаҳо чорво забҳ мекунанд. Зиёрати қабри гузаштагон ва аёдати хешовандону наздикон яке дигар аз одатҳои ид дониста мешавад.

Оҷонсии омори Тоҷикистон аз коҳиши сатҳи ҷинояткорӣ дар кишвар хабар додааст.

Ба иттилои ин ниҳод, давоми се моҳи аввали соли равон дар Тоҷикистон 6336 ҷиноят сабт шудааст, ки дар қиёс ба ҳамин давраи соли гузашта 1,7 дарсад камтар мебошад.

Аз ҷумла ба иттилои расмӣ, имсол куштор ва сӯиқасд ба он 51 дарсад, қасдан расонидани зарари вазнин ба саломатӣ 32, таҷовуз ба номус ва сӯиқасд ба он 18, дуздӣ қариб 4 дарсад, қаллобӣ 4,5 ва авбошӣ 3 дарсад коҳиш ёфтаанд.

Манбаъ мегӯяд, дар се моҳи аввали имсол содиршавии ҷиноятҳои иқтисодӣ низ 3,7 дарсад камтар сабт шудааст.

Аммо дар моҳҳои январ-марти имсол ғоратгарӣ 26 дарсад, ҷиноятҳои вобаста ба маводи мухаддир 36 ва вайрон кардани қоидаҳои ҳаракати роҳҳо 1,5 дарсад зиёд шудааст.

Мақомоти қудратӣ ҳанӯз шарҳ надодаанд, ки сабабҳои кам шудани содиршавии баъзе ҷиноятҳо чист.

Дар пайи боридани борони сел ва жолаи сахт, ба таҳхонаи чанд бино дар шаҳри Душанбе об даромадааст ва корҳои бартарафсозӣ идома доранд. Дар ин бора аз Раёсати ҳолатҳои фавқулодаи шаҳри Душанбе 1-уми май ба Радиои Озодӣ хабар доданд.

Манбаъ гуфт, дар ҳодисаи рӯзи гузашта ягон талафоти ҷонӣ ба қайд гирифта нашудааст. Мақомот мегӯянд, зарари расида аз ин офати табииро ҳисоб доранд.

Баъзе аз сокинон, махсусан аз ноҳияи Сино ба Радиои Озодӣ шикоят карданд, ки таҳхонаи бинои зист ва ҳавлиашон зери об мондааст.

Рӯзи 30-юми апрел борони сел ва жолаи сахт зиндагиву ҳаракати мардум дар шаҳри Душанбе, пойтахти Тоҷикистонро мушкил кард. Баъзе аз роҳҳо, аз ҷумла роҳҳо дар ноҳияи Сино зери об монданд ва ҳаракати нақлиёт як муддат дар онҳо номумкин шуд. Дар наворҳо дар шабакаҳои иҷтимоӣ мошинҳои зери об мондаро ҳам дидан мумкин аст.

Маркази обуҳавошиносӣ ҳушдор додааст, ки то 4-уми май дар минтақаҳои гуногуни Тоҷикистон, аз ҷумла Душанбе, боронҳои сахт ва сел пешбинӣ мешавад. Аз мардум ҳам хостаанд, ки дар ин рӯзҳо эҳтиёткор бошанд.

Иёлоти Муттаҳидаи Амрико коҳиши нерӯҳои низомиаш дар Олмонро баррасӣ дорад.

Доналд Трамп, президенти ИМА дар шабакаи Truth Social навиштааст, ки "дар ояндаи наздик бояд тасмим гирифта шавад".

Пеш аз ин, президенти Амрико Фридирх Мертс, садри аъзами Олмонро барои назараш дар мавриди ҷанги ИМА бо Эрон танқид карда буд.

Садри аъзами Олмон гуфта буд, ки зоҳиран ИМА ҳеч нақшаи дақиқе барои ҷанг дар Эрон надошт.

Олмон ва ИМА кишварҳои муҳими узви созмони низомии НАТО ҳастанд.

ИМА дар пойгоҳи низомиаш дар Олмон 39 ҳазор низомӣ дорад.

Маълум нест, ки чӣ теъдоде аз онҳо кам хоҳанд шуд.

Маъмурияти Трамп борҳо гуфтаанд, ки ҳузурашон дар созмони низомии НАТО-ро бозбинӣ хоҳанд кард.

Борони сел ва жолаи сахт имрӯз, 30-юми апрел, зиндагиву ҳаракати мардум дар шаҳри Душанбе, пойтахти Тоҷикистонро мушкил кард.

Дар видеоҳо аз гӯшаҳои гуногуни шаҳр дида мешавад, ки баъзе аз роҳҳо зери об мондаанд ва ҳаракати нақлиёт дар онҳо номумкин шудааст. Дар дигар видеоҳо дар шабакаҳои иҷтимоӣ мошинҳои зери об мондаро ҳам дидан мумкин аст.

Мақомот барои боз кардани ҷӯйҳои обгузари шаҳр, мошин ва дигар нақлиётро сафарбар кардаанд, вале зоҳиран имкони рафъи паёмадҳои селобро надоранд.

Наворро инҷо бинед:

Маркази обуҳавошиносӣ ҳушдор додааст, ки аз имрӯз то 4-уми май дар минтақаҳои гуногуни Тоҷикистон, аз ҷумла Душанбе, боронҳои сахт ва сел пешбинӣ мешавад. Аз мардум ҳам хостаанд, ки дар ин рӯзҳо эҳтиёткор бошанд.

Тоҷикистон яке аз кишварҳои осебпазир дар баробари фалокатҳои табиӣ аст. Ҳар сол дар натиҷаи селу обхезӣ ва тармаву дигар офатҳо мардум даҳҳо миллион доллар зиён мебинанд. Ҳолатҳои талафоти ҷонӣ ҳам дида мешавад.

Роҳбарони Иёлоти Муттаҳидаи Амрико ва Русия рӯзи 29-уми апрел телефонӣ гап задаанд. Суҳбат якуним соат давом кардааст.

Доналд Трамп, раиси ҷумҳури Амрико гуфт, дар суҳбат бо Путин вазъи Украина ва Эронро баҳс кардаанд.

Ба гуфтаи Трамп, ӯ ба Путин оташбаси кутоҳмуддат дар Украина пешниҳод кард ва умедвор аст, ки Маскав инро қабул мекунад.

Дар ҳамин ҳол Юрий Ушаков, ёвари президенти Русия ба расонаҳо гуфтааст, Путин ба Трамп пешниҳод дод, ки ба муносибаи Рӯзи Ғалаба дар Ҷанги дуюми ҷаҳонӣ дар Украина оташбас ҷорӣ шавад. Ба гуфтаи Ушаков, президенти Амрико ин пешниҳоди Путинро дастгирӣ кардааст.

Муҳлати ин оташбас маълум нест ва мақомоти украинӣ ҳам дар ин бора чизе нагуфтаанд. Дар Аврупо Рӯзи Ғалаба 8 ва дар Русия 9 май таҷлил мешавад.

Қамчибек Ташиев, раиси пешини Кумитаи амнияти миллии Қирғизистон ба "кӯшиши ғасби қудрат" ва "сӯиистифода аз мақом" муттаҳам мешавад. Дар ин бора адвокат Икромидин Тошиев ба бахши қирғизии Радиои Озодӣ хабар додааст.

Бархеҳо оғози парвандаи ҷиноӣ алайҳи Тошиевро ба номаи 75 чеҳраи маъруф рабт медиҳанд, ки хостори баргузории интихоби қаблазмуҳлати президентӣ шуда буданд.

Рӯзи 29-уми апрел худи Қамчибек Тошиев дар муроҷиатномае тасдиқ кард, ки алайҳи ӯ парвандаи ҷиноӣ боз шудааст. Тошиев дар ин муроҷиат ба бегуноҳии худ таъкид карда гуфтааст, ба адолати додгоҳӣ бовар дорад.

Пештар хабар расида буд, ки рӯзи 28-уми апрел Қамчибек Тошиев, раҳбари собиқи КДАМ, Нурлан Тургунбек, раиси собиқи порлумон ва Курманқул Зулушев, собиқ Додситони кулли Қирғизистон аз ҷониби муфаттишони Вазорати корҳои дохилӣ бозпурсӣ шудаанд.

Дар бораи иттиҳоми раиси собиқи порлумон ва додситони пешини Қирғизистон хабари расмӣ дар даст нест. Вазорати корҳои дохилии Қирғизистон дар ин бора чизе нагуфтааст.

Қамчибек Тошиев аз чеҳраи таъсиргузор дар Қирғизистон ва дӯсти наздики Содир Ҷабборов, президенти ин кишвар буд, моҳи феврали имсол аз мақомаш барканор шуд.

Додгоҳи шаҳри Ваҳдат як муҳоҷири собиқро бо иттиҳоми фиристодани маблағ ба Муҳаммадиқболи Садриддин, яке аз мухолифони тундлаҳни ҳукумат ба 13 сол зиндони низомаш сахт маҳкум кардааст.

Додгоҳ 25-уми апрел ҷузъиёти ин ҳукмро нашр кард.

Назари фарди маҳкумшуда, ки 39-сола ва сокини ҷамоати Карим Исмоили шаҳри Ваҳдат будааст, ба ҳукм маълум нест.

Дар қарори додгоҳ омадааст, ин шахс соли 2023 ҳангоми дар Русия буданаш ҳафт маротиба ба миқдори умумии 17 ҳазору 500 рубл ба Муҳаммадиқболи Садриддин маблағ фиристодааст.

Додгоҳ ин мардро ҳамчунин ба он гунаҳкор кардааст, ки аз ақидаҳои созмонҳои дар Тоҷикистон мамнуи Ҳизби наҳзати исломӣ ва Паймони миллӣ, ҷонибдорӣ кардааст.

Додгоҳ ин муҳоҷирро бар асоси моддаи 179 қисми 2-и Кодекси ҷиноӣ маҳкум кардааст, ки такроран маблағгузории ҷиноятҳои хусусияти террористидоштаро пешбинӣ мекунад.

Созмонҳои мухолифи ҳукумати Тоҷикистон дар Аврупо борҳо иттиҳоми мақомоти Тоҷикистон дар бораи гуруҳи террористӣ будани худро рад кардаанд.

Ин бори аввал нест, ки мақомоти Тоҷикистон муҳоҷирони пешинро барои фиристодани маблағ ба Муҳаммадиқболи Садриддин, мудири пойгоҳи "Ислоҳ" боздошт ва зиндонӣ мекунанд.

Моҳи майи соли 2025 мақомоти интизомии Кӯлоб 24 нафарро бо иттиҳоми ифротгароӣ ва фиристодани пул ба Муҳаммадиқболи Садриддин дастгир карда буданд.

Манобеи Радиои Озодӣ он вақт гуфта буданд, "Сбербанк"-и Русия ба мақомоти Тоҷикистон рӯйхати афродеро додааст, ки аз Русия барои Муҳаммадиқболи Садриддин маблағ фиристодаанд.

Муҳаммадиқболи Садриддин он вақт дар як посухи катбӣ ба Радиои Озодӣ навишт, ки интиқоли маблағ ба ҳисоби "Ислоҳнет"-ро рад намекунад, вале таъкид мекунад, ки ҳеч нафареро, ки ба ҳисобаш пул фиристодаанд, дастгир накардаанд.

Муҳаммадиқболи Садриддин муқими Аврупо ва муассиси вебсайти "Ислоҳ" аст, ки саҳифаҳои ӯро Додгоҳи олии Тоҷикистон мамнӯъ ва ифротӣ эълон кардааст ва ба зидди худаш ҳам дар Тоҷикистон бо иттиҳоми тундгароии исломӣ парванда боз кардаанд. Худаш тамоми ин иттиҳомотро рад мекунад.

Порлумони Тоҷикистон пешниҳоди ҳукумат барои зиёд кардани ҳаҷми буҷаи соли 2026-ро қабул кард. Тибқи тағйироти нав, ҳаҷми буҷаи кишвар барои имсол 916 миллион сомонӣ зиёд карда мешавад ва қарор аст ин маблағ барои идомаи сохтмони неругоҳи "Роғун" сарф шавад. Ҳаҷми буҷаи Тоҷикистон дар оғози соли равон 65 миллиард сомонӣ пешбинӣ шуда буд.

Файзиддин Қаҳҳорзода, вазири молияи Тоҷикистон 22-юми апрел дар ҳузури вакилони Маҷлиси намояндагон гуфт, "ҳадаф аз таҳияи лоиҳаи мазкур равона намудани маблағҳои иловагӣ тавассути буҷаи ҷумҳуриявӣ барои рушди соҳаи энергетика, махсусан маблағгузории сохтмони неругоҳи "Роғун" аст.

Буҷаи Тоҷикистон асосан аз ҳисоби молиёт ё андоз ва пардохтҳои гумрукӣ пур мешавад. Тибқи омори ахир, ки 29-уми апрел дар ҷаласаи ҳукумати Тоҷикистон садо дод, нақшаи даромади будҷа дар се моҳи аввали соли 2026 барзиёд иҷро шудааст.

Соли равон мақомот ҳаҷми ҷаримаҳоро зиёд карда, ҳамчунин молиётҳои нав ҷорӣ карданд. Аз ҷумла, ахиран барои воридоти ҳар тонна сӯзишвории дизелӣ ва газ ба кишвар 30 евро пардохти экологӣ ҷорӣ шуд.

Вазорати мудофиаи Русия эълон кард, ки имсол гузашти низомӣ ба муносибати Рӯзи Ғалаба дар Ҷанги Дуюми Ҷаҳонӣ, ба таври маҳдуд баргузор мешавад.

Дар баёнияи ин вазорат омадааст, имсол дар гузашти низомӣ силоҳҳои вазнин ба намоиш гузошта намешаванд ва ҳамчунин донишҷӯёни донишгоҳҳои ҳарбӣ низ дар чорабинӣ ширкат намекунанд.

Сабаби ин тасмим "вазъияти амалиётии кунунӣ" унвон шуда, аммо шарҳи бештаре ироа нашудаст.

Давоми қариб 20 соли ахир бори аввал аст, ки гузашти низомӣ дар назди Кремл бидуни намоиши ҳеч мошини ҳарбӣ ва силоҳҳои сангин баргузор мешавад.

Русия аз гузашти низомии Рӯзи Ғалаба ба унвони намоиши қудрати низомии худ истифода мекунад.

Бархе нозирон, аз ҷумла Кирилл Мартинов, сардабири "Новая газета Европа" мегӯянд, таҳдиди ҳамлаҳои паҳподҳои Украина шояд сабаби даст кашидани Русия аз баргузории гузашти низомӣ шудааст.

Мартинов мегӯяд, "тавоноии Украина барои ҳадаф қарор додани дохили хоки Русия дар солҳои ахир воқеан афзоиш ёфтааст".

Доналд Трамп, президенти ИМА гуфт, ки Эрон аз Амрико хоҳиш кардааст, ки гулӯгоҳи Ҳурмузро боз кунад.

Дар як паём дар шабакаи TruthSocial, Трамп гуфт, ки мақомоти эронӣ “ба мо хабар доданд, ки онҳо дар "ҳоли фурӯпошӣ" қарор доранд” ва мехоҳанд, ки ИМА гулӯгоҳро “ҳарчи зудтар” боз кунад.

Эрон убури киштиҳои хориҷиро аз ин гулӯгоҳ маҳдуд кардааст. ИМА ҳам роҳи киштиҳои Эронро дар ин оброҳа бастааст.

Ин боиси якбора кам шудани ҳаракати киштиҳо ва боло рафтани нархи нафт дар бозори ҷаҳонӣ гаштааст.

ИМА ва Исроил рӯзи 28-уми феврал ба Эрон ҳамла карданд. Бо гузашти беш аз як моҳ аз ҷанг ба хотири гуфтугӯ ва расидан ба як созиш ИМА оташбас эълон кард. Ҳанӯз ҳеч нишонае аз гуфтугӯ ва созиш миёни ду кишвар дида намешавад.